តើការពិនិត្យអេកូសាស្ត្រច្រើនដង ប៉ះពាល់ដល់ទារកក្នុងផ្ទៃ និងអ្នកម្តាយដែរ ឬទេ?

ការពិនិត្យអេកូផ្ទៃពោះចំពោះស្ត្រីមានផ្ទៃពោះមានសារៈសំខាន់ណាស់ក្នុងការតាមដានការវិវត្តន៍សរីរាង្គ និងដឹងពីបញ្ហាផ្សេងៗរបស់ទារកដែលនៅក្នុងផ្ទៃ។ តើការពិនិត្យអេកូសាស្ត្រច្រើនដង ប៉ះពាល់ដល់ទារកក្នុងផ្ទៃ និងអ្នកម្តាយដែរ ឬទេ?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមទំព័រហ្វេសប៊ុកផ្នែកសម្ភព និងរោគស្ត្រីនៃមន្ទីរពេទ្យព្រះអង្គឌួង បានឱ្យដឹងថា ការពិនិត្យអេកូសាស្ត្រ គឺជាវិធីសាស្ត្រមួយពុំមានផលប៉ះពាល់អ្វីឡើយដល់ទារកក្នុងផ្ទៃ និងអ្នកម្តាយ ទោះបីមានការពិនិត្យច្រើនដងក៏ដោយ។ លើសពីនេះការពិនិត្យអេកូសាស្ត្រ ត្រូវធ្វើយ៉ាងតិចណាស់ឱ្យបាន ៥ដង ទៅតាមអាយុគភ៌ ព្រោះវាមានសារៈសំខាន់ក្នុងតាមដានការវិវត្តន៍របស់ទារកក្នុងផ្ទៃ។ ខាងក្រោមនេះ ជាពេលវេលានៃការពិនិត្យអេកូសាស្ត្រយ៉ាងតិច ៥ដង ដែលអ្នកម្តាយគួរដឹង

ការពិនិត្យលើកទី១៖ ធ្វើឡើងនៅពេលបាត់រដូវ ដើម្បីដឹងថា តើកូនស្ថិតនៅក្នុង ឬនៅក្រៅស្បូន? ហើយទារកកំពុងវិវត្តន៍ ឬឈប់វិវត្តន៍?

លើកទី២ គឺចន្លោះពី (១២សប្តាហ៍ – ១៦សប្តាហ៍)៖ ដើម្បីកំណត់ថ្ងៃបង្កកំណើត និងថ្ងៃគ្រប់ខែ។ វាស់កម្រាស់កញ្ចឹងកកូន (nuchal translucency) និងពិនិត្យរក trisomy 21។ ភាពមិនប្រក្រតីរបស់ទារក (malformation) និងកំណត់ភេទកូន ស្រី ឬ ប្រុស។

លើកទី៣ នៅចន្លោះ (២២សប្តាហ៍ – ២៥សប្តាហ៍)៖​ ជាអំឡុងពេលដែលអេកូសាស្ត្រមើលលម្អិត នូវគ្រប់សរីរាង្គរបស់ទារក ដូចជា ខួរក្បាល (មានទឹកក្នុងខួរក្បាលជាដើម) មុខ មាត់ ភ្នែក ច្រមុះ ត្រចៀក កន្លើត (មាត់ឆែប….) បេះដូង (បេះដូងប្រហោង…) សួត ថ្លើម ក្រលៀន ក្រពះ ពោះវៀន ផ្លោកនោម ឆ្អឹងខ្នង សន្ទះទ្រូង អវយវៈ (លើស ឬខ្វះ)។

លើកទី៤ (៣៣សប្តាហ៍ – ៣៥សប្តាហ៍)៖ ដើម្បីដឹងពី ទម្រង់ និងទម្ងន់កូន ការលូតលាស់ និងសុខភាពទារក ទីតាំងរបស់សុក បរិមាណទឹកភ្លោះ និងបញ្ហាផ្សេងៗទៀតដែលអាចកើតមានចំពោះទារក។

លើកទី៥ (ដល់ថ្ងៃកំណត់សម្រាលហើយ មិនឈឺពោះសម្រាល)៖ គឺដើម្បីតាមដានសុខភាពកូន (ចង្វាក់បេះដូងកូន, ចលនារបស់ទារកជាដើម) និងតាមដានទឹកភ្លោះ (អស់ទឹកភ្លោះ ទឹកភ្លោះតិចពេក រឺច្រើនពេក)៕