អាជ្ញាធរ បានឲ្យដឹងថា ដោយមានប្រជាពលរដ្ឋមួយចំនួនបាននាំគ្នាយកសំរាម កាកសំណល់ មកបោះចោលនៅមុខវិទ្យាល័យចំណេះទូទៅ និង បច្ចេកទេស ហ៊ុន សែន ជម្ពូវ័ន តាមបណ្ដោយផ្លូវជាតិលេខ ៤ ធ្វើឲ្យប៉ះពាល់សណ្តាប់ធ្នាប់ បរិស្ថាន អនាម័យ សោភ័ណភាព ទីក្រុង នៅព្រឹកថ្ងៃទី ៣០ ឧសភា នេះ រដ្ឋបាលសង្កាត់ចោមចៅទី ៣ បានឲ្យក្រុមប្រជាការពារ បោះបង្គោលដាក់ស្លាកហាមឃាត់មិនឲ្យយកសំរាមមកបោះចោលនៅទីនោះទៀតទេ។ ក្នុងនោះ ចាត់ឲ្យកម្លាំងចាំឃ្លាំមើល ប្រសិនបើឃើញមានពលរដ្ឋណាមកបោះសំរាមនៅទីនោះទៀត នឹងចាប់ផាកពិន័យជាទឹកប្រាក់ ដោយចាប់ពី ២០ ម៉ឺនរៀល រហូតដល់ ១ លានរៀល។

ជាមួយនេះ អាជ្ញាធរ ក៏បានអំពាវនាវដល់ប្រជាពលរដ្ឋទាំងអស់ សូមចូលរួមថែក្សាសណ្តាប់ធ្នាប់ បរិស្ថាន និង អនាម័យ ទាំងអស់គ្នា៕
អត្ថបទ ៖ សុខា

The post រដ្ឋបាលសង្កាត់ចោមចៅទី ៣ នឹងចាត់វិធានការក្តៅចំពោះបុគ្គលណាបោះសំរាមចោល នៅមុខវិទ្យាល័យចំណេះទូទៅ និង បច្ចេកទេស ហ៊ុន សែន ជម្ពូវ័ន appeared first on Kampuchea Thmey Daily.

សកម្មភាពសម្អាតនេះ ត្រូវបានអនុវត្តឡើងក្នុងគោលបំណងរៀបចំសណ្តាប់ធ្នាប់ សម្អាតបរិស្ថាន និង លើកកម្ពស់សោភ័ណភាពក្នុងមូលដ្ឋានឱ្យកាន់តែមានភាពស្អាត និង របៀបរៀបរយ ខណៈកន្លងមកមានប្រជាពលរដ្ឋមួយចំនួនបានយកសំរាមទៅបោះចោលដោយគ្មានសណ្តាប់ធ្នាប់ បណ្តាលឱ្យសំរាមរាយប៉ាយពាសពេញតាមដងផ្លូវ។

ក្នុងឱកាសចុះពិនិត្យ និង ដឹកនាំការងារនោះ លោក ជិន ប៊ុនធឿន អភិបាលខណ្ឌឫស្សីកែវ បានលើកឡើងថា ការរក្សាអនាម័យ និង បរិស្ថាន គឺជាកាតព្វកិច្ចរួមរបស់ប្រជាពលរដ្ឋគ្រប់រូប មិនមែនជាការទទួលខុសត្រូវរបស់អាជ្ញាធរតែម្ខាងនោះទេ។ លោកបានអំពាវនាវ និង ស្នើសុំឱ្យប្រជាពលរដ្ឋដែលរស់នៅក្នុងតំបន់ខាងលើ និង តំបន់ជុំវិញ ចូលរួមថែរក្សាបរិស្ថាន តាមរយៈការទុកដាក់ និង បោះសំរាមឱ្យបានត្រឹមត្រូវទៅតាមទីកន្លែងដែលបានកំណត់។

