ដើម្បីយល់ដឹងពីការវិធានការពន្លត់អគ្គិភ័យបឋម កម្លាំងជំនាញការិយាល័យបង្ការពន្លត់អគ្គិភ័យ នៃស្នងការដ្ឋាននគរបាលខេត្តតាកែវ នៅរសៀលថ្ងៃទី២១ ខែមីនា ឆ្នាំ២០២៣ បានចុះណែនាំ អប់រំ និងផ្សព្វផ្សាយអំពីច្បាប់ និងហានិភ័យនៃគ្រោះថ្នាក់អគ្គិភ័យ ដល់អាជីករលក់ដូរនៅក្នុងផ្សារធំតាកែវ ទីរួមខេត្តតាកែវ។

ក្នុងឳកាសចុះណែនាំ អប់រំ និងផ្សព្វផ្សាយអំពីច្បាប់ និងហានិភ័យនៃគ្រោះថ្នាក់អគ្គិភ័យនេះ កម្លាំងជំនាញបានណែនាំដល់ម្ចាស់ទីតាំង និងតូបដែលមានហានិភ័យខ្ពស់ ដូចជាតូបអ៊ុតសក់ តូបលក់គ្រឿងបរិភោគ ទីតាំងប្រើប្រាស់ហ្គាស ព្រមទាំង បង្ហាត់បង្រៀនបន្ថែម ពីវិធីប្រើប្រាស់បំពង់ពន្លត់អគ្គិភ័យ និងវិធានពន្លត់បឋម។

ជាមួយគ្នានេះ កម្លាំងជំនាញក៏បានផ្សព្វផ្សាយនូវលេខទូរស័ព្ទប្រចាំបញ្ជារបស់ស្នងការដ្ឋាននគរបាលខេត្តជូនអាជីវករលក់ដូរ ដើម្បីងាយស្រួលទំនាក់ទំនងពេលមានករណីអគ្គិភ័យជាយថាហេតុ៕

អត្ថបទ៖ សុខុម