​ការប្ដេជ្ញាបែបនេះ ​បាន​ធ្វើឡើង​ក្នុង​ពេល​ដែល​លោកស្រី Keiko Miwa ​បានជួបពិភាក្សាការងារ​ជា​មួយ​លោកឧបនា​យករដ្ឋមន្រ្តី ​ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី ០៦ ខែកុម្ភៈ ឆ្នាំ ២០២៦។​

​ជាជំនួបពិភាក្សាការងារសំដៅពង្រីកទិដ្ឋភាពវិនិយោគ ​និង​ស្វែងរកដំណោះស្រាយ​ក្នុង​ការ​បង្កើន​ភាព​ធន់នៃសេដ្ឋកិច្ចម៉ាក្រូ ​ដើម្បីធានានូវវឌ្ឍនភាពប្រកបដោយចីរភាព។​

​ភាគីទាំងពីរបានផ្លាស់ប្តូរយោបល់យ៉ាងស៊ីជម្រៅលើបរិបទសេដ្ឋកិច្ចបច្ចុប្បន្ន ដែល​កំពុង​ជួបប្រទះនូវ​កាប្រែប្រួលឥតឈប់ឈរនៃផ្នែកពាណិជ្ជកម្មសកល ​និង​បញ្ហាព្រំដែន​ជាមួយ​ប្រទេសជិតខាង។

​លោកឧបនាយករដ្ឋមន្ត្រី បានគូសបញ្ជាក់​ពីគោលដៅយុទ្ធសាស្ត្រ​របស់រាជរដ្ឋាភិបាលកម្ពុជា ក្នុងការ​កែទម្រង់រចនាសម្ព័ន្ធសេដ្ឋកិច្ច តាមរយៈការទាក់ទាញ​វិនិយោគ​ដែលមានតម្លៃបន្ថែមខ្ពស់ ​និង​ការ​បង្កើន​ភាពប្រកួតប្រជែងរបស់វិស័យឯកជន។​

​លោកស្រី Keiko Miwa ​រំពឹងថា ​នឹងសម្រេចបានសមិទ្ធផលក្នុងឆ្នាំ២០២៦ រួមមាន៖ ​មជ្ឈមណ្ឌល​ភស្តុភារកម្មក្រុងព្រះសីហនុ, ​ថាមពលកកើតឡើងវិញតាមរយៈកិច្ចសហការ​ជាមួយអគ្គិសនីកម្ពុជា ​និង​ការគាំទ្រដល់ធនាគារជាតិ​តាម​រយៈការរៀបចំចាត់ថ្នាក់ហិរញ្ញវត្ថុបៃតង ​ដើម្បីជំរុញលំហូរទុន​ទៅ​កាន់គម្រោងដែលមានមេត្រីភាពនឹងបរិស្ថាន។​

​IFC កំពុងបន្តការងារផ្ដល់ប្រឹក្សាយ៉ាងទូលំទូលាយរបស់ខ្លួនក្នុងការពង្រឹងវិស័យហិរញ្ញវត្ថុ ​ការគាំ​ទ្រ​ដល់​ការដាំដុះស្រូវប្រកបដោយនិរន្តរភាព ​កាលើកកម្ពស់តម្លៃបន្ថែម​លើខ្សែច្រវាក់​ផលិតកម្ម​កសិកម្ម ព្រមទាំងវិស័យកាត់ដេរសម្លៀកបំពាក់ ​វាយនភណ្ឌ និង​ស្បែកជើង (GTF) ​របស់កម្ពុជា ​តាមរយៈការ​លើក​កម្ពស់ស្ដង់ដារពលកម្ម ​និង​ការផ្ដល់ហិរញ្ញប្បទានដល់អ្នកផ្គត់ផ្គង់។

​ទន្ទឹមនឹងនេះ IFC ក៏កំពុងស្វែងរកកាលានុវត្តភាពក្នុងឧស្សាហកម្មដែលកំពុងលេចធ្លោផ្សេងៗទៀត រួមមាន៖ គ្រឿងបង្គុំរថយន្ត អេឡិចត្រូនិច ការកែច្នៃចំណីអាហារ និងផលិតកម្មសំបកកង់ ដែល​ភាគ​ច្រើន​នៃផលិតផលទាំងនេះត្រូវបាននាំចេញទៅកាន់ទីផ្សារសហរដ្ឋអាមេរិក។​

​ភាគីទាំងពីរបានផ្តោតជាពិសេសលើវឌ្ឍនភាពការងារពាក់ព័ន្ធនឹងក្របខ័ណ្ឌយុទ្ធសាស្ត្រ និងផែន​ទីបង្ហាញផ្លូវគោលនយោបាយសម្រាប់សួនឧស្សាហកម្មបៃតង ដែលបានដាក់ជូនក្រុមប្រឹក្សាអភិវឌ្ឍន៍កម្ពុជា ពិនិត្យកាលពីខែមិថុនា ឆ្នាំ​២០២៥ ​រួមជាមួយនឹងសំណើគាំទ្រដល់​ការរៀបចំក្របខ័ណ្ឌ​តំបន់សេដ្ឋកិច្ចពិសេសបៃតង និងការអនុវត្តសាកល្បងនូវក្របខ័ណ្ឌនេះ​នៅក្នុងតំបន់សេដ្ឋកិច្ច​ពិសេសដែលបានជ្រើសរើសមួយចំនួន។

