អង់គ្លេស Archives - Kampuchea Thmey Daily

អង់គ្លេស ប្រកាសបញ្ជូនយន្តហោះចម្បាំង នាវាចម្បាំង ឧបករណ៍រកមីនទៅច្រក Hormuz

Minea Neu — Wed, 13 May 2026 02:37:27 +0000

ចក្រភពអង់គ្លេស បានឲ្យដឹងនៅថ្ងៃអង្គារថា ខ្លួននឹងចូលរួមផ្តល់នូវឧបករណ៍រុករកមីនស្វ័យប្រវត្តិ យន្តហោះចម្បាំង Typhoon និងនាវាចម្បាំង HMS Dragon សម្រាប់បេសកកម្មការពារជាតិពហុជាតិសាសន៍ដែលមានគោលបំណងធានាសុវត្ថិភាពការដឹកជញ្ជូននៅច្រកសមុទ្រហ័រមូស (Hormuz)។

យោងតាមភ្នាក់ងារសារព័ត៌មានរ៉យទ័រ ចុះផ្សាយថ្ងៃទី១៣ ខែឧសភា ឆ្នាំ២០២៦ រដ្ឋមន្ត្រីក្រសួងការពារជាតិអង់គ្លេស លោក John Healey បានប្រកាសពីការប្តេជ្ញាចិត្តនេះ អំឡុងពេលកិច្ចប្រជុំកំពូលជាមួយសមភាគីជាង ៤០រូបមកពីប្រទេសដទៃទៀតពាក់ព័ន្ធនឹងបេសកកម្មនៅច្រកហ័រមូសហើយនឹងចាប់ផ្តើមដំណើរការ ពេលលក្ខខណ្ឌត្រូវបានអនុញ្ញាត។

យន្តហោះចម្បាំងអង់គ្លេស។ រូបភាព៖ Reuters

លោកលើកឡើងក្នុងសេចក្តីថ្លែងការណ៍មួយថា៖ « ជាមួយសម្ព័ន្ធមិត្តរបស់យើង បេសកកម្មពហុជាតិសាសន៍នេះនឹងមាន សុវត្ថិភាព ឯករាជ្យ និងអាចទុកចិត្តបាន»។

សង្គ្រាមដែលបង្កដោយដោយសហរដ្ឋអាមេរិក-អ៊ីស្រាអែលលើអ៊ីរ៉ង់ បានកាត់បន្ថយចរាចរណ៍ឆ្លងកាត់ច្រកសមុទ្រ Hormuz យ៉ាងខ្លាំង ជាពិសេសរំខានដល់ការនាំចេញប្រេងនិងធ្វើឱ្យតម្លៃថាមពលកើនឡើងជាគំហុក។

ការចូលរួមចំណែករបស់ចក្រភពអង់គ្លេស នឹងទទួលបានការគាំទ្រពីមូលនិធិថ្មីចំនួន ១៥៥.៥៣លានដុល្លារ សម្រាប់ឧបករណ៍រាវរកមីន និងប្រព័ន្ធប្រឆាំងដ្រូន ខណៈទីក្រុងឡុងដ៍ស្វែងរកការធានាឡើងវិញនូវការដឹកជញ្ជូនពាណិជ្ជកម្មសេរីភាពនៃការធ្វើនាវាចរណ៍ ចំពេលមានភាពតានតឹងក្នុងតំបន់កាន់តែខ្លាំង។

កញ្ចប់ទឹកប្រាក់នេះនឹងរួមបញ្ចូលគ្នាជាប្រព័ន្ធ ដើម្បីស្វែងរកនិងសម្អាតមីនដោយកងទ័ពជើងទឹក ទូកគ្មានមនុស្សបើកល្បឿនលឿន យន្តហោះចម្បាំង Typhoon សម្រាប់ល្បាតតាមអាកាស និងនាវាចម្បាំង HMS Dragon ជានាវាពិឃាតការពារដែនអាកាស កំពុងធ្វើដំណើរទៅកាន់មជ្ឈិមបូព៌ារួចហើយ៕

សម្រួល៖ ណឺ មិនា

The post អង់គ្លេស ប្រកាសបញ្ជូនយន្តហោះចម្បាំង នាវាចម្បាំង ឧបករណ៍រកមីនទៅច្រក Hormuz appeared first on Kampuchea Thmey Daily.

នាវាផ្ទុកយន្តហោះបារាំង ដើរដោយថាមពលនុយក្លេអ៊ែរ ទៅជិតសមុទ្រក្រហម ក្បែរច្រក Hormuz

Minea Neu — Thu, 07 May 2026 05:30:00 +0000

ក្រុមនាវាផ្ទុកយន្តហោះរបស់បារាំង កំពុងធ្វើដំណើរទៅភាគខាងត្បូងនៃព្រែកជីកស៊ុយអេ (Suez) ចូលទៅក្នុងសមុទ្រក្រហម ដើម្បីត្រៀមសម្រាប់បេសកកម្មមិនប្រាកដប្រជានាពេលអនាគត ដែលជាផ្នែកមួយនៃផែនការបារាំង-អង់គ្លេសសម្រាប់ច្រកសមុទ្រហ័រមូស (Hormuz)។ នេះបើយោងតាមកងកម្លាំងប្រដាប់អាវុធបារាំងលើកឡើងកាលពីថ្ងៃពុធ។

