ស្ពានអាកាស Archives - Kampuchea Thmey Daily

អាជ្ញាធរសង្កាត់ស្ទឹងមានជ័យទី ១ ជួសជុលភ្លើងបំភ្លឺផ្លូវ ក្រោមស្ពានអាកាសស្ទឹងមានជ័យឡើងវិញ

អ៊ិន ពិសី — Thu, 16 Oct 2025 04:30:59 +0000

ដើម្បីសម្រួលដល់ការធ្វើដំណើររបស់ប្រជាពលរដ្ឋនាពេលយប់ អាជ្ញាធរសង្កាត់ស្ទឹងមានជ័យទី ១ បានធ្វើការជួសជុលភ្លើងបំភ្លឺផ្លូវក្រោមស្ពានអាកាសស្ទឹងមានជ័យឡើងវិញ ខណៈកន្លងមកពិបាកធ្វើដំណើរដោយសារស្ថានភាពងងឹតខ្លាំង។

ទីតាំងដែលអាជ្ញាធរបានធ្វើការជួសជុលភ្លើងឡើងវិញនេះ ស្ថិតនៅចំណុចក្រោមស្ពានអាកាសស្ទឹងមានជ័យ សង្កាត់ស្ទឹងមានជ័យទី ១ ខណ្ឌមានជ័យ រាជធានីភ្នំពេញ។

លោក តាំង គីម ជាប្រជាពលរដ្ឋ បានឲ្យដឹងថា នៅត្រង់ចំណុចក្រោមស្ពានអាកាសស្ទឹងមានជ័យ នេះ តែងតែមានអ្នកដំណើរគ្រោះថ្នាក់ ដោយសារតែងងឹតមើលមិនឃើញឧបសគ្គខាងមុខ ហើយផ្លូវកោងទៀតផង។

លោក តាំង គីម បន្តថា នៅពេលឃើញមានអាជ្ញាធរមូលដ្ឋានយកចិត្តទុកដាក់ក្នុងការជួសជុលភ្លើងបំភ្លឺផ្លូវនេះឡើងវិញ លោកសប្បាយចិត្តណាស់ ដើម្បីបញ្ចៀសគ្រោះថ្នាក់ដល់អ្នកធ្វើដំណើរ ជាពិសេសនៅពេលយប់តែម្ដង។

លោក ជា សារ៉េត ចៅសង្កាត់ស្ទឹងមានជ័យ បានបញ្ជាក់ឲ្យកម្ពុជាថ្មីដឹងថា ទីតាំងខាងលើនេះ កន្លងមកមានភ្លើងបំភ្លឺហើយ ប៉ុន្តែដោយសារដាច់ប្រព័ន្ធភ្លើង ទើបធ្វើឲ្យងងឹត ដូច្នេះ ដើម្បីសម្រួលដល់ការធ្វើដំណើរ លោកបានចាត់ក្រុមការងារចុះពិនិត្យជួសជុលឡើងវិញ៕

អត្ថបទ ៖ ម៉េង

The post អាជ្ញាធរសង្កាត់ស្ទឹងមានជ័យទី ១ ជួសជុលភ្លើងបំភ្លឺផ្លូវ ក្រោមស្ពានអាកាសស្ទឹងមានជ័យឡើងវិញ appeared first on Kampuchea Thmey Daily.

ស្ពានអាកាស សម្តេចធិបតី ហ៊ុន ម៉ាណែត នឹងដាក់ឱ្យប្រើប្រាស់ជាបណ្ដោះអាសន្ន ចាប់ពីថ្ងៃទី ១១ កក្កដា ស្អែកនេះហើយ

អ៊ិន ពិសី — Thu, 10 Jul 2025 09:02:01 +0000

ស្ពានអាកាស សម្តេចធិបតី ហ៊ុន ម៉ាណែត ត្រង់ចំណុចប្រសព្វរវាងមហាវិថី សម្តេចតេជោ ហ៊ុន សែន និងផ្លូវជាតិលេខ ២ ស្ថិតនៅព្រំប្រទល់រាជធានីភ្នំពេញ និងខេត្តកណ្តាល នឹងដាក់ឱ្យប្រើប្រាស់ជាបណ្ដោះអាសន្ន ចាប់ពីថ្ងៃទី ១១ ខែកក្កដា ឆ្នាំ ២០២៥ ស្អែកនេះតទៅហើយ។

តាមសេចក្ដីជូនដំណឹងរបស់រដ្ឋបាលរាជធានីភ្នំពេញ បានឱ្យដឹងថា ដោយយោងតាមអនុសាសន៍ដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាថ្ងៃទី ១០ ខែកក្កដា ឆ្នាំ ២០២៥ នេះ រដ្ឋបាលរាជធានីភ្នំពេញ មានកិត្តិយសសូមជម្រាបជូនដំណឹងដល់សាធារណជនទាំងអស់ ឱ្យបានជ្រាបថា ស្ពានអាកាស សម្តេចធិបតី ហ៊ុន ម៉ាណែត ត្រង់ចំណុចប្រសព្វរវាងមហាវិថី សម្តេចតេជោ ហ៊ុន សែន និងផ្លូវជាតិលេខ ២ ស្ថិតនៅព្រំប្រទល់រាជធានីភ្នំពេញ និងខេត្តកណ្តាល ត្រូវបានស្ថាបនាជាស្ពានភ្លោះទ្វេទិស និងត្រូវបានបើកការដ្ឋានសាងសង់ កាលពីថ្ងៃទី ១៧ ខែមិថុនា ឆ្នាំ ២០២៤ ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដោយមានក្រុមហ៊ុន OCIC ជាអ្នកទទួលការសាងសង់។