​ជំនួបនេះបានបង្ហាញពីការខិតខំប្រឹងប្រែងរួមគ្នារវាងរាជរដ្ឋាភិបាលកម្ពុជា និងស្ថាប័នអន្តរជាតិ ក្នុងការ​ប្រែ​ក្លាយបញ្ហាប្រឈមឱ្យទៅជាកាលានុវត្តភាព តាមរយៈការកសាងប្រព័ន្ធ​អេកូឡូស៊ី​វិនិយោគ​ដែលមានភាពធន់ ចីរភាព និងមានលក្ខណៈវិទ្យាសាស្ត្រទំនើប៕

The post ស្ថាប័នហិរញ្ញវត្ថុ​អន្តរជាតិ ​IFC​ កំពុង​ស្វែង​រក​កា​លានុ​វត្ត​ភាព​ឧស្សាហកម្ម​ដំឡើង​រថយន្ត​ និង​កែច្នៃ​ចំណី​អាហារ​នៅ​កម្ពុជា​ appeared first on Kampuchea Thmey Daily.

ក្នុង​ឱកាស​ចូល​ជួប​ពិភាក្សា​ការងារ​ជាមួយ​រដ្ឋមន្ត្រី​ក្រសួង​ឧស្សាហកម្ម លោក ហែម វណ្ណឌី នៅ​ថ្ងៃ​ទី​១៩ ខែ​មករា ឆ្នាំ​២០២៦ នេះ​ លោក​ស្រី Hoque បានលើកឡើងថា ដំណើរទស្សនកិច្ចរបស់ក្រុមបេសកកម្មរបស់ IFC នៅកម្ពុជា ដែលរួមមានជំនាញការផ្នែកកាត់ដេរ ស្បែកជើង និងផលិតផលធ្វើដំណើរ មកពីប្រទេសបង់ក្លាដេស មានគោលបំណងគាំទ្រដល់បរិវត្តកម្មវិស័យកាត់ដេរ ស្បែកជើង និងផលិតផលធ្វើដំណើររបស់កម្ពុជា ដោយចែករំលែកបទពិសោធន៍ពីក្នុងតំបន់។

លោកស្រីបានលើកឡើងពីការងារដ៏ទូលំទូលាយរបស់ IFC ជាមួយនឹងម៉ាកយីហោសាកល កម្មវិធីហិរញ្ញប្បទានខ្សែច្រវាក់ផ្គត់ផ្គង់ ការគាំទ្រគម្រោង ‘រោងចក្រកាន់តែប្រសើរនៅកម្ពុជា’ និង​កម្មវិធីនិរន្តរភាព ដោយក្នុងនោះ IFC បានផ្តល់ហិរញ្ញប្បទានខ្សែច្រវាក់ផ្គត់ផ្គង់រយៈពេលខ្លី ប្រមាណ ១៥០ ទៅ ២០០ លានដុល្លារអាមេរិកក្នុងមួយឆ្នាំ។

លោក​ស្រី Hoque បាន​អះអាង​ថា «បច្ចុប្បន្ន IFC កំពុងសិក្សាលទ្ធភាពវិនិយោគលើកម្មវិធីមួយចំនួន ដូចជាតំបន់សេដ្ឋកិច្ចពិសេសបៃតង មជ្ឈមណ្ឌលភស្តុភារកម្ម និងយន្តការហិរញ្ញប្បទានសម្រាប់ទាំងសហគ្រាសធុនតូចនិងមធ្យម និងគម្រោងវិនិយោគផ្ទាល់ពីបរទេស»។

ជា​ការ​ឆ្លើយ​តប លោក​រដ្ឋមន្ត្រី ហែម វណ្ណឌី បានកោតសរសើរ IFC ចំពោះការគាំទ្រដល់កំណើនសេដ្ឋកិច្ចកម្ពុជា និងបានកត់​សម្គាល់​ថា ខណៈដែលកិច្ចសហប្រតិបត្តិការកន្លងមកផ្ដោតខ្លាំងលើវិស័យហិរញ្ញ​វត្ថុ ដំណាក់កាល​បន្ទាប់គួរផ្តល់​អាទិភាពដល់ការពង្រីកវិសាលភាព និងតម្លៃបន្ថែមនៃវិស័យឧស្សាហកម្ម។

លោក​រដ្ឋមន្ត្រី បានលើកឡើងថា កំណើនឧស្សាហកម្មកម្ពុជានឹងត្រូវជម្នះបញ្ហាប្រឈមថ្មីៗ ពិសេសក្រោយការចាកចេញពីឋានៈជាប្រទេសដែលមានការអភិវឌ្ឍតិចតួច ដែលទាមទារការធ្វើពិពិធកម្ម ការបង្កើនផលិតភាព និងការពង្រឹងខ្សែច្រវាក់ផ្គត់ផ្គង់ក្នុងស្រុក។

