លោកឧត្តមសេនីយ៍ទោ ម៉ែន លី ស្នងការនគរបាលខេត្តតាកែវ បានបញ្ជាក់ថា កម្លាំងនគរបាលជំនាញបានធ្វើការស្រាវជ្រាវ និងឃាត់ខ្លួនបុគ្គលដែលបង្ហោះម៉ូតូតាមដងផ្លូវសាធារណៈនេះ តាំងពីថ្ងៃទី១៩ខែឧសភា ម្សិលមិញ ដើម្បីយកមកសាកសួរ និងអនុវត្តនីតិវិធីច្បាប់។ បើតាមការបញ្ជាក់ពីសមត្ថកិច្ច បុគ្គលខាងលើមានឈ្មោះ ឡាយ ឈៀង អាយុ២៧ឆ្នាំ មុខរបរលក់រថយន្ត មានទីលំនៅភូមិឡូរី សង្កាត់រកាក្នុង ក្រុងដូនកែវ ខេត្តតាកែវ។

លោកឧត្តមសេនីយ៍ទោ ម៉ែន លី ស្នងការនគរបាលខេត្តតាកែវ

សមត្ថកិច្ចបានឱ្យដឹងថា ក្រៅពីការបើកបរបង្ហោះម៉ូតូបង្កភាពអនាធិបតេយ្យ និងអាចគ្រោះថ្នាក់ដល់អ្នកប្រើប្រាស់ផ្លូវសាធារណៈ បុគ្គលរូបនេះក៏ត្រូវទទួលខុសត្រូវចំពោះមុខច្បាប់ ពាក់ព័ន្ធនឹងបទល្មើសចរាចរណ៍ជាច្រើនទៀត រួមមាន ៖ការប្រើប្រាស់ម៉ូតូគ្មានពន្ធនាំចូលត្រឹមត្រូវ គ្មានស្លាកលេខ និងគ្មានបណ្ណបើកបរ។

មហាជនជាច្រើនបានសម្តែងការគាំទ្រចំពោះវិធានការរបស់សមត្ថកិច្ច ដោយចាត់ទុកថា ជាការអនុវត្តច្បាប់ស្មើភាព និងជាសារ​ព្រមានដល់ក្រុមអ្នកបើកបរដែលចូលចិត្តបើកបរប្រថុយប្រថាន ឬបង្កសកម្មភាពគ្រោះថ្នាក់តាមដងផ្លូវ ដើម្បីបង្កើតខ្លឹមសារ និងទាក់ទាញការចាប់អារម្មណ៍លើបណ្ដាញសង្គម។

សមត្ថកិច្ច​លើកឡើងថា សកម្មភាព “បង្ហោះម៉ូតូ” មិនត្រឹមតែជាការរំលោភច្បាប់ចរាចរណ៍ប៉ុណ្ណោះទេ ប៉ុន្តែថែមទាំងអាចបង្កគ្រោះថ្នាក់ធ្ងន់ធ្ងរដល់អ្នកបើកបរ និងអ្នកដទៃនៅលើដងផ្លូវ។ ក្នុងករណីបាត់បង់ការគ្រប់គ្រង អាចនាំឱ្យកើតមានគ្រោះថ្នាក់ដល់អាយុជីវិត និងទ្រព្យសម្បត្តិជាសាធារណៈផងដែរ។ តាមច្បាប់ចរាចរណ៍ផ្លូវគោក ការបើកបរដោយគ្មានបណ្ណបើកបរ ការប្រើប្រាស់យានយន្តគ្មានស្លាកលេខ ឬគ្មានឯកសារត្រឹមត្រូវ និងការបើកបរបង្កគ្រោះថ្នាក់ ឬអនាធិបតេយ្យតាមផ្លូវសាធារណៈ អាចប្រឈមនឹងការផាកពិន័យ ការដកហូតយានយន្ត និងការចាត់វិធានការតាមផ្លូវច្បាប់ធ្ងន់ធ្ងរ អាស្រ័យលើស្ថានភាពជាក់ស្តែង។

