ស្ដ្រីមានផ្ទៃពោះ Archives - Kampuchea Thmey Daily

តើការពិនិត្យអេកូសាស្ត្រច្រើនដង ប៉ះពាល់ដល់ទារកក្នុងផ្ទៃ និងអ្នកម្តាយដែរ ឬទេ?

Ken Malis — Thu, 22 May 2025 03:05:30 +0000

ការពិនិត្យអេកូផ្ទៃពោះចំពោះស្ត្រីមានផ្ទៃពោះមានសារៈសំខាន់ណាស់ក្នុងការតាមដានការវិវត្តន៍សរីរាង្គ និងដឹងពីបញ្ហាផ្សេងៗរបស់ទារកដែលនៅក្នុងផ្ទៃ។ តើការពិនិត្យអេកូសាស្ត្រច្រើនដង ប៉ះពាល់ដល់ទារកក្នុងផ្ទៃ និងអ្នកម្តាយដែរ ឬទេ?

បើតាមទំព័រហ្វេសប៊ុកផ្នែកសម្ភព និងរោគស្ត្រីនៃមន្ទីរពេទ្យព្រះអង្គឌួង បានឱ្យដឹងថា ការពិនិត្យអេកូសាស្ត្រ គឺជាវិធីសាស្ត្រមួយពុំមានផលប៉ះពាល់អ្វីឡើយដល់ទារកក្នុងផ្ទៃ និងអ្នកម្តាយ ទោះបីមានការពិនិត្យច្រើនដងក៏ដោយ។ លើសពីនេះការពិនិត្យអេកូសាស្ត្រ ត្រូវធ្វើយ៉ាងតិចណាស់ឱ្យបាន ៥ដង ទៅតាមអាយុគភ៌ ព្រោះវាមានសារៈសំខាន់ក្នុងតាមដានការវិវត្តន៍របស់ទារកក្នុងផ្ទៃ។ ខាងក្រោមនេះ ជាពេលវេលានៃការពិនិត្យអេកូសាស្ត្រយ៉ាងតិច ៥ដង ដែលអ្នកម្តាយគួរដឹង

ការពិនិត្យលើកទី១៖ ធ្វើឡើងនៅពេលបាត់រដូវ ដើម្បីដឹងថា តើកូនស្ថិតនៅក្នុង ឬនៅក្រៅស្បូន? ហើយទារកកំពុងវិវត្តន៍ ឬឈប់វិវត្តន៍?

លើកទី២ គឺចន្លោះពី (១២សប្តាហ៍ – ១៦សប្តាហ៍)៖ ដើម្បីកំណត់ថ្ងៃបង្កកំណើត និងថ្ងៃគ្រប់ខែ។ វាស់កម្រាស់កញ្ចឹងកកូន (nuchal translucency) និងពិនិត្យរក trisomy 21។ ភាពមិនប្រក្រតីរបស់ទារក (malformation) និងកំណត់ភេទកូន ស្រី ឬ ប្រុស។

លើកទី៣ នៅចន្លោះ (២២សប្តាហ៍ – ២៥សប្តាហ៍)៖ ជាអំឡុងពេលដែលអេកូសាស្ត្រមើលលម្អិត នូវគ្រប់សរីរាង្គរបស់ទារក ដូចជា ខួរក្បាល (មានទឹកក្នុងខួរក្បាលជាដើម) មុខ មាត់ ភ្នែក ច្រមុះ ត្រចៀក កន្លើត (មាត់ឆែប….) បេះដូង (បេះដូងប្រហោង…) សួត ថ្លើម ក្រលៀន ក្រពះ ពោះវៀន ផ្លោកនោម ឆ្អឹងខ្នង សន្ទះទ្រូង អវយវៈ (លើស ឬខ្វះ)។

លើកទី៤ (៣៣សប្តាហ៍ – ៣៥សប្តាហ៍)៖ ដើម្បីដឹងពី ទម្រង់ និងទម្ងន់កូន ការលូតលាស់ និងសុខភាពទារក ទីតាំងរបស់សុក បរិមាណទឹកភ្លោះ និងបញ្ហាផ្សេងៗទៀតដែលអាចកើតមានចំពោះទារក។

លើកទី៥ (ដល់ថ្ងៃកំណត់សម្រាលហើយ មិនឈឺពោះសម្រាល)៖ គឺដើម្បីតាមដានសុខភាពកូន (ចង្វាក់បេះដូងកូន, ចលនារបស់ទារកជាដើម) និងតាមដានទឹកភ្លោះ (អស់ទឹកភ្លោះ ទឹកភ្លោះតិចពេក រឺច្រើនពេក)៕

The post តើការពិនិត្យអេកូសាស្ត្រច្រើនដង ប៉ះពាល់ដល់ទារកក្នុងផ្ទៃ និងអ្នកម្តាយដែរ ឬទេ? appeared first on Kampuchea Thmey Daily.

ឆ្លុះអេកូវាសំខាន់សម្រាប់កូន និងម្ដាយ តែមានដឹងទេថា ឆ្លុះអេកូហើយត្រូវធ្វើអ្វីខ្លះ?

Sorn Phanith — Mon, 01 Nov 2021 02:50:27 +0000

ការពិនិត្យអេកូទារកក្នុងផ្ទៃមានសារៈសំខាន់ណាស់ មិនអាចខ្វះបាន សម្រាប់ការអនុវត្តជាក់ស្តែងនៅផ្នែកសម្ភព។ គឺជាការផ្តល់ភាពសុក្រឹត និងអត្ថប្រយោជន៍ជាច្រើន ក្នុងករណីមានការចូលរួមពីលោក-លោកស្រីជាមាតា បិតា។ ខាងក្រោមនេះជាការណែនាំនូវចំណុចទាំងឡាយដែលលោក-លោកស្រីគួរចងចាំ នៅពេលពិនិត្យអេកូ៖

១) ការពិនិត្យដើម្បីរកអាយុគភ៌ និងកាលបរិច្ឆេទគ្រប់ខែ៖

ស្ត្រីដែលមានផ្ទៃពោះទាំងអស់ ចាំបាច់គួរពិនិត្យនៅពេលគភ៌មានអាយុពី ១១ ទៅ១៤សប្ដាហ៍ គឺជាការពិនិត្យដែលផ្តល់ភាពសុក្រិតជាងគេ ហើយស្ត្រីត្រូវចងចាំនូវកាលបរិច្ឆេទគ្រប់ខែនោះរហូតដល់ពេលសម្រាលកូន។

