អាវុធនុយក្លេអ៊ែរ Archives - Kampuchea Thmey Daily

រុស្ស៊ី ៖ អាវុធនុយក្លេអ៊ែរ ជាការធានាតែមួយគត់ ដើម្បីទប់ស្កាត់សង្គ្រាមលោក

សាង ស្រីល័ក្ខ — Thu, 25 Jun 2026 11:03:00 +0000

អ្នកនាំពាក្យវិមានក្រឹមឡាំង លោក Dmitry Peskov បានប្រកាសកាលពីថ្ងៃទី២៤ ខែមិថុនា ថា អាវុធនុយក្លេអ៊ែរគឺជា «ខែលការពារតែមួយគត់» ដែលនឹងទប់ស្កាត់ពិភពលោក កុំឲ្យធ្លាក់ចូលទៅក្នុងសង្គ្រាមសកល ចំពេលមានការភ័យខ្លាចអំពីការរត់ប្រណាំងសព្វាវុធថ្មី រវាងប្រទេសជាច្រើន។ យោង សារព័ត៌មាន thehindu ។

អ្នកនាំពាក្យវិមានក្រឹមឡាំង លោក Dmitry Peskov (រូបភាព៖Reuters)

នៅក្នុងការថ្លែងទៅកាន់វេទិកាវិទ្យាសាស្ត្រ និងអ្នកជំនាញអន្តរជាតិ Primakov លើកទី១២ កាលពីថ្ងៃទី២៤ ខែមិថុនា លោក Peskov បានគូសបញ្ជាក់ថា «បច្ចុប្បន្ន សន្តិសុខសកលលោកកំពុងតែធ្លាក់ចុះលើទិដ្ឋភាពជាច្រើន។ តាមពិតទៅ ពិភពលោកនាពេលបច្ចុប្បន្ន គឺគ្មានអ្វីក្រៅពីការការពារដោយនុយក្លេអ៊ែរនោះឡើយ។ នេះគឺជាកត្តាតែមួយគត់ ដែលកំពុងការពារពិភពលោកពីសង្គ្រាមលោក»។

ទោះជាយ៉ាងណាក៏ដោយ អ្នកនាំពាក្យវិមានក្រឹមឡាំងរូបនេះបានសង្កត់ធ្ងន់ថា ការការពារដោយនុយក្លេអ៊ែរមិនអាចបង្ការជម្លោះក្នុងតំបន់បាននោះទេ ហើយហានិភ័យនៃជម្លោះតូចៗបែបនេះកំពុងតែបន្តកើនឡើង។ លោក Peskov ក៏បានបន្ថែមទៀតថា អង្គការដោះស្រាយវិបត្តិពហុភាគី ក៏ដូចជាប្រព័ន្ធទំនាក់ទំនងអន្តរជាតិទាំងមូល កំពុងតែបាត់បង់តម្លៃ និងឥទ្ធិពលរបស់ខ្លួនជាបណ្តើរៗហើយ។

លោកបាននិយាយទៀតថា វាច្បាស់ណាស់ថា សណ្តាប់ធ្នាប់ពិភពលោកបច្ចុប្បន្ន មិនថាតែការដួលរលំ ឬកំពុងឆ្លងកាត់ការផ្លាស់ប្តូរយ៉ាងស៊ីជម្រៅនោះទេ ប៉ុន្តែក្នុងពេលជាមួយគ្នានេះ ប្រព័ន្ធទំនាក់ទំនងអន្តរជាតិទាំងមូលក៏កំពុងតែធ្លាក់ចុះតម្លៃដូចគ្នាដែរ។ មិនតែប៉ុណ្ណោះ ប្រព័ន្ធសេដ្ឋកិច្ចអន្តរជាតិ ក៏ដូចជាតួនាទីរបស់រូបិយប័ណ្ណបម្រុងសំខាន់ៗរបស់ពិភពលោក ក៏កំពុងតែធ្លាក់ចុះឥទ្ធិពលផងដែរ។