ស្នងការដ្ឋាននគរបាលខេត្តតាកែវ ក៏បានអំពាវនាវដល់ប្រជាពលរដ្ឋ ជាពិសេសក្រុមយុវជន និងអ្នកប្រើប្រាស់ម៉ូតូធំទាំងអស់ សូមចូលរួមគោរពច្បាប់ចរាចរណ៍ បើកបរដោយការទទួលខុសត្រូវ និងចៀសវាងសកម្មភាពប្រថុយប្រថានដែលអាចបង្កគ្រោះថ្នាក់ដល់សង្គមនិងអ្នកដទៃ៕  អត្ថបទ៖ វីរៈ

The post បង្ហោះម៉ូតូធំផ្អើលពេញបណ្ដាញសង្គម នគរបាលខេត្តតាកែវឃាត់ម្ចាស់ម៉ូតូយកមកអនុវត្តច្បាប់យ៉ាងម៉ឺងម៉ាត់ appeared first on Kampuchea Thmey Daily.

ការណែនាំឲ្យរៀបចំកម្លាំងអន្តរាគមន៍ពិសេសនេះ គឺសំដៅបង្កើនប្រសិទ្ធភាពក្នុងការទប់ស្កាត់ និងបង្ក្រាបបទល្មើសគ្រប់ប្រភេទ ជាពិសេសបទល្មើសលួច ឆក់ ប្លន់ បង្ហាក្មេងទំនើង ការប្រើប្រាស់ និងជួញដូរគ្រឿងញៀន ព្រមទាំងសកម្មភាពផ្សេងៗដែលអាចបង្កអសន្តិសុខ និងប៉ះពាល់ដល់សុខសុវត្ថិភាពប្រជាពលរដ្ឋ។ កម្លាំងទាំងនេះ នឹងធ្វើការល្បាតទាំងយប់ទាំងថ្ងៃ តាមទីប្រជុំជន ផ្សារ សាលារៀន តំបន់កម្សាន្ត និងគោលដៅដែលប្រជាពលរដ្ឋរស់នៅច្រើន ដើម្បីធានាបាននូវភាពកក់ក្តៅ និងទំនុកចិត្តពីសំណាក់ប្រជាពលរដ្ឋ។

លោកស្នងការខេត្តតាកែវ ក៏បានណែនាំដល់អធិការនគរបាលស្រុក-ក្រុងទាំងអស់ ត្រូវយកចិត្តទុកដាក់ខ្ពស់លើការអនុវត្តតួនាទីភារកិច្ចរបស់ខ្លួន ដោយត្រូវមានវត្តមានប្រចាំការជាប្រចាំ ត្រៀមអន្តរាគមន៍បានទាន់ពេលវេលា នៅពេលមានហេតុការណ៍ផ្សេងៗកើតឡើង និងត្រូវពង្រឹងកិច្ចសហការជាមួយអាជ្ញាធរមូលដ្ឋាន កងកម្លាំងពាក់ព័ន្ធ និងប្រជាការពារ ដើម្បីរួមគ្នាថែរក្សាសន្តិសុខ សណ្ដាប់ធ្នាប់ និងរបៀបរៀបរយសង្គមឱ្យកាន់តែល្អប្រសើរ។

ការដាក់ចេញវិធានការនេះ បានបង្ហាញពីការយកចិត្តទុកដាក់ខ្ពស់របស់ថ្នាក់ដឹកនាំនគរបាលជាតិ ក៏ដូចជាស្នងការដ្ឋាននគរបាលខេត្តតាកែវ ក្នុងការអនុវត្តគោលនយោបាយ “ភូមិ-ឃុំ-សង្កាត់ មានសុវត្ថិភាព” ស្របតាមការណែនាំរបស់រាជរដ្ឋាភិបាលកម្ពុជា ដើម្បីធានាឱ្យប្រជាពលរដ្ឋរស់នៅប្រកបដោយភាពសុខដុមរមនា សុវត្ថិភាព និងមានភាពកក់ក្តៅក្នុងមូលដ្ឋានរបស់ខ្លួន៕