ជា​មួយ​គ្នា​នោះ លោក​រដ្ឋមន្ត្រី​ក៏បានជម្រាបជូនគណៈប្រតិភូពីសារសំខាន់នៃការអភិវឌ្ឍឧស្សាហកម្មប្រតិគមន៍ ដោយ​លើកឡើងថា បច្ចុប្បន្ន កម្ពុជាមានរោងចក្រធុនធំកំពុងដំណើរការជាង ៣.០០០ មូលដ្ឋាន និង​បាន​អនុម័ត​គម្រោង​វិនិយោគក្នុងទំហំទុនខ្ពស់បំផុតមិនធ្លាប់មាន សរុបជាង ១០ ពាន់លានដុល្លារអាមេរិកក្នុងឆ្នាំ២០២៥ ប៉ុន្តែការប្រើ​ប្រាស់វត្ថុធាតុដើម​ក្នុងស្រុកក្នុងឧស្សាហកម្មទាំងនេះនៅមានកម្រិតនៅឡើយ។

បន្ថែម​ពី​នេះ លោក​រដ្ឋមន្ត្រី ហែម​ វណ្ណឌី បានស្នើឱ្យ IFC ផ្តល់ការគាំទ្របន្ថែមលើការ “ភ្ជាប់តួអង្គនៃខ្សែច្រវាក់ផ្គង់ផ្គង់” តាម​រយៈ​ការ​បណ្តុះបណ្តាលសហគ្រាសធុនតូច និងមធ្យមសក្តានុពល ក្នុងអនុវិស័យ ដូចជាផលិតកម្មអំបោះ គ្រឿងភ្ជាប់និងលម្អ សារធាតុគីមី វត្ថុធាតុដើមជាស្បែក និងការវេចខ្ចប់ជាដើម ដោយសង្កត់ធ្ងន់ថា សហ​គ្រាសធុនតូច និងមធ្យមគឺជាតួអង្គគន្លឹះសម្រាប់តម្លៃបន្ថែមខ្ពស់ និងភាពប្រកួតប្រជែង​រយៈ​ពេល​វែង និង​ស្នើ​ឱ្យ IFC គាំទ្រកម្ពុជាកំណត់​កត្តាផ្លាស់ប្តូរធំ (game changers) និងឧស្សាហកម្មសក្តានុពលថ្មីៗដែលកម្ពុជាមានឧត្តមភាពប្រកួត​ប្រជែង៕

The post IFC កំពុងសិក្សាលទ្ធភាពវិនិយោគលើកម្មវិធីមួយចំនួននៅកម្ពុជា និងវិនិយោគផ្ទាល់ពីបរទេស appeared first on Kampuchea Thmey Daily.

ការលើកឡើងនេះធ្វើឡើងក្នុងជំនួបរវាងលោកស្រីបណ្ឌិត ជា សិរី ទេសាភិបាល NBC ​និងលោកស្រី Towfiqua Hoque ប្រធានស្ថានតំណាង ​IFC​ ​ នារសៀលថ្ងៃទី២២ ខែមេសា ឆ្នាំ២០២៥ នៅធនាគារជាតិនៃកម្ពុជា អគារវត្តភ្នំ។

បើយោងតាម NBC គោលបំណងនៃជំនួបនេះគឺដើម្បីឱ្យក្រុមការងារ IFC ប្រចាំកម្ពុជា បានជម្រាបជូនពីវឌ្ឍនភាពការងារកន្លងមកទាក់ទងនឹងកិច្ចការពារអតិថិជនក្នុងវិស័យហិរញ្ញវត្ថុ ការជំរុញការផ្តល់ហិរញ្ញប្បទានសម្រាប់គម្រោងបៃតង និងកិច្ចសហប្រតិបត្តិការមួយចំនួនទៀត។

​

លោកស្រី Towfigua បានលើកឡើងអំពីស្ថានភាពសេដ្ឋកិច្ចពិភពលោក ដែលកំពុងមានការប្រែប្រួលយ៉ាងឆាប់រហ័ស និងបានជម្រាបជូនពីការតាំងចិត្តរបស់ IFC ក្នុងការបន្តវិនិយោគនៅកម្ពុជា ក៏ដូចជាការត្រៀមខ្លួនចូលរួមក្នុងកិច្ចសហការនានា ជាមួយភាគីពាក់ព័ន្ធ។

លោកស្រីក៏បានរំលេចពីការទទួលបានអនុសាសន៍ណែនាំមួយចំនួនសម្រាប់ឱ្យ IFC ធ្វើប្រតិបត្តិការកាន់តែមានប្រសិទ្ធភាព ហើយក្នុងនោះក៏មានការបញ្ជាក់ឱ្យបន្តការប្រើប្រាស់ធនធានរបស់ IFC ក្នុងការវិនិយោគក្នុងវិស័យហិរញ្ញវត្ថុនៅកម្ពុជា ផងដែរ។

លោកស្រីបណ្ឌិត ជា សិរី បានវាយតម្លៃខ្ពស់ចំពោះកិច្ចសហប្រតិបត្តិការជាមួយ IFC នាពេលកន្លងមក និងបានស្វាគមន៍ចំពោះការតាំងចិត្តរបស់ IFC ក្នុងការបន្តការវិនិយោគក្នុងវិស័យហិរញ្ញវត្ថុនៅកម្ពុជា។

លោកស្រីបណ្ឌិត បានលើកឡើងអំពីគោលដៅរួមក្នុងកិច្ចការពារអតិថិជនក្នុងវិស័យហិរញ្ញវត្ថុ និងបានថ្លែងអំណរគុណចំពោះការគាំទ្រដល់ ធនាគារជាតិនៃកម្ពុជា ក្នុងការរៀបចំ និងដាក់ចេញនូវបទប្បញ្ញត្តិ ព្រមទាំងពង្រឹងការត្រួតពិនិត្យនានាពាក់ព័ន្ធនឹងកិច្ចការពារអតិថិជន៕

The post IFC បន្តប្តេជ្ញាចូលរួមអភិវឌ្ឍន៍វិស័យហិរញ្ញវត្ថុនៅកម្ពុជា appeared first on Kampuchea Thmey Daily.

