អត្រានុកូលដ្ឋាន Archives - Kampuchea Thmey Daily

កម្ពុជាប្ដេជ្ញាចុះបញ្ជីកំណើតក្នុងប្រព័ន្ធឌីជីថលឱ្យបាន១០០% នៅត្រឹមឆ្នាំ២០៣០

hun sirivadh — Fri, 17 Jan 2025 04:25:53 +0000

អគ្គនាយកដ្ឋានអត្តសញ្ញាណកម្មបានបញ្ជាក់ពីជំហរក្នុងការធ្វើទំនើបកម្មប្រព័ន្ធចុះបញ្ជីអត្រានុកូលដ្ឋាន និងស្ថិតិអត្រានុកូលដ្ឋាន និងសម្រេចឱ្យបាននូវមហិច្ឆិតានៃការចុះបញ្ជីកំណើតឱ្យបាន១០០% និងការចុះបញ្ជីមរណភាព ៨០% ត្រឹមឆ្នាំ២០៣០ ដើម្បីឱ្យស្របតាមគោលការណ៍ជាសកលនៃ ទស្សវត្សអត្រានុកូលដ្ឋាន។

អគ្គនាយកនៃអគ្គនាយកដ្ឋានអត្តសញ្ញាណកម្មលោក តុប នេត

ប្រទេសកម្ពុជាត្រូវបានជ្រើសរើសជាប្រទេសម្ចាស់ផ្ទះ សហការរៀបចំកិច្ចប្រជុំបណ្ដាញមន្ត្រីជំនាញអត្រានុកូលដ្ឋាននៅតំបន់អាស៊ីអាគ្នេយ៍លើកទីៗ ជាមួយគណៈកម្មការសេដ្ឋកិច្ចនិងសង្គមនៅតំបន់អាស៊ីនិងប៉ាស៊ីហ្វិក (UN-ESVAP) ដែលរៀបចំឡើងចាប់ពីថ្ងៃទី១៤ដល់១៦ ខែមករា ឆ្នាំ២០២៥ នៅរាជធានីភ្នំពេញ។

ការជ្រើសរើសជាម្ចាស់ផ្ទះនេះដោយ UN-ESCAP ពិនិត្យឃើញអំពីដំណើរវិវឌ្ឍន៍ដ៏ល្អក្នុងការអនុវត្តការងារអត្រានុកូលដ្ឋាននៅកម្ពុជា ដើម្បីចែករំលែកនូវបទពិសោធន៍ បញ្ហាប្រឈម និងដំណោះស្រាយដល់ប្រទេសក្នុងតំបន់ចាកចេញពីការចុះបញ្ជីដោយដៃហើយឈានទៅដល់ការចុះបញ្ជីតាមប្រព័ន្ធឌីជីថល។

ក្នុងសេចក្ដីប្រកាសព័ត៌មានអគ្គនាយកដ្ឋានអត្តសញ្ញាណកម្មប្ដេជ្ញា៖ «ក្នុងការធ្វើទំនើបកម្មប្រព័ន្ធចុះបញ្ជីអត្រានុកូលដ្ឋាន និងស្ថិតិអត្រានុកូលដ្ឋាន និងសម្រេចឱ្យបាននូវមហិច្ឆិតានៃការចុះបញ្ជីជាឱ្យបាន១០០% និងការចុះបញ្ជីមរណភាព ៨០% ត្រឹមឆ្នាំ២០៣០»។

កិច្ចប្រជុំដែលមានរយៈពេល៣ថ្ងៃនេះមានការចូលរួមពីពីតំណាងប្រតិភូតំបន់អាស៊ីអាគ្នេយ៍ ប្រទេស Papua New Guinea តំណាងក្រសួងស្ថាប័នពាក់ព័ន្ធមានប្រមាណ៨០នាក់ មកពី១១ប្រទេស និង១៥ស្ថាប័នអន្តរជាតិ៕

អត្ថបទដោយ ហ៊ុន សិរីវឌ្ឍន៍

The post កម្ពុជាប្ដេជ្ញាចុះបញ្ជីកំណើតក្នុងប្រព័ន្ធឌីជីថលឱ្យបាន១០០% នៅត្រឹមឆ្នាំ២០៣០ appeared first on Kampuchea Thmey Daily.

ការចុះបញ្ជីអត្រានុកូលដ្ឋាន ប្ដូរពីចុះបញ្ជីដោយដៃទៅជាប្រើប្រាស់ប្រព័ន្ធបច្ចេកវិទ្យា

អ៊ិន ពិសី — Thu, 26 Sep 2024 04:55:11 +0000

ច្បាប់ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម បានកំណត់អំពីបែបបទ និងនីតិវិធី នៃការអនុវត្តការងារអត្រានុកូលដ្ឋាន មានភាពសាមញ្ញងាយស្រួល និងថែមទាំងបានធ្វើទំនើបកម្មតាមរយៈការប្រើប្រាស់បច្ចេកវិទ្យាឌីជីថល ដែលជានវានុវត្តន៍ថ្មីលើការចុះបញ្ជីអត្រានុកូលដ្ឋាន ដោយប្ដូរពីការចុះបញ្ជីដោយដៃ ទៅជាការចុះបញ្ជីដោយប្រើប្រាស់ប្រព័ន្ធបច្ចេកវិទ្យា។

នេះជាការលើកឡើងរបស់ លោក កើត ឆែ អភិបាលរង តំណាង លោក ឃួង ស្រេង អភិបាល នៃគណៈអភិបាលរាជធានីភ្នំពេញ និង លោក យឹម សំអុល អនុប្រធាននាយកដ្ឋានអត្រានុកូលដ្ឋាន នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ អញ្ជើញជាអធិបតីភាពក្នុងពិធីបើក «វគ្គបណ្ដុះបណ្ដាលស្ដីពីការងារអត្រានុកូលដ្ឋាន ស្របតាមច្បាប់ស្ដីពីអត្រានុកូលដ្ឋាន ស្ថិតិ-អត្រានុកូលដ្ឋាន និងអត្តសញ្ញាណកម្ម និងលិខិតបទដ្ឋានគតិយុត្តិក្រោមច្បាប់» នាព្រឹកថ្ងៃទី ២៦ ខែកញ្ញា ឆ្នាំ ២០២៤ នេះ នៅសាលារាជធានីភ្នំពេញ។

លោក កើត ឆែ បានមានប្រសាសន៍ថា វគ្គបណ្ដុះបណ្ដាលតម្រង់ទិសដល់មន្ត្រីរដ្ឋបាលរាជធានីភ្នំពេញ រដ្ឋបាលខណ្ឌ និងរដ្ឋបាលសង្កាត់ ពាក់ព័ន្ធនឹងការងារអត្រានុកូលដ្ឋានស្របតាមច្បាប់ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្មនេះ សំដៅពង្រឹងប្រសិទ្ធភាព នៃការផ្តល់សេវាតម្រូវការជូនប្រជាពលរដ្ឋ។ ការងារអត្រានុកូលដ្ឋាន គឺជាការងារចម្បងអាទិភាពមួយ ដែលរាជរដ្ឋាភិបាល និងក្រសួងមហាផ្ទៃ យកចិត្តទុកដាក់ខ្ពស់ ដើម្បីរៀបចំកំណត់ត្រាបញ្ជីអត្រានុកូលដ្ឋានមួយមានភាពសុក្រឹត ត្រឹមត្រូវ ច្បាស់លាស់ ចៀសវាងនូវកំហុសទិន្នន័យរបស់ប្រជាពលរដ្ឋ ក៏ដូចជាអាចយកបញ្ជីអត្រានុកូលដ្ឋាន ដើម្បីផលិតជារបាយការណ៍ស្ថិតិអត្រានុកូលដ្ឋាន សម្រាប់ប្រើប្រាស់ក្នុងការកសាងនូវផែនការ និងគោលនយោបាយសេដ្ឋកិច្ច-សង្គម។

