លោកស្រី ដោ សម្ផស្ស នាយិការងរដ្ឋបាល និង ជាអ្នកនាំពាក្យរដ្ឋបាលសាលារាជធានីភ្នំពេញ បានឱ្យដឹងនាព្រឹកថ្ងៃទី១មិថុនា២០២៦នេះថា៖ ក្រោមការដឹកនាំ និងបញ្ជាផ្ទាល់របស់លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ កាលពីថ្ងៃទី៣១ ខែឧសភា ឆ្នាំ២០២៦នេះ រដ្ឋបាលខណ្ឌទាំង១៤ បានធ្វើចុះត្រួតពិនិត្យតាមទីតាំងអគារខុនដូរ អាផាតមិន បុរី ផ្ទះសំណាក់ និង សណ្ឋាគារមួយចំនួន ក្នុងគោលដៅប្រតិបត្តិការ បោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) និងផ្សព្វផ្សាយអនុក្រឹត្យលេខ ០៣ អនក្រ.បក ចុះថ្ងៃទី៥ ខែមករា ឆ្នាំ២០២៦ របស់រាជរដ្ឋាភិបាលកម្ពុជា ស្ដីពីការគ្រប់គ្រងសន្ដិសុខសុវត្ថិភាពតាមទីតាំងរស់នៅប្រមូលផ្ដុំ ក្នុងភូមិសាស្ដ្ររាជធានីភ្នំពេញ។

លោកស្រី ដោ សម្ផស្ស នាយិការងរដ្ឋបាល និង ជាអ្នកនាំពាក្យរដ្ឋបាលសាលារាជធានីភ្នំពេញ

លោកស្រីបានបន្តថា៖ ក្នុងប្រតិបត្តិការរយៈពេល ១ថ្ងៃនោះគណៈបញ្ជាការឯកភាពរដ្ឋបាលខណ្ឌទាំង១៤ បានធ្វើការត្រួតពិនិត្យទីតាំងសរុបបានចំនួន៨០ទីតាំង រកឃើញជនបរទេសស្នាក់នៅសរុបចំនួន ១៣៥៤នាក់ (ស្រី ៣៨៣នាក់) ក្នុងនោះជនបរទេសចំនួន ១៦នាក់ ស្នាក់នៅដោយគ្មានលិខិតឆ្លងដែនត្រឹមត្រូវ។ ជារួមក្រុមការងារពុំបានឃើញបទល្មើសការឆបោកតាមប្រព័ន្ធបច្ចេកវិទ្យា (ONLINE SCAMS) ឡើយ។

លោកស្រីអ្នកនាំពាក្យបន្តទៀតថា៖ ដោយឡែកចំពោះ ខណ្ឌ៧មករា ក្រុមការងារបានរកឃើញទីតាំងសង្ស័យជាប់ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ចំនួន ១ករណី នៅបន្ទប់លេខ២៦០៥ ជាន់ទី២៦ នៃអគារ Skyline B ស្ថិតនៅអគារលេខ៦ ផ្លូវលេខ១៣៤ ភូមិ៣ សង្កាត់វាលវង់ រួមមាន៖ កុំព្យូទ័រ (Laptop) ៤គ្រឿង ម៉ូនីទ័រ ១គ្រឿង និងទូរស័ព្ទដៃ ១៥គ្រឿង ប៉ុន្តែមិនមានមនុស្សស្នាក់នៅទេ។ រីឯនៅខណ្ឌឫស្សីកែវវិញ បន្ទាប់ពីក្រុមការងារត្រួតពិនិត្យទីតាំងចំនួន ៤កន្លែង នៅក្នុងបុរី ផេនសៀ ស្ថិតនៅសង្កាត់ស្វាយប៉ាក រួមមកក្រុមការងារបានរកឃើញមានសម្ភារគួរឱ្យសង្ស័យមួយចំនួនធំ នៅក្នុងផ្ទះលេខ៨I ផ្លូវលេខP១ និងផ្ទះលេខ៨D ផ្លូវលេខP០៣ រួមមាន៖ ទូរស័ព្ទដៃចំនួន ៣១៧គ្រឿង កុំព្យូទ័រ (all in one) ចំនួន ៤០គ្រឿង ម៉ូនីទ័រចំនួន ៦គ្រឿង និងធុង CPUចំនួន ៣គ្រឿង ដោយមិនមានមនុស្សស្នាក់នៅ ឬប្រព្រឹត្តបទល្មើសនៅទីតាំងនោះទេ។

ចំណែកគណៈបញ្ជាការឯកភាពខណ្ឌសែនសុខ បានរកឃើញជនបរទេសចំនួន ០៩នាក់ស្នាក់នៅខុសច្បាប់(គ្មានលិខិតឆ្លងដែន ០៦នាក់ និងផុតទិដ្ឋាការ ០៣នាក់) ។ ករណីមិនសហការជាមួយសមត្ថកិច្ចត្រួតពិនិត្យរដ្ឋបាល និងគ្មានមុខរបរច្បាស់លាស់។ ជនបរទេសចំនួន ០៩នាក់ខាងលើ សម្រេចប្រគល់ជូនស្នងការដ្ឋាននគរបាលរាជធានីភ្នំពេញ ដើម្បីអនុវត្តនីតិវិធីបន្ដ។