អត្ថបទ៖ វីរៈ

The post ស្នងការខេត្តតាកែវ បង្កើតកម្លាំងអន្តរាគមន៍ពិសេសតាមស្រុក-ក្រុង ដើម្បីពង្រឹងសន្តិសុខ និងរក្សាសណ្តាប់ធ្នាប់សាធារណៈ appeared first on Kampuchea Thmey Daily.

លោកអភិបាលខេត្តតាកែវបានថ្លែងបន្តថា កន្លងមកមានការរិះគន់ពីសំណាក់ប្រជាពលរដ្ឋចំពោះអាជ្ញាធរថាបានបណ្ដែតបណ្ដោយឲ្យមានការដឹកទំនិញសំពីងសំពោងតាមរថយន្តកែច្នៃខុសបច្ចេកទេសដែលមានទ្រុងខ្ពស់ៗយកទៅដឹកទំនិញ និងដែលនាំឲ្យកើតមានគ្រោះថ្នាក់ចរាចរណ៍ថែមទៀតផង។

លោក វ៉ី សំណាង បានសង្កត់ធ្ងន់ថា បើសមត្ថកិច្ចទប់ស្កាត់ការដឹកទំនិញសំពីងសំពោងមិនបានទេ វានឹងក្លាយទៅជាបញ្ហាអនាធិបតេយ្យ ហើយអ្នកដែលត្រូវប្រជាពលរដ្ឋរិះគន់មុនគេ គឺចៅហ្វាយខេត្ត ដូច្នោះត្រូវយកច្បាប់មកអនុវត្តដោយគ្មានមនោសញ្ចេតនាព្រោះមនោសញ្ចេតនា និងច្បាប់គឺខុសគ្នា។

ឆ្លើយតបទៅនឹងការលើកឡើងរបស់លោក វ៉ី សំណាង អភិបាលខេត្ត លោកឧត្តមសេនីយ៍ទោ ម៉ែន លី ស្នងការ​នគបាលខេត្តតាកែវបានសន្យាថានឹងទប់ស្កាត់ឲ្យអស់ចំពោះរថយន្តដឹកទំនិញសំពីងសំពោងចាប់ពីថ្ងៃនេះតទៅ ហើយប្រសិនបើលោកធ្វើមិនបានទេ លោកសន្យាថានឹងចុះចេញពីតំណែងជាស្នងការនគបាលខេត្តតាកែវ។

គួរបញ្ជាក់ថា កន្លងមកប្រជាពលរដ្ឋក្នុងខេត្តតាកែវតែងតែនាំគ្នារិះគន់រឿងរថយន្តកែច្នៃខុសបច្ចេកទេសដឹកទំនិញសំពីងសំពោងចេញពីច្រកទ្វាអន្តរជាតិភ្នំដិនមកកាន់ទីរួមខេត្តតាកែវ និងបន្តទៅរាជធានីភ្នំពេញយ៉ាងរលូន ដោយគ្មានសមត្ថកិច្ចណាធ្វើការទប់ស្កាត់នោះទេ។ គេមិនដឹងថា ហេតុអ្វីបានជាសមត្ថកិច្ចចរាចរណ៍មិនទប់ស្កាត់ឬក៏មើលមិនឃើញរថយន្តទាំងអស់នេះដឹកយ៉ាងសំពីងសំពោង?..៕

អត្ថបទ៖ វីរ:

The post ស្នងការខេត្តតាកែវសន្យាថានឹងចុះចេញពីតំណែង បើទប់ស្កាត់រថយន្ដដឹកទំនិញសំពីងសំពោងមិនបាន​តាមការណែនាំរបស់អភិបាលខេត្ត appeared first on Kampuchea Thmey Daily.