លោកអភិបាល បានបញ្ជាក់ថា ការបោះសំរាមពាសវាលពាសកាល មិនត្រឹមតែបង្កឱ្យបាត់បង់សោភ័ណភាពទីក្រុងប៉ុណ្ណោះទេ ប៉ុន្តែថែមទាំងអាចបង្កផលប៉ះពាល់ដល់សុខភាពសាធារណៈ បង្កក្លិនមិនល្អ និង អាចជាដើមហេតុ នៃការស្ទះប្រព័ន្ធលូ បណ្តាលឱ្យមានការជន់លិចក្នុងរដូវវស្សាផងដែរ។

ជាមួយគ្នានេះ លោកក៏បានជំរុញឱ្យប្រជាពលរដ្ឋទាំងអស់ចូលរួមសហការជាមួយអាជ្ញាធរមូលដ្ឋាន ដើម្បីធ្វើឱ្យមូលដ្ឋានខណ្ឌឫស្សីកែវ ក្លាយជាតំបន់ស្អាត មានបរិស្ថានល្អ និង មានសណ្តាប់ធ្នាប់កាន់តែប្រសើរឡើង ស្របតាមទិសដៅ នៃការអភិវឌ្ឍទីក្រុងប្រកបដោយនិរន្តរភាព៕
អត្ថបទ ៖ សំណាង

The post អភិបាលខណ្ឌឫស្សីកែវ ដាក់គ្រឿងចក្រសម្អាតផ្លូវនៅភូមិទួលពពែ និង អំពាវនាវពលរដ្ឋបញ្ឈប់ការបោះសំរាមពាសវាលពាសកាល appeared first on Kampuchea Thmey Daily.

ក្នុងឱកាសចុះពិនិត្យ និង បិទទីតាំងបញ្ចេញសំរាមនេះ លោកអភិបាលខណ្ឌឫស្សីកែវ មានប្រសាសន៍ថា ការសម្រេចលុបបំបាត់ទីតាំងបញ្ចេញសំរាមខាងលើ គឺជាវិធានការចាំបាច់ក្នុងការកែលម្អសោភ័ណភាពទីក្រុង បរិស្ថានស្អាត និង ធានាអនាម័យសាធារណៈ ឲ្យកាន់តែប្រសើរឡើង។ លោកបញ្ជាក់ថា ការរៀបចំសណ្តាប់ធ្នាប់ នៃការបញ្ចេញ និង ប្រមូលសំរាម ឲ្យមានប្រសិទ្ធភាព គឺជាផ្នែកមួយក្នុងការរួមចំណែកធ្វើឲ្យមូលដ្ឋានមានភាពស្អាត និង របៀបរៀបរយ។

ជាមួយគ្នានេះ លោកអភិបាលខណ្ឌ ក៏បានអំពាវនាវដល់ប្រជាពលរដ្ឋរស់នៅតំបន់ខាងលើ សូមបញ្ឈប់ការយកសំរាមមកបោះចោលនៅទីតាំងដែលត្រូវបានបិទនេះបន្តទៀត ដើម្បីចៀសវាងការបង្កភាពកខ្វក់ និង ប៉ះពាល់បរិស្ថានជុំវិញ។

សម្រាប់ការរៀបចំបញ្ចេញសំរាមជំនួសវិញ រដ្ឋបាលខណ្ឌ បានកំណត់ពេលវេលាជាក់លាក់សម្រាប់ប្រជាពលរដ្ឋ។ ក្នុងនោះ ប្រជាពលរដ្ឋដែលរស់នៅតាមបណ្តោយផ្លូវជាតិលេខ ៥ ត្រូវបញ្ចេញសំរាមនៅមុខផ្ទះ ចាប់ពីម៉ោង ៦ ល្ងាច ដល់ម៉ោង ៩ យប់ ដោយមានក្រុមហ៊ុន ៨០០ ស៊ុបពើ ទទួលបន្ទុកក្នុងការចេញប្រមូលសំរាមតាមពេលវេលាកំណត់។

