លោក វន់ ស៊ីគូ មន្រ្តីទទួលបន្ទុកការងារគ្រោះមហន្តរាយរដ្ឋបាលខេត្តកោះកុង បានឱ្យដឹងនៅថ្ងៃទី១៥ ខែកក្កដា ឆ្នាំ២០២៦ថា យ៉ាងហោចណាស់ មានលំនៅដ្ឋានពលរដ្ឋ១៤៣គ្រួសារ ដីស្រែចម្ការ២២៦ហិចតា ព្រមទាំងស្ពានថ្នល់មួយចំនួនបានរងផលប៉ះពាល់ ព្រោះតែព្យុះភ្លៀង និងខ្យល់កន្រ្តាក់នៅមូលដ្ឋានស្រុកស្រែអំបិល ស្រុកកោះកុង និងស្រុកមណ្ឌលសីមា។

មន្រ្តីទទួលបន្ទុកការងារគ្រោះមហន្តរាយរបស់រដ្ឋបាលខេត្តកោះកុង អះអាងថា ឥទ្ធិពលព្យុះភ្លៀង៣ទៅ៤ថ្ងៃនេះ មិនទាន់បង្កគ្រោះថ្នាក់របួស ឬស្លាប់ដល់ប្រជាពលរដ្ឋនោះទេ។ រីឯបរិមាណទឹកហក់ឡើងក៏បានស្រកទៅវិញជាធម្មតាហើយដែរ។ ប៉ុន្តែស្ថានភាពស្ថិតនៅក្រោមការតាមដានជាប្រចាំផងដែរ។

រដ្ឋបាលខេត្តកោះកុង បានណែនាំដល់រដ្ឋបាលសមត្ថកិច្ចក្រុងស្រុកទាំង៧ បន្តបង្កើនការយកចិត្តទុកដាក់តាមដានពីការប្រែប្រួលអាកាសធាតុ ផ្តល់ស្បៀងអាហារ និងចុះជួយសង្រ្គោះអោយទាន់ពេលវេលាចំពោះមូលដ្ឋានពលរដ្ឋដែលងាយនឹងប្រឈម។ ក្នុងចំណោមស្រុកដែលរងផលប៉ះពាល់ គឺលោក សុវណ្ណ ប៊ុនធឿន អភិបាលស្រុកកោះកុង ថ្លែងប្រាប់កម្ពុជាថ្មីថា គិតមកទល់ម៉ោងលំនៅដ្ឋានពលរដ្ឋ៣៦គ្រួសារបានរងប៉ះពាល់ ហើយក៏បានជម្លៀសទៅទីទួលសុវត្ថិភាពផងដែរ ដោយពុំមាននរណាម្នាក់របួស ឬស្លាប់ ព្រោះជំនន់ទឹកភ្លៀងនេះឡើយ។

លោកអភិបាលស្រុកកោះកុង ក៏បានផ្តល់ជាស្បៀងអាហារ និងតង់ដល់ពលរដ្ឋអំឡុងមានការប្រែប្រួលអាកាសធាតុឆ្នាំនេះ។ ជាក់ស្តែងបរិមាណទឹកជន់ហូរពីជ្រលងភ្នំតាមដងព្រែកនានាក៏បានស្រកជាបណ្តើរៗហើយដែរ។ បច្ចុប្បន្ន អាជ្ញាធរសមត្ថកិច្ចកំពុងតាមដានកម្ពស់ទឹកដែលបង្ហូរពីវារីអគ្គិសនី តបនឹងការជូនដំណឹងរបស់ក្រុមហ៊ុនអោយមានការប្រុងប្រយ័ត្នខ្ពស់ ពិសេសពលរដ្ឋរស់នៅតាមដងព្រែក។

ខេត្តកោះកុង បានរងឥទ្ធិពលព្យុះភ្លៀង និងខ្យល់កន្រ្តាក់៣ទៅ៤ថ្ងៃមកហើយ ដែលបង្កការព្រួយបារម្ភមួយចំនួនដល់ពលរដ្ឋនៅតាមតំបន់ភ្នំ និងនៅតាមដៃព្រែកឆ្នេរសមុទ្រ ដោយអាជ្ញាធរសមត្ថកិច្ចជំនាញ ក៏ត្រៀមលក្ខណៈជួយសង្រ្គោះជម្លៀសទីទួលសុវត្ថិភាព ព្រមទាំងផ្តល់ជាស្បៀងអាហារជាដើម៕ អត្តបទ៖សិរីវឌ្ឍនៈ

The post ស្រុកចំនួន៣នៅខេត្តកោះកុង រងផលប៉ះពាល់ខ្លាំងក្រោយជំនន់ទឹកភ្លៀង៣ទៅ៤ថ្ងៃជាប់គ្នា appeared first on Kampuchea Thmey Daily.

ក្នុងពិធីបើកបើកសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្ត លោកស្រី ឈី វ៉ា អភិបាលខេត្តកោះកុង បានលើកឡើងនៅព្រឹកថ្ងៃទី១៦ ខែមករា ឆ្នាំ២០២៦ នេះថា ប្រទេសជាតិកំពុងរងការឈ្លាន និងអាវុធការបំផ្លិចបំផ្លាញដោយសារជម្លោះប្រដាប់តាមព្រំដែនកម្ពុជា-ថៃ បានបង្ហាញឱ្យឃើញកាន់តែច្បាស់នូវសមត្ថភាព និងភាពចាស់ទុំផ្នែក នយោបាយរបស់រាជរដ្ឋាភិបាលកម្ពុជា ក្នុងការដឹកនាំការបញ្ចប់វិបត្តិ ដោយប្រើប្រាស់គ្រប់យន្តការទាំងការទូតផ្លូវច្បាប់ និងកាតព្វកិច្ចការពារជាតិសំដៅធ្វើយ៉ាងណាមិនឱ្យផលប្រយោជន៍ជាតិត្រូវបានរំលោភបំពានឡើយ។

លោកស្រី ក៏បានបន្តបំផុសស្មារតីស្នេហាជាតិ និងមហាសាមគ្គីរបស់ប្រជាពលរដ្ឋខ្មែរគ្រប់ទិសទី បាននិងកំពុងរួបរួមគ្នាយ៉ាងរឹងមាំ ក្នុងការគាំទ្រដល់វីរកងទ័ពដែលកំពុងឈរជើងយ៉ាងអង់អាច ការពារទឹកដីនៅសមរភូមិមុខ និងជឿជាក់លើចំណាត់ការរបស់រាជរដ្ឋាភិបាលដែលដឹកនាំដោយសម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត ជានាយករដ្ឋមន្រ្តី។

បន្ថែមលើនេះ រយៈពេល១ឆ្នាំកន្លងទៅ លោកស្រី ឈី វ៉ា បានវាយតម្លៃខ្ពស់អំពីកិច្ចខិតខំប្រឹងប្រែងរបស់អាជ្ញាធរសមត្ថកិច្ច និងមន្រ្តីពាក់ព័ន្ធទាំងអស់ដែលបានសម្រេចលទ្ធផលការងារគួរជាទីមោទកភាពមិនអាចកាត់ផ្តាច់បានសំដៅដល់ការវិនិយោគអភិវឌ្ឍន៍ និងបង្កើតមានសមិទ្ធផលសំខាន់ជាច្រើនជូនខេត្ត។

លោកស្រីអភិបាលខេត្តកោះកុង អំពាវនាវដល់មន្រ្តីគ្រប់រូបដែលនៅក្រោមឱវាទ ត្រូវគោរពក្រមសីលធម៌ឱ្យបានម៉ឺងម៉ាត់ទៅតាមតួនាទីភារកិច្ចរបស់ខ្លួនបម្រើប្រជាពលរដ្ឋ និងមិនឆ្លៀតឱកាសទាញយកប្រយោជនផ្ទាល់ខ្លូនឡើយ។ មន្ត្រីរាជការ គឺមានតែការគោរពវិន័យ ការ លើកកម្ពស់ស្មារតីទទួលខុសត្រូវ ភាពស្មោះត្រង់ចំពោះតួនាទី ភារកិច្ច និងភាពថ្លៃថ្នូក្នុងវិជ្ជាជីវៈការងារប៉ុណ្ណោះ ទើបអាចបង្កើនផលិតភាព និងប្រសិទ្ធភាពការងារបានល្អប្រសើរ។

ទាក់ទិននឹងបញ្ហាប្រឈមទាំងឡាយដែលមានក្នុងឆ្នាំ២០២៥ អាជ្ញាធរខេត្តកោះកុង រំពឹងទុកថា នឹងដោះស្រាយបានដោយ ជោគជ័យបន្ថែមទៀតក្នុងឆ្នាំ២០២៦នេះ តាមរយៈការចូលរួមមតិយោបល់អាជ្ញាធរសមត្ថកិច្ច មន្រ្តីពាក់ព័ន្ធ ដោយផ្តោតទៅលើការប្តេជ្ញាចិត្តខិតខំប្រឹងប្រែងអនុវត្តការងារក្នុងឆ្នាំនេះ និងបណ្តាឆ្នាំខាងមុខបន្តទៀត៕

អត្ថបទ៖សិរីវឌ្ឍនៈ

The post អភិបាលខេត្តកោះកុង មើលឃើញកាន់តែច្បាស់ពីភាពចាស់ទុំរបស់កម្ពុជា ចំពោះការដោះស្រាយជម្លោះព្រំដែន appeared first on Kampuchea Thmey Daily.