ដោយឡែក ងាកមកកាន់សន្ធិសញ្ញាគ្រប់គ្រងអាវុធនុយក្លេអ៊ែរចុងក្រោយបង្អស់រវាងប្រទេសរុស្ស៊ី និងសហរដ្ឋអាមេរិក ដែលមានឈ្មោះថា «New START» បានផុតកំណត់កាលពីខែកុម្ភៈ ដោយការផុតកំណត់នេះ បានដកចេញនូវរាល់ការរឹតត្បិតទៅលើមហាអំណាចនុយក្លេអ៊ែរធំៗទាំងពីររបស់ពិភពលោក។ រហូតមកដល់ពេលនេះ មិនទាន់មានសញ្ញាណាមួយបង្ហាញថា ភាគីទាំងសងខាងមានចំណាត់ការក្នុងការបន្តសុពលភាព ឬជំនួសកិច្ចព្រមព្រៀងនេះនៅឡើយទេ បើទោះបីជាភាគីទាំងពីរបានយល់ព្រមបង្កើតការចរចាយោធាកម្រិតខ្ពស់ឡើងវិញក៏ដោយ។

យ៉ាងណាមិញ ការផុតកំណត់នៃសន្ធិសញ្ញា New START ដោយគ្មានកិច្ចព្រមព្រៀងថ្មីមកជំនួស បានធ្វើឲ្យពិភពលោកធ្លាក់ចូលទៅក្នុង «សុបិនអាក្រក់នៃសម័យសង្គ្រាមត្រជាក់» សារជាថ្មី ដែលប្រទេសមហាអំណាចនានានឹងចាប់ផ្តើមប្រកួតប្រជែងគ្នាលាក់កំបាំង និងផលិតអាវុធប្រល័យលោកជាការរត់ប្រណាំងដោយគ្មានការត្រួតពិនិត្យពីអន្តរជាតិ៕

អត្ថបទ ៖ សាង ស្រីល័ក្ខ

The post រុស្ស៊ី ៖ អាវុធនុយក្លេអ៊ែរ ជាការធានាតែមួយគត់ ដើម្បីទប់ស្កាត់សង្គ្រាមលោក appeared first on Kampuchea Thmey Daily.

កូរ៉េខាងជើងថ្កោលទោសប្រទេស G7 លើការអំពាវនាវឱ្យទីក្រុងព្យុងយ៉ាង រំសាយអាវុធនុយក្លេអ៊ែរ

Minea Neu — Fri, 19 Jun 2026 10:52:00 +0000

កូរ៉េខាងជើង បានថ្កោលទោសក្រុមប្រទេសសេដ្ឋកិច្ចជឿនលឿនទាំង៧ របស់ពិភពលោក(G7) ចំពោះ ការអំពាវនាវឱ្យមានការរំសាយអាវុធនុយក្លេអ៊ែរ ដោយមន្ត្រីជាន់ខ្ពស់ លោកស្រី គីម យ៉ូជុង ពិពណ៌នាពីការទាមទារនេះ ថាជាការរំលោភលើអធិបតេយ្យភាព និងសណ្តាប់ធ្នាប់រដ្ឋធម្មនុញ្ញប្រទេសខ្លួន។ នេះបើយោងតាមទីភ្នាក់ងារសារព័ត៌មានកណ្តាលកូរ៉េខាងជើង (KCNA) នៅថ្ងៃទី១៨ ខែមិថុនា ឆ្នាំ២០២៦ ។

យោងតាមសេចក្តីថ្លែងការណ៍មួយ ចេញផ្សាយនៅល្ងាចថ្ងៃព្រហស្បតិ៍ លោកស្រី គីម យ៉ូជុង ជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក គីម ជុងអ៊ុន និយាយថា៖ « ឋានៈរបស់ទីក្រុងព្យុងយ៉ាងជារដ្ឋមានអាវុធនុយក្លេអ៊ែរ គឺជាការពិត ដែលមិនអាចត្រឡប់ក្រោយវិញបានទេ ទោះក្នុងកាលៈទេសៈណាក៏ដោយ»។

មន្ត្រីជាន់ខ្ពស់កូរ៉េខាងជើង លោកស្រី គីម យ៉ូជុង។ រូបភាព៖ Reuters

លោកស្រី ថា ឃ្លាំងអាវុធនុយក្លេអ៊ែររបស់កូរ៉េខាងជើងគឺជាផលប្រយោជន៍ជាតិស្នូល ហើយបម្រើជាការរារាំងការពារខ្លួនប្រឆាំងនឹង ការគំរាមកំហែងឥតឈប់ឈរពីប្រទេសអរិភាព។