យោងតាមសារព័ត៌មាន ABC ផ្សាយថ្ងៃទី៦ ខែឧសភា ឆ្នាំ២០២៦ នាវាផ្ទុកយន្តហោះ Charles de Gaulle ដើរដោយថាមពលនុយក្លេអ៊ែរ រួមទាំងមាននាវាអមដំណើរ ផ្លាស់ប្តូរទីតាំងឆ្ពោះទៅភាគខាងត្បូងព្រែកជីកស៊ុយអេ គឺជាដំណាក់កាលចុងក្រោយនៃការដាក់ពង្រាយនាវានៅមជ្ឈិមបូព៌ា ដែលជាប្រកាសលើកដំបូងដោយប្រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) ក្នុងសុន្ទរកថាតាមទូរទស្សន៍នៅថ្ងៃទី០៣ ខែមីនា មួយថ្ងៃ មុនពេលអ៊ីរ៉ង់បិទច្រកសមុទ្រ Hormuz ។

នាវា Charles de Gaulle របស់បារំាង។ រូបភាព៖ EN.Com

ការផ្លាស់ប្តូរទៅភាគខាងត្បូងនៃព្រែកជីកស៊ុយអេ នាំឱ្យនាវាផ្ទុកយន្តហោះតែមួយគត់របស់បារាំងខិតទៅជិតចំណុចប្រសព្វនៃឈូងសមុទ្រពែរ្ស ជាកន្លែងដែលប្រេងមួយភាគប្រាំរបស់ពិភពលោកតែងឆ្លងកាត់ តែអ៊ីរ៉ង់បិទចរាចរណ៍ពាណិជ្ជកម្ម ចាប់តាំងពីដើមខែមីនា ដើម្បីដាក់សម្ពាធឲ្យសហរដ្ឋអាមេរិកបោះបង់ការធ្វើសង្គ្រាមប្រឆាំងអ៊ីរ៉ង់។

លោក Guillaume Vernet អ្នកនាំពាក្យរបស់ប្រធានសេនាធិការកងកម្លាំងប្រដាប់អាវុធបារាំងប្រាប់ទីភ្នាក់ងារសារព័ត៌មាន AP ថា៖ « ដំណើរឆ្ពោះទៅភាគខាងត្បូងនៃព្រែកជីក Suez គឺជារឿងថ្មីសម្រាប់យើង។ តាមភូមិសាស្ត្រ វានៅជិតច្រកសមុទ្រ Hormuz ជាង ដូច្នេះនឹងអាចឱ្យយើងឆ្លើយតបបានលឿនជាងមុន ពេលមានលក្ខខណ្ឌណាមួយដែលត្រូវបានបំពេញ»។

យ៉ាងណា លោក Vernet សង្កត់ធ្ងន់ថា៖ « សន្តិសុខពហុជាតិសាស្រ្តនៅច្រក Hormuz បង្កើតឡើងដោយប្រទេសបារាំង ចក្រភពអង់គ្លេសនិងប្រទេសជាង ៥០ប្រទេសនឹងមិនចាប់ផ្តើមប្រតិបត្តិការទេ រហូតដល់កម្រិតពីរត្រូវបានលុបចោល ដូចជាការគំរាមកំហែងដល់ការដឹកជញ្ជូនត្រូវតែបន្ថយ ហើយឧស្សាហកម្មសមុទ្រត្រូវតែធានាឱ្យបានគ្រប់គ្រាន់ដើម្បីប្រើប្រាស់ច្រកសមុទ្រ»។

លោកបន្ថែមថា ប្រតិបត្តិការណាមួយកើតឡើងនឹងតម្រូវឱ្យមានការព្រមព្រៀងពីប្រទេសជិតខាង។

លោកមានប្រសាសន៍ថា៖ « សព្វថ្ងៃនេះ ច្រកសមុទ្រ Hormuz ជាប់គាំងដោយសារតែការគំរាមកំហែង ហើយការធានាចំពោះសុវត្ថិភាពគឺខ្ពស់ណាស់។ គ្មានកប៉ាល់ណាមួយនឹងធ្វើឱ្យដំណើរទៅកន្លែងគ្រោះថ្នាក់នោះទេ»។

គួរបញ្ជាក់ថា ប្រតិបត្តិការរបស់បារាំងគឺខុសពីគម្រោងសេរីភាពឬ «Project Freedom» ជាបេសកកម្មអមដំណើររបស់សហរដ្ឋអាមេរិកចាប់ផ្តើមកាលពីថ្ងៃអាទិត្យ ទាញការបាញ់ប្រហារ និងការគំរាមកំហែងពីអ៊ីរ៉ង់ ទោះបីជាមានបទឈប់បាញ់នៅថ្ងៃទី ៨ ខែមេសា។

លោក Vernet និយាយថា៖ « វាជាបេសកកម្មមួយដែលខុសពីបេសកកម្មរបស់សហរដ្ឋអាមេរិក។ ផែនការបារាំង-អង់គ្លេសគឺជាការការពារ និងស្របតាមច្បាប់អន្តរជាតិ»៕

ប្រែសម្រួល៖ ណឺ មិនា

The post នាវាផ្ទុកយន្តហោះបារាំង ដើរដោយថាមពលនុយក្លេអ៊ែរ ទៅជិតសមុទ្រក្រហម ក្បែរច្រក Hormuz appeared first on Kampuchea Thmey Daily.