២) ការពិនិត្យកាយសម្បទារបស់ទារកក្នុងផ្ទៃ៖

ស្ត្រីដែលមានផ្ទៃពោះគួរធ្វើការពិនិត្យនៅសប្តាហ៍ទី២២ ដល់ ២៤ គឺជាពេលវេលាសមស្របដែលអាចឲ្យយើងពិនិត្យ បានងាយស្រួល ព្រោះសរីរាង្គទារកធំល្មម និងបរិដ្ឋានជុំវិញទារកមានសភាពស្រឡះល្អ។ ការពិនិត្យមុន ឬក្រោយ ពេលនេះមានលក្ខណៈពិបាក និងមិនសព្វជ្រុងជ្រោយ។ ៨០%នៃជំងឺរបស់ទារកក្នុងផ្ទៃ ត្រូវបានពិនិត្យឃើញ ដោយសារការធ្វើអេកូសាស្ត្រ។

៣) ការពិនិត្យសម្រាប់វាយតម្លៃការសម្រាល៖

ការពិនិត្យអេកូត្រូវធ្វើឡើងនៅចន្លោះពី ៣២ ទៅ ៣៤ សប្តាហ៍ ព្រោះអាចឲ្យយើងដឹងអំពីទម្រង់ទំហំ ទម្ងន់របស់ទារក ទីតាំងសុក និងបរិមាណទឹកភ្លោះ ដែលមានទំនាក់ទំនងយ៉ាងជិតស្និទ្ធទៅនឹងលទ្ធភាពនៃការសម្រាលកូន។

៤) ការណែនាំផ្សេងៗទៀត៖

– ការពិនិត្យអេកូផ្ទៃពោះមិនមានផលប៉ះពាល់ដល់សុខភាពរបស់ម្តាយ និងទារកឡើយ។

– ការពិនិត្យអេកូត្រូវធ្វើឡើងយ៉ាងតិច៣ដង ក្នុងអំឡុងពេលពីមានផ្ទៃពោះរហូតដល់គ្រប់ខែក្នុងករណីការវិវត្តន៍របស់ ផ្ទៃពោះធម្មតា។ គ្រប់ការពិនិត្យអេកូត្រូវមានការណែនាំជាមុនពីគ្រូពេទ្យជំនាញ ដើម្បីជៀសវាងការពិនិត្យច្រើនដង ឥតប្រយោជន៍ខាតពេលវេលានិងថវិកា។ ករណីផ្ទុយពីនេះ ការពិនិត្យអេកូត្រូវធ្វើឡើងបន្ថែមទៀត តាមការតាមដានរបស់គ្រូពេទ្យជំនាញទៅតាមករណីដែលបានជួបប្រទះ។

– គ្រប់ការពិនិត្យអេកូផ្ទៃពោះមិនចាំបាច់ពិសាទឹកជាមុន ដើម្បីឲ្យមានទឹកនោមក្នុងប្លោកនោមទេ។ លើកលែងតែក្នុងករណីការពិនិត្យអេកូផ្ទៃពោះក្នុងខែដំបូង ការពិនិត្យទីតាំងសុក និងវាស់ប្រវែងរបស់មាត់ស្បូន។

រាល់ពេលមកពិគ្រោះជាមួយអ្នកជំនាញរោគស្ត្រី និងសម្ភព និងមកទទួលពិនិត្យអេកូសាស្ត្រទារកនៅមន្ទីរពេទ្យកាល់ម៉ែត សូមលោក-លោកស្រី ជម្រាបគ្រប់ព័ត៌មានអំពីស្ថានភាពសុខភាពនៃមាតា និងបម្រែបម្រួលនៃទារក៕

អត្ថបទ៖ រស្មី

The post ឆ្លុះអេកូវាសំខាន់សម្រាប់កូន និងម្ដាយ តែមានដឹងទេថា ឆ្លុះអេកូហើយត្រូវធ្វើអ្វីខ្លះ? appeared first on Kampuchea Thmey Daily.

ការធ្លាក់ឈាមត្រីមាសដំបូងនៃគភ៌ រួមជាមួយផលលំបាក និងការំខាន

Sorn Phanith — Wed, 20 Oct 2021 02:39:04 +0000

ការធ្លាក់ឈាមអំឡុងពេលមានគភ៌ ជាក្តីបារម្ភរបស់ស្ត្រីជាមាតាទាំងឡាយ។ ២០% ទៅ ៣០% នៃគភ៌សរុបអាចជួបប្រទះបញ្ហានេះ នៅអំឡុងពេលត្រីមាសដំបូង។ បញ្ហានេះអាចជាសញ្ញាអាសន្ន ដែលស្ត្រីចាំបាច់ត្រូវត្រួតពិនិត្យនិងតាមដានជាបន្ទាន់នៅមន្ទីរពេទ្យ ឬមណ្ឌលសុខភាពដែលនៅក្បែរផ្ទះរបស់លោកអ្នក។

ផ្ទុយទៅវិញបញ្ហានេះ អាចជាផលរំខានតិចតួចតែប៉ុណ្ណោះចំពោះស្ត្រីនិងគភ៌ វាអាស្រ័យលើបរិមាណនៃការធ្លាក់ឈាម និងរោគសញ្ញាផ្គួបផ្សំ (៧០% នៃការធ្លាក់ឈាមរបស់ស្ត្រី គភ៌អាចវិវត្តន៍ធម្មតា) ។

១) ប្រភេទនៃការធ្លាក់ឈាម៖

-ការធ្លាក់រំអិលឈាមក្រហម ឬក្រមៅ (កករ ឃ្លោក ឬកាកកាហ្វេ)