លោកស្រី គីម ព្រមានថា៖ « ការប៉ុនប៉ងបំផ្លាញឋានៈនុយក្លេអ៊ែររបស់ប្រទេសកូរ៉េខាងជើងស្មើនឹងនាំឱ្យមានគ្រោះមហន្តរាយ»។

ការកត់សម្គាល់នេះធ្វើឡើងមួយថ្ងៃ បន្ទាប់ពីមេដឹកនាំ G7 បានជួបប្រជុំគ្នានៅទីក្រុង Evian ប្រទេសបារាំងក្នុងសប្តាហ៍នេះ ហើយបានបញ្ជាក់ជាថ្មីនូវការប្តេជ្ញាចិត្តរបស់ពួកគេ ចំពោះការលុបបំបាត់អាវុធនុយក្លេអ៊ែរទាំងស្រុងរបស់កូរ៉េខាងជើង ស្របតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។

គួរបញ្ជាក់ថា មេដឹកនាំ G7 បានសម្តែងការព្រួយបារម្ភអំពីកម្មវិធីនុយក្លេអ៊ែរ និងមីស៊ីលផ្លោងរបស់កូរ៉េខាងជើង ដោយបញ្ជាក់ជាថ្មីនូវការគាំទ្រចំពោះការរំសាយអាវុធនុយក្លេអ៊ែរទាំងស្រុងរបស់កូរ៉េខាងជើង។

លោកស្រី គីម បានច្រានចោលការអំពាវនាវឱ្យរំសាយអាវុធនុយក្លេអ៊ែរថា «ជារឿងហួសសម័យទាំងស្រុង» ដោយទទូចថា សម្ពាធអន្តរជាតិនឹងមិនផ្លាស់ប្តូរគោលនយោបាយនុយក្លេអ៊ែររបស់កូរ៉េខាងជើងឡើយ៕

សម្រួល៖ ណឺ មិនា

The post កូរ៉េខាងជើងថ្កោលទោសប្រទេស G7 លើការអំពាវនាវឱ្យទីក្រុងព្យុងយ៉ាង រំសាយអាវុធនុយក្លេអ៊ែរ appeared first on Kampuchea Thmey Daily.

តើរុស្ស៊ីអាចដាក់គ្រាប់នុយក្លេអ៊ែរ ក្នុងលំហអាកាសយ៉ាងដូចម្តេច?

Minea Neu — Thu, 18 Jun 2026 00:00:00 +0000

រុស្ស៊ីអាចដាក់ពង្រាយក្បាលគ្រាប់នុយក្លេអ៊ែរចូលទៅក្នុងលំហអាកាសដោយប្រើប្រាស់មីស៊ីលផ្លោងអន្តរទ្វីប (ICBM) ដើម្បីដាក់ឧបករណ៍ផ្ទុះ ឬផ្កាយរណបដើរដោយថាមពលនុយក្លេអ៊ែរចូលទៅក្នុងគន្លងផែនដីទាប។

អ្នកជំនាញយោធាអាល្លឺម៉ង់ នៅតែមានការសង្ស័យ ចំពោះការដាក់ពង្រាយនេះដោយសារតែលក្ខណៈបំផ្លិចបំផ្លាញនៃអាវុធនុយក្លេអ៊ែរដែលមានមូលដ្ឋានលើលំហអាកាស បញ្ហាប្រឈមផ្នែកបច្ចេកទេស ភស្តុភារ និងហិរញ្ញវត្ថុដ៏ធំធេងពាក់ព័ន្ធ។

អាវុធនុយក្លេអ៊ែររុស្ស៊ី។ រូបភាព៖ Reuters

សារព័ត៌មាន CNN បានចុះផ្សាយឱ្យដឹងពីរបៀបដែលរុស្ស៊ីអាចដាក់ពង្រាយក្បាលគ្រាប់នុយក្លេអ៊ែរទៅក្នុងលំហអាកាសដោយវិធីផ្សេងៗ រួមមាន៖