កាលពីព្រឹកថ្ងៃទីថ្ងៃទី៨ ខែមករា ឆ្នាំ២០២៥ លោកស្រីបណ្ឌិត ជា សិរី ទេសាភិបាល NBC បាន​ដឹកនាំកិច្ចប្រជុំបើកកិច្ចពិភាក្សារបស់ក្រុមការងារហិរញ្ញវត្ថុបៃតងអន្តរក្រសួង ​ដែលមានវត្តមានចូលរួមពី ទេសាភិបាលរង រដ្ឋលេខាធិការ អនុរដ្ឋលេខាធិការ និងតំណាងមកពី ១២ ក្រសួង-ស្ថាប័នពាក់ព័ន្ធ ។

បើយោងតាម NBC៖«កិច្ចប្រជុំក្រុមការងារអន្តរក្រសួងនេះ មានគោលបំណងចែករំលែក បច្ចុប្បន្នភាពនៃយុទ្ធសាស្រ្ត ផែនការសកម្មភាព និងគំនិតផ្តួចផ្តើមនានារបស់រាជរដ្ឋាភិបាល ប្រមូលធាតុចូលបន្ថែម លើការអភិវឌ្ឍផែនទីមគ្គុទ្ទេសក៍ហិរញ្ញវត្ថុប្រកបដោយចីរភាពរបស់ប្រទេសកម្ពុជា លើប្រព័ន្ធវដ្តករសាស្រ្តស្តីពីហិរញ្ញវត្ថុបៃតងនៅកម្ពុជា និងលើដំណើរការរៀបចំមុខងារនិងភារកិច្ចរបស់ក្រុមការងារហិរញ្ញវត្ថុបៃតងអន្តរក្រសួង និងពិភាក្សាអំពីការកំណត់ការងារអាទិភាព និងទិសដៅការងារដែលត្រូវអនុវត្តបន្តនាពេលអនាគត»។

NBC បានពន្យល់ថា យន្តការអន្តរក្រសួងនេះក៏ផ្តល់ឱកាសឱ្យសមាជិកនីមួយៗអាចចែករំលែកព័ត៌មាន និងចំណេះដឹងពាក់ព័ន្ធក្នុងការងារទប់ទល់ការបែ្រប្រួលអាកាសធាតុ ដែលជាគោលដៅសកល ក៏ដូចជាគោលដៅរួមរបស់រាជរដ្ឋាភិបាលកម្ពុជា ក្នុងការអភិវឌ្ឍប្រកបដោយចីរភាព។

កាលពីថ្ងៃទី១៧ ខែតុលា សាជីវកម្មហិរញ្ញវត្ថុអន្តរជាតិ (IFC) ដែលជាសមាជិកនៃក្រុមធនាគារពិភពលោក បានសហការជាមួយសមាគមធនាគារនៅកម្ពុជា(ABC) រៀបចំសិក្ខាសាលាដើម្បីជំរុញហិរញ្ញប្បទានបៃតង គាំទ្រកំណើន ប្រកបដោយចីរភាព​ ជាពិសេស​ ដើម្បីជួយដោះស្រាយផលប៉ះពាល់នៃការប្រែប្រួល អាកាសធាតុ និង​លើកកម្ពស់ប្រព័ន្ធធអេកូឡូស៊ីហិរញ្ញវត្ថុប្រប្រកបដោយចីរភាព និងបង្កើនសមត្ថភាពរបស់គ្រឹះស្ថានហិរញ្ញវត្ថុក្នុងស្រុកអំពី ហិរញ្ញប្បទានអាកាសធាតុ។

​ជាមួយគ្នានេះ កាលពីដើមខែមករា ឆ្នាំ២០២៤ ធនាគារជាតិនៃកម្ពុជា​ ​និង​សាជីវកម្ម​ហិរញ្ញវត្ថុ​អន្តរជាតិ​ ​បាន​ចុះហត្ថលេខា​លើ​កិច្ចព្រមព្រៀង​សហប្រតិបត្តិការ​ដើម្បី​ជំរុញ​ទី​ផ្សារ​ហិរញ្ញវត្ថុ​បៃតង​នៅ​កម្ពុជា​ ​ដែល​គាំទ្រ​ដល់​ការផ្លាស់ប្តូរ​របស់​ប្រទេស​ឆ្ពោះទៅ​រក​សេដ្ឋកិច្ច​បៃតង​។​

ភាពជា​ដៃគូ​នេះ​មាន​គោលបំណង​ជួយ​កម្ពុជា​ដោះស្រាយ​ផល​ប៉ះពាល់​ដែល​បណ្តាលមកពី​ប​ម្រែ​ប​ម្រួ​ល​អាកាសធាតុ​ ​និង​បង្កើត​បរិយាកាស​អំណោយផល​សម្រាប់​ទាញ​យក​សក្តានុពល​ពី​ហិរញ្ញវត្ថុ​បៃតង​។​