លោកស្រីដោ សម្ផស្ស បានបញ្ជាក់បន្ថែមទៀតថា៖ ក្រោយការពិនិត្យរួចវត្ថុតាង រួមទាំងជនបរទេសដែលស្នាក់នៅដោយគ្មានលិខិតស្នាមត្រឹមត្រូវ ត្រូវបានប្រគល់ជូនស្នងការដ្ឋាននគរបាលរាជធានីភ្នំពេញបន្តនីតិវិធី។ ក្នុងថ្ងៃជាមួយគ្នានេះដែរស្នងការដ្ឋាននគរបាលរាជធានីភ្នំពេញ បានអនុវត្តការផាកពិន័យចំពោះម្ចាស់ ឬ អ្នកគ្រប់គ្រងទីតាំងរស់នៅប្រមូលផ្ដុំតាមអនុក្រឹត្យលេខ០៣ អនក្រ.បក សរុបចំនួន ៤ទីតាំង មានមនុស្សចំនួន ៥នាក់ គិតជាថវិកាសរុបបានចំនួន ២០.០០០.០០០រៀល (ម្ភៃលានរៀលគត់)៕ អត្ថបទ៖ ស្រីរ័ត្ន

The post ខណ្ឌទាំង១៤ ចុះពិនិត្យទីតាំងសង្ស័យប្រព្រឹត្តបទល្មើស ONLINE SCAMS ចំនួន៨០ទីតាំង រកឃើញជនបរទេសស្នាក់នៅជាង១៣០០នាក់ appeared first on Kampuchea Thmey Daily.

គណៈបញ្ជាការឯកភាពរដ្ឋបាលខណ្ឌឫស្សីកែវ ដឹកនាំដោយលោក ជិន ប៊ុនធឿន អភិបាលខណ្ឌ កាលពីថ្ងៃទី២៩ ខែឧសភា ឆ្នាំ២០២៦ ខណៈត្រួតពិនិត្យជនបរទេសនៅបុរីវិមានភ្នំពេញ សង្កាត់ច្រាំងចំរេះទី២ ខណ្ឌឫស្សីកែវ ចំនួន២ផ្ទះ បានរកឃើញជនបរទេសស្នាក់នៅសរុបចំនួន១៥នាក់ ស្រី៣នាក់។ ក្នុង១៥នាក់នេះ មានជនបរទេសចំនួន៣នាក់ មិនមានឯកសារត្រឹមត្រូវ។ ក្រោយការត្រួតពិនិត្យជនបទបរទេសដែលខុសច្បាប់ត្រូវបានប្រគល់ជូនស្នងការដ្ឋាននគរបាលរាជធានីភ្នំពេញ ដេីម្បីបន្តនីតិវិធី។

ក្នុងករណីនេះ ក្រុមការងារមិនបានរកឃើញបទល្មើសទាក់ទងនឹង Scam online ទេ។ នេះបើតាមលោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាលសាលារាជធានីភ្នំពេញ បានឱ្យដឹងនារសៀលថ្ងៃទី៣០ ឧស
ភា ២០២៦នេះ។

លោកស្រី បានបន្តថា ក្រោមការដឹកនាំបញ្ជាផ្ទាល់របស់លោក ឃួង ស្រេង អភិបាលរាជធានីភ្នំពេញ នាព្រឹកថ្ងៃទី២៩ ខែឧសភា ឆ្នាំ២០២៦ គណ:បញ្ជាការឯកភាពរដ្ឋបាលខណ្ឌចំនួន៣ មានខណ្ឌប្ញស្សីកែវ ខណ្ឌពោធិ៍សែនជ័យ និងខណ្ឌ ច្បារអំពៅបាន ចុះត្រួតពិនិត្យ និងបង្រ្កាបទីតាំងបទល្មេីសឆបោកតាមប្រព័ន្ធបច្ចេកវិទ្យា (Online Scam) ព្រមៗគ្នាតែម្ដង។

បើតាមលោកស្រី ក្នុងនោះគណ:បញ្ជាការឯកភាពរដ្ឋបាលខណ្ឌពោធិ៍សែនជ័យ ដឹកនាំដោយលោក សក់ ចន្ទកញ្ញារិទ្ធិ បានចុះត្រួតពិនិត្យនិងបង្រ្កាបទីតាំងមួយកន្លែង ស្ថិតនៅភូមិក្បាលដំរី១ សង្កាត់កាកាបទី១ ដោយរកឃើញមនុស្សសរុបចំនួន២នាក់ សង្ស័យជាទីតាំងជួសជុលសម្ភារ:កុំព្យូទ័រ បំរើការឱ្យបទល្មេីសតាមប្រព័ន្ធបច្ចេកវិទ្យា (Online Scam)។ ក្រោយការត្រួតពិនិត្យជនសង្ស័យ និងវត្ថុតាង ត្រូវបញ្ជូនទៅស្នងការដ្ឋាននគរបាលរាជធានី ដើម្បីបន្តនីតិវិធី។