១. មីស៊ីលផ្លោងអន្តរទ្វីប ICBM ធុនធ្ងន់៖ រុស្ស៊ីអាចប្រើប្រាស់ប្រព័ន្ធរ៉ុក្កែតកែប្រែរួច ស្រដៀងគ្នាទៅនឹងប្រព័ន្ធប្រើសម្រាប់បាញ់បង្ហោះផ្កាយរណប ឬកម្មវិធីមីស៊ីលបើកបរដើរដោយថាមពលនុយក្លេអ៊ែរ Burevestnik ដើម្បីបញ្ជូនបន្ទុកទៅកាន់គន្លងផែនដី។

២. ផ្កាយរណបគន្លងផែនដី៖ ជំនួសឱ្យគ្រាប់បែកប្រពៃណី ឧបករណ៍នុយក្លេអ៊ែរ អាចត្រូវបានបញ្ចូលទៅក្នុងតួផ្កាយរណបសកម្ម ឬដាក់ក្នុងក្នុងគន្លងផែនដីពេលស្ងប់ស្ងាត់ ដោយរង់ចាំការធ្វើឱ្យសកម្ម។

៣. ការបំផ្ទុះអាវុធនេះនៅក្នុងគន្លងផែនដីទាប៖ ប្រទេសរុស្ស៊ីនឹងបញ្ចេញជីពចរវិទ្យុសកម្ម និងជីពចរអេឡិចត្រូម៉ាញ៉េទិច(EMP) ដោយមិនរើសទីតាំងឆ្លងកាត់លំហ៕

សម្រួល៖ ណឺ មិនា

The post តើរុស្ស៊ីអាចដាក់គ្រាប់នុយក្លេអ៊ែរ ក្នុងលំហអាកាសយ៉ាងដូចម្តេច? appeared first on Kampuchea Thmey Daily.

យោធាជាន់ខ្ពស់អាល្លឺម៉ង់ ថា រុស្ស៊ីអាចកំពុងដាក់ឧបករណ៍នុយក្លេអ៊ែរចូលក្នុងលំហអាកាស

Minea Neu — Mon, 15 Jun 2026 04:57:39 +0000

មន្ត្រីយោធាអវកាសជាន់ខ្ពស់របស់ប្រទេសអាល្លឺម៉ង់ បានលើកឡើងថា ប្រទេសរុស្ស៊ីអាចនឹងកំពុងធ្វើការលើបច្ចេកវិទ្យាដែលមានសមត្ថភាពដាក់ឧបករណ៍នុយក្លេអ៊ែរក្នុងគន្លងតារាវិថី ដោយព្រមានថា សេណារីយ៉ូបែបនេះអាចរំខានយ៉ាងធ្ងន់ធ្ងរដល់ហេដ្ឋារចនាសម្ព័ន្ធ ដែលពឹងផ្អែកលើផ្កាយរណប និងប្រព័ន្ធយោធានៅទូទាំងពិភពលោក។

យោងតាមសារព័ត៌មាន Politico និងផ្សាយបន្តដោយសារព័ត៌មាន United 24 Media នៅថ្ងៃទី១៤ ខែមិថុនា ឆ្នាំ២០២៦ លោក Michael Traut មេបញ្ជាការនៃបញ្ជាការអវកាសរបស់អាល្លឺម៉ង់និយាយថា លោកមិនអាចច្រានចោលលទ្ធភាពដែលទីក្រុងមូស្គូកំពុងបន្តសមត្ថភាពបែបនេះ[ដាក់ឧបករណ៍នុយក្លេអ៊ែរក្នុងគន្លងតារាវិថី] ជាផ្នែកមួយនៃភាពតានតឹងកើនឡើង នាពេលអនាគតនោះទេ។

លោក Michael Traut មេបញ្ជាការនៃបញ្ជាការអវកាសរបស់អាល្លឺម៉ង់។ រូបភាព៖ NZZ

លោក Traut ថ្លែងក្នុងបទសម្ភាសន៍ជាមួយសារព័ត៌មាន Politico ថា៖ « ក្នុងជម្លោះដែលកំពុងកើនឡើង មានការសង្ស័យថារុស្ស៊ីអាចកំពុងធ្វើការលើបច្ចេកវិទ្យា ដើម្បីដាក់ឧបករណ៍នុយក្លេអ៊ែរចូលទៅក្នុងគន្លងផែនដី»។

ពេលអ្នកកាសែតសួរថា តើលោកចាត់ទុកសេណារីយ៉ូបែបនេះជារឿងប្រាកដនិយមឬអត់?