ប្រទេសធំៗនៅអឺរ៉ុប និងជប៉ុន ត្រៀមចូលរួមធានាសុវត្ថិភាពច្រកហ័រមូហ្ស តាមសំណើ ត្រាំ

Huon Dina — Fri, 20 Mar 2026 03:47:38 +0000

បណ្តាប្រទេសធំៗនៅអឺរ៉ុប និងជប៉ុន បានចេញសេចក្តីថ្លែងការណ៍រួមមួយកាលពីថ្ងៃព្រហស្បតិ៍ ដោយនិយាយថា ពួកគេត្រៀមខ្លួនរួចជាស្រេចដើម្បីចូលរួមកិច្ចខិតខំប្រឹងប្រែងធានាសុវត្ថិភាពសម្រាប់ការដឹកជញ្ជូនតាមរយៈច្រកសមុទ្រហ័រមូហ្ស ហើយនឹងចាត់វិធានការដើម្បីធ្វើឱ្យទីផ្សារថាមពលមានស្ថិរភាព។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ការប្រកាសយ៉ាងដូច្នេះ ធ្វើឡើងក្រោយមានការទាមទារជាបន្តបន្ទាប់ពីប្រធានាធិបតីអាមេរិក លោក ដូណាល់ ត្រាំ ឱ្យបណ្ដាប្រទេសផ្សេងៗរួមដៃគ្នាជួយអាមេរិកក្នុងការធានាសុវត្ថិភាពច្រកហ័រមូហ្ស ដែលជាផ្លូវដឹកជញ្ជូនប្រេងដ៏សំខាន់របស់ពិភពលោក។ កន្លងមក មានសេចក្ដីរាយការណ៍ថា បណ្ដាប្រទេសមួយចំនួន រួមទាំងអាល្លឺម៉ង់ បានច្រានចោលសំណើរបស់ ត្រាំ ដែលធ្វើឱ្យ ត្រាំ ហៅពួកគេថា «រមិលគុណ»។

ប្រទេសធំៗទាំងនោះ រួមមាន ចក្រភពអង់គ្លេស បារាំង អាល្លឺម៉ង់ អ៊ីតាលី ហូឡង់ និងជប៉ុន។

ពួកគេបាននិយាយក្នុងសេចក្ដីថ្លែងការណ៍យ៉ាងដូច្នេះថា៖ «យើងសូមអំពាវនាវដល់អ៊ីរ៉ង់ឱ្យបញ្ឈប់ជាបន្ទាន់នូវការគំរាមកំហែង ការដាក់មីន ការវាយប្រហារដោយដ្រូន និងមីស៊ីល និងការប៉ុនប៉ងផ្សេងទៀតដើម្បីបិទច្រកសមុទ្រចំពោះការដឹកជញ្ជូនពាណិជ្ជកម្ម និងអនុវត្តតាមសេចក្តីសម្រេចលេខ ២៨១៧ របស់ក្រុមប្រឹក្សាសន្តិសុខអង្គការសហប្រជាជាតិ»។

ពួកគេបន្តថា៖ «សេរីភាពនៃការធ្វើនាវាចរណ៍គឺជាគោលការណ៍ជាមូលដ្ឋាននៃច្បាប់អន្តរជាតិ រួមទាំងក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រផងដែរ»។

ការបិទច្រកសមុទ្រហ័រមូហ្ស បានក្លាយជាអាវុធដ៏សំខាន់មួយសម្រាប់អ៊ីរ៉ង់ ក្នុងការឆ្លើយតបទៅនឹងការវាយប្រហាររបស់សហរដ្ឋអាមេរិក និងអ៊ីស្រាអែល។ ការបិទនេះ បានបង្កការរាំងស្ទះដល់ដំណឹកជញ្ជូនទំនិញសំខាន់ៗពីមជ្ឈិមបូព៌ា រួមទាំងប្រេងកាត ដែលធ្វើឱ្យថ្លៃដឹកជញ្ជូន និងថាមពល ហក់ឡើងទូទាំងសកលលោក។

បណ្ដាប្រទេសអឺរ៉ុបធំៗ និងជប៉ុនដដែល បាននិយាយដោយមិនទម្លាក់កំហុសលើសហរដ្ឋអាមេរិក និងអ៊ីស្រាអែលថា៖ «ឥទ្ធិពលនៃទង្វើរបស់អ៊ីរ៉ង់ នឹងប៉ះពាល់ដល់ប្រជាជនគ្រប់ផ្នែកទាំងអស់នៃពិភពលោក ជាពិសេសអ្នកងាយរងគ្រោះ»។

ពួកគេបន្តថា៖ «យើងសូមបង្ហាញការត្រៀមខ្លួនរួចជាស្រេច ក្នុងការរួមចំណែកដល់កិច្ចខិតខំប្រឹងប្រែងធានាបាននូវការធ្វើដំណើរឆ្លងកាត់ច្រកសមុទ្រដោយសុវត្ថិភាព។ យើងសូមស្វាគមន៍ចំពោះការប្តេជ្ញាចិត្តរបស់ប្រទេសនានា ដែលកំពុងចូលរួមក្នុងការរៀបចំផែនការនេះ»។

ក្រៅពីនោះ ប្លុកដដែលបានស្វាគមន៍ចំពោះការសម្រេចចិត្តរបស់ទីភ្នាក់ងារថាមពលអន្តរជាតិ (IEA) ដើម្បីអនុញ្ញាតឱ្យមានការបញ្ចេញទុនបម្រុងប្រេងកាតជាយុទ្ធសាស្ត្រ។ ពួកនិយាយយ៉ាងដូច្នេះថា៖ «យើងនឹងចាត់វិធានការផ្សេងទៀត ដើម្បីធ្វើឱ្យទីផ្សារថាមពលមានស្ថេរភាព រួមទាំងការធ្វើការជាមួយប្រទេសផលិតមួយចំនួន ដើម្បីបង្កើនផលិតកម្ម»៕

The post ប្រទេសធំៗនៅអឺរ៉ុប និងជប៉ុន ត្រៀមចូលរួមធានាសុវត្ថិភាពច្រកហ័រមូហ្ស តាមសំណើ ត្រាំ appeared first on Kampuchea Thmey Daily.

