ការណែនាំបែបនេះបានធ្វើឡើង ក្នុងពិធីប្រកាសសមាសភាពគណៈកម្មាធិការសមាគមអតីតយុទ្ធជន និងនិវត្តជនកម្ពុជាខណ្ឌទាំង១៤ នៃរាជធានីភ្នំពេញនាព្រឹកថ្ងៃទី៨ ខែឧសភា ឆ្នាំ២០២៦នេះ នៅសាលារាជធានីភ្នំពេញ។

លោក ឃួង ស្រេង បានមានប្រសាសន៍លើកឡើងថា ក្រៅពីយកចិត្តទុកដាក់ចំពោះអតីតយុទ្ធជន និងនិវត្តជននៅក្នុងមូលដ្ឋានហើយ គណៈកម្មាធិការសមាគមអតីតយុទ្ធជន និងនិវត្តជនកម្ពុជាខណ្ឌ ត្រូវយកចិត្តទុកដាក់ឱ្យបានខ្ពស់ចំពោះគ្រួសារយុទ្ធជនជួរមុខ ដោយយើងមានស្ថិតិអស់ហើយ។ កន្លងមកនេះ យើងអនុវត្តការងារបានល្អហើយ សូមបន្តការងារនេះឱ្យកាន់តែល្អថែមទៀត។

បន្ថែមពីនេះលោក ឃួង ស្រេង ក៏បានជំរុញឱ្យគណៈកម្មាធិការសមាគមអតីតយុទ្ធជន និងនិវត្តជនកម្ពុជាខណ្ឌទាំង១៤ ពង្រឹងសាមគ្គីភាពផ្ទៃក្នុងឱ្យបានល្អ ដើម្បីបន្តដឹកនាំសមាគមន៍ឲ្យរីកចម្រើន ត្រូវគោរព និងប្រតិបត្តិឱ្យខ្ជាប់ខ្ជួននូវលក្ខន្តិកៈរបស់សមាគម ,យកចិត្តទុកដាក់ខ្ពស់ចំពោះសុខុមាលភាព និងជីវភាពរបស់សមាជិក ផ្តល់ការគាំទ្រចំពោះសមាជិក ដែលជួបការខ្វះខាតកំពុងមានជំងឺ ផ្តល់ការឧបត្ថម្ភដល់គ្រួសារសមាជិកដែលបានទទួលមរណភាពឲ្យទាន់ពេលវេលា សំដៅរួមចំណែកសម្រាលទុក្ខលំបាករបស់ពួកគាត់។

លោក ឃួង ស្រេង បានបន្តថា សម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែតតែងតែយកចិត្តទុកដាក់គិតគូរចំពោះ ជីវភាពរស់នៅរបស់អតីតយុទ្ធជន និងនិវត្តជន ដែលមានគុណបំណាច់ដ៏ធំធេងមិនអាចកាត់ថ្លៃបានក្នុងការលះបង់ដើម្បីបុព្វហេតុរំដោះជាតិ មាតុភូមិ ដោយបាននាំមកនូវសុខសន្តិភាព និងការអភិវឌ្ឍរីកចម្រើនលើគ្រប់វិស័យរហូតដល់សព្វថ្ងៃ។ ដូច្នេះហើយ ទើបសម្ដេចអគ្គមហាសេនាបតីតេជោ ហ៊ុន សែន បង្កើតឱ្យមានសមាគមន៍នេះឡើង គឺដើម្បីឱ្យយើងជួយមើលថែចិញ្ចឹមពួកគាត់។

ក្នុងឱកាសនោះ លោក រឿន រិទ្ធីពង្ស ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា រាជធានីភ្នំពេញ បានឡើងអានសេចក្តីសម្រេចស្តីពី “ ប្រកាសសមាសភាពគណៈកម្មាធិការសមាគមអតីតយុទ្ធជន និងនិវត្តជនកម្ពុជាខណ្ឌទាំង១៤ នៃរាជធានីភ្នំពេញ ដោយបានតែងតាំងអភិបាលខណ្ឌទាំង១៤ ជាប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជាខណ្ឌ ដោយមានអនុប្រធានប្រចាំការ១រូប អនុប្រធាន៣រូប និងសមាជិក សមាជិកា២រូប នៅគ្រប់ខណ្ឌទាំង១៤ នៃរាជធានីភ្នំពេញ៕

អត្ថបទ៖ ស្រីរ័ត្ន

The post អភិបាលរាជធានី ណែនាំឱ្យអាជ្ញាធរយកចិត្តទុកដាក់ខ្ពស់ចំពោះគ្រួសារយុទ្ធជនជួរមុខនៅក្នុងមូលដ្ឋាន appeared first on Kampuchea Thmey Daily.

ពីទីក្រុងតូក្យូ លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានបញ្ជាក់ថា កិច្ចសន្ទនានេះ លោកស្រី អភិបាល ក្រុងតូក្យូ និងអភិបាល ឬតំណាងរាជធានី -ក្រុង នានា នៃបណ្ដាប្រទេស អាស៊ានបានធ្វេីបទបង្ហាញលេីប្រធានបទ ស្តីពី “វិធានការទប់ទល់នឹងខ្យល់ព្យុះទឹកជំនន់ និងការអភិវឌ្ឍហេដ្ឋារចនាសម្ពន្ធទីក្រុង ” សម្រាប់ទីក្រុងរបស់ខ្លួន។ ក្នុងនាមលោក ឃួង ស្រេង អភិបាល នៃគណៈអភិបាលរាជធានីភ្នំពេញ លោក សេង វណ្ណៈ អភិបាលរងបានធ្វើបទបង្ហាញស្តីពី “ភាពធន់ និងការគ្រប់គ្រងគ្រោះមហន្តរាយធម្មជាតិ របស់រដ្ឋបាលរាជធានីភ្នំពេញ ដេីម្បីចីរភាពនិងបរិយាប័ន្ន “។