លោក កើត ឆែ បន្តថា ផលអវិជ្ជមាន នៃអត្រានុកូលដ្ឋានរបស់ប្រទេសកម្ពុជានាពេលកន្លងមក គឺកើតចេញពីរបបប្រល័យពូជសាសន៍ប៉ុលពត និងសង្គ្រាមស៊ីវិល។ កម្ពុជា បានរៀបចំកំណត់ត្រាបញ្ជីអត្រានុកូលដ្ឋានឡើងវិញនាឆ្នាំ ២០០០ បន្ទាប់ពីប្រទេសជាតិមានសន្តិភាពពេញលេញ តាមរយៈការដាក់ចេញនូវនយោបាយឈ្នះ-ឈ្នះ របស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា និងបន្តពូនជ្រំ-ថែរក្សាដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។

លោក កើត ឆែ បានបញ្ជាក់ថា ច្បាប់ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្មបានចូលជាធរមាន កាលពីខែកក្កដា ឆ្នាំ ២០២៤ ច្បាប់នេះមានគោលបំណងមិនត្រឹមតែកំណត់អំពីបែបបទ និងនីតិវិធី នៃការអនុវត្តការងារអត្រានុកូលដ្ឋានដែលមានភាពសាមញ្ញ ងាយស្រួល និងបត់បែនទៅតាមបរិបទ នៃសង្គមកម្ពុជាប៉ុណ្ណោះទេ ប៉ុន្តែថែមទាំងបានធ្វើទំនើបកម្មតាមរយៈការប្រើប្រាស់បច្ចេកវិទ្យាឌីជីថល ដែលជានវានុវត្តន៍ថ្មីលើការចុះបញ្ជីអត្រានុកូលដ្ឋាន ដោយប្តូរពីការចុះបញ្ជីដោយដៃ ទៅជាការចុះបញ្ជីដោយប្រើប្រាស់ប្រព័ន្ធបច្ចេកវិទ្យា។

លោកបញ្ជាក់ទៀតថា តាមរយៈវគ្គបណ្ដុះបណ្ដាលនេះ មន្ត្រីនឹងបានយល់ច្បាស់អំពីទម្រង់ បែបបទ និងនីតិវិធី នៃការកត់ត្រាការងារអត្រានុកូលដ្ឋាន ឱ្យបានត្រឹមត្រូវ ស្របតាមច្បាប់ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម និងសេចក្ដីណែនាំរបស់ក្រសួងមហាផ្ទៃ ដើម្បីធានាបានប្រជាពលរដ្ឋគ្រប់រូបមានឯកសារអត្រានុកូលដ្ឋាន ស្របតាមគោលបំណង នៃច្បាប់ថ្មី ដែលបានបញ្ញត្តថា ការចុះបញ្ជីអត្រានុកូលដ្ឋាន គឺធានាឱ្យមនុស្សគ្រប់រូបមានអត្តសញ្ញាណខាងផ្លូវច្បាប់, ធានានូវការគោរពសិទ្ធិមនុស្ស ការទទួលបានសេវាគ្រប់ប្រភេទ និងជាមូលដ្ឋានសម្រាប់រៀបចំផែនការអភិវឌ្ឍន៍ និងការតាមដានភាពរីកចម្រើន នៃសង្គម។

លោកបានអះអាងថា ការខិតខំត្រងត្រាប់ស្តាប់ រៀនសូត្រ ពីវគ្គបណ្ដុះបណ្ដាលនេះ មន្ត្រីនឹងទទួលបានបុណ្យកុសលធំណាស់ ដោយពេលយើងបានចេះដឹងពីការរៀនសូត្រនេះហើយ នឹងយកចំណេះដឹងនេះទៅបម្រើសេវាជូនប្រជាពលរដ្ឋក្នុងមូលដ្ឋានលើការផ្ដល់សេវាអត្រានុកូលដ្ឋាននេះ៕

អត្ថបទ ៖ ស្រីរ័ត្ន

The post ការចុះបញ្ជីអត្រានុកូលដ្ឋាន ប្ដូរពីចុះបញ្ជីដោយដៃទៅជាប្រើប្រាស់ប្រព័ន្ធបច្ចេកវិទ្យា appeared first on Kampuchea Thmey Daily.

ការងារស្ថិតិ និងអត្រានុកូលដ្ឋាន ជាកិច្ចការដ៏មានសារៈសំខាន់ និងជាសេវាដែលប្រជាពលរដ្ឋត្រូវការក្នុងជីវភាពប្រចាំថ្ងៃ

Kang Tola — Thu, 27 Jun 2024 13:59:42 +0000

លោក កើត ឆែ អភិបាលរង នៃគណៈអភិបាលរាជធានីភ្នំពេញបានមានប្រសាសន៍លើកឡើងថា ការងារស្ថិតិ និងអត្រានុកូលដ្ឋាន គឺជាកិច្ចការដ៏មានសារៈសំខាន់ និងជាសេវាដែលប្រជាពលរដ្ឋខ្មែរគ្រប់រូបត្រូវការក្នុងជីវភាពប្រចាំថ្ងៃ។ដូច្នេះមន្ត្រីដែលបំពេញការងារនេះត្រូវបន្តពង្រឹងសមត្ថភាព និងត្រូវយល់ឱ្យបានច្បាស់អំពី គោលបំណង និងខ្លឹមសារនៃច្បាប់ថ្មី។

ការលើកឡើងនិងការស្នើបែបនេះរបស់លោកកើត ឆែ បានធ្វើឡើង ខណៈលោកបានអញ្ជើញជាតំណាង លោក ឃួង ស្រេង អភិបាល នៃគណៈអភិបាលរាជធានីភ្នំពេញ ក្នុងពិធីបិទ «សិក្ខាសាលា ផ្សព្វផ្សាយច្បាប់ស្ដីពីអត្រានុកូលដ្ឋាន ស្ថិតិអត្រានុកូលដា្ឋន និងអត្តសញ្ញាណកម្ម» ជូនដល់ ថ្នាក់ដឹកនាំ-មន្ត្រីរាជការ រដ្ឋបាលរាជធានីភ្នំពេញ ស្នងការដ្ឋាននគរបាលរាជធានីភ្នំពេញរដ្ឋបាលខណ្ឌ-សង្កាត់ និងមន្ទីរ-អង្គភាពក្រោមឱវាទ នៅសាលារាជធានីភ្នំពេញ នារសៀលថ្ងៃទី២៧ ខែមិថុនា ឆ្នាំ២០២៤ ដោយមានការចូលរួមពីលោកឧត្តមសេនីយ៍ឯក បណ្ឌិត តូប នេត អគ្គនាយក នៃអគ្គនាយកដ្ឋានអត្តសញ្ញាណកម្មនិងលោកកែ ប៊ុនឡេង សមាជិកក្រុមប្រឹក្សារាជធានីភ្នំពេញ។

លោកកើត ឆែ បន្តថា ការរៀបចំសិក្ខាសាលាផ្សព្វផ្សាយពាក់ព័ន្ធនឹងការងារអត្រានុកូលដ្ឋាន គឺសំដៅពង្រឹងប្រសិទ្ធភាពនៃការផ្តល់សេវាអត្រានុ កូលដ្ឋាន ជូនបងប្អូនប្រជាពលរដ្ឋ ស្របតាមគោលនយោបាយរបស់រាជរដ្ឋាភិបាល ច្បាប់ និងលិខិតបទដ្ឋានគតិយុត្តិ ពាក់ព័ន្ធនានា។