ចិនអំពាវនាវឱ្យរុស្ស៊ី-អ៊ុយក្រែនអត់ធ្មត់ បន្ទាប់ពីរុស្ស៊ីចោទ បារាំងនិងអង់គ្លេស ផ្តល់នុយក្លេអ៊ែរឲ្យអ៊ុយក្រែន

Minea Neu — Thu, 26 Feb 2026 10:30:35 +0000

ប្រទេសចិនបង្កើនជំហរប្រឆាំងនឹងការកើនឡើងនៃអាវុធនុយក្លេអ៊ែរក្នុងប្រទេសអ៊ុយក្រែន និងអំពាវនាវឱ្យមានការអត់ធ្មត់ បន្ទាប់ពីរុស្ស៊ីអះអាងថា ចក្រភពអង់គ្លេស និងបារាំងកំពុងមានគម្រោងផ្តល់អាវុធនុយក្លេអ៊ែរដល់ទីក្រុងកៀវ។

អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning) ជំរុញឱ្យគ្រប់ភាគីទាំងអស់ជៀសវាងសកម្មភាពណាដែលអាចបង្កឱ្យមានការយល់ច្រឡំ ឬបង្កើនភាពតានតឹងកាន់តែខ្លាំងបន្ថែមទៀត។

អ្នកនាំពាក្យក្រសួងការបរទេសចិន លោកស្រី Mao Ning ។ រូបភាព៖ ក្រសួងការបរទេសចិន

លោកស្រី ម៉ៅ និយាយថា៖ «យើងសូមអំពាវនាវឱ្យភាគីពាក់ព័ន្ធរក្សាភាពស្ងប់ស្ងាត់ អនុវត្តការអត់ធ្មត់ និងជៀសវាងចលនាណាមួយដែលអាចនាំឱ្យមានការយល់ច្រឡំនិងការគិតខុស ធ្វើឱ្យភាពតានតឹងកាន់តែកើនឡើង»។

យ៉ាងណា លោកស្រី បន្ថែមទៀតថា៖ «ប្រទេសចិនតែងតែជឿជាក់ថា អាវុធនុយក្លេអ៊ែរមិនត្រូវប្រើប្រាស់ទេ សង្គ្រាមនុយក្លេអ៊ែរមិនត្រូវប្រយុទ្ធទេ ហើយកាតព្វកិច្ចមិនរីកសាយភាយអាវុធនុយក្លេអ៊ែរអន្តរជាតិគួរតែត្រូវបានគោរពយ៉ាងម៉ឺងម៉ាត់»។

ការបញ្ជាក់ជាថ្មីរបស់លោកស្រីពីជំហររបស់ទីក្រុងប៉េកាំងបានកើតឡើង បន្ទាប់ពីការឈ្លានពានរបស់រុស្ស៊ីលើអ៊ុយក្រែនកំពុងស្ថិតក្រោមការត្រួតពិនិត្យឡើងវិញពីអន្តរជាតិ ដោយជម្លោះដ៏សាហាវបំផុតនៅអឺរ៉ុបចាប់តាំងពីសង្គ្រាមលោកលើកទី២ ចូលដល់ឆ្នាំទី៥។

យ៉ាងណា លោកស្រី Tammy Bruce តំណាងរងសហរដ្ឋអាមេរិកប្រចាំអង្គការសហប្រជាជាតិ បានរិះគន់ អំឡុងពេលជួបជុំក្រុមប្រឹក្សាសន្តិសុខកាលពីថ្ងៃអង្គារថា៖ «ប្រទេសចិននៅតែជាអ្នកជំរុញនៃម៉ាស៊ីនសង្គ្រាមដ៏សំខាន់របស់រុស្ស៊ី»។

លោកស្រីបន្ថែមថា៖ «ប្រសិនបើប្រទេសចិនពិតជាចង់បានសន្តិភាពមែន គួរតែបញ្ចប់ការនាំចេញទំនិញប្រើប្រាស់ពីរប្រភេទ(ទាក់ទងយោធា និងបច្ចេកវិទ្យា) ជាបន្ទាន់ និងឈប់ទិញប្រេងរបស់រុស្ស៊ី»។

ចំណែក លោកស្រី Fu Cong បេសកជនជាន់ខ្ពស់របស់ទីក្រុងប៉េកាំងប្រចាំអង្គការសហប្រជាជាតិបានបដិសេធការចោទប្រកាន់នេះថា មិនអាចទទួលយកបានទាំងស្រុង និងជាការបង្ខូចកេរ្តិ៍ឈ្មោះប្រទេសចិន។

លោកស្រី Fu បន្តថា៖ « យើងមិនបានផ្តល់អាវុធប្រល័យជីវិតដល់ភាគីណាមួយនៃជម្លោះនោះទេ ហើយយើងបានអនុវត្តការគ្រប់គ្រងយ៉ាងតឹងរ៉ឹងលើទំនិញប្រើប្រាស់ពីរយ៉ាង(ទាក់ទងយោធា និងបច្ចេកវិទ្យា) យ៉ាងជាប់លាប់»៕

ប្រែសម្រួល៖ ណឺ មិនា

The post ចិនអំពាវនាវឱ្យរុស្ស៊ី-អ៊ុយក្រែនអត់ធ្មត់ បន្ទាប់ពីរុស្ស៊ីចោទ បារាំងនិងអង់គ្លេស ផ្តល់នុយក្លេអ៊ែរឲ្យអ៊ុយក្រែន appeared first on Kampuchea Thmey Daily.