បច្ចុប្បន្ន ការសាងសង់ស្ពានអាកាស សម្តេចធិបតី ហ៊ុន ម៉ាណែត សម្រេចបានលទ្ធផលដូចតទៅ ៖ ស្ពានអាកាសទី ១ សម្រេចបានការសាងសង់ ១០០% ហើយស្ពានអាកាសទី ២ គ្រោងនឹងបញ្ចប់ការសាងសង់ នាដើមខែសីហា ឆ្នាំ ២០២៥។ ចំពោះមុខ ដើម្បីជួយសម្រួលដល់លំហូរចរាចរ និងការធ្វើដំណើររបស់ប្រជាពលរដ្ឋ ទាំងក្នុងពេលបច្ចុប្បន្ន និងក្នុងអំឡុងពិធីបុណ្យភ្ជុំបិណ្ឌខាងមុខ សំដៅដោះស្រាយការកកស្ទះចរាចរឱ្យបានជាអតិបរមានោះ សម្តេចមហាបវរធិបតី នាយករដ្ឋមន្ត្រី បានផ្តល់គោលការណ៍សម្រេចដ៏ខ្ពង់ខ្ពស់បំផុតឱ្យរដ្ឋបាលរាជធានីភ្នំពេញដាក់ឱ្យប្រើប្រាស់ជា បណ្តោះអាសន្ននូវស្ពានអាកាស សម្តេចធិបតី ហ៊ុន ម៉ាណែត ដូចខាងក្រោម ៖ ស្ពានអាកាសទី ១-មានទិសដៅចរាចរតាមបណ្ដោយមហាវិថី សម្តេចតេជោ ហ៊ុន សែន ឆ្លងកាត់ផ្លូវជាតិលេខ ២ ឆ្ពោះទៅអាកាសយានដ្ឋានអន្តរជាតិតេជោ ចាប់ពីថ្ងៃទី ១១ ខែកក្កដា ឆ្នាំ ២០២៥ តទៅ។ ស្ពានអាកាសទី ២- មានទិសដៅចរាចរពីអាកាសយានដ្ឋានអន្តរជាតិតេជោ ឆ្លងកាត់ផ្លូវជាតិលេខ ២ ឆ្ពោះមក មហាវិថី សម្តេចតេជោ ហ៊ុន សែន ចូលមករាជធានីភ្នំពេញ ចាប់ពីថ្ងៃទី ១៥ ខែសីហា ឆ្នាំ ២០២៥ តទៅ៕

អត្ថបទ ៖ ស្រីរ័ត្ន

The post ស្ពានអាកាស សម្តេចធិបតី ហ៊ុន ម៉ាណែត នឹងដាក់ឱ្យប្រើប្រាស់ជាបណ្ដោះអាសន្ន ចាប់ពីថ្ងៃទី ១១ កក្កដា ស្អែកនេះហើយ appeared first on Kampuchea Thmey Daily.

ស្ពានអាកាសសម្តេចធិបតី ហ៊ុន ម៉ាណែត ឈានដល់ការតភ្ជាប់តួស្ពាន ខណៈការដ្ឋានសម្រេចបាន៨៥%

Sokhom Khon — Mon, 09 Jun 2025 03:33:03 +0000

ស្ពានអាកាសសម្តេចធិបតី ហ៊ុន ម៉ាណែត ស្ថិតនៅតាមបណ្ដោយមហាវិថីសម្ដេចតេជោ ហ៊ុន សែន ប្រសព្វជាមួយផ្លូវជាតិលេខ២ ព្រំប្រទល់រវាង រាជធានីភ្នំពេញ និងខេត្តកណ្តាល សម្រេចការងារបានប្រមាណ៨៥ភាគរយ ហើយនៅព្រឹកថ្ងៃទី០៩មិថុនានេះ លោក ឃួង ស្រេង អភិបាលនៃគណៈអភិបាលរាជធានីភ្នំពេញ បានអញ្ជើញជាអធិបតីភាពក្នុងពិធីតភ្ជាប់តួស្ពានដោយមានការចូលរួមពីមន្ត្រីក្រោមឱវាទជាច្រើនរូបទៀត។

លោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញបានឱ្យដឹងថា គិតមកដល់ពេលនេះ ការដ្ឋានសាងសង់ស្ពានអាកាសសម្តេចធិបតី ហ៊ុន ម៉ាណែត ទាំងមូលសម្រេចបានប្រមាណ៨៥ភាគរយហើយ ក្នុងនោះស្ពានអាកាសដែលមានទិសដៅពីភ្នំពេញទៅប្រលានយន្តហោះថ្មីខេត្តកណ្តាល នឹងរួចរាល់នៅចុងខែមិថុនានេះ។ ចំណែកស្ពានអាកាសដែលមានទិសដៅពីប្រលានយន្តហោះថ្មី មកភ្នំពេញវិញនឹងរួចរាល់នៅចុងខែកក្កដាឆ្នាំ២០២៥ខាងមុខនេះ។

សូមបញ្ជាក់ថា ស្ពានអាកាសនេះបានបើកការដា្ឋនសាងសង់ ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវ កាលពីព្រឹកថ្ងៃទី១៧ ខែមិថុនា ឆ្នាំ២០២៤ ដោយរាជរដ្ឋាភិបាលជាម្ចាស់គម្រោង តាមរយៈរដ្ឋបាលរាជធានីភ្នំពេញ ដោយប្រើប្រាស់ថវិកាសាងសង់ចំនួន ១៦,២០០,៥០០ ដុល្លាអាមេរិក សាងសង់ដោយក្រុមហ៊ុនវិនិយោគទុនអណិកជនកម្ពុជា (OCIC) ដោយប្រើប្រាស់រយៈពេលសាងសង់ចំនួន១២ខែ។