-ការធ្លាក់ឈាមដូចកណ្តាលរដូវ ពណ៌ក្រហម ឬ ក្រមៅ

-ការធ្លាក់កំណកឈាម ក្រហម ឬក្រមៅ

២) រោគសញ្ញាផ្គួបផ្សំ៖

– ឈឺពោះ ឬឈឺលើថ្ងាសផ្នែកខាងក្រោមនៃពោះ

– កម្រិតឈឺ តិច ឬខ្លាំង

– រោយចង្កេះ

– អស់កម្លាំង ល្ហិតល្ហៃ

– បាត់បង់ស្មារតី

៣) មូលហេតុ៖ មូលហេតុដែលអាចជួបប្រទះ (ពីស្រាលទៅធ្ងន់)មានៈ

– ការប៉ះទង្គិច ឬកកិតមាត់ស្បូន (ការរួមភេទ, ការពិនិត្យមាត់ស្បូន)

– ការបង្កកំណើតរបស់គភ៌ក្នុងស្បូន (ការកាច់សំបុក)

– ការគំរាមរលូត ឬរលូត

– កូនក្រៅស្បូន

– កូនពង

– ការរលាកមាត់ស្បូន

៤) ដំបូន្មាន៖

– ប្រការគួរជៀសវាងមាន ការរួមភេទ ការហែលទឹក ការធ្វើដំណើរឆ្ងាយ និងការធ្វើការងារធ្ងន់។

– សូមរក្សាអនាម័យដោយការផ្លាស់ប្តូរសំឡីទ្រនាប់ និងការសំអាតប្រដាប់ភេទ។

– សូមស្ត្រីយកចិត្តទុកដាក់ និងវាយតម្លៃលើបរិមាណនៃការបាត់បង់ឈាមតាមទ្វាមាស ដោយត្រួតពិនិត្យលើការប្រើប្រាស់សំឡីអនាម័យ ចំនួននៃការផ្លាស់ប្តូរសំឡី និងកម្រិតឈាមដែលជ្រាបជោគលើសំឡីរបស់ស្ត្រី។ គ្រូពេទ្យជំនាញ ឬឆ្មបជំនាញ នឹងសួរបញ្ជាក់សុំឲ្យស្ត្រីរៀបរាប់នូវសភាព និងលក្ខណៈនៃឈាម ដែលហូរតាមទ្វាមាសរបស់ស្ត្រី។ ស្ត្រីអាចថតរូបភាពបង្ហាញជូនគ្រូពេទ្យ ឬឆ្មបជំនាញក៏បាន។

សូមស្ត្រីយកចិត្តទុកដាក់លើថ្ងៃខែមករដូវជាប្រចាំរបស់ខ្លួន បើសិនមានការរាំងរដូវ សញ្ញាធ្លាក់ឈាម ឬឈឺចាប់លើផ្ទៃពោះផ្នែកណាមួយសូមប្រញាប់មកពិនិត្យសុខភាពកុំបីខាន ជាមួយក្រុមគ្រូពេទ្យជំនាញផ្នែកសម្ភព នៃមន្ទីរពេទ្យកាល់ម៉ែត ដើម្បីកំណត់បាននូវរោគវិនិច្ឆ័យ និងធ្វើការព្យាបាលបានទាន់ពេលវេលា ប្រកបដោយប្រសិទ្ធភាព៕

អត្ថបទ៖ រស្មី

The post ការធ្លាក់ឈាមត្រីមាសដំបូងនៃគភ៌ រួមជាមួយផលលំបាក និងការំខាន appeared first on Kampuchea Thmey Daily.

ហេតុអ្វីបានជាហើមជើង ក្នុងអំឡុងពេលមានផ្ទៃពោះ!

Sorn Phanith — Mon, 11 Oct 2021 01:27:25 +0000

១) មូលហេតុដែលបណ្តាលឲ្យហើមអំឡុងពេលមានផ្ទៃពោះរួមមាន:

– លើសជាតិទឹកបណ្តាលមកពីបម្រែបម្រួលអរម៉ូន អំឡុងពេលមានផ្ទៃពោះ (ជាបាតុភូតធម្មតាដែលកើតមានអំឡុងមានផ្ទៃពោះ)។

– ការសង្កត់ទៅលើសរសៃឈាមធំៗរបស់អាងត្រគៀក (pelvic veins) ដោយទម្ងន់កាន់តែធ្ងន់របស់ស្បូន ដែលធ្វើឲ្យលំហូរឈាមពីចុងជើងត្រលប់មកបេះដូង យឺតជាងធម្មតានិងចាល់ឈាមបង្កជាការហើមជើង។ ដោយហេតុផលនេះ ការហើមភាគច្រើនកើតមាននៅអំឡុងពេលត្រីមាសទី៣នៃផ្ទៃពោះ ចំពោះស្ត្រីដែលមានទឹកភ្លោះច្រើន ឬពរពោះកូនភ្លោះ (ជាបាតុភូតធម្មតាដែលកើតមានអំឡុងមានផ្ទៃពោះ)។

– កង្វះជាតិអាល់ប៊ុយមីន (Albumin) ដែលអាចបណ្តាលមកពីបាត់ជាតិសាច់តាមទឹកនោម (ជំងឺទឹកនោមប្រៃ)។

– ជំងឺខ្សោយតម្រងនោម ឬ ខ្សោយបេះដូង ។ល។

២) សញ្ញាអាសន្ននៃការហើមជើងអំឡុងមានផ្ទៃពោះ ដែលត្រូវយកចិត្តទុកដាក់រួមមាន៖

នៅពេលដែលស្ត្រីមានផ្ទៃពោះមានហើមជើងបូករួមនិងសញ្ញាមួយចំនួនដូចជា:

– លើសសម្ពាធឈាម

– ហត់ដង្ហក់

– ទឹកនោមតិច

– ជើងឡើងក្រហមហើយឈឺ -ល។

៣) វិធីព្យាបាល៖

ក. បើជាការហើមមានសញ្ញាអាសន្ន គួរប្រញាប់រួសរាន់មកជួបពិគ្រោះជាមួយគ្រូពេទ្យជំនាញដើម្បីវិភាគរកមូលហេតុឲ្យបានគ្រប់ជ្រុងជ្រោយ និងដើម្បីទទួលដំបូន្មាន ឬការព្យាបាលដ៏ត្រឹមត្រូវ។