ចក្រភពអង់គ្លេសនិងបណ្តាប្រទេសអ៊ឺរ៉ុបមួយចំនួន ប្រឈមឆ្លងជំងឺកញ្រ្ជឹលតាមខ្យល់

Minea Neu — Tue, 27 Jan 2026 05:01:03 +0000

ជំងឺកញ្ជ្រឹល ត្រូវបានគេស្គាល់ថា rubeola ឬ «កញ្ជ្រឹល១០ថ្ងៃ» គឺជាការឆ្លងដ៏ធ្ងន់ធ្ងរ ជាពិសេសតាមរយៈខ្យល់។ វាប៉ះពាល់ដល់ផ្លូវដង្ហើម ប្រព័ន្ធភាពស៊ាំ និងស្បែក រីករាលដាលយ៉ាងឆាប់រហ័សតាមរយៈដំណក់ទឹក នៅពេលដែលអ្នកជំងឺក្អក កណ្តាស់ ឬនិយាយ។ ទោះបីជាវាធ្លាប់ត្រូវបានគេចាត់ទុកថា ជាជំងឺកុមារធម្មតាក៏ដោយ ប៉ុន្តែអាចបណ្តាលឱ្យមានផលវិបាកធ្ងន់ធ្ងរដូចជា ពិការភ្នែក រលាកខួរក្បាល (ហើមខួរក្បាល) និងជំងឺរលាកសួតផងដែរ។

យោងតាមសារព័ត៌មានរ៉យទ័រ អង្គការសុខភាពពិភពលោក (WHO) បានឱ្យដឹងកាលពីថ្ងៃចន្ទថា ចក្រភពអង់គ្លេស និងប្រទេសមួយចំនួនទៀតនៅតំបន់អឺរ៉ុប បានបាត់បង់លទ្ធភាពលុបបំបាត់ជំងឺកញ្ជ្រឹលរបស់ពួកគេ បន្ទាប់ពីការឆ្លងមានការកើនឡើងនៅទូទាំងទ្វីប។

វ៉ាក់សាំងកញ្រ្ជឹល។ Reuters

មិនតែប៉ុណ្ណោះបណ្តាប្រទេសមួយចំនួន ដូចជា អេស្បាញ អូទ្រីស អាមេនី អាស៊ែបៃហ្សង់ (Azerbaijan) និងអ៊ូសបេគីស្ថាន (Uzbekistan) ក៏បាត់បង់លទ្ធភាពទទួលបានការព្យាបាលរបស់ពួកគេដែរ ខណៈអង្គការសុខភាពពិភពលោកបានជំរុញឱ្យប្រទេសនានាបង្កើនអត្រាការចាក់វ៉ាក់សាំង ជាពិសេសក្នុងចំណោមប្រជាជនដែលមិនបានការពារ ជាពិសេសកុមារ ត្រូវធានាថាមេរោគនឹងមិនឆ្លងទៅអ្នកផ្សេងទៀតកាន់តែច្រើន។

គួរបញ្ជាក់ផងដែរថា កញ្ជ្រឹលគឺអាចការពារបានទាំងស្រុងដោយការចាក់វ៉ាក់សាំង ប៉ុន្តែវាឆ្លងខ្លាំង ដូច្នេះហើយគឺវាជាជំងឺមួយក្នុងចំណោមជំងឺដំបូងគេដែលស្ទុះងើបឡើងវិញនៅពេលដែលអត្រានៃការចាក់វ៉ាក់សាំងធ្លាក់ចុះ។

កញ្រ្ជឹលជាទូទៅបណ្តាលឱ្យមានរោគសញ្ញារួមមានគ្រុនក្តៅខ្លាំង និងឡើងកន្ទួល ប៉ុន្តែវាក៏អាចនាំឱ្យមានផលវិបាករយៈពេលវែងធ្ងន់ធ្ងរ និងអាចស្លាប់បានផងដែរ។

រីឯប្រទេសកាណាដាបានបាត់បង់លទ្ធភាពលុបបំបាត់ជំងឺកញ្រ្ជឹលរបស់ខ្លួនកាលពីឆ្នាំមុន ហើយសហរដ្ឋអាមេរិកកំពុងធ្វើការដើម្បីរក្សាស្ថានភាពរបស់ខ្លួននៅពេលដែលការឆ្លងកើនឡើង។

គណៈកម្មាធិការសុខភាពពិភពលោក (WHO) ក្នុងតំបន់នីមួយៗ បានឱ្យដំបូន្មានថាប្រទេសនីមួយៗ គួរសម្រចបានដោយគ្មានជំងឺកញ្ជ្រឹល និងអត្រានៃការឆ្លងថយចុះ។

យ៉ាងណា ដើម្បីត្រូវបានចាត់ទុកថាគ្មានជំងឺកញ្ជ្រឹល អង្គការសុខភាពពិភពលោក (WHO) បានបន្តទៀតថា ប្រទេសមួយត្រូវតែមិនមានករណីឆ្លងក្នុងស្រុកនៃប្រភេទជំងឺដូចគ្នាសម្រាប់រយៈពេល ១២ខែ ឬយូរជាងនេះ៕

ប្រែសម្រួល៖ ណឺ មិនា

The post ចក្រភពអង់គ្លេសនិងបណ្តាប្រទេសអ៊ឺរ៉ុបមួយចំនួន ប្រឈមឆ្លងជំងឺកញ្រ្ជឹលតាមខ្យល់ appeared first on Kampuchea Thmey Daily.