លោក​ ​យឹម​ ​លាត​ ​ទេសាភិបាល​រង​ធនាគារ​ជាតិ​កម្ពុជា​បាន​លើកឡើង​ថា៖«វិ​ស័យ​ហិរញ្ញវត្ថុ​ដើរ​តួនាទី​យ៉ាងសំខាន់​ក្នុង​ការ​គៀង​គរ​ធនធាន​សម្រាប់​គម្រោង​ដែល​ធន់​នឹង​អាកាសធាតុ​ ​ប៉ុន្តែ​នេះ​នឹង​តម្រូវ​ឱ្យ​មាន​គោល​នយោបាយ​ត្រឹមត្រូវ​ ​និង​ការ​បង្កើត​បរិយាកាស​អំណោយផល​»​។​

លោកថា៖«​យើង​ប្តេជ្ញា​បង្កើត​ក្របខ័ណ្ឌ​គោល​នយោបាយ​ហិរញ្ញវត្ថុ​បៃតង​ ​ប្រព័ន្ធ​អេកូ​ឡូ​ស៊ី​ហិរញ្ញវត្ថុ​ដ៏​រឹង​មាំ​មួយ​ដើម្បី​លើកទឹកចិត្ត​អោយ​មានការ​វិនិយោគ​ក្នុង​គម្រោង​បៃតង​នៅ​ក្នុង​ប្រទេស​កម្ពុជា​ ​ក៏ដូចជា​គាំទ្រ​ដល់​គម្រោង​អាកាសធាតុ​របស់​រដ្ឋាភិបាល​ ​ដូច​មាន​ចែង​នៅ​ក្នុង​ការចូលរួម​ចំណែក​របស់​ជាតិ​ក្រោម​កិច្ចព្រមព្រៀង​ទីក្រុង​ប៉ា​រី​ស​»។​

​បច្ចុប្បន្ននេះ​ ​មាន​កត្តា​ជាច្រើន​ដែល​បាន​រារាំង​ដល់​សក្តានុពល​ហិរញ្ញវត្ថុ​បៃតង​របស់​កម្ពុជា​ ​រួម​ទាំង​កង្វះ​ព័ត៌មាន​អំពីអ្វី​ដែល​សម្គាល់​ថា​ជា​ហិរញ្ញវត្ថុ​បៃតង​ ​និង​គោល​នយោបាយ​បៃតង​ក្នុងចំណោម​ស្ថាប័ន​ហិរញ្ញវត្ថុ​ក្នុងស្រុក​ ​ដើម្បី​ធ្វើ​នុ​វា​នុ​វត្ត​ ​និង​ដាក់​ចេញ​ផលិតផល​ហិរញ្ញវត្ថុ​ប្រកបដោយ​ចីរភាព​។​

​​យោងតាមរបាយការណ៍របស់ធនាគារពិភពលោក និងសាជីកម្មហិរញ្ញវត្ថុអន្តរជាតិ ស្តីពីស្ថានភាពអាកាសធាតុនិង ការអភិវឌ្ឍរបស់ប្រទេសកម្ពុជា (CCDR) ប្រទេសកម្ពុជានឹងត្រូវការការវិនិយោគបន្ថែមចំនួន ៣៦ ពាន់លានដុល្លារពីវិស័យឯកជន និងពីវិស័យសាធារណៈ រវាងឆ្នាំ ២០២៣ និង ២០៥០ ដើម្បីសម្រេចបាននូវគោលដៅអាកាសធាតុស្តីពីអព្យាក្រឹតភាពកាបួននៅឆ្នាំ ២០៥០។

CCDR បានប៉ាន់ប្រមាណថា ដោយសារប្រទេសកម្ពុជាងាយរងគ្រោះដោយទឹកជំនន់ គ្រោះរាំងស្ងួត និងការឡើង កម្ពស់កម្រិតទឹកសមុទ្រ ប្រសិនបើគ្មានវិធានការបន្សំ និងកាត់បន្ថយត្រឹមត្រូវ ការប្រែប្រួលអាកាសធាតុអាចធ្វើឲ្យ ខាតបង់រហូតដល់ ៩ ភាគរយនៃផលិតផលក្នុងស្រុកសរុបរបស់កម្ពុជាត្រឹមឆ្នាំ ២០៥០៕

The post កម្ពុជាកំពុងប្រមូលធាតុចូលដើម្បីរៀបចំគោលនយោបាយហិរញ្ញវត្ថុបៃតង appeared first on Kampuchea Thmey Daily.

