ក្នុងសេចក្ដីថ្លែងការណ៍របស់លោកវេជ្ជបណ្ឌិត ទា ផលា លើកឡើងថា កម្ពុជាបានប្ដេជ្ញាចិត្តបញ្ចប់ជំងឺអេដស៍ត្រឹមឆ្នាំ២០៣០ ដោយបានរំលេចពីសមិទ្ធផលគួរឱ្យកត់សម្គាល់របស់កម្ពុជាក្នុងនាមជាប្រទេសដំបូងនៅតំបន់អាស៊ី-ប៉ាស៊ីហ្វិក និងជាប្រទេសមួយក្នុងចំណោមប្រទេសចំនួន៧ នៅលើពិភពលោក ដែលសម្រេចបានគោលដៅសកលមេរោគអេដស៍ ៩៥-៩៥-៩៥។

ការសម្រេចបាននូវគោលដៅសកលមេរោគអេដស៍ ៩៥-៩៥-៩៥  គឺសំដៅដល់ ៩៥% នៃអ្នកផ្ទុកមេរោគអេដស៍បានដឹងពីស្ថានភាពផ្ទុកមេរោគអេដស៍របស់ខ្លួន, ៩៥% នៃអ្នកដែលដឹងស្ថានភាពផ្ទុកមេរោគអេដស៍ បានទទួលការព្យាបាលដោយឱសថប្រឆាំងមេរោគអេដស៍ និង៩៥%នៃអ្នកដែលបានទទួលការព្យាបាល ដោយឱសថប្រឆាំងមេរោគអេដស៍ មានបន្ទុកមេរោគអេដស៍កម្រិតទាប។ ភាពជោគជ័យមុនកាលកំណត់នេះ គឺជាការឆ្ពោះទៅរកការបញ្ចប់ជំងឺអេដស៍ ដែលជាបញ្ហាគំរាមកំហែងចំពោះសុខភាពសាធារណៈនៅឆ្នាំ២០៣០។

កម្ពុជា ពីប្រទេសដែលឆ្លងជំងឺអេដស៍ច្រើនជាងគេ មួយឆ្នាំមានអ្នកឆ្លងអេដស៍ចំនួន១៥ ០០០នាក់ បច្ចុប្បន្ននេះ បានប្រែក្លាយទៅជាប្រទេសឈានមុខគេ ក្នុងការឆ្លើយតបទៅនឹងមេរោគអេដស៍ ក្នុងតំបន់អាស៊ី-ប៉ាស៊ីហ្វិក។ កម្ពុជានៅតែចាត់ទុកជំងឺអេដស៍ គឺជាហានិភ័យចម្បងចំពោះសុខភាពសាធារណៈ ដែលរាជរដ្ឋាភិបាលត្រូវបន្តដោះស្រាយ និងយកចិត្តទុកដាក់ខ្ពស់ជានិច្ច។

ស្ថិតនៅស្នាក់ការកណ្ដាលអង្គការសហប្រជាជាតិ លោកវេជ្ជបណ្ឌិត ទា ផលា អនុប្រធានអាជ្ញាធរជាតិប្រយុទ្ធនឹងជំងឺអេដស៍ ក៏បានចែករំលែកបទពិសោធ និងឧត្តមានុវត្តន៍របស់កម្ពុជា​ ក្នុងការឆ្លើយតបនឹងជំងឺអេដស៍ប្រកបដោយចីរភាព និងភាពធន់ ទៅកាន់តំណាងមកពីទ្វីបអាហ្វ្រិកផងដែរ៕

ដោយ៖ ធឿន វ៉ាន់សុង

The post កម្ពុជាប្ដេជ្ញាចិត្តចំពោះអង្គការសហប្រជាជាតិថា នឹងបញ្ចប់ជំងឺអេដស៍ត្រឹមឆ្នាំ២០៣០ appeared first on Kampuchea Thmey Daily.

ថ្លែងក្នុងកិច្ចប្រជុំស្តីពីការប្រកាសការលើកកម្ពស់ការប្រើប្រាស់ស្រោមអនាម័យ និងការឆ្លើយតមទៅនឹងមេរោគអេដស៍ និងជំងឺអេដស៍ជាមួយបណ្តាញសារព័ត៌មានដែលរៀបចំឡើងដោយអង្គការមូលនិធិថែទាំសុខភាពអ្នកជំងឺអេដស៍ (AHF) កាលពីរសៀលថ្ងៃទី ៤ កុម្ភៈ ឆ្នាំ២០២៦ លោកទេសរដ្ឋមន្ត្រី អៀង មូលី មានប្រសាសន៦ថា ការឆ្លងថ្មីនៃអ្នកជំងឺអេដស៍ភាគច្រើនទៅលើក្រុមគោលដៅមួយចំនួនដូចជានារីរកស៊ីបម្រើសេវាផ្លូវភេទ ការស្រឡាញ់ភេទដូចគ្នា និងអ្នកប្រើប្រាស់គ្រឿងញៀន ដោយសារក្រុមទាំងនេះរួមភេទជាមួយដៃគូមិនបានប្រើប្រាស់ស្រោមអនាម័យត្រឹមត្រូវ។

លោកបានលើកឡើងថា«ដើម្បីទប់ស្កាត់ការឆ្លងមេរោគអេដស៍ រដ្ឋាភិបាលបានចេញគោលនយោបាយលើកទឹកចិត្តដល់អ្នកដឹងខ្លួន ឬសង្ស័យផ្ទុកមេរោគនេះដើម្បីទៅធ្វើតេស្តរកមេរោគអេដស៍ដោយផ្តល់គោលការណ៍មួយចំនួនដូចជាការផ្តល់ប័ណ្ណប.ស.ស និងផ្តល់សេវាព្យាបាលជូនគាត់»។ លោកគូសបញ្ជាក់ថា ការប្រើស្រោមអនាម័យពិតជាមានសារៈសំខាន់ណាស់ក្នុងទប់ស្កាត់ការឆ្លងមេរោគអេដស៍ ការឆ្លងជំងឺកាមរោគផ្សេងៗ និងការមិនចង់មានកូនដ៏មានប្រសិទ្ធភាព។ ដូច្នេះត្រូវតែធ្វើការផ្សព្វផ្សាយឱ្យបានទូលំទូលាយ ដែលរាជរដ្ឋាភិបាលចង់បានក្នុងលុបបំបាត់ការឆ្លងជំងឺអេដស៍នេះ។

