សាលាមត្តេយ្យ Archives - Kampuchea Thmey Daily

ឆ្នាំនេះ ក្រសួងអប់រំ ជ្រើសរើសសាលារៀនជិត ៨០០ នៅទូទាំងប្រទេស ជាសាលាស្តង់ដារគំរូ

អ៊ិន ពិសី — Fri, 26 Apr 2024 08:11:50 +0000

នៅក្នុងឆ្នាំ ២០២៤ នេះ ក្រសួងអប់រំ យុវជន និងកីឡា បានជ្រើសរើសសាលារៀនគោលដៅចំនួន ៧៩៣ សាលា ដើម្បីដាក់ឱ្យអនុវត្តស្តង់ដារសាលារៀនគំរូ។

ក្នុងចំណោមសាលាគោលដៅចំនួន ៧៩៣ ក្នុងនោះរួមមាន សាលាមត្តេយ្យសិក្សា ៩៦ សាលាបឋមសិក្សា ៣៤៨ និងសាលាមធ្យមសិក្សា ៣៤៩ និងក្នុងសន្និបាតអប់រំ ឆ្នាំ ២០២៤ កន្លងទៅនេះ បានប្រកាសទទួលស្គាល់សាលារៀនគំរូចំនួន ១២០ រួមមាន សាលាមត្តេយ្យសិក្សា ១០ សាលាបឋមសិក្សា ៤០ អនុវិទ្យាល័យ ១៥ និងវិទ្យាល័យ ៥៥ ខណៈបច្ចុប្បន្នសាលារៀនជំនាន់ថ្មីមានចំនួន ១៣ ក្នុងនោះកម្រិតវិទ្យាល័យ ៨ និងកម្រិតបឋមសិក្សា ៥។

នៅក្នុងកិច្ចប្រជុំស្ដីពីការចុះគាំទ្រសាលារៀនជំនាន់ថ្មី និងសាលារៀនគំរូ នៅសាលាបឋមសិក្សា និងសាលាមធ្យមសិក្សាចំណេះទូទៅ កាលពីរសៀល ថ្ងៃទី ២៤ ខែមេសា លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រី ក្រសួងអប់រំ យុវជន និង កីឡា បានលើកឡើងថា ដើម្បីជំរុញដំណើរការចុះគាំទ្រសាលារៀនជំនាន់ថ្មី និងអនុវត្តស្តង់ដារសាលារៀនគំរូឱ្យកាន់តែប្រសើរឡើង គ្រប់អង្គភាព និងមន្ត្រីពាក់ព័ន្ធទាំងអស់ ផ្តោតការយកចិត្តទុកដាក់ និងមានភាពបុរេសកម្ម ចំពោះការអនុវត្តការងារសាលារៀនជំនាន់ថ្មី ដោយត្រូវមានផែនការ និងកម្មវិធីច្បាស់លាស់ ព្រោះការវិនិយោគនេះមានតម្លៃខ្ពស់ ហើយអង្គភាពពាក់ព័ន្ធត្រូវធ្វើការរួមគ្នា ដើម្បីសម្រេចគោលដៅរួម ស្តង់ដារសាលារៀនគំរូ ដោយប្រើប្រាស់ធនធានមានស្រាប់ឱ្យអស់លទ្ធភាព ដូចជា ការអនុវត្តម៉ោងសិក្សា ការប្រើប្រាស់គ្រូបង្រៀន ការកៀរគរធនធានសិក្សា (សៀវភៅលំហាត់បន្ថែម, វីដេអូបង្រៀន) ការបង្កលក្ខណៈឱ្យសិស្សមានលទ្ធភាពនៅសាលារៀនឱ្យបានកាន់តែច្រើន ដើម្បីរៀនសូត្រ និង ការអប់រំចរិយាធម៌ជាដើម និងត្រូវមានរបបប្រជុំត្រួតពិនិត្យជាប្រចាំនៅគ្រប់រចនាសម្ព័ន្ធពាក់ព័ន្ធ ដើម្បីជួយគាំទ្រកែលម្អ និងធានាបានការសម្រេចគោលដៅជាដំណាក់ៗ៕

អត្ថបទ ៖ សំអឿន

The post ឆ្នាំនេះ ក្រសួងអប់រំ ជ្រើសរើសសាលារៀនជិត ៨០០ នៅទូទាំងប្រទេស ជាសាលាស្តង់ដារគំរូ appeared first on Kampuchea Thmey Daily.

ភ្នំពេញ មានសាលារៀនចាប់ពីកម្រិតមត្តេយ្យ ដល់ មធ្យម ជិត ២៥០ សាលា

អ៊ិន ពិសី — Sat, 17 Feb 2024 01:27:42 +0000

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានមានប្រសាសន៍ កាលពីរសៀលថ្ងៃទី ១៦ កុម្ភៈ ថា បច្ចុប្បន្ន មន្ទីរមានសាលារៀនចាប់ពីកម្រិតមត្តេយ្យសិក្សា រហូតដល់កម្រិតមធ្យមសិក្សា ចំនួន ២៤៧ សាលា ក្នុងនោះសាលាបឋមសិក្សាមានច្រើនជាងគេរហូតដល់ទៅ ១៦១ សាលា។

លោកប្រធានមន្ទីរ បានបន្តថា ចំណោមសាលារៀន ២៤៧ សាលា ក្នុងនោះសាលាមត្តេយ្យសិក្សាមានចំនួន ១៨ សាលា សាលាបឋមសិក្សាមានចំនួន ១៦១ សាលា និងសាលាមធ្យមសិក្សាមានចំនួន ៦៨ សាលា។

លោកប្រធានមន្ទីរ បានបន្តទៀតថា «សម្រាប់ឆ្នាំ ២០២៤ នេះ មន្ទីរអប់រំរាជធានីភ្នំពេញ មិនមានគម្រោងបង្កើតសាលាថ្មីបន្ថែមទៀតទេ ពោលគឺសាលា ២៤៧ គឺគ្រប់គ្រាន់សម្រាប់សិស្សានុសិស្សរៀន ហើយអ្វីដែលត្រូវធ្វើបន្ត គឺការពង្រឹងហេដ្ឋារចនាសម្ព័ន្ធបន្ថែមនៅតាមសាលារៀនទាំងនោះឱ្យមានបរិស្ថានស្អាត ដើម្បីជួយសម្រួលដល់ការសិក្សារបស់សិស្សានុសិស្ស»។

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានជំរុញដល់គ្រឹះស្ថានសិក្សាអនុវត្តកម្មវិធីក្រៅម៉ោងសិក្សាបន្ថែម ដើម្បីពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស។

លោកឧបនាយករដ្ឋមន្ត្រី បានណែនាំថា សកម្មភាពក្រៅម៉ោងសិក្សា ត្រូវរៀបចំស្របទៅតាមតម្រូវការក្នុងការអនុវត្តកម្មវិធីសិក្សាឱ្យបានពេញលេញ និងដើម្បីពង្រឹងចំណេះដឹង វិន័យ សីលធម៌ ចរិយាធម៌ និងឥរិយាបថរបស់សិស្ស ព្រមទាំងការតម្រង់ទិសវិជ្ជាជីវៈ ដោយអនុវត្តការផ្តល់ពិន្ទុ ៨០% លើចំណេះដឹង, ១០% លើបំណិន និង ១០% លើសីលធម៌ និងចរិយាធម៌៕

អត្ថបទ ៖ សំអឿន

The post ភ្នំពេញ មានសាលារៀនចាប់ពីកម្រិតមត្តេយ្យ ដល់ មធ្យម ជិត ២៥០ សាលា appeared first on Kampuchea Thmey Daily.

អ្នកគ្រូចិនបង្ខំក្មេងប្រុសអាយុ ៦ ឆ្នាំឲ្យញ៉ាំកម្អួតខ្លួនឯងវិញ បន្ទាប់ពីក្អួតដាក់ក្នុងថ្នាក់

Boa Sokunveary — Mon, 23 Oct 2023 09:34:55 +0000

អ្នកគ្រូម្នាក់បានបង្ខំសិស្សប្រុសអាយុ ៦ ឆ្នាំឲ្យញ៉ាំកម្អួតរបស់ខ្លួនវិញ ក្រោយក្អួតដាក់ថ្នាក់នៅសាលាមត្តេយ្យ Maluwan ក្នុងខេត្ត Liaoning ភាគឦសានប្រទេសចិនកាលពីថ្ងៃទី ១៥ ខែកញ្ញាកន្លងទៅ ប៉ុន្តែទើបតែត្រូវគេផ្សព្វផ្សាយប៉ុណ្ណោះ ។

ពាក់ព័ន្ធនឹងរឿងខាងលើនេះដែរ មានវីដេអូកាម៉េរាមួយបានបង្ហាញពីសកម្មភាពអ្នកគ្រូបញ្ចុកកម្អួតឲ្យក្មេងប្រុសនោះញ៉ាំ ។ បន្ទាប់ពីមហាជនបានឃើញវីដេអូនោះហើយ គ្រប់គ្នាពិតជាភ្ញាក់ផ្អើល និងខឹងអ្នកគ្រូរូបនេះយ៉ាងខ្លាំង ។

មិនតែប៉ុណ្ណោះ ថ្ងៃកើតហេតុជាថ្ងៃខួបកំណើត ៦ ឆ្នាំរបស់ក្មេងប្រុសរងគ្រោះទៀតផង ។ បើតាមឪពុករបស់ក្មេងប្រុសបានឲ្យដឹងថា កូនប្រុសខ្លួនស្លៀកពាក់ខោអាវថ្មីដើម្បីទៅរៀននៅថ្ងៃខួបកំណើត ប៉ុន្តែពេលមកវិញសំលៀកបំពាក់ប្រឡាក់អស់ លុះកូនប្រុសប្រាប់ថា អ្នកគ្រូបញ្ចុកអាហារថែម ទើបបែកធ្លាយរឿងនេះ ។

ដំបូងឡើយ សាលារៀនមិនព្រមឲ្យមើលកាមេរ៉ាសុវត្ថិភាពទេ រហូតទាល់តែប៉ូលិសទៅដល់ទីតាំងទើបអាចមើលបាន ហើយការពិតត្រូវបានបកស្រាយនៅគ្រានោះឯង ។

ដល់ថ្ងៃទី ១៣ ខែតុលា ការិយាល័យអប់រំក្នុងស្រុកបាននិយាយនៅលើគណនី WeChat ផ្លូវការថា ខ្លួនបានផ្ទៀងផ្ទាត់ករណីនេះ បន្ទាប់ពីការស៊ើបអង្កេត និងទាមទារឲ្យសាលាសុំទោសឪពុកម្តាយ ហើយបណ្ដេញគ្រូចេញពីសាលាផងដែរ ៕

ប្រែសម្រួល៖ វារី

ប្រភព៖ SCMP

ចុចអាន៖ អ្នកគ្រូ ចិន ម្នាក់ត្រូវប្រហារជីវិត ដោយសារដាក់ថ្នាំបំពុលសិស្សសាលាមត្តេយ្យ ២៥ នាក់

The post អ្នកគ្រូចិនបង្ខំក្មេងប្រុសអាយុ ៦ ឆ្នាំឲ្យញ៉ាំកម្អួតខ្លួនឯងវិញ បន្ទាប់ពីក្អួតដាក់ក្នុងថ្នាក់ appeared first on Kampuchea Thmey Daily.

តើសាលាមត្តេយ្យរដ្ឋ មានទទួលក្មេងអាយុចាប់ពីអាយុប៉ុន្មានឆ្នាំឡើង?

Chan Sotheavy — Wed, 02 Aug 2023 10:19:06 +0000

ជាកង្វល់សម្រាប់មាតាបិតា និងអាណាព្យាបាល ក្នុងការជ្រើសរើសសាលាមត្តេយ្យសម្រាប់បុត្រធីតា ព្រោះភាគច្រើន អាណាព្យាបាលមិនសូវបានដឹងពីសាលាមតេ្តយ្យរដ្ឋ និងយល់ថា ថ្នាក់មត្តេយ្យរដ្ឋមានទទួលក្មេងតែអាយុ ៥ឆ្នាំ ជាហេតុ ធ្វើឱ្យអាណាព្យាបាលសម្រេចបញ្ជូនកូនៗទៅសាលាមេត្តយ្យឯកជន។

បើតាមអ្នកគ្រូមត្តេយ្យមួយរូប បានឱ្យដឹងថា ជាទូទៅសាលាមត្តេយ្យរដ្ឋ មានបែងចែកជា ៣កម្រិត គឺមតេ្តយ្យកម្រិតទាប កម្រិតមធ្យម និងកម្រិតខ្ពស់។ ក្នុងកម្រិតទាំង៣នោះ គឺមានទទួលក្មេងដោយកំណត់អាយុប្រហែលពី ៣ឆ្នាំ ដល់ ៥ឆ្នាំ ទៅតាមលក្ខខណ្ឌសាលា។ អ្នកគ្រូរូបនោះ បញ្ជាក់ទៀតថា នៅក្នុងសាលាបឋមសិក្សា ក៏មានថ្នាក់មត្តេយ្យដែរ គឺកម្រិតខ្ពស់ ដែលទទួលក្មេងអាយុ ៥ឆ្នាំ ។

គួរឱ្យដឹងដែរថា ការបណ្តុះបណ្តាលរបស់សាលាមត្តេយ្យរដ្ឋ មានកម្មវិធីសិក្សាដូចជា គណិតវិទ្យា ភាសា និងសកម្មភាព ផ្សេងៗ ដែលផ្សារភ្ជាប់ជាមួយការបណ្តុះគំនិតក្មេង រួមនឹងផ្នែកនៃទេពកោសល្យរបស់គាត់ផងដែរ។

តាមរយៈសាលាមត្តេយ្យជាច្រើនទូទាំងប្រទេស ពិសេសក្នុងក្រុងភ្នំពេញ ថ្នាក់មត្តេយ្យសិក្សា មានច្រើនគួរឱ្យកត់សម្គាល់ ដូចជា សាលាមតេ្តយ្យវត្តកោះ សាលាមត្តេយ្យទឹកល្អក់ សាលាមតេ្តយ្យទួលគោក សាលាមតេ្តយ្យសាមគ្គី សាលាមតេ្តយ្យមិនា សាលាមត្តេយ្យស្ទឹងមានជ័យ សាលាមត្តេយ្យទួលតាចាន់ សាលាមត្តេយ្យមជ្ឈឹមវ័ន្ត សាលាមត្តេយ្យដូនតេងតាផ្លុង សាលាមតេយ្យភូមិ៥ និងសាលាមត្តេយ្យបុរី ១០០ខ្នងជាដើម។ នេះសបញ្ជាក់បានថា អាណាព្យាបាលកាន់តែយល់ពីគុណតម្លៃនៃការបញ្ជូនបុត្រធីតា ទៅកាន់សាលាមតេ្តយ្យរដ្ឋ។

បើតាមបទពិសោធន៍អាណាព្យាបាល ដែលបញ្ជូនកូនៗរបស់ខ្លួន ទៅសាលាមតេ្តយ្យរដ្ឋ ក្នុងរាជធានីភ្នំពេញ បញ្ចាក់ស្រដៀងគ្នាថា អ្នកគ្រូៗនៅតាមសាលាមត្តេយ្យរដ្ឋ មានការយកចិត្តទុកដាក់ជាមួយក្មេងៗណាស់ ហើយមត្តេយ្យខ្លះ ក៏មាន Day Care ផងដែរ៕

The post តើសាលាមត្តេយ្យរដ្ឋ មានទទួលក្មេងអាយុចាប់ពីអាយុប៉ុន្មានឆ្នាំឡើង? appeared first on Kampuchea Thmey Daily.