កាលពីថ្ងៃទី១៧ ខែតុលា ស្ថាប័នទាំងពីរបានសហការគ្នារៀបចំនូវវគ្គបណ្តុះបណ្តាលដើម្បីផ្តល់ចំណេះដឹង និងឧបករណ៍ដល់បុគ្គលិកធនាគារជាង មួយរយនាក់ដែលពួកគេត្រូវការ ដើម្បីជំរុញគំនិតផ្តួចផ្តើមស្តីពីហិរញ្ញប្បទានប្រកបដោយ ចីរភាព ជាពិសេសគឺ ដើម្បីដោះស្រាយតម្រូវការបញ្ចេញដើមទុន សម្រាប់គម្រោងដែលមិនមានផលប៉ះពាល់អាភាសធាតុ ​ ។

បើតាម IFC កម្មវិធីបណ្តុះ បណ្តាលនេះគឺជាផ្នែកមួយនៃកិច្ចសហប្រតិបត្តិការទូលំទូលាយរវាង IFC និងតនាគារជាតិនៃកម្ពុជា (NBC) ដើម្បី ជំរុញសន្ទុះហិរញ្ញប្បទានបៃតង តាមរយៈការអភិវឌ្ឍន៍ទីផ្សារមូលធននៅកម្ពុជា។ ដោយមានការសម្របសម្រួលពី សំណាក់អ្នកជំនាញរបស់ IFC និងភាគីពាក់ព័ន្ធសំខាន់ៗនៃធនាគារជាតិនៃកម្ពុជា និងនិយ័តករមូលបត្រកម្ពុជា វត្ត បណ្តុះបណ្តាលបានគ្របដណ្តប់លើប្រធានបទជាច្រើន ដោយផ្តើមពីប្រព័ន្ធវត្តិករសាស្ត្រសម្រាប់ហិរញ្ញប្បទាន ប្រកបដោយចីរភាព និងប្រព័ន្ធគ្រប់គ្រងបរិស្ថាននិងសង្គមដែលកំពុងប្រព្រឹត្តទៅ រហូតដល់ទិន្នាការថ្មីៗ និង ឱកាស នៅក្នុងហិរញ្ញប្បទានប្រកបដោយចីរភាព។

លោកស្រី តុហ្វិក្ខា ហុក (Towfiqua Hoque) ប្រធានសាជីវកម្មហិរញ្ញវត្ថុអន្តរជាតិដែលទើបតែងតាំងថ្មីប្រចាំនៅ កម្ពុជា បានមានប្រសាសន៍ថា ​សារៈសំខាន់នៃហិរញ្ញប្បទានប្រកបដោយចីរភាពមិនអាចត្រូវបានបរិយាយឲ្យ អស់សេចក្តីបានឡើយ។ វាមិនគ្រាន់តែជាការគ្រប់គ្រង ហានិភ័យដែលទាក់ទងនឹងការប្រែប្រួលអាកាសធាតុ ប៉ុណ្ណោះទេ ប៉ុន្តែក៏ជាការចាប់យកឱកាសដែលមកជាមួយនឹងការផ្លាស់ប្តូរបៃតងផងដែរ ។

លោកស្រីបានថ្លែងថា៖«តាមរយៈការរួមបញ្ចូលនូវការពិចារណាផ្នែកបរិស្ថាន សង្គម និងអភិបាលកិច្ចទៅក្នុងប្រព័ន្ធហិរញ្ញវត្ថុ យើងអាចបង្កើតសេដ្ឋកិច្ច ដែលមានភាពធន់ និងមានបរិយាប័ន្នកាន់តែខ្លាំង»។

ក្នុងតួនាទីថ្មីរបស់គាត់ លោកស្រី ហុក នឹងដឹកនាំគំនិតផ្តួចផ្តើមរបស់ IFC ដើម្បីជំរុញវិស័យហិរញ្ញវត្ថុរបស់ប្រទេស កម្ពុជា ជំរុញថាមពលកកើតឡើងវិញ លើកកម្ពស់ហេដ្ឋារចនាសម្ព័ន្ធដឹកជញ្ជូន និងភស្តុភារបៃតង និងពង្រីកហិរញ្ញ ប្បទានអាកាសធាតុ។

លោក ឌិត សុចល សមាជិកក្រុមប្រឹក្សានិងជាប្រធានគណៈកម្មាធិការហិរញ្ញប្បទានប្រកបដោយចីរភាពរបស់ ABC បានមានប្រសាសន៍ថា ប្រទេសកម្ពុជាកំពុងស្ថិតក្នុងដំណាក់កាលមួយដ៏សំខាន់ដែលផលប៉ះពាល់នៃការប្រែប្រួល អាកាសធាតុកាន់តែបង្ហាញឱ្យឃើញច្បាស់ ហើយមានកម្រូវការបន្ទាន់ក្នុងការកសាងសមត្ថភាព និងជំនាញក្នុង វិស័យហិរញ្ញវត្ថុ ដើម្បីគ្រប់គ្រង និងលើកកម្ពស់គំនិតផ្តួចផ្តើមស្តីពីហិរញ្ញប្បទានបៃតងប្រកបដោយប្រសិទ្ធភាព។

លោកបានថ្លែងថា៖«វគ្គបណ្តុះបណ្តាលនេះ បានផ្តល់ឱ្យអ្នកចូលរូបនូវការយល់ដឹងដ៏មានតម្លៃ និងយុទ្ធសាស្ត្រ អនុវត្តន៍ជាក់ស្តែង ដែលពួកគេនឹងនាំយកទៅកាន់ស្ថាប័នរៀងៗខ្លួន»។

