ឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ នាព្រឹកថ្ងៃសុក្រ ទី០២ ខែមករា ឆ្នាំ២០២៦ បានអញ្ជើញអធិបតីភាពដ៏ខ្ពង់ខ្ពស់ ក្នុងកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការ រក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមប្រចាំឆ្នាំ២០២៥ ព្រមទាំងដាក់ចេញទិសដៅការងារសម្រាប់ឆ្នាំ២០២៦ នៅស្នងការដ្ឋាននគរបាលខេត្តស្វាយរៀង។ អង្គពិធីនេះមានការចូលរួមពីសំណាក់លោកស្នងការ ស្នងការរង មន្ត្រីនគរបាលពាក់ព័ន្ធ និងអាជ្ញាធរដែនដីជាច្រើនរូប។

យោងតាមរបាយការណ៍បូកសរុបលទ្ធផលការងារប្រចាំឆ្នាំ២០២៥ បានឱ្យដឹងថា ក្នុងរយៈពេលពេញមួយឆ្នាំកន្លងទៅ កងកម្លាំងនៃស្នងការដ្ឋាននគរបាលខេត្តស្វាយរៀង បានខិតខំប្រឹងប្រែងយ៉ាងសកម្មក្នុងការបង្ក្រាបបទល្មើសផ្សេងៗ ជាពិសេសការអនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព»។ ក្នុងនោះ បទល្មើសព្រហ្មទណ្ឌត្រូវបានបង្ក្រាបបានទាន់ពេលវេលា ការងារគ្រប់គ្រងសន្តិសុខតាមខ្សែបន្ទាត់ព្រំដែនត្រូវបានពង្រឹង និងការផ្ដល់សេវាសាធារណៈជូនប្រជាពលរដ្ឋមានភាពល្អប្រសើរ។

ថ្លែងក្នុងឱកាសនោះ អភិបាលខេត្តស្វាយរៀង ប៉េង ពោធិ៍សា បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងកម្លាំងនគរបាលខេត្តទាំងអស់ ដែលបានលះបង់កម្លាំងកាយចិត្ត ដើម្បីការពារសុខសុវត្ថិភាពជូនប្រជាពលរដ្ឋ និងរក្សាសន្តិសុខសណ្តាប់ធ្នាប់ក្នុងខេត្តបានយ៉ាងល្អប្រសើរ។

ទន្ទឹមនឹងនោះ ឯកឧត្តម ឧត្តមសេនីយ៍ឯក ឌី វិជ្ជា ក៏បានពាំនាំនូវការផ្ដាំផ្ញើសាកសួរសុខទុក្ខ និងការណែនាំពីសំណាក់ឯកឧត្តមអគ្គស្នងការនគរបាលជាតិ ដោយបានសង្កត់ធ្ងន់លើទិសដៅការងារសំខាន់ៗសម្រាប់ឆ្នាំ២០២៦ រួមមាន៖១. បន្តពង្រឹងការងារសន្តិសុខផ្ទៃក្នុង និងទប់ស្កាត់រាល់សកម្មភាពដែលបង្កអសន្តិសុខសង្គម។ ២. បង្កើនការយកចិត្តទុកដាក់លើការងារគ្រប់គ្រងជនបរទេស និងការបង្ក្រាបបទល្មើសឆ្លងដែនគ្រប់ប្រភេទ។ ៣. ជំរុញការអនុវត្តច្បាប់ចរាចរណ៍ផ្លូវគោកឱ្យមានប្រសិទ្ធភាពខ្ពស់ ដើម្បីកាត់បន្ថយគ្រោះថ្នាក់ និង៤. បន្តលើកកម្ពស់សមត្ថភាពមន្ត្រី និងពង្រឹងសីលធម៌ វិជ្ជាជីវៈ ក្នុងការបម្រើសេវាជូនប្រជាពលរដ្ឋ។

ក្នុងអង្គពិធីនេះ ក៏មានការបំពាក់គ្រឿងឥស្សរិយយស និងប្រគល់លិខិតសរសើរ ប័ណ្ណសរសើរ ជូនដល់មន្ត្រីនគរបាលដែលមានស្នាដៃឆ្នើមក្នុងការបំពេញភារកិច្ចកន្លងមក ដើម្បីជាការលើកទឹកចិត្តផងដែរ៕

ដោយ/ភក្ដី

The post ឧត្តមសេនីយ៍ឯក ឌី វិជ្ជា  អញ្ជើញបូកសរុបលទ្ធផលការងារប្រចាំឆ្នាំ២០២៥ និងដាក់ចេញទិសដៅការងារបន្តសម្រាប់ឆ្នាំ២០២៦ នៅស្នងការដ្ឋាននគរបាលខេត្តស្វាយរៀង appeared first on Kampuchea Thmey Daily.

