អាមេរិក Archives - Kampuchea Thmey Daily

វៀតណាមរំពឹងការវិនិយោគបន្ថែមពីក្រុមហ៊ុនអាមេរិក និងសម្ព័ន្ធមិត្ត ក្នុងអាណត្តិថ្មីរបស់ ត្រាំ

Huon Dina — Tue, 19 Nov 2024 08:36:34 +0000

ក្រុមហ៊ុនទីផ្សារមូលធន KB Securities Vietnam (KBSV) បានលើកឡើងថា ក្រុមហ៊ុនអាមេរិក និងក្រុមហ៊ុនមកពីប្រទេសជាសម្ព័ន្ធមិត្តរបស់អាមេរិកកាន់តែច្រើន អាចនឹងផ្លាស់ទីផលិតកម្មទៅកាន់ប្រទេសវៀតណាម ក្នុងអាណត្តិប្រធានាធិបតីថ្មីរបស់លោក ដូណាល់ ត្រាំ ដែលរំពឹងថានឹងបង្កើនភាពតានតឹងជម្លោះពាណិជ្ជកម្មអាមេរិក-ចិន។

កាសែត The Investor បានចុះផ្សាយកាលពីថ្ងៃចន្ទថា ក្រុមហ៊ុនសហគ្រាសមកពីកូរ៉េខាងត្បូង តៃវ៉ាន់ និងជប៉ុន ដែលគេចាត់ទុកថាជាសម្ព័ន្ធមិត្តជិតស្និទ្ធរបស់សហរដ្ឋអាមេរិកក្នុងតំបន់អាស៊ីប៉ាស៊ីហ្វិក ត្រូវបានព្យាករថានឹងផ្លាស់ប្តូរផលិតកម្មតាមដំណាក់កាលរបស់ខ្លួនទៅកាន់ប្រទេសវៀតណាម។ នាពេលបច្ចុប្បន្ន ក្រុមហ៊ុនពីប្រទេសទាំងនេះ បានរួមចំណែកជាងពាក់កណ្ដាលនៃការនាំចេញរបស់វៀតណាមទៅកាន់អាមេរិករួចទៅហើយ។

KBSV បានចង្អុលបង្ហាញថា ការកើនឡើងនៃភាពតានតឹងពាណិជ្ជកម្មរវាងមហាអំណាចសេដ្ឋកិច្ចទាំង២ គឺជាមូលហេតុដែលជំរុញឱ្យក្រុមហ៊ុនសាជីវកម្មពហុជាតិ ផ្លាស់ប្តូរមូលដ្ឋានផលិតកម្មចេញពីប្រទេសចិន ដើម្បីការពារហានិភ័យ។ អ្នកវិភាគ KBSV បាននិយាយថា និន្នាការនេះប្រហែលជាមិនខ្លាំងដូចឆ្នាំ ២០១៨-២០២២ ដែលគេឃើញក្រុមហ៊ុនផ្សេងៗ Apple, Intel, Foxconn, Lego និង Sumitomo Wiring Systems ផ្លាស់ប្ដូរទីតាំងផលិតកម្មរបស់ខ្លួន នោះទេ ប៉ុន្តែវានឹងនៅតែបន្តកើតមាន។

អ្នកវិភាគ KBSV បានបន្ថែមថា ឧស្សាហកម្មនាំចេញសំខាន់ៗមួយចំនួនរបស់សហគ្រាសវៀតណាម ជាពិសេសវាយនភណ្ឌ និងកាត់ដេរ អាចបង្កើនការប្រកួតប្រជែងជាមួយទំនិញចិន នៅពេលនាំចេញទៅអាមេរិក។ ជាមួយគ្នានោះទោះបីជាសហរដ្ឋអាមេរិកអាចនឹងដាក់ពន្ធ ១០-២០ ភាគរយ លើវាយនភណ្ឌវៀតណាមក៏ដោយ ក៏ផលប៉ះពាល់ជាក់ស្តែងមិនគួរឱ្យព្រួយបារម្ភពេកដែរ បើប្រៀបធៀបទៅនឹងពន្ធបច្ចុប្បន្ន (៨-២៥ ភាគរយ) ។ ជាក់ស្ដែងទៅ ពន្ធចន្លោះពី ១០-២០ ភាគរយ នឹងអាចប្រកួតប្រជែងខ្លាំងជាងអត្រាពន្ធ ៦០ ភាគរយ ដែលលោក ត្រាំ គំរាមដាក់លើចិន។ យ៉ាងណាមិញ វៀតណាមនឹងត្រូវប្រកួតប្រជែងជាមួយប្រទេសផ្សេងទៀត។

ទោះយ៉ាងណាក៏ដោយ អាណត្តិថ្មីរបស់ ត្រាំ ក៏បង្កផលប៉ះពាល់មួយចំនួនផងដែរ ដែលក្នុងនោះរួមមានទាំងកម្រិតនៃប្រភពវិនិយោគដោយផ្ទាល់ពីបរទេសពីប្រទេសចិន ខណៈមានលទ្ធភាពដែលអាមេរិកអាចនឹងបង្កើនពន្ធប្រឆាំងការលក់បង្ខូចតម្លៃលើផលិតផលវៀតណាម៕

The post វៀតណាមរំពឹងការវិនិយោគបន្ថែមពីក្រុមហ៊ុនអាមេរិក និងសម្ព័ន្ធមិត្ត ក្នុងអាណត្តិថ្មីរបស់ ត្រាំ appeared first on Kampuchea Thmey Daily.