ចំណែក លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ីអង្កការមូលនិធិថែទាំសុខភាពអ្នកឆ្លងជំងឺអេដស៍(AHF)បានលើកឡើងថា ការផ្សព្វផ្សាយឱ្យប្រើប្រាស់ស្រោមអនាម័យ ដើម្បីឱ្យពលរដ្ឋយល់ដឹងកាន់តែទូលំទូលាយ ក្នុងការទប់ស្កាត់ការឆ្លងមេរោគអេដស៍។ លោកបានបន្តថា ការផ្សព្វផ្សាយការប្រើប្រាស់ស្រោមអនាម័យជាមួយនឹងសារសាមញ្ញមួយ “កុំស្ទាក់ស្ទើរប្រើស្រោមអនាម័យ” ស្រោមអនាម័យ គឺជាឧបករណ៍ដ៏មានឥទ្ធិពលបំផុត និងចំណាយតិចបំផុតមួយក្នុងការបង្ការមេរោគអេដស៍ និងជំងឺកាមរោគ។

ទោះជាមូលនិធិសម្រាប់កម្មវិធីសុខភាពកំពុងថយចុះ ប៉ុន្តែហានិភ័យនៃការឆ្លងមេរោគអេដស៍ និងជំងឺកាមរោគមិនទាន់បានថយចុះនៅឡើយទេ។ នៅក្នុងបរិបទនេះស្រោមអនាម័យមានសារៈសំខាន់ជាងពេលណាៗទាំងអស់ នៅតែជាមធ្យាបាយមួយ ក្នុងចំណោមមធ្យាបាយផ្សេងៗទៀតមានតម្លៃសមរម្យ និងមានប្រសិទ្ធភាពបំផុត ដែលយើងមានដើម្បីបង្ការមេរោគអេដស៍ ជំងឺឆ្លងតាមការរួមភេទផ្សេងទៀត និងការមានផ្ទៃពោះដោយមិនបានគ្រោងទុក។ ស្រោមអនាម័យមិនមែនជាបច្ចេកវិទ្យាថ្មីទេ ប៉ុន្តែវាត្រូវបានបញ្ជាក់ឱ្យឃើញថា វាអាចទុកចិត្តបាន និងមានឥទ្ធិពលខ្លាំង។ វាផ្តល់ការការពារពីរយ៉ាងគឺ វាការពារប្រឆាំងនឹងមេរោគអេដស៍ និងជំងឺកាមរោគផ្សេងទៀត។

លោកវជ្ជបណ្ឌិតថ្លែងថា« ប្រទេសកម្ពុជាបានបង្ហាញភាពជាអ្នកដឹកនាំដ៏រឹងមាំរួចហើយ តាមរយៈគោលនយោបាយប្រើប្រាស់ស្រោមអនាម័យ ១០០ ភាគរយ ជាពិសេសនៅក្នុងគ្រឹះស្ថានកម្សាន្តនានា។ គោលនយោបាយនេះ បានជួយសង្គ្រោះជីវិត និងបង្ហាញថានៅពេលដែលមានគោលការណ៍ច្បាស់លាស់ ការប្តេជ្ញាចិត្ត និងកិច្ចសហប្រតិបត្តិការ នឹងនាំឱ្យសុខភាពសាធារណៈប្រសើរឡើង »។

គួរបញ្ជាក់ថា អង្គការមូលនិធិថែទាំសុខភាពអ្នកជំងឺអេដស៍ (AHF) គឺជាអង្គការមិនស្វែងរកប្រាក់ចំណេញសកលដែលផ្តល់ថ្នាំទំនើប និងការតស៊ូមតិដល់មនុស្សជាង ២,៨ លាននាក់នៅក្នុងប្រទេសចំនួន ៥០ ទូទាំងពិភពលោកនៅអាហ្វ្រិក អាមេរិក តំបន់អាស៊ី/ប៉ាស៊ីហ្វិក និងអឺរ៉ុប។ បច្ចុប្បន្ន (AHF) ជាអ្នកផ្តល់សេវាថែទាំសុខភាពអេដស៍ មិនស្វែងរកប្រាក់ចំណេញធំជាងគេបំផុតនៅលើពិភពលោក៕

អត្ថបទ៖ សំអឿន

The post មន្រ្តីព្រមានថា មេរោគអេដស៍អាចផ្ទុះឡើងវិញ បើអត្រាអ្នកឆ្លងថ្មីមិនធ្លាក់ក្រោម១នាក់ក្នុងមួយថ្ងៃ appeared first on Kampuchea Thmey Daily.

ការណែនាំនេះ ខណៈនៅឆ្នាំ២០២៤ អ្នកផ្ទុកមេរោគអេដស៍មានចំនួនប្រមាណ ៧៦ ០០០នាក់ ដែលក្នុងនេះអ្នកផ្ទុកមេរោគ អេដស៍ចំនួន ៧១ ៧១៦នាក់ បានទទួលការធ្វើតេស្តរកមេរោគ និងបានដឹងពីស្ថានភាពផ្ទុកមេរោគអេដស៍ របស់ពួកគេ និងបានទទួលសេវាថែទាំនិងព្យាបាលដោយឱសថប្រឆាំងមេរោគអេដស៍នៅមូលដ្ឋាន សុខាភិបាលរបស់រដ្ឋនៅទូទាំងប្រទេស ស្មើនឹង១០០% ដែលជាអត្រាគ្របដណ្តប់ខ្ពស់ជាងគេនៅតំបន់ អាស៊ី-ប៉ាស៊ីហ្វិក។ ប៉ុន្តែអ្នកផ្ទុកមេរោគអេដស៍ជាង ៤០០០ នាក់ទៀតពុំទាន់បានមកទទួលសេវាធ្វើតេស្តឬព្យាបាលនៅឡើយទេ។

ទោះជាបែបនេះក្តី ករណីឆ្លងថ្មីនៃមេរោគអេដស៍នៅកម្ពុជាបានធ្លាក់ចុះជាបន្តបន្ទាប់ ជាក់ស្តែងការឆ្លងថ្មីនៃមេរោគអេដស៍បានធ្លាក់ចុះពី ១ ៥០០ករណីក្នុងឆ្នាំ២០២៣ មកនៅត្រឹម ១ ២០០ករណីក្នុងឆ្នាំ២០២៤។ ចំណែកឯចំនួនអ្នកស្លាប់ ដោយសារមេរោគអេដស៍ក៏បានធ្លាក់ចុះពី ១ ១០០ករណីក្នុងឆ្នាំ២០២៣ មកនៅត្រឹម ១ ០០០ករណី ក្នុងឆ្នាំ២០២៤។