ជាក់ស្ដែង​កាលពី​ថ្ងៃទី ១៤ ខែ​សីហា ឆ្នាំ ២០២៥ លោក​ឧត្ដមសេនីយ៍​ឯក ឃឹង សារ៉ាត់ និង​លោកស្រី ឆាយ សាលីន និង​សហការី​មន្ទីរ​ប្រឆាំង​បទល្មើស​គ្រឿងញៀន បាន​នាំ​យក​អំណោយ​ដ៏​ថ្លៃថ្លា​មក​ចែក​ជូន​ដល់​កងកម្លាំង​នគរបាល​ការពារ​ព្រំដែន និង​ជនភៀសសឹក ស្ថិត​ក្នុង​វត្ត​ឧ​ត្ត​រ​គី​រី​ទួល​អណ្តែត ខេត្ត​ព្រះវិហារ។

លោក​ឧត្ដមសេនីយ៍​ទោ សួស សុខដារ៉ា ស្នងការ នៃ​ស្នងការដ្ឋាន​នគរបាល​ខេត្ត​ព្រះវិហារ និង​ឯកឧត្ដម មេបញ្ជាការ​រង បញ្ជា​ការដ្ឋាន​អង្គរក្ស បាន​ថ្លែង​អំណរគុណ​យ៉ាង​ជ្រាលជ្រៅ​ជូន​ដល់​គណៈ​ប្រតិភូ​ទាំងអស់ ជាពិសេស លោក​ឧត្ដមសេនីយ៍​ឯក ឃឹង សារ៉ាត់ និង​លោកស្រី ដែល​បាន​នាំ​យក​អំណោយ​យ៉ាង​ច្រើន​សន្ធឹកសន្ធាប់​មក​ប្រគល់​ជូន​ដល់​កម្លាំង​ការពារ​ព្រំដែន ដែល​អំណោយ​ទាំងនេះ​ពិតជា​មាន​សារៈសំខាន់​ណាស់​សម្រាប់​ផ្គត់ផ្គង់​ដល់​កម្លាំង​ជួរមុខ។

លោក​ឧត្ដមសេនីយ៍​ឯក ឃឹង សារ៉ាត់ នាយក​មន្ទីរ​ប្រឆាំង​បទល្មើស​គ្រឿងញៀន មាន​ប្រសាសន៍​ថា អំណោយ​ដ៏​ថ្លៃថ្លា​របស់ លោក​នាយ​ឧត្ដមសេនីយ៍ អគ្គស្នងការ​នគរបាល​ជាតិ គឺ​បង្ហាញ​អំពី​ការ​យក​ចិត្ត​ទុក​ដាក់​ពី​សុខទុក្ខ និង​ជា​ការ​ដឹងគុណ​ចំពោះ​ភាព​អង់អាច​ក្លាហាន​របស់​វីរ​កងទ័ព​ដែល​បាន​លះបង់​ក្តី​សុខ​ផ្ទាល់ខ្លួន និង​ហ៊ាន​ពលី​គ្រប់​បែបយ៉ាង​ដើម្បី​បុព្វហេតុ​ជាតិ​មាតុភូមិ​ពី​ការ​ឈ្លានពាន​របស់​កងទ័ព​ថៃ​នា​ពេល​កន្លងមក។

លោក​ក៏បាន​បញ្ជាក់​ទៀត​ថា ការ​បូជា​ជីវិត និង​ស្មារតី​របស់​ពួកគាត់ គឺជា​រឿង​ដ៏​សំខាន់​ដែល​មិន​អាច​បំភ្លេច​បាន។ វីរ​កងទ័ព​ជួរមុខ​ បាន​លះបង់​កម្លាំង​កាយ​ចិត្ត និង​ជីវិត​ ដើម្បី​ការពារ​បូរណភាព​ទឹកដី​ នៃ​ព្រះរាជាណាចក្រ​កម្ពុជា​ពី​ការឈ្លានពាន​របស់​កងទ័ព​ថៃ។ ការ​ប្រយុទ្ធ​ដ៏​ស្វិតស្វាញ​របស់​ពួកគាត់​បាន​បង្ហាញ​ពី​មោទនភាព​ជាតិ និង​ឆន្ទៈ​ដ៏​មុតមាំ​ក្នុង​ការ​ការពារ​មាតុភូមិ ទង្វើ​នេះ​មិន​ត្រឹមតែ​ការពារ​ព្រំដែន​ប៉ុណ្ណោះ​ទេ ថែមទាំង​ថែរក្សា​សន្តិភាព និង​អធិបតេយ្យភាព​របស់​ជាតិ​ផង​ដែរ។

លោក​បាន​បញ្ជាក់​បន្ថែម​ថា កូនចៅ​ជំនាន់​ក្រោយ ​ត្រូវ​យល់ដឹង​ពី​ប្រវត្តិសាស្ត្រ និង​ការ​លះបង់​របស់​វីរ​កងទ័ព ដើម្បី​បន្ត​ការ​ចងចាំ​នេះ​ជា​រៀង​រហូត។ វីរ​កងទ័ព​ជួរមុខ​ គឺជា​វីរបុរស​ពិតៗ ដែល​សម​នឹង​ទទួល​បាន​ការ​គោរព និង​ដឹងគុណ​ដ៏​ជ្រាលជ្រៅ​បំផុត​ចំពោះ​ការ​បូជា​ជីវិត​របស់​ពួកគាត់ និង​ចងចាំ​ស្ថិត​នៅ​ក្នុង​ដួងចិត្ត​ប្រជាជន​កម្ពុជា​ជា​រៀង​រហូត។