ប្រមុខបក្សកុម្មុយនិស្តវៀតណាម និង ត្រាំ ពិភាក្សាគ្នាលើទំនាក់ទំនងសេដ្ឋកិច្ច

Huon Dina — Wed, 13 Nov 2024 02:12:31 +0000

បក្សកុម្មុយនិស្តវៀតណាមបានឱ្យដឹងកាលពីថ្ងៃអង្គារថា ប្រមុខបក្សកុម្មុយនិស្តវៀតណាម លោក To Lam បានពិភាក្សាគ្នាលើទំនាក់ទំនងសេដ្ឋកិច្ចជាមួយលោក ដូណាល់ ត្រាំ នៅពេលលោកទូរស័ព្ទទៅអបអរសាទរអ្នកនយោបាយអាមេរិករូបនេះចំពោះជ័យជម្នះជាថ្មីក្នុងការបោះឆ្នោតប្រធានាធិបតីអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

លោក Lam បាននិយាយក្នុងការហៅទូរស័ព្ទជាមួយលោក ត្រាំ កាលពីថ្ងៃចន្ទថា៖ «វៀតណាមបានត្រៀមខ្លួនរួចជាស្រេចក្នុងការលើកកម្ពស់ស្ថិរភាព និងការអភិវឌ្ឍយូរអង្វែងនៃទំនាក់ទំនងទ្វេភាគី ដើម្បីជាប្រយោជន៍ដល់ប្រជាជននៃប្រទេសទាំង២»។ នេះបើតាមសេចក្ដីថ្លែងការណ៍ចេញផ្សាយដោយបក្សកុម្មុយនិស្តវៀតណាម ដែលបន្តថា លោក ត្រាំ បានសម្តែងការគោរពចំពោះទំនាក់ទំនងជាមួយវៀតណាម និងកិច្ចសហប្រតិបត្តិការសេដ្ឋកិច្ចវៀតណាម-អាមេរិក ហើយចង់លើកកម្ពស់វាបន្ថែមទៀត។

គួរគូសបញ្ជាក់ថា បញ្ហាសេដ្ឋកិច្ចជាមួយអាមេរិក គឺជាប្រធានបទធំសម្រាប់វៀតណាម ដោយហេតុថា មហាអំណាចសេដ្ឋកិច្ចមួយនេះគឺជាទីផ្សារនាំចេញដ៏ធំបំផុតរបស់វៀតណាម។ កាលពីខែកញ្ញាឆ្នាំមុន ប្រទេសទាំង២ បានដំឡើងងារទំនាក់ទំនងរបស់ខ្លួនទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ ដែលវាជាកម្រិតខ្ពស់បំផុតក្នុងចំណាត់ថ្នាក់របស់ វៀតណាម។ ប៉ុន្តែឥឡូវនេះ មានការព្រមានឱ្យវៀតណាមបង្កើនការប្រុងប្រយ័ត្នពីលទ្ធភាពនៃផលប៉ះពាល់ពីរដ្ឋបាល ត្រាំ ដែលរំពឹងថានឹងបន្តឹងការនាំចូលទៅអាមេរិក ដើម្បីជំរុញវិស័យផលិតកម្ម និងកាត់បន្ថយឱនភាពពាណិជ្ជកម្ម។

កាលពីសប្តាហ៍មុន មន្ត្រី និងអ្នកជំនាញខ្សែសង្វាក់ផ្គត់ផ្គង់បានប្រាប់រ៉យទ័រថា វៀតណាមអាចប្រឈមមុខនឹងការប្រែប្រួលពាណិជ្ជកម្ម នៅពេលលោក ត្រាំ ឡើងកាន់អំណាច ដោយប្រទេសនេះអាចទទួលបានអត្ថប្រយោជន៍ពីកំណើននៃភាពតានតឹងពាណិជ្ជកម្មអាមេរិក-ចិន ប៉ុន្តែអាចរងផលប៉ះពាល់ពីវិធានការការពារនិយមរបស់អាមេរិកផងដែរ។

ទោះជាយ៉ាងណាក៏ដោយ សេចក្ដីថ្លែងការណ៍របស់បក្សកុម្មុយនិស្តវៀតណាម ហាក់ដូចជារំលេចនូវភាពវិជ្ជមានជាធំ ដោយនិយាយថា មេដឹកនាំទាំង២បានអញ្ជើញគ្នាទៅវិញទៅមកឱ្យទៅធ្វើទស្សនកិច្ចនៅប្រទេសរបស់ខ្លួនរៀងៗខ្លួន។

គួររំឭកថា លោក ត្រាំ បានធ្វើដំណើរទស្សនកចិ្ចទៅប្រទេសវៀតណាម២ដង ក្នុងអាណត្តិដំបូងរបស់លោកជាប្រធានាធិបតី ដោយលើកទី១បានចូលរួមកិច្ចប្រជុំកំពូលវេទិកាសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក(APEC) ហើយបន្ទាប់មក គឺកិច្ចប្រជុំជាមួយមេដឹកនាំកូរ៉េខាងជើងលោក គីម ជុងអ៊ុន៕

The post ប្រមុខបក្សកុម្មុយនិស្តវៀតណាម និង ត្រាំ ពិភាក្សាគ្នាលើទំនាក់ទំនងសេដ្ឋកិច្ច appeared first on Kampuchea Thmey Daily.

ម៉ិកស៊ិកព្រមានពីលទ្ធភាពដាក់ពន្ធសងសឹក ប្រឆាំងនឹងអាមេរិក

Huon Dina — Tue, 12 Nov 2024 02:35:21 +0000

រដ្ឋមន្ត្រីសេដ្ឋកិច្ចរបស់ម៉ិកស៊ិក លោក Marcelo Ebrard បានព្រមានឡើងកាលពីថ្ងៃចន្ទថា ប្រសិនបើរដ្ឋបាលអាមេរិកថ្មីរបស់លោកប្រធានាធិបតីជាប់ឆ្នោត ដូណាល់ ត្រាំ បង្កើនពន្ធលើការនាំចេញទំនិញរបស់ម៉ិកស៊ិកនោះ នោះរដ្ឋាភិបាលម៉ិកស៊ិកអាចនឹងសងសឹកជាមួយនឹងវិធានការពន្ធដូចគ្នា លើទំនិញនាំចូលពីសហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

លោក Ebrard បានថ្លែងពីការណ៍នេះ ក្នុងបទសម្ភាសន៍ជាមួយសារព័ត៌មានក្នុងស្រុក Radio Formula ដោយរំឭកពីរបៀបដែលលោក ត្រាំ បានគំរាមកំហែងដាក់ពន្ធ ២៥ ភាគរយ លើទំនិញរបស់ម៉ិកស៊ិក ពេលលោកកាន់អំណាចកាលពីលើកមុន។