យោងតាមរបាយការណ៍របស់ធនាគារពិភពលោក និងសាជីកម្មហិរញ្ញវត្ថុអន្តរជាតិ ស្តីពីស្ថានភាពអាកាសធាតុនិង ការអភិវឌ្ឍរបស់ប្រទេសកម្ពុជា) (Canibodia Country Climate and Devolopment Report កាត់ថា CCDR) ប្រទេសកម្ពុជានឹងត្រូវការការវិនិយោគបន្ថែមចំនួន ៣៦ ពាន់លានដុល្លារពីវិស័យឯកជន និងពីវិស័យសាធារណៈ រវាងឆ្នាំ ២០២៣ និង ២០៥០ ដើម្បីសម្រេចបាននូវគោលដៅអាកាសធាតុស្តីពីអព្យាក្រឹតភាពកាបួននៅឆ្នាំ ២០៥០។

CCDR បានប៉ាន់ប្រមាណថា ដោយសារប្រទេសកម្ពុជាងាយរងគ្រោះដោយទឹកជំនន់ គ្រោះរាំងស្ងួត និងការឡើង កម្ពស់កម្រិតទឹកសមុទ្រ ប្រសិនបើគ្មានវិធានការបន្សំ និងកាត់បន្ថយត្រឹមត្រូវ ការប្រែប្រួលអាកាសធាតុអាចធ្វើឲ្យ ខាតបង់រហូតដល់ ៩ ភាគរយនៃផលិតផលក្នុងស្រុកសរុបរបស់កម្ពុជាត្រឹមឆ្នាំ ២០៥០។

​លោក ស្រី ហុក បានបន្ថែមថា៖«កិច្ចខិតខំប្រឹងប្រែងរបស់ IFC មានគោលបំណងគាំទ្រដល់វិស័យឯកជនដ៏រឹងមាំ និងមាន លក្ខណ:ប្រកួតប្រជែង ដែលនឹងដើរតួនាទីយ៉ាងសំខាន់ក្នុងការជំរុញដំណាក់កាលបន្ទាប់របស់ប្រទេស កម្ពុជាលើ ការអភិវឌ្ឍន៍សេដ្ឋកិច្ចប្រកបដោយចីរភាព និងកាបួនកម្រិតទាប»៕

​

​

The post ស្ថាប័នហិរញ្ញវត្ថុពីរសហការគ្នាលើកកម្ពស់ហិរញ្ញប្បទានបៃតងនៅកម្ពុជា appeared first on Kampuchea Thmey Daily.

គម្រោង Cambodia SuperPort^TM ឬ មជ្ឈមណ្ឌលភស្តុភារភ្នំពេញ (PPLC) នឹងត្រូវបានអភិវឌ្ឍដោយក្រុមហ៊ុន PPLC Support and Industrial Co. Ltd. ដែលជាការបណ្តាក់ទុនរួមគ្នា​រវាងក្រុមហ៊ុនភស្តុភារឈានមុខ​គេនៅអាស៊ី YCH Group និងក្រុមហ៊ុនផ្តល់​សេវាកម្មភស្តុភារធំជាងគេរបស់កម្ពុជាគឺ WorldBridge Group ។

ចំណែកទីតាំងយុទ្ធសាស្ត្ររបស់ SuperPort នៅរាជធានីភ្នំពេញ ជាចំណុចកណ្តាលនៃប្រទេស និងជាមជ្ឈមណ្ឌល​សេដ្ឋកិច្ចរបស់ខ្លួន ជាមួយនឹងការតភ្ជាប់ទៅកាន់គ្រប់មធ្យោបាយនៃការដឹកជញ្ជូន នឹងអាចឱ្យ SuperPort ក្លាយជាកន្លែងដឹកជញ្ជូនពហុទម្រង់ពេញលេញដំបូងបង្អស់របស់ប្រទេសកម្ពុជា។ ការណ៍នេះនឹងជួយកាត់​បន្ថយការចំណាយលើផ្នែកភស្តុភារទាំងមូល ការកែលម្អប្រសិទ្ធភាពច្រវ៉ាក់ផ្គត់ផ្គង់ ដើម្បីធ្វើសមាហរណកម្មក្នុងតំបន់ និងជំរុញការប្រកួតប្រជែងរបស់កម្ពុជា។

អ្នកឧកញ៉ា សៀ ឫទ្ធី ប្រធានក្រុមហ៊ុនWorldBridge Group មានប្រសាសន៍ថា «យើងមានសេចក្តីសោមនស្សរីក​រាយដែល IFC បានជ្រើសរើសគាំទ្រ Cambodia SuperPortTM ។ គ្រឿងបរិក្ខារនេះនឹងក្លាយជាការរួម​ចំណែក​យ៉ាង​សំខាន់ក្នុងការរីកចម្រើនរបស់ប្រទេសកម្ពុជា តាមរយៈការផ្តល់គ្រឿង​បរិក្ខារសម្រាប់ការផលិត​ជំនាន់ក្រោយ​នៅក្នុងព្រះរាជាណាចក្រកម្ពុជា»។