អង្គសិក្ខាសាលានេះធ្វើឡើង ដើម្បីទទួលយកនូវចំណេះដឹងថ្មី សម្រាប់ជាទុនបន្ថែម និងជាមូលដ្ឋាន ឈានទៅអនុវត្តច្បាប់ ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ដែលនឹងចូលជាធរមាន ចាប់ពីថ្ងៃទី០១ ខែកក្កដា ឆ្នាំ២០២៤ នេះតទៅ។

លោកបន្តថា ការងារស្ថិតិ និងអត្រានុកូលដ្ឋាន គឺជាកិច្ចការដ៏មានសារៈសំខាន់ និងជាសេវាដែលប្រជាពលរដ្ឋខ្មែរគ្រប់រូបត្រូវការក្នុងជីវភាពប្រចាំថ្ងៃ ហើយឯកសារអត្រានុកូលដ្ឋាន គឺជាឯកសារបញ្ជាក់អំពីស្ថានភាពរបស់បុគ្គលម្នាក់ៗ ដែលរួមមាន៖ (១) កំណើត (២) ការ រៀបអាពាហ៍ពិពាហ៍ និង (៣) មរណភាព។

លោកបន្តទៀតថា សម្រាប់ទិដ្ឋភាពច្បាប់ ឯកសារអត្រានុកូលដ្ឋាន គឺជា ភស្តុតាងលាយលក្ខណ៍អក្សរដែលបង្ហាញអំពីស្ថានភាពគតិយុត្តិរបស់បុគ្គលម្នាក់ និងប្រើប្រាស់ជាមូលដ្ឋាន ក្នុងការ កំណត់សិទ្ធិ និងកាតព្វកិច្ចផ្សេងៗផងដែរ។ ឈរលើមូលដ្ឋាននេះ និងអនុលោមតាមផែនការយុទ្ធសាស្ត្រជាតិស្តីពីអត្តសញ្ញាណកម្ម រយៈ ពេល១០ឆ្នាំ (២០១៧-២០២៦) ក្នុងគោលដៅពង្រឹង និងធ្វើទំនើបកម្មការងារអត្តសញ្ញាណកម្ម, ច្បាប់ស្ដីពីរតនុកូលដ្ឋាន ស្ថិត អត្រានុកូលដ្ឋាន និងអត្តសញ្ញាណកម្ម ត្រូវបានប្រកាសឱ្យប្រើកាលពីថ្ងៃទី០១ ខែកក្កដា ឆ្នាំ២០២៣ ហើយនឹងចូលជាធរមាន នាពេលឆាប់ៗខាងមុខនេះ។

លោកកើត ឆែ បានបញ្ជាក់ផងដែរថា ការគ្រប់គ្រងអត្តសញ្ញាណរបស់ប្រជាជន ជាកិច្ចការសន្តិសុខថ្នាក់ជាតិដ៏មានសារៈសំខាន់ ដែលឱ្យ អាជ្ញាធរអាចគ្រប់គ្រង និងបង្ការនូវបទល្មើសបាន។ លោកស្នើឱ្យមន្ត្រីដែលបំពេញការងារអត្រានុកូលដ្ឋានត្រូវបន្តពង្រឹងសមត្ថភាព និងត្រូវយល់ឱ្យបានច្បាស់អំពី គោលបំណង និងខ្លឹមសារនៃច្បាប់ថ្មី ព្រមទាំងត្រូវដុសខាត់ចំណេះដឹងលើការប្រើប្រាស់ប្រព័ន្ធ បច្ចេកវិទ្យាផងដែរ។ ទីចាត់ការរដ្ឋបាល ត្រូវលើកផែនការបណ្តុះបណ្តាលសម្រាប់ឆ្នាំ២០២៥ ឱ្យបានរួសរាន់។

ក្នុងអំឡុងពេលអនុវត្តច្បាប់ថ្មី, ក្នុងករណីដែលមានភាពស្រពិចស្រពិល ឬមិនច្បាស់លាស់ត្រង់ចំណុច ណាមួយ មន្ត្រីអត្រានុកូលដ្ឋានថ្នាក់សង្កាត់ និងមន្ត្រីពាក់ព័ន្ធថ្នាក់ខណ្ឌ ត្រូវទំនាក់ទំនងមកការិយាល័យ ស្ថិតិ និងអត្រានុកូលដ្ឋាន ទីចាត់ការរដ្ឋបាល សាលារាជធានីភ្នំពេញ ដើម្បីសុំការបញ្ជាក់៕

ដោយ ៖ ស្រីរ័ត្ន

The post ការងារស្ថិតិ និងអត្រានុកូលដ្ឋាន ជាកិច្ចការដ៏មានសារៈសំខាន់ និងជាសេវាដែលប្រជាពលរដ្ឋត្រូវការក្នុងជីវភាពប្រចាំថ្ងៃ appeared first on Kampuchea Thmey Daily.

អាជ្ញាធរកោះកុង និងមន្ត្រីជំនាញ ពិគ្រោះយោបល់គ្នាលើការងារអត្រានុកូលដ្ឋាន

អ៊ិន ពិសី — Mon, 13 May 2024 08:10:30 +0000

អាជ្ញាធរខេត្តកោះកុង និងមន្ត្រី នៃអគ្គនាយកដ្ឋានអត្តសញ្ញាណកម្ម បាននិងកំពុងពិគ្រោះយោបល់គ្នាលើបញ្ហាប្រឈមនានា នៃការងារអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្មនាពេលកន្លងមក។

លោកស្រី មិថុនា ភូថង អភិបាលខេត្តកោះកុង លើកឡើងថា កិច្ចការងារពិគ្រោះយោបល់នេះធ្វើឡើងក្នុងគោលបំណងជាធាតុចូល និងដាក់ចេញនូវវិធានការដោះស្រាយ ព្រមទាំងកំណត់នូវយន្តការ ឬតម្រូវការចាំបាច់នានា បន្ថែមទៀត សម្រាប់ធានាដល់ការរៀបចំលិខិតបទដ្ឋានគតិយុត្តិក្រោមច្បាប់នេះ។

ថ្លែងបន្តក្នុងសិក្ខាសាលាផ្សព្វផ្សាយច្បាប់ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម នៅថ្ងៃទី ១៣ ខែឧសភា ឆ្នាំ ២០២៤ នេះ លោកស្រីអភិបាលខេត្តកោះកុង គូសបញ្ជាក់ដែរថា ការងារស្ថិតិបែបបទរដ្ឋបាល ចាំបាច់មានការផ្សព្វផ្សាយឱ្យបានយល់ដឹងកាន់តែទូលំទូលាយនូវខ្លឹមសារ នៃច្បាប់ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ដែលបានប្រកាសឱ្យប្រើដោយព្រះរាជក្រម នាថ្ងៃទី ០១ ខែកក្កដា ឆ្នាំ ២០២៣ កន្លងទៅ ហើយ នឹងត្រូវចាប់ផ្ដើមអនុវត្តចាប់ពីថ្ងៃទី ០១ ខែកក្កដា ឆ្នាំ ២០២៤ ខាងមុខ។

លោកស្រី មិថុនា ភូថង បន្ថែមថា ឯកសារស្ថិតិអត្រានុកូលដ្ឋាន និងអត្តសញ្ញាណកម្ម គឺជា ឯកសារគតិយុត្តិដ៏សំខាន់ចាំបាច់សម្រាប់ប្រជាពលរដ្ឋ ដែលទាក់ទងទៅនឹងការចុះបញ្ជីកំណើត អាពាហ៍ពិពាហ៍ មរណភាព បញ្ជីស្នាក់នៅ ការចុះបញ្ជីអត្តសញ្ញាណបណ្ណសញ្ជាតិខ្មែរ។ ឯកសារទាំងអស់នេះ ជាភស្តុតាងដ៏មានតម្លៃបំផុត ក្នុងជីវិតរស់នៅរបស់មនុស្សម្នាក់ៗ សម្រាប់បញ្ជាក់អំពីអត្តសញ្ញាណស្ថានភាពស៊ីវិលរបស់មនុស្សនៅក្នុងសង្គមគ្រួសារ និងត្រកូលរបស់ខ្លួន សម្រាប់ការពារសិទ្ធិសេរីភាព ផលប្រយោជន៍ និងកាតព្វកិច្ចនានាក្នុងសង្គម។