លោក ឃឹង សារ៉ាត់ បាន​បញ្ជាក់​យ៉ាង​ច្បាស់​អំពី​គោលជំហរ​ដ៏​រឹងមាំ និង​មិន​ផ្លាស់ប្ដូរ​របស់​រាជរដ្ឋាភិបាល​កម្ពុជា​ក្នុង​ការ​ដោះស្រាយ​បញ្ហា​ព្រំដែន​កម្ពុជា​-​ថៃ ក្រោយពី​មានការ​ឯកភាព​គ្នា​ស្ដីពី​កិច្ចព្រមព្រៀង​បទ​ឈប់​បាញ់​នៅ​តាម​បណ្ដោយ​តំបន់​ព្រំដែន​កាលពី​ថ្ងៃទី​ ៧ ខែសីហា ឆ្នាំ​ ២០២៥ រាជរដ្ឋាភិបាល​កម្ពុជា​ បាន​អះអាង អំពី​គោលជំហរ​របស់ខ្លួន​ដែល​ផ្អែកលើ​គោលការណ៍​ចម្បង​ពីរ​គឺ យន្តការ​ច្បាប់ និង ការ​គោរព​កិច្ចព្រមព្រៀង​បទ​ឈប់​បាញ់ ដើម្បី​ឆ្ពោះ​ទៅ​រក​ដំណោះស្រាយ​បញ្ហា​ព្រំដែន​ប្រកប​ដោយ​សន្តិភាព យុត្តិធម៌ និង​និរន្តរភាព។

អំណោយ​លោក​នាយ​ឧត្ដមសេនីយ៍ ស ថេត តាមរយៈ លោក​ឧត្ដមសេនីយ៍​ឯក ឃឹង សារ៉ាត់ និង​លោកស្រី ត្រូវ​បាន​យក​មក​ប្រគល់​ជូន​ក្នុង​ឱកាស​នោះ​រួមមាន ស្នងការដ្ឋាន​នគរបាល​ខេត្ត​ព្រះវិហារ ទទួល​បាន​អង្ករ​ចំនួន ១០​ តោន ទឹក​សុទ្ធ ៤០​ កេស ធូបមូស ៤០​ កេស តង់​ចំនួន​ ២០​ ប៉ាវ ម៉ាស់ ១៥ ​កេស បារី ​១៥ ​កេស សាច់​ងៀត​ចំនួន ២០០ ​គីឡូ និង​ថវិកា​ចំនួន ៥​ លាន​រៀល ជូន​ដល់​បញ្ជា​ការដ្ឋាន​អង្គរក្ស រួមមាន អង្ករ ៥​ តោន ទឹក​សុទ្ធ​ ១០​ កេស គ្រឿង​ឧបភោគបរិភោគ​មួយចំនួនធំ និង​ថវិកា​ ៥​ លាន ជូន​ដល់​ជនភៀសសឹក​ចំនួន ​៥០០​ គ្រួសារ ក្នុង​ ១​ គ្រួសារ​ ទទួលបាន​អង្ករ ​១០ គីឡូក្រាម ទឹកស៊ីអ៊ីវ ១​ យួរ ប្រេងឆា ​១ ​ដប មី​ ១០ ​កញ្ចប់ និង​ថវិកា ​២០,០០០ ​រៀល ប្រគេន​ដល់​ព្រះសង្ឃ​វត្ត​ឧ​ត្ត​រ​គី​រី​ទួល​អណ្តែត ​១​ លាន​រៀល និង​ឧបត្ថម្ភ​ដល់​គណៈ​បញ្ជាការ​ខេត្ត​ចំនួន ​៥ ​លាន​រៀល៕

អត្ថបទ ៖ ម៉េង

The post កងកម្លាំងការពារព្រំដែនទិសខេត្តព្រះវិហារ និងជនភៀសសឹក ៥០០ គ្រួសារ ទទួលអំណោយពីតំណាងអគ្គស្នងការនគរបាលជាតិ appeared first on Kampuchea Thmey Daily.

ការឃាត់ខ្លួននេះ ធ្វើឡើងនៅវេលាម៉ោង ១៩:០០នាទី ថ្ងៃទី០៧ ខែសីហាឆ្នាំ២០២៥ នៅចំណុចភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប ។ ប្រតិបត្តិការបង្រ្កាប និងឈានដល់ការឃាត់ខ្លួន ដោយ​យោងតាមពាក្យបណ្ដឹងរបស់ជនរងគ្រោះចំនួន៣ រួមមាន បណ្តឹងរបស់ម្ដាយក្មេងស្រីរងគ្រោះ ភេទស្រី អាយុ ៣៧ឆ្នាំ កូនស្រីរងគ្រោះ អាយុ ១៤ឆ្នាំ , ក្មេងស្រី អាយុ ១៦ឆ្នាំ (គ្មានអាណាព្យាបាល)  និង ក្មេងស្រី អាយុ ១៦ឆ្នាំ។​​