លោក Riccardo Puliti អនុប្រធាន IFC ប្រចាំតំបន់អាស៊ី និងប៉ាស៊ីហ្វិកថ្លែងថា “ភស្តុភារគឺជាឆ្អឹងខ្នង​នៃសេដ្ឋកិច្ច​ជាតិ ហើយកំពង់ផែទំនើបនេះក៏នឹងគាំទ្រដល់ការរីកចម្រើនយ៉ាងឆាប់រហ័សនៃពាណិជ្ជកម្មអេឡិចត្រូនិក ហើយ IFC នឹងធ្វើការជាមួយដៃគូរបស់ខ្លួនដើម្បីលើកកម្ពស់ការផលិតដែលមានតម្លៃខ្ពស់នៅក្នុងតំបន់ ខណៈពេលដែលពង្រីក​សមាហរណកម្មរបស់ខ្លួនទៅក្នុងច្រវ៉ាក់ផ្គត់ផ្គង់ និងពាណិជ្ជកម្មពិភពលោក។ លោក បន្តថា ការអភិវឌ្ឍន៍កំពង់ផែ​ទំនើបលំដាប់ពិភពលោកតម្លៃរាប់លានដុល្លារនឹងដើរតួនាទីយ៉ាងសំខាន់ក្នុងការពង្រីកសេដ្ឋកិច្ចកម្ពុជា និងជំរុញការតភ្ជាប់​នៅទូទាំងអាស៊ីអាគ្នេយ៍ ដោយផ្តល់នូវច្រវ៉ាក់ផ្គត់ផ្គង់កាន់តែលឿន និងមានប្រសិទ្ធភាពក្នុងតំបន់ ដែលចុងក្រោយផ្តល់​អត្ថប្រយោជន៍ដល់អ្នកប្រើប្រាស់។

គម្រោងបច្ចុប្បន្នគឺភាពជាដៃគូទីពីររបស់ YCH ជាមួយ IFC បន្ទាប់ពីកិច្ចសហប្រតិបត្តិការដែលកំពុងបន្តដើម្បីអភិវឌ្ឍ Vietnam SuperPort ។ គម្រោងទាំងពីរនេះគឺជាផ្នែកមួយនៃយុទ្ធសាស្ត្ររបស់ YCH Group ដើម្បីពង្រីក​បណ្តាញក្នុងតំបន់របស់ខ្លួននៅក្នុងតំបន់អាស៊ីអាគ្នេយ៍ និងជំរុញការតភ្ជាប់ក្នុងបណ្តាប្រទេសអាស៊ាន។

សូមបញ្ជាក់ថា ភស្តុភារគឺជាវិស័យសំខាន់មួយសម្រាប់កម្ពុជាក្នុងការសម្រេចបាននូវគោលដៅ​របស់ខ្លួនក្នុងការក្លាយ​ជាប្រទេស​ដែលមានចំណូលមធ្យមកម្រិតខ្ពស់នៅឆ្នាំ ២០៣០ និងជាប្រទេសដែលមានប្រាក់ចំណូលខ្ពស់នៅឆ្នាំ ២០៥០។ ខណៈដែល​រដ្ឋាភិបាល​នៃប្រទេសកម្ពុជាកំពុងបង្កើតផែនការមេសម្រាប់ការតភ្ជាប់ពហុមធ្យោបាយ និងភស្តុភារ។ គម្រោងនឹង​គាំទ្ររដ្ឋាភិបាលក្នុងការសម្រេចបាននូវចក្ខុវិស័យរបស់​ខ្លួនក្នុងការក្លាយ​ជាមជ្ឈមណ្ឌល​ដឹកជញ្ជូនក្នុងតំបន់ និងលើក​កម្ពស់ការ​តភ្ជាប់បណ្តាញភស្តុភារ និងការផ្គត់ផ្គង់របស់ប្រទេស។

ចំណែក IFC ជាសមាជិកនៃក្រុមធនាគារពិភពលោក គឺជាស្ថាប័នអភិវឌ្ឍន៍ពិភពលោកដ៏ធំបំផុតដែលផ្តោតលើវិស័យ​ឯកជន​​នៅក្នុង​ទីផ្សារដែលកំពុងរីកចម្រើន។ យើងធ្វើការនៅក្នុងប្រទេសជាង ១០០ ដោយប្រើដើមទុន ជំនាញ និងឥទ្ធិពល​របស់យើងដើម្បីបង្កើតទីផ្សារ និងឱកាសនៅក្នុងប្រទេសកំពុងអភិវឌ្ឍន៍។ ក្នុងឆ្នាំសារពើពន្ធ ២០២២ IFC បានសន្យា​ផ្តល់ប្រាក់ចំនួន 32.8 ពាន់លានដុល្លារដល់ក្រុមហ៊ុនឯកជន និងស្ថាប័នហិរញ្ញវត្ថុក្នុងប្រទេសកំពុងអភិវឌ្ឍន៍ ដោយប្រើប្រាស់ថាមពលនៃវិស័យឯកជនដើម្បីបញ្ចប់ភាពក្រីក្រខ្លាំង និងជំរុញវិបុលភាពរួមគ្នា ខណៈដែលសេដ្ឋកិច្ច​កំពុងប្រឈមមុខនឹងផលប៉ះពាល់នៃវិបត្តិសកលលោក៕

The post កម្ពុជា នឹងមានមជ្ឈមណ្ឌលភស្តុភារទំនើប​លំដាប់ពិភពលោកដំបូងគេ ជំរុញពាណិជ្ជកម្ម កាត់បន្ថយការចំណាយ និងពន្លឿនកំណើន​សេដ្ឋកិច្ច appeared first on Kampuchea Thmey Daily.