អ្នកស្រី គ្រួច ចន្នី ជាម្ចាស់សិប្បកម្មផលិតសាប៊ូទឹកបោកសម្លៀកបំពាក់ អាឡាដាំង ខេមបូឌា បាន ប្រាប់ កម្ពុជាថ្មី ថា ក្នុងនាមអ្នកស្រីជាសហគ្រិនខ្មែរម្នាក់ ចាប់ពេលវេលានេះតទៅ។ អ្នកស្រី សូមស្នើសុំចិត្តប្រជាពលរដ្ឋខ្មែរទាំងអស់ មេត្តាបន្តពហិការទំនិញថៃតទៅទៀត ដើម្បីធ្វើយ៉ាងណាអាចចូលរួមចំណែកជួយដល់សេដ្ឋកិច្ចជាតិ តាមរយៈការគាំទ្រផលិតផលក្នុងស្រុកឱ្យបានកាន់តែផុលផុស។

អ្នកស្រី បន្តថា ការធ្វើបែបនេះមិនមែនជាការកេងចំណេញធ្វើទីផ្សារអ្វីទេ តែផ្ទុយទៅវិញ អ្នកស្រី សូមឱ្យប្រជាជនខ្មែរត្រូវគិតថាប្រសិនបើមិនបានជួយអ្វីដល់កងទ័ព និងជនភៀសសឹក តែយើងក៏អាចចូលរួមចំណែកតាមរយៈស្មារតីរួមមួយ ពិសេសត្រូវតែបន្តពហិការទំនិញថៃរហូតទៅ។

បើក្រឡេកទៅមើលពីសិប្បកម្មផលិតសាប៊ូបោកសម្លៀកបំពាក់របស់អ្នកស្រី គ្រួច ចន្នី សិប្បកម្មរបស់កូនខ្មែរូបនេះ កំពុងទទួលបានការគាំទ្រខ្លាំងពីសំណាក់ប្រជាជនខ្មែរ ខណៈបច្ចុប្បន្នប្រជាជនខ្មែរបានងាកមកគាំទ្រផលិតក្នុងស្រុកកាន់តែច្រើនឡើងៗ ផងដែរ។

ម្ចាស់សិប្បកម្មរូបនេះ បានឱ្យដឹងទៀតថា ចាប់តាំងពីថ្ងៃដែលមានជម្លោះរឿងព្រំដែនរវាងកម្ពុជា និងថៃមក អ្នកស្រី សង្កេតឃើញថា ផលិតផលដែលផលិតបានក្នុងស្រុកកាន់តែមានតម្រូវការខ្ពស់ ដ្បិតអីតាមបណ្ដាផ្សារនានា អតិថិជនជាប្រជាពលរដ្ឋខ្មែរ បានសួររកតែទំនិញដែលផលិតក្នុងស្រុកតែប៉ុណ្ណោះ។

ទាក់ទងនឹងគុណភាពវិញ ម្ចាស់សិប្បកម្មរូបនេះ បានបញ្ជាក់ដែរថា «សាប៊ូបោកសម្លៀកបំពាក់ និងលាងចាន​ របស់សិប្បកម្មអាឡាំដាំង ក៏មានស្ដង់ដាដូចទៅនឹងរបស់ដែលនាំចូលពីប្រទេសជិតខាង ក្នុងនោះ៖ ទាក់ទងនឹងក្លិន និងសមត្ថភាពសម្អាតសម្លៀកបំពាក់វិញ សាប៊ូដែលផលិតក្នុងស្រុកក៏អាចប្រកួតប្រជែងជាមួយរបស់នាំចូលបានផងដែរ»។

យ៉ាងណាមិញ ចំពោះដំណើរការផលិតសាប៊ូនៅក្នុងសិប្បកម្មរបស់អ្នកស្រី គ្រួច ចន្នី បច្ចុប្បន្នសិប្បកម្ម ក៏អាចមានសមត្ថភាពផលិតសាប៊ូទឹកបោកសម្លៀកបំពាក់ និងសាប៊ូលាងចាន បានប្រមាណជាង៤ពាន់លីត្រ ក្នុងមួយថ្ងៃ ផងដែរ។