ស្ពានអាកាសនេះ ជាប្រភេទបេតុងអាមេ ( ធ្នឹមរាងអក្សរ I )មានបណ្ដោយ ស្ពាន៦២២ម៉ែត្រ ក្នុងនោះស្ពានទី១: ផ្លូវឯកទិសមានទិសដៅតាមបណ្តោយមហាវិថីសម្តេចតេជោ ហ៊ុន សែន ឆ្លងកាត់ផ្លូវជាតិលេខ២ឆ្ពោះទៅកាន់អាកាសយានដ្ឋានអន្តរជាតិតេជោ។ ស្ពានទី២: ផ្លូវឯកទិសមានទិសដៅឆ្លងកាត់ផ្លូវជាតិលេខ២ពីអាកាសយានដ្ឋានអន្តរជាតិតេជោ ឆ្ពោះទៅកាន់ មហាវិថីសម្តេចតេជោ ហ៊ុន សែន។ ស្ពាននេះមានទម្ងន់ផ្ទុកអនុញ្ញាត ២៥តោន កម្ពស់សុវត្ថិភាព
៥.៥០ម៉ែត្រ។ មានគន្លងចរាចរណ៍ចំនួន៣គន្លង ។ ទទឹងស្ពានប្រវែង ៩.៥០ម៉ែត្រ។ កម្រាលស្ពានអ៊ុតកៅស៊ូ AC កម្រាស់: ០.១០ម៉ែត្រ បង្កាន់ដៃស្ពានសងខាងមានកម្ពស់ ១.២០ម៉ែត្រ មានបំពាក់ភ្លើងសូឡាបំភ្លឺផ្លូវតាមបង្កាន់ដៃស្ពាន និងផ្លូវសងខាងស្ពាន។ មានប្រព័ន្ធលូសម្រាប់រំដោះទឹកនៅសងខាងផ្លូវ។ រវាងប្រឡោះស្ពានទី ១និង ស្ពានទី២ មានគម្លាត៩.០០ម៉ែត្រដែលបានរចនាជាឧទ្យានបៃតង ជាមួយការរៀបចំផ្លាកសញ្ញាចរាចណ៍ផងដែត៕

អត្ថបទ៖ ស្រីរ័ត្ន

The post ស្ពានអាកាសសម្តេចធិបតី ហ៊ុន ម៉ាណែត ឈានដល់ការតភ្ជាប់តួស្ពាន ខណៈការដ្ឋានសម្រេចបាន៨៥% appeared first on Kampuchea Thmey Daily.

ពលរដ្ឋសប្បាយរីករាយយ៉ាងខ្លាំងចំពោះ ស្ពានអាកាសសម្តេចធិបតី សមិទ្ធផលថ្មីក្នុងការអភិវឌ្ឍសង្គមជាតិ

អ៊ិន ពិសី — Thu, 15 May 2025 07:25:56 +0000

ប្រជាពលរដ្ឋរស់នៅតំបន់កំណាត់ផ្លូវជាតិលេខ ២ មានក្ដីសប្បាយរីករាយយ៉ាងខ្លាំងចំពោះ ស្ពានអាកាសសម្តេចមហាបវរធិបតី ហ៊ុន ម៉ាណែត ដែលជាសមិទ្ធផលថ្មីមួយបន្ថែមទៀត ក្នុងការជំរុញល្បឿនសេដ្ឋកិច្ចសង្គមជាតិ។

ពលរដ្ឋក្នុងតំបន់ខាងលើ បានបង្ហាញក្តីរំភើបរីករាយ និងមានក្តីមោទនភាពជាខ្លាំងចំពោះសមិទ្ធផលថ្មី ដែលជាការអភិវឌ្ឍថ្មីបន្ថែមទៀត ក្នុងតំបន់រស់នៅរបស់ពួកគាត់ ខណៈស្ពានអាកាសសម្តេចធិបតី បានសម្រេចលទ្ធផល នៃការសាងសង់ ៨០ ភាគរយហើយ។

ពលរដ្ឋបន្ថែមថា សមិទ្ធផលថ្មីនេះ នឹងដើរតួនាទីសំខាន់ក្នុងការសម្រួលលំហូរចរាចរណ៍ធ្វើដំណើរ ស្របពេលដែលអាកាសយានដ្ឋានអន្តរជាតិមរតកតេជោ ក៏នឹងជិតដាក់ឱ្យដំណើរការជាផ្លូវការនៅខែកក្កដា ខាងមុខនេះ។

គួររំលឹកថា ស្ពានអាកាសសម្តេចធិបតី ហ៊ុន ម៉ាណែត ស្ថិតនៅត្រង់ចំណុចប្រសព្វរវាងមហាវិថីសម្តេចតេជោ ហ៊ុន សែន (ផ្លូវ ៦០ ម៉ែត្រ) និងផ្លូវជាតិលេខ ២ ស្ថិតនៅព្រំប្រទល់រាជធានីភ្នំពេញ និង ខេត្តកណ្ដាល ត្រូវបានដំណើរការបើកការដ្ឋានសាងសង់កាលថ្ងៃទី ១៧ ខែមិថុនា ឆ្នាំ ២០២៤ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ស្ពានអាកាសសម្តេចធិបតី ហ៊ុន ម៉ាណែត នេះ ជាគម្រោងរបស់រាជរដ្ឋាភិបាល តាមរយៈរដ្ឋបាលរាជធានីភ្នំពេញ ដោយប្រើប្រាស់ថវិកាសាងសង់ចំនួន ១៦,២០០,៥០០ ដុល្លារអាមេរិក សាងសង់ដោយក្រុមហ៊ុនវិនិយោគទុន (OCIC) ដោយប្រើប្រាស់រយៈពេលសាងសង់ចំនួន ១២ ខែ។ គម្រោងសាងសង់ស្ពានអាកាសនេះ ស្ពានជាប្រភេទបេតុងអាមេ (ធ្នឹមរាងអក្សរ I) ដែលមានបណ្ដោយស្ពានសរុប ៦២២ ម៉ែត្រ បណ្ដោយតួស្ពាន: ២៨១ ម៉ែត្រ , ផ្លូវតភ្ជាប់ក្បាលស្ពានទៅមកខាងមហាវិថីសម្តេចតេជោ ហ៊ុន សែន ប្រវែង ១៨០ ម៉ែត្រ , ផ្លូវតភ្ជាប់ក្បាលស្ពានទៅមកខាងព្រលានយន្តហោះ អន្តរជាតិតេជោ ១៦១ ម៉ែត្រ។ ស្ពានទី១: ផ្លូវឯកទិសមានទិសដៅតាមបណ្តោយមហាវិថីសម្តេចតេជោ ហ៊ុន សែន ឆ្លងកាត់ផ្លូវជាតិលេខ ២ ឆ្ពោះទៅកាន់អាកាសយានដ្ឋានអន្តរជាតិតេជោ។ ស្ពានទី២: ផ្លូវឯកទិសមានទិសដៅឆ្លងកាត់ផ្លូវជាតិលេខ ២ ពីអាកាសយានដ្ឋានអន្តរជាតិតេជោ ឆ្ពោះទៅកាន់ មហាវិថីសម្តេចតេជោ ហ៊ុន សែន។ ទម្ងន់ផ្ទុកអនុញ្ញាត ២៥ តោន កម្ពស់សុវត្ថិភាព:៥.៥០ ម៉ែត្រ (ត្រង់ចំណុចប្រសព្វផ្លូវជាតិលេខ ២)៕