លោកស្រីអ្នកនាំពាក្យ បានបន្តទៀតថា បន្ទាប់ពីធ្វើបទបង្ហាញ និងការចូលរួមមតិយោបល់ដេីម្បីផ្លាស់ប្ដូរ និងចែក​រំលែក​បទពិសោធន៍រវាងទីក្រុងនីមួយៗរួមមាន (ទីក្រុងតូក្យូ និងទីក្រុងក្នុងតំបន់អាស៊ាន ) រួចមក លោកស្រីអភិបាលក្រុងតូក្យូបានដាក់ជូនអង្គប្រជុំពិនិត្យ និងអនុម័តលេីសេចក្ដីព្រាងសេចក្ដីថ្លែងការណ៍រួម នៃកិច្ចសន្ទនារវាងទីក្រុងតូក្យូ និងបណ្តាទីក្រុងនៃ ប្រទេសសមាជិក អាស៊ានដេីម្បីចីរភាពTokyo-Southeast Asia Capitals Dialogue for Sustainability Joint Statement ហៅកាត់ថា (TOKYO-SEADS) ដោយផ្តោតលើប្រធានបទសំខាន់ គឺ “វិធានការទប់ទល់នឹងខ្យល់ព្យុះ និងទឹកជំនន់ និងការអភិវឌ្ឍហេដ្ឋារចនាសម្ពន្ធទីក្រុងដេីម្បីបង្កើត ទីក្រុងប្រកបដោយភាពធន់និងចីរភាព”។

មុននឹងបញ្ចប់ លោកស្រីអភិបាលក្រុងតូក្យូ ក៏បានជម្រាបជូនអំពីកម្មវិធីនៃកិច្ចប្រជុំមន្ត្រីបច្ចេកទេស ជាន់ខ្ពស់របស់ G-NETS គ្រោងនឹងរៀបចំធ្វើឡើងនៅខែ ឧសភា ឆ្នាំ២០២៧ និងកិច្ចប្រជុំកំពូលលេីកទី៤របស់ G-NETS នឹងធ្វើនៅឆ្នាំ២០២៨ ហើយលោកស្រីអភិបាលក្រុងបានអញ្ជើញលោក លោកស្រីអភិបាលរាជធានី -ក្រុង និងមន្ត្រីជាន់ខ្ពស់ពាក់ព័ន្ធទាំងអស់ចូលរួមក្នុងប្រជុំដ៏មានសារ:សំខាន់ទាំងនោះបន្តទៀត៕

អត្ថបទ៖ ស្រីរ័ត្ន

The post អភិបាលរាជធានីភ្នំពេញ ចូលរួមក្នុងកិច្ចសន្ទនារវាងទីក្រុងតូក្យូ និងបណ្ដាទីក្រុងនៃប្រទេសអាស៊ាន ដេីម្បីចីរភាព (TOKYO-SEADS) appeared first on Kampuchea Thmey Daily.

ការលើកឡើងបែបនេះរបស់លោក ឃួង ស្រេង បានធ្វើឡើងនារសៀលថ្ងៃទី២៧ ខែមេសា ឆ្នាំ២០២៦ ខណៈអញ្ជើញចូលជួបពិភាក្សាការងារជាមួយលោកស្រី យូរីកូ កូអ៊ីកេ អភិបាលក្រុងតូក្យូ ក្នុងឱកាសដែលលោកអញ្ជើញបំពេញទស្សនកិច្ចផ្លូវការ និងចូលរួមកិច្ចប្រជុំកំពូលលើកទី៣ នៃបណ្តាញទីក្រុង សកលសម្រាប់ចីរភាព (3rd G-NETS Leaders Summit) នៅទីក្រុងតូក្យូ ប្រទេសជប៉ុន។

លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងពីទីក្រុងតូក្យូមកថា នៅក្នុងកិច្ចពិភាក្សាការងារជាមួយលោកស្រី យូរីកូ កូអ៊ីកេ អភិបាលក្រុងតូក្យូ ជាដំបូងលោកអភិបាលរាជធានីបានថ្លែងអំណរគុណជូនចំពោះលោកស្រីអភិបាលក្រុងតូក្យូ ដែលបានចំណាយពេលវេលាដ៏មមាញឹកក្នុងការរៀបចំធ្វើជាម្ចាស់ផ្ទះ​នៃកិច្ចប្រជុំកំពូល G-NETS និងបានផ្តល់កិត្តិយសទទួលជួបពិភាក្សាការងារជាមួយគណៈប្រតិភូរដ្ឋបាលរាជធានីភ្នំពេញជាពេលនេះ។

លោកអភិបាលក៏បានជម្រាបជូនលោកស្រីអំពីស្ថានភាពរបស់រាជធានីភ្នំពេញចាប់តាំងពីពេលកកើតរហូតដល់ពេលបច្ចុប្បន្ន ជាពិសេស អំពីការកសាងអភិវឌ្ឍន៍រាជធានី ក្រោមការដឹកនាំប្រកបដោយភាពឈ្លាសវៃ ប៉ិនប្រសប់ និងគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា នៃព្រះរាជាណាចក្រកម្ពុជា ក៏ដូចជារាជរដ្ឋាភិបាលនីតិកាលទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលជាថ្នាក់ដឹកនាំបន្តវេនវ័យក្មេង ប្រកបដោយសមត្ថភាព បញ្ញាញាណ និងថាមពល បាននិងកំពុងបន្តផ្តោតការយកចិត្តទុកដាក់ខ្ពស់ថែរក្សាសន្តិភាព និងស្ថិរភាពនយោបាយ ដែលជាបុរេលក្ខខណ្ឌ ដើម្បីធានាដល់ការអភិវឌ្ឍជាតិមាតុភូមិរហូតមកដល់សព្វថ្ងៃ។