លោកស្រីអ្នកនាំពាក្យ បន្តទៀតថា នាព្រឹកថ្ងៃទី២៩ ខែឧសភា ឆ្នាំ ២០២៦ដដែលនោះ គណៈបញ្ជាការឯកភាពរដ្ឋបាលខណ្ឌច្បារអំពៅ ដឹកនាំដោយលោក ម៉ូវ ម៉ានិត ជាអភិបាលខណ្ឌ និងមានការសម្របសម្រួលនីតិវិធីពីព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ចុះត្រួតពិនិត្យរដ្ឋបាល ដោយរកឃើញជនបរទេសស្នាក់នៅសង្ស័យប្រព្រឹត្តបទល្មើស Online Scam ចំនួន២ខ្នងផ្ទះ នៅបុរីសុង ឃុន ស្ថិតក្នុងភូមិស្វាយតាអុក សង្កាត់វាលស្បូវ។ ក្នុងនោះរកឃើញជនជាតិចិនភេទប្រុសសរុប១១នាក់ រួមនិងវត្ថុតាងមួយចំនួន។ នាពេលនេះទាំងមនុស្ស និងសម្ភារៈ បានប្រគល់ជូនស្នងការដ្ឋាននគរបាលរាជធានី ភ្នំពេញដេីម្បីបន្តនីតិវិធី៕ ស្រីរ័ត

The post ខណ្ឌចំនួន៣ ចុះត្រួតពិនិត្យនិងបង្រ្កាបបទល្មេីសឆបោកតាមប្រព័ន្ធបច្ចេកវិទ្យា ព្រមៗគ្នាឃាត់ខ្លួនមនុស្សជាច្រើននាក់ appeared first on Kampuchea Thmey Daily.

លោក សេង ជី ចៅសង្កាត់ និងជាប្រធានគណៈបញ្ជាការឯកភាពសង្កាត់វាលវង់ នៃរដ្ឋបាលខណ្ឌ៧មករា បានឲ្យដឹងថា ក្នុងយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា (Online Scams) កម្លាំងអាជ្ញាធរ ក្រោមការបទបញ្ជារបស់ឯកឧត្តម ឃួង ស្រេង អភិបាលរាជធានីភ្នំពេញ និងលោក ថេង សុថុល អភិបាលខណ្ឌ៧មករា នៅតែបន្តបង្កើនការយកចិត្តទុកដាក់ខ្ពស់ ក្នុងការអនុវត្តបទបញ្ជាលេខ០១ , លេខ០២ និងអនុក្រឹត្យលេខ០៣ របស់សម្តេចប្រមុខរាជរដ្ឋាភិបាលកម្ពុជា ក្នុងការចុះត្រួតពិនិត្យការស្នាក់នៅប្រមូលផ្តុំពីសំណាក់ជនបរទេសទាំងឡាយ។

លោក សេង ជី ចៅសង្កាត់វាលវង់

លោកចៅសង្កាត់បានបញ្ជាក់បន្ថែមថា ក្នុងនាមអាជ្ញាធរមូលដ្ឋាន សូមឲ្យម្ចាស់ទីតាំងចូលរួមសហការជាមួយអាជ្ញាធរមូលដ្ឋាន និងកៀកជិត រាយការណ៍ពីបទល្មើស និងមានការសង្ស័យ ដល់អាជ្ញាធរ ដើម្បីបង្ក្រាបទប់ស្កាត់ឱ្យបានទាន់ពេលវេលា។

គួរបញ្ជាក់ថា កាលពីពេលថ្មីៗ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបន្តដាក់តឿនដល់កងកម្លាំងសមត្ថកិច្ច និងអាជ្ញាធរពាក់ព័ន្ធត្រូវបន្តយកចិត្តទុកដាក់បន្ថែមលើបញ្ហាសន្តិសុខ សណ្តាប់ធ្នាប់ ពិសេសបង្ក្រាបឲ្យអស់លើឧក្រិដ្ឋកម្មឆបោកប្រព័ន្ធតាមប្រព័ន្ធបច្ចេកវិទ្យា ( Online Scams ) ខណៈក្រសួងមហាផ្ទៃ ក៏បានកំណត់បន្ទាត់ក្រហម នៃការបោសសម្អាតឧក្រិដ្ឋកម្មឆបោកនេះ ត្រឹមដំណាច់ខែមីនា ពោលគឺនៅមុនខែមេសា ឆ្នាំ២០២៦៕ អត្ថបទ ៖សុភា

The post ម្ចាស់ទីតាំងផ្តល់ការស្នាក់នៅ ជាតួអង្គសំខាន់ក្នុងការគ្រប់គ្រងជនបរទេស ដើម្បីប្រឆាំងបទល្មើស Online Scams appeared first on Kampuchea Thmey Daily.