តាមក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តតាកែវ​ បានឲ្យដឹងថា សកម្មភាពក្រុមក្មេងទំនើងជិះម៉ូតូប្រដេញវាយគ្នានេះ គឺបានកើតឡើងនៅលើផ្លូវជាតិលេខ៣ ម្តុំផ្សារអង្គតាសោម ក្នុងស្រុកត្រាំកក់ វេលាម៉ោង១៥និង៤៥នាទី នៅថ្ងៃទី២៨ ខែឧសភា ឆ្នាំ២០២៤។

ជាមួយនឹងការបញ្ជាកម្លាំងជំនាញចុះស្រាវជ្រាវ ស្នងការខេត្តតាកែវ ក៏អំពាវនាវឲ្យប្រជាពលរដ្ឋដែលនៅតាមដងផ្លូវបានស្គាល់ ឬឃើញភិនភាគមុខសញ្ញាខាងលើសូមរាយការណ៍មកសមត្ថកិច្ច ដើម្បីចុះបង្ក្រាប និងឃាត់ខ្លួនជាបន្ទាន់៕

អត្ថបទ៖ សុខុម

The post ស្នងការខេត្តតាកែវ កំពុងស្រាវជ្រាវករណីក្រុមក្មេងទំនើងជិះម៉ូតូដេញវាយគ្នានៅម្ដុំផ្សារអង្គតាសោម(មានវីដេអូ) appeared first on Kampuchea Thmey Daily.

យោងតាមសេចក្ដីប្រកាសរបស់ក្រុមការងារតាមដានព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តតាកែវ បានឲ្យដឹងថា ករណីគប់កញ្ចក់រថយន្ដបានកើតឡើងនៅវេលាម៉ោង១៩និង៥០នាទី យប់ថ្ងៃ០១ ខែកញ្ញា ឆ្នាំ២០២៣ លើបណ្តោយផ្លូវជាតិលេខ៣ ស្ថិតក្នុងភូមិសាស្ត្រភូមិព្រៃញឹក ឃុំខ្វាវ ស្រុកសំរោង ខេត្តតាកែវ បង្កឡើងដោយជនល្មើសមិនស្គាល់អត្តសញ្ញាណមានគ្នា៤នាក់ ម៉ូតូ២គ្រឿង បើកបរ​មកពីទិសខាងជើងមកត្បូង បានធ្វើសកម្មភាពគប់ដុំថ្មទៅលើរថយន្តជនរងគ្រោះម៉ាកហីយ៉ាន់ដាយ ពណ៌ខៀវ ពាក់ផ្លាកលេខភ្នំពេញ3B-9147 បើកបរមកពីទិសខាងត្បូងទៅជើង បបណ្តាលឱ្យត្រូវត្រង់កញ្ចក់មុខបណ្ដាលឲ្យអ្នកបើកបររថយន្ដឈ្មោះ សុខ ពៅ ភេទប្រុស អាយុ៣៧ឆ្នាំ រងរបួសបែកចិញ្ចើមខាងឆ្វេង។

ក្រុមការងារតាមដានព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តតាកែវបញ្ជាក់ថា នៅព្រឹកថ្ងៃទី០២ ខែកញ្ញា ឆ្នាំ២០២៣ នេះ លោកឧត្តមសេនីយ៍ទោ ឈាង ផាន់ណារ៉ា ស្នងការនៃស្នងការដ្ឋាននគរបាលខេត្តតាកែវ បានបញ្ជាកម្លាំងការិយាល័យជំនាញ នៃស្នងការដ្ឋាននគរបាលខេត្ត ចុះសហការជាមួយកម្លាំងអធិការដ្ឋាននគរបាលស្រុកសំរោង ស្រុកត្រាំកក់ ស្រុកបាទី និងកម្លាំងប៉ុស្តិ៍នគរបាលពាក់ព័ន្ធរតាមបណ្តោយផ្លូវជាតិលេខ៣ ដើម្បីប្រមូលព័ត៌មាន ស្វែងរកជនបង្កដើម្បីយកមកផ្តន្ទាទោសតាមផ្លូវច្បាប់។