លោកស្រី មិថុនា ភូថង ដែលទទួលបាននូវការតែងតាំងជាអភិបាលខេត្តកោះកុង កាលពីខែមិថុនា ឆ្នាំ២០១៧ សម្រាប់អាណត្តិទី១ និងបន្តសម្រាប់អាណត្តិទី២ កាលពីខែកុម្ភៈ ឆ្នាំ២០២១ ត្រូវចប់អាណត្តិរបស់ខ្លួនក្នុងខែសីហា ឆ្នាំ២០២៥។ តាមច្បាប់ស្ដីពីការគ្រប់គ្រងរដ្ឋបាលរាជធានីខេត្តក្រុង​ស្រុកខណ្ឌ គឺអភិបាល និងអភិបាលរងទាំងអស់មានអាណត្តិការងារមិនលើសពី៤ឆ្នាំ ក៏ប៉ុន្តែអាចត្រូវបានតែងតាំងបន្ថែម៤ឆ្នាំទៀតសម្រាប់អាណត្តិទី២ របស់ខ្លួនក្នុងដែនសមត្ថកិច្ចដដែល។ ដូច្នេះការផ្លាស់ប្ដូរតំណែងអភិបាលខេត្តរបស់លោកស្រី មិថុនា ភូថង គឺស្របតាមច្បាប់កំណត់។

បើទោះជាត្រូវចប់តួនាទីនៅរដ្ឋបាលថ្នាក់ក្រោមជាតិនេះក៏ពិតមែន ក៏ប៉ុន្តែលោកស្រី មិថុនា ភូថង ក៏ត្រូវបានតែងតាំងនូវតួនាទីថ្មី ជារដ្ឋលេខាធិការនៃក្រសួងកិច្ចការនារី ដែលជាមុខតំណែងនយោបាយនៅរដ្ឋបាលថ្នាក់ជាតិ។

លោកស្រី មិថុនា ភូ​ថង បាន​ក្លាយជា​អភិបាលខេត្ត​ស្ត្រី​ដំបូង​បំផុត​ក្នុង​ប្រវត្តិសាស្ត្រ​របស់​កម្ពុជា ដោយ​លោកស្រី​ត្រូវបាន​ព្រះមហាក្សត្រនៃកម្ពុជា ដំឡើង​តំណែង​ពី​អភិបាលរងខេត្ត មកជំនួសតំណែងរបស់​លោក ប៊ុន លើ​ត ជាអភិបាលខេត្តកោះកុង។

និយាយដល់ឈ្មោះលោក ប៊ុន លើត គឺជាអតីតអភិបាលខេត្តកោះកុងមួយរូប ដែលបានកាន់តំណែងនេះពីឆ្នាំ២០០៩ ដល់ឆ្នាំ២០១៧ ពោលគឺរយៈពេលពីរអាណត្តិ ៨ឆ្នាំដូចគ្នានឹងលោកស្រី មិថុនា ភូថង។ ក្រោយចប់អាណត្តិការងារនេះ លោក ប៊ុន លើត ត្រូវបានព្រះមហាក្សត្រត្រាស់បង្គាប់តែងតាំងជារដ្ឋលេខាធិការក្រសួងការពារជាតិ រហូតដល់បច្ចុប្បន្ននេះ ដែលមានឋានន្តរសក្តិនាយឧត្តមសេនីយ៍។

ក្រៅពីអតីតអភិបាលខេត្តកោះកុងទាំងពីរខាងលើ ក៏មានលោក យុទ្ធ ភូថង ម្នាក់ទៀតក្រោយបញ្ចប់មុខងារជាអភិបាលខេត្តកោះកុង ក៏ត្រូវបានទទួលការតែងតាំង ហើយបច្ចុប្បន្នកំពុងកាន់តួនាទីរដ្ឋលេខាធិការនៃក្រសួងកសិកម្ម រុក្ខាប្រមាញ់ និងនេសាទ ផងដែរ។ លោក យុទ្ធ ភូថង កាន់ជាអភិបាលខេត្តកោះកុង ពីឆ្នាំ១៩៩៨ ដល់ឆ្នាំ២០០៩ បន្ទាប់ពីអភិបាលខេត្តដំបូងគេ រាប់ក្រោយឆ្នាំ១៩៧៩ គឺលោក រុង ផ្លាមកេសន។