ក្នុងពាក្យបណ្តឹងរបស់ជនរងគ្រោះ បានប្តឹងអំពីករណី “សញ្ចារកម្ម” ប្រព្រឹត្តកាលពីអំឡុងខែកុម្ភៈ ឆ្នាំ២០២៥ រហូតមកដល់បច្ចុប្បន្ន នៅចំណុចផ្ទះជួល ភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប(កន្លែងលក់កាហ្វេមេត្រីរបស់ជនសង្ស័យ) ។​

ជនរងគ្រោះជាអនីតិជនទាំង០៣នាក់បានបំភ្លឺជូនសមត្ថកិច្ចដូចៗគ្នាថា ពួកគេត្រូវបានជនសង្ស័យខាងលើ លួងលោមឲ្យជួលបន្ទប់របស់គាត់ ស្នាក់នៅ ដោយមិនចាំបាច់បង់ប្រាក់ជាមុនទេ ហើយនៅពេណារក ប្រាក់បានចាំបង់ជាក្រោយ រួមទាំងម្ហូបអាហារ និងកាហ្វេទៀតផង ។ ជនរងគ្រោះអះអាងថា៖«នៅពេលពួកគេទាំង០៣នាក់គ្មានប្រាក់បង់ឲ្យគាត់ គាត់បានបង្ខំឲ្យទៅបំរើផ្លូវភេទជាមួយភ្ញៀវ ដើម្បីយកប្រាក់សងថ្លៃដែលពួកខ្លួនជំពាក់គាត់ បើមិនព្រមធ្វើតាមគាត់ទេ គាត់គំរាមថា ចំណាយតែ៣០០បាត កាត់ដៃ-ជើង មិនឲ្យបានសុខទេ»។

មិនតែប៉ុណ្ណោះ ឈ្មោះ យឿប ឌីណា ហៅម៉េង បានដក១០% នៃប្រាក់ ដែលខ្លួនទៅបំរើផ្លូវភេទជាមួយភ្ញៀវទៀតផង បើភ្ញៀវឲ្យបានក្នុង១០០$ គាត់ដកអស់ ២៥$ ពេលខ្លះបានតែ ៥០$ រូបគាត់ដកអស់១០$ ហើយចំណែកប្រាក់ដែលនៅសល់ពីការបំរើផ្លូវភេទ ពួកខ្លួនមិនដែលបានយកមកចាយវាយនោះទេ គឺឈ្មោះ យឿប ឌីណា  តម្រូវឱ្យបង់ថ្លៃបន្ទប់ជួល ថ្លៃម្ហូបអាហារ ថ្លៃកាហ្វេ ថ្លៃជួលម៉ូតូ ថ្លៃជួលទូរស័ព្ទប្រើ ។

ឈ្មោះ អ.ធ.ត. ដែលជាជនរងគ្រោះ អាយុ១៤ឆ្នាំ បានររៀបរាប់ជូនសមត្ថកិច្ចដោយក្តុកក្តួលទៀតថា៖ នៅកំឡុងខែឧសភាឆ្នាំ២០២៥ ខ្លួនបានខ្ចីម៉ូតូម៉ាកហុងដាវ៉ារីអូឃ្លីក របស់ឈ្មោះ តេង ចាន់រតន: ភេទប្រុស ត្រូវជាប្អូនធម៌ឈ្មោះ យឿប ឌីណា ដើម្បីដើរលេងតែត្រូវបានជួបគ្រោះ ថ្នាក់ចរាចរណ៍នៅផ្លូវ៦០ម៉ែត្រ បណ្តាលឲ្យខូចខាត ម៉ូតូ បាក់បូម វៀចតួ ពេលនោះពួកគាត់ ( តេង ចាន់រតន:និងឈ្មោះ យឿប ឌីណា) បានឲ្យខ្លួនសងថ្លៃជួសជុលម៉ូតូចំនួន ៨០០$ ដោយសារគ្មានប្រាក់ ទើបខ្លួនមកផ្ទះជួលរបស់ឈ្មោះ យឿប ឌីណា ហៅម៉េង ទើបមាន បញ្ហានេះកើតឡើងតែម្តង ។

ដោយមានការសម្របសម្រួលពីលោក មាស ច័ន្ទពិសិដ្ឋ  ព្រះរាជអាជ្ញា នៃអយ្យការអមសាលាដំបូងខេត្តសៀមរាប ការិយាល័យជំនាញកសាងសំណុំរឿងដើម្បីអនុវត្តតាមនីតិវិធី ចំណែក​ជនរងគ្រោះ​ប្រគល់ជូន​មន្ទីរ​សង្គម​កិច្ច អតីត​យុវជន និងយុវនីតិសម្បទាខេត្តសៀមរាប ៕

The post ជើងខ្លាំង​ពាក់ព័ន្ធករណី “សញ្ចារកម្ម” ទៅលើក្មេងស្រីជាច្រើននាក់ ត្រូវ​បានកងរាជអាវុធហត្ថ​ខេត្តសៀមរាប ឃាត់​ខ្លួន appeared first on Kampuchea Thmey Daily.