អត្ថបទ ៖ សុភា

The post ពលរដ្ឋសប្បាយរីករាយយ៉ាងខ្លាំងចំពោះ ស្ពានអាកាសសម្តេចធិបតី សមិទ្ធផលថ្មីក្នុងការអភិវឌ្ឍសង្គមជាតិ appeared first on Kampuchea Thmey Daily.

ស្ពានអាកាស«មរតកតេជោ» នឹងសម្ពោធដាក់ឱ្យប្រើប្រាស់ជាផ្លូវការ ក្រោមអធិបតីភាព សម្ដេចមហាបវរធិបតី ហ៊ុន ម៉ាណែត និង លោកជំទាវបណ្ឌិត នាថ្ងៃទី ០៧ មេសាខាងមុខ

អ៊ិន ពិសី — Mon, 24 Mar 2025 07:50:04 +0000

ស្ពានអាកាស «មរតកតេជោ» ប្រសព្វរវាងមហាវិថីព្រះមុនីវង្ស មហាវិថីសម្តេចតេជោ ហ៊ុន សែន និង មហាវិថីយោធពលខេមរភូមិន្ទ (ផ្លូវ ២៧១) ក្នុងខណ្ឌមានជ័យ និងខណ្ឌចំការមន ដែលជាស្ពានអាកាសពីរជាន់ដំបូងគេនៅប្រទេសកម្ពុជា គ្រោងនឹងសម្ពោធដាក់ឲ្យប្រើប្រាស់ជាផ្លូវការក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត នាថ្ងៃទី ០៧ ខែមេសា ខាងមុខនេះ។

ស្ពានអាកាស «មរតកតេជោ» នឹងជួយកាត់បន្ថយការខាតបង់ពេលវេលាក្នុងការធ្វើដំណើរ សន្សំសំចៃ សម្រួលលំហូរចរាចរណ៍ ធ្វើឱ្យប្រជាពលរដ្ឋងាយស្រួលធ្វើដំណើរ ជាពិសេសពេលរដូវបុណ្យទានម្តងៗ ដូចជា ក្នុងអំឡុងពេលពិធីបុណ្យចូលឆ្នាំខ្មែរ ប្រពៃណីជាតិខាងមុខនេះ ជាដើម។

សមិទ្ធផលថ្មីៗ ជាបន្តបន្ទាប់ទៀត នឹងលេចរូបរាងឡើង ក្រោមការដឹកនាំប្រកបដោយគតិបណ្ឌិត របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា ស្ពានអាកាស «មរតកតេជោ» នឹងបើកសម្ពោធដាក់ឱ្យប្រើប្រាស់ជាផ្លូវការក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត នាថ្ងៃទី ០៧ ខែមេសា ខាងមុខនេះ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ និងដើម្បីដោះស្រាយការកកស្ទះចរាចរណ៍នៅទីតាំងនេះផងដែរ។

គួររំលឹកថា ស្ពានអាកាស «មរតកតេជោ» ក្នុងជំហានទី ២ បានធ្វើពិធីតភ្ជាប់ស្ពាន(ស្ពានអាកាសជាន់ទី ១) កាលពីរសៀលថ្ងៃទី ១៧ ខែធ្នូ ឆ្នាំ ២០២៤ ក្រោមអធិបតីភាព លោក ឃួង ស្រេង អភិបាលរាជធានីភ្នំពេញ និង អ្នកឧកញ៉ា ពុង ឃាវសែ ប្រធានក្រុមប្រឹក្សាភិបាល OCIC។ ស្ពានអាកាសថ្មីនេះ ត្រូវបានអភិបាល នៃគណៈអភិបាលរាជធានីភ្នំពេញ លោក ឃួង ស្រេង និង លោកស្រី អញ្ជើញជាអធិបតី ក្រុងពាលីបញ្ចុះបឋមសិលា សុំម្ចាស់ទឹកម្ចាស់ដី កាលពីរសៀលថ្ងៃទី ៣០ ខែសីហា ឆ្នាំ ២០២២ ហើយនៅព្រឹកថ្ងៃទី ៣១ ខែសីហា ឆ្នាំ ២០២២ ត្រូវបាន សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី អញ្ជើញជាអធិបតីភាពដ៏ខ្ពង់ខ្ពស់ បើកការដ្ឋានស្ថាបនា។