ក្នុងកិច្ចប្រជុំ សាមញ្ញលើកទី២២ របស់ក្រុមប្រឹក្សាខណ្ឌ អាណត្តិទី៤ នាព្រឹកថ្ងៃទី២៧ ខែមីនា ឆ្នាំ២០២៦ លោកជា ខេមា អភិបាលខណ្ឌដូនពេញ បានឲ្យដឹងថា ៖ ដោយអនុវត្តតាមអនុក្រឹត្យលេខ០៣របស់សម្តេចប្រមុខរាជរដ្ឋាភិបាលកម្ពុជា កម្លាំងគណៈបញ្ជាការឯកភាពរដ្ឋបាលខណ្ឌ និងគណៈបញ្ជាការឯកភាពរដ្ឋបាលសង្កាត់ទាំង១១ក្នុងមូលដ្ឋាន នៅតែបន្តបង្កើនការចុះត្រួតពិនិត្យការស្នាក់នៅប្រមូលផ្តុំរបស់ជនបរទេស ដើម្បីបន្តអង្កេតតាមដានការចូលមកជ្រកកោននៅកម្ពុជាដោយខុសច្បាប់ដើម្បីប្រព្រឹត្តិបទល្មើសនានា ពិសេសនោះ គឺ ការឆបោកតាមប្រព័ន្ធបច្ចេកវិទ្យា ( Online Scams ) តែម្តង។

លោកអភិបាលសង្កត់ធ្ងន់ថា ក្នុងមូលដ្ឋានខណ្ឌដូនពេញ មានអាគារ ខុនដូរ អាផាតមិន សណ្ឋាគារ ចំនួន៣១៥ទីតាំង កម្លាំងគណៈបញ្ជាការនៃរដ្ឋបាលខណ្ឌបានបែកចែកកម្លាំងជា៣ក្រុម បន្តចុះត្រួតពិនិត្យ ជាប់ជាប្រចាំ ក្នុងយុទ្ធនាការចុះត្រួតពិនិត្យនោះ មិនមានបទល្មើសអនឡាញស្កែម (oine scams)នោះឡើយ។

លោកអភិបាលខណ្ឌបានបញ្ជាក់ថា ក្នុងមូលដ្ឋានខណ្ឌដូនពេញជាបេះដូងរបស់រាជធានីភ្នំពេញ ដូច្នេះមិនត្រូវមានបទល្មើសគ្រប់ប្រភេទ បញ្ហាក្មេងទំនើង មានការប្រមូលផ្ដុំគ្នាពេលយប់ព្រលប់ បញ្ហាសន្តិសុខ សណ្ដាប់ធ្នាប់នេះជាកត្តាសំខាន់ និងត្រូវធនាបានសន្តិសុខសុវត្ថិភាព សណ្ដាប់ធ្នាប់សាធារណៈល្អប្រសើរ ជូនដល់ ប្រជាពលរដ្ឋ ម្ចាស់អាជីវកម្ម ភ្ញៀវទេសចរណ៍ជាតិ អន្តរជាតិ។

ប្រជាពលរដ្ឋ សម្ដែងការគាំទ្របំផុតចំពោះយុទ្ធនាការបោសសម្អាតឧក្រិដ្ឋកម្មឆបោកតាមប្រព័ន្ធបច្ចេកវិទ្យា  ( Online Scams ) ចេញពីប្រទេសកម្ពុជា ព្រោះកម្ពុជាជាប្រទេសដែលកំពុងមានការអភិវឌ្ឍន៍ក្រោមម្លប់ នៃសន្តិភាព ដូច្នោះហើយប្រជាជន ពុំត្រូវការបទល្មើសឧក្រិដ្ឋទាំងឡាយអាចមានដង្ហើមនៅរស់រាននោះឡើយ។ ប្រទេសកម្ពុជារីកចំរើនទៅបាន ពុំអាស្រ័យទៅលើ បទល្មើសទាំងនោះឡើយ គឺពឹងផ្អែកទៅការវិនិយោគក្រុមហ៊ុន សហគ្រាស វិស័យទេសចរណ៍ វប្បធម៌ ដូនតារបស់ខ្មែរ ជាពិសេស ធនធានមនុស្ស មានចំណេះដឹង.។ល។

គួរបញ្ជាក់ថា ៖ កាលពីថ្ងៃទី២៦ ខែមីនា ឆ្នាំ២០២៦ថ្មីៗនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបន្តដាក់តឿនដល់កងកម្លាំងសមត្ថកិច្ច និងអាជ្ញាធរពាក់ព័ន្ធត្រូវបន្តយកចិត្តទុក ដាក់បន្ថែមលើបញ្ហាសន្តិសុខ សណ្តាប់ធ្នាប់ ពិសេសបង្ក្រាបឲ្យអស់លើឧក្រិដ្ឋកម្មឆបោកប្រព័ន្ធតាមប្រព័ន្ធបច្ចេកវិទ្យា ( Scams Online ) ខណៈក្រសួងមហាផ្ទៃ ក៏បានកំណត់បន្ទាត់ក្រហម នៃការបោសសម្អាតឧក្រិដ្ឋកម្មឆបោកនេះ ត្រឹមដំណាច់ខែមីនា ពោលគឺនៅមុនខែមេសា ឆ្នាំ២០២៦មកដល់៕ អត្ថបទ ៖ សុភា

The post អាជ្ញាធរមូលដ្ឋានខណ្ឌ ក្នុងរាជធានីភ្នំពេញបន្តអំពាវនាវដល់ម្ចាស់ទីតាំងជួលស្នាក់នៅឲ្យជនបរទេស បន្តចូលរួមសហការរាយការណ៍ព័ត៌មានជូនអាជ្ញាធរ appeared first on Kampuchea Thmey Daily.

