អ្នកគ្រូចិនបង្ខំក្មេងប្រុសអាយុ ៦ ឆ្នាំឲ្យញ៉ាំកម្អួតខ្លួនឯងវិញ បន្ទាប់ពីក្អួតដាក់ក្នុងថ្នាក់

អ្នកគ្រូម្នាក់បានបង្ខំសិស្សប្រុសអាយុ ៦ ឆ្នាំឲ្យញ៉ាំកម្អួតរបស់ខ្លួនវិញ ក្រោយក្អួតដាក់ថ្នាក់នៅសាលាមត្តេយ្យ Maluwan ក្នុងខេត្ត Liaoning ភាគឦសានប្រទេសចិនកាលពីថ្ងៃទី ១៥ ខែកញ្ញាកន្លងទៅ ប៉ុន្តែទើបតែត្រូវគេផ្សព្វផ្សាយប៉ុណ្ណោះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងរឿងខាងលើនេះដែរ មានវីដេអូកាម៉េរាមួយបានបង្ហាញពីសកម្មភាពអ្នកគ្រូបញ្ចុកកម្អួតឲ្យក្មេងប្រុសនោះញ៉ាំ ។ បន្ទាប់ពីមហាជនបានឃើញវីដេអូនោះហើយ គ្រប់គ្នាពិតជាភ្ញាក់ផ្អើល និងខឹងអ្នកគ្រូរូបនេះយ៉ាងខ្លាំង ។

មិនតែប៉ុណ្ណោះ ថ្ងៃកើតហេតុជាថ្ងៃខួបកំណើត ៦ ឆ្នាំរបស់ក្មេងប្រុសរងគ្រោះទៀតផង ។ បើតាមឪពុករបស់ក្មេងប្រុសបានឲ្យដឹងថា កូនប្រុសខ្លួនស្លៀកពាក់ខោអាវថ្មីដើម្បីទៅរៀននៅថ្ងៃខួបកំណើត ប៉ុន្តែពេលមកវិញសំលៀកបំពាក់ប្រឡាក់អស់ លុះកូនប្រុសប្រាប់ថា អ្នកគ្រូបញ្ចុកអាហារថែម ទើបបែកធ្លាយរឿងនេះ ។

ដំបូងឡើយ សាលារៀនមិនព្រមឲ្យមើលកាមេរ៉ាសុវត្ថិភាពទេ រហូតទាល់តែប៉ូលិសទៅដល់ទីតាំងទើបអាចមើលបាន ហើយការពិតត្រូវបានបកស្រាយនៅគ្រានោះឯង ។

ដល់ថ្ងៃទី ១៣ ខែតុលា ការិយាល័យអប់រំក្នុងស្រុកបាននិយាយនៅលើគណនី WeChat ផ្លូវការថា ខ្លួនបានផ្ទៀងផ្ទាត់ករណីនេះ បន្ទាប់ពីការស៊ើបអង្កេត និងទាមទារឲ្យសាលាសុំទោសឪពុកម្តាយ ហើយបណ្ដេញគ្រូចេញពីសាលាផងដែរ ៕

ប្រែសម្រួល៖ វារី

ប្រភព៖ SCMP

ចុចអាន៖ អ្នកគ្រូ ចិន​ ម្នាក់ត្រូវប្រហារជីវិត ដោយសារដាក់ថ្នាំបំពុលសិស្សសាលាមត្តេយ្យ ២៥ នាក់