ដោយឡែក សម្រាប់ប្រជាពលរដ្ឋរស់នៅតាមផ្លូវខាងក្នុង នៃទីតាំងដែលត្រូវបានបិទនេះ ត្រូវបញ្ចេញសំរាមមកខាងក្រៅ ចាប់ពីម៉ោង ៧ ព្រឹក ដល់ម៉ោង ៨ ព្រឹក ដោយមានរទេះសំរាមរបស់ក្រុមហ៊ុន ៨០០ ស៊ុបពើ ដាក់ប្រចាំការទទួលសំរាម។ ក្នុងករណីដែលមិនមានរទេះសំរាមប្រចាំទីតាំង ប្រជាពលរដ្ឋត្រូវរក្សាទុកសំរាមនៅតាមផ្ទះរៀងៗ ខ្លួន ជាបណ្តោះអាសន្ន រង់ចាំរហូតដល់មានរថយន្ត ឬ រទេះប្រមូលសំរាមមកដល់ ទើបអាចយកសំរាមចេញបាន។

តាមបណ្តោយផ្លូវជាតិលេខ ៥ ចាប់ពីស្តុប ៦៨ ផ្សារតូចទួលសង្កែ រហូតដល់ស្ពានព្រែកព្នៅ មានបរិមាណសំរាមត្រូវបញ្ចេញចន្លោះពី ៣៥ ទៅ ៤០ តោន ក្នុង ១ ថ្ងៃ ដែលទាមទារឲ្យមានការគ្រប់គ្រង និង ប្រមូលសំរាមប្រកបដោយប្រសិទ្ធភាព ដើម្បីរក្សាបាននូវសោភ័ណភាព និង បរិស្ថានល្អសម្រាប់សហគមន៍ទាំងមូល៕
អត្ថបទ ៖ សំណាង

The post រដ្ឋបាលខណ្ឌឫស្សីកែវ កំណត់របៀបបញ្ចេញសំរាមថ្មី ក្រោយបិទទីតាំងចាក់សំរាម ១ កន្លែង នៅតាមបណ្តោយផ្លូវជាតិ ៥ appeared first on Kampuchea Thmey Daily.

លោក​ វ៉ា​ សាវឿន​ ចៅសង្កាត់ចោមចៅទី ៣​ បានឲ្យដឹងថា​ ដោយសារតែមានប្រជាពលរដ្ឋមួយចំនួននៅមិនទាន់ចេះថែរក្សាបរិស្ថាន​ អនាម័យ​ ដោយបោះចោលនូវកាកសំណល់តាមដងផ្លូវ​ ប្រឡាយទឹកជាដើម​ នេះជាហេតុដែលបង្កឲ្យស្ទះចរន្តទឹក។ ជាក់ស្តែងកាលពីល្ងាចថ្ងៃទី ១៧​ ឧសភា​ មានភ្លៀងមួយមេធំធ្វើឲ្យទឹកលិចលើដងផ្លូវជាតិលេខ ៤​ ត្រង់គល់ស្ពានអាកាសចោមចៅ​ និង មានសំរាមអណ្តែងពេញលើផ្ទៃទឹក​ ប្រឡាយនោះ​ ទើបលោកចាត់តាំងឲ្យ​ លោក​ ចែន​ ចាន់​ ប្រធានប្រជាការពារសង្កាត់ដឹកនាំកម្លាំងចុះកាយស្តារសំរាម​ ស្មៅ​ រួមទាំងកាសសំណល់ផ្សេងៗ ចេញពីប្រឡាយទឹក ដើម្បីបញ្ចៀសការជន់លិចដោយទឹកភ្លៀង​ ជាពិសេសឲ្យចរន្តទឹកហូរបានលឿនឆាប់ស្រក។

លោក​ចៅសង្កាត់ បញ្ជាក់ទៀតថា​ សំរាម​ ស្មៅ​ និង កាកសំណល់ដែលស្តាររួច លោកបានទាក់ទងរថយន្តដឹកសំរាមមកប្រមូលយកទៅចាក់ចោលនៅទីលានចាក់សំរាម ដើម្បីបរិស្ថានស្អាត។

អាជ្ញាធរ អំពាវនាវដល់ប្រជាពលរដ្ឋទាំងអស់ សូមមេត្តាជួយថែរក្សាបរិស្ថាន​ អនាម័យ​ និង សណ្តាប់ធ្នាប់ ឲ្យបានល្អទាំងអស់គ្នា​ ដើម្បីទីក្រុងស្អាត៕
អត្ថបទ ៖ សុខា

The post អាជ្ញាធរសង្កាត់ចោមចៅទី ៣ កាយស្តារសំរាមតាមប្រឡាយផ្លូវជាតិលេខ ៤ ក្រោយភ្លៀងមួយមេ appeared first on Kampuchea Thmey Daily.