ការដោះដូរទំនិញកម្ពុជា-អង់គ្លេស សម្រេចបានទឹកប្រាក់ជាង ៩០០ លានដុល្លារ ត្រឹមរយៈពេល ១០ខែ

deth leng — Fri, 14 Nov 2025 02:08:16 +0000

ការដោះដូរទំនិញកម្ពុជា-អង់គ្លេសសម្រេចបានទំហំទឹកប្រាក់ជាង ៩០០ លានដុល្លារនៅក្នុងរយៈពេល ១០ ខែ ឆ្នាំ ២០២៥ កើនឡើង ៧,១ ភាគរយ ធៀបនឹងរយៈពេលដូចគ្នានៅក្នុងឆ្នាំ ២០២៤ ដែលមានទំហំ ៨៥០ លានដុល្លារ។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា។

ទិន្នន័យរបស់ GDCE បង្ហាញថា គិតចាប់ពីខែមករា ដល់ខែតុលា ឆ្នាំ ២០២៥ ទំហំពាណិជ្ជកម្មទ្វេភាគីកម្ពុជា-អង់គ្លេសសរុបចំនួន ៩១១ លានដុល្លារ កើន ៧,១% ក្នុងនោះកម្ពុជានាំទំនិញចេញទៅអង់គ្លេសមានទំហំទឹកប្រាក់ ៨៦៩ លានដុល្លារ កើន ៧,៦% ចំណែកអង់គ្លេសនាំចូលមកវិញមានតម្លៃ ៤២ លានដុល្លារ ធ្លាក់ចុះ ១,៦%។ ផលិតផលសំខាន់ៗ ដែលកម្ពុជា នាំទៅអង់គ្លេសមានដូចជាសម្លៀកបំពាក់ ស្បែកជើង កង់ជាដើម។

លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម មានប្រសាសន៍ថា កម្ពុជា និងចក្រភពអង់គ្លេសមានទំនាក់ទំនងជិតស្និទ្ធលើគ្រប់វិស័យ ជាពិសេសក្នុងវិស័យពាណិជ្ជកម្ម និងវិនិយោគ។

លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច ប្រាប់កម្ពុជាថ្មីថា ពាណិជ្ជកម្មទ្វេភាគីកម្ពុជា-អង់គ្លេស មានលក្ខណៈល្អប្រសើរនៅឆ្នាំនេះ ដែលយើទទួលបានការអនុគ្រោះពន្ធពីអង់គ្លេស ពិសេសគឺការនាំចេញវិស័យវាយនភណ្ឌ កាត់ដេរ និងគ្រឿងបង្គុំអគ្គិសនី នាំចេញទៅអង់គ្លេសក្នុងអត្រាសូន្យភាគរយ។

នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-អង់គ្លេសសម្រេចបានទឹកប្រាក់ ១ ពាន់លានដុល្លារ កើនឡើង ១៦ ភាគរយ ក្នុងនោះកម្ពុជានាំចេញទៅអង់គ្លេសមានទំហំ ៩៥៨,៧៥ លានដុល្លារ កើន ២០,៤ ភាគរយ និងអង់គ្លេសនាំចូលមកកម្ពុជាវិញ មានទំហំទឹកប្រាក់ ៥៣,៧ លានដុល្លារ ធ្លាក់ចុះជិត ៣០ ភាគរយ៕

អត្ថបទ៖ ឡេង ដេត

The post ការដោះដូរទំនិញកម្ពុជា-អង់គ្លេស សម្រេចបានទឹកប្រាក់ជាង ៩០០ លានដុល្លារ ត្រឹមរយៈពេល ១០ខែ appeared first on Kampuchea Thmey Daily.

ប្រទេសជាច្រើនចាប់ផ្ដើមដាក់ពិន័យអ្នកបើកបរណាដែលប្រើទូរស័ព្ទពេលឈប់ភ្លើងស្តុបក្រហម

Bun sopheap — Mon, 27 Oct 2025 04:39:56 +0000

ប្រទេសជាច្រើន ដូចជាចក្រភពអង់គ្លេស ជប៉ុន បារាំង អាល្លឺម៉ង់ ហ្វីលីពីន និងអូស្ត្រាលី បានចាប់ផ្ដើមដាក់ពិន័យនិងមិនអនុញ្ញាតឱ្យអ្នកបើកបរប្រើប្រាស់ទូរស័ព្ទក្នុងអំឡុងនៅពេលឈប់ស្តុបក្រហមនោះទេ។ នេះបើយោងតាមការចេញផ្សាយរបស់សារព័ត៌មាន VN Express កាលពីថ្ងៃទី២៦ខែតុលា។

(រូបភាព៖ VN Express)