ប្រភពដដែលបានបព្ជាក់ថា បន្ទាប់ពីទទួលបានព័ត៌មាន កម្លាំងជំនាញអធិការដ្ឋាននគរបាលស្រុកសំរោង រួមជាមួយកម្លាំងប៉ុស្តិ៍រដ្ឋបាលខ្វាវ បានចុះដល់កន្លែងកើតហេតុភ្លាមៗ ដើម្បីប្រមូលព័ត៌មាន និងបានសហការជាមួយបណ្តាប៉ុស្តិ៍រដ្ឋបាលពាក់ព័ន្ធទាំងខេត្តកំពង់ស្ពឺ និងតាកែវ នៅតាមបណ្តោយផ្លូវជាតិលេខ៣ តែដោយសារទីតាំងកើតហេតុពុំមានកាមេរ៉ាសុវត្ថិភាព ទើបមិនអាចទាន់កំណត់មុខសញ្ញាណជនបង្កបាន។

សូមបញ្ជាក់ថា កាលពីយប់ថ្ងៃទី១ ខែកញ្ញា ឆ្នាំ២០២៣ មានគណនីហ្វេសប៊ុកមួយឈ្មោះ ហ៊ាសុង កំពង់ចាម បានបង្ហោះ​ចែកចាយនៅលើបណ្ដាញសង្គមពីករណីជនសង្ស័យគប់កញ្ចក់រថយន្ដដោយភ្ជាប់ជាមួយរូបភាពរបួសឈាមពេញផ្ទៃមុខ។

ម្ចាស់គណនីហ្វេសប៊ុកបានសរសេរថា «សូមបងប្អូនជួយស៊ែរម្នាក់មួយផងឲ្យបងប្អូនតៃកុងឡានទាំងអសើគ្នាបានដឹង នៅវេលាម៉ោង៧និង០០នាទី ថ្ងៃទី១ ខែ៩ ឆ្នាំ២០២៣ មានករណីក្មេងទំនើងគប់កញ្ចក់ឡានផ្លូវជាតិលេខ៣ នៅចំណុចគីឡូម៉ែត្រ៥៣ ផ្សារត្រាំខ្នា សូមបងប្អូនប្រុងប្រយ័ត្នទាំងអស់គ្នា»៕

អត្ថបទ៖​ សុខុម

The post ស្នងការខេត្តតាកែវបញ្ជាឲ្យអធិការស្រុកចំនួន​៣​ចុះស្រាវជ្រាវករណីគប់កញ្ចក់រថយន្ដនៅផ្លូវជាតិ​លេខ៣ appeared first on Kampuchea Thmey Daily.

ក្នុងឳកាសចុះណែនាំ អប់រំ និងផ្សព្វផ្សាយអំពីច្បាប់ និងហានិភ័យនៃគ្រោះថ្នាក់អគ្គិភ័យនេះ កម្លាំងជំនាញបានណែនាំដល់ម្ចាស់ទីតាំង និងតូបដែលមានហានិភ័យខ្ពស់ ដូចជាតូបអ៊ុតសក់ តូបលក់គ្រឿងបរិភោគ ទីតាំងប្រើប្រាស់ហ្គាស ព្រមទាំង បង្ហាត់បង្រៀនបន្ថែម ពីវិធីប្រើប្រាស់បំពង់ពន្លត់អគ្គិភ័យ និងវិធានពន្លត់បឋម។