លោកថ្លែងយ៉ាងដូច្នេះថា៖ «ប្រសិនបើអ្នកដាក់ពន្ធ ២៥ ភាគរយ លើខ្ញុំ ខ្ញុំត្រូវតែប្រតិកម្មជាមួយនឹងពន្ធដូចគ្នា។ ប្រសិនបើអ្នកអនុវត្តវិធានការពន្ធ យើងនឹងអនុវត្តវិធានការពន្ធ។ ហើយនឹងបានអីមកវិញ? គឺការខាតបង់ដ៏ធំសម្រាប់សេដ្ឋកិច្ចអាមេរិកខាងជើង»។

លោក Ebrard បានបន្តសង្កត់ធ្ងន់ថា វិធានការពន្ធនឹងធ្វើឱ្យអតិផរណានៅសហរដ្ឋអាមេរិកកើនឡើង ដែលនេះជា «ដែនកំណត់សំខាន់» ក្នុងការប្រឆាំងកុំឱ្យមានការសងសឹកបែបនេះ។

គួរគូសបញ្ជាក់ថា មុនជាប់ការបោះឆ្នោតថ្ងៃ ៥ វិច្ឆិកា លោក ត្រាំ បានសន្យាថានឹងបង្កើនពន្ធ ២៥ ភាគរយ លើទំនិញម៉ិកស៊ិក ប្រសិនបើប្រទេសជិតខាងមួយនេះ មិនបញ្ឈប់ «បញ្ជូន» ជនអន្តោប្រវេសន៍ខុសច្បាប់ចូលទឹកដីអាមេរិកទេនោះ។

ទោះបីជាយ៉ាងណាក៏ដោយ វិធានការដាក់ពន្ធអាចនឹងជាក្លាយបញ្ហាសម្រាប់សហរដ្ឋអាមេរិក ដែលមានម៉ិកស៊ិកជាដៃគូពាណិជ្ជកម្មដ៏ធំបំផុតរបស់ខ្លួន។ យោងតាមក្រសួងការបរទេសអាមេរិក ទំហំពាណិជ្ជកម្មរវាងប្រទេសទាំង២ ក្នុងឆ្នាំ២០២៣ មានប្រមាណ ៨០៧ ប៊ីលានដុល្លារ ដោយការនាំចេញទំនិញរបស់អាមេរិកទៅម៉ិកស៊ិក រួមចំណែក ៣២២ ប៊ីលានដុល្លារ។

ម៉ិកស៊ិក គឺជាគោលដៅកំពូលសម្រាប់ការនាំចេញផលិតផលប្រេង និងឧស្ម័នធម្មជាតិរបស់អាមេរិក។ ប្រទេសនេះក៏ជាទីផ្សារដ៏សំខាន់មួយសម្រាប់គ្រឿងបន្លាស់រថយន្ត បន្ទះឈីប និងគ្រឿងបន្លាស់អេឡិចត្រូនិកផ្សេងៗ សារធាតុគីមីទូទៅ និងឧបករណ៍កុំព្យូទ័រ របស់អាមេរិកផងដែរ។

អ្វីគួរឱ្យព្រួយបារម្ភសម្រាប់សេដ្ឋវិទូ គឺថា លោក ត្រាំ មិនមែនសន្យាដាក់ពន្ធតែលើម៉ិកស៊ិកប៉ុណ្ណោះទេ។ លោកបានប្ដេជ្ញាដាក់ពន្ធចន្លោះពី ១០-២០ ភាគរយ លើគ្រប់មុខទំនិញពីបរទេស និង ៦០ ភាគរយ លើទំនិញមកពីចិន ដែលជាផ្នែកមួយនៃចំណាត់ការការពារនិយមរបស់លោក ដើម្បីជំរុញវិស័យផលិតកម្មក្នុងស្រុក និងកាត់បន្ថយឱនភាពពាណិជ្ជកម្ម។

សេដ្ឋវិទូព្យាករថា គោលនយោបាយរបស់លោក នឹងទាក់ទាញការសងសឹក ឬគោលនយោបាយក្នុងរបៀបដូចគ្នាពីប្រទេសផ្សេងៗ ដូចអ្វីដែលលោក Ebrard បានគំរាម ដែលនេះនឹងជះផលអវិជ្ជមានដល់លំហូរពាណិជ្ជកម្មសេរីរបស់សកល ដោយកាត់បន្ថយការនាំចេញ ហើយឆ្ពោះទៅរកការធ្លាក់ចុះនៃសេដ្ឋកិច្ចសកល៕

The post ម៉ិកស៊ិកព្រមានពីលទ្ធភាពដាក់ពន្ធសងសឹក ប្រឆាំងនឹងអាមេរិក appeared first on Kampuchea Thmey Daily.

រឿងរន្ធត់ “Five Nights at Freddy’s” ជាប់ជាភាពយន្តរកចំណូលបានច្រើនជាងគេនៅ អាមេរិកខាងជើង

Boa Sokunveary — Mon, 30 Oct 2023 06:16:32 +0000

កាលពីថ្ងៃអាទិត្យ ទី២៩ ខែតុលា BoxOfficeMojo.com បានប្រកាសថា រឿងរន្ធត់ “Five Nights at Freddy’s” ជាប់ជាភាពយន្តលេខ ១ នៅអាមេរិកខាងជើង ដែលរកចំណូលបាន ៧៨ លានដុល្លារ ។

ឥលូវនេះ វាកំពុងចាក់ផ្សាយនៅលើប៉ុស្តិ៍ទូរទស្សន៍ Peacock ផងដែរ ។

ចំណែកឯខ្សែភាពយន្តលេខ ២ គឺ “Taylor Swift: The Eras Tour” ដែលរកចំណូលបាន ១៤,៧ លានដុល្លារ ហើយលេខ ៣ គឺរឿង “Killers of the Flower Moon” ដែលរកចំណូលបាន ៩ លានដុល្លារ លេខ ៤ រឿង “After Death” រកបាន ៥ លានដុល្លារ និងលេខ ៥ រឿង “The Exorcist: Believer” រកបាន ៣,១ លានដុល្លារ ។

សូមជម្រាបថា ភាពយន្តរន្ធត់ “Five Nights at Freddy’s” ដឹកនាំដោយអ្នកស្រី Emma Tammi បានចាក់បញ្ចាំងកាលពីថ្ងៃទី២៧ ខែតុលា ឆ្នាំ ២០២៣ និងថ្លៃផលិតចំណាយអស់ ២០ លានដុល្លារ ។

តាមពិតទៅ រឿងនេះគឺដកស្រង់ចេញពីវីដេអូហ្គេមបង្កើតឡើងដោយលោក Scott Cawthon នៅឆ្នាំ ២០១៤ ៕

ប្រែសម្រួល៖ វារី

ប្រភព៖ UPI

ចុចអាន៖ ត្រឹម ១៧ ថ្ងៃ Barbie រកចំណូលបានដល់ទៅ ១ ពាន់លានដុល្លារក្នុង Box office ពិភពលោក

The post រឿងរន្ធត់ “Five Nights at Freddy’s” ជាប់ជាភាពយន្តរកចំណូលបានច្រើនជាងគេនៅ អាមេរិកខាងជើង appeared first on Kampuchea Thmey Daily.