គួរឱ្យដឹងថា សិប្បកម្មផលិតសាប៊ូ អាឡាំដាំង របស់អ្នកស្រី គ្រួច ចន្នី ជាសិប្បកម្មខ្នាតតូចមួយដែលបានបើកដំណើរការឡើងមកតាំងពីឆ្នាំ ២០២០មកម្ល៉េះ។ បច្ចុប្បន្នសិប្បកម្ម មានទីតាំងស្ថិតនៅខណ្ឌកំបូល រាជធានីភ្នំពេញ៕

អត្ថបទ ៖ សួស សិត

The post សហគ្រិនខ្មែរ ស្នើសុំចិត្តប្រជាពលរដ្ឋខ្មែរបន្តពហិការទំនិញថៃ ខណៈសង្រ្គាមឈ្លានពានផ្ទុះឡើងសាជាថ្មី appeared first on Kampuchea Thmey Daily.

ថ្លែងប្រាប់ កម្ពុជាថ្មី អ្នកស្រី គ្រួច ចន្នី ជាម្ចាស់សិប្បកម្មផលិតសាប៊ូ អាឡាដាំង ខេមបូឌា បានឱ្យដឹងថា​ សម្រាប់ពេលបច្ចុប្បន្ននេះ សិប្បកម្មផលិតសាប៊ូទឹកបោកសម្លៀកបំពាក់ និងលាងចាន របស់អ្នកស្រី កាន់តែមានតម្រូវាការខ្ពស់ជាងមុន ខណៈដែលប្រជាជនខ្មែរនាំគ្នាគាំទ្រផលិតផលក្នុងស្រុកកាន់តែច្រើនជាងមុន។

អ្នកស្រី បន្តថា ទាក់ទងនឹងការផលិតសាប៊ូបោកសម្លៀកបំពាក់ និងលាងចាន ក្នុងសិប្បកម្មអាឡាដាំង បច្ចុប្បន្ននេះ ក៏អាចមានសមត្ថភាពផ្គត់ផ្គង់ទៅកាន់ផ្សារមួយនៅក្នុងរាជធានីភ្នំពេញ និងបណ្ដាខេត្តមួយចំនួនទៀតក្នុងប្រទេសកម្ពុជា ផងដែរ។

ចំពោះគុណភាពវិញ ម្ចាស់សិប្បកម្មរូបនេះ បានបញ្ជាក់ដែរថា «សាប៊ូបោកសម្លៀកបំពាក់ និងលាងចាន​ របស់សិប្បកម្មអាឡាំដាំង ក៏មានស្ដង់ដាដូចទៅនឹងរបស់ដែលនាំចូលពីប្រទេសជិតខាង ក្នុងនោះ៖ ទាក់ទងនឹងក្លិន និងសមត្ថភាពសម្អាតសម្លៀកបំពាក់វិញ សាប៊ូដែលផលិតក្នុងស្រុកក៏អាចប្រកួតប្រជែងជាមួយរបស់នាំចូលបានផងដែរ»។

អ្នកស្រី គ្រួច ចន្នី ក៏បានបញ្ជាក់ទៀតដែរថា «បច្ចុប្បន្នការផលិតសាប៊ូ​ មិនពិបាកក្នុងរកទីផ្សារដូចកាលពីមុននោះឡើយ នេះក៏ដោយសារតែអតិថិជនជឿជាក់លើផលិតផលក្នុងស្រុក និងក៏អាចកម្មុងទិញ ឬស្វែងរកផលិតផលទាំងនេះបានតាមរយៈប្រព័ន្ធផ្សព្វផ្សាយ ពិសេសគឺតាមហ្វេសប៊ុកផេករបស់សិប្បកម្ម ឬសហគ្រាសបានយ៉ាងងាយស្រួល និងរហ័សទាន់ចិត្ត ផងដែរ»។

ក្រៅពីការផលិតសាប៊ូទឹកបោកសម្លៀកបំពាក់ និងលាងចាន សិប្បកម្មអាឡាំងដាំង របស់អ្នកស្រី គ្រួច ចន្នី ក៏មានគម្រោងក្នុងការផលិតប្រភេទសាប៊ូម្សៅ ​និងទឹកក្រអូបសម្រាប់បោកសម្លៀកបំពាក់ ដើម្បីធ្វើយ៉ាងណាអាចឆ្លើយតបទៅនឹងតម្រូវការទីផ្សារនាពេលបច្ចុប្បន្ន។