ជាមួយគ្នានេះ កម្លាំងជំនាញក៏បានផ្សព្វផ្សាយនូវលេខទូរស័ព្ទប្រចាំបញ្ជារបស់ស្នងការដ្ឋាននគរបាលខេត្តជូនអាជីវករលក់ដូរ ដើម្បីងាយស្រួលទំនាក់ទំនងពេលមានករណីអគ្គិភ័យជាយថាហេតុ៕

អត្ថបទ៖ សុខុម

The post ស្នងការខេត្តតាកែវ ចុះផ្សព្វផ្សាយពីវិធីប្រើប្រាស់បំពង់ពន្លត់អគ្គិភ័យ និងវិធានពន្លត់បឋមដល់អាជីវករលក់ដូរ នៅផ្សារធំតាកែវ appeared first on Kampuchea Thmey Daily.

របាយការណ៍សមត្ដកិច្ចបានឲ្យដឹងថា ជនទាំង៤នាក់ដែលឃាត់ខ្លួនមានឈ្មោះ ១-ឈ្មោះ ហេង សុភក្ដិ ហៅ ហ្គែត ភេទប្រុសអាយុ១៧ឆ្នាំ រស់នៅភូមិត្រពាំងត្របែក ឃុំអង្គតាសោម និងដកហូតម៉ូតូម៉ាកនិចពណ៌សខៀវស៊េរី ឆ្នាំ២០២១ពាក់ផ្លាកលេខតាកែវ1.Z7296។ ទី២-ឈ្មោះ ជុំ ចាន់ភារក្ស ភេទប្រុស អាយុ១៧ឆ្នាំ រស់នៅភូមិព្រៃរំដេង ឃុំអង្គតាសោម ដកហូតវត្ថុតាងម៉ូតូម៉ាកនិចពណ៌សខៀវស៊េរីឆ្នាំ២០២៣ពាក់ផ្លាកលេខតាកែវ1.A B5578 ។ ទី៣-ឈ្មោះអ៊ុន យូ ភេទប្រុស អាយុ១៧ឆ្នាំ រស់នៅភូមិអង្គតាសោម ឃុំអង្គតាសោម។ ទី៤-ឈ្មោះ រី យ៉ានុត ភេទប្រុស អាយុ១៧ឆ្នាំ រស់នៅភូមិអង្គតាសោម ឃុំអង្គតាសោម និងបក្ខពួកម្នាក់ទៀតឈ្មោះ លី ស៊ីអាន់ ភេទប្រុសអាយុ១៨ឆ្នាំ រស់នៅភូមិអង្គតាសោម ឃុំអង្គតាសោម ដែលជាម្ចាស់ម៉ូតូម៉ាក អ៊ិចស៊ិនទរ័ បានរត់គេចខ្លួនបាត់។

តាមចម្លើយសារភាពជនសង្ស័យឆ្លើយថា នៅថ្ងៃកើតហេតុ ពួកខ្លួនទាំង៥នាក់ ពិតជាបានធ្វើសកម្មភាពជិះម៉ូតូយកដុំថ្មគប់ទៅលើគូជម្លោះរបស់ខ្លួនដែលជិះម៉ូតូតាមផ្លូវជាតិលេខ៣ បណ្ដាលឲ្យត្រូវរថយន្តម៉ាកហ្វតរ៉ាប់ទរ័ ប្រាកដមែន។

បច្ចុប្បន្នជនសង្ស័យ និងវត្ថុតាង កម្លាំងជំនាញកំពុងកសាងសំណុំរឿងទៅតាមនីតិវិធី និងបន្តស្វែងរកចាប់ខ្លួនបក្ខពួកដែលរត់គេចខ្លួនយកមកផ្តន្ទាទោសតាមច្បាប់។