តើវត្តមានលោក ចូ បាយដិន នៅអ៊ីស្រាអែល ជាការបន្ធូរស្ថានការណ៍ ឬបំប៉នបញ្ហានៅមជ្ឈឹមបូព៌ា?

vann sokunthea — Thu, 19 Oct 2023 12:49:33 +0000

លោក ចូ បាយដិន ប្រធានាធិបតីអាមេរិក បានធ្វើដំណើរទស្សនកិច្ចដ៏កម្រមួយទៅកាន់ប្រទេសអ៊ីស្រាអែលកាលពីថ្ងៃពុធ ដើម្បីជួបជជែកដោយផ្ទាល់ជាមួយសមភាគី Benjamin Netanyahu នាយករដ្ឋមន្រ្តីអ៊ីស្រាអែល។ លោក Benjamin Netanyahu បានទៅរង់ចាំទទួលលោក ចូ បាយដិន ដល់ជណ្តើរចុះពីលើយន្តហោះតែម្តង ហើយភាគីទាំង២បានអោបរឹតគ្នា មុនចូលទៅជជែកពិភាក្សាជាផ្លូវការ។

លោក Joe Biden និងលោក Benjamin Netanyahu

ដំណើរទស្សនកិច្ចរបស់លោក ចូ បាយដិន នៅអ៊ីស្រាអែលនេះ គឺបន្ទាប់ពីមានការទម្លាក់គ្រាប់បែកទៅលើមន្ទីរពេទ្យ Al Ahli ក្នុងតំបន់កាហ្សាដែលបានសម្លាប់ជីវិតមនុស្សអស់ប្រមាណ៥០០នាក់។ ប្រទេសនៅតំបន់មជ្ឈឹមបូព៌ា បានចោទប្រកាន់ថា ជាទង្វើរបស់កងទ័ពអ៊ីស្រាអែល ដោយហេតុថា ការផ្ទុះមន្ទីរពេទ្យនេះ ក្នុងពេលដែលអ៊ីស្រាអែលកំពុងទម្លាក់គ្រាប់បែកឥតឈប់ឈរ និងឡោមព័ន្ធតំបន់កាហ្សា ដើម្បីកម្ទេចក្រុមសកម្មប្រយុទ្ធហាម៉ាសប៉ាឡេស្ទីន។ ប៉ុន្តែ រដ្ឋាភិបាលអ៊ីស្រាអែល បានទាត់ចោល ហើយបានទម្លាក់ការទទួលខុសត្រូវនេះទៅលើក្រុមអ៊ីស្លាមជីហាតទៅវិញ។

ពេលអង្គុយចុះជជែកគ្នាភ្លាម លោកប្រធានាធិបតីអាមេរិក ចូ បាយដិន បាននិយាយទៅលោក Benjamin Netanyahu នាយករដ្ឋមន្រ្តីអ៊ីស្រាអែលថា ការទម្លាក់គ្រាប់បែកសម្លាប់ជីវិតមនុស្សនៅមន្ទីរពេទ្យកាហ្សា ហាក់ដូចជាទង្វើរបស់ក្រុមផ្សេង ប៉ុន្តែ មិនមែនជាទង្វើរបស់«អ្នក»នោះទេ។ ក្រោយមក សេតវិមានក៏បានចេញមកបញ្ជាក់ថា ការផ្ទុះនៅមន្ទីរពេទ្យកាហ្សា មិនមែនជាទង្វើរបស់អ៊ីស្រាអែលទេ ប៉ុន្តែ ក៏មិនទាន់បានវាយតម្លៃឱ្យឃើញថា ជាការទទួលខុសត្រូវរបស់ភាគីណា ឬក្រុមណាមួយនៅឡើយដែរ។ ភ្នាក់ងារស៊ើបការសំងាត់របស់អាមេរិកតាមរយៈសេតវិមាន ត្រឹមតែបានគូសបញ្ជាក់ថា កំពុងតែប្រមូលព័ត៌មានបន្ថែមពាក់ព័ន្ធនឹងករណីមួយនេះ។

លោក ចូ បាយដិន ទៅអ៊ីស្រាអែល ប្រៀបដូចយក«អាវក្រោះ»ទៅពាក់ឱ្យអ៊ីស្រាអែលដែលកំពុងប្រយុទ្ធ

មែនទែនទៅ លោក ចូ បាយដិន ទៅកាន់ប្រទេសអ៊ីស្រាអែលនេះ មិនមែនទៅដោយដៃទទេនោះទេ តែផ្ទុយទៅវិញ គឺនាំយកទៅទាំងការគាំទ្រផ្នែកស្មាតី និងគម្រោងថវិកាគាំទ្រទៅជាមួយផង។ និយាយឱ្យចំ វត្តមានរបស់លោក ចូ បាយដិន នេះ ប្រៀបដូចជាយក«អាវក្រោះ»ទៅពាក់ឱ្យអ៊ីស្រាអែល ឬអាចនិយាយម្យ៉ាងទៀតថា ជាការប្រកាសបញ្ជាក់ប្រាប់ទៅប្រទេសនៅមជ្ឈឹមបូព៌ា និងក្រុមប្រដាប់អាវុធអ៊ីស្លាមដទៃទៀតឱ្យកាន់តែច្បាស់ថា «អ៊ីស្រាអែល គឺមានអាមេរិកនៅគាំទ្រ និងនៅការពារ»។