គួរជម្រាបថា ការចុះបញ្ជីអត្រានុកូលដ្ឋាន នឹងផ្តល់សារៈសំខាន់ធំៗ ចំនួនពីរ គឺ ទី១,កំណត់អត្តសញ្ញាណ តាមផ្លូវច្បាប់ អំពីព្រឹត្តិការណ៍ជីវិតរបស់បុគ្គលគ្រប់រូប ដែលជាការគាំទ្រដល់ការបង្កើតឯកសារ អត្តសញ្ញាណជាតិ និង ទី២,បង្កើតបាននូវប្រភពទិន្នន័យតាមតម្រូវការសម្រាប់ប្រើប្រាស់ក្នុងការវិភាគទាំងឡាយ ទាំងនៅថ្នាក់ជាតិ និងថ្នាក់ក្រោមជាតិ ព្រមទាំងបង្កើតបាននូវស្ថិតិអត្រានុកូលដ្ឋាន។

ចំពោះលោកឧត្ដមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម យល់ថា វត្តមានមន្ត្រីនគរបាល និងអាជ្ញាធរមូលដ្ឋាន ដែលមកជួបជុំគ្នាពិភាក្សាលើកិច្ចការនេះ នឹងផ្តោតយកចិត្តទុកដាក់ខ្ពស់ក្នុងការស្តាប់នូវខ្លឹមសារ នៃបទបង្ហាញដែលមានជាបន្តបន្ទាប់ឱ្យបានម៉ត់ចត់ច្បាស់លាស់ និងលើកជាមតិយោបល់ ឬសំណួរ ដើម្បីមានមូលដ្ឋានយកទៅអនុវត្តឱ្យបានល្អប្រសើរ។

លោក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម មើលឃើញថា ការផ្តល់សេវាសាធារណៈមានសារៈសំខាន់ណាស់សម្រាប់ប្រជាពលរដ្ឋ ដើម្បីឱ្យប្រជាពលរដ្ឋគ្រប់រូបទទួលបានសេវាអត្រានុកូលដ្ឋាន និងអត្តសញ្ញាណកម្មគ្រប់ប្រភេទ ប្រកបដោយភាពងាយស្រួលឆាប់រហ័ស មានតម្លាភាព និងមានគណនេយ្យភាព។ ជាពិសេសសំដៅចូលរួមចំណែកដល់ការលើកកម្ពស់អភិបាលកិច្ចល្អ ពង្រឹងរដ្ឋបាលសាធារណៈ និងលើកកម្ពស់ការផ្តល់សេវាសាធារណៈជូនប្រជាពលរដ្ឋ ជាពិសេសកាត់បន្ថយហានិភ័យសង្គម ការលើកកម្ពស់យុត្តិធម៌ សមធម៌សង្គម សំដៅរួមចំណែករក្សាបាននូវសន្តិភាព សន្តិសុខជាតិ ស្ថិរភាព នយោបាយ និងសុវត្ថិភាពសង្គម៕

អត្ថបទ ៖ សិរីវឌ្ឍនៈ

The post អាជ្ញាធរកោះកុង និងមន្ត្រីជំនាញ ពិគ្រោះយោបល់គ្នាលើការងារអត្រានុកូលដ្ឋាន appeared first on Kampuchea Thmey Daily.

លោក កើត រិទ្ធ ស្នើឲ្យរៀបចំចៅក្រមទទួលបន្ទុកដោះស្រាយសំណុំរឿង ពាក់ព័ន្ធនឹងបញ្ហាអត្រានុកូលដ្ឋាន

sopheak khoun — Wed, 10 Jan 2024 01:36:46 +0000

សំណុំរឿងពាក់ព័ន្ធនឹងបញ្ហាអត្រានុកូលដ្ឋាន មានប្រមាណជា ៦,០០០ នៅសាលាជម្រះក្ដីទូទាំងប្រទេស ដែលនឹង ២៣ភាគរយ នៃសំណុំរឿងរដ្ឋប្បវេណីសរុប។ ដើម្បីដោះស្រាយបញ្ហានេះ ក្រសួងយុត្តិធម៌ នឹងស្នើសុំឲ្យរៀបចំចៅក្រមទទួលបន្ទុកលើការងារនេះ តែម្ដង។ នេះបើតាមការឲ្យដឹងពីលោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌។

ការឲ្យដឹងនេះ បានធ្វើឡើងក្នុងសន្និសីទសារព័ត៌មាន ដើម្បីប្រកាសដាក់ចេញនូវយុទ្ធនាការសំខាន់ចំនួន ២ ដើម្បីពង្រឹង និងលើកកម្ពស់សេវាយុត្តិធម៌ និងគុណភាពនៃយុត្តិធម៌នៅកម្ពុជា កាលពីល្ងាចថ្ងៃទី ៩ ខែមករា ឆ្នាំ ២០២៤។ យុទ្ធនាការទាំង ២នោះ រួមមាន៖ ១. យុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ និង ២. យុទ្ធនាការត្រួតពិនិត្យនិងដោះស្រាយភាពមិនប្រក្រតីនៅតាមតុលាការ។

លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានបញ្ជាក់ថា ដល់ពេលនេះ សំណុំរឿងនៅតុលាការ ពាក់ព័ន្ធនឹងបញ្ហាអត្រានុកូលដ្ឋាន មានប្រមាណជា ៦,០០០សំណុំរឿង ស្មើនឹង ២៣ភាគរយ នៃសំណុំរឿងរដ្ឋប្បវេណីសរុប នៅតុលាការទូទាំងប្រទេស។

បើតាមលោករដ្ឋមន្ត្រី ចំនួនពាក្យបណ្ដឹងអំពីបញ្ហាអត្រានុកូលដ្ឋាននេះ គឺមានចំនួនច្រើនដែលប្រជាពលរដ្ឋប្ដឹង ដោយសារបញ្ហាខុសឈ្មោះ ឬខុសថ្ងៃខែឆ្នាំកំណើត ដែលតាមច្បាប់ត្រូវដោះស្រាយនៅតុលាការ។

«ខ្ញុំសូមយករឿងនេះ ធ្វើការងារជាមួយតុលាការ យកការទទួលខុសត្រូវមួយ និងស្នើសុំឲ្យចៅក្រមនៅទូទាំងប្រទេស សាលាជម្រះក្ដីទូទាំងប្រទេស រៀបចំឲ្យមានចៅក្រមដែលទទួលបន្ទុកលើការងារនេះ ហើយស្នើសុំក្នុងការអនុវត្តនេះ គឺមានតែ ២គត់ លឿន ហើយនិងត្រឹមត្រូវ»។ នេះជាការគូសបញ្ជាក់បន្ថែមពីលោក កើត រិទ្ធ។

លោកឧបនាយករដ្ឋមន្ត្រី លើកឡើងដែរថា អត្រានុកូលដ្ឋាន គឺជាឯកសារដ៏សំខាន់មួយ ដែលប្រជាពលរដ្ឋត្រូវការប្រើប្រាស់ក្នុងពេលណាមួយ។ តែនៅពេលមានបញ្ហាខុសឈ្មោះ ឬខុសថ្ងៃខែឆ្នាំកំណើត ប្រជាពលរដ្ឋត្រូវប្ដឹងទៅតុលាការ ហើយនៅពេលតុលាការប្រើរយៈពេលយូរ ក្នុងការដោះស្រាយពាក្យនោះ នឹងលេចឡើងនូវរឿងរ៉ាវផ្សេងៗ មិនខានឡើយ។