អាជ្ញាធររបស់ប្រទេសទាំងនោះបាននិយាយថា ការប្រើប្រាស់ទូរស័ព្ទបានធ្វើឱ្យអ្នកបើកបរមិនសូវប្រុងប្រយ័ត្ន និងមានប្រតិកម្មយឺតនៅពេលភ្លើងស្តុបប្រែពណ៌បៃតង ដែលអាចបង្កគ្រោះថ្នាក់។

នៅចក្រភពអង់គ្លេស អ្នកបើកបរអាចត្រូវពិន័យជាប្រាក់ ២០០ ផោន និងបាត់បង់ពិន្ទុអាជ្ញាប័ណ្ណចំនួន៦សម្រាប់ការប៉ះទូរស័ព្ទរបស់ពួកគេពេលឈប់ស្តុប។ រីឯប្រទេសបារាំង និងអាល្លឺម៉ង់អនុញ្ញាតឱ្យអ្នកបើកបរប្រើប្រាស់ទូរស័ព្ទលុះត្រាតែរថយន្តចតបានត្រឹមត្រូវនិងពន្លត់ម៉ាស៊ីនរួចរាល់។

ចំពោះនៅប្រទេសជប៉ុន អ្នកបើកបរអាចត្រូវពិន័យជាប្រាក់រហូតដល់ ២៥,០០០ យ៉េន (១៧០ ដុល្លារ) ឬថែមទាំងជាប់ពន្ធនាគារចំពោះការរំលោភធ្ងន់ធ្ងរទៀតផង។ ចំណែកនៅប្រទេសហ្វីលីពីន និងអូស្ត្រាលីក៏ផ្តល់ការពិន័យយ៉ាងធ្ងន់ធ្ងរដែរដល់អ្នកបើកបរដែលប្រើប្រាស់ទូរស័ព្ទក្នុងពេលចរាចរណ៍ ឬនៅពេលឈប់ភ្លើងស្តុបក្រហម។

កន្លែងខ្លះក្នុងប្រទេស ដូចជាសិង្ហបុរី និងរដ្ឋមួយចំនួនរបស់សហរដ្ឋអាមេរិក អនុញ្ញាតឱ្យប្រើប្រាស់ទូរស័ព្ទបាននៅពេលដែលរថយន្តឈប់ទាំងស្រុង ប៉ុន្តែប៉ូលិសនៅតែព្រមានថាវាមានគ្រោះថ្នាក់។ រីឯនៅប្រទេសវៀតណាម អ្នកបើកបរត្រូវបានពិន័យលុះត្រាតែពួកគេប្រើទូរស័ព្ទ ខណៈពេលដែលរថយន្ត ឬម៉ូតូកំពុងបើកបរប៉ុណ្ណោះ។

គួរបញ្ជាក់ថាដោយសារតែបញ្ហានេះ មនុស្សឥឡូវនេះកំពុងជជែកវែកញែកថាតើការប្រើប្រាស់ទូរស័ព្ទនៅពេលឈប់ភ្លើងស្តុបក្រហមក៏គួរតែត្រូវបានដាក់ទណ្ឌកម្មដែរឬទេ ជាពិសេសចាប់តាំងពីកាមេរ៉ាចរាចរណ៍ថ្មីអាចថតអ្វីដែលអ្នកបើកបរធ្វើនៅចំណុចប្រសព្វឈប់ភ្លើងស្តុប៕

(រូបភាព៖ Times Union)

អត្ថបទ៖ ប៊ុន សុភាព

The post ប្រទេសជាច្រើនចាប់ផ្ដើមដាក់ពិន័យអ្នកបើកបរណាដែលប្រើទូរស័ព្ទពេលឈប់ភ្លើងស្តុបក្រហម appeared first on Kampuchea Thmey Daily.

អង់គ្លេសចាប់ខ្លួនបាតុកររាប់រយនាក់ ជុំវិញបាតុកម្មគាំទ្រប៉ាឡេស្ទីន

Huon Dina — Sun, 05 Oct 2025 03:30:42 +0000

ប៉ូលីសអង់គ្លេសបានចាប់ខ្លួនមនុស្សជាង ៤០០ នាក់ ក្នុងបាតុកម្មបង្ហាញការគាំទ្រប៉ាឡេស្ទីននៅកណ្ដាលទីក្រុងឡុងដ៍ កាលពីថ្ងៃសៅរ៍ (៤ តុលា) ខណៈបាតុករប្រឆាំងនឹងការហាមឃាត់ «សកម្មភាពប៉ាឡេស្ទីន» ក្រោយមានការវាយប្រហារមួយកើតឡើងនៅកន្លែងប្រារព្ធសាសនាជនជាតិជ្វីពក្នុងទីក្រុង មែនឆេស្ទ័រ។

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ បាតុកម្មដែលរៀបចំឡើងនៅទីលាន Trafalgar បានប្រឆាំងនឹងការសម្រេចចិត្តរបស់រដ្ឋាភិបាលអង់គ្លេសក្នុងការហាមឃាត់សកម្មភាពប៉ាឡេស្ទីន ដែលជាបណ្ដាញរៀបចំបាតុកម្មគាំទ្រប៉ាឡេស្ទីន ក្រោមច្បាប់ស្ដីពីការប្រឆាំងនឹងអំពើភេរវកម្ម។ ក្នុងនោះ សកម្មជនរៀបចំបាតុកម្មបានច្រាលចោលការទាមទាររបស់ប៉ូលីស និងរដ្ឋាភិបាលឱ្យលុបចោលការប្រមូលផ្ដុំគ្នា បន្ទាប់ពីការវាយប្រហារនៅវិហារជ្វីបកាលពីថ្ងៃព្រហស្បតិ៍ បានសម្លាប់មនុស្សយ៉ាងហោចណាស់ ២ នាក់។