អ្នកផ្ទុកមេរោគអេដស៍នៅកម្ពុជា ត្រូវបានរាប់បញ្ចូលក្នុងចំណោមប្រជាជនក្រីក្រដែលកំពុងទទួលបាន នូវផលប្រយោជន៍នៃកម្មវិធីគាំពារសង្គមកាន់តែទូលំទូលាយ។ គិតពីពេលចាប់ផ្តើមអនុវត្តកម្មវិធី ក្នុងត្រីមាសទី១ ឆ្នាំ២០២២ រហូតដល់ដំណាច់ខែកញ្ញា ឆ្នាំ២០២៥ អ្នកផ្ទុកមេរោគអេដស៍ចំនួន ៥៣ ៨២១នាក់ បានទទួលប័ណ្ណមូលនិធិសមធម៌សុខាភិបាល ស្មើនឹង ៧៥% នៃអ្នកផ្ទុកមេរោគអេដស៍ សកម្មចំនួន ៧១ ៧១៦នាក់។

ជាមួយនឹងសមិទ្ធផលខាងលើ នាយករដ្ឋមន្រ្តីកម្ពុជា បានណែនាំស្ថាប័នពាក់ព័ន្ធផ្សព្វផ្សាយស្វែងរកអ្នកផ្ទុកមេរោគអេដស៍ឱ្យមកទទួលសេវា ដើម្បីការពារសមិទ្ធផលសម្រេចបាន ព្រមទាំងរុញការឆ្លើយតប នឹងមេរោគអេដស៍ ឈានឆ្ពោះទៅសម្រេចគោលដៅអភិវឌ្ឍន៍ប្រកបដោយចីរភាពនៅឆ្នាំ២០៣០។ ក្នុងសារលិខិតសង្កត់ធ្ងន់ថា៖«មេរោគអេដស៍មិនទាន់បំបាត់អស់នៅឡើយទេ។ ជំងឺអេដស៍នៅតែជាបញ្ហាសុខភាពសាធារណៈមួយដែលបាន ប៉ះពាល់ដល់ជីវិតមនុស្សជាច្រើន រួមទាំងជះផលអវិជ្ជមានដល់សង្គម សេដ្ឋកិច្ច នៅទូទាំងពិភពលោក»។

ការប្រារព្ធទិវាពិភពលោកប្រយុទ្ធនឹងជំងឺអេដស៍ គឺជាកាលានុវត្តភាពថ្មីដ៏សំខាន់មួយ ដើម្បីបង្ហាញពីផលប៉ះពាល់លើការឆ្លើយតបនឹងមេរោគអេដស៍ និងជំងឺអេដស៍ ជាមួយ ការប្រឈមថ្មីនានា រួមទាំងការកាត់បន្ថយថវិកាពីអ្នកផ្តល់ជំនួយអន្តរជាតិ ក៏ដូចជាដើម្បីបង្ហាញពីចីរភាពនិងភាពធន់ របស់ប្រទេស និងសហគមន៍ដែលក្រោកឈរយ៉ាងរឹងមាំក្នុងការការពារសមិទ្ធផលសម្រេចបាន ព្រមទាំងរុញការឆ្លើយតប នឹងមេរោគអេដស៍ ឈានឆ្ពោះទៅសម្រេចគោលដៅអភិវឌ្ឍន៍ប្រកបដោយចីរភាពនៅឆ្នាំ២០៣០។

សារលិខិតបញ្ជាក់ថា ប្រធានបទ “យកឈ្នះការរំខាន បរិវត្តកម្មឆ្លើយតបនឹងជំងឺអេដស៍» មានន័យសំខាន់ក្នុងការជំរុញ ឱ្យសង្គមខិតខំប្រឹងប្រែងបន្តការឆ្លើយតបនឹងមេរោគអេដស៍ និងជំងឺអេដស៍ឱ្យកាន់តែមានប្រសិទ្ធភាព និងមានភាព រឹងមាំជាងមុន។ ការរំខានដូចជា ការរើសអើង ការមាក់ងាយចំពោះអ្នកផ្ទុកមេរោគអេដស៍ ប្រជាជនគន្លឹះ កង្វះការយល់ដឹងត្រឹមត្រូវពីប្រជាពលរដ្ឋ កង្វះធនធាន ឬកង្វះការយកចិត្តទុកដាក់របស់អ្នកពាក់ព័ន្ធដែលតម្រូវឱ្យយើងទាំងអស់ពង្រឹងកិច្ចសហការគ្រប់តួអង្គ ដើម្បីគាស់រំលើងឧបសគ្គទាំងនោះ ហើយជំរុញឱ្យមានបរិវត្តកម្ម ឬការផ្លាស់ប្តូរដ៏វិជ្ជមានមួយ ក្នុងការដឹកនាំ គ្រប់គ្រង និងបង្ការជំងឺអេដស៍៕

The post អាជ្ញាធរកំពុងផ្សព្វផ្សាយស្វែករកអ្នកផ្ទុកមេរោគអេដស៍ជាង ៤ ០០០ នាក់ឱ្យមកទទួលសេវាព្យាបាល appeared first on Kampuchea Thmey Daily.

លោកវេជ្ជបណ្ឌិត ម៉ា សួនសុភ័ក្រ្ត ប្រធានគ្រប់គ្រងមណ្ឌលរក្សាសុខភាព គ្លីនិកថែទាំ និងព្យាបាលជំងឺកាមរោគ មានប្រសាសន៍ថា ក្រុមយុវវ័យដែលប្រឈមអាចអញ្ជើញមកទទួលសេវានៅ មណ្ឌលរក្សាសុខភាពដែលបង្កើតឡើងដោយអង្គការមូលនិធិថែទាំសុខភាព ដែលគាំទ្រដោយមជ្ឈមណ្ឌលជាតិប្រយុទ្ធនឹងជំងឺអេដស៍សើរស្បែកនិងកាមរោគ។ មណ្ឌលសុខភាពនេះ បម្រើសេវាចាប់ពីម៉ោង ៨ព្រឹកដល់ម៉ោង៦ល្ងាច ៧ថ្ងៃក្នុង១សប្តាហ៍ មិនមានសម្រាកទេព្រោះមានបុគ្គលិកប្តូរវេនគ្នាប្រចាំការ។ ការព្យាបាលនៅទីនេះមិនមានគិតថ្លៃទេ និងលាក់ការណ៍សម្ងាត់ជូនអតិថិជនផងដែរ។