អគ្គស្នងការនគរបាលជាតិ បានបញ្ជាក់ថា កម្លាំងសមត្ថកិច្ចចម្រុះចំនួន ១៦, ៧៥៨នាក់ មកពី១៦ស្ថាប័នអង្គភាព ដូចជា អគ្គស្នងការដ្ឋាននគរបាលជាតិ បញ្ជាការដ្ឋានកងរាជអាវុធហត្ថ បញ្ជាការដ្ឋានអង្គរក្ស បញ្ជាការដ្ឋានជាតិកម្លាំងពិសេសប្រឆាំងភេរវកម្ម បញ្ជាការដ្ឋានកងទ័ពជើងទឹក យោធភូមិភាគពិសេស និងសមត្ថកិច្ចពាក់ព័ន្ធមួយចំនួនទៀត។ លោកបន្ថែមថា កម្លាំងសមត្ថកិច្ចទាំងអស់ នឹងត្រូវបែងចែកទៅតាមទីតាំងប្រារព្ធពិធី និងជុំវិញកន្លែងប្រារព្ធព្រះរាជពិធី ចំណតទូក និងមណ្ឌលស្នាក់នៅរបស់កីឡាករចំណុះទូកតាមរាជធានី-ខេត្ត៕

អត្ថបទ៖ សុភា

The post អគ្គស្នងការនគរបាលជាតិ នឹងពង្រាយកម្លាំងចម្រុះ​ជាង១​ម៉ឺន​៦ពាន់នាក់ ដើម្បីការពារសន្តិសុខសណ្ដាប់​ធ្នាប់ក្នុងពិធីបុណ្យអុំទូក appeared first on Kampuchea Thmey Daily.

ក្រុមការងារ Hotline Scam 24/7 នៃអគ្គស្នងការដ្ឋាននគរបាលជាតិ បំភ្លឺថា រាល់ការដាក់ពាក្យបណ្ដឹងតាមប្រព័ន្ធ​អនឡាញរបស់ប្រជាពលរដ្ឋដែលពុំមានលក្ខណៈគ្រប់គ្រាន់ ដែលអាច បម្រើដល់ការអនុវត្តនីតិវិធីតាមផ្លូវច្បាប់ ក្រុមការងារតែងតែធ្វើការទំនាក់ទំនងតាមប្រព័ន្ធទូរស័ព្ទជនរងគ្រោះ ដើម្បីឲ្យធ្វើការកែសម្រួល និងបំពេញឲ្យគ្រប់លក្ខខណ្ឌ ប៉ុន្តែដើមបណ្ដឹងដែលជារងគ្រោះមួយចំនួន មិនបានសហការជាមួយសមត្ថកិច្ចពេញលេញនោះទេ។

ជាក់ស្តែងថ្មីៗនេះ ក្រុមការងារ Hotline Scam 24/7 បានព្យាយាមទំនាក់ទំនងទៅកាន់ជនរងគ្រោះ ឈ្មោះ ផៃ អញ្ជលី តាមរយៈលេខទូរស័ព្ទដែលបានដាក់ក្នុងពាក្យបណ្ដឹងជាច្រើនលើកច្រើនសារ ដើម្បីចូលរួមសហការ កែសម្រួលពាក្យបណ្ដឹងរបស់ខ្លួន ដែលមិនមានលក្ខណៈគ្រប់គ្រាន់ និងបំភ្លឺចំពោះអង្គហេតុដែលបានកើតឡើងឲ្យច្បាស់លាស់ចំពោះសមត្ថកិច្ច ប៉ុន្តែបុគ្គលខាងលើមិនព្រមសហការ និងបានប្រើពាក្យសម្ដីមិនសមរម្យ ព្រមទាំងបានបង្ហោះសាររិះ​គន់​សមត្ថកិច្ចថែមទៀតផង។

សមត្ថកិច្ចក្រុមការងារ Hotline Scam 24/7 នៃអគ្គស្នងការដ្ឋាននគរបាលជាតិ សូមស្នើឲ្យម្ចាស់គណនី ហ្វេសប៊ុកឈ្មោះ “ផៃ អញ្ជលី” លុបចោលនូវការបង្ហោះផ្សព្វផ្សាយខ្លឹមសារ ដែលបង្កឲ្យមានការយល់ច្រឡំ និងប៉ះពាល់ ដល់កិត្តិយស សេចក្តីថ្លៃថ្នូររបស់កងកម្លាំងនគរបាលជាតិ។

ទន្ទឹមនឹងនេះ សូមស្នើឲ្យម្ចាស់គណនីហ្វេសប៊ុកឈ្មោះ ផៃ អញ្ជលី ចូលរួមបំភ្លឺជាមួយសមត្ថកិច្ចនៅការិយាល័យក្រុមការងារ Hotline Scam 24/7 នៃអគ្គស្នងការដ្ឋាននគរបាលជាតិ ត្រឹមថ្ងៃទី១៣ ខែមីនា ឆ្នាំ២០២៤ រៀងរាល់ម៉ោងការងារជាកំហិត៕

The post សមត្ថកិច្ចបំភ្លឺ ករណីគនីហ្វេសប៊ុក ផៃ អញ្ជលី ដាក់ពាក្យប្ដឹងរឿងឆបោកតាមបណ្ដាញសង្គម appeared first on Kampuchea Thmey Daily.