បើតាមអ្នកនាំពាក្យក្រសួងបរិស្ថាន លោក ខ្វៃ អាទិត្យា សរុបទាំង៣ថ្ងៃនៃពិធីបុណ្យចូលឆ្នាំខ្មែរ សំរាមចំនួនជាង ៧ ១៣៤ តោន ត្រូវបានប្រមូលទុកដាក់ទៅទីលានទុកដាក់សំរាមនៅក្នុងរាជធានីភ្នំពេញ។ ដោយឡែកនៅថ្ងៃធម្មតាការប្រមូលទុកដាក់សំរាមដែលបញ្ចេញដោយប្រជាពលរដ្ឋរស់នៅរាជធានីភ្នំពេញ ដោយក្រុមហ៊ុនប្រមូលសំរាមទាំង៣ មានប្រមាណ ពី៤០០០តោន ទៅ៤៥០០តោនក្នុង១ថ្ងៃ ហើយនៅសរុបទូទាំងប្រទេស សំរាមជាង ១ម៉ឺនតោន ត្រូវបានប្រមូលទុកដាក់ទៅទីលានជារៀងរាល់ថ្ងៃ ហើយក្នុងនោះ ២០% ជាសំណល់ប្លាស្ទិក។

លោក ខ្វៃ អាទិត្យា អះអាងថា ការថយចុះនេះកើតឡើងដោយសារការចូលរួមចំណែក យ៉ាងសកម្មរបស់ប្រជាពលរដ្ឋ និងអ្នកពាក់ព័ន្ធ ក្នុងការទុកដាក់សំរាមឱ្យមានរបៀបរៀបរយ និងការកាត់បន្ថយការប្រើប្រាស់ថង់ប្លាស្ទិក។ លោកថា  ការចូលរួមទាំងនេះមិនត្រឹមតែជួយឱ្យទីក្រុង ទីប្រជុំជន តាមមូលដ្ឋាន និងតាមដងផ្លូវ មានសោភ័ណភាពប៉ុណ្ណោះទេ ប៉ុន្តែថែមទាំងជួយការពារបរិស្ថានកម្ពុជា ជាពិសេសការជំរុញចលនាឆ្ពោះទៅការរៀបចំផ្ទះរបស់យើង ប្រទេសកម្ពុជា មាន«ភាពស្អាត តាមរយៈយុទ្ធនាការផ្សេងៗដូចជា “ថ្ងៃនេះខ្ញុំមិនប្រើថង់ប្លាស្ទិកទេ” យុទ្ធនាការ “កម្ពុជាស្អាត ខ្មែរធ្វើបាន” និងយុទ្ធនាការ«ផ្លូវជាតិ គ្មានសំរាមនិងសំណល់ប្លាស្ទិក» ដែលបានដាក់ចេញស្របនឹងយុទ្ធសាស្រ្តចក្រាវិស័យបរិស្ថាន និងគោលនយោបាយយុទ្ធសាស្រ្តរបស់រាជរដ្ឋាភិបាលកម្ពុជា។

លោក ខ្វៃ អាទិត្យា បានបន្ថែមថា កម្ពុជាត្រូវការពង្រឹងការចូលរួមបន្ថែមទៀត ដើម្បីប្រែក្លាយសកម្មភាព ទៅជាចលនា ដើម្បីការផ្លាស់ប្តូរផ្នត់គំនិត របស់ប្រជាពលរដ្ឋ បង្កើនចូលរួមគ្រប់គ្រងសំរាមឱ្យបានត្រឹមត្រូវ ធ្វើការញែកសំរាម ការកែច្នៃសំរាម និងការកាត់បន្ថយការប្រើប្រាស់ប្លាស្ទិក៕

The post ៣ថ្ងៃនៃបុណ្យចូលឆ្នាំ សំរាម ៧ ១៣៤ តោននៅភ្នំពេញ ត្រូវបានប្រមូល៖ អ្នកនាំពាក្យថា ចំនួននេះថយចុះ ព្រោះពលរដ្ឋចេះទុកដាក់ និងបន្ថយការប្រើថង់ប្លាស្ទិក appeared first on Kampuchea Thmey Daily.