លោកវេជ្ជបណ្ឌិតបានបន្តថា ការបង្កើតមណ្ឌលរក្សាសុខភាពនេះគឺដើម្បីផ្តល់សេវាព្យាបាលជំងឺកាមរោគដោយសារតែបញ្ហាជំងឺនេះនៅកម្ពុជាក៏ដូចជានៅលើពិភពលោកមានការឆ្លងច្រើន។ លោកបន្តថា ចាប់តាំងពីបង្កើតឡើងក្នុងកំឡុង​ខែមករាឆ្នាំ២០២៥ ក្នុងមួយខែមានអតិថិជនមកទទួលសេវាប្រមាណពី ៣៥០ទៅ ៤០០នាក់ក្នុងនោះ៩០% ជាក្រុមបុរសស្រលាញ់បុរស។ លោកបានបន្ថែមថា ក្រៅពីផ្តល់សេវាពិនិត្យព្យាបាលជំងឺកាមរោគយើងក៏មានផ្តល់សេវាបង្ការការចម្លងមេរោគអេដស៍តាមរយៈការផ្តល់ថ្នាំលេបនិងថ្នាំចាក់សម្រាប់បង្ការមុនពេលរួមភេទកុំឱ្យឆ្លងមេរោគអេដស៍និងថ្នាំលេបក្រោយរួមភេទកុំឱ្យឆ្លងមេរោគអេដស៍ផងដែរ។

ថ្លែងក្នុងប្រាប់អ្នកសារព័ត៌មាននៅព្រឹកថ្ងៃទី ១៣ កញ្ញានេះ នៅមណ្ឌលថែរក្សាសុខភាពទួលគោករបស់ AHF ដែលមានទីតាំងផ្ទះលេខ០៦ ផ្លូវលេខ៦០៤ សង្កាត់បឹងកក់២ ខណ្ឌទួលគោក រាជធានីភ្នំពេញ លោកវេជ្ជបណ្ឌិត ចន ផាន់ណា ប្រធានអង្គការមូលនិធិថែទាំសុខភាពអ្នកជំងឺអេដស៍ប្រចាំប្រទេសកម្ពុជា បានមានប្រសាសន៍ថា«យើងមានសេចក្តីសោមនស្សរីករាយក្នុងការផ្តល់ជូនអ្នកសារព័ត៌មាននូវឱកាសមួយដើម្បីទស្សនាគ្លីនិកពិនិត្យ និងព្យាបាលកាមរោគ ចូលរួមដោយផ្ទាល់ជាមួយអតិថិជន និងបានឃើញដោយផ្ទាល់នូវសេវាកម្មដែលមានឥទ្ធិពលដែលយើងផ្តល់ជូន» ។

លោកបន្តថា ជាមួយនឹងការថយចុះនៃជំនួយអន្តរជាតិ ការទ្រទ្រង់ការឆ្លើយតបនឹងមេរោគអេដស៍របស់កម្ពុជារហូតដល់ឆ្នាំ ២០៣០ នៅតែជាបញ្ហាប្រឈមដ៏សំខាន់។ ឥឡូវនេះគឺជាពេលវេលាដើម្បីជំរុញការផ្តល់មូលនិធិក្នុងស្រុកដើម្បីបំពេញតាមការប្តេជ្ញាចិត្តរបស់រាជរដ្ឋាភិបាល។ AHF Cambodia កំពុងពង្រឹងកិច្ចខិតខំប្រឹងប្រែងរបស់ខ្លួនដោយធានាបាននូវការទទួលបានការព្យាបាល ១០០% សម្រាប់អតិថិជនដែលទើបធ្វើរោគវិនិច្ឆ័យថាមានផ្ទុកមេរោគអេដស៍ និងការពង្រីកសេវាកម្មរបស់យើង រួមទាំងមណ្ឌលពិនិត្យ និងព្យាបាលជំងឺកាមរោគ។

លោកបានបន្ថែមទៀតថា បច្ចុប្បន្នអង្គការមូលនិធិថែទាំសុខភាពអ្នកជំងឺអេដស៍កម្ពុជាបានសហការជាមួយក្រសួងសុខាភិបាល ផ្តល់ការថែទាំ និងព្យាបាលមេរោគអេដស៍ដល់អតិថិជនដែល កម្មវិធីនេះបានចាប់ផ្តើមនៅឆ្នាំ ២០០៥ ហើយបានពង្រីកសេវាកម្មបន្តិចម្តងៗជាមួយភ្នាក់ងារថែទាំសុខភាពផ្សេងទៀត។ តាមរយៈកម្មវិធីផ្សេងៗដែលគាំទ្រ AHF Cambodia មានគោលបំណងធ្វើឱ្យប្រសើរឡើងនូវការព្យាបាល និងថែទាំអ្នករស់នៅជាមួយមេរោគអេដស៍ និងជំងឺអេដស៍នៅមន្ទីរពេទ្យរដ្ឋាភិបាល លើកកម្ពស់ការធ្វើតេស្តមេរោគអេដស៍ក្នុងសហគមន៍ និងការប្រើប្រាស់ស្រោមអនាម័យ និងការពារមេរោគអេដស៍ ជាពិសេសក្នុងចំណោមប្រជាជនសំខាន់ៗ និងក្រុមដែលប្រឈមមុខខ្ពស់ច្រើនបំផុតផ្សេងទៀត។

លោកវេជ្ជបណ្ឌិត បានស្នើសុំឱ្យអ្នកសារព័ត៌មានជួយផ្សព្វផ្សាយស្តីពីជំងឺអេដស៍និងជំងឺកាមរោគឱ្យបានផុសផុសបន្ថែមទៀតទាក់ទិននឹងបញ្ហាប្រឈមនិងភាពជោគជ័យដើម្បីលើកទឹកចិត្តឱ្យប្រជាពលរដ្ឋពិសេសក្រុមប្រឈមស្ត្រីបម្រើការកំសាន្តសប្បាយ អ្នកស្រលាញ់ភេទដូចគ្នាវ័និងក្រុមបំលែងភេទមកទទួលសេវាឱ្យបានទាន់ពេល ដើម្បីរក្សាសុខភាពបានល្អប្រសើរឈានទៅរកការបញ្ចប់ជំងឺអេដស៍នៅឆ្នាំ២០២៣០ខាងមុខនេះ។