ក្នុងន័យនេះ ឧត្តមសេនីយ៍ឯក លឹម សុខារស្មី បានស្នើដល់បណ្តាក្រុមហ៊ុនផ្តល់សេវាសន្តិសុខឯកជន និងសហគ្រាសគ្រឹះស្ថាន មេត្តាផ្តល់កិច្ចសហការល្អ ជាមួយក្រុមការងារជំនាញ ឱ្យទទួលបានប្រសិទ្ធភាពខ្ពស់ ដើម្បីជួយពង្រឹងការងារសន្តិសុខឯកជន និងការរៀបចំប្រព័ន្ធសន្តិសុខ សុវត្ថិភាពនៅតាមបណ្តាទីតាំង និងគោលដៅរបស់ក្រុមហ៊ុន និងសហគ្រាសគ្រឹះស្ថានឱ្យមានសន្តិសុខ សុវត្ថិភាពពេញលេញ។

ប្រធាននាយកដ្ឋាន បានគូសបញ្ជាក់ថា វិស័យសន្តិសុខឯកជននេះ បានចូលរួមចំណែកក្នុងការថែរក្សា សន្តិសុខ សុវត្ថិភាព និងសណ្តាប់ធ្នាប់សង្គម។ ដើម្បីឱ្យវិស័យសន្តិសុខឯកជន មានភាពរីកចម្រើន និងប្រកបដោយគុណភាព អភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និង នាយឧត្តមសេនីយ៍ ស ថេត អគ្គស្នងការនគរបាលជាតិ តែងតែមានការយកចិត្តទុកដាក់ខ្ពស់ និងគាំទ្រជានិច្ចក្នុងគោលបំណងជំរុញឱ្យវិស័យសន្តិសុខឯកជន មានការរីកចម្រើន ដើម្បីចូលរួមថែរក្សា សន្តិសុខ សុវត្ថិភាព សណ្ឋាប់ធ្នាប់សាធារណៈ និងសង្គមឱ្យបានល្អប្រសើរ។

ឧត្តមសេនីយ៍ឯក លឹម សុខារស្មី មានប្រសាសន៍បន្តថា ភ្នាក់ងារសន្តិសុខឯកជន ក៏បានដើរតួនាទីយ៉ាងសំខាន់ ជាកម្លាំងជំនួយដល់កងកម្លាំងមានសមត្ថកិច្ច ក្នុងការបង្ការ ទប់ស្កាត់ បង្ក្រាបបទល្មើសនានា និងចូលរួមអនុវត្តគោលនយោបាយ «ភូមិ-ឃុំ-សង្កាត់មានសុវត្ថិភាព» ប្រកបដោយប្រសិទ្ធភាព។ ការចូលរួមអនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» គឺត្រូវផ្តើមចេញពីយើងទាំងអស់គ្នា ពិសេសគឺភ្នាក់ងារសន្តិសុខឯកជន ដែលជាកម្លាំងជំនួយដល់កងកម្លាំងមានសមត្ថកិច្ច ដែលនៅឈរជើងជាប់ជាប្រចាំតាមបណ្តាគោលដៅនានា ២៤/២៤ម៉ោង។

ប្រធាននាយកដ្ឋាន ក៏បានស្នើដល់កម្លាំងភ្នាក់ងារសន្តិសុខឯកជនទាំងអស់ ត្រូវអនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» នេះឱ្យមានប្រសិទ្ធភាពខ្ពស់ ពិសេសបង្ការទប់សង្កាត់បទល្មើស និងរាយការណ៍ដល់សមត្ថកិច្ចមូលដ្ឋាន ឬសមត្ថកិច្ចជំនាញ ដើម្បីបង្ការទប់ស្កាត់បង្ក្រាបបទល្មើសឱ្យទាន់ពេលវេលា ជាពិសេសបទល្មើសគ្រឿងញៀន និងបទល្មើសព្រហ្មទណ្ឌនានា ដោយតម្រូវឱ្យមានកិច្ចសហការល្អ ជាមួយសមត្ថកិច្ចមូលដ្ឋាន ត្រូវរាយការណ៍អំពីបទល្មើស និងសម្រួលដល់សមត្ថកិច្ច ក្នុងការបង្ការទប់ស្កាត់ បង្ក្រាបបទល្មើសតាមគោលដៅនីមួយៗ។

ឧត្តមសេនីយ៍ឯក លឹម សុខារស្មី បានគូសបញ្ជាក់ថា ដើម្បីមានសមត្ថភាពក្នុងការចូលរួមបង្ការបង្ក្រាប បទល្មើសតាមគោលដៅ យើងទាំងអស់គ្នាត្រូវពង្រឹងសមត្ថភាព គឺផ្តើមចេញពីការបណ្តុះបណ្តាល ឱ្យមានការយល់ដឹងជ្រៅជ្រះ ក្នុងការអនុវត្តភារកិច្ចនេះ។ នេះជាលើកទី៥៨ ដែលនាយកដ្ឋានគ្រប់គ្រងសន្តិសុខឯកជន រៀបចំបើកវគ្គបំប៉នជំនាញភ្នាក់ងារសន្តិសុខឯកជន ដល់ភ្នាក់ងារសន្តិសុខឯកជនបម្រើសេវាកម្ម និងមិនបម្រើសេវាកម្ម។