លោក ចូ បាយដិន ទាំងនៅអាមេរិក និងទាំងទៅដល់អ៊ីស្រាអែល បានប្រកាសដដែលៗថា អាមេរិកនៅឈរខាងអ៊ីស្រាអែលនៅក្នុងជម្លោះប្រដាប់អាវុធជាមួយក្រុមហាម៉ាសដែលយកតំបន់កាហ្សា និងប្រជាពលរដ្ឋប៉ាឡេស្ទីន ធ្វើជាទីលានប្រយុទ្ធគ្នា។ លោក ចូ បាយដិន ថែមទាំងបានប្រកាសនៅទីក្រុងTel Aviv ប្រទេសអ៊ីស្រាអែលទៀតថា រដ្ឋាភិបាលក្រុងវ៉ាស៊ីនតោន នឹងផ្តល់អ្វីគ្រប់បែបយ៉ាងទាំងអស់ដែលអ៊ីស្រាអែលត្រូវការ ដើម្បីការពារខ្លួនក្នុងពេលកំពុងបន្តសង្រ្គាមនៅក្នុងតំបន់កាហ្សា។

បើគិតជាកញ្ចប់ថវិកាពិតប្រាកដដែលអាមេរិកចង់ផ្តល់ទៅឱ្យអ៊ីស្រាអែលនៅពេលនេះ គឺមិនទាន់កំណត់ច្បាស់ទេ ប៉ុន្តែ គ្រាន់តែមានការស្នើឡើងជាកញ្ចប់ក្នុងរង្វង់១០០ពាន់លានដុល្លារ។ ក្នុងនោះ ៦០ពាន់លានដុល្លារ គឺអាមេរិក នឹងផ្តល់ទៅអ៊ុយក្រែន និង៤០ពាន់លានដុល្លារទៀតសម្រាប់ផ្តល់ទៅឱ្យអ៊ីស្រាអែល និងតៃវ៉ាន់។

ដ្បិតថា កញ្ចប់ថវិកាណាមួយរបស់អាមេរិកមិនទាន់ទៅដល់ដៃអ៊ីស្រាអែលក្នុងពេលនេះមែន ប៉ុន្តែ ការប្រកាសគាំទ្រ និងការការពារអ៊ីស្រាអែលពីសំណាក់សហរដ្ឋអាមេរិក គឺលោក ចូ បាយដិន មិនមែននិយាយឱ្យតែរួចពីមាត់ និងមិនធ្វើសកម្មភាពអ្វីសោះនោះឡើយ។ រដ្ឋបាលលោក ចូ បាយដិន បានបញ្ជូនរួចរាល់ហើយនូវគ្រឿងសព្វាវុធ និងនាវាផ្ទុកយន្តហោះទៅកាន់តំបន់សមុទ្រមេឌីទែរ៉ាណា ខាងកើត ដើម្បីតៀមជួយអ៊ីស្រាអែល បើសិនស្ថានភាពមានការប្រែប្រួល ឬការវិវត្តណាមួយភ្លាមៗ ដែលមិនអាចស្មានដល់។

ប្រធានាធិបតីអាមេរិក ហាក់យកចិត្តទុកដាក់ពីសន្តិសុខអ៊ីស្រាអែល ជាជាងមហន្តរាយនៅក្នុងតំបន់កាហ្សា

ខុសពីការរំពឹងរបស់សហគមន៍អន្តរជាតិ ក៏ដូចជា អ្នកតាមដានបញ្ហាអន្តរជាតិនានា គឺលោកប្រធានាធិបតីអាមេរិក ចូ បាយដិន មិនបានអំពាវនាវឱ្យមានបទឈប់បាញ់គ្នារវាងអ៊ីស្រាអែល និងក្រុមហាម៉ាសនៅក្នុងតំបន់កាហ្សាឡើយ។ ផ្ទុយទៅវិញ លោក ចូ បាយដិន បានលើកឡើង និងបារម្ភខ្លាំងតែពីសន្តិសុខរបស់អ៊ីស្រាអែលនៅក្នុងតំបន់មជ្ឈឹមបូព៌ាប៉ុណ្ណោះ។ អ្វីដែលលោក មានការបារម្ភខ្លាំងនោះ គឺខ្លាចក្រែងក្រុមប្រដាប់អាវុធនៅក្នុងតំបន់មជ្ឈឹមបូព៌ា ជាអាទិ៍ ក្រុម Hezbollah ដែលមានអ៊ីរ៉ង់នៅពីក្រោយ វាយប្រហារអ៊ីស្រាអែលពីមុខម្ខាងទៀតតាមបន្ទាត់ព្រំដែនជាមួយប្រទេសលីបង់។

ជំនួសឱ្យការមិនអំពាវនាវឱ្យមានបទឈប់បាញ់ លោក ចូ បាយដិន ក៏បានបង្ហាញពីយកចិត្តទុកដាក់ដល់សុខទុក្ខប្រជាពលរដ្ឋប៉ាឡេស្ទីននៅក្នុងតំបន់កាហ្សាខ្លះៗដែរ មិនអត់ទេ។ មុនឡើងយន្តហោះទៅកាន់អាមេរិកវិញ លោក ចូ បាយដិន បានប្រកាសផ្តល់ជំនួយ១០០លានដុល្លារអាមេរិកសម្រាប់ជួយដល់ប្រជាពលរដ្ឋនៅក្នុងតំបន់កាហ្សា និងWest Bank។ មិនតែប៉ុណ្ណោះ លោកបានធានាថា រដ្ឋាភិបាលអ៊ីស្រាអែលនឹងផ្តល់អាហារ ទឹក និងថ្នាំសង្កូវដល់ប្រជាពលរដ្ឋនៅតំបន់កាហ្សាតាមច្រកព្រំដែនអេហ្ស៊ីប។ ព័ត៌មានចុងក្រោយ គឺអេហ្ស៊ីប បានអនុញ្ញាតឱ្យក្បួនរថយន្តជំនួយមនុស្សធម៌មួយចំនួនបានចូលទៅតំបន់កាហ្សា តាមការអំពាវនាវរបស់លោកប្រធានាធិបតីអាមេរិក។

លោក ចូ បាយដិន«លក់មុខ»នៅមជ្ឈឹមបូព៌ា ព្រោះរឿងទម្លាក់គ្រាប់បែកលើមន្ទីរពេទ្យកាហ្សា?