លោក យុទ្ធ ​ភូ​ថង និងលោកស្រី មិថុនា ភូថង ត្រូវជាឪពុកកូននឹងគ្នា ហើយលោក គឺជាកូនប្រុសរបស់លោកព្រឹទ្ធាចារ្យ សាយ ភូថង  ដែលជា​អតីត​អនុប្រធាន​ក្រុមប្រឹក្សារដ្ឋ និង​សមាជិក​គណៈអចិន្ត្រៃយ៍​គ​ណ​បក្ស​ប្រជាជន​កម្ពុជា ប៉ុន្តែលោកព្រឹទ្ធាចារ្យ​បានទទួល​មរណភាពទៅហើយ៕

ដោយ៖ ធឿន វ៉ាន់សុង

The post ក្រោយចប់អាណត្តិ អតីតអភិបាលខេត្តកោះកុង៣រូប ទទួលបានតួនាទីជារដ្ឋលេខាធិការ appeared first on Kampuchea Thmey Daily.

ក្នុងឱកាសអបអរសាទរព្រះរាជពិធីចម្រើនព្រះជន្មព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងអញ្ជើញចុះសួរសុខទុក្ខអ្នកជំងឺនៅមន្ទីរពេទ្យបង្អែកខេត្តកោះកុង លោកស្រី មិថុនា ភូថង បានក្រើនរម្លឹកដល់ពលរដ្ឋត្រូវថែរក្សាសុខភាពអោយបានល្អជាប្រចាំថ្ងៃ។

លោកស្រីអភិបាលខេត្ត មើលឃើញថា អត្រាពលរដ្ឋ និងកុមារ ងាយប្រឈមនឹងជំងឺជាច្រើនប្រភេទព្រោះតែការបរិភោគចំណីអាហារណាដែលមានរសជាតិផ្អែមខ្លាំង។ ដោយលោកស្រីណែនាំដល់អាណាព្យាបាលកុមារតូចៗ គប្បីមិនត្រូវឱ្យកូនៗផឹក ឬញុំាចំណីអាហាររសជាតិផ្អែមច្រើនពេកនោះទេ។

លោកស្រីអភិបាលខេត្តកោះកុង ជំរុញប្រជាពលរដ្ឋ ត្រូវបរិភោគអាហារណាដែលមានជីវៈជាតិល្អ សម្រាប់ទ្រទ្រង់រូបរាងកាយ និងសូមពលរដ្ឋគ្រប់រូបឆ្លៀតពេលវេលាធ្វើលំហាត់ប្រាណយ៉ាងហោចណាស់៣០នាទីជារៀងរាល់ថ្ងៃ សម្រាប់បញ្ចេញជាតិពុលពីក្នុងខ្លួន។

អ្នកស្រី ជុន កែវវ៉ាន់ណាត មកពីឃុំតាតៃក្រោម ស្រុកកោះកុង និងលោក ជាង សុគន្ធ ជាពលរដ្ឋរស់នៅសង្កាត់ស្ទឹងវែង ក្រុងខេមរភូមិន្ទ លើកឡើងស្រដៀងគ្នាព្រឹកថ្ងៃទី១៤ ខែឧសភា ឆ្នាំ២០២៥ថា ក្រុមគ្រូពេទ្យពិតជាបានផ្តល់សេវាពិនិត្យព្យាបាលដល់ពួកគាត់យ៉ាងដិតដល់ ប្រកបដោយក្រមសីលធម៌ល្អសមនឹងគ្រូពេទ្យមើលថែរក្សាអ្នកជំងឺ។

តំណាងដល់ពលរដ្ឋ បន្ថែមទៀតថា ក្រុមគ្រូពេទ្យគ្មានការទាមទារលុយកាក់មុននឹងការព្យាបាលនោះឡើយ។ ពួកគាត់សូមថ្លែងអំណអរគុណយ៉ាងជ្រាលជ្រៅជូនចំពោះរាជរដ្ឋាភិបាល រដ្ឋបាលខេត្តកោះកុង និងក្រុមគ្រូពេទ្យដែលបានយកចិត្តទុកដាក់ពីសុខទុក្ខរបស់ពួកគាត់តាមរយៈផ្តល់ជាថវិកា និងព្យាបាលជំងឺបានឆាប់រហ័សល្អ និងមានទំនុកចិត្តខ្ពស់

អត្ថបទ៖ សិរីវឌ្ឍនៈ

The post អភិបាលខេត្តកោះកុង ណែនាំអាណាព្យាបាលកុំឲ្យកូនតូចៗបរិភោគអាហារមានជាតិផ្អែមច្រើន appeared first on Kampuchea Thmey Daily.