ខ. បើគ្រូពេទ្យរកឃើញថា ជាការហើមដោយមូលហេតុធម្មតានៃការមានគភ៌ នោះស្ត្រីយើងគួរអនុវត្តទម្លាប់មួយចំនួនដូចខាងក្រោម:

– គេងផ្អៀងមកខាងឆ្វេងដៃ ដើម្បីកាត់បន្ថយការសង្កត់របស់ស្បូនទៅ លើសរសៃឈាមធំៗ។

– ដាក់ជើងរបស់អ្នកឲ្យបានខ្ពស់ គ្រប់ពេលដែលអាចធ្វើបានដូចជា នៅពេលធ្វើការ ឬពេលគេង ឬតម្រង់ជើងឲ្យបានញឹកញាប់ពេលអង្គុយលេង។

– ជៀសវាងការអង្គុយគងអន្ទាក់ខ្លាយូរ។

– ឧស្សាហ៍ផ្លាស់ប្តូរឥរិយាបថ ឬដើរហាត់ប្រាណដើម្បីជួយចលនាឈាមហូរបានល្អ។

– ចូរកុំបាក់ទឹកចិត្ត ព្រោះវាអាចបាត់ទៅវិញក្រោយពេលសម្រាលបុត្ររួច។

ស្ត្រីមានផ្ទៃពោះគួរតែមកតាមដាន និងពិនិត្យសុខភាពឲ្យបានទៀងទាត់ជាប្រចាំ។ ក្នុងករណីមានការហើមនិងក្តីបារម្ភណាមួយ គួរមកជួបពិគ្រោះជាមួយគ្រូពេទ្យជំនាញសម្ភព នៃមន្ទីរពេទ្យកាល់ម៉ែត ដើម្បីទទួលបាននូវការប្រឹក្សា និងព្យាបាលបានត្រឹមត្រូវទាន់ពេលវេលាប្រកបដោយសុវត្ថិភាព៕

អត្ថបទ៖ រស្មី

The post ហេតុអ្វីបានជាហើមជើង ក្នុងអំឡុងពេលមានផ្ទៃពោះ! appeared first on Kampuchea Thmey Daily.

ការយល់ដឹងអំពី ការប្រើថ្នាំសន្តំ សម្រាប់បំបាត់ការឈឺចាប់ពេលសម្រាលកូន

Sorn Phanith — Mon, 04 Oct 2021 02:25:19 +0000

សម្រាលបុត្រដោយប្រើប្រាស់ថ្នាំសន្តំ(Epidural) គឺជាវិធីសាស្ដ្រដែលកំពុងពេញនិយមបំផុត សម្រាប់បំបាត់ការឈឺចាប់ ក្នុងអំឡុងពេលសម្រាលកូន នៅដំណាក់កាលបច្ចុប្បន្ន។ ជាង 70% នៃស្ត្រីដែលផ្តល់កំណើតនៅមន្ទីរពេទ្យនៃប្រទេសអភិវឌ្ឍន៍បានប្រើថ្នាំសន្ដំ epidural ។ ការយល់ដឹងពីរបៀបប្រើប្រាស់ អត្ថប្រយោជន៍ និងហានិភ័យរបស់វា នឹងជួយអ្នក ក្នុងការធ្វើការសម្រេចចិត្តរបស់អ្នកក្នុងអំឡុងពេល ឈឺពោះសម្រាលកូន។

ក) ការប្រើថ្នាំសណ្តំ epidural ជាអ្វី?

ការដាក់ថ្នាំសន្ដំ epidural ជាការប្រើថ្នាំបំបាត់ការឈឺចាប់ ក្នុងតំបន់ដែលមានការឈឺចាប់ ជាក់លាក់ណាមួយនៃរាងកាយ។ ជាក់ស្ដែងក្នុងពេលសម្រាល គឺបន្ថយការឈឺចាប់ដោយសារការកន្ត្រាក់នៃស្បូន។ ថ្នាំ epidural ជាថ្នាំបំបាត់ការឈឺចាប់ដែលមានផលប៉ះពាល់ តិចតួចបំផុត។

ខ) តើ epidural ត្រូវបានចាក់យ៉ាងដូចម្ដេច?

ជាទូទៅការប្រើថ្នាំសន្ដំ epidural នឹងចាប់ផ្តើម ចាប់ពីពេលមាត់ស្បូនបើកបាន ៣សង់ទីម៉ែត្រ។ ជាដំបូងគ្រូរពេទ្យនឹងផ្ដល់សារធាតុរាវតាមសរសៃឈាមរបស់អ្នក(iv fluid) មុនពេល ចាប់ផ្តើមដាក់ epidural។ គ្រូពេទ្យជំនាញផ្នែកសម្ភព និងផ្នែកដាក់ថ្នាំសន្ដំ នៃមន្ទីរពេទ្យកាល់ម៉ែត នឹងនៅទីនោះ សម្រាប់ដំណើរនៃការដាក់ថ្នាំសន្តំ។

អ្នកនឹងត្រូវបានស្នើឱ្យអង្គុយ ឬគេងចង្កោមខ្នង បន្ទាប់មកខ្នងរបស់អ្នកនឹងត្រូវលាងសំអាត ដោយទឹកសម្លាប់មេរោគ។ គ្រូពេទ្យនឹងចាក់បញ្ចូលម្ជុលទៅចន្លោះឆ្អឹងខ្នងរបស់អ្នក។ ម្ជុលជ័រតូចនឹង ត្រូវបានបិតជាប់ខ្នងរបស់អ្នកដើម្បីបង្ហូរថ្នាំ។ ពេលនោះ អ្នកនឹងត្រូវស្នើរឲ្យត្រឡប់មកគេងក្នុងសភាពធម្មតាវិញ អារម្មណ៍ឈឺចាប់ក៏ត្រូវបានកាត់បន្ថយ។

គ) អត្ថប្រយោជន៍៖

– បន្ថយការឈឺចាប់ពេលសម្រាល ពេលទម្លាក់សុក នឹងពេលដេររបួស

– អ្នកមានពេលសម្រាក បើការសម្រាលមានរយៈពេលយូរ

– ក្នុងករណីមានការវះកាត់យកកូន យើងនៅតែអាចបន្តតាមរយៈបច្ចេកទេសនេះដដែល

– ជួយសំរួល ភាពភ័យខ្លាច ហត់នឿយ ថប់បារម្ភ ហើយជំនួសមកវិញនៅអារម្មណ៍ ជឿជាក់, ស្ងប់ស្ងាត់ និងមានកម្លាំងចិត្តក្នុងការសម្រាល។