មុនទៅកាន់ប្រទេសអ៊ីស្រាអែលកាលពីថ្ងៃពុធ តាមគម្រោង លោក ចូ បាយដិន ក្រៅពីជួបលោកនាយករដ្ឋមន្រ្តីអ៊ីស្រាអែល ក៏គ្រោងជួបជាមួយមេដឹកនាំហ្ស៊កដានី និងមេដឹកនាំក្នុងតំបន់មជ្ឈឹមបូព៌ាដទៃទៀត។ ប៉ុន្តែ ហេតុការណ៍ទម្លាក់គ្រាប់បែកលើមន្ទីរពេទ្យនៅតំបន់កាហ្សាសម្លាប់ជីវិតមនុស្សប្រមាណ៥០០នាក់ បានធ្វើឱ្យមេដឹកនាំទាំងអស់នោះសម្រេចលុបចោលជំនួបជាមួយលោក ចូ បាយដិន ភ្លាមៗតែម្តង។ ដូច្នេះហើយ បញ្ហាផ្ទុះមន្ទីរពេទ្យនេះ ធ្វើឱ្យមានផលវិបាកផ្នែកការទូតសម្រាប់លោក ចូ បាយដិន នៅតំបន់មជ្ឈឹមបូព៌ា។

ព្រះអង្គម្ចាស់ Abdullah II

ប្រទេសហ្សកដានី ដែលជាអ្នកផ្តើមគំនិតរៀបចំឱ្យមានជំនួបកំពូលរវាងលោក ចូ បាយដិន ជាមួយព្រះអង្គម្ចាស់ Abdullah II ជាមួយប្រធានាធិបតី អេហ្ស៊ីប លោក Abdel Fattah el-Sisi និងលោក Mahmoud Abbas ប្រធានាធិបតីរដ្ឋប៉ាឡេស្ទីននោះ បានលុបចោលទៅវិញ។ មានន័យថា លោក ចូ បាយដិន លែងត្រូវបានទទួលស្វាគមន៍នៅក្នុងរាជធានី Amman ប្រទេសហ្ស៊កដានីទៀតហើយ។ ការណ៍នេះ ធ្វើឱ្យលោក ចូ បាយដិន ប្រឈមមុខនឹងភាពអាម៉ាស ដោយសារតែមេដឹកនាំនៃប្រទេសហ្ស៊កដានី អេហ្ស៊ីប និងរដ្ឋប៉ាឡេស្ទីនថា ពួកគេគ្មានទំនុកចិត្តលើសមត្ថភាពរបស់លោកប្រធានាធិបតីអាមេរិកក្នុងការបញ្ចប់អំពើហិង្សានៅក្នុងតំបន់កាហ្សា ដែលពួកគេចាត់ទុកថា ជាទង្វើរំលោភបំពានច្បាប់អន្តរជាតិ៕

ប្រធានាធិបតី អេហ្ស៊ីប លោក Abdel Fattah el-Sisi

លោក Mahmoud Abbas

ដោយ៖ វណ្ណ សុគន្ធា

The post តើវត្តមានលោក ចូ បាយដិន នៅអ៊ីស្រាអែល ជាការបន្ធូរស្ថានការណ៍ ឬបំប៉នបញ្ហានៅមជ្ឈឹមបូព៌ា? appeared first on Kampuchea Thmey Daily.

អ្នកវិទ្យាសាស្ត្រអាមេរិក ជាប់នៅក្រោមដីប្រហែល ១ គីឡូម៉ែត្រ ដោយសារជំងឺ

Boa Sokunveary — Fri, 08 Sep 2023 08:10:00 +0000

កាលពីថ្ងៃព្រហស្បតិ៍ ទី៧ ខែសីហា អ្នកជួយសង្គ្រោះជាង ១៥០ នាក់បានចុះទៅជួយបុរសជនជាតិអាមេរិកម្នាក់ ដែលជាប់នៅក្រោមដីប្រហែល ១ គីឡូម៉ែត្រ ក្នុងរូងភ្នំនៅភាគខាងត្បូងប្រទេសតួកគី ។

បុរសខាងលើ ឈ្មោះ Mark Dickey អាយុ ៤០ ឆ្នាំម្នាក់ កំពុងជាប់ចុះរូងភ្នំ ហើយឡើងមិនរួច ដោយសារការហូរឈាមក្រពះ ។

ប្រធាន TUMAF លោក Bulent Genc បានឲ្យដឹងថា “ក្រុមអន្តរជាតិជាច្រើន រួមទាំងក្រុម Croats និង Italians កំពុងជួយក្នុងប្រតិបត្តិការនេះ ។ Mark កំពុងជាប់ក្រោមរូងភ្នំជម្រៅប្រហែល ១ គីឡូម៉ែត្រ ដូច្នេះពួកគេកំពុងបែងចែកការចុះភ្នំជាប្រាំពីរផ្នែក” ។

Genc បាននិយាយថា “ពួកគេរំពឹង (ប្រតិបត្តិការជួយសង្គ្រោះ) នឹងចំណាយពេល ១០ ថ្ងៃ ឬខ្លីជាងនេះ បើបុរសនោះប្រសើរជាងមុន ។ គួរជម្រាបថា ឥលូវនេះ Mark អាចឈរដោយខ្លួនឯងបានហើយ ៕

ប្រែសម្រួល៖ វារី

ប្រភព៖ newyorkpost

ចុចអាន៖ រូងភ្នំស្អាតដូចឋានសួគ៌ ៧ កន្លែងជុំវិញពិភពលោក ឃើញហើយចំហមាត់

The post អ្នកវិទ្យាសាស្ត្រអាមេរិក ជាប់នៅក្រោមដីប្រហែល ១ គីឡូម៉ែត្រ ដោយសារជំងឺ appeared first on Kampuchea Thmey Daily.

អាហារូបករណ៍សម្រាប់សិស្សនារី SHE-CAN បើកទទួលពាក្យហើយ!