លោក ឃួង ស្រេង បានណែនាំបែបនេះក្នុងអង្គប្រជុំត្រួតពិនិត្យវឌ្ឍនភាព នៃការរៀបចំអបអរសាទរពិធីបុណ្យចូលឆ្នាំថ្មី ប្រពៃណីជាតិ ឆ្នាំមមី ឆ្នាំ ២០២៦ កាលពីព្រឹកថ្ងៃទី ២៥ មីនានេះ ក្រោមវត្តមាន លោក សំហេង បុរស សមាជិកអចិន្ត្រៃយ៍ សហភាពសហពន្ធ័យុវជនកម្ពុជា តំណាង ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងាសាធារណៈ និងជាប្រធានសហភាពសហពន្ធ័យុវជនកម្ពុជា នៅសាលារាជធានីភ្នំពេញ។

លោក ឃួង ស្រេង លើកឡើងថា ការរៀបចំតុបតែង ព្រឹត្តិការណ៍នគរសង្ក្រាន្ដ ដើម្បីអបអរសាទរពិធីបុណ្យចូលឆ្នាំថ្មី ប្រពៃណីជាតិ ឆ្នាំមមី ឆ្នាំ ២០២៦ នេះ ត្រូវប្រគល់ជូនទៅសហភាពសហពន្ធ័យុវជនកម្ពុជា ជាអ្នករៀបចំ ដោយ ស.ស.យ.ក មានបទពិសោធច្រើនលើការងាររៀបចំនេះ រហូតទទួលបានជោគជ័យជាង ១០ ឆ្នាំ រួចមកហើយ។ ចំណែកគណៈបញ្ជាការឯកភាពរាជធានីភ្នំពេញ ទទួលខុសត្រូវទាំងស្រុងលើការរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈ។

លោក ឃួង ស្រេង បានបន្តថា ព្រឹត្តិការណ៍នគរសង្ក្រាន្ដ ជាព្រឹត្តិការណ៍ធំមួយរបស់ជាតិ ដែលទាមទារឲ្យការរៀបចំ ការតុបតែង និងការរក្សាសន្តិសុខ សុវត្ថិភាព ត្រូវតែម៉ត់ចត់បំផុត ដើម្បីបង្កភាពសប្បាយរីករាយជូនប្រជាពលរដ្ឋ ក្នុងឱកាសអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី ចាប់ផ្តើមពីថ្ងៃទី ១៤ រហូតដល់ថ្ងៃទី ១៩ មេសា។

លោក ឃួង ស្រេង ក៏បានអំពាវនាវដល់កងកម្លាំង និងអាជ្ញាធរទាំងអស់ សូមដាក់ចិត្ត ដាក់កាយធ្វើការងារនេះ ដើម្បីមុខមាត់ប្រទេសជាតិ និងប្រជាជន ដោយគ្រប់គណៈកម្មការទាំងអស់ មានបញ្ហាអ្វីត្រូវរាយការណ៍ទៅលេខាធិការដ្ឋាន សំដៅធ្វើយ៉ាងណាឲ្យ ពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី នេះ ទទួលបានភាពជោគជ័យ និងសប្បាយរីករាយ។

គួរជម្រាបថា ព្រឹត្តិការណ៍នេះ នឹងធ្វើឡើងចាប់ពីថ្ងៃទី ១៤ រហូតដល់ថ្ងៃទី ១៩ មេសា នៅទីតាំងធំៗ ចំនួន ៣ កន្លែង និង តូច ៣ កន្លែងទៀត។ ក្នុងនោះ ទីតាំងធំៗ ៣ កន្លែងនោះ រួមមាន ៖ ទី១- ទីតាំងរមណីយដ្ឋានវប្បធម៌ប្រវត្តិសាស្ត្រ វត្តភ្នំ។ ទី២-ផ្លូវថ្មើរជើងចតុមុខ និងទី៣-នៅសួនវឌ្ឍនៈ រហូតដល់ផ្សាររាត្រី។ ចំណែក ៣ កន្លែងតូចៗ គឺ ទី១-នៅសួនមុខ
វត្តបទមវតី , ទី២-នៅផ្លូវ ៣០៨ និង ទី៣-នៅផ្លូវលេខ ១៥៥ និងជុំវិញផ្សារទួលទំពូង៕
អត្ថបទ ៖ ស្រីរ័ត្ន

The post ព្រឹត្តិការណ៍នគរសង្ក្រាន្ដនៅភ្នំពេញរៀបចំឡើងដោយ ស.ស.យ.ក ចំណែកអាជ្ញាធររាជធានីទទួលខុសត្រូវលើសន្តិសុខ សុវត្ថិភាព appeared first on Kampuchea Thmey Daily.

លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាល រាជធានីភ្នំពេញ បានឲ្យដឹងថា ៖ អនុវត្តតាមបទបញ្ជាលេខ០១, លេខ០២ និងអនុក្រឹត្យលេខ០៣របស់ប្រមុខរាជរដ្ឋាភិបាលកម្ពុជា កម្លាំងគណៈបញ្ជាការឯកភាពរដ្ឋបាលរាជធានីភ្នំពេញ ដែលមានកម្លាំងនគរបាល និងកម្លាំងកងរាជអាវុធហត្ថ និងកម្លាំងគណៈបញ្ជាការឯកភាពរដ្ឋបាលខណ្ឌទាំង១៤ បានបង្កើនការយកចិត្តទុកដាក់ខ្ពស់ក្នុងការចុះរដ្ឋបាលពិនិត្យទីតាំងស្នាក់នៅប្រមូលផ្ដុំទាំងអស់ ក្នុងក្របខណ្ឌរាជធានីភ្នំពេញ ដើម្បីពិនិត្យលើការស្នាក់នៅរបស់ជនបរទេស និងគោលដៅចម្បង គឺដើម្បីទប់ស្កាត់ និងបង្ក្រាបដាច់ខាតលើបទល្មើសឆបោកតាមប្រព័ន្ធបច្ចេកវិទ្យា (Scams Online)។

លោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យរដ្ឋបាល រាជធានីភ្នំពេញ

លោកស្រីអ្នកនាំពាក្យ បញ្ជាក់ថា ៖ កិច្ចការងារនេះ អាជ្ញាធរទូទាំងរាជធានី នឹងបង្កើនកម្តៅក្នុងការបោសសម្អាតឲ្យស្អាតនៅមុនថ្ងៃទី១៥ ខែមីនា ឆ្នាំ២០២៦ខាងមុខនេះ ពោលនៅមុនការដាក់បន្ទាត់ក្រហមរបស់ក្រសួងមហាផ្ទៃ។

ពលរដ្ឋប្រុសស្រីសង្កេតឃើញថា ក្នុងមួយរយៈពេលក្រោយមកនេះ ការបង្ក្រាបបទល្មើស Scams Online នៅទូទាំងប្រទេសនិយាយជារួម និយាយដោយឡែកក្នុងក្របខណ្ឌរាជធានីភ្នំពេញ ហាក់មានការថយចុះកម្រិតខ្ពស់ ឬស្ទើរតែមិនឃើញមាន ក្រោយប្រមុខរាជរដ្ឋាភិបាលកម្ពុជា ក៏ដូចជាក្រសួងមហាផ្ទ និងកងកម្លាំងអាជ្ញាធរមានសមត្ថកិច្ចពាក់ព័ន្ធបានយកចិត្តទុកដាក់បោសសម្អាតឧក្រិដ្ឋកម្មឆបោកនេះចេញពីកម្ពុជា ដើម្បីធានាសន្តិសុខ សុវត្ថិភាព និងស្ថេរភាពជូនសង្គមជាតិ និងប្រជាជនទាំងមូល។

ពួកគាត់បញ្ជាក់បន្ថែមថា កម្ពុជារីកមុខរីកមាត់លើ ឆាកអន្តរជាតិតាមរយៈផលវិជ្ជមាននានា មិនមែនគេស្គាល់ដោយសារ ជាប្រទេសមានបទល្មើសឧក្រិដ្ឋនោះឡើយ ព្រោះកម្ពុជាជាប្រទេស មានវប្បធម៌ អរិយធម៌ និងជាប្រទេសសម្បូរដោយតំបន់ទេសចរណ៍ បុរាណៗជាច្រើន ដែលអាចទាក់ទាញភ្ញៀវទេសចរណ៍មកកម្សាន្តបាន ជាពិសេសបណ្ដាវិនិយោគិនបរទេស អាចមកវិនិយោគបាន ខណៈកម្ពុជា ជាប្រទេសដែលកំពុងឋិតក្នុងការអភិវឌ្ឍន៍យ៉ាងគំហុគ ក្រោមម្លប់ សុខសន្តិភាពដ៏ពេញលេញរបស់ប្រទេសជាតិ ដែលដឹកនាំក្រោមកិត្តិ បណ្ឌិតរបស់សម្តេចតេជោ ហ៊ុនសែន និងសម្ដេចធិបតី ហ៊ុន ម៉ាណែត។

គួរបញ្ជាក់ថា សម្តេចធិបតី នាយករដ្ឋមន្ត្រី កាលពីពេលថ្មីៗ នៅក្នុងពិធីបិទសន្និបាទបូកសរុបលទ្ធផលការងាររបស់អាជ្ញាធរជាតិប្រយុទ្ធប្រឆាំងគ្រឿងញៀន ក៏បានដាក់បញ្ជាឲ្យ កងកម្លាំងអាជ្ញាធរមានសមត្ថកិច្ចនៅទូទាំងប្រទេស ត្រូវបន្តទប់ស្កាត់ និងបង្ក្រាបឲ្យមានប្រសិទ្ធិ លើបញ្ហាអនឡាញស្គេមនេះ ខណៈកម្ពុជាពុំមែនជាទីជម្រកសុវត្ថិភាពរបស់ក្រុមឧក្រិដ្ឋជនទាំងនេះឡើយ៕ អត្ថបទ ៖ សុភា

The post បន្ទាត់ក្រហមនៃការបោសសម្អាត Scams Online កាន់តែជិតផុតថ្ងៃឱសានវាទ អាជ្ញាធររាជធានីកាន់តែបន្ថែមកម្ដៅក្នុងការបោសសម្អាត appeared first on Kampuchea Thmey Daily.