ស្ពានអាកាសនេះ សាងសង់ដោយក្រុមហ៊ុនវិនិយោគទុនអាណិកជនកម្ពុជា OCIC នៅចំណុចប្រសព្វមហាវិថី សម្តេចតេជោ ហ៊ុន សែន មហាវិថីព្រះមុនីវង្ស ជាមួយវិថីកងយោធពលខេមរភូមិន្ទ ហៅផ្លូវលេខ ២៧១ ក្នុងទឹកដីខណ្ឌចំការមន និង ខណ្ឌមានជ័យ ដោយគ្រោងចំណាយថវិកា ជាង ៣៦ លានដុល្លារ និងចំណាយពេលវេលាសាងសង់ ៣៦ ខែ។

ស្ពានអាកាសថ្មីនេះ នឹងដោះស្រាយបាននូវលំហូរចរាចរណ៍ពីខេត្តកណ្ដាលឆ្លងកាត់មហាវិថីតេជោហ៊ុន សែន ពីព្រលានយន្តហោះថ្មី ខេត្តកណ្ដាល ចូលមករាជធានីភ្នំពេញ និងទី ២ ទៀត អាចកាត់បន្ថយបាននូវការកកស្ទះចរាចរណ៍នៅតាមបណ្ដោយផ្លូវជាតិ ១ ចូលមករាជធានីភ្នំពេញផងដែរ៕

អត្ថបទ ៖ ស្រីរ័ត្ន

The post ស្ពានអាកាស«មរតកតេជោ» នឹងសម្ពោធដាក់ឱ្យប្រើប្រាស់ជាផ្លូវការ ក្រោមអធិបតីភាព សម្ដេចមហាបវរធិបតី ហ៊ុន ម៉ាណែត និង លោកជំទាវបណ្ឌិត នាថ្ងៃទី ០៧ មេសាខាងមុខ appeared first on Kampuchea Thmey Daily.

ការដ្ឋានសាងសង់ស្ពានអាកាស សម្តេចមហាបវរធិបតី ហ៊ុន ម៉ាណែត សាងសង់បានប្រមាណ ៥២% ហើយ

អ៊ិន ពិសី — Fri, 31 Jan 2025 06:52:15 +0000

ស្ពានអាកាសភ្លោះ សម្តេចមហាបវរធិបតី ហ៊ុន ម៉ាណែត ស្ថិតនៅតាមបណ្ដោយមហាវិថី សម្ដេចតេជោ ហ៊ុន សែន ប្រសព្វនឹងផ្លូវជាតិលេខ ២ ព្រំប្រទល់រវាង រាជធានីភ្នំពេញ និងខេត្តកណ្តាល គិតមកដល់ពេលនេះការដ្ឋានទាំងមូលសម្រេចបានប្រមាណ ៥២% ដោយបច្ចុប្បន្នកំពុងដំឡើងធ្នឹមបេតុង បានប្រមាណជាង ៦០% ហើយគ្រោងនឹងបញ្ចប់អ៊ុតកៅស៊ូផ្លូវស្ពាននៅចុងខែមិនាខាងមុខនេះ។

លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា គិតមកដល់ពេលនេះការដ្ឋានសាងសង់ស្ពានអាកាស សម្តេចមហាបវរធិបតី ហ៊ុន ម៉ាណែត ទាំងមូល សម្រេចបានប្រមាណ ៥២% ហើយ។ ចំពោះស្ពានដែលមានទិសដៅពីមហាវិថី សម្តេចតេជោ ហ៊ុន សែន (ផ្លូវ ៦០ ម៉ែត្រ) ទៅមហាវិថីព្រលានសម្តេចតេជោ បានសាងសង់គ្រឹះ និងសសរស្ពានរួចរាល់ហើយ។ បច្ចុប្បន្នកំពុងតែដំឡើងធ្នឹមបេតុងបានប្រមាណជាង ៦០% ៤ប្រលោះ/៧ប្រលោះ) ហើយគ្រោងនឹងបញ្ចប់អ៊ុតកៅស៊ូផ្លូវស្ពាននៅចុងខែមិនាខាងមុខនេះ។ ចំពោះស្ពានដែលមានទិសដៅពីមហាវិថីព្រលានសម្តេចតេជោ ទៅមហាវិថីសម្តេចតេជោ ហ៊ុន សែន (ផ្លូវ ៦០ ម៉ែត្រ) បានសាងសង់គ្រឹះ និងសសររួចហើយ។ ឯការដំឡើងធ្នឹម នឹងរៀបចំចាប់ពីខែមេសា ខាងមុខនេះ។

លោកស្រី ដោ សម្ផស្ស បានបញ្ជាក់ផងដែរថា ចំពោះការសាងសង់ដំឡើងធ្នឹមស្ពាននេះ នឹងមានបិទចរាចរណ៍រវាងមហាវិថី សម្តេចតេជោ ហ៊ុន សែន (ផ្លូវ ៦០ ម៉ែត្រ) មហាវិថីព្រលានសម្តេចតេជោ និងផ្លូវជាតិលេខ ២ (ក្នុងបរិវេណការដ្ឋាន) ម្ដងម្កាល ដោយសារការដ្ឋានត្រូវការប្រើប្រាស់គ្រឿងចក្រធំៗ និងដើម្បីពន្លឿនការងារឱ្យបានទាន់ផែនការ។ ដូចនេះ សូមប្រជាពលរដ្ឋដែលប្រើប្រាស់ផ្លូវទាំងនេះ មេត្តាយោគយល់ និងអធ្យាស្រ័យ។

សូមបញ្ជាក់ថា គម្រោងស្ពានអាកាសភ្លោះសម្តេចមហាបវរធិបតី ហ៊ុន ម៉ាណែត គ្រោងបញ្ចប់ការដ្ឋានទាំងមូលនៅខែមិថុនា ឆ្នាំ ២០២៥ ទៅតាមផែនការដែលបានគ្រោងទុក ដោយប្រើប្រាស់ថវិកាក្នុងសាងសង់ចំនួន ១៦,២០០,៥០០ ដុល្លារអាមេរិក និងប្រើប្រាស់រយៈពេលសាងសង់ចំនួន ១២ ខែ៕

អត្ថបទ ៖ ស្រីរ័ត្ន

The post ការដ្ឋានសាងសង់ស្ពានអាកាស សម្តេចមហាបវរធិបតី ហ៊ុន ម៉ាណែត សាងសង់បានប្រមាណ ៥២% ហើយ appeared first on Kampuchea Thmey Daily.