លោកអភិបាលក៏បានជម្រាបជូនបន្តទៀតថា រាជរដ្ឋាភិបាលកម្ពុជាក្រោមការដឹកនាំដ៏ខ្ពង់ខ្ពស់បំផុតរបស់សម្តេចតេជោអតីតនាយករដ្ឋមន្ត្រី និងសម្តេចធិបតីនាយករដ្ឋមន្ត្រី បានយកចិត្តទុកដាក់ខ្ពស់ក្នុងការរៀបចំនូវហេដ្ឋារចនាសម្ព័ន្ធរូបវ័ន្ត បណ្តាញប្រឡាយលូ ប្រព័ន្ធគ្រប់គ្រងទឹកកខ្វក់ ការគ្រប់គ្រងសំណល់រឹង ការគ្រប់គ្រងចរាចរណ៍ និងការរក្សាអនាម័យនៅតាមបណ្តោយដងទន្លេផងដែរ សំដៅធ្វើយ៉ាងណាឲ្យរាជធានីភ្នំពេញមានសោភណភាពស្រស់ស្អាត បរិយាកាសរស់នៅល្អ និងមានភាពធន់ទៅនឹងគ្រោះធម្មជាតិ ជំនន់ទឹកភ្លៀង និងគ្រោះមហន្តរាយផ្សេងៗ ព្រមទាំងការអភិវឌ្ឍប្រព័ន្ធគ្រប់គ្រងទីក្រុងតាមបែបឆ្លាតវៃ តាមរយៈការបំពាក់នូវកាមេរ៉ាឆ្លាតវៃនៅតាមដងផ្លូវ ដែលមានសមត្ថភាពខ្ពស់ក្នុងការថែរក្សាសន្តិសុខ និង សណ្តាប់ធ្នាប់ទីក្រុង។ កិច្ចការស្តារ និងអភិវឌ្ឍហេដ្ឋារចនាសម្ព័ន្ធខាងលើក៏ត្រូវបានចូលរួមចំណែកយ៉ាងជិតស្និទ្ធពីសំណាក់រដ្ឋាភិបាលជប៉ុនតាមរយៈទីភ្នាក់ងារ JICA ដែលបានផ្តល់នូវគម្រោងហិរញ្ញប្បទានឥត សំណងជាច្រើនគម្រោង ដើម្បីរួមចំណែកធ្វើឲ្យរាជធានីភ្នំពេញមានការអភិវឌ្ឍប្រកបដោយចីរភាព។

ជាកិច្ចឆ្លើយតប លោកស្រីអភិបាលក្រុងតូក្យូបានសម្តែងការស្វាគមន៍យ៉ាងកក់ក្តៅជូនលោកអភិបាលរាជធានីភ្នំពេញ និងគណៈប្រតិភូ ចំពោះការអញ្ជើញចូលរួមក្នុងកិច្ចប្រជុំកំពូលលើកទី៣ របស់ G-NETS ជាពិសេសក្នុងជំនួបពិភាក្សាការងារក្នុងពេលនេះ។

លោកស្រី អភិបាលក្រុងតូក្យូក៏បានជម្រាបជូនលោកអភិបាលរាជធានីភ្នំពេញអំពីគោលបំណងដែលទីក្រុងតូក្យូបង្កើតឱ្យមានព្រឹត្តិការណ៍ G-NETS ចាប់តាំងពីឆ្នាំ២០២២ មក គឺដើម្បីជំរុញចំណងការទូតរវាងទីក្រុង និងទីក្រុងក្នុងសកលលោក ដោយអនុញ្ញាតឱ្យទីក្រុងនានាប្រើប្រាស់វេទិកា នេះដើម្បីចែករំលែកចំណេះដឹង ជំនាញបច្ចេកទេសសាកល្បង​បច្ចេកវិទ្យាច្នៃប្រឌិត និងសហការលើគោលនយោបាយកម្រិតខ្ពស់ ក្នុងការដោះស្រាយបញ្ហាប្រឈមជាសកល និងបង្កើតអនាគតទីក្រុងរួមគ្នាប្រកបដោយនិរន្តរភាព ភាពធន់ និងបរិយាប័ន្ន ហើយលោកស្រីសង្ឃឹមថារដ្ឋបាលរាជធានីភ្នំពេញអាចការចែករំលែកនូវបទពិសោធន៍ និងចំណេះដឹងរបស់ខ្លួនជាមួយបណ្តាទីក្រុងជាសមាជិកផ្សេងទៀត ព្រមទាំងទទួលបាននូវបទពិសោធន៍ថ្មីៗបន្ថែមទៀតទាក់ទងនឹងការដោះស្រាយគ្រោះមហន្តរាយ ពីការចូលរួមក្នុងកម្មវិធីនេះ។ ជាទីបញ្ចប់លោកស្រីបានជូនពរឱ្យការស្នាក់នៅ និងបំពេញទស្សនកិច្ចរបស់ គណៈប្រតិភូរដ្ឋបាលរាជធានីភ្នំពេញទទួលបានជោគជ័យ៕

អត្ថបទ៖ ស្រីរ័ត្ន

The post អភិបាលរាជធានី៖ កិច្ចការស្តារ និងអភិវឌ្ឍហេដ្ឋារចនាសម្ព័ន្ធជាច្រើននៅរាជធានីភ្នំពេញ ត្រូវបានចូលរួមចំណែកពីរដ្ឋាភិបាលជប៉ុន appeared first on Kampuchea Thmey Daily.

ដើម្បីការរៀបចំព្រឹត្តិការណ៍ “នគរសង្ក្រាន្ត” នេះ ទទួលបានជោគជ័យ និងមានសោភ័ណភាពស្រស់បំព្រង សមស្របទៅតាមទំនៀមទម្លាប់ប្រពៃណី វប្បធម៌ដ៏ល្អផូរផង់របស់ជាតិ កាលពីព្រឹកថ្ងៃទី ១០ មេសា នេះ លោក ឃួង ស្រេង អភិបាលរាជធានីភ្នំពេញ បានដឹកនាំមន្ត្រីជំនាញ ចុះពិនិត្យទីតាំងដែលត្រូវរៀបចំព្រឹត្តិការណ៍ “នគរសង្ក្រាន្ត” មួយចំនួន ពិសេសនៅរមណីយដ្ឋានវប្បធម៌ប្រវត្តិសាស្ត្រវត្តភ្នំ និងនៅភូមិវប្បធម៌(សួនច្បារវឌ្ឍនៈ សួនច្បារអតីតទីលានប្រជាធិបតេយ្យ) ក្នុងភូមិសាស្ត្រខណ្ឌដូនពេញ។

ក្នុងឱកាស នៃការចុះពិនិត្យនោះ លោក ឃួង ស្រេង ក៏បានណែនាំឲ្យក្រុមការងារពន្លឿនការរៀបចំនេះឲ្យបានលឿន និងទាន់ពេលចូលឆ្នាំ។ បន្ថែមពីនេះ លោក ឃួង ស្រេង នូវបានណែនាំឲ្យក្រុមការងារ និងមន្ត្រីពាក់ព័ន្ធ បាញ់ទឹកសំអាតផ្លូវ ធ្វើអនាម័យ បរិស្ថាន ផងដែរ។