គួររំលឹកថា កាលពីថ្ងៃទី២៣ ខែមករា ឆ្នាំ២០២៣ វេលាម៉ោង១៦និង១៥នាទី នៅចំណុចលើផ្លូវជាតិលេខ៣ ចន្លោះគីឡូម៉ែត្រ៧៨-៧៩ស្ថិតក្នុងភូមិត្រពាំងខ្នារ ឃុំអង្គតាសោម ស្រុកត្រាំកក់ ខេត្តតាកែវ ក្រុមជនសង្ស័យបានធ្វើសកម្មភាពគប់ទៅលើកញ្ចក់រថយន្តម៉ាក Ford ពណ៌ស ពាក់ផ្លាកលេខ កម្ពុជា EaLux68 ដែលជាកម្មសិទ្ធិរបស់ឈ្មោះ អ៊ា អេលុច ភេទប្រុសអាយុ៤២ឆ្នាំ មានទីលំនៅសង្កាត់បឹងសាឡាង ខណ្ឌទួលគោក រាជធានីភ្នំពេញ ដែលធ្វើដំណើរតាមផ្លូវជាតិលេខ៣ពីខេត្តកំពត ទៅរាជនានីភ្នំពេញ បណ្ដាលឲ្យបែកកញ្ចក់ធ្លាយចូលទៅក្នុងរថយន្តត្រូវឈ្មោះ អ៊ា អេលុច រងរបួសធ្ងន់ រួចជនសង្ស័យក៏បើកម៉ូតូគេចខ្លួនបាត់។ ជនរគ្រោះរងរបួសផ្នែកផ្ទៃមុខធ្ងន់ធ្ងររហូតបញ្ជូនទៅសង្ក្រោះនៅក្រៅប្រទេស៕

អត្ថបទ៖ សុខុម

The post ចាប់ខ្លួនបានហើយក្រុមគប់កញ្ចក់រថយន្ដនៅផ្លូវជាតិលេខ៣ បណ្ដាលឲ្យរងរបួសធ្ងន់ម្នាក់កាល​ពី​ខែមករាកន្លងទៅ appeared first on Kampuchea Thmey Daily.

បើតាមក្រុមការងារតាមដានព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តតាកែវ បានឲ្យដឹងថា បន្ទាប់ពីបានឃើញនូវព័ត៌មាននេះ លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ បានបញ្ជាកម្លាំងអធិការដ្ឋាននគរបាលស្រុកត្រាំកក់ ចុះធ្វើការស្រាវជ្រាវបន្ទាន់ដោយបានសុំធ្វើការបំភ្លឺផ្ទាល់ពីជនរងគ្រោះបានឱ្យដឹងថា ករណីនេះបានកើតឡើងនៅថ្ងៃទី១៦ ខែកុម្ភៈ ឆ្នាំ២០២៣ វេលាម៉ោង ១៧និង១០នាទី តាមបណ្ដោយផ្លូវលេខ១៣២ ចន្លោះគីឡូម៉ែត្រលេខ១១-១២ ស្ថិតក្នុងភូមិអង្គត្រា ឃុំ ត្រពាំងធំខាងជើង ស្រុកត្រាំកក់ ខេត្តតាកែវ មានជនរងគ្រោះឈ្មោះ ថេត ដាវី ភេទស្រី អាយុ១៧ឆ្នាំ មុខរបរ សិស្ស រស់នៅភូមិប្រកៀប ឃុំត្រពាំងធំខាងត្បូង ស្រុកត្រាំកក់ ខេត្តតាកែវ (ត្រូវជាបងប្អូនជីដូនមួយជាមួយម្ចាស់គណនី ឃុនលួងឆៃ) បានជិះមួយគ្រឿងម៉ាកហុងដា វ៉េវ ពណ៌ខ្មៅ ពាក់ផ្លាកលេខ តាកែវ 1AC 9343 ចេញពីសាលារៀនភាសាចិន នៅក្នុងវត្តមង្គលមានល័ក្ខណ៍ ហៅ វត្តត្រពាំងគល់ លុះមកដល់ចំណុច​កើតហេតុ រៀបនឹងបត់ឆ្លងផ្លូវទៅខាងស្តាំ ក៏មានម៉ូតូម៉ាកហុងដាឌ្រីម សេ១២៥ ពណ៌ខ្មៅ មិនច្បាស់ផ្លាកលេខ ចំនួន០៣គ្រឿង (ម៉ូតូមួយជិះគ្នា២នាក់) ជិះស្របទិសពីកើតទៅលិច បានបើកភ្លើងញ៉ាក់ដាក់ ពេលនោះម៉ូតូមួយគ្រឿងបើកបរយ៉ាងលឿន តែមិនបានបុកទេ ដោយភាគីម្ខាង​ទៀត​យកជើងធាក់ម៉ូតូជនរងគ្រោះដែលឈប់នោះ ទើបបណ្ដាលឱ្យម៉ូតូជនរងគ្រោះដួលរងរបួស ចំណែកម៉ូតូភាគីម្ខាងទៀតមិនបានដួលក៏ជិះហួសគេចខ្លួនទៅទិសខាងលិចបាត់ទៅ។