ស្ពានអាកាសភ្លោះភ្ជាប់ផ្លូវ ៦០ ម៉ែត្រ ទៅព្រលានអន្តរជាតិតេជោ ប្រកាសបើកការដ្ឋាននៅថ្ងៃ ១៧ មិថុនា នេះ

Ngoeul Narath — Fri, 14 Jun 2024 10:51:36 +0000

តាមការគ្រោងទុក នៅព្រឹកថ្ងៃចន្ទ ទី១៧ ខែមិថុនា ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នឹងអញ្ជើញជាអធិបតីភាពដ៏ខ្ពង់ខ្ពស់បំផុតក្នុងពិធីបើកការដ្ឋានសាងសង់ស្ពានអាកាសភ្លោះ ត្រង់ចំណុចផ្លូវប្រសព្វមហាវិថីសម្ដេចតេជោ ហ៊ុន សែន និងផ្លូវជាតិលេខ២ ស្ថិតនៅភូមិបត្តាជី១ សង្កាត់ព្រែកហូរ ក្រុងតាខ្មៅ ខេត្តកណ្ដាល។ នេះបើតាមសេចក្ដីជូនដំណឹងរបស់មន្ទីរសាធារណការ និងដឹកជញ្ជូនខេត្តកណ្ដាល។

តាមសេចក្ដីជូនដំណឹង មន្ទីរសាធារណការ និងដឹកជញ្ជូនខេត្តកណ្ដាល នឹងបិទចរាចរណ៍យាន្តជំនិះគ្រប់ប្រភេទ នៅលើកំណាត់ផ្លូវជាតិលេខ២ ចាប់ពីចំណុចស្តុបព្រែកហូរ រហូតដល់ផ្លូវចូលវត្តព្រែកថ្លឹង និងបិទចរាចរណ៍លើកំណាត់មហាវិថីសម្ដេចតេជោ ហ៊ុន សែន ចាប់ពីផ្លូវក្រវ៉ាត់ក្រុងទី២ រហូតដល់ផ្លូវក្រវ៉ាត់ក្រុងទី៣។

សម្រាប់យាន្តជំនិះគ្រប់ប្រភេទ ដែលចង់ធ្វើដំណើរតាមផ្លូវជាតិលេខ២ ចាប់ពីចំណុចស្តុបព្រែកហូរ រហូតដល់ផ្លូវចូលវត្តព្រែកថ្លឹង និងលើកំណាត់មហាវិថីសម្ដេចតេជោ ហ៊ុន សែន ចាប់ពីផ្លូវក្រវ៉ាត់ក្រុងទី២ រហូតដល់ផ្លូវក្រវ៉ាត់ក្រុងទី៣ ត្រូវធ្វើដំណើរវាងតាមផ្លូវក្រវ៉ាត់ក្រុងទី៣ ផ្លូវក្រវ៉ាត់ក្រុងទី២ និងផ្លូវជាតិលេខ២១វិញ។

គួរឱ្យដឹងថា គេនៅមិនដឹងអំពីប្រវែង និងទំហំស្ពាន ទទឹងតួស្ពាន និងរចនាសម្ព័ន្ធជាក់លាក់នៅឡើយទេ គិតមកទល់ពេលនេះ។

«កម្ពុជាថ្មី» បានទាក់ទងទៅ លោក ផន រឹម មន្រ្តីអ្នកនាំពាក្យក្រសួងសាធារណការ និងដឹកជញ្ជូន ដើម្បីសុំគូសបញ្ជាក់ពីរចនាសម្ព័ន្ធរបស់គម្រោងលម្អិត ប៉ុន្តែលោកបានឲ្យដឹងថា គម្រោងសាងសង់ស្ពានអាកាសភ្លោះនេះ មិនស្ថិតនៅក្រោមការគ្រប់គ្រងរបស់ក្រសួងឡើយ ពោលជាគម្រោងរបស់រដ្ឋបាលរាជធានីភ្នំពេញ។

កាលពីសប្តាហ៍មុន នៅសាលារាជធានីភ្នំពេញ ក៏បានរៀបចំកិច្ចប្រជុំចង្អៀតមួយពាក់ព័ន្ធគម្រោងសាងសង់ស្ពានអាកាសភ្លោះនេះ ប៉ុន្តែលទ្ធផលលម្អិតយ៉ាងណាមិនត្រូវបានប្រកាសឲ្យអ្នកសារព័ត៌មានដឹងនោះទេ។

បន្ថែមពីនេះ «កម្ពុជាថ្មី» ក៏បានព្យាយាមទាក់ទងទៅមន្រ្តីព្រលានយន្តហោះអន្តរជាតិតេជោ តែមិនទាន់ទទួលបានការឆ្លើយតប៕

The post ស្ពានអាកាសភ្លោះភ្ជាប់ផ្លូវ ៦០ ម៉ែត្រ ទៅព្រលានអន្តរជាតិតេជោ ប្រកាសបើកការដ្ឋាននៅថ្ងៃ ១៧ មិថុនា នេះ appeared first on Kampuchea Thmey Daily.