បច្ចុប្បន្ន ផលិតផលប្លាស្ទិកជាង ៤០០ លានតោន ត្រូវបានផលិតក្នុងមួយឆ្នាំៗ ប៉ុន្តែមានប្រមាណ ១២% បានដុតបំផ្លាញ ហើយប្រមាណ ៩% ប៉ុណ្ណោះត្រូវបានធ្វើការកែច្នៃឡើងវិញ។ ចំណែកនៅសល់ គឺត្រូវបានបោះចោលនៅទីលានចាក់សំរាម ឬបញ្ចេញទៅក្នុងបរិស្ថាន រួមទាំងមហាសមុទ្រផងដែរ។

នេះជាការបង្ហាញក្តីព្រួយបារម្ភរបស់លោក ខ្វៃ អាទិត្យា អនុលេខាធិការ និងជាអ្នកនាំពាក្យក្រសួងបរិស្ថាន បានថ្លែងក្នុងយុទ្ធនាការសម្អាតផ្លូវជាតិ «ផ្លូវជាតិ គ្មានសំរាម និងសំណល់ប្លាស្ទិក» និងយុទ្ធនាការពង្រឹងការអនុវត្តគោលការណ៍ណែនាំស្តីពី អារាម មេត្រីបរិស្ថាន និងសាលាមេត្រីបរិស្ថាន នៅកោះស្រឡៅដ៏ស្រស់ស្អាត។

លោក ខ្វៃ អាទិត្យា បានបន្តនៅថ្ងៃទី ៣ ខែមេសា ឆ្នាំ ២០២៦ នេះថា ប្រសិនបើគ្មានវិធានការប្រកបដោយនិរន្តភាពនោះទេ គេរំពឹងថាបរិមាណសំណល់ប្លាស្ទិកដែលហូរចូលទៅក្នុងប្រព័ន្ធអេកូឡូស៊ី ក្នុងទឹក នឹងកើនឡើងជិតបីដង ប្រមាណពី ១១ លានតោន ក្នុងឆ្នាំ ២០១៦ ដល់ប្រមាណ ២៩ លានតោន ក្នុងឆ្នាំ ២០៤០។ មិនតែប៉ុណ្ណោះ អ្វីដែលគួរឲ្យបារម្ភបំផុតនោះគឺ ប្លាស្ទិកបានបំបែកខ្លួនក្លាយជាបំណែកតូចៗ ហៅថា មីក្រូប្លាស្ទិក និងណាណូប្លាស្ទិក ដែលបាននិងកំពុងបំពុលខ្សែច្រវាក់អាហារ និងបង្កគ្រោះថ្នាក់ដល់ភាវៈមានជីវិត ទាំងនៅក្នុងទឹក និងលើគោក។ ព្រោះតែមើលឃើញពីបញ្ហាប្រឈមនេះ មន្រ្តីជាន់ខ្ពស់ក្រសួងបរិស្ថាន នៅតែបន្តបំផុសស្មារតីដល់ប្រជាពលរដ្ឋរស់នៅភូមិកោះស្រឡៅ ឃុំកោះកាពិ ស្រុកកោះកុង ដោយធ្វើយ៉ាណាឲ្យពួកគាត់ចូលរួមរៀបចំទុកដាក់សំរាមឲ្យបានល្អប្រសើរ ខណៈប្រទះឃើញមានសំណល់ប្លាស្ទិករសាត់អណ្តែតលើទឹកច្រើន។