គិតមកដល់ថ្ងៃទី ១០ មេសា នេះ ក្រោមការណែនាំពី លោក ឃួង ស្រេង អភិបាលរាជធានីភ្នំពេញ អង្គភាពជំនាញនានា និងមន្ទីរពាក់ព័ន្ធរបស់រដ្ឋបាលរាជធានីភ្នំពេញ បាននិងកំពុងមមាញឹកញាប់ដៃញាប់ជើងសម្រុករៀបចំតុបតែងលម្អសោភ័ណភាពនៅតាមសួនច្បារសាធារណៈនានា ជាពិសេសនៅរមណីយដ្ឋានវប្បធម៌ប្រវត្តិសាស្ត្រវត្តភ្នំ និងតាមដងមហាវិថីនានា នៅក្នុងរាជធានីភ្នំពេញ ដើម្បីត្រៀមរៀបចំព្រឹត្តិការណ៍ “នគរសង្ក្រាន្ត”។ ចំណែកខាងជំនាញរបស់សហភាពសហព័ន្ធយុវជនកម្ពុជា ក៏កំពុងរៀបចំតុបតែងលម្អ ពិសេសភូមិវប្បធម៌ ក៏ដូចទីតាំងផ្សេងៗ ទៀតដែរ។

រូបសំណាកសេះមាស ដ៏អង់អាច តំណាងឲ្យ ឆ្នាំមមី នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ ធ្វើឡើងពីឫស្សី កម្ពស់ ៣,៨៩ ម៉ែត្រ រចនាក្រោមថ្វីដៃជាងដ៏ចំណាន ត្រូវបានក្រុមការងាររបស់ រដ្ឋបាលរាជធានីភ្នំពេញ ដំឡើងរួចរាល់ នៅលើបល្ល័ង្ក កម្ពស់ ៣ ម៉ែត្រ ទទឹង ៣ ម៉ែត្រ ខាងមុខ នាឡិកាធំ នៃរមណីយដ្ឋានវប្បធម៌ប្រវត្តិសាស្ត្រវត្តភ្នំ រង់ចាំទទួលស្វាគមន៍ប្រជាពលរដ្ឋមកទស្សនា ក្នុងឱកាសពិធីបុណ្យចូលឆ្នាំថ្មីនេះ។

គួរបញ្ជាក់ថា តាមសេចក្តីជូនដំណឹងរបស់រដ្ឋបាលរាជធានីភ្នំពេញ ព្រឹត្តិការណ៍ “នគរសង្ក្រាន្ត” នៅរាជធានីភ្នំពេញ នឹងធ្វើឡើងក្នុងរយៈពេល ៦ ថ្ងៃ ដោយចាប់ពីថ្ងៃទី ១៤ ខែមេសា ដល់ថ្ងៃទី ១៩ ខែមេសា ឆ្នាំ ២០២៦។ ដើម្បីចូលរួមអបអរសាទរក្នុងឱកាសពិធីបុណ្យចូលឆ្នាំថ្មី ប្រពៃណីជាតិ ឆ្នាំមមី អដ្ឋស័ក ព.ស.២៥៧០ គ.ស.២០២៦ និងចូលរួមថែរក្សាការពារទំនៀមទម្លាប់ប្រពៃណី វប្បធម៌ដ៏ល្អផូរផង់របស់ជាតិ ទាក់ទាញភ្ញៀវទេសចរជាតិ-អន្តរជាតិ ជាពិសេសបង្ហាញពីការដឹងគុណយ៉ាងជ្រាលជ្រៅ និងផ្សារភ្ជាប់ពិធីបុណ្យចូលឆ្នាំជាមួយវីរកងកម្លាំងជួរមុខ និងពលរដ្ឋភៀសសឹក ក្រោមស្មារតីការរួបរួមសាមគ្គី នៃមហាគ្រួសារខ្មែរតែមួយ រដ្ឋបាលរាជធានីភ្នំពេញ បានសហការជាមួយសហភាពសហព័ន្ធយុវជនកម្ពុជា (ស.ស.យ.ក) រៀបចំព្រឹត្តិការណ៍ “នគរសង្ក្រាន្ត” រយៈពេល ៦ ថ្ងៃ ចាប់ពីថ្ងៃទី ១៤ ខែមេសា ដល់ថ្ងៃទី ១៩ ខែមេសា ឆ្នាំ ២០២៦ នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ តំបន់ជុំវិញវត្តភ្នំ បរិវេណសួនច្បារវឌ្ឍនៈ សួនច្បារអតីតទីលានប្រជាធិបតេយ្យ ស្ពាននាគភ្លោះរមណីយដ្ឋានវត្តភ្នំ រហូតដល់ផ្សាររាត្រី ផ្លូវថ្មើរជើងចតុមុខរាជធានីភ្នំពេញ (Walk Street) និងកម្មវិធីអមនៅបរិវេណបាសាក់លែន (Bassac Lane) និងបរិវេណផ្សារទួលទំពូង។ ព្រឹត្តិការណ៍ “នគរសង្ក្រាន្ត” មានការរៀបចំកម្មវិធីប្រពៃណីសាសនា និងកម្មវិធីមួយចំនួន ដូចជា ពិធីទទួលទេវតាឆ្នាំថ្មី ដង្ហែក្បួននគរសង្ក្រាន្ត ដង្ហែព្រះពុទ្ធរូប ពូនភ្នំខ្សាច់ ស្រង់ព្រះ សម្តែងទស្សនីយភាពសិល្បៈវប្បធម៌ជាច្រើនទម្រង់ លេងល្បែងប្រជាប្រិយជាតិ និងការតាំងពិព័រណ៍ផលិតផលក្នុងស្រុក។ ជាមួយគ្នានេះ រដ្ឋបាលរាជធានីភ្នំពេញ នឹង បើកដំណើរការផ្លូវថ្មើរជើងចតុមុខរាជធានីភ្នំពេញ (Walk Street) រយៈពេល ៦ ថ្ងៃ ចាប់ពីថ្ងៃទី ១៤ ខែមេសា ដល់ថ្ងៃទី ១៩ ខែមេសា ឆ្នាំ ២០២៦ ផងដែរ។