ឃ) ផលរំខាន៖

– សំពាធឈាមធ្លាក់ចុះ ក្នុងករណីនេះ គ្រូពេទ្យជំនាញនឹងព្យាយាមជួយរក្សាសំពាធឈាមឲ្យនៅធម្មតា

– ឈឺក្បាលផលលំបាកនេះតិចជាង 1%

– អាចមានផលរំខានដូចជា ញាក់ញ័រ ហឹងត្រចៀក ឈឺត្រង់កន្លែងចាក់ម្ជុល (នឹងបាត់ទៅវិញដោយឯកឯង)

– បន្ទាប់ពីចាក់ថ្នាំហើយ អ្នកនឹងតម្រូវឲ្យគេងមួយកន្លែងនៅលើគ្រែដើម្បីរង់ចាំការសម្រាល

– អ្នកអាចកាត់បន្ថយអារម្មណ៍នៃការប្រឹង ឬបញ្ចេញកូនដោយសារការមិនឈឺចាប់

ង) តើការប្រើថ្នាំ epidural មានផលអាក្រក់លើទារកដែរឬទេ?

តាមការសិក្សាថ្មីៗ epidural មិនមានផលប៉ះពាល់អាក្រក់លើទារកឡើយ។

ច) តើស្ត្រីប្រភេទណាដែលមិនអាចប្រើប្រាស់ epidural?

ស្ត្រីដែលមិនអាចប្រើថ្នាំ epidural មាន៖

– ការបដិសេធមិនធ្វើពីអ្នកជំងឺ

– មានសំពាធឈាមទាប

– មានជំងឺវិបត្តិកំណកឈាម

– មានមេរោគក្នុងឈាម

– មានដំបៅ ឬដាច់របួសនៅកន្លែងដែលត្រូវចាក់ម្ចុល

– ធ្លាប់មានប្រតិកម្មជាមួយថ្នាំស្ពឹក

– ជំងឺបេះដូងធ្ងន់ធ្ងរ

សម្រាលបុត្រ ដោយមិនមានការឈឺចាប់ ប្រកបដោយក្តីញញឹម អាចរកបាននៅមន្ទីរពេទ្យកាល់ម៉ែត៕

អត្ថបទ៖ រស្មី

The post ការយល់ដឹងអំពី ការប្រើថ្នាំសន្តំ សម្រាប់បំបាត់ការឈឺចាប់ពេលសម្រាលកូន appeared first on Kampuchea Thmey Daily.

ស្ត្រីគួរតែយល់ដឹងក្នុងរយៈពេល “មុន និង អំឡុងពេល” មានផ្ទៃពោះ

Sorn Phanith — Sat, 02 Oct 2021 02:29:46 +0000

កត្តាពិនិត្យឈាម និងទឹកនោម ៖

ជាធម្មតាការពិនិត្យឈាម និងទឹកនោម ត្រូវធ្វើឡើងចំនួន ២ដង (អាចលើសពីនេះក្នុងករណីចាំបាច់) ក្នុងអំឡុងពេលមានផ្ទៃពោះ។

១. នៅពេលចាប់ផ្តើមមានកូន:

+ វាស់កម្រិត marqueur sérique de la trisomie 21

+ ការពិនិត្យរកក្រុមឈាម (Rhésus(+) ឬ Rhésus(-))

+ ការពិនិត្យគ្រាប់ឈាម: (កង្វះគ្រាប់ឈាមក្រហម, ប្លាកែត (plaquettes) ចុះទាប,…)

+ ការពិនិត្យរកមេរោគ (អេដស៍, ស្វាយ, ព្រូនឆ្មារ, ស្អូច,…)

+ ពិនិត្យជាតិស្ករ ក្នុងឈាម ខ្វះជាតិស្ករ ទឹកនោមផ្អែមពេលមានទម្ងន់?

២. នៅពេលជិតសម្រាលៈ

ការពិនិត្យឈាមនៅរយៈពេលនេះមានសារៈសំខាន់ សម្រាប់ត្រៀមនៅពេលសម្រាល (សម្រាលដោយធម្មជាតិ ឬវះកាត់)។

គ) ការពិនិត្យរោគស្ត្រី ៖

+ រលាកមាត់ស្បូន

+ រលាកទ្វាមាស

+ ធ្លាក់ស បង្កដោយមេរោគ (មេរោគអាចបណ្តាលឲ្យកូនលូតលាស់មិនសមស្រប បែកទឹកភ្លោះខុសប្រក្រតី ឬ កូនកើតមិនគ្រប់ខែ)

ឃ) ការចាក់វ៉ាក់សាំង ៖

ក្នុងអំឡុងពេលមានផ្ទៃពោះ វ៉ាក់សាំងសំខាន់ចាំបាច់ដែលត្រូវចាក់ និងគ្មានផលប៉ះពាល់ដល់ទារកក្នុងផ្ទៃនោះគឺៈ

+ វ៉ាក់សាំងតេតាណូស

+ វ៉ាក់សាំងការពារផ្តាសាយ

ង) ការទទួលជាតិដែក acide folique និង វីតាមីនផ្សេងៗ ៖

អ្នកអាចទទួលជាតិដែក acide folique និងវីតាមីន មុនពេលបង្ករកំណើត និងក្នុងអំឡុងពេលមានផ្ទៃពោះជាការចាំបាច់ណាស់ ដើម្បីឲ្យទារកក្នុងផ្ទៃលូតលាស់បានល្អគ្រាប់គ្រាន់ និងត្រឹមត្រូវ ព្រមទាំងអាចបង្ការពីជំងឺផ្សេងៗមួយចំនួនទៀតផង ។

បញ្ជាក់៖ ការពិនិត្យឈាម រោគស្ត្រី ការចាក់វ៉ាក់សាំង និងការទទួលជាតិដែក ព្រមទាំងវីតាមីនផ្សេងៗ គឺមានសារៈសំខាន់បំផុតក្នុងការស្វែងរកមេរោគនិងជំងឺដែលមាន ដើម្បីឈានទៅរកការការពារនិងព្យាបាលប្រកបដោយជោគជ័យ ក្នុងគោលបំណងធានានូវសុវត្ថិភាពសុខភាពមាតា និងទារក។

សូមជូនពរមាតា និងបុត្រធីតាទាំងអស់ ឲ្យមានសុខភាពល្អ និងសុវត្ថិភាព ក្នុងពេលសម្រាលនិងក្រោយសម្រាល៕

អត្ថបទ៖ រស្មី

The post ស្ត្រីគួរតែយល់ដឹងក្នុងរយៈពេល “មុន និង អំឡុងពេល” មានផ្ទៃពោះ appeared first on Kampuchea Thmey Daily.