លោក អ៊ុម ហ៊ុយឈុនហេង ចៅសង្កាត់បឹងទំពន់ទី២ នៃរដ្ឋបាលខណ្ឌមានជ័យ បានឲ្យដឹងថា បច្ចុប្បន្ន កម្លាំងគណៈបញ្ជាការឯកភាពរដ្ឋបាលសង្កាត់ អនុវត្តតាមបទបញ្ជារបស់ឯកឧត្តម ឃួង ស្រេង អភិបាលរាជធានីភ្នំពេញ និងក្រោមការចង្អុលបង្ហាញដឹកនាំដោយលោកសេង គន្ធ អភិបាលខណ្ឌមានជ័យ តែងតែបានយកចិត្តទុកដាក់ជាប្រចាំ ក្នុងការអនុវត្តលើអនុក្រឹត្យលេខ០៣ របស់រាជរដ្ឋាភិបាលកម្ពុជា ក្នុងការចុះត្រួតពិនិត្យរាល់អាជីកម្មប្រមូលផ្តុំ ដែលបានផ្តល់ការស្នាក់នៅលើជនបរទេស ដើម្បីទប់ស្កាត់បទល្មើសនានា ពិសេស គឺបទល្មើសឆបោកតាមប្រព័ន្ធបច្ចេកវិទ្យា ( Scams Online )។

លោក អ៊ុម ហ៊ុយឈុនហេង ចៅសង្កាត់បឹងទំពន់ទី២

លោកចៅសង្កាត់បានបញ្ជាក់បន្ថែមថា ក្នុងការអនុវត្តន៍នេះ រាជរដ្ឋបាលភិបាលនិងអាជ្ញាធរមូលដ្ឋាន លើកទឹកចិត្តដល់ម្ចាស់អាជីវកម្មជួលការស្នាក់នៅទាំងឡាយ បន្តចូលរួមរាយការណ៍ ពីការស្នាក់នៅរបស់ជនបរទេស ដើម្បីទប់ស្កាត់បទល្មើសឆបោកតាមប្រព័ន្ធបច្ចេកវិទ្យា ( Scams Online ) បើពុំដូចនេះទេ និងអនុវត្តតាមច្បាប់ជាធរមាន ដោយផាកពិន័យជាទឹកប្រាក់ផងដែរ។

លោកស្រី វីន សុភ័ក្រ អ្នកគ្រប់គ្រងនិងជាម្ចាស់អាគារខុនដូរ L-Tower បានបង្ហាញការពេញចិត្តក្នុងការចូលរួមចំណែកជាមួយរដ្ឋាភិបាល និងអាជ្ញាធរមានសមត្ថកិច្ច ដែលមានគោលដៅ ក្នុងការទប់ស្កាត់ និងបង្ក្រាបបទល្មើសឆបោកតាមប្រព័ន្ធអនឡាញ ដើម្បីធានាបានសន្តិសុខសុវត្ថិភាពល្អក្នុងសង្គមជាតិ ។  ប្រទេសកម្ពុជាគាំទ្រ ការមកទេសចរណ៍របស់ជនបរទេសគ្រប់ជាតិសាសន៍ ប៉ុន្តែមិនគាំទ្រនៅជនបរទេស ចូលមកកម្ពុជាដើម្បីប្រព្រឹត្តបទល្មើសនោះទេ។

លោកស្រី វីន សុភ័ក្រ អ្នកគ្រប់គ្រងនិងជាម្ចាស់អាគារខុនដូរ L-Tower

យោងតាមអនុក្រឹត្យលេខ ០៣ របស់រាជរដ្ឋាភិបាល មាត្រាទី២០ កំណត់ថា ៖ ម្ចាស់ទីតាំងរស់នៅប្រមូលផ្តុំ ឬអ្នកគ្រប់គ្រងទីតាំងរស់នៅប្រមូលផ្តុំ ដែលមានចេតនាលាក់បាំង និងអនុញ្ញាត ឱ្យជនបរទេសដែលចូលមកព្រះរាជាណាចក្រកម្ពុជាដោយខុសច្បាប់ ស្នាក់នៅក្នុងទីតាំងស្ថិតនៅក្រោមការ ទទួលខុសត្រូវរបស់ខ្លួន ត្រូវផាកពិន័យជាប្រាក់ចំនួន ៤,០០០,០០០ (បួនលាន)រៀល សម្រាប់ជនបរទេសម្នាក់ ដោយមិនទាន់គិតដល់ទោសព្រហ្មទណ្ឌដែលបានកំណត់ក្នុងច្បាប់ជាធរមានឡើយ៕ អត្ថបទ ៖ សុភា

The post អាជ្ញាធរមូលដ្ឋានជំរុញឲ្យម្ចាស់អាជីវកម្មទាំងឡាយ បន្តចូលរួមរាយការណ៍ ពីការស្នាក់នៅរបស់ជនបរទេស ដើម្បីទប់ស្កាត់បទល្មើសឆបោកបច្ចេកវិទ្យា appeared first on Kampuchea Thmey Daily.

