ស្នងការខេត្តតាកែវ កំពុងស្រាវជ្រាវករណីក្រុមក្មេងទំនើងជិះម៉ូតូដេញវាយគ្នានៅម្ដុំផ្សារអង្គតាសោម(មានវីដេអូ)

លោកឧត្តមសេនីយ៍ទោ ឈាង ផាន់ណារ៉ា ស្នងការនៃស្នងការដ្ឋាននគរបាលខេត្តតាកែវ បានបញ្ជាឲ្យកម្លាំងជំនាញ ចុះសហការជាមួយកម្លាំងជំនាញនៃអធិការដ្ឋាននគរបាលស្រុកត្រាំកក់ ដើម្បីធ្វើការស្រាវជ្រាវរកក្រុមក្មេងទំនើងដែលបង្កការអុកឡុកជិះម៉ូតូដេញវាយគ្នានៅម្ដុំផ្សារអង្គតាសោមដើម្បីយកមកអនុវត្តច្បាប់។ ការចេញបញ្ជានេះបានធ្វើឡើងបន្ទាប់ពីមានការចែករំលែកនូវឃ្លីបវីដេអូនៅលើបណ្ដាញសង្គមពីសកម្មភាពក្មេងទំនើងពីរក្រុមជិះម៉ូតូប្រដេញវាយគ្នាប្រដាប់ដោយដាវ និងពូថៅយ៉ាងអនាធិបតេយ្យនៅលើដងផ្លូវសាធារណៈ។

តាមក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តតាកែវ​ បានឲ្យដឹងថា សកម្មភាពក្រុមក្មេងទំនើងជិះម៉ូតូប្រដេញវាយគ្នានេះ គឺបានកើតឡើងនៅលើផ្លូវជាតិលេខ៣ ម្តុំផ្សារអង្គតាសោម ក្នុងស្រុកត្រាំកក់ វេលាម៉ោង១៥និង៤៥នាទី នៅថ្ងៃទី២៨ ខែឧសភា ឆ្នាំ២០២៤។

ជាមួយនឹងការបញ្ជាកម្លាំងជំនាញចុះស្រាវជ្រាវ ស្នងការខេត្តតាកែវ ក៏អំពាវនាវឲ្យប្រជាពលរដ្ឋដែលនៅតាមដងផ្លូវបានស្គាល់ ឬឃើញភិនភាគមុខសញ្ញាខាងលើសូមរាយការណ៍មកសមត្ថកិច្ច ដើម្បីចុះបង្ក្រាប និងឃាត់ខ្លួនជាបន្ទាន់៕

អត្ថបទ៖ សុខុម