ក្រសួងបរិស្ថាន បានដាក់ចេញនូវយុទ្ធសាស្រ្តចក្រាវិស័យបរិស្ថាន ២០២៣-២០២៨ ដោយផ្តោតអាទិភាព លើ «ភាពស្អាត» «ភាពបៃតង» និង«ចីរភាព» ក្នុងនោះបានរំលេចយ៉ាងច្បាស់អំពីយន្តការ នៃការលើកកម្ពស់ការយល់ដឹង សាធារណៈ និងការលើកទឹកចិត្ត សំដៅជំរុញឲ្យមានការប្តេជ្ញាចិត្ត ការកែប្រែទម្លាប់ និងចូលរួម សកម្មភាព ប្រតិបត្តិមេត្រីបរិស្ថាន។

គួរជម្រាបថា ការបណ្តុះភាពស្អាតក្នុងផ្នត់គំនិត ដែលជាកត្តាជំរុញខាងក្នុងឲ្យបុគ្គលម្នាក់ៗ មានការគោរពស្រឡាញ់បរិស្ថាន ចេះគ្រប់គ្រងខ្លួនឯង និងមានការទទួលខុសត្រូវខ្ពស់ចំពោះទង្វើរបស់ខ្លួន ចំពោះខ្លួនឯង ចំពោះអ្នកដទៃ និងចំពោះសង្គមទាំងមូល ការអប់រំឲ្យយល់ពីតម្លៃពិតប្រាកដ នៃបរិស្ថាន យល់ថាគ្រប់ទង្វើរបស់មនុស្សសុទ្ធតែមានផលប៉ះពាល់ដល់បរិស្ថាន និងការចូលរួមថែរក្សាការការពារបរិស្ថាន។

ក្រសួងបរិស្ថាន បានប្រគល់ជូនអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជូនប្រជាពលរដ្ឋនៅក្នុងសហគមន៍តំបន់ការពារធម្មជាតិកោះស្រឡៅ រួមមាន ៖ ១.អំពូលហូមសូឡា ចំនួន ៣២៨ ឈុត (១ គ្រួសារ ទទួលបានសូឡា ១ ឈុត) , ២.ធុងសំរាម ចំនួន ៣០០ ធុង , ៣.ម៉ូតូដឹកសំរាម ចំនួន ១ គ្រឿង ដើម្បីបំពាក់ជូនតាមខ្នងផ្ទះរបស់ប្រជាពលរដ្ឋ និងជាប្រយោជន៍របស់សហគមន៍នៅលើកោះស្រឡៅ។

នាពេលខាងមុខ ក្រសួង មានផែនការកសាងកន្លែងទុកដាក់សំរាម និងបន្តការកសាងហេដ្ឋារចនាសម្ព័ន្ធមួយចំនួនផ្សេងទៀត និងអភិវឌ្ឍន៍ទូកប្រើដោយម៉ាស៊ីនមានមេត្រីបរិស្ថានប្រើប្រាស់ថាមពលពន្លឺព្រះអាទិត្យ(ទេវតា)ផងដែរ។

លោក ហែម ប៊ុនសំបូរ អភិបាលរងស្រុកកោះកុង សូមថ្លែងការកោតសរសើរចំពោះក្រសួង និងមន្ទីរបរិស្ថានខេត្តកោះកុង ដែលបានរួមចំណែកមួយភាគធំធ្វើឲ្យការងារគាំពារអភិរក្សបរិស្ថាន និងបង្កើនការទាក់ទាញភ្ញៀវទេសចរមកលេងកម្សាន្តនៅលើកោះស្រឡៅនេះ។

លោក ហែម ប៊ុនសំបូរ ក៏បានចាត់ទុកយុទ្ធនាការសម្អាតផ្លូវជាតិ «ផ្លូវជាតិ គ្មានសំរាម និងសំណល់ប្លាស្ទិក» និងយុទ្ធនាការពង្រឹងការអនុវត្តគោលការណ៍ណែនាំស្តីពី អារាម មេត្រីបរិស្ថាន និងសាលាមេត្រីបរិស្ថាន មានសារៈសំខាន់អំពីការជួយកែផ្នត់គំនិត ដែលជាកត្តាជំរុញខាងក្នុង ឲ្យបុគ្គលម្នាក់ៗ ចេះស្រឡាញ់បរិស្ថាន អនាម័យ សោភ័ណភាពក្នុងផ្ទះ និងសហគមន៍ ព្រមទាំងទាក់ទាញវិស័យទេសចរណ៍ ហើយអភិរក្សធនធានធម្មជាតិផងដែរ។