យ៉ាងណាមិញ ចំពោះដំណើរការផលិតសាប៊ូនៅក្នុងសិប្បកម្មរបស់អ្នកស្រី គ្រួច ចន្នី បច្ចុប្បន្នសិប្បកម្ម ក៏អាចមានសមត្ថភាពផលិតសាប៊ូទឹកបោកសម្លៀកបំពាក់ និងសាប៊ូលាងចាន បានប្រមាណជាង៤ពាន់លីត្រ ក្នុងមួយថ្ងៃ ខណៈដែលពីមុនសិប្បកម្មផលិតបានត្រឹមតែជាង ១ពាន់លីត្រ តែប៉ុណ្ណោះ។

សិប្បកម្មផលិតសាប៊ូទឹកបោកសម្លៀកបំពាក់ អាឡាំដាំង របស់អ្នកស្រី គ្រួច ចន្នី ជាសិប្បកម្មខ្នាតតូចមួយដែលបានបើកដំណើរការឡើងមកតាំងពីឆ្នាំ ២០២០មកម្ល៉េះ។ បច្ចុប្បន្នសិប្បកម្មរបស់កូនខ្មែរមួយនេះ មានទីតាំងស្ថិតនៅខណ្ឌកំបូល រាជធានីភ្នំពេញ៕

អត្ថបទ ៖ សួស សិត

The post សាប៊ូបោកខោអាវ និងលាងចានផលិតក្នុងស្រុកកាន់តែមានតម្រូវការខ្ពស់ ខណៈប្រជាជនខ្មែរ ពហិការទំនិញថៃ appeared first on Kampuchea Thmey Daily.

ស្ថិតនៅក្នុងវ័យ ៤៣ឆ្នាំ អ្នកស្រី គ្រួច ចន្នី ជាម្ចាស់សិប្បកម្មផលិតសាប៊ូ អាឡាដាំង ខេមបូឌា ប្រាប់ កម្ពុជាថ្មីថា សិប្បកម្មរបស់អ្នកស្រីបានបើកដំណើរការតាំងពីឆ្នាំ ២០២០ មកម្ល៉េះ។

អ្នកស្រី បន្តថា មូលហេតុដែលបង្កើតសិប្បកម្មផលិតសាប៊ូនេះឡើងមក ដោយសារតែអ្នកស្រីចង់មានមុខរបរផ្ទាល់ខ្លួនមួយដែលសមរម្យ ម្យ៉ាងដោយហេតុតែ អ្នកស្រី និងស្វាមី ស្រឡាញ់ការកែច្នៃផលិតសាប៊ូទាំងនេះ តាំងពីអ្នកស្រី នៅជាបុគ្គលិកបម្រើការក្នុងក្រុមហ៊ុនរបស់គេមកម្ល៉េះ។

សម្រាប់ពេលបច្ចុប្បន្ន សិប្បកម្មអាឡាំដាំង របស់អ្នកស្រី គ្រួច ចន្នី មានសមត្ថភាពផលិតសាប៊ូបានក្នុងបរិមាណ១ពាន់លីត្រ ក្នុងមួយថ្ងៃ ដ្បិតសិប្បកម្មមានបុគ្គលិកបម្រើការត្រឹមតែ៥នាក់ តែប៉ុណ្ណោះ។

អ្នកស្រី គ្រួច ចន្នី បញ្ជាក់ថា៖ «ទោះបីជាបច្ចុប្បន្នសិប្បកម្មអាឡាដាំង អាចផលិតសាប៊ូក្នុងបរិមាណតិចតួចក៏ពិតមែន តែទីផ្សារវិញ អ្នកស្រី អះអាងថា ប្រជាជនខ្មែរបានជួយគាំទ្រផលិតផលសាប៊ូទឹកបោខោអាវ និងសាប៊ូលាងចាន របស់អ្នកស្រីច្រើនជាងពេលកន្លងទៅ ពិសេសនៅតាមបណ្ដាផ្សារនានាក្នុងរាជធានីភ្នំពេញ»។