ចំណែកលោក ឡេង វឌ្ឍនា គ្រូពេទ្យព្យាបាលបានលើកឡើងថា ការចម្លងជំងឺកាមរោគមានការកើនឡើងដែលភាគច្រើនពួកគាត់មិនបានដឹងខ្លួនឡើយ ដោយអ្នកខ្លះពេលមកព្យាបាលគាត់គិតថាបានជាសះស្បើយហើយ តែគាត់នៅជាមួយដៃគូមិនបានការពារខ្លួនក៏មានការចម្លងថ្មីផងដែរ។ លោកក៏បានអំពាវនាវដល់អ្នកជំងឺកាមរោគដែលបានជាសះស្បើយសូមមកពិនិត្យជំងឺតាមការកំណត់របស់គ្រូពេទ្យនិងត្រូវចេះការពារខ្លួននៅពេលនៅជាមួយដៃគូពិសេសអ្នកមានដៃគូច្រើនដើម្បីធានាថាបងប្អូនមិនមានការឆ្លងថ្មី៕

អត្ថបទ៖ សំអឿន

The post អង្គការ AHF លើកទឹកចិត្តក្រុមយុវជនប្រឈមមកទទួលសេវាពិនិត្យព្យាបាលជំងឺកាមរោគខណៈជំងឺនេះមានការកើនឡើងខ្ពស់ appeared first on Kampuchea Thmey Daily.

សេចក្តីសម្រេចនេះ ត្រូវបានអនុម័តនៅក្នុងកិច្ចប្រជុំពេញអង្គលើកទី២២ នៃក្រុមប្រឹក្សាសេដ្ឋកិច្ច និងសង្គម (ECOSOC) របស់អង្គការសហប្រជាជាតិ នៅថ្ងៃ ទី១០ ខែមិថុនា ឆ្នាំ២០២៥ នាទីក្រុងញូវយ៉ក សហរដ្ឋអាមេរិក។ សេចក្តីប្រកាសព័ត៌មានក្រសួងការបរទេស និងសហប្រតិបត្តិការអន្តរជាតិ​ បានគូសបញ្ជាក់ថា៖«នេះជាសមិទ្ធផលដ៏សំខាន់មួយទៀត បញ្ជាក់អំពីការប្តេជ្ញាចិត្តដ៏ខ្ជាប់ខ្ជួនរបស់កម្ពុជា ក្នុងកិច្ចខិតខំប្រឹងប្រែងសកលចំពោះការប្រយុទ្ធប្រឆាំងនឹងជំងឺអេដស៍ និងការលើកកម្ពស់គំនិតផ្ដួចផ្ដើមសុខភាពសាធារណៈ។

ក្រសួងការបរទេស តាងនាមរាជរដ្ឋាភិបាលកម្ពុជា ថ្លែងអំណរគុណយ៉ាងជ្រាលជ្រៅ ចំពោះរដ្ឋសមាជិកទាំងអស់ដែលបានគាំទ្រ និងមានទំនុកចិត្តមកលើកម្ពុជា។ កម្ពុជានឹងបន្តចូលរួមយ៉ាងសកម្មក្នុងក្រុមប្រឹក្សាសម្របសម្រួលកម្មវិធី របស់អង្គការយូអិនអេដស៍ ដើម្បីពង្រឹងគំនិតផ្ដួចផ្ដើមសុខភាពសាធារណៈដែលប្រកបដោយសុវត្ថិភាព បរិយាបន្ន និងភាពធន់ ក្នុងសាមគ្គីភាព និងទំនួលខុសត្រូវរួម។

ក្រុមប្រឹក្សាសម្របសម្រួលកម្មវិធីរបស់អង្គការយូអិនអេដស៍ ដែលដឹកនាំអង្គការ UNAIDS តាំងពីខែមករា ឆ្នាំ១៩៩៦ មានអ្នកតំណាងមកពីរដ្ឋាភិបាលចំនួន២២ប្រទេសនៃតំបន់ទាំងអស់ក្នុងពិភពលោក និងអ្នកតំណាងអង្គការមិនមែនរដ្ឋាភិបាលចំនួន៥។ ក្នុងនោះ ១- តំបន់អឺរ៉ុបខាងកើត និងក្រុមផ្សេងៗ ៧អាសនៈ ២- តំបន់អាហ្វ្រិក ៥អាសនៈ ៣- តំបន់អាស៊ីនិងប៉ាស៊ីហ្វិក ៥អាសនៈ ៤- តំបន់អាម៉េរិកឡាទីន និងការ៉ាអ៊ុប ៣អាសនៈ និង៥- តំបន់អឺរ៉ុបខាងកើត-រដ្ឋឯករាជ្យ ២អាសនៈ។ អាណត្តិរបស់សមាជិកទាំង ២២នេះ មានរយៈពេល៣ឆ្នាំ។

សម្រាប់កម្ពុជាបានទទួលអាសនៈសមាជិក UNAIDS តាមរយៈការបោះឆ្នោតរបស់ក្រុមប្រឹក្សាសេដ្ឋកិច្ច និងសង្គមនៃអង្គការសហប្រជាជាតិ នៅទីក្រុងញូវយ៉ក កាលពីថ្ងៃទី៥ ខែមេសា ឆ្នាំ២០២៣ តំណាងតំបន់អាស៊ី និងប៉ាស៊ីហ្វិកសម្រាប់អាណត្តិ ២០២៣-២០២៥។

ក្រោមការដឹកនាំដ៏ឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្តី កម្ពុជាបានដាក់បេក្ខភាពបន្តសមាជិកភាពសម្រាប់អាណត្តិឆ្នាំ២០២៦-២០២៨។ ជាលទ្ធផល នៅថ្ងៃ ទី១០ ខែមិថុនា ឆ្នាំ២០២៥ ក្រុមប្រឹក្សាសេដ្ឋកិច្ចនិងសង្គមបានបោះឆ្នោតជាឯកច្ឆន្ទ ជ្រើសរើសកម្ពុជាឱ្យបន្តអាណត្តិរយៈពេលបីឆ្នាំ(ឆ្នាំ២០២៦-២០២៨) ក្នុងក្រុមប្រឹក្សាសម្របសម្រួលកម្មវិធីរបស់អង្គការ យូអិនអេដស៍ ដោយចាប់ផ្តើមពីថ្ងៃទី១ ខែមករា ឆ្នាំ២០២៦។