តាមរយៈការសាកសួរផ្ទាល់ជនរងគ្រោះ និងភូមិសាស្ត្រកន្លែងកើតហេតុ កម្លាំងជំនាញសន្និដ្ឋានករណីខាងលើមិនមែនជាករណីធាក់ផ្តួលប៉ុនប៉ងប្លន់ម៉ូតូនោះទេ គឺជាករណីគ្រោះថ្នាក់ចរចរណ៍ ដោយម៉ូតូទាំងសងខាងជិះបញ្ច្រាស់ផ្លូវ ម្យ៉ាងវិញទៀតម៉ូតូជនរងគ្រោះបានឈប់ហ្នឹងមួយកន្លែងទៅហើយដើម្បីបម្រុងនឹងបត់ គ្មានហេតុផលណាក្រុមជនល្មើសចាំបាច់ជិះលឿនធាក់ផ្តួលនោះទេ ណាមួយកន្លែងពេលកើតហេតុក៏មានអ្នកដំណើរច្រើនឆ្លងកាត់ផងដែរ។

សូមបញ្ជាក់ថា កាលពីថ្ងៃទី១៧ ខែកុម្ភៈ ឆ្នាំ២០២៣ នៅលើបណ្ដាញសង្គមហ្វេសប៊ុករបស់គណនីឈ្មោះ ឃុន លួងឆៃ បានបង្ហោះចែកចាយរៀបរាប់ថា ករណីធាក់យកម៉ូតូមិនបានសម្រេច ធ្លាប់តែឃើញព័ត៌មានឥឡូវធ្លាក់លើគ្រួសារខ្ញុំផ្ទាល់ក្មេងស្រីកំពុងពេញស្រលាញ់រូប ស្រលាញ់រាងឥឡូវមុខខ្ទេច។ ករណីនេះបង្កឡើងដោយជនសង្ស័យជិះ ម៉ូតូ ០៣គ្រឿង មានគ្នា ០៦នាក់ រវាងផ្លូវបញ្ច្រាសទិសនៅចន្លោះម៉ោង ០៥-០៦ល្ងាច ស្ថិតត្រង់ចំណុចផ្លូវខាង កើតវត្តមង្គលមានល័ក្ខណ៍(វត្តត្រពាំងគល់) ឃុំត្រពាំងធំខាងជើង ស្រុកត្រាំកក់ ខេត្តតាកែវ តាកែវទៀត ហើយបងប្អូនប្រយ័ត្នប្រយែងផង ខ្ញុំសុំស្នើដល់បងបងប៉ូលីសជួយអន្តរាគមន៍ផង អរគុណសន្តិភាព៕

អត្ថបទ៖ សុខុម

The post ស្នងការខេត្តតាកែវ បំភ្លឺ ក្រោយមានគណនីហ្វេស​ប៊ុកមួយបង្ហោះថា មានជនសង្ស័យធាក់ប្លន់ម៉ូតូ​តែមិនបានសម្រេច appeared first on Kampuchea Thmey Daily.