នៅក្នុងវគ្គបំប៉នជំនាញនេះ សិក្ខាកាមទាំងអស់នឹងទទួលបានចំណេះដឹងលើប្រធានបទសំខាន់ៗដែលកំពុងតែជួបប្រទះ និងប្រឈមជាប្រចាំថ្ងៃក្នុងការអនុវត្តការងារដូចជា៖ តួនាទី និងការទទួលខុសត្រូវរបស់ភ្នាក់ងារសន្តិសុខឯកជន វិធីសាស្រ្តការពារគោលដៅ ច្បាប់ចរាចរណ៍ផ្លូវគោក របៀបផ្តល់ជំនួយ និងសហការជាមួយសមត្ថកិច្ច ការឈ្វេងយល់អំពីក្រមព្រហ្មទណ្ឌ និងក្រមនីតិវិធីព្រហ្មទណ្ឌ វិធានការបង្ការពន្លត់អគ្គីភ័យ និងការជម្លៀសខ្លួនចេញពីអគ្គីភ័យ និងកិច្ចសហការការពារកន្លែងកើតហេតុ ជាដើម៕

The post អគ្គស្នងការនគរបាលជាតិ ពង្រឹងការងារក្រុមហ៊ុនផ្ដល់សេវាសន្ដិសុខឯកជន appeared first on Kampuchea Thmey Daily.

តាមសេចក្ដីបំភ្លឺព័ត៌មានរបស់អ្នកនាំពាក្យអគ្គស្នងការដ្ឋាននគរបាលជាតិ ក្រុមជនស៊ីវិលមួយក្រុមនោះ គឺជាកងកម្លាំងប្រតិបត្តិការរបស់នាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិ ដែលបានទទួលបញ្ជាឲ្យចុះអនុវត្តដីការបស់ព្រះរាជអាជ្ញា នៃសាលាដំបូងរាជធានីភ្នំពេញ ប៉ុន្តែប្រតិបត្តិការនេះមានការភាន់ច្រឡំចំពោះអត្តសញ្ញាណរថយន្ត ដែលបណ្តាលឲ្យមានការរំខានដល់ការធ្វើដំណើររបស់ប្រជាពលរដ្ឋ។ ហើយក្រោយពីដឹងថាមានការភាន់ច្រឡំ កងកម្លាំងប្រតិបត្តិការទាំងអស់បានដកមកកាន់អង្គភាពវិញ។

អ្នកនាំពាក្យរូបនេះបញ្ជាក់ថា ចំពោះចំណុចខ្វះខាតក្នុងប្រតិបត្តិការធ្វើឲ្យមានការសង្ស័យ គឺដោយសារកងកម្លាំងអនុវត្តច្បាប់មិនបានគ្រងឯកសណ្ឋានជាសមត្ថកិច្ច តែមានពាក់ប័ណ្ណសម្គាល់ខ្លួន។

ជាមួយគ្នានេះ អគ្គស្នងការដ្ឋាននគរបាលជាតិក៏សូមទទួលយកនូវចំណុចខ្វះខាតក្នុងការអនុវត្តភារកិច្ចរបស់កងកម្លាំង និងស្នើសុំឲ្យមានការយោគយល់អធ្យាស្រ័យចំពោះកំហុសឆ្គងទាំងនេះ។ អគ្គស្នងការដ្ឋាននគរបាលជាតិនឹងធ្វើការពិនិត្យ ណែនាំកែលម្អឡើងវិញដល់កងកម្លាំងប្រតិបត្តិការ និងសូមអរគុណនូវរាល់កិច្ចសហការផ្តល់ព័ត៌មានក្នុងន័យស្ថាបនា និងសង្ឃឹមថា សាធារណជនពុំមានទស្សនៈ ទុទ្ទិដ្ឋិនិយមចំពោះហេតុការណ៍នេះឡើយ។

សូមបញ្ជាក់ថា កាលពីថ្ងៃទី២៦ ខែកុម្ភៈ ឆ្នាំ២០២៤ ម្ចាស់គណនីហ្វេសប៊ុកឈ្មោះ Un Chanpanharith បានបង្ហោះចែកចាយនៅលើបណ្ដាញសង្គមថា «ធ្លាប់តែឃើញក្នុងរឿង ឥឡូវជួបផ្ទាល់អត់ដឹងមកពីខាងណាទេ ឈប់ស្តុបសុខៗ ជិះឡានមកកាក់ពីមុខ (Luxus is200tt ស្លាកលេខ2BO 7770) ចុះមកគោះឡានមានកាំភ្លើងនៅចង្កេះ ម៉ូតូឡានផង។ ហៅចុះមកក្រៅមក ទាល់បើកកញ្ចក់មកថាច្រឡំ សំណាងហើយជិះជាមួយម៉ាក់ និងក្មួយ បើតែម្នាក់ឯងមិនដឹងម៉ិច។ នៅច្បារអំពៅ ស្ដុបព្រែកបារាំង ការងារតែងតែមានកំហុស និងការយល់ច្រឡំ»៕

អត្ថបទ៖ សុខុម

The post អ្នកនាំពាក្យអគ្គស្នងការនគរបាលជាតិ៖ ការឃាត់រថយន្ដមួយគ្រឿងនៅខណ្ឌច្បារអំពៅ​ គឺជាការភាន់ច្រឡំ(មានវីដេអូ) appeared first on Kampuchea Thmey Daily.