អាជ្ញាធរជាតិប្រយុទ្ធនឹងជំងឺអេដស៍ បញ្ជាក់ថា៖«នេះជាជោគជ័យដ៏ធំមួយទៀតផ្នែកការទូត ដែលកម្ពុជាទទួលបានតាមរយៈការបោះឆ្នោតឯកច្ឆន្ទផ្តល់ការទុកចិត្តដល់កម្ពុជាឱ្យបន្តអង្គុយលើអាសនៈជាសមាជិកក្រុមប្រឹក្សាសម្របសម្រួលនៃកម្មវិធីរបស់អង្គការយូអិនអេដស៍មួយអាណត្តិថ្មីទៀត ពិភពលោកបានសម្លឹងឃើញថា កម្ពុជាមានសមត្ថភាពគ្រប់គ្រងការរីករាលដាលនៃមេរោគអេដស៍បានប្រកបដោយប្រសិទ្ធភាពខ្ពស់»។

បើតាមរបាយការណ៍របស់អាជ្ញាធរជាតិប្រយុទ្ធនឹងជំងឺអេដស៍ នៅឆ្នាំ២០២៤កន្លងទៅនេះ គេប៉ាន់ស្មានអ្នកសង្ស័យថាផ្ទុកមេរោគអេដស៍ទាំងអស់នៅកម្ពុជា មានចំនួន ៧៦ ០០០នាក់។ ការឆ្លងថ្មីមានចំនួន ១២០០នាក់ ឯអ្នកស្លាប់ដោយសារអេដស៍មានចំនួន ១០០០នាក់។ ជារួម អត្រាប្រេវ៉ាឡង់នៃមេរោគអេដស៍នៅកម្ពុជាក្នុងចំណោមប្រជាជនទូទៅមានត្រឹម ០,៥% តែប៉ុណ្ណោះ។ បើគិតតាមគោលដៅពិភពលោក៩៥-៩៥-៩៥ កម្ពុជាសម្រេចបាន៩២-១០០-៩៨។ ក៏ប៉ុន្តែ ទោះជាយ៉ាងណាក៏ដោយ កម្ពុជាត្រូវតែបន្តការខិតខំតទៅទៀត ដើម្បីទប់ស្កាត់ការឆ្លងថ្មីឱ្យនៅក្នុងរង្វង់ ២០០ករណីក្នុងមួយឆ្នាំ៕

The post ជោគជ័យផ្នែកការទូត! កម្ពុជា ជាប់ឆ្នោតជាថ្មីជាសមាជិកសម្របសម្រួល UNAIDS សម្រាប់អាណត្តិ ២០២៦-២០២៨ appeared first on Kampuchea Thmey Daily.

លោក​វេជ្ជបណ្ឌិត​ បា​នប​ន្ត​ទៀតថា ​តាម​ការ​ប៉ាន់ស្មាន​ឆ្នាំ ២០២៤ កម្ពុ​ជា មាន​ចំនួន​អ្នករស់នៅ​ជាមួយ​មេរោគ​អេដស៍​ប្រមាណ ៧៦ ០០០ នាក់ ក្នុងនោះ ​មាន​អ្នកជំងឺ​អេដស៍​សកម្ម​ដែល​កំពុង​ទទួល​សេវា​ព្យាបាល​ដោយ​ឱសថ​ប្រឆាំង​មេរោគ​អេដស៍​ទាំង ៧៤ កន្លែង ចំនួន ៦៩ ៩៩៤ នាក់ ហើយ​ប្រហែល​នៅសល់​អ្នករស់នៅ​ជាមួយ​មេរោគ​អេដស៍ ៦ ០០០ នាក់ ទៅ ៧ ០០០ នាក់​ នៅ​មិនទាន់​បាន​ដឹង​ខ្លួន និង​មិនទាន់បាន​ធ្វើតេស្ត និង​ទទួល​សេវា​ព្យាបាល​នៅឡើយ​ទេ ខណៈ​ក្នុង ១ ឆ្នាំៗ ​មាន​អ្នក​ឆ្លង​ថ្មី​ នៃ​មេរោគ​អេដស៍​ប្រមាណ ១ ២០០ នាក់​ និង​ស្លាប់​ប្រមាណ ១ ១០០ នាក់។

លោក​វេជ្ជបណ្ឌិត បាន​អំពាវនាវ​ដល់​អ្នក​រស់នៅ​ជាមួយ​មេរោគ​អេដស៍​ដែល​មិនទាន់បាន​ដឹងខ្លួន​ និង​ធ្វើតេស្ត​រក​មេរោគ​អេដស៍​ទាំងនោះ​ប្រញាប់​មក​ធ្វើតេស្ត​ ដើម្បី​ទទួលបាន​ការព្យាបាល​ជំងឺ​នៅតាម​កន្លែង​ព្យាបាល​ដោយ​ឱសថ​ប្រឆាំង​មេរោគ​អេដស៍​ទាំង ៧៤ កន្លែង​ ឱ្យបាន​ទាន់ពេលវេលា​ សំដៅ​ចូលរួម​កាត់បន្ថយ​អត្រា​ឆ្លង​ថ្មី ​នៃ​ជំងឺ​អេដស៍ ​ឱ្យ​កាន់តែ​ថយ​ចុះ​បន្ថែម​ទៀត។

ប្រទេស​កម្ពុជា​ ត្រូវបាន​អង្គការសហប្រជាជាតិ​ទទួលស្គាល់ថា​ជា​ប្រទេសមួយ​ក្នុងចំណោម​ប្រទេស​មួយ​ចំនួន​ទទួលបាន​ជោគជ័យ​ក្នុងការ​ប្រយុទ្ធ​នឹង​ជំងឺអេដស៍​គួរឱ្យកត់សម្គាល់។

ក្នុងជំនួប​ពិភាក្សា​ការងារ​ជាមួយ លោក អៀង មូលី ទេសរដ្ឋមន្ត្រី​ទទួល​បេសកកម្ម​ពិសេស និង​ជា​ប្រធាន​អាជ្ញាធរ​ជាតិ​ប្រយុទ្ធ​នឹង​ជំងឺអេដស៍​ និង​លោក​សាស្ត្រាចារ្យ ឈាង រ៉ា រដ្ឋមន្ត្រី​ក្រសួង​សុខាភិបាល​ នាពេល​ថ្មីៗ​ នេះ លោកស្រី Winnie BYANYIMA (​វីន​នី ប៊ីយ៉ា​នី​ម៉ា​) នាយក​ប្រតិបត្តិ​អង្គការសហប្រជាជាតិ​ប្រយុទ្ធ​នឹង​ជំងឺអេដស៍​ដែល​ហៅ​កាត់​ថា (​យូ អិន អេដស៍​) បាន​កោតសរសើរ​ប្រទេស​កម្ពុជា​ដែល​បាន​ខិតខំ​ប្រឹងប្រែង​ក្នុងការ​ប្រយុទ្ធ​នឹង​ជំងឺ​អេដស៍​ទទួលបាន​ជោគជ័យ។