លោកអភិបាលរងស្រុកកោះកុង បានឲ្យដឹងដែរថា ការពារបរិស្ថានពុំមែនជាការងាររបស់បុគ្គលណាម្នាក់ឡើយ វាជាការទទួលខុសត្រូវរួមគ្នា។ ប្រសិនបើស្រឡាញ់សុខភាពខ្លួនឯង និងចង់ឃើញកូនចៅរស់នៅក្នុងបរិយាកាសល្អបរិសុទ្ធ សូមផ្តើមការរៀបចំទុកដាក់សំរាម និងសំណល់ប្លាស្ទិកឲ្យបានត្រឹមត្រូវ ជៀសវាងបោះចោលសំរាមពាសវាលពាសកាល៕
អត្ថបទ ៖ សិរីវឌ្ឍនៈ

The post ក្រសួងបរិស្ថាន កំពុងកែផ្នត់គំនិតពលរដ្ឋកោះស្រឡៅមិនឲ្យបោះចោលសំរាមលើទឹក appeared first on Kampuchea Thmey Daily.

ការណែនាំធ្វើឡើងនាថ្ងៃទី៣០ ខែមីនា ក្នុងឱកាសបណ្ឌិតសភាចារ្យ ហង់ជួន ណារ៉ុន ចុះទស្សនកិច្ច និងសំណេះសំណាលជាមួយបុគ្គលិកអប់រំ នៅវិទ្យាល័យ ហ៊ុន សែន ប៊ុនរ៉ានី ផ្សារដើមថ្កូវ ដោយការចូលរួមពីសំណាក់ ប្រធានមន្ទីរអប់រំ យុវជន និងកីឡារាជធានីភ្នំពេញ នាយក នាយិកា និងលោកគ្រូ អ្នកគ្រូ។ ក្នុងឱកាសនោះ លោកបានលើកឡើងថា គុណភាពអប់រំត្រូវតែដើរទន្ទឹមនឹងវិន័យ និងសីលធម៌ក្នុងការរស់នៅស្អាត។

ក្នុងសំណេរនោះ បានសរសេរថា៖ “គណៈគ្រប់គ្រងសាលាត្រូវបន្ថែមការយកចិត្តទុកដាក់លើការគ្រប់គ្រងសំរាមនៅតាមថ្នាក់រៀន និងតូបលក់អាហារក្នុងសាលា ដោយពង្រឹងយន្តការដឹកនាំឱ្យមានប្រសិទ្ធភាព ជាពិសេសត្រូវចាត់អ្នកទទួលខុសត្រូវពិនិត្យមើលរាល់សប្តាហ៍ និងប្រើប្រាស់កម្លាំងរបស់ក្រុមប្រឹក្សាយុវជន និងកាយរឹទ្ធិ ដើម្បីចូលរួមសម្អាតទីធ្លាសាលា និងបណ្តុះទម្លាប់គ្រប់គ្រងកាកសំណល់ដល់សិស្សានុសិស្ស”។

ជាមួយគ្នានេះ ​រដ្ឋមន្ត្រីក្រសួងអប់រំ ក៏បានបញ្ជាក់ថា ក្នុងទិសដៅអភិវឌ្ឍទៅមុខ ក្រសួងរៀប​ចំ​យុទ្ធសាស្ត្រក្នុងការប្រែក្លាយវិទ្យាល័យ ហ៊ុន សែន ប៊ុនរ៉ានី ផ្សារដើមថ្កូវ ឱ្យទៅជាវិទ្យាល័យគំរូ តាមរយៈការលើកកម្ពស់សមត្ថភាពវិជ្ជាជីវៈគ្រូបង្រៀនជាប្រចាំ ក៏ដូចជាការប្រើប្រាស់បច្ចេកវិទ្យាក្នុងការរៀននិងបង្រៀន ។ ក្រសួងនឹងបន្តចុះជួយគាំទ្រលើការរៀបចំថ្នាក់កុំព្យូទ័រ និងការប្រើប្រាស់ឧបករណ៍ឌីជីថល ដើម្បីបង្កើនប្រសិទ្ធភាពនៃការរៀន និងបង្រៀនឱ្យទាន់យុគសម័យឌីជីថល។