ការណែនាំនេះបានធ្វើឡើងក្នុងកិច្ចប្រជុំបូកសរុបដកពិសោធន៍រឹតបន្ដឹងច្បាប់ចរាចរណ៍ផ្លូវគោក ឆ្នាំ២០២៣ និងលើកទិសដៅការងារឆ្នាំ២០២៤ នៅព្រឹកថ្ងៃទី៣០ ខែមករា ឆ្នាំ២០២៤ ដោយមានការចូលរួមពីប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ស្នងការនគរបាលរាជធានី-ខេត្ត ស្នងការរងទទួលផែន នាយការិយាល័យរាជធានី-ខេត្ត និងអធិការខណ្ឌទាំង១៤ នៃស្នងការដ្ឋាននគរបាលរាជធានីភ្នំពេញ។

នាយឧត្តមសេនីយ៍ ស ថេត បានគូសបញ្ជាក់ថា ឆ្លងកាត់យុទ្ធនាការប៉ុន្មានថ្ងៃនេះនៅរាជធានីភ្នំពេញ អត្រាគ្រោះថ្នាក់ចរាចរណ៍មានការថយចុះ បើធៀបនឹងរយៈពេលមុខនៃយុទ្ធនាការត្រួតពិនិត្យរឹតបន្ដឹងច្បាប់ចរាចរណ៍ និងត្រួតពិនិត្យជាតិអាល់កុលលើអ្នកបើកបរ។

នាយឧត្តមសេនីយ៍ អគ្គស្នងការនគរបាលជាតិ បានថ្លែងយ៉ាងដូច្នេះថា «ក្នុងរយៈពេលប៉ុន្មានថ្ងៃមកនេះ ដោយសារមានការចង្អុលបង្ហាញ ការដាក់បទបញ្ជារបស់សម្ដេចធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា ខ្ញុំបានចាត់ចែងបញ្ជាផ្ទាល់ទៅឯកឧត្តម ឧត្តមសេនីយ៍ឯក ជួន ណារិន្ទ ដើម្បីបើកយុទ្ធនាការមួយធ្វើការត្រួតពិនិត្យគ្រឿងស្រវឹង។ ជាលទ្ធផល នៅរាជធានីភ្នំពេញ មានការថយចុះចំនួនគ្រោះថ្នាក់ មានន័យថាយើងដើរតាមផ្លូវមួយដែលត្រឹមត្រូវ»។

នាយឧត្តមសេនីយ៍ អគ្គស្នងការនគរបាលជាតិ បន្តថា ការរឹតបន្ដឹងច្បាប់ចរាចរណ៍ត្រួតពិនិត្យជាតិស្រវឹងលើអ្នកបើកបរ គឺដើម្បីការពារអាយុជីវិតរបស់ប្រជាពលរដ្ឋ ឬឈានទៅលុបបំបាត់នូវភាពអាណាធិបតេយ្យ ការមិនគោរពច្បាប់ចរាចរណ៍។ ឯកឧត្តម នាយឧត្តមសេនីយ៍ បន្ថែមទៀតថា នៅពេលខាងមុខ រាជធានី-ខេត្តណាដែលនៅតែបន្ដកើនឡើងនូវគ្រោះថ្នាក់ចរាចរណ៍ទៀត នឹងត្រូវកោះប្រជុំដាច់ដោយឡែកដើម្បីដកពិសោធន៍បន្ដទៀត។

ជាមួយគ្នានេះ នាយឧត្តមសេនីយ៍ ស ថេត ក៏បានណែនាំដល់មន្ដ្រីនគរបាលទាំងអស់ នៅពេលអនុវត្តរឹតបន្ដឹងច្បាប់ចរាចរណ៍ ត្រូវប្រើប្រាស់អាកប្បកិរិយា ពាក្យសម្ដីឲ្យនាមសមរម្យ ហើយត្រូវលុបបំបាត់នូវបាតុភាពអសកម្មផ្សេងៗ ជៀសវាងនូវការតិះទៀនពីសំណាក់ប្រជាពលរដ្ឋ។ ប៉ុន្ដែកម្លាំងសមត្ថកិច្ចត្រូវអនុវត្តការងារនេះឲ្យបានម៉ឺងម៉ាត់ និងគ្មានការលើកលែងដោយឡើយ ចំពោះបុគ្គលទាំងឡាយដែលរារាំងដល់សមត្ថកិច្ច៕

The post អគ្គស្នងការនគរបាលជាតិ ណែនាំឲ្យនគរបាលទូទាំងប្រទេស​ ត្រូវបន្ដយុទ្ធនាការរឹតបន្ដឹងច្បាប់ចរាចរណ៍ ពិសេសត្រួតពិនិត្យជាតិ​អាល់កុល appeared first on Kampuchea Thmey Daily.