ក្រុមនិស្សិតកម្ពុជា មិនចង់ឲ្យកម្ពុជាក្លាយជាជម្រក នៃបទល្មើសឧក្រិដ្ឋទាំងឡាយណាមួយនោះទេ ពិសេសឧក្រិដ្ឋកម្មឆបោកអនឡាញ ពោលចង់ឲ្យកម្ពុជា ជាប្រទេសដែលមានភាពកក់ក្តៅ និងសន្តិភាពបំផុតសម្រាប់មនុស្សគ្រប់គ្នា និងគ្រប់ជាតិសាសន៍ ព្រោះកម្ពុជាជាប្រទេសដែលពោរពេញដោយវប្បធម៌ អរិយធម៌ ទេសចរណ៍ និងការអភិវឌ្ឍន៍ ក្រោមម្លប់ នៃសុខសន្តិភាពពេញលេញ។ ក្រុមនិស្សិតមានមតិលើកឡើងស្រដៀងៗគ្នាថា ប្រទេសជាតិមានការរីកចំរើន មានការអភិវឌ្ឍន៍ ទៅបានអាស្រ័យលើធនធានមនុស្សខ្លាំង ប្រទេសមានសន្តិភាព មានសន្តិសុខល្អ មានផ្សព្វផ្សាយទេសចរណ៍ ភ្ញៀវជាតិអន្តរជាតិមកលេងកម្សាន្ដបានដោយសេរីមិនមានភាពភ័យខ្លាច ននេះជាកិត្តិយសប្រទេសជាតិ លើឆាកអន្តរជាតិ។

ស្របពេលដែលក្រសួងមហាផ្ទៃ ដែលជាសេនាធិការផ្ទាល់របស់រាជរដ្ឋាភិបាល បានដាក់ឱសានវាទត្រឹមខែមេសា ខាងមុខ ក្នុងការបោសសម្អាតឲ្យអស់នូវឧក្រិដ្ឋកម្មឆបោកតាមប្រព័ន្ធបច្ចេកវិទ្យា (Online scams) មហាជនគ្រប់មជ្ឈដ្ឋាន និងប្រជាពលរដ្ឋក្នុងប្រទេស បានសម្តែងនូវការគាំទ្រជាខ្លាំងលើវិធានការដ៏ម៉ឺងម៉ាត់នេះ។

បច្ចុប្បន្នអាជ្ញាធរថ្នាក់មូលដ្ឋាន ជាពិសេសមូលដ្ឋានទាំង១៤ខណ្ឌក្នុងរាជធានីភ្នំពេញ បានកំពុងយុទ្ធការបោសសម្អាតបទល្មើសអនឡាញទាំងនេះដោយមិនដកដៃឡើយ ត្រួតពិនិត្យជាបន្តបន្ទាប់តាមបន្ទប់អាគារ ខនដូរ ជាដើម ដើម្បីពិនិត្យរាល់ជនបរទេសដែលមកស្នាក់នៅ។

គួររំលឹកថា សម្តេចធិបតី ហ៊ុន ម៉ាណែត នាយករដ្ឋមន្ត្រី បានបញ្ជាក់ថា សម្តេចពិតជាចង់ឃើញណាស់នូវការចូលរួមជាមួយ ការប្តេជ្ញាចិត្ត និង ការលះបង់ដើម្បីជាតិ ពីគ្រប់តួអង្គដែលមានការពាក់ព័ន្ធទាំងអស់ ជាពិសេស ការចូលរួមប្រជាជនខ្មែរយើងគ្រប់ស្រទាប់វណ្ណៈ គ្រប់និន្នាការ ក៏ដូចជា មន្ត្រីរាជការ អាជ្ញាធរមូលដ្ឋាន កងកម្លាំងមានសមត្ថកិច្ចពាក់ព័ន្ធទាំងអស់ ដើម្បីរួបរួមគ្នាជាកម្លាំងមហាសាមគ្គីជាតិខ្មែរ សំដៅលុបបំបាត់នូវរាល់បញ្ហាអសកម្មពាក់ព័ន្ធ នឹង ឧក្រិដ្ឋកម្មឆបោកតាមប្រព័ន្ធបច្ចេកវិទ្យា ក៏ដូចជាដើម្បីលើកកម្ពស់កេរ្តិ៍ឈ្មោះដ៏ប្រពៃនៃ ព្រះរាជាណាចក្រកម្ពុជា នៅលើឆាកអន្តរជាតិ៕ អត្ថបទ៖ សុភា

The post ក្រុមនិស្សិតបន្តគាំទ្ររាជរដ្ឋាភិបាល ក្នុងយុទ្ធនាការបោស សម្អាតឧក្រិដ្ឋកម្មឆបោកអនឡាញចេញពីកម្ពុជា appeared first on Kampuchea Thmey Daily.