ស្ពានអាកាសច្រមុះជ្រូកក្បាលថ្នល់ គ្រោងដាក់ប្រើប្រាស់បណ្ដោះអាសន្ន ជាង ៧០ ថ្ងៃទៀត

KC Virak — Mon, 29 Jan 2024 05:26:50 +0000

ស្ពានអាកាសដែលបាន និងកំពុងសាងសង់ ស្ថិតនៅខណ្ឌចំការមន និងខណ្ឌមានជ័យ មានកម្ពស់ បីជាន់ គ្រោងនឹងដាក់ឈ្មោះ ស្ពានអាកាស មរតកតេជោ ហើយក៏នឹងគ្រោងប្រកាសដាក់ឱ្យប្រើប្រាស់ជាបណ្តោះអាសន្ន នៅរយៈ ៧៤ ថ្ងៃខាងមុខទៀតនេះ។ នេះបើតាមការបញ្ជាក់ឱ្យដឹងពី លោក ឃួង ស្រេង អភិបាលរាជធានីភ្នំពេញ ក្នុងឱកាសដែលលោកអញ្ជើញជាអធិបតីភាពក្នុងពិធីភ្ជាប់ស្ពានអាកាស មរតកតេជោនេះ នៅព្រឹកថ្ងៃទី២៩ ខែមករា ឆ្នាំ២០២៤ នេះ។

លោក ឃួង ស្រេង មានប្រសាសន៍ថា ស្ពានអាកាសដែលបាន និងកំពុងសាងសង់ ស្ថិតនៅខណ្ឌចំការមន និងខណ្ឌមានជ័យ មានកម្ពស់បីជាន់ គ្រោងនឹងដាក់ឈ្មោះ ស្ពានអាកាស មរតកតេជោ។ នេះគ្រាន់តែជាគម្រោង ដោយ លោកនឹងសុំទៅប្រមុខរាជរដ្ឋាភិបាលដែលមាន សម្ដេចបបរធិបតី ហ៊ុន ម៉ាណែត ជាប្រមុខដឹកនាំ ដើម្បីសុំប្រសិទ្ធនាមឈ្មោះស្ពាននេះ។

លោក ឃួង ស្រេង បន្តថា ស្ពានអាកាសមរតកតេជោ សម្រេចបានលើការសាងសង់ ក្នុងដំណាក់កាលទី១ ហើយ ៧៤ថ្ងៃទៀត នឹងសុំទៅសម្ដេចធិបតី ហ៊ុន ម៉ាណែត ដើម្បីប្រកាសដាក់ឱ្យប្រើប្រាស់ស្ពានអាកាសនេះជាបណ្តោះអាសន្ន ដើម្បីឱ្យប្រជាពលរដ្ឋបានធ្វើដំណើរឆ្លងកាត់ កាត់បន្ថយបាននូវការកកស្ទះចរារចរណ៍។ ខណៈដាក់ឱ្យប្រើប្រាស់ជាបណ្ដោះអាសន្ន គម្រោងទី២ នឹងបន្តសាងសង់ នៅជាន់ផ្ទាល់ដី និងជាន់ទី១ បន្តទៀត។ ស្ពានអាកាសថ្មីនេះនឹងដោះស្រាយបាននៅរំហូរចរាចរណ៍ ពីខេត្តកណ្ដាល ឆ្លងកាត់ មហាវិថីតេជោ ហ៊ុន សែន ពីព្រលានយន្តហោះថ្មី ខេត្តកណ្ដាល ចូលមករាជធានីភ្នំពេញ និងទី២ ទៀត អាចកាត់បន្ថយបាននូវការកកស្ទះចរាចរណ៍នៅតាមបណ្ដោយផ្លូវជាតិ១ ចូលមករាជធានីភ្នំពេញផងដែរ។

លោក ឃួង ស្រេង បានបញ្ជាក់ថា វិស្វករដែលបាន និងកំពុងសាងសង់ស្ពានអាកាសមរតកតេជោ គឺជាវិស្វកររបស់ខ្មែរសុទ្ធសាធ ដែលបណ្ដុះបណ្ដាលនៅកម្ពុជារហូតក្លាយជាវិស្វករ ក្រោមការដឹកនាំប្រទេសរបស់ សម្ដេចតេជោ ហ៊ុន សែន។ ពីមុន យើងពឹងគេលើជំនាញផ្សេងខ្លះ ប៉ុន្តែពេលនេះ កូនខ្មែរយើងអាចធ្វើបានហើយ។ កម្ពុជាមានធនធានមនុស្សគ្រប់គ្រាន់ដើម្បីអភិវឌ្ឍប្រទេសខ្លួនឯងបាន។ ប៉ុន្តែទោះបីជាយ៉ាងណាក្តី យើងក៏មិនបោះបង់ចោលនៅបច្ចេកទេសរបស់ពិភពលោកដែរ។ យើងនឹងសិក្សាស្រាវជ្រាវបន្ថែមទៀត ដើម្បីឱ្យកិច្ចការងារអភិវឌ្ឍគម្រោងផ្សេងៗរបស់ជាតិមានភាពរឹងមាំដើម្បីឧត្ដមប្រយោជន៍ជាតិ។

លោកសូមឱ្យបងប្អូនប្រជាពលរដ្ឋ ជឿទុកចិត្តទៅលើការដឹកនាំរបស់ សម្ដេចបវរធិបតី ហ៊ុន ម៉ាណែត ដោយសម្ដេចនឹងបន្តរក្សាមរតករបស់សម្ដេចតេជោ និងបន្តអភិវឌ្ឍហេដ្ឋារចនាសម្ព័ន្ធថ្មីៗទៀត ជូនជាតិមាតុភូមិ។ សម្ដេច ហ៊ុន ម៉ាណែត បានប្តេជ្ញាចិត្តរក្សាឱ្យបាននូវសន្តិភាពដើម្បីកម្ពុជាមានការអភិវឌ្ឍលើគ្រប់វិស័យ។