ត្រង់ចំណុចនេះ លោក កើត រិទ្ធ បានសង្កត់ធ្ងន់ថា «ឥឡូវអត់ទេ ហើយសូមបញ្ជាក់ថា តាមរយៈនេះក៏សូមប្រកាសតែម្ដង រឿងទាក់ទងបញ្ហាអត្រានុកូលដ្ឋាន បើមានបញ្ហាមិនប្រក្រតីប្ដឹងមក ជាមួយនឹងខាងលេខាធិការដ្ឋាន គ្រប់រឿងទាំងអស់ ទុករឿងឲ្យយឺត ឬក៏មានករណីដែលថា ទាមទារផលប្រយោជន៍ផ្សេងៗ សូមប្ដឹងមកលេខាធិការដ្ឋាន»។

លោករដ្ឋមន្ត្រី ក៏បានបញ្ជាក់ដែរថា លោក នឹងជួបជាមួយមន្ត្រីតុលាការនៅទូទាំងប្រទេស លើបញ្ហាសំណុំរឿង ស្ដីពី បញ្ហាអត្រានុកូលដ្ឋាននេះ ហើយកំពុងមានចំនួនច្រើន នៅតាមសាលាជម្រះក្ដីទូទាំងប្រទេស ពោលគឺមានរហូតដល់ ២៣ភាគរយ នៃសំណុំរឿងរដ្ឋប្បវេណីសរុប៕

The post លោក កើត រិទ្ធ ស្នើឲ្យរៀបចំចៅក្រមទទួលបន្ទុកដោះស្រាយសំណុំរឿង ពាក់ព័ន្ធនឹងបញ្ហាអត្រានុកូលដ្ឋាន appeared first on Kampuchea Thmey Daily.

ការងារស្ថិតិ និងអត្រានុកូលដ្ឋាន ជាកិច្ចការដ៏មានសារៈសំខាន់ និងជាសេវាតម្រូវការសម្រាប់ប្រជាពលរដ្ឋខ្មែរគ្រប់រូប នៅក្នុងជីវភាពប្រចាំថ្ងៃ

deth leng — Mon, 09 Oct 2023 08:45:14 +0000

លោក កើត ឆែ អភិបាលរង នៃគណៈអភិបាលរាជធានីភ្នំពេញបានលើកឡើងថា៖ ការងារស្ថិតិ និងអត្រានុកូលដ្ឋាន គឺជាកិច្ចការ ដ៏មានសារៈសំខាន់ និងជាសេវាតម្រូវការ ដែលប្រជាពលរដ្ឋខ្មែរគ្រប់រូបត្រូវការក្នុងជីវភាពប្រចាំថ្ងៃ ហើយឯកសារនេះ ក៏ជាឯកសារបញ្ជាក់អំពីស្ថានភាពរបស់បុគ្គលម្នាក់ៗផងដែរដែលមានដូចជាកំណើត, ការរៀបអាពាហ៍ពិពាហ៍ និងមរណភាព។

ការលើកឡើងបែបនេះបានធ្វើឡើងខណៈអញ្ជើញជាតំណាងលោក ឃួង ស្រេង នៃគណៈអភិបាលរាជធានីភ្នំពេញ ក្នុងពិធីបើក «វគ្គបណ្តុះបណ្តាលស្តីពីការចុះបញ្ជីអត្រានុកូលដា្ឋន តាមរយៈការជូនដំណឹងពីមូលដា្ឋនសុខាភិបាល ដោយ ប្រើប្រាស់បច្ចេកវិទ្យាឌីជីថល នៅមូលដ្ឋានសង្កាត់ ចំនួន ០៦ នរដ្ឋបាលខណ្ឌពោធិ៍សែនជ័យ រាជធានីភ្នំពេញ»នៅសណ្ឋាគារកាំបូឌីយ៉ាណា នាថ្ងៃទី០៩ ខែតុលា ឆ្នាំ២០២៣នេះហើយពិធីនេះ ក៏មានវត្តមានលោក ឧត្តមសេនីយ៍ឯក បណ្ឌិត តូប នេត អគ្គនាយក ន អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃផងដែរ។

លោក កើត ឆែ បានមានប្រសាសន៍ថា៖ការងារស្ថិតិ និងអត្រានុកូលដ្ឋាន គឺជាកិច្ចការ ដ៏មានសារៈសំខាន់ និងជាសវាតម្រូវការ ដែលប្រជាពលរដ្ឋខ្មែរគ្រប់រូប ត្រូវការ ក្នុងជីវភាពប្រចាំថ្ងៃ ហើយឯកសារអត្រានុកូលដ្ឋាន គឺជាឯកសារ បញ្ជាក់អំពីស្ថានភាពរបស់បុគ្គលម្នាក់ៗ ដែលរួមមាន៖ (១) កំណើត (២) ការរៀបអាពាហ៍ពិពាហ៍ និង(៣) មរណភាព។

និយាយម៉្យាងទៀត សម្រាប់ទិដ្ឋភាពច្បាប់ ឯកសារអត្រានុកូលដ្ឋាន គឺជាភស្តុតាងលាយលក្ខណ៍ អក្សរ ដែលបង្ហាញអំពីស្ថានភាពគតិយុត្តរបស់បុគ្គលម្នាក់ៗ និងប្រើប្រាស់ជាមូលដ្ឋានក្នុងការកំណត់សិទ្ធិ និងកាតព្វកិច្ចផ្សេងៗផងដែរ។

លោកបញ្ជាក់ថា អគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ និងរដ្ឋបាលរាជធានីភ្នំពេញ បានដាក់ឱ្យដំណើរការ យន្តការច្រកចេញចូលតែមួយសេវាអត្តសញ្ញាណកម្ម នៅសង្កាត់ចំនួន ១៤ នៃខណ្ឌទាំង១៤ ដោយធ្វើការជ្រើសរើសយក ១សង្កាត់ ក្នុងខណ្ឌនីមួយៗ ក្នុងគោលបំណងបង្ខិតសេវានៃការផ្តល់អត្តសញ្ញាណប័ណ្ណ ឱ្យ នៅកៀកជិតប្រជាពលរដ្ឋ ក្នុងនោះក្រុមការងារបានកំណត់ជ្រើសរើស យក ១សង្កាត់ ក្នុងខណ្ឌនីមួយៗ សរុប ១៤ សង្កាត់ លើ ១៤ ខណ្ឌ ន រាជធានីភ្នំពេញ ដើម្បីបម្រើឱ្យការងារសាកល្បងនេះ កាលពីថ្ងៃទី១៣ ខែឧសភា ឆ្នាំ២០២២ កន្លងទៅ។

ដោយឡែក សម្រាប់លើកទី២នេះ គឺជាការដាក់ឱ្យដំណើរការសាកល្បងនូវការងារចុះបញ្ជីអត្រានុកូលដ្ឋានតាមរយៈការជូនដំណឹង ពីមូលដ្ឋានសុខាភិបាល ដោយប្រើប្រាស់បច្ចេកវិទ្យាឌីជីថលនៅក្នុងសង្កាត់ចំនួន ០៦ នៃខណ្ឌពោធិ៍សែនជ័យ។