អុន ស្រីមាន — Sun, 09 Jul 2023 00:31:00 +0000

អាហារូបករណ៍របស់សហរដ្ឋអាមេរិក ដែលមានឈ្មោះថា SHE-CAN ចាប់ផ្តើមបើកទទួលពាក្យនៅខែកក្កដា និងឈប់ទទួលពាក្យថ្ងៃទី១៥ ខែតុលា ឆ្នាំ២០២៣នេះ ជាមួយនឹងអត្ថប្រយោជន៍ជាច្រើនសម្រាប់ការសិក្សានៅអាមេរិក។

ប្រភព៖ SHE-CAN

អាហារូបករណ៍ SHE-CAN មានមូលដ្ឋាននៅសហរដ្ឋអាមេរិក ដែលជាកម្មវិធីភាពជាអ្នកដឹកនាំមួយ ផ្តល់ឱ្យនិស្សិតស្រ្តីឆ្នើមនៅកម្ពុជា អាចមានឱកាសទៅបន្តការសិក្សានៅមហាវិទ្យាល័យសហរដ្ឋអាមេរិក។ SHE-CAN ផ្តល់ជាប្រាក់ឧបត្ថម្ភ វគ្គបណ្តុះបណ្តាលភាពជាអ្នកដឹកនាំ ការណែនាំ និងការគាំទ្រអាជីព ដើម្បីរៀបចំពួកគេត្រឡប់មកកម្ពុជាវិញជាមួយនឹងភាពជាអ្នកដឹកនាំល្អ។ ក្រៅពីការផ្តល់ជូននេះ អាហារូបករណ៍នេះ ក៏ផ្តោតសំខាន់លើស្ត្រីដែលមកពីជីវភាពខ្វះខាត និងមានមហិច្ឆតាខ្ពស់ក្នុងការសិក្សា ក៏ដូចជា មានភាពជាអ្នកដឹកនាំនៅក្នុងខ្លួនរបស់ពួកគេ។

លក្ខខណ្ឌទទួលបានអាហារូបករណ៍មានដូចជា៖

ជានិស្សិតស្រ្តីមានអាយុពី ១៧ ដល់២០ឆ្នាំ មានមហិច្ឆតាខ្ពស់ក្នុងការផ្លាស់ប្តូរការសិក្សា
បញ្ចប់អនុវិទ្យាល័យមុនខែមករា ឆ្នាំ២០២៤
មកពីគ្រួសារមានប្រាក់ចំណូលទាប
អាចមានពេលចូលរួមវគ្គបណ្តុះបណ្តាលនៅភ្នំពេញ
ចាប់អារម្មណ៍សិក្សានៅអាមេរិក (សម្រាប់តែនិស្សិតមិនទាន់បញ្ចប់ការសិក្សានៅសាកលវិទ្យាល័យ)
ធ្លាប់ធ្វើជាអ្នកដឹកនាំនៅសាលា ឬ សហគមន៍ពួកគេរួចហើយ (ប្រធានថ្នាក់…)
មានភាសាអង់គ្លេសខ្លាំង (និយាយ សរសេរ អាន ស្តាប់… អាចប្រើប្រាស់ផ្លូវការបាន)
ជាសិស្សពូកែ មានចំណាត់ថ្នាក់ល្អ
មិនអនុញ្ញាតិឱ្យធ្វើការពេញម៉ោងកំឡុងពេលនោះ។

ប្រភព៖ SHE-CAN

SHE-CAN ទទួលពាក្យសម្រាប់តែបេក្ខនារីណាដែលបានបំពេញឯកសារគ្រប់ចំនួនតាមលក្ខខណ្ឌរបស់កម្មវិធី ដោយមិនមានការស្នើសុំពន្យាពេលឡើយ។ ឯកសារដែលចាំបាច់ត្រូវមានគឺ របាយការណ៍ពិន្ទុប្រឡងថ្នាក់ជាតិជា PDF (ប្រសិនបើមិនទាន់ប្រឡង ឬ មិនទាន់ទទួលពិន្ទុទេ ត្រូវធ្វើរបាយការណ៍ជាលាយលក្ខណ៍អក្សរ)។ ព្រឹត្តិបត្រពិន្ទុ ថ្នាក់ទី១០ ១១ និងទី១២ ជាទម្រង់ PDF។ ព្រឹត្តិបត្រពិន្ទុនៅសាកលវិទ្យាល័យជាទម្រង់ PDF និងបកប្រែជាភាសាអង់គ្លេស ប្រសិនបើពិន្ទុនោះជាភាសាខ្មែរ។ ព័ត៌មានលម្អិត សូមចូលតាមរយៈតំណភ្ជាប់ (https://shecan.hire.trakstar.com/jobs/fk0xcmq) និង (https://shecan.global/scholars/apply-to-be-a-scholar)។

សូមជម្រាបថា សម្រាប់អាហារូបករណ៍ឆ្នាំ២០២៣-២០២៤ នេះ មិនត្រឹមតែផ្តល់ជូនឱ្យកម្ពុជាប៉ុណ្ណោះទេ ក៏ត្រូវបានផ្តល់ជូនប្រទេស Guatemala និង Liberia ផងដែរ៕

The post អាហារូបករណ៍សម្រាប់សិស្សនារី SHE-CAN បើកទទួលពាក្យហើយ! appeared first on Kampuchea Thmey Daily.

អ៊ីរ៉ង់ តវ៉ាជាមួយ FIFA ជុំវិញអាមេរិក ដកពាក្យ “Allah” ចេញពីទង់ជាតិរបស់ខ្លួន

អ៊ិន ពិសី — Mon, 28 Nov 2022 08:39:21 +0000

សហព័ន្ធបាល់ទាត់អ៊ីរ៉ង់ ថ្កោលទោស “ទង្វើគ្មានវិជ្ជាជីវៈ” នៅពេលស្ថាប័នបាល់ទាត់អាមេរិក ប្រើប្រាស់ទង់ជាតិដែលបានកែប្រែក្នុងការបង្ហោះតាមប្រព័ន្ធផ្សព្វផ្សាយសង្គម។

សហព័ន្ធកីឡាបាល់ទាត់របស់ប្រទេសអ៊ីរ៉ង់និយាយថា ខ្លួនបានដាក់ពាក្យបណ្ដឹងទៅ FIFA ជុំវិញការដកពាក្យ “Allah” ចេញពីទង់ជាតិរបស់សាធារណរដ្ឋអ៊ីស្លាម នៅលើការបង្ហោះតាមប្រព័ន្ធផ្សព្វផ្សាយសង្គម ដោយគូប្រកួតរបស់ខ្លួនសហរដ្ឋអាមេរិក មុនពេលការប្រកួតបាល់ទាត់ពិភពលោក នាពេលខាងមុខរវាងប្រទេសទាំងពីរ។