ម្ចាស់សិប្បកម្មរូបនេះ បានឱ្យដឹងទៀតថា មូលហេតុដែលប្រជាជនខ្មែរបច្ចុប្បន្នងាកមកគាំទ្រផលិតផលក្នុងស្រុកកាន់តែច្រើន ក៏ដោយសារខ្មែរមានស្មារតីជាតិនិយម ជាក់ស្ដែងមួយរយៈចុងក្រោយមកនេះ ប្រជាជនខ្មែរស្ទើរមួយប្រទេសបាន​ពហិការទំនិញរបស់ថៃ មិនថាតែទឹកដោះគោ ឬផលិតផលសាប៊ូ នោះឡើយ។

ជាចក្ខុវិស័យទៅថ្ងៃអនាគត អ្នកស្រី គ្រួច ចន្នី ក៏មានគោលដៅចង់ពង្រីកសិប្បកម្មផលិតសាប៊ូរបស់ខ្លួនឱ្យក្លាយជាសហគ្រាសមួយដែលមានស្ដង់ដាត្រឹមត្រូវ និងអាចផលិតសាប៊ូក្នុងបរិមាណច្រើនជាងមុន ដើម្បីធធ្វើយ៉ាងណាងាយស្រួលឆ្លើយ​តបទៅនឹងតម្រូវការទីផ្សារ ផងដែរ។

សិប្បកម្មផលិតសាប៊ូទឹកបោកសម្លៀកបំពាក់ អាឡាំដាំង របស់អ្នកស្រី គ្រួច ចន្នី ជាសិប្បកម្មខ្នាតតូចមួយដែលបានបើកដំណើរការតាំងពីឆ្នាំ ២០២០មកម្ល៉េះ។ បច្ចុប្បន្នសិប្បកម្ម មានទីតាំងស្ថិតនៅខណ្ឌកំបូល រាជធានីភ្នំពេញ៕

អត្ថបទ ៖ សួស សិត

The post សហគ្រិនខ្មែរផលិតសាប៊ូបោកខោអាវ និងលាងចាន កំពុងមានទីផ្សារ ខណៈប្រជាជនខ្មែរ​ពហិការទំនិញថៃ appeared first on Kampuchea Thmey Daily.

អ្នកស្រី ផល រតនា អាយុ៤២ឆ្នាំ ម្ចាស់សិប្បកម្មផលិតសាប៊ូ AVIYA COSMETICS CO.,LTD បានប្រាប់ កម្ពុជាថ្មី ថា ដំបូងឡើយ អ្នកស្រី ត្រឹមតែជាស្ដ្រីមេផ្ទះម្នាក់ ដែលមានតួនាទីមើលថែទាំកូន និងលក់ដូរបន្ដិចបន្ដួច នៅឯប្រទេសថៃ ក៏ព្រោះតែអ្នកស្រីបានរៀបការជាមួយស្វាមីជនជាតិថៃ។

អ្នកស្រី បន្តថា​ មូលហេតុដែលខ្លួនមានជំនាញចេះកែច្នៃ និងផលិតសាប៊ូដុះខ្លួន ដោយសារតែអំឡុងពេលការផ្ទុះឡើងនូវជំងឺកូវីដ-១៩ នៅប្រទេសថៃ មានអង្គការស្រ្ដីមួយដែលមានទីតាំងនៅប្រទេសថៃ បានចុះមកបង្រៀន និងបណ្ដុះបណ្ដាលជំនាញផលិតសាប៊ូដុះខ្លួន ដល់ស្ដ្រីមេផ្ទះ ដែលប្រឈមនឹងការបាត់បង់ការងារ និងការស្វែងរកប្រាក់ចំណូលប្រចាំថ្ងៃ ជាដើម។

ម្ចាស់សិប្បកម្មផលិតសាប៊ូ រូបនេះ បានបន្ថែមទៀតថា ទាក់ទងនឹងការបណ្ដុះបណ្ដាលជំនាញ នាពេលនោះ អ្នកស្រី ក៏មិនទាន់មានសមត្ថភាពផលិតសាប៊ូ លក់ចេញទៅកាន់ទីផ្សារបាននោះដែរ ដោយសារតែការចាប់ផ្ដើមដំបូង គ្រាន់តែជាការផលិតសាកល្បង ដើម្បីចែកគ្នាប្រើប្រាស់ តែប៉ុណ្ណោះ។