ក្នុងជំនួប​នេះដែរ លោកស្រី វីន​នី ប៊ីយ៉ា​នី​ម៉ា ​ក៏បាន​កោតសរសើរ ក្រសួងសុខាភិបាល ដែល​បាន​ខិតខំ​ប្រឹងប្រែង​ក្នុងការ​ឆ្លើយតប​នឹង​មេរោគ​អេដស៍​នៅ​កម្ពុជា ដែល​សម្រេចបាន​លទ្ធផល ៩៥-៩៥-៩៥ ជា​ភាគរយ​ខ្ពស់ ប្រៀបធៀប​នឹង​គោលដៅ​ដាក់ចេញ ដែល​កម្ពុជា​ធ្លាប់ជា​ប្រទេស​មាន​អត្រា​ប្រេ​វ៉ាឡង់ អ្នក​ផ្ទុកមេរោគ​អេដស៍​ខ្ពស់ ក្នុង​តំបន់​អាស៊ី​ប៉ាស៊ីហ្វិក គឺ​ ៣% ក្នុង​ឆ្នាំ​ ១៩៩៦ ហើយ​ធ្លាក់​ចុះមក​នៅត្រឹមតែ​ ០.៥% ក្នុង​ឆ្នាំ​ ២០២៤។

លោក​សាស្ត្រាចារ្យ​ ឈាង រ៉ា បាន​ថ្លែងអំណរគុណ​ចំពោះ​ការបន្ត​គាំទ្រ​របស់​អង្គការ UNAIDS ក្នុង​បេសកកម្ម​បញ្ចប់​ការ​រីក​រាលដាល ​នៃ​ជំងឺអេដស៍​នៅ​កម្ពុជា។

លោក​រដ្ឋមន្ត្រី មានប្រសាសន៍ថា ​រដ្ឋាភិបាល​កម្ពុជា ដែលមាន​ក្រសួងសុខាភិបាល ជា​សេនាធិការ បាន​សហការ​ជាមួយ​ដៃគូ​អភិវឌ្ឍន៍ អង្គការ​ក្រៅ​រាជរដ្ឋាភិបាល សហគមន៍ និង​សង្គម​ស៊ីវិល ក្នុង​​ការងារ​ប្រយុទ្ធ​ប្រឆាំងនឹង​ជំងឺអេដស៍​នៅ​កម្ពុជា ដើម្បី​ឆ្លើយតប​ឱ្យ​បាន​នូវ​គោលនយោបាយ​ជាតិ​ការ​បញ្ចប់​ជំងឺ​អេដស៍ ឆ្នាំ​ ២០២៣-២០២៨៕

អត្ថបទ ៖ សំអឿន

The post មន្ត្រីជាន់ខ្ពស់អេដស៍ ៖ នៅសល់អ្នកផ្ទុកមេរោគអេដស៍ប្រមាណ ៧ ០០០ នាក់ទៀត មិនទាន់ដឹងខ្លួន និងធ្វើតេស្ត នៅឡើយទេ appeared first on Kampuchea Thmey Daily.

លោកបណ្ឌិត ឈឹម ឃិនដារ៉េត អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍ អះអាង ក្នុងនាមអ្នកបច្ចេកទេសមួយរូបថា មកដល់ពេលនេះស្ថានភាពការឆ្លងមេរោគអេដស៍ថ្មីមិនមានការផ្ទុះឡើងវិញទេក្នុងប្រទេសកម្ពុជា។  ផ្ទុយទៅវិញការឆ្លងថ្មីនៃមេរោគអេដស៍បានធ្លាក់ចុះជាបន្តបន្ទាប់។

ការធ្លាក់ចុះគួរឱ្យកត់សម្គាល់នៃការឆ្លងមេរោគអេដស៍ថ្មីនេះ គឺបន្ទាប់ពីរាជរដ្ឋាភិបាលកម្ពុជា បានដាក់ចេញនូវផែនការយុទ្ធសាស្រ្តទូលំទូលាយ និងពហុវិស័យឆ្លើយតបនឹងមេរោគអេដស៍។ លោក ឈឹម ឃិនដារ៉េត មានប្រសាសន៍ថា៖«យើងមើលនិន្នាការនៃការធ្លាក់ចុះ គិតចាប់ពីឆ្នាំ ១៩៩៧ ចំនួនអ្នកឆ្លងថ្មីនៃមេរោគអេដស៍ចន្លោះពី ១ ៥០០០ ទៅ ២ ៧០០០ នាក់ និងអត្រាប្រេវ៉ាឡង់លើងដល់ ៣ ភាគរយ ដែលជាអត្រាខ្ពស់បំផុត»។

ប៉ុន្តែគិតត្រឹមក្នុងឆ្នាំ ២០២៣ អត្រាឆ្លងថ្មីនៃមេរោគអេដស៍ មានចំនួន ១ ២០០ នាក់ ដែលចំនួននេះមានការថយចុះជាង ២០០ នាក់ បើប្រៀបធៀបទៅនឹងឆ្នាំ ២០២២ ដែលមានអត្រាឆ្លងថ្មី ១ ៤០០ នាក់។

ទន្ទឹមនឹងលទ្ធផលភាពជោគជ័យខាងលើ បច្ចុប្បន្ន អាជ្ញាធរជាតិប្រយុទ្ធនឹងជំងឺអេដស៍ បានសម្តែងការព្រួយបារម្ភចំពោះប្រជាជនគន្លឹះដែលងាយប្រឈមនឹងការឆ្លងមេរោគអេដស៍។ ប្រជាជនគន្លឹះសំដៅដល់ក្រុមអ្នកប្រើប្រាស់គ្រឿងញៀន ក្រុមស្ត្រីបម្រើក្នុងសេវាកម្សាន្ត ក្រុមបំប្លែងភេទ  និង ក្រុមបុរសរួមភេទជាមួយបុរស ជាដើម។

ផ្អែកតាមទិន្នន័យរបស់មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគនៃក្រសួងសុខាភិបាល ករណីឆ្លងថ្មីនៃមេរោគអេដស៍មានការធ្លាក់ចុះពី ១ ៤០០ នៅ ឆ្នាំ ២០២២ មក ១ ២០០ នៅឆ្នាំ២០២៣។ គិតត្រឹមត្រីមាសទី៣ ឆ្នាំ២០២៤នេះ អ្នកផ្ទុកមេរោគអេដស៍ចំនួន ៦៩.៤១៣ នាក់បានមកទទួលសេវាថែទាំ និងព្យាបាលដោយឱសថប្រឆាំងមេរោគអេដស៍ដោយឥតគិតប្រាក់នៅមូលដ្ឋានសុខាភិបាលរបស់រដ្ឋ។