ជាមួយគ្នានេះ រដ្ឋបាលរាជធានីភ្នំពេញ បានអំពាវនាវដល់ប្រជាពលរដ្ឋពីគ្រប់មជ្ឈដ្ឋាន សូមអញ្ជើញមកចូលរួមទស្សនាកម្សាន្តក្នុងព្រឹត្តិការណ៍ “នគរសង្ក្រាន្ត” នៅតាមទីតាំងខាងលើ ឲ្យបានច្រើនកុះករ ក្រោមម្លប់សន្តិភាព ដ៏ត្រជាក់ត្រជំ និងក្រោមស្មារតីសាមគ្គីភាព ឯកភាព និងភាពធន់៕
អត្ថបទ ៖ ស្រីរ័ត្ន

The post អភិបាលរាជធានី ចុះពិនិត្យមើលការរៀបចំព្រឹត្តិការណ៍ “នគរសង្ក្រាន្ត” ខណៈបុណ្យចូលឆ្នាំថ្មី នៅសល់តែ ៤ ថ្ងៃទៀត appeared first on Kampuchea Thmey Daily.

ការណែនាំរបស់លោក ឃួង ស្រេង បានធ្វើឡើងនៅរសៀលថ្ងៃទី០៦មេសា ឆ្នាំ២០២៦ ខណៈលោកអភិបាល និងឯកឧត្ដម ឌី វិជ្ជា អគ្គស្នងការរងនគរបាលជាតិ អញ្ជើញជាអធិបតីក្នុងអង្គប្រជុំពិភាក្សាស្តីពីការងារការពារសន្តិសុខ សុវត្ថិភាព និងសណ្តាប់ធ្នាប់សាធារណៈ ក្នុងឱកាសពិធីបុណ្យចូលឆ្នាំថ្មីប្រពៃណីជាតិ ឆ្នាំមមី អដ្ឋស័ក ព.ស.២៥៧០ នៅសាលារាជធានីភ្នំពេញ។

លោក ឃួង ស្រេង បានមានប្រសាសន៍ថា នៅរាជធានីភ្នំពេញ មានវត្តអារាមចំនួន១៥១វត្ត ប្រជាពលរដ្ឋ ក្រៅពីមកដើរលេងកំសាន្តនៅរមណីយដ្ឋានវប្បធម៌ប្រវត្តិសាស្ត្រវត្តភ្នំ និងតំបន់សប្បាយភាព៥ទីតាំងទៀតដែលរៀបចំឡើងដោយ (ស.ស.យ.ក.) សហការជាមួយរដ្ឋបាលរាជធានីភ្នំពេញហើយ ពួកគាត់អាចដើរលេងកំសាន្តនៅតាមបណ្តាវត្តអារាមទាំងនេះឬនៅកន្លែងសប្បាយភាពផ្សេងទៀត។ ដូច្នេះទេ សូមអាជ្ញាធរខណ្ឌទាំង១៤ និងកងកម្លាំងមានសមត្ថកិច្ចទាំងអស់ យកចិត្តទុកដាក់ឱ្យបានខ្ពស់ លើការរក្សាសន្តិសុខ សុវត្ថិភាពជូនប្រជាពលរដ្ឋ ដើម្បីឱ្យពួកគាត់បានសប្បាយរីករាយ ក្នុងឱកាសពិធីបុណ្យចូលឆ្នាំថ្មីប្រពៃណីជាតិ មិនថានៅទីតាំង “នគរសង្ក្រាន្ត”ឬទាំងសប្បាយភាពផ្សេងៗទៀតឡើយ។ ក្រៅពីការងាររក្សាសន្តិសុខ សុវត្ថិភាពជូនប្រជាពលរដ្ឋ ក្នុងឱកាសពិធីបុណ្យចូលឆ្នាំថ្មីហើយ យើងក៏មិនភ្លេចការបោសសំអាត បទល្មើសឆបោកតាមប្រព័ន្ធបច្ចេកវិទ្យា (ONLINE SCAMS)ដែរ។

ជាមួយនឹងការងាររក្សាសន្តិសុខ សុវត្ថិភាពជូនប្រជាពលរដ្ឋហើយ លោក ឃួង ស្រេង ក៏បានណែនាំឱ្យអាជ្ញាធរ និងស្ថាប័នពាក់ព័ន្ធរៀបចំតុបតែង ដើម្បីទទួលទេវតាឆ្នាំថ្មី ការបំបាត់ក្លិនស្អុយ និងគិតគូរពីការប្រមូលសំរាមនៅទីតាំងសប្បាយភាពទាំងអស់នេះផងដែរ។

ឯកឧត្ដម ឌី វិជ្ជា បានមានប្រសាសន៍លើកឡើងផងដែរថា ព្រឹត្តិការណ៍ “នគរសង្ក្រាន្ត” ឆ្នាំនេះ មិនមែនធ្វើឡើងក្នុងរយៈពេល៣ថ្ងៃទេ គឺមានរយៈពេល៦ថ្ងៃ ដូច្នេះយើងត្រូវគ្រប់គ្រងកម្លាំងឱ្យបានល្អ នៅគ្រប់ទីតាំងទាំងអស់សំដៅធ្វើយ៉ាងណាឱ្យពិធីបុណ្យចូលឆ្នាំថ្មីប្រពៃណីជាតិដំណើរការទៅដោយរលូន និងសប្បាយរីករាយជូនប្រជាពលរដ្ឋ។