លោក Traut ឆ្លើយតបថា៖ « ខ្ញុំមិនអាចបដិសេធបានទេ»។

លោក Traut បន្ថែមថា ផលវិបាកនៃការបំផ្ទុះនុយក្លេអ៊ែរ ក្នុងលំហអាកាសនឹងខុសគ្នាយ៉ាងខ្លាំងពីការវាយប្រហារនុយក្លេអ៊ែរធម្មតា នៅលើផែនដី ប៉ុន្តែអាចមានផលប៉ះពាល់យ៉ាងធំធេងទៅលើសង្គមសម័យទំនើបដែលពឹងផ្អែកលើផ្កាយរណបសម្រាប់ការទំនាក់ទំនង ការរុករក សេវាធនាគារ ការដឹកជញ្ជូន ការព្យាករណ៍អាកាសធាតុ និងប្រតិបត្តិការយោធា។

មេបញ្ជាការអាល្លឺម៉ង់រូបនេះ បានចង្អុលបង្ហាញពីការសាកល្បងនុយក្លេអ៊ែរ Starfish Prime របស់សហរដ្ឋអាមេរិកធ្វើឡើង ក្នុងឆ្នាំ១៩៦២ ជាឧទាហរណ៍មួយ អំពីរបៀបដែលការផ្ទុះនុយក្លេអ៊ែររយៈកម្ពស់ខ្ពស់អាចប៉ះពាល់ដល់ផ្កាយរណប និងហេដ្ឋារចនាសម្ព័ន្ធអវកាស។

យោងតាមសារព័ត៌មាន Politico លោក Traut ព្រមានថា ព្រឹត្តិការណ៍ស្រដៀងគ្នានេះ នៅថ្ងៃនេះ អាចធ្វើឱ្យផ្កាយរណបទាំងអស់ដែលដំណើរការក្នុងគន្លងផែនដីទាប មិនអាចដំណើរការបានរហូតដល់មួយភាគបីក្នុងរយៈពេលប៉ុន្មានសប្តាហ៍ និងខែបន្ទាប់។

បទសម្ភាសន៍នេះកើតឡើង ចំពេលមានការព្រួយបារម្ភកាន់តែខ្លាំងឡើងក្នុងចំណោមរដ្ឋាភិបាលលោកខាងលិចអំពីការគំរាមកំហែងដល់ប្រព័ន្ធដែលមានមូលដ្ឋានលើលំហ។

លោក Traut បន្តថា ហានិភ័យទាក់ទងនឹងលំហបានពង្រីក នៅក្នុងប៉ុន្មានឆ្នាំថ្មីៗនេះ ចាប់ពីការកកស្ទះប្រព័ន្ធ GPS និងការជ្រៀតជ្រែកឡាស៊ែរ រហូតដល់ការវាយប្រហារដោយផ្ទាល់លើផ្កាយរណប។

លោក Traut បន្ថែមថា៖ « ឧទាហរណ៍ដ៏ល្អបំផុតគឺការកកស្ទះ GPS នៅក្នុងតំបន់បាល់ទិក។ ការរំខានទាំងនេះប៉ះពាល់ទាំងអាកាសចរណ៍ស៊ីវិល និងចរាចរណ៍ផ្លូវសមុទ្រ»៕

សម្រួល៖ ណឺ មិនា

The post យោធាជាន់ខ្ពស់អាល្លឺម៉ង់ ថា រុស្ស៊ីអាចកំពុងដាក់ឧបករណ៍នុយក្លេអ៊ែរចូលក្នុងលំហអាកាស appeared first on Kampuchea Thmey Daily.