គួរបញ្ជាក់ថា ស្ពានអាកាសទី៨ នេះ សាងសង់ដោយ ក្រុមហ៊ុនវិនិយោគទុនអាណិកជនកម្ពុជា OCIC នៅចំណុចប្រសព្វ មហាវិថីសម្តេចតេជោ ហ៊ុន សែន មហាវិថីព្រះមុនីវង្ស ជាមួយវិថីកងយោធពលខេមរភូមិន្ទ ហៅផ្លូវលេខ២៧១ ក្នុងទឹកដីខណ្ឌចំការមន និងខណ្ឌមានជ័យ ដោយគ្រោងចំណាយថវិកា ជាង ៣៦ លានដុល្លារ និងចំណាយពេលវេលាសាងសង់ ៣៦ ខែ។

គម្រោងស្ពានអាកាស ព្រះមុនីវង្ស មានសាងសង់ផ្លូវផ្ទាល់ដី ដែលមានរង្វង់មូលបែងចែកទិស និងផ្លូវតភ្ជាប់រវាងមហាវិថីព្រះមុនីវង្ស មហាវិថីសម្តេចតេជោ ហ៊ុន សែន វិថីកងយោធពលខេមរភូមិន្ទ ឆ្ពោះទៅស្ពានព្រះមុនីវង្ស និងផ្លូវជាតិលេខ២។ បន្ទាប់មក សាងសង់ស្ពានអាកាសចំនួនពីរជាន់។ ស្ពានអាកាសជាន់ទី១ ជាស្ពានរង្វង់មូល នៅត្រង់ចំណុចប្រសព្វ ដែលបំបែកខ្នែងជាបួនទិសផ្សេងគ្នា ទៅកាន់ មហាវិថីសម្តេចតេជោ ហ៊ុន សែន ស្ពានព្រះមុនីវង្ស មហាវិថីព្រះមុនីវង្ស និង វិថីកងយោធពលខេមរភូមិន្ទ។ ស្ពានអាកាសជាន់ទី២ ជាផ្លូវទ្វេទិស មានទិសដៅទៅមក រវាងមហា វិថីព្រះមុនីវង្ស និងមហាវិថី សម្តេចតេជោ ហ៊ុន សែន។ ក្រៅពីស្ពានអាកាស ព្រះមុនីវង្ស រដ្ឋបាលរាជធានីភ្នំពេញបានតៀមដំណើរការការដ្ឋានសាងសង់ស្ពានអាកាសមួយកន្លែងទៀត ស្ថិតនៅចំណុចប្រសព្វ មហាវិថីសហព័ន្ធរុស្ស៉ី ជាមួយ មហាវិថីសម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល ហៅផ្លូវលេខ២០០៤ ក្នុងខណ្ឌពោធិ៍សែនជ័យ។

បច្ចុប្បន្ននេះ នៅក្នុងរាជធានីភ្នំពេញ មានស្ពានអាកាសចំនួន៧ ដែលបានសាងសង់រួចរាល់ និងកំពុងប្រើប្រាស់ រួមមាន ស្ពានអាកាសក្បាលថ្នល់ ស្ពានអាកាស៧មករា ស្ពានអាកាសស្ទឹងមានជ័យ ស្ពានអាកាស៥មករា ស្ពានអាកាសមិត្តភាពកម្ពុជា-ចិន សែនសុខ ឬហៅថា ស្ពានអាកាស ផ្សារដីហ៊ុយ ស្ពានអាកាសចោមចៅ និងស្ពានអាកាសលើផ្លូវជាតិលេខ៥ ខណ្ឌឬស្សីកែវ៕

អត្ថបទ៖ ស្រីរ័ត្ន

The post ស្ពានអាកាសច្រមុះជ្រូកក្បាលថ្នល់ គ្រោងដាក់ប្រើប្រាស់បណ្ដោះអាសន្ន ជាង ៧០ ថ្ងៃទៀត appeared first on Kampuchea Thmey Daily.

ស្ពានអាកាស Archives - Kampuchea Thmey Daily

អាជ្ញាធរសង្កាត់ស្ទឹងមានជ័យទី ១ ជួសជុលភ្លើងបំភ្លឺផ្លូវ ក្រោមស្ពានអាកាសស្ទឹងមានជ័យឡើងវិញ

ស្ពានអាកាស សម្តេចធិបតី ហ៊ុន ម៉ាណែត នឹងដាក់ឱ្យប្រើប្រាស់ជាបណ្ដោះអាសន្ន ចាប់ពីថ្ងៃទី ១១ កក្កដា ស្អែកនេះហើយ

ស្ពានអាកាសសម្តេចធិបតី ហ៊ុន ម៉ាណែត ឈានដល់ការតភ្ជាប់តួស្ពាន ខណៈការដ្ឋានសម្រេចបាន៨៥%

ពលរដ្ឋសប្បាយរីករាយយ៉ាងខ្លាំងចំពោះ ស្ពានអាកាសសម្តេចធិបតី សមិទ្ធផលថ្មីក្នុងការអភិវឌ្ឍសង្គមជាតិ

ការដ្ឋានសាងសង់ស្ពានអាកាស សម្តេចមហាបវរធិបតី ហ៊ុន ម៉ាណែត សាងសង់បានប្រមាណ ៥២% ហើយ

ស្ពានអាកាសភ្លោះភ្ជាប់ផ្លូវ ៦០ ម៉ែត្រ​ ទៅព្រលានអន្តរជាតិតេជោ ប្រកាសបើកការដ្ឋាននៅ​ថ្ងៃ ១៧ មិថុនា​ នេះ

ស្ពានអាកាសច្រមុះជ្រូកក្បាលថ្នល់ គ្រោងដាក់ប្រើប្រាស់បណ្ដោះអាសន្ន ជាង ៧០ ថ្ងៃទៀត

ស្ពានអាកាសភ្លោះភ្ជាប់ផ្លូវ ៦០ ម៉ែត្រ ទៅព្រលានអន្តរជាតិតេជោ ប្រកាសបើកការដ្ឋាននៅថ្ងៃ ១៧ មិថុនា នេះ