នាយករដ្ឋមន្ត្រីអង់គ្លេស លោក Keir Starmer បានជំរុញឱ្យមានការអត់ធ្មត់កាលពីព្រឹកថ្ងៃសៅរ៍ ដោយសរសេរនៅលើបណ្ដាញសង្គម X ថា៖ «នេះគឺជាពេលវេលានៃការកាន់ទុក្ខ។ វាមិនមែនជាពេលវេលាដើម្បីបង្កើនភាពតានតឹង និងបង្កឱ្យមានការឈឺចាប់បន្ថែមទៀតទេ»។

ប៉ូលីសបាននិយាយថា មនុស្ស ៤៤២ នាក់ត្រូវបានចាប់ខ្លួនសម្រាប់ការប្រកាសការគាំទ្រ «សកម្មភាពប៉ាឡេស្ទីន» ពោលគឺប្រហែលពាក់កណ្ដាលនៃចំនួនមនុស្សដែលត្រូវបានចាប់ខ្លួនក្នុងបាតុកម្មស្រដៀងគ្នាកាលពីខែមុន។

សកម្មជនម្នាក់ គឺលោកស្រី Angie Zelter បាននិយាយថា៖ «យើងមានសិទ្ធិតវ៉ា – សកម្មភាពប៉ាឡេស្ទីនមិនមានហឹង្សាទេ ហើយមិនគួរត្រូវបានហាមឃាត់ទេ»។

គេមើលឃើញថា សន្ទុះនៃការគាំទ្រប៉ាឡេស្ទីនមានការកើនឡើងជុំវិញពិភពលោក ប្រឆាំងនឹង «ការប្រល័យពូជសាសន៍» របស់អ៊ីស្រាអែលនៅតំបន់ហ្គាហ្សា ដែលសម្លាប់មនុស្សប្រមាណ ៦៦ ២២៥ នាក់ គិតត្រឹមថ្ងៃព្រហស្បតិ៍សប្ដាហ៍មុន រាប់តាំងពីសង្រ្គាមផ្ទុះឡើងកាលពី ៣ ឆ្នាំមុន ជុំវិញការវាយប្រហាររបស់ក្រុមហាម៉ាស៍លើអ៊ីស្រាអែល៕

The post អង់គ្លេសចាប់ខ្លួនបាតុកររាប់រយនាក់ ជុំវិញបាតុកម្មគាំទ្រប៉ាឡេស្ទីន appeared first on Kampuchea Thmey Daily.

អង់គ្លេស Archives - Kampuchea Thmey Daily

អង់គ្លេស​ ប្រកាស​​បញ្ជូន​យន្ត​ហោះ​ចម្បាំង នាវា​ចម្បាំង​ ឧបករណ៍​រក​មីន​ទៅ​ច្រក​ Hormuz

​នាវា​ផ្ទុក​យន្តហោះបារាំង​​ ដើរដោយថាមពល​នុយ​ក្លេ​អ៊ែរ​​ ទៅ​ជិតសមុទ្រ​ក្រហម​ ​ក្បែរច្រក Hormuz

ប្រទេសធំៗនៅអឺរ៉ុប និងជប៉ុន ​ត្រៀមចូលរួម​ធានាសុវត្ថិភាព​ច្រកហ័រមូហ្ស ​តាមសំណើ ត្រាំ

​​ចក្រភព​អង់គ្លេស​និង​បណ្តាប្រទេស​​អ៊ឺរ៉ុប​មួយ​ចំនួន ប្រឈម​ឆ្លង​​ជំងឺ​កញ្រ្ជឹល​តាមខ្យល់​

ការ​ដោះដូរ​ទំនិញកម្ពុជា-អង់គ្លេស​ សម្រេច​បាន​ទឹក​ប្រាក់​ជាង ​៩០០ ​លានដុល្លារ ត្រឹមរយៈពេល ១០​ខែ ​

ប្រទេសជាច្រើនចាប់ផ្ដើមដាក់ពិន័យអ្នកបើកបរណាដែលប្រើទូរស័ព្ទពេលឈប់ភ្លើងស្តុបក្រហម

អង់គ្លេសចាប់ខ្លួនបាតុកររាប់រយនាក់ ជុំវិញបាតុកម្មគាំទ្រប៉ាឡេស្ទីន

អង់គ្លេស ប្រកាសបញ្ជូនយន្តហោះចម្បាំង នាវាចម្បាំង ឧបករណ៍រកមីនទៅច្រក Hormuz

នាវាផ្ទុកយន្តហោះបារាំង ដើរដោយថាមពលនុយក្លេអ៊ែរ ទៅជិតសមុទ្រក្រហម ក្បែរច្រក Hormuz

ប្រទេសធំៗនៅអឺរ៉ុប និងជប៉ុន ត្រៀមចូលរួមធានាសុវត្ថិភាពច្រកហ័រមូហ្ស តាមសំណើ ត្រាំ

ចក្រភពអង់គ្លេសនិងបណ្តាប្រទេសអ៊ឺរ៉ុបមួយចំនួន ប្រឈមឆ្លងជំងឺកញ្រ្ជឹលតាមខ្យល់

ការដោះដូរទំនិញកម្ពុជា-អង់គ្លេស សម្រេចបានទឹកប្រាក់ជាង ៩០០ លានដុល្លារ ត្រឹមរយៈពេល ១០ខែ