អឺរ៉ុប-កូរ៉េខាងត្បូង៖ កូរ៉េខាងជើងនឹងមិនត្រូវទទួលស្គាល់ ជារដ្ឋមានអាវុធនុយក្លេអ៊ែរទេ

Minea Neu — Fri, 12 Jun 2026 03:57:48 +0000

កូរ៉េខាងត្បូងនិងសហភាពអឺរ៉ុប បានឯកភាពគ្នាលើកឡើងថា កូរ៉េខាងជើងនឹងមិនត្រូវបានទទួលស្គាល់ជារដ្ឋមានអាវុធនុយក្លេអ៊ែរឡើយ ដោយបញ្ជាក់ជាថ្មីនូវការប្តេជ្ញាចិត្តរបស់ពួកគេ ចំពោះការរំសាយអាវុធនុយក្លេអ៊ែរ ប៉ុន្មានថ្ងៃបន្ទាប់ពីប្រមុខដឹកនាំចិននិងកូរ៉េខាងជើង បានសន្យាថា នឹងភ្ជាប់ទំនាក់ទំនងកាន់តែជិតស្និទ្ធ ក្នុងកិច្ចប្រជុំកំពូលមួយដោយមិននិយាយជាសាធារណៈអំពីបញ្ហានុយក្លេអ៊ែរ។ នេះបើយោងតាមសារព័ត៌មាន Bloomberg ផ្សាយថ្ងៃទី១១ ខែមិថុនា ឆ្នាំ២០២៦ ។

លោក Lee Jae Myung, លោកស្រី Ursula von der Leyen និង លោក Antonio Costa ! រូបភាព៖ Reuters

ប្រធានាធិបតីកូរ៉េខាងត្បូង លោក Lee Jae Myung បានជួបពិភាក្សាជាមួយប្រធានគណៈកម្មការអឺរ៉ុប លោកស្រី Ursula von der Leyen និងប្រធានក្រុមប្រឹក្សាអឺរ៉ុប លោក Antonio Costa កាលពីថ្ងៃពុធ នៅទីក្រុងព្រុចសែល ដែលភាគីទាំងពីរបានយល់ព្រមបង្កើនទំនាក់ទំនងការពារជាតិ រួមទាំងកិច្ចខិតខំប្រឹងប្រែង ដើម្បីសម្រួលដល់ការផ្លាស់ប្តូរព័ត៌មានសម្ងាត់។

សហភាពអឺរ៉ុប និងកូរ៉េខាងត្បូងនិយាយនៅក្នុងសេចក្តីថ្លែងការណ៍រួមមួយ ដោយសំដៅទៅលើឈ្មោះផ្លូវការរបស់កូរ៉េខាងជើង គឺសាធារណរដ្ឋប្រជាធិបតេយ្យប្រជាមានិតកូរ៉េ ថា៖ « កូរ៉េខាងជើងនឹងមិនត្រូវបានទទួលយកជារដ្ឋអាវុធនុយក្លេអ៊ែរឡើយ»។

មីស៊ីលកូរ៉េខាងជើង។ រូបភាព៖ Reuters

សេចក្តីថ្លែងការណ៍ធ្វើឡើង បន្ទាប់ពីកិច្ចប្រជុំរវាងមន្ត្រីសហរដ្ឋអាមេរិក និងជប៉ុននៅទីក្រុងតូក្យូកាលពីដើមសប្តាហ៍នេះ ដែលពួកគេបានបញ្ជាក់ជាថ្មីនូវការប្តេជ្ញាចិត្តក្នុងការស្វែងរកការរំសាយអាវុធនុយក្លេអ៊ែររបស់កូរ៉េខាងជើង។

គួរបញ្ជាក់ថា កូរ៉េខាងត្បូង និងសហភាពអឺរ៉ុបក៏បានថ្កោលទោសលើកិច្ចសហប្រតិបត្តិការយោធារវាងរុស្ស៊ី និងកូរ៉េខាងជើងផងដែរ។

មេដឹកនាំអឺរ៉ុបជំរុញឱ្យប្រធានាធិបតីរុស្ស៊ី វ្ល៉ាឌីមៀ ពូទីន យល់ព្រមលើបទឈប់បាញ់ជាបន្ទាន់ និងពេញលេញ បន្ទាប់ពីបដិសