អ្នកគ្រូ ចិន​ ម្នាក់ត្រូវប្រហារជីវិត ដោយសារដាក់ថ្នាំបំពុលសិស្សសាលាមត្តេយ្យ ២៥ នាក់

អ្នកគ្រូបង្រៀនថ្នាក់មត្តេយ្យម្នាក់នៅក្នុងប្រទេសចិនត្រូវបានកាត់ទោសប្រហារជីវិត ពីបទដាក់ថ្នាំពុលក្នុងបបរក្មេងៗចំនួន ២៥ នាក់ កាលពី ៤ ឆ្នាំមុន ។

អ្នកស្រី Wang Yun អាយុ ៣៩ ឆ្នាំ បានសម្រេចចិត្តបំពុលក្មេងៗនៅសាលាមត្តេយ្យ Mengmeng ក្នុងទីក្រុង Jiaozuo ដោយសារចង់សងសឹកជាមួយគ្រូដូចគ្នាពីបញ្ហាគ្រប់គ្រងកូនសិស្ស ។

អ្នកស្រី Wang ដាក់សូដ្យូមនីទ្រីតទៅក្នុងបបររបស់សិស្ស ដែលជាបបរអង្ករមានរសជាតិផ្អែម និងពេញនិយមខ្លាំងនៅចិន ។ គ្រានោះកុមារទាំងអស់ចាប់ផ្តើមក្អួតនិងសន្លប់ ហើយបញ្ជូនទៅមន្ទីរពេទ្យ Jiaozuo No.2 People ដើម្បីលាងក្រពះ និងសង្គ្រោះបន្ទាន់ ។

យោងតាមប្រព័ន្ធផ្សព្វផ្សាយរដ្ឋបានឲ្យដឹងថា កាលពីថ្ងៃព្រហស្បតិ៍ ទី១៣ ខែកក្កដា ឆ្នាំ២០២៣ តុលាការបាននាំអ្នកស្រី Wang ទៅកាន់កន្លែងប្រហារជីវិត និងអនុវត្តការកាត់ទោសប្រហារជីវិតតែម្ដង ។

គួរបន្ថែមថា នៅខែមករា ឆ្នាំ២០២០ កុមារម្នាក់ក្នុងចំណោម ២៥ នាក់បានចំណាយពេល ១០ ខែនៅក្នុងមន្ទីរពេទ្យ ហើយបាត់បង់ជីវិតដោយសារការខូចសរីរាង្គជាច្រើនបណ្តាលមកពីការពុលសូដ្យូមនីទ្រីតខាងលើ ។

ជាមួយគ្នានេះ គ្រូបង្រៀនដែលតុលាការពណ៌នាថា “គួរឲ្យស្អប់ខ្ពើមនិងកាចសាហាវ” ក៏ធ្លាប់បំពុលប្តីរបស់ខ្លួនក្នុងឆ្នាំ ២០១៧ ដែរ ដោយដាក់សូដ្យូមនីត្រាតនៅក្នុងពែងតែរបស់គាត់ដូចគ្នា ប៉ុន្តែលោកគ្រាន់តែរបួសស្រាលប៉ុណ្ណោះ ៕

ប្រែសម្រួល៖ វារី

ប្រភព៖ dailymail

ចុចអាន៖ ចាក់សម្លាប់មនុស្ស ៦ នាក់ក្នុងសាលាមត្តេយ្យនៅភាគខាងត្បូង ចិន

ចុចអាន៖ ការស្លាប់ដោយសារថ្នាំបំពុល ៥ ករណី ប្រចាំប្រវត្តិសាស្ត្រពិភពលោក