ទីភ្នាក់ងារសារព័ត៌មានរដ្ឋ IRNA បានរាយការណ៍កាលពីថ្ងៃអាទិត្យថា “នៅក្នុងទង្វើដែលគ្មានវិជ្ជាជីវៈ ទំព័រ Instagram របស់សហព័ន្ធបាល់ទាត់អាមេរិក បានដកនិមិត្តសញ្ញាព្រះអាឡស់ចេញពីទង់ជាតិអ៊ីរ៉ង់”។ សហព័ន្ធកីឡាបាល់ទាត់អ៊ីរ៉ង់ បានផ្ញើអ៊ីមែលទៅ FIFA ដើម្បីទាមទារឲ្យវាចេញការព្រមានធ្ងន់ធ្ងរដល់សហព័ន្ធអាមេរិក។

មិនមានការឆ្លើយតបជាសាធារណៈភ្លាមៗពីស្ថាប័នគ្រប់គ្រងកីឡាបាល់ទាត់ពិភពលោកចំពោះពាក្យបណ្ដឹងដែលរាយការណ៍នោះទេ បានកើតឡើងពេលសហរដ្ឋអាមេរិក ត្រៀមប្រឈមមុខជាមួយនឹងអ៊ីរ៉ង់ ក្នុងការប្រកួតកាត់សេចក្ដីក្រុមឡើងវគ្គបន្ត នៃ World Cup ថ្ងៃអង្គារ ហើយវាគឺជាការប្រកួតរងបន្ទុករួចទៅហើយដោយភាពជាសត្រូវរាប់ទសវត្សរ៍រវាងប្រទេស។ សហរដ្ឋអាមេរិក និងអ៊ីរ៉ង់ បានកាត់ផ្ដាច់ទំនាក់ទំនងការទូតនៅឆ្នាំ ១៩៨០។

ការបង្ហាញ នៃ”ការគាំទ្រ” សម្រាប់ការតវ៉ារបស់អ៊ីរ៉ង់

សហព័ន្ធបាល់ទាត់សហរដ្ឋអាមេរិក (USSF) បាននិយាយនៅក្នុងសេចក្ដីថ្លែងការណ៍មួយកាលពីព្រឹកថ្ងៃអាទិត្យថា ខ្លួនបានសម្រេចចិត្តបោះបង់ចោលទង់ជាតិផ្លូវការនៅលើគណនីប្រព័ន្ធផ្សព្វផ្សាយសង្គមក្នុងការបង្ហាញសាមគ្គីភាពជាមួយ “ស្ត្រីនៅក្នុងប្រទេសអ៊ីរ៉ង់ដែលតស៊ូដើម្បីសិទ្ធិមនុស្សជាមូលដ្ឋាន” បន្ទាប់ពីមរណភាពនេះ។ ស្ត្រីជនជាតិអ៊ីរ៉ង់ អាយុ ២២ ឆ្នាំ Mahsa Amini នៅក្នុងការឃុំឃាំងរបស់ប៉ូលិស។

ទង់ជាតិ នៃសាធារណរដ្ឋឥស្លាមមានខ្សែផ្ដេកចំនួនបីជាពណ៌ក្រហម ស និងបៃតង ជាមួយនឹងពាក្យថា “Allah” លេចឡើងជាអក្សររចនានៅកណ្ដាល។

នៅរសៀលថ្ងៃអាទិត្យ ទង់ធម្មតាដែលមាននិមិត្តសញ្ញាត្រូវបានផ្លាស់ប្ដូរឡើងវិញនៅក្នុងបដា Twitter ហើយការបង្ហោះ Facebook និង Instagram ដែលមានទង់ជាតិត្រូវបានផ្លាស់ប្ដូរត្រូវបានដកចេញ។

សហព័ន្ធបាននិយាយថា “យើងចង់បង្ហាញការគាំទ្ររបស់យើងចំពោះស្ត្រីនៅក្នុងប្រទេសអ៊ីរ៉ង់ ជាមួយនឹងក្រាហ្វិករបស់យើងសម្រាប់រយៈពេល ២៤ ម៉ោង”។

អង្គការសហប្រជាជាតិបាននិយាយថា មនុស្សជាង ៣០០ នាក់ ត្រូវបានសម្លាប់ចំពេលមានការបង្ក្រាបលើការតវ៉ាដែលបានផ្ទុះឡើងបន្ទាប់ពីការស្លាប់របស់ Amini ក្នុងខែកញ្ញា ហើយមនុស្សប្រហែល ១៤,០០០ នាក់ ត្រូវបានចាប់ខ្លួន រួមទាំងកុមារផងដែរ។ អ៊ីរ៉ង់ បានចោទអាមេរិក និងរដ្ឋបរទេសផ្សេងទៀតថា បានបង្កបាតុកម្មដោយគ្មានភស្តុតាង៕

ប្រភព ៖ aljazeera.com

អត្ថបទ ៖ មន្នីរ័ត្ន

The post អ៊ីរ៉ង់ តវ៉ាជាមួយ FIFA ជុំវិញអាមេរិក ដកពាក្យ “Allah” ចេញពីទង់ជាតិរបស់ខ្លួន appeared first on Kampuchea Thmey Daily.

អាមេរិក Archives - Kampuchea Thmey Daily

វៀតណាម​រំពឹង​ការវិនិយោគបន្ថែម​ពី​ក្រុមហ៊ុនអាមេរិក​ និង​សម្ព័ន្ធមិត្ត​ ក្នុង​អាណត្តិថ្មីរបស់​ ត្រាំ

ប្រមុខបក្សកុម្មុយនិស្តវៀតណាម​ និង​ ត្រាំ​ ពិភាក្សាគ្នា​លើទំនាក់ទំនង​សេដ្ឋកិច្ច

ម៉ិកស៊ិកព្រមានពី​លទ្ធភាពដាក់​ពន្ធ​សងសឹក​ ប្រឆាំង​នឹង​អាមេរិក​