ស្ដ្រីមានផ្ទៃពោះ និងកុមារអាយុក្រោម២ឆ្នាំក្នុងសង្កាត់ចំនួន២ទទួលសាច់ប្រាក់រាជរដ្ឋាភិបាល

Sokhom Khon — Wed, 29 Sep 2021 03:12:38 +0000

ខណៈដែលប្រទេសកម្ពុជាកំពុងតែរាតត្បាតដោយជំងឺដ៏កាចសាហាវកូវីដ១៩នោះ រាជរដ្ឋាភិបាលនៅតែបន្តកម្មវិធីឧបត្ថម្ភសាច់ប្រាក់ជូនស្រី្តមានផ្ទៃពោះ និងកុមារអាយុក្រោម២ឆ្នាំ និងគ្រួសារក្រីក្រងាយរងគ្រោះតាមរយៈនាយកដ្ឋានសុខុមាលភាពសង្គម នៃក្រសួងសង្គមកិច្ច អតីតយុទ្ធជន និងយុវនីតិសម្បទាសហការជាមួយមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តព្រះវិហារ នាថ្ងៃនេះក្នុងសង្កាត់ចំនួន២នៅសង្កាត់ប៉ាលហាល និងសង្កាត់កំពង់ប្រណាក ក្រុងព្រះវិហារ ខេត្តព្រះវិហារ។

លោក ឈួរ សុបញ្ញា ប្រធាននាយកដ្ឋានសុខុមាលភាពសង្គម នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានថ្លែងថា ដោយមើលឃើញការលំបាករបស់ស្រី្តមានផ្ទៃពោះ និងកុមារអាយុក្រោម២ឆ្នាំ និងជនងាយរងគ្រោះរួចមក លោកបានសហការជាមួយមន្ទីរសង្គមកិច្ចខេត្តព្រះវិហារ។

ជាក់ស្ដែងថ្ងៃនេះក្រុមការងារបានចុះពិនិត្យការអនុវត្តកម្មវិធីឧបត្ថម្ភសាច់ប្រាក់ជូនស្រី្តមានផ្ទៃពោះ និងកុមារអាយុក្រោម២ឆ្នាំ និងកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ នៅក្នុងសង្កាត់ប៉ាលហាល និងសង្កាត់កំពង់ប្រណាក ក្រុងព្រះវិហារ ខេត្តព្រះវិហារដែលកំពុងតែជួបការលំបាកលើជីវភាពប្រចាំថ្ងៃ ។

សូមបញ្ចាក់ថា យោងតាមសេចក្តីជូនរបស់ក្រសួងសង្គមកិច្ច អតីតយុទ្ធជន និងយុវនីតិសម្បទាបានបញ្ចាក់មុននេះថា ដំណើរការបើកសាច់ប្រាក់ពីកម្មវិធីឧបត្ថម្ភសាច់ ប្រាក់របស់រាជរដ្ឋាភិបាលនឹងជូនដល់គ្រួសារក្រីក្រ និងងាយរងគ្រោះក្នុងអំឡុងពេលប្រយុ ទ្ធនឹងកូវីដ-១៩ សម្រាប់ជុំទី៦លើកទី២បានអនុវត្តចាប់ ពីថ្ងៃទី២៥ ខែសីហា ដល់២៤ ខែកញ្ញា ឆ្នាំ២០២១ គឺមានរយៈពេល ១ខែ រួចរាល់ហើយៗពេលនេះបន្តជុំទី៦លើកទី៣ទៀត។

សេចក្តីជូនដំណឹងបានបន្ថែមថា កិច្ចការនេះនឹងត្រូវអនុវត្តតាមនីតិវិធីចំនួន១០ចំនុចសំខាន់ៗដូចខាងក្រោម

ទី១.ចំពោះគ្រួសារដែលបានផ្ទៀងផ្ទាត់ទាំង ៤ជុំ និងជុំទី៥ ទី៦លើកទី១ ទី២រួចហើយ សូមអញ្ជើញទៅបើកប្រាក់ឧបត្ថម្ភនៅតាមបញ្ជរវីងណាមួយដោយមិនតម្រូវឱ្យមកសាលាឃុំ សង្កាត់ សារជាថ្មីទៀតទេ។

ទី២.ចំពោះគ្រួសារក្រីក្រនិងងាយរងគ្រោះ ដែលមានប័ណ្ណសម ធម៌មានជុំទី១១ ទាំងអស់នឹងត្រូវផុតសុពលភាពនៃការប្រើប្រា ស់ប័ណ្ណចាស់ ហើយដោយជំនួសមកវិញដោយប័ណ្ណជុំទី១៤ វិញ ។

ទី៣. ចំពោះគ្រួសារក្រីក្រ និងងាយរងគ្រោះដែលមានប័ណ្ណសម ធម៌មានជុំទី១១ ដែលបានជាប់បន្តទៅជុំទី១៤ ត្រូវយកប័ណ្ណថ្មី ដែលផ្តល់ដោយរដ្ឋបាល ឃុំសង្កាត់ដើម្បីយកទៅបើកសាច់ ប្រាក់ឧបត្ថម្ភនៅតាមបញ្ជរវីងដូចធម្មតា ដោយមិនតម្រូវឲ្យទៅផ្ទៀងផ្ទាត់ឡើងវិញនៅតាម ឃុំ សង្កាត់ នោះទេ លើកឡើងតែគ្រួសារ ដែលជាប់ថ្មីនៅជុំទី១៤ ត្រូវទៅផ្ទៀងផ្ទាត់នៅតាម ឃុំ សង្កាត់ ជាមុនសិនមុនទៅបើកប្រាក់នៅតាមបញ្ជរវីង ។