បន្ទាប់មកក្រោយសម័យកាល កូវីដ-១៩ កន្លងផុតទៅ អ្នកស្រី ផល រតនា ក៏មានគំនិតចាប់ផ្ដើមបើកសិប្បកម្មខ្នាតតូចមួយនេះឡើង កាលពីដើមឆ្នាំ ២០២១។ អ្វីដែលសំខាន់ការចាប់ផ្ដើមដំបូងក្នុងវិស័យសិប្បកម្មផលិតសាប៊ូ របស់អ្នកស្រី ក៏ទទួលបានការគាំទ្រខ្លាំងពីប្រជាជនដែលរស់នៅប្រទេសថៃ ក្រៅពីនេះ អ្នកស្រី អាចនាំចេញផលិតផលសាប៊ូរបស់គាត់ទៅកាន់ទីផ្សារប្រទេសអឺរ៉ុប ក្នុងនោះមាន៖ បារាំង អូស្ដ្រាលី និងបណ្ដាប្រទេសអាស៊ី ដូចជា៖ ហ្វីលីពីន ឡាវ វៀតណាម និងប្រទេសកម្ពុជារបស់យើង ផងដែរ។

ទាក់ទងនឹងការផលិតសាប៊ូ អ្នកស្រី រតនា បានបញ្ជាក់ថា វត្ថុធាតុដើម គឺផ្ដើមចេញដើមឈើអែម ដែលប្រមូលទិញពីកសិករ នៅក្នុងប្រទេសថៃ និងវៀមណាម ដើម្បីយកមកកែច្នៃជាមួយអាកុល ទុករយៈពេល៣ខែ ទើបអាចផលិតចេញជាសាប៊ូ និងផលិតផលថែរក្សាស្បែកផ្សេងៗទៀត ប្រកបដោយស្ដង់ដា ទទួលបានការត្រួតពិនិត្យយ៉ាងត្រឹមត្រូវពីមន្ទីរសុខាភិបាល នៃប្រទេសថៃ មុននឹងដាក់លក់ចេញទៅកាន់ទីផ្សារ។

បើក្រឡេកទៅមើលពីអតីតកាលវិញ អ្នកស្រី ផល រតនា ត្រឹមជាក្មេងស្រីធម្មតាម្នាក់ ដែលកើតក្នុងត្រកូលគ្រួសារមធ្យមមួយ ដែលមានស្រុកកំណើតនៅភូមិ សូភី២ ឃុំកំពង់ស្វាយ ក្រុងសិរីសោភ័ណ ខេត្តបន្ទាយមានជ័យ បន្ទាប់មកទើបអ្នកស្រី បានរៀបការជាមួយស្វាមីជាជនជាតិថៃ និង កំពុងតែរស់នៅបំពេញការងារ នៅឯប្រទេសថៃ បច្ចុប្បន្នអ្នកស្រីទទួលបានកូនប្រុសស្រីចំនួន២នាក់ ផងដែរ។

អ្នកស្រី ផល រតនា បានប្រាប់ឱ្យដឹងទៀតថា គោលដៅថ្ងៃអនាគត អ្នកស្រី ក៏មានគម្រោងនឹងបើកសិប្បកម្មផលិតសាប៊ូនេះ នៅទឹកដីកំណើតរបស់ខ្លួន ដើម្បីចូលរួមជួយដល់សេដ្ឋកិច្ចក្នុងស្រុកឱ្យកាន់តែប្រសើរ ពិសេសទៀតនោះ អ្នកស្រី ក៏មានគម្រោងជួយ និងលើកទឹកចិត្តដល់ស្រ្ដីមេផ្ទះទាំងឡាយ ប្រសិនបើអាចចូលរួមរៀន និងសិក្សាជំនាញមួយឱ្យច្បាស់មិនថាការផលិតសាប៊ូ ឬជំនាញផ្សេងទៀតនោះឡើយ ដើម្បីទុកជាទុន និងអាចមានឱកាសចូលរួមកសាងសេដ្ឋកិច្ចគ្រួសារ និងសង្គមជាតិ៕

អត្ថបទ ៖ សួស សិត

The post ពីស្រ្ដីមេផ្ទះ តស៊ូក្លាយជាម្ចាស់សិប្បកម្មផលិតសាប៊ូពីឈើអែមដ៏ល្បីឈ្មោះ appeared first on Kampuchea Thmey Daily.