ដើម្បីប្រែក្លាយជាវិទ្យាល័យគំរូ បណ្ឌិតសភាចារ្យ ហង់ជួន ណារ៉ុន ក៏អំពាវនាវឱ្យមានការចូលរួមពីគ្រប់ភាគីពាក់ព័ន្ធ ជាពិសេស មាតាបិតា អ្នកអាណាព្យាបាល ក្នុងការគាំទ្រដល់ការសិក្សារបស់កូនៗ សហការជាមួយលោកគ្រូអ្នកគ្រូ ក្នុងគោលដៅអភិវឌ្ឍន៍សមត្ថភាពសិស្សានុសិស្ស និងគុណភាពអប់រំនៅកម្ពុជា៕

The post រដ្ឋមន្ត្រីអប់រំ ណែនាំនាយកសាលាយកចិត្តទុកដាក់បន្ថែមលើការគ្រប់គ្រងសំរាមតាមថ្នាក់រៀន និងតូបលក់អាហារ appeared first on Kampuchea Thmey Daily.

លោក វ៉ា សាវឿន ចៅសង្កាត់​ចោមចៅ​ទី ៣ លើក​ឡើង​ថា មាន​ប្រជាពលរដ្ឋ​មួយ​ចំនួន​តូច​មិន​ទាន់​ជួយ​រក្សា​បរិស្ថាន អនាម័យ នៅតែ​បោះចោល​សំរាម​គ្មាន​សណ្ដាប់ធ្នាប់ ធ្វើ​ឲ្យ​សំរាម​ទាំងនោះ​ហើរ​ធ្លាក់​ចូល​ក្នុង​ប្រឡាយ​ទឹក​ក្លាយ​ជា​កាកសំណល់ ស្ទះ​ចរន្ត​ទឹក​ហូរ ងាយ​នឹង​ជន់​លិច​នា​រដូវ​វស្សា។

លោក​ចៅសង្កាត់​ចោមចៅ​ទី ៣ បន្ថែម​ថា ដោយ​ឃើញ​សំរាម​ពាសពេញ​លើ​ផ្ទៃ​ទឹក នៅ​ថ្ងៃ​ទី ២០ កុម្ភៈ នេះ លោក ប៉ាង លីដា ក៏បាន​ដឹកនាំ​ក្រុម​ការងារ ក្រុម​ប្រឹក្សា​សង្កាត់​ចោមចៅ​ទី ៣ ដាក់​គ្រឿង​ចក្រ​កាយ​ស្តារ​យក​សំរាម កាកសំណល់​ចេញពី​ប្រឡាយ​ទឹក ដើម្បី​សម្រួល​ចរន្តទឹក​ហូរ និង​សោភ័ណភាព​ទីក្រុង​ស្អាត។ ក្នុងនាម​អាជ្ញាធរ លោក ក៏បាន​អំពាវនាវ​ដល់​ប្រជាពលរដ្ឋ​ទាំងអស់ សូម​មេត្តា​វេច​ខ្ចប់​ទុក​ដាក់​សំរាម​ឲ្យ​បាន​ត្រឹមត្រូវ៕

អត្ថបទ ៖ សុខា

The post អាជ្ញាធរខណ្ឌពោធិ៍សែនជ័យ សហការជាមួយក្រុមប្រឹក្សាសង្កាត់ចោមចៅទី ៣ ចុះស្តារសំរាមចេញពីប្រឡាយអមផ្លូវជាតិលេខ ៤ appeared first on Kampuchea Thmey Daily.