ទី៤. ករណីគ្រួសារក្រីក្រ និងងាយរងគ្រោះ ដែលមានប័ណ្ណសម ធម៌មានជុំទី១១ មិនបានជាប់នៅក្នុងជុំទី១៤ បន្តទៀត តែបានផ្ទៀងផ្ទាត់រួចហើយនៅតាមឃុំ សង្កាត់ និងមានលុយនៅសល់ ក្នុងគណនីរបស់ខ្លួននោះ អ្នកទទួលផលនៅអាចប្រើប្រាស់ប័ណ្ណជុំទី១១ ដើម្បីដកប្រាក់ ដែលនៅសល់នោះនៅគ្រប់បញ្ជវីងបាន តែអ្នកទទួលផលនោះមិនបានទទួលការឧបត្ថម្ភបន្តទៀតនោះទេ ។

ទី៥.ចំពោះគ្រួសារដែលបានផ្ទៀងផ្ទាត់ទាំង ៤ជុំ និងជុំទី២ លើកទី១ រួចហើយ លើកលែងតែជុំទី១១ ដែលមិនបានជាប់ជុំទី១៤ សូមអញ្ជើញទៅបើកប្រាក់ឧបត្ថម្ភនៅតាមបញ្ជរវីងណាមួយដោយមិនតម្រូវឱ្យមកសាលាឃុំ សង្កាត់ សារជាថ្មីទៀតទេ។

ទី៦. ចំពោះគ្រួសារក្រីក្រ និងងាយរងគ្រោះ ដែលមានប័ណ្ណសម ធម៌មានសុពលភាព ហើយមិនទាន់បានផ្ទៀងផ្ទាត់ទាំង ៤ជុំ និ ងគ្រួសារក្រីក្រ ដែលទើបទទួលបានប័ណ្ណសមធម៌ថ្មីសូមអញ្ជើ ញទៅផ្ទៀងផ្ទាត់នៅសាលា ឃុំ សង្កាត់ ណាមួយ ដើម្បីទទួលបានការឧបត្ថម្ភសាច់ប្រាក់ក្នុងជុំទី៦ លើកទី៣នេះ។

ទី៧.ពេលទៅបើកប្រាក់ឧបត្ថម្ភជុំទី៦លើកទី៣នៅតាមបញ្ជរវីង តម្រូវឱ្យអ្នកទទួលផលត្រូវភ្ជាប់ទៅជាមួយនូវឯកសារពាក់ព័ន្ធដូចគ្នានឹងការបើកប្រាក់ឧបត្ថម្ភលើកមុនៗផងដែរ ពិសេសប ណ្ណសមធម៌ ដែលនៅមានសុពលភាព និងត្រូវចងចាំលេខកូដសម្ងាត់។

ទី៨.ករណីភ្លេចលេខសម្ងាត់ សូមទំនាក់ទំនងអ្នកទទួលបន្ទុកកម្មវិធីនៅតាមឃុំ សង្កាត់ ឬ មន្ទីរសង្គមកិច្ច អតីតយុទ្ធជន និងយុវនីតិសម្បទា រាជធានី ខេត្ត ។

ទី៩.ក្នុងករណីប្រជាពលរដ្ឋ ឬ សាធារណជន ពិនិត្យឃើញភាពមិនប្រក្រតីណាមួយក្នុងការអនុវត្តកម្មវិធី ឬ ដកសាច់ប្រាកមិន បាននៅតាមបញ្ជរវីងណាមួយនោះ សូម សាធារណជន និងអ្នកទទួលផលទាំងអស់ ធ្វើការទំនាក់ទំនងជាមួយអ្នកកាន់កម្មវិធីនៅតាមឃុំ សង្កាត់ ឬ នៅមន្ទីរសង្គមកិច្ច អតីតយុទ្ធជន និងយុវនីតិសម្បទា ឬ មន្ទីរផែនការ រាជធានី ខេត្តនីមួយៗ។

ទី១០. សូម គ្រួសារក្រីក្រ និងងាយរងគ្រោះ ទាំងអស់គោរពនូវវិធានការរបស់រាជរដ្ឋាភិបាលក្នុងការបង្ការ និងទប់ស្កាត់ការរីករាលដាលដោយអនុវត្តនូវវិធានការ ៣កុំ ៣ការពារ នៅគ្រប់ទីកន្លែង៕

អត្ថបទ៖ វិមាន

The post ស្ដ្រីមានផ្ទៃពោះ និងកុមារអាយុក្រោម២ឆ្នាំក្នុងសង្កាត់ចំនួន២ទទួលសាច់ប្រាក់រាជរដ្ឋាភិបាល appeared first on Kampuchea Thmey Daily.

សូមស្វែងយល់ស្ត្រីមានផ្ទៃពោះ និងថ្ងៃគ្រប់ខែសម្រាប់សម្រាលកូន

Sorn Phanith — Wed, 29 Sep 2021 01:40:47 +0000

១) ថ្ងៃឈឺពោះសម្រាលកូន ជាថ្ងៃដែលឈឺពោះមានចង្វាក់ឈឺបាត់ឈឺបាត់ (ក្នុងនោះមានរំអិលលាយឈាមផងដែរ) ឈឺរហូតដល់កូនកើតចេញពីផ្ទៃម្តាយ។

– សម្រាលកូនគ្រប់ខែ គឺសម្រាលកូន ក្នុងចន្លោះពេលដែលកូនមានអាយុ៣៧សប្តាហ៍ពេញ នៃការបាត់រដូវ និង ៤១សប្តាហ៍ ៣ថ្ងៃ។

– សម្រាលកូនមិនគ្រប់ខែ

– ក្រោម ៦ខែ = រលូត

– ពី ៦ខែទៅ ៨ខែកន្លះ=សម្រាលមុនខែ

– កូនលើសខែ គឺពី៤១ សប្តាហ៍នៃការបាត់រដូវឡើងទៅ

២) ថ្ងៃទី ១ នៃរដូវចុងក្រោយៈ គឺជា

– ថ្ងៃទី១ ដែលឈាមរដូវធ្លាក់ (មិនមែនជាថ្ងៃដែលអស់ឈាមរដូវទេ)