ចំណែកអ្នកផ្ទុកមេរោគអេដស៍ប្រមាណជិត ៧.០០០នាក់ទៀត នៅមិនទាន់បានដឹងពីស្ថានភាពផ្ទុកមេរោគអេដស៍របស់ពួកគាត់ ដែលអាជ្ញាធរជាតិប្រយុទ្ធនឹងជំងឺអេដស៍ កំពុងធ្វើសកម្មភាពដើម្បីអប់រំ និងជូនដំណឹងឱ្យគាត់បានដឹង និងមកទទួលសេវាធ្វើតេស្តរកមេរោគអេដស៍ និងទទួលការព្យាបាលថែទាំឱ្យបានឆាប់។

ក្នុងនាមស្ថាប័នជំនាញ លោកបណ្ឌិត ឈឹម ឃិនដារ៉េត អំពាវនាវដល់បងប្អូន ជាពិសេសប្អូនៗយុវវ័យចូរការពារខ្លួន ការពារគ្រួសារ ការពារមិត្តភក្តិ កុំឱ្យឆ្លងមេរោគអេដស៍ តាមរយៈការសិក្សាស្វែងយល់ពីការអប់រំចំណេះដឹងទាក់ទងនឹងមេរោគអេដស៍ និងជំងឺអេដស៍។

ក្នុងករណីសង្ស័យថា បានប្រព្រឹត្តិនឹងការឆ្លងមេរោគអេដស៍ សូមក្លាហានប្រញាប់ ធ្វើតេស្តរកមេរោគអេដស៍ដើម្បីឆាប់ទទួលបានការថែទាំព្យាបាល រក្សាសុខភាពបានល្អ។ ការធ្វើតេស្តរកមេរោគអេដស៍ និងព្យាបាលដោយឱសថប្រឆាំងមេរោកអេដស៍នៅមូលដ្ឋានសុខាភិបាលមិនត្រូវឱ្យបង់ប្រាក់ឡើយ។

ក្នុងឱកាសទិវាពិភពលោកប្រយុទ្ធនឹងជំងឺអេដស៍ ១ ធ្នូ ឆ្នាំ២០២៤ ក្រោមប្រធានបទ “សិទ្ធិ ជាមាគ៌ា ឆ្ពោះទៅបញ្ចប់អេដស៍” នាយករដ្ឋមន្រ្តីកម្ពុជា សម្តេចធិបតី ហ៊ុន ម៉ាណែត អំពាវនាវដល់គ្រប់ក្រសួង ស្ថាប័ន ត្រូវធ្វើការរួមគ្នាជាពហុវិស័យ ដើម្បីលុបបំបាត់ការចម្លងមេរោគអេដស៍ និងជំងឺអេដស៍។

ទិវានេះត្រូវបានប្រារព្ធឡើង ដើម្បីឆ្លុះបញ្ចាំងនូវការប្តេជ្ញាចិត្តជារួមរបស់ពិភពលោក ក៏ដូចជារាជរដ្ឋាភិបាល និង ប្រជាជនកម្ពុជា ក្នុងការចូលរួមចែករំលែកនូវចំណេះដឹង ជំនាញ និងបទពិសោធក្នុងការប្រយុទ្ធទប់ស្កាត់ការរាលដាល នៃមេរោគអេដស៍ ឱ្យកាន់តែមានប្រសិទ្ធភាពខ្ពស់ និងបង្ហាញពីការគាំទ្រដល់អ្នកផ្ទុកមេរោគអេដស៍ និងអ្នករងផលប៉ះពាល់ដោយ​សារមេរោគអេដស៍ និងជំងឺអេដស៍ឱ្យទទួលបានសេវាថែទាំ ព្យាបាល និងសេវាគាំពារសង្គម ឆ្ពោះទៅបញ្ចប់អេដស៍ឱ្យបានឆាប់បំផុត៕

The post អាជ្ញាធរជាតិប្រយុទ្ធនឹងជំងឺអេដស៍៖ មកដល់ពេលនេះស្ថានភាពការឆ្លងមេរោគអេដស៍ថ្មីមិនមានការផ្ទុះឡើងវិញទេ appeared first on Kampuchea Thmey Daily.

កម្ពុជាជាប្រទេសដែលមានការប្តេជ្ញាចិត្តខ្ពស់ក្នុងការលុបបំបាត់ការឆ្លងមេរោគអេដស៍ ហើយក៏ជាប្រទេសមួយដែលឈានមុខគេក្នុងតំបន់ នៃការខិតជិតទៅសម្រេចបាននូវគោលដៅ ៩៥ ៩៥ ៩៥ ដែលគោលដៅ ៩៥ ទី២ និងទី៣ បានសម្រេចលើសការរំពឹងទុក និងសម្រេចបាន ៨៩% នៃគោលដៅ៩៥ ទី១។

ការលុបបំបាត់ការឆ្លងមេរោគអេដស៍បាន គឺទាមទារឱ្យមានការចូលរួមយ៉ាងសកម្ម មិនត្រឹមតែពីវិស័យសុខាភិបាល ប៉ុន្តែពីសំណាក់បណ្តាក្រសួងស្ថាប័នពាក់ព័ន្ធទាំងអស់ក្រោមការសម្របសម្រួលពីសំណាក់អាជ្ញាធរជាតិ ដើម្បីឱ្យការឆ្លើយតបជាពហុវិស័យអាចប្រព្រឹត្តទៅបានស្របតាមគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨។

គួរបញ្ជាក់ថា ជំនួបពិភាក្សានេះ ធ្វើឡើងនៅរាជធានីភ្នំពេញ នាថ្ងៃទី២៤ ខែកក្កដា ឆ្នាំ២០២៤ ដោយទទួលបានការអនុញ្ញាតពី សាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងមានការអញ្ជើញចូលរួមពី អនុរដ្ឋលេខាធិការ អគ្គនាយករង បច្ចេកទេសសុខាភិបាល និងតំណាងមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ៕

The post ក្រសួងសុខាភិបាល សិក្សាលើការបង្ការមេរោគអេដស៍ពហុវិស័យ នៅកម្ពុជា appeared first on Kampuchea Thmey Daily.