គួរបញ្ជាក់ថា តាមសេចក្តីជូនដំណឹងរបស់រដ្ឋបាលរាជធានីភ្នំពេញ ព្រឹត្តិការណ៍ “នគរសង្ក្រាន្ត” នៅរាជធានីភ្នំពេញ នឹងធ្វើឡើងក្នុងរយៈពេល ៦ថ្ងៃ ដោយចាប់ពីថ្ងៃទី១៤ ខែមេសា ដល់ថ្ងៃទី១៩ ខែមេសា ឆ្នាំ២០២៦។ ដើម្បីចូលរួម អបអរសាទរក្នុងឱកាសពិធីបុណ្យចូលឆ្នាំថ្មីប្រពៃណីជាតិ ឆ្នាំមមី អដ្ឋស័ក ព.ស.២៥៧០ គ.ស.២០២៦ និងចូលរួម ថែរក្សាការពារទំនៀមទម្លាប់ប្រពៃណី វប្បធម៌ដ៏ល្អផូរផង់របស់ជាតិ ទាក់ទាញភ្ញៀវទេសចរជាតិ-អន្តរជាតិ ជាពិសេស បង្ហាញពីការដឹងគុណយ៉ាងជ្រាលជ្រៅ និងផ្សារភ្ជាប់ពិធីបុណ្យចូលឆ្នាំជាមួយវីរកងកម្លាំងជួរមុខ និងបងប្អូនភៀសសឹក ក្រោមស្មារតីការរួបរួមសាមគ្គីនៃមហាគ្រួសារខ្មែរតែមួយ រដ្ឋបាលរាជធានីភ្នំពេញ បានសហការជាមួយសហភាព សហព័ន្ធយុវជនកម្ពុជា (ស.ស.យ.ក.) រៀបចំព្រឹត្តិការណ៍ “នគរសង្ក្រាន្ត” រយៈពេល ៦ថ្ងៃ ចាប់ពីថ្ងៃទី១៤ ខែមេសា ដល់ថ្ងៃទី១៩ ខែមេសា ឆ្នាំ២០២៦ នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ តំបន់ជុំវិញវត្តភ្នំ បរិវេណសួនច្បារវឌ្ឍនៈ សួនច្បារអតីតទីលានប្រជាធិបតេយ្យ ស្ពាននាគភ្លោះរមណីយដ្ឋានវត្តភ្នំ រហូតដល់ផ្សាររាត្រី ផ្លូវថ្មើរជើងចតុមុខរាជធានី ភ្នំពេញ (Walk Street) និងកម្មវិធីអមនៅបរិវេណបាសាក់លែន (Bassac Lane) និងបរិវេណផ្សារទួលទំពូង។

ព្រឹត្តិការណ៍ “នគរសង្ក្រាន្ត” មានការរៀបចំកម្មវិធីប្រពៃណីសាសនា និងកម្មវិធីមួយចំនួនដូចជា ពិធីទទួលទេវតាឆ្នាំថ្មី ដង្ហែក្បួននគរសង្ក្រាន្ត ដង្ហែព្រះពុទ្ធរូប ពូនភ្នំខ្សាច់ ស្រង់ព្រះ សម្តែងទស្សនីយភាពសិល្បៈវប្បធម៌ជាច្រើនទម្រង់ លេងល្បែងប្រជាប្រិយជាតិ និងការតាំងពិព័រណ៍ផលិតផលក្នុងស្រុក។ ជាមួយគ្នានេះ រដ្ឋបាលរាជធានីភ្នំពេញ នឹង បើកដំណើរការផ្លូវថ្មើរជើងចតុមុខរាជធានីភ្នំពេញ (Walk Street) រយៈពេល ៦ថ្ងៃ ចាប់ពីថ្ងៃទី១៤ ខែមេសា ដល់ថ្ងៃទី១៩ ខែមេសា ឆ្នាំ២០២៦ ផងដែរ។

ជាមួយគ្នានេះ រដ្ឋបាលរាជធានីភ្នំពេញ បានអំពាវនាវដល់បងប្អូនប្រជាពលរដ្ឋពីគ្រប់មជ្ឈដ្ឋាន សូមអញ្ជើញ មកចូលរួមទស្សនាកម្សាន្តក្នុងព្រឹត្តិការណ៍ “នគរសង្ក្រាន្ត” នៅតាមទីតាំងខាងលើ ឱ្យបានច្រើនកុះករ ក្រោមម្លប់សន្តិភាព ដ៏ត្រជាក់ត្រជំ និងក្រោមស្មារតីសាមគ្គីភាព ឯកភាព និងភាពធន់៕

អត្ថបទ៖ ស្រីរ័ត្ន

The post អភិបាលរាជធានី ណែនាំឱ្យកងកម្លាំងទាំង១៤ ខណ្ឌយកចិត្តទុកដាក់ខ្ពស់លើការរក្សាសន្តិសុខ សុវត្ថិភាពជូនពលរដ្ឋក្នុងឱកាសបុណ្យចូលឆ្នាំថ្មី appeared first on Kampuchea Thmey Daily.

លោកបានបញ្ជាក់ថា អាជ្ញាធរមិនគួរគិតថាបទល្មើសឆបោកតាមប្រព័ន្ធបច្ចេកវិទ្យាបានអស់ពីមូលដ្ឋានរបស់ខ្លួនឡើយ ព្រោះក្រុមឆបោកអាចលាក់ខ្លួននៅទីតាំងដែលយើងមិននឹកស្មានដល់ផងដែរ។ ដូច្នេះ អាជ្ញាធរខណ្ឌ និងកម្លាំងពាក់ព័ន្ធទាំងអស់ ត្រូវត្រួតពិនិត្យ និងបោសសម្អាតឱ្យបានដូចភ្លៀងរលឹម នៅក្នុងមូលដ្ឋានដែលខ្លួនគ្រប់គ្រង។

ជាមួយគ្នានេះ លោក ឃួង ស្រេង បានមានប្រសាសន៍ថា តាមផែនការរបស់លោក ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានដាក់បទបញ្ជាឱ្យធ្វើការបង្ក្រាប និងបោសសម្អាតបទល្មើសឆបោកតាមប្រព័ន្ធបច្ចេកវិទ្យាឱ្យអស់ នៅត្រឹមពាក់កណ្តាលខែមីនា ឆ្នាំ២០២៦ នេះ។ លោកបញ្ជាក់ថា៖«ដូច្នេះយើងនៅពេលតែ១សប្តាហ៍ទៀតប៉ុណ្ណោះ ដើម្បីអនុវត្តផែនការនេះឱ្យទទួលបានជោគជ័យ។ កន្លងមកនេះយើងអនុវត្តការងារនេះបានល្អប្រសើរហើយ។ ប៉ុន្តែទោះបីជាយ៉ាងណាក្តី យើងកុំសន្តិភាពពេក ពួកគេអាចជ្រកនៅតាមទីតាំងមួយចំនួនដែលយើងនឹកស្មានមិនដល់»។

ភ្ជាប់ជាមួយការបោសសម្អាតការឆបោកតាមប្រព័ន្ធបច្ចេកវិទ្យា រឿងល្បែងស៊ីសងគ្រប់ប្រភេទនិងគ្រឿងញៀន ក៏ត្រូវបន្តបោសសម្អាតផងដែរ ដើម្បីបង្កភាពកក់ក្តៅដល់ប្រជាពលរដ្ឋ។ ឥឡូវយើងកំពុងតែដើរលើផ្លូវត្រូវហើយ សូមបន្តដើរលើផ្លូវនេះទៅមុខទៀត សំដៅធ្វើយ៉ាងណាឱ្យបទល្មើសឆបោកតាមប្រព័ន្ធបច្ចេកវិទ្យាគ្មាននៅក្នុងមូលដ្ឋានរបស់យើងគ្រប់គ្រង។ នេះជាការណែនាំបន្ថែម។

ក្នុងឱកាសនោះ លោក ឃួង ស្រេង អភិបាលរាជធានីភ្នំពេញ ក៏បានធ្វើការកោតសរសើរដល់គណៈបញ្ជាការឯកភាពរដ្ឋបាលរាជធានីនិងគណៈបញ្ជាការឯកភាពរដ្ឋបាលខណ្ឌទាំង១៤ ព្រមទាំងកងកម្លាំងសមត្ថកិច្ចនគរបាល និងកងរាជ​អាវុធហត្ថរាជធានីភ្នំពេញដែលបានធ្វើការងារបង្ក្រាបនិងបោសសម្អាតបទល្មើសឆបោកតាមប្រព័ន្ធបច្ចេកវិទ្យានេះកន្លងមកទទួលបានជោគជ័យល្អ។

តាមអនុសាសន៍របស់នាយករដ្ឋមន្រ្តី សម្តេចធិបតី ហ៊ុន ម៉ាណែត ប្រទេសកម្ពុជាបានប្រកាន់យកគោលនយោបាយអភិវឌ្ឍសេដ្ឋកិច្ចពណ៌ស ដោយមិនទទួលយកសេដ្ឋកិច្ចពណ៌ប្រផេះ និងសេដ្ឋកិច្ចពណ៌ខ្មៅឡើយ។ ពណ៌ប្រផេះ ឬខ្មៅសំដៅទៅលើពាក់ព័ន្ធការឆបោកអនឡាញ។ សម្តេចធិបតីបានបញ្ជាក់ថា កម្ពុជាបានប្តេជ្ញាចិត្តយ៉ាងមុតមាំក្នុងការបោស សម្អាត និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scam) ឱ្យអស់ពីប្រទេសកម្ពុជា ត្រឹមខែមេសា ឆ្នាំ២០២៦ខាងមុខនេះ៕

ដោយ៖ ស្រីរ័ត្ន

The post អភិបាលរាជធានី ដាក់កំហិតឱ្យបោសសម្អាតឆបោកអនឡាញក្នុងមូលដ្ឋាន ត្រឹមពាក់កណ្តាលខែមីនានេះ appeared first on Kampuchea Thmey Daily.

ការ​សង្កត់​ធ្ងន់​នេះ ក្នុង​អង្គ​ប្រជុំ​ស្ដីពី​វឌ្ឍនភាព​ការងារ​បង្ក្រាប​ការ​ឆបោក​តាម​ប្រព័ន្ធ​បច្ចេកវិទ្យា (Online Scams) កាលពី​ព្រឹក​ថ្ងៃ​ទី ១១ ខែ​កុម្ភៈ ឆ្នាំ ២០២៦ នៅ​សាលា​រាជធានី​ភ្នំពេញ។

នា​ឱកាស​នោះ លោក ឃួង ស្រេង បាន​សង្កត់​ធ្ងន់​ថា «ដើម្បី​ឲ្យ​បទល្មើស​ឆបោក​តាម​ប្រព័ន្ធ​បច្ចេកវិទ្យា (ONLINE SCAMS) អស់​ពី​ក្នុង​មូលដ្ឋាន ដាច់ខាត​យើង​ត្រូវ​សំអាត​មេ​ SCAMER ឲ្យ​អស់ បើ​មិន​អស់​ទេ វា​នឹង​កើតកូន កើត​ចៅ​បន្ត​មក​ទៀត»។

លោក ឃួង ស្រេង បន្ត​ថា ខណ្ឌ​ទាំង ១៤ ត្រូវ​ចុះ​ត្រួតពិនិត្យ​ជា​ប្រចាំ​នៅ​ក្នុង​មូលដ្ឋាន​របស់​ខ្លួន ជា​មួយ​នឹង​ការ​ត្រៀម​កម្លាំង​សហការ​តាមដាន​សភាពការណ៍​ជាក់ស្ដែង។ ការងារ​នេះ ត្រូវតែ ម៉ឺងម៉ាត់ និង​ម៉ត់ចត់​បំផុត ព្រោះ​នេះ​ជា​យុទ្ធនាការ​សំអាត​បទល្មើស​ឆបោក​តាម​ប្រព័ន្ធ​បច្ចេកវិទ្យា (ONLINE SCAMS) ឲ្យ​អស់ ត្រឹម​ថ្ងៃ​ទី ៣០ ខែ​មីនា ឆ្នាំ ២០២៦ ខាងមុខនេះ។

លោក​បន្ត​ទៀត​ថា សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី និង លោក​អភិ​សន្តិ​បណ្ឌិត ស សុខា ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួងមហាផ្ទៃ បាន​ដាក់​បទបញ្ជា​ឲ្យ​អនុវត្ត គឺ ត្រូវ​បោស​សំអាត​បទល្មើស​ឆបោក​តាម​ប្រព័ន្ធ​បច្ចេកវិទ្យា (ONLINE SCAMS) នេះ​ឲ្យ​ក្លាយ​ជា​តំបន់​ពណ៌ស។

លោក​បញ្ជាក់​ថា ពេលនេះ​ជា​យុទ្ធនាការ​សំអាត​បទល្មើស​ឆបោក​តាម​ប្រព័ន្ធ​បច្ចេកវិទ្យា (ONLINE SCAMS) ជា​យុទ្ធនាការ​ក្តៅ ដែល​ទាមទារ​ឲ្យ​លុបបំបាត់​ឲ្យ​អស់ ក្លាយ​ជា​តំបន់​ពណ៌ស។ ប៉ុន្តែ​មិន​មែន​មាន​ន័យ​ថា បោះចោល​ការងារ​រក្សា​សន្តិសុខ សណ្ដាប់ធ្នាប់​សាធារណៈ​ជូន​ប្រជាពលរដ្ឋ​នោះ​ទេ។ ក្នុងនាម​អាជ្ញាធរ ត្រូវ​អនុវត្ត​ការងារ​ទាំង ២ ខាង​លើ​នេះ ឲ្យ​បាន​ល្អ ​ព្រមៗ គ្នា ដើម្បី​ជា​ជំនឿ​ទុក​ចិត្ត​ពី​ប្រជាពលរដ្ឋ។

លោក​​បន្ថែម​ថា ជា​ទិសដៅ​បន្ត​របស់​ខណ្ឌ​ទាំង ១៤ និង​កម្លាំង​មាន​សមត្ថកិច្ច​ពាក់ព័ន្ធ ត្រូវ​កំណត់​ទីតាំង​ដែល​សង្ស័យ​ឲ្យ​ដូច​ភ្លៀង​រលឹម ជាមួយ​នឹង​ការ​ប្រើប្រាស់​ជំនាញ​ផ្ទាល់ខ្លួន​នៅ​ក្នុង​មូលដ្ឋាន​ឲ្យ​អស់​លទ្ធភាព និង​ជឿជាក់​ថា នៅ​មូលដ្ឋាន​របស់​ខ្លួន​គ្មាន​បទល្មើស​ឆបោក​តាម​ប្រព័ន្ធ​បច្ចេកវិទ្យា (ONLINE SCAMS) ក្រោយ​ថ្ងៃ​ទី ៣០ ខែ​មីនា ឆ្នាំ ២០២៦ ខាងមុខ៕

អត្ថបទ ៖ ស្រីរ័ត្ន

The post លោក ឃួង ស្រេង ៖ បើចង់លុបបំបាត់បទល្មើស ONLINE SCAMS ឲ្យអស់ គណៈបញ្ជាការឯកភាពរាជធានី ត្រូវសំអាតមេ SCAMER appeared first on Kampuchea Thmey Daily.

ការ​ដាក់​ចេញ​ជា​ផែនការ​ខាង​លើ​នេះ​បាន​ធ្វើ​ឡើង​កាលពី​រសៀល​ថ្ងៃ​ទី ១២ ខែ​មករា ឆ្នាំ ២០២៦ ម្សិលមិញ ក្នុង​កិច្ចប្រជុំ​ជាមួយ​កម្លាំង​មាន​សមត្ថកិច្ច​ទាំង ២ ប្រភេទ និង​អាជ្ញាធរ​ខណ្ឌ​ទាំង ១៤ ព្រមទាំង​មន្ទីរ​ពាក់ព័ន្ធ​មួយ​ចំនួន​នៅ​សាលា​រាជធានី​ភ្នំពេញ​ផង​ដែរ។

លោក ឃួង ស្រេង លើក​ឡើង​ថា ការ​ប្រយុទ្ធ​ប្រឆាំង​ការ​ឆបោក​តាម​ប្រព័ន្ធ​បច្ចេកវិទ្យា (ONLINE SCAMS) វា​ជា​រឿង​សំខាន់​ដែល​រាជរដ្ឋាភិបាល​បាន​និង​កំពុង​យកចិត្តទុកដាក់ ហើយ​ការងារ​នេះ កងកម្លាំង និង​គណៈ​បញ្ជាការ​ឯកភាព​ខណ្ឌ​ទាំង ១៤ បាន​បំពេញ​ការងារ​របស់​ខ្លួន​បាន​ល្អ​ប្រសើរ រហូត​បង្ក្រាប​បាន​ជា​បន្តបន្ទាប់​ទាំង ONLINE SCAMS និង​ការ​ចាប់​ជំរិត។

លោក ឃួង ស្រេង បន្ត​ថា ជា​ផែនការ​ចំពោះ​មុខ ការ​បង្ក្រាប​ការ​ឆបោក​តាម​ប្រព័ន្ធ​បច្ចេកវិទ្យា (ONLINE SCAMS) គឺ​អនុវត្ត​ជា​លក្ខណៈ​ទ្រង់ទ្រាយ​ធំ​មួយ ជា​មួយ​នឹង​ការ​កំណត់​ទីតាំង​ច្បាស់លាស់ ពី​មួយ​ខណ្ឌ​ទៅ​មួយ​ខណ្ឌ ពិសេស​នៅ​តំបន់​ដែល​មាន​ការ​សង្ស័យ។ គ្រប់​ខុន​ដូ​ទាំងអស់ ត្រូវ​តែ​មាន​ការ​ត្រួតពិនិត្យ លើកលែងតែ​ម្ចាស់​ទីតាំង​ខុន​ដូ​ទាំងនោះ​អះអាង​ថា គ្មាន​បទល្មើស និង​ទទួល​ខុសត្រូវ​ចំពោះ​មុខ​ច្បាប់។

លោក ឃួង ស្រេង បញ្ជាក់​ថា ក្រៅពី​បង្ក្រាប ONLINE SCAMS ហើយ ល្បែងស៊ីសង​គ្រប់​ប្រភេទ ដូចជា ជល់​មាន់ បៀរ អាប៉ោង កន្ទុយលេខ ឆ្នោត​ឡូតូ ជាដើម គឺ ត្រូវតែ​បង្ក្រាប​ឱ្យ​អស់ ព្រោះ​វា​ប៉ះពាល់​ផ្ទាល់​នឹង​ជីវភាព​ប្រចាំថ្ងៃ​របស់​ប្រជាពលរដ្ឋ។ ចំពោះ​ការងារ​ការពារ​សន្តិសុខ​សុវត្ថិភាព និង​សណ្ដាប់​សាធារណៈ ក៏​ត្រូវ​តែ​យកចិត្តទុកដាក់​ឱ្យ​បាន​ខ្ពស់​ជូន​ប្រជាពលរដ្ឋ​ក្នុង​មូលដ្ឋាន​ខណ្ឌ​ទាំង ១៤ ផង​ដែរ៕

អត្ថបទ ៖ ស្រីរ័ត្ន

The post គណៈបញ្ជាការឯកភាពរាជធានី ដាក់ផែនការជាទ្រង់ទ្រាយធំក្នុងការបង្ក្រាប ការឆបោកតាមប្រព័ន្ធបច្ចេកវិទ្យា (ONLINE SCAMS) appeared first on Kampuchea Thmey Daily.