– គឺជាខែចុងក្រោយគេ ដែលរដូវមក (មិនមែនខែ ដែលអត់មកទេ)

៣) រដូវទៀងទាត់ គឺរដូវដែលមក ២៨ថ្ងៃម្តង

ឧទាហរណ៍ៈ

– ខែមុន រដូវមកថ្ងៃទី ៣០

– ខែបន្ទាប់ត្រូវមកថ្ងៃទី ២៨

– ខែបន្ទាប់ទៀតត្រូវមកថ្ងៃទី ២៦

៤) សប្តាហ៍នៃការបាត់រដូវ

យើងគិតអាយុកូនក្នុងផ្ទៃជាសប្តាហ៍ ដោយរាប់ពីថ្ងៃទី១ នៃរដូវដែលមក ខែចុងក្រោយគេ។

៥) ថ្ងៃបង្កកំណើតកូនៈ គឺ ១៤ថ្ងៃបន្ទាប់ពីថ្ងៃទី១ នៃរដូវដែលមក ខែចុងក្រោយគេ

៦) ការកំណត់ថ្ងៃសម្រាលកូនៈ តាមរដូវដែលទៀងទាត់ក្តី (២៨ថ្ងៃ)

តាមអេកូបីខែដំបូងក្តី គឺយើងកំណត់យក ៤០សប្តាហ៍នៃការបាត់រដូវជាថ្ងៃសម្រាល។ តែកូនអាចសម្រាលមុន ១០ថ្ងៃ ឬក្រោយ ១០ថ្ងៃ។

៧) ការកំណត់ថ្ងៃសម្រាលកូន តាមអេកូបីខែដំបូងក្តី និងតាមរដូវដែលទៀងទាត់ក្តី គឺពុំមានខុសគ្នាឡើយ។ ខុសគ្នាយ៉ាងច្រើន ៣ ទៅ ៤ថ្ងៃប៉ុណ្ណោះ។ដូច្នេះបើប្អូនមិនចាំរដូវ ប្អូនត្រូវយកថ្ងៃសម្រាលកូនតាមអេកូបីខែដំបូង។

៨) បើដល់ថ្ងៃសម្រាលហើយ គឺ៤០សប្តាហ៍ ពុំទាន់ឈឺពោះសម្រាល ប្អូនត្រូវមើលអេកូម្តងទៀត បើទឹកភ្លោះនៅគ្រប់គ្រាន់ សុខភាពកូននៅល្អ ប្អូនអាចទុកតាមដានបាន ១០ថ្ងៃទៀត ដោយប្អូនត្រូវមកតាមដានផ្ទៃពោះរាល់ ២ ឬ៣ថ្ងៃម្តង រហូតដល់ថ្ងៃឈឺពោះសម្រាលកូន។

៩) បើ ១០ថ្ងៃហ្នឹង មិនទាន់ឈឺពោះសម្រាលទៀត ប្អូនចាំបាច់ត្រូវសម្រាកពេទ្យ ដើម្បីដាក់ថ្នាំឲ្យឈឺពោះសម្រាល ទៅតាមបច្ចេកទេសលោកគ្រូ អ្នកគ្រូផ្នែកសម្ភព។

១០) យើងអាចទុកកូនទៅក្នុងផ្ទៃបានត្រឹមតែ ៤១សប្តាហ៍ ៣ថ្ងៃប៉ុណ្ណោះ។ លើសពីថ្ងៃនេះទារកនៅក្នុងផ្ទៃនឹងទ្រោមបន្តិចម្តងៗរហូតស្លាប់នៅក្នុងពោះ។

សូមបងប្អូនអញ្ជើញមកពិនិត្យ និងតាមដានផ្ទៃពោះឲ្យបានទៀងទាត់ជាមួយគ្រូពេទ្យផ្នែកសម្ភពនៃមន្ទីរពេទ្យកាល់ម៉ែត ដើម្បីឲ្យការសម្រាលកូនប្រកបទៅដោយសុវត្ថិភាព៕

អត្ថបទ៖ រស្មី

The post សូមស្វែងយល់ស្ត្រីមានផ្ទៃពោះ និងថ្ងៃគ្រប់ខែសម្រាប់សម្រាលកូន appeared first on Kampuchea Thmey Daily.

ស្ដ្រីមានផ្ទៃពោះ Archives - Kampuchea Thmey Daily

តើការពិនិត្យអេកូសាស្ត្រច្រើនដង ប៉ះពាល់ដល់ទារកក្នុងផ្ទៃ និងអ្នកម្តាយដែរ ឬទេ?

ឆ្លុះអេកូវាសំខាន់សម្រាប់កូន និងម្ដាយ តែមានដឹងទេថា ឆ្លុះអេកូហើយត្រូវធ្វើអ្វីខ្លះ?

ការធ្លាក់ឈាមត្រីមាសដំបូងនៃគភ៌ រួមជាមួយផលលំបាក និងការំខាន

ហេតុអ្វីបានជាហើមជើង ក្នុងអំឡុងពេលមានផ្ទៃពោះ!

ការយល់ដឹងអំពី ការប្រើថ្នាំសន្តំ សម្រាប់បំបាត់ការឈឺចាប់ពេលសម្រាលកូន

ស្ត្រីគួរតែយល់ដឹងក្នុងរយៈពេល “មុន និង អំឡុងពេល” មានផ្ទៃពោះ

ស្ដ្រីមានផ្ទៃពោះ និងកុមារអាយុក្រោម២ឆ្នាំក្នុងសង្កាត់ចំនួន​២ទទួលសាច់ប្រាក់រាជរដ្ឋាភិបាល

សូមស្វែងយល់ស្ត្រីមានផ្ទៃពោះ និងថ្ងៃគ្រប់ខែសម្រាប់សម្រាលកូន

ស្ដ្រីមានផ្ទៃពោះ និងកុមារអាយុក្រោម២ឆ្នាំក្នុងសង្កាត់ចំនួន២ទទួលសាច់ប្រាក់រាជរដ្ឋាភិបាល