លោកបន្តថា កាលពីថ្ងៃទី ២៨ ខែកញ្ញា ឆ្នាំ២០២៣ កន្លងទៅ យើងបានជួបជុំគ្នាម្ដងហើយ នៅសាលារាជធានីភ្នំពេញ ដើម្បីពិភាក្សាលើទិដ្ឋភាពរួម នៃការដាក់ឱ្យ ដំណើរការចុះបញ្ជីអត្រានុកូលដ្ឋានតាមប្រព័ន្ធឌីជីថល ហើយសម្រាប់ ថ្ងៃនេះទៀតសោត គឺជាការជួបជុំក្នុងក្របខណ្ឌវគ្គបណ្តុះបណ្តាល ដែល មានគោលបំណង ពន្យល់លម្អិតអំពីបែបបទ និងនីតិវិធី ដែលត្រូវអនុវត្ត សម្រាប់ការចុះបញ្ជីអត្រានុកូលដ្ឋាន តាមរយៈការជូនដំណឹងពីមូលដ្ឋាន សុខាភិបាល ដោយប្រើប្រាស់បច្ចេកវិទ្យាឌីជីថលនេះ។

ការត្រៀម អនុវត្តទម្រង់បែបបទថ្មី ព្រោះថានេះ គឺជាការចាប់ផ្ដើមមួយ ដ៏មាន សារៈសំខាន់ ក្នុងគោលដៅពង្រឹងការងារគ្រប់គ្រងអត្រានុកូលដ្ឋាន របស់បងប្អូនប្រជាពលរដ្ឌ (កំណើត និងមរណភាព) ឱ្យស្របតាមច្បាប់ ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ដែល ត្រូវបានប្រកាសឱ្យប្រើកាលពីថ្ងៃទី០១ ខែកក្កដា ឆ្នាំ២០២៣ ផង និង ស្របតាមគោលនយោបាយ និងចក្ខុវិស័យរបស់រាជរដ្ឋាភិបាល ក្នុងការធ្វើ ទំនើបកម្មស្ថាប័ន និងការលើកកម្ពស់ការធ្វើឌីជីថូបនីយកម្ម ក្នុងរដ្ឋបាល សាធារណៈផងដែរ។

ក្រោយពីត្រូវបាន ដាក់ឱ្យដំណើរការជាផ្លូវការ លើផ្ទៃប្រទេសរួចមក ទម្រង់បែបបទថ្មីនេះ នឹងជួយសម្រួលដល់បងប្អូនប្រជាពលរដ្ឋ ក្នុងការស្នើសុំឯកសារអត- នុកូលដ្ឋាន និងធ្វើឱ្យពួកគាត់មានឯកសារគ្រប់ៗគ្នា ស្របតាមគោលបំណង នៃច្បាប់ថ្មី ដែលបានបញ្ញត្តថា «ការចុះបញ្ជីអត្រានុកូលដ្ឋានគឺធានាឱ្យមនុស្ស គ្រប់រូបមានអត្តសញ្ញាណខាងផ្លូវច្បាប់, ធានានូវការគោរពសិទ្ធិមនុស្ស ការទទួលបានសេវាគ្រប់ប្រភេទ និងជាមូលដ្ឋានសម្រាប់រៀបចំផែនការ អភិវឌ្ឍន៍ និងការតាមដានភាពរីកចម្រើននៃសង្គម»៕

អត្ថបទ៖ ស្រីរ័ត្ន

The post ការងារស្ថិតិ និងអត្រានុកូលដ្ឋាន ជាកិច្ចការដ៏មានសារៈសំខាន់ និងជាសេវាតម្រូវការសម្រាប់ប្រជាពលរដ្ឋខ្មែរគ្រប់រូប នៅក្នុងជីវភាពប្រចាំថ្ងៃ appeared first on Kampuchea Thmey Daily.

អគ្គនាយកដ្ឋានអត្តសញ្ញាណកម្ម បំភ្លឺជុំវិញបញ្ហារបស់ពលរដ្ឋក្នុងការកែឯកសារអត្រានុកូលដ្ឋាន

Thoeun Vansong — Fri, 29 Sep 2023 10:02:11 +0000

អគ្គនាយកដ្ឋានអត្តសញ្ញាណកម្ម បានចេញមកបំភ្លឺជុំវិញព័ត៌មានផ្សាយថា ពលរដ្ឋជួបប្រទះបញ្ហាប្រឈមក្នុងការកែតម្រូវឯកសារអត្រានុកូលដ្ឋាន ដូចជា សំបុត្រកំណើត អត្តសញ្ញាណប័ណ្ណសញ្ជាតិខ្មែរ ជាដើម ដោយអគ្គនាយកដ្ឋានអត្តសញ្ញាណកម្ម បានលើកពន្យល់នូវទិដ្ឋភាពរួមមួយចំនួននៃបញ្ហានេះ។

ការបំភ្លឺរបស់អគ្គនាយកដ្ឋានអត្តសញ្ញាណកម្មពេលនេះ គឺជាការឆ្លើយតបនឹងការលើកឡើងរបស់លោក សយ សុភាព ដែលបានលើកឡើងបញ្ហាប្រឈមរបស់ប្រជាពលរដ្ឋរស់នៅតាមបណ្តាខេត្តនានាពាក់ព័ន្ធនឹងការកែតម្រូវសំបុត្រកំណើត និងអត្តសញ្ញាណប័ណ្ណសញ្ជាតិខ្មែរ ដោយជួបប្រទះការលំបាកក្នុងការមកដាក់ពាក្យស្នើសុំកែតម្រូវ នៅអគ្គនាយកដ្ឋានអត្តសញ្ញាណកម្ម។

តាមរយៈសេចក្ដីបំភ្លឺរបស់ខ្លួន នៅថ្ងៃទី២៩ ខែកញ្ញានេះ អគ្គអគ្គនាយកដ្ឋានអត្តសញ្ញាណកម្ម បានរំលឹកឡើងវិញថា នៅក្រោយការដួលរលំរបបប្រល័យពូជសាសន៍ ប៉ុល ពត នៅខែមករា ឆ្នាំ១៩៧៩ ប្រទេសកម្ពុជា បានចាប់ផ្ដើមកសាងឡើងវិញពីចំណុចសូន្យ ដោយបាតដៃទទេ។ ឯកសារសម្គាល់អត្តសញ្ញាណរបស់ប្រជាពលរដ្ឋ និងលិខិតស្នាមផ្សេងៗទៀតត្រូវបានខូចខាត ឬបាត់បង់ស្ទើរគ្មានសល់។ ប្រព័ន្ធគ្រប់គ្រងអត្តសញ្ញាណបុគ្គល ត្រូវបានបំផ្លិចបំផ្លាញទាំងស្រុង ការបំពេញទិន្នន័យ ដើម្បីរៀបចំឯកសារអត្តសញ្ញាណពលរដ្ឋឡើងវិញ ភាគច្រើនផ្អែកលើការចងចាំរបស់បុគ្គលម្នាក់ៗ ឬតាមរយៈការប៉ាន់ស្មាន ដោយពុំមានឯកសារសម្អាងជាក់លាក់ឡើយ។

ដើម្បីដោះស្រាយបញ្ហាខាងលើ អគ្គនាយកដ្ឋានអត្តសញ្ញាណកម្ម បានឱ្យដឹងថា រាជរដ្ឋាភិបាល បានចេញអនុក្រឹត្យ ចុះថ្ងៃទី២៩ ខែធ្នូ ឆ្នាំ២០០០ ស្ដីពីអត្រានុកូលដ្ឋាន។ ផ្តើមចេញពីអនុក្រឹត្យនេះ ក្រសួងមហាផ្ទៃ ទទួលបានគោលការណ៍ អនុញ្ញាតពីរាជរដ្ឋាភិបាល បានធ្វើយុទ្ធនាការរយៈពេលជាង ២ឆ្នាំ (ខែតុលា ឆ្នាំ២០០៤ – ខែធ្នូ ឆ្នាំ២០០៦) ដើម្បីផ្តល់សំបុត្រកំណើតឡើងវិញជូនប្រជាពលរដ្ឋ។ ជាលទ្ធផលនៃយុទ្ធនាការនេះ ប្រជាពលរដ្ឋជាច្រើនមានសំបុត្រកំណើតជាក់លាក់ឡើងវិញ ហើយបញ្ហាប្រឈមជាច្រើនត្រូវបានដោះស្រាយជាបន្តបន្ទាប់ ដែលជាសមិទ្ធផលដ៏ធំធេងមួយរបស់រាជរដ្ឋាភិបាល។ តែយ៉ាងណា អគ្គនាយកដ្ឋានអត្តសញ្ញាណកម្ម បញ្ជាក់ថា តាមរយៈយុទ្ធនាការនេះបានបន្សល់ទុកបញ្ហា បច្ចេកទេសមួយចំនួន គឺកំហុសទិន្នន័យនៅលើសំបុត្រកំណើតរបស់ប្រជាពលរដ្ឋមានចំនួនច្រើន ជាអាទិ៍ ខុសអក្ខរាវិរុទ្ធ ខុសឈ្មោះ ខុសភេទ ខុសថ្ងៃខែឆ្នាំកំណើត ឬខុសទីកន្លែងកំណើត ជាដើម ដែលត្រូវបន្តដោះស្រាយដល់បច្ចុប្បន្ន។

តាមរយៈសេចក្ដីបំភ្លឺដដែលនេះ អគ្គនាយកដ្ឋានអត្តសញ្ញាណកម្ម បានបន្ថែមថា ដើម្បីដោះស្រាយបញ្ហាប្រឈមទាំងនេះ ក្រសួងមហាផ្ទៃបានចេញសេចក្តីណែនាំ ចុះថ្ងៃទី២០ ខែតុលា ឆ្នាំ២០១៧ ស្តីពីការកែតម្រូវ និងការធ្វើមោឃភាពទិន្នន័យនៃបញ្ជីអត្រានុកូលដ្ឋាន (សាកល្បងកែតម្រូវជាបឋមរយៈពេល២ឆ្នាំ) និងបន្ទាប់មក បានចេញសេចក្ដីណែនាំថ្មីមួយទៀត ចុះថ្ងៃទី២៣ ខែធ្នូ ឆ្នាំ២០១៩ ស្តីពីការបន្តដំណើរការកែតម្រូវ និងការធ្វើមោឃភាពទិន្នន័យនៃបញ្ជីអត្រានុកូលដ្ឋាន។

អនុវត្តតាមស្មារតីនៃសេចក្ដីណែនាំនេះ ប្រជាពលរដ្ឋដែលមានកំហុសឆ្គងទិន្នន័យ អាចដាក់ពាក្យស្នើសុំកែតម្រូវទិន្នន័យ ឬមោឃភាពទិន្នន័យនៃបញ្ជីអត្រានុកូលដ្ឋាន តាមរយៈរដ្ឋបាលក្រុង-ស្រុក-ខណ្ឌ នៃឃុំ-សង្កាត់ ដែលពលរដ្ឋបានចុះបញ្ជីអត្រានុកូលដ្ឋាន ឬជម្រើសមួយទៀត ប្រជាពលរដ្ឋអាចមកដាក់ពាក្យដោយផ្ទាល់នៅនាយកដ្ឋានអត្រានុកូលដ្ឋាន អគ្គនាយកដ្ឋានអត្តសញ្ញាណកម្ម។ នេះជាការបញ្ជាក់បន្ថែមរបស់អគ្គនាយកដ្ឋានអត្តសញ្ញាណកម្ម។

លើទិដ្ឋភាពជាក់ស្តែង អង្គភាពជំនាញមួយនេះ បានសង្កត់ធ្ងន់ថា កំហុសទិន្នន័យនៃឯកសារអត្រានុកូលដ្ឋានរបស់ប្រជាពលរដ្ឋមានលក្ខណៈចម្រុះ និងស្មុគស្មាញ។ ក្នុងនោះ កំហុសមួយចំនួនបានកើតឡើងដោយអចេតនា កំហុសមួយចំនួនបានកើតឡើងដោយកង្វះការប្រុងប្រយ័ត្នរបស់មន្ត្រីជំនាញ និងកំហុសមួយចំនួនទៀតបានកើតឡើងដោយសារពលរដ្ឋ ខ្លះបានផ្តល់ទិន្នន័យមិនត្រឹមត្រូវ ក្នុងគោលបំណងដំឡើងអាយុ ឬកែទិន្នន័យផ្សេងទៀត ដើម្បីបំពេញបែបបទទៅបម្រើការងារ ឬបំពេញតម្រូវការផ្សេងៗ។

ទោះជាយ៉ាងណា អគ្គនាយកដ្ឋានអត្តសញ្ញាណកម្ម កំពុងបន្តប្រឹងប្រែងសហការជាមួយភាគីពាក់ព័ន្ធទាំងអស់ សំដៅដោះស្រាយបញ្ហាផងទាំងពួងឱ្យបានសមស្របជូនពលរដ្ឋ ស្របតាមទស្សនៈវិស័យដែលបានកំណត់នៅក្នុងផែនការយុទ្ធសាស្ត្រជាតិស្តីពីអត្តសញ្ញាណកម្ម ២០១៧-២០២៦ គឺមនុស្សគ្រប់រូបត្រូវបានកំណត់អត្តសញ្ញាណ និងមនុស្សម្នាក់មានអត្តសញ្ញាណតែមួយ។

អគ្គនាយកដ្ឋានអត្តសញ្ញាណកម្ម កត់សម្គាល់ថា ការលើកឡើងរបស់លោក សយ សុភាព អាចធ្វើឱ្យប្រជាពលរដ្ឋមានការភ័ន្តច្រឡំអំពីទីកន្លែងដែលអាចដាក់ពាក្យស្នើសុំកែតម្រូវ និងមោឃភាពទិន្នន័យនៃបញ្ជីអត្រានុកូលដ្ឋាន ដែលតាមការពិតមានផ្តល់ជូនតាមរយៈរដ្ឋបាលក្រុង-ស្រុក-ខណ្ឌ រួចទៅហើយ។ ការមកស្នើសុំកែតម្រូវនៅអគ្គនាយកដ្ឋានអត្តសញ្ញាណកម្ម គឺជាជម្រើសបន្ថែមលើទីតាំងដែលមានស្រាប់ជូនប្រជាពលរដ្ឋ។

តែយ៉ាងណា អគ្គនាយកដ្ឋានអត្តសញ្ញាណកម្ម ក៏បានអរគុណ និងស្វាគមន៍រាល់មតិយោបល់ទាំងអស់ ដែលបានផ្តល់ក្នុងន័យស្ថាបនា ដើម្បីរួមគ្នាដោះស្រាយបញ្ហាប្រឈមនានាជូនប្រជាពលរដ្ឋ ឱ្យបានកាន់តែប្រសើរ ស្របតាមប្រសាសន៍ណែនាំដ៏ខ្ពង់ខ្ពស់របស់ប្រមុខរាជរដ្ឋាភិបាល៕

The post អគ្គនាយកដ្ឋានអត្តសញ្ញាណកម្ម បំភ្លឺជុំវិញបញ្ហារបស់ពលរដ្ឋក្នុងការកែឯកសារអត្រានុកូលដ្ឋាន appeared first on Kampuchea Thmey Daily.

សម្ដេច ស ខេង ប្រាប់ UN ថា កម្ពុជាយកចិត្តទុកដាក់ខ្ពស់លើការងារអត្រានុកូលដ្ឋាន

KC Virak — Fri, 05 Nov 2021 01:57:24 +0000

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានប្រាប់ UN ថា កម្ពុជាយកចិត្តទុកដាក់ខ្ពស់លើការងារអត្រានុកូលដ្ឋាន ដោយធ្វើយ៉ាងណាសម្រេចឱ្យបាននូវគោលដៅមួយគឺ មនុស្សម្នាក់មានអត្តសញ្ញាណមួយ។

ថ្លែងនៅក្នុងជំនួបជាមួយ លោកស្រី Armida Salsiah Alisjahbana អគ្គលេខាធិការង អង្គការសហប្រជាជាតិ និងជាលេខាធិការប្រតិបត្តិ នៃ UN-ESCAP នៅរសៀលថ្ងៃទី៤ ខែវិច្ឆិកា សម្ដេចក្រឡាហោម ស ខេង បានមានប្រសាសន៍ថា ផ្អែកលើប្រវត្តិសាស្ត្ររបស់កម្ពុជា ជាពិសេសនៅក្នុងរបបប្រល័យពូជសាសន៍ដែលកិច្ចការអត្រានុកូលដ្ឋាននេះត្រូវបានកម្ទេចចោលស្ទើរតែទាំងស្រុងនៅក្នុងអំឡុងទស្សវត្សឆ្នាំ១៩៧០ ហើយមកដល់ពេលនេះ រាជរដ្ឋាភិបាលកម្ពុជាបានខិតខំធ្វើកិច្ចការនេះសម្រេចបានសមិទ្ធផលគួរឱ្យកត់សម្គាល់ច្រើន តាមយុទ្ធសាស្ត្រដែលបានដាក់ចេញកន្លងមក ដើម្បីបំរើកិច្ចការប្រកបជីវភាពប្រចាំថ្ងៃរបស់ប្រជាពលរដ្ឋក្នុងសង្គម។

សម្ដេចក្រឡាហោមបានបន្តទៀតថា មិនតែប៉ុណ្ណោះ វឌ្ឍនភាពការងារអត្រានុកូលដ្ឋាននេះក៏បានបំរើទៅដល់ការងារចុះឈ្មោះបោះឆ្នោត និងការងារផ្ដល់អត្តសញ្ញាណបណ្ណជូនប្រជាពលរដ្ឋផងដែរ។ សម្ដេចក្រឡាហោមបានជម្រាបជូនលោកស្រីថា កម្ពុជាបាន និងកំពុងតែខិតខំយកចិត្តទុកដាក់ធ្វើការងារនេះយ៉ាងសកម្ម ហើយកម្ពុជាក៏មានផែនការយុទ្ធសាស្ត្ររបស់ខ្លួន ២០១៧-២០២១ ដែលផែនការនេះ កំពុងអនុវត្តរហូតដល់បច្ចុប្បន្ន។ ទន្ទឹមនឹងនេះ រាជរដ្ឋាភិបាលកំពុងតែយកចិត្តទុកដាក់រៀបចំសេចក្ដីព្រាងច្បាប់សំខាន់ៗមួយចំនួនជាច្បាប់ស្ដីពីអត្រានុកូលដ្ឋាន និងការងារអត្តសញ្ញាណកម្មជាដើម ដែលក្នុងគោលដៅជាសំខាន់គឺ ខិតខំធ្វើយ៉ាងណាសម្រេចឱ្យបាននូវគោលដៅមួយគឺ មនុស្សម្នាក់មានអត្តសញ្ញាណមួយ។

លោកស្រីអគ្គលេខាធិការរងអង្គការរងអង្គការសហប្រជាជាតិ បានវាយតម្លៃខ្ពស់ និងអបអរសាទរចំពោះកម្ពុជា ដែលបានបង្កើតនូវផែនការជាតិរយៈពេល ១០ ឆ្នាំ ២០១៧-២០២៤ ហើយទន្ទឹមគ្នានេះមកដល់ពេលនេះ មានរយៈពេល៤ឆ្នាំមកហើយ និងបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការរៀបចំសេចក្ដីព្រាងច្បាប់មួយចំនួនដែលសម្ដេចបានជម្រាបជូនក្នុងគោលដៅធ្វើយ៉ាងណាសម្រេចឱ្យបាននូវគោលដៅ និងគោលបំណងធ្វើឱ្យប្រជាពលរដ្ឋម្នាក់មានអត្តសញ្ញាណតែមួយ។

ក្នុងជំនួបនោះលោកស្រី Armida Salsiah Alisjahbana បានអញ្ជើញសម្ដេចក្រឡាហោមចូលរួមកិច្ចប្រជុំតុមូលថ្នាក់រដ្ឋមន្ត្រីលើកទី២ ស្ថិតិអត្រានុកូលដ្ឋានដែលរៀបចំតាមប្រព័ន្ធវីដេអូ នៅថ្ងៃទី១៩ ខែវិច្ឆិកា ឆ្នាំ២០២១ ព្រមទាំងថ្លែងការណ៍ពាក់ព័ន្ធទៅនឹងវឌ្ឍនភាពការងារដែលកម្ពុជាសម្រេចបានលើការងារអត្រានុកូលដ្ឋាន ស្តិតិអត្រានុកូលដ្ឋាននេះ ដែលកិច្ចការនេះមានសារៈសំខាន់ និងពាក់ព័ន្ធទៅនឹងកិច្ចខិតខំប្រឹងប្រែងក្នុងការសម្រេចឱ្យបាននូវគោលដៅទី១៦ នៃគោលដៅអភិវឌ្ឍន៍ប្រកបដោយចីរភាពផងដែរ។

លោកស្រី បានលើកឡើងថា គោលបំណងនៃការរៀបចំសន្និសីតកិច្ចប្រជុំតុមូលថ្នាក់រដ្ឋមន្ត្រីលើកទី២នេះ ជាគោលបំណងមួយក្នុងការជំរុញប្រទេសនានាដែលចូលរួមនោះបង្ហាញពីបទពិសោធន៍ កិច្ចខិតខំប្រឹងប្រែងរបស់ខ្លួន ពាក់ព័ន្ធទៅនឹងការងារអត្រានុកូលដ្ឋាន។

ជាការឆ្លើយតបការអញ្ជើញនេះ សម្ដេចក្រឡាហោម ស ខេង បានគាំទ្រចំពោះគំនិតផ្ដួចផ្ដើមរៀបចំកិច្ចប្រជុំតុមូលថ្នាក់រដ្ឋមន្ត្រីនេះ ហើយសម្ដេចនឹងអញ្ជើញចូលរួមតាមការអញ្ជើញ និងបានបញ្ជាក់ទៀតថា កិច្ចប្រជុំនេះ ក៏ជាឱកាសមួយសម្រាប់កម្ពុជាក្នុងការធ្វើសេចក្ដីថ្លែងការណ៍ដើម្បីចែករំលែកបទពិសោធន៍ខ្លះៗដែលកម្ពុជាសម្រេចបានក្នុងពេលកន្លងមក។

សម្ដេចក្រឡាហោមបានចាត់ទុកថា កិច្ចប្រជុំតុមូលថ្នាក់រដ្ឋមន្ត្រីលើកទី២ ខាងមុខនេះ ក៏ជាឱកាសមួយក្នុងការបង្កើតភាពដៃគូថ្មីមួយទៀតដើម្បីរួមចំណែកដល់កិច្ចការរបស់កម្ពុជាក្នុងវឌ្ឍនភាពនៃការងារអត្រានុកូលដ្ឋានដែលកម្ពុជាកំពុងតែអនុវត្តពេលនេះ៕

អត្ថបទ៖ សំអឿន

The post សម្ដេច ស ខេង ប្រាប់ UN ថា កម្ពុជាយកចិត្តទុកដាក់ខ្ពស់លើការងារអត្រានុកូលដ្ឋាន appeared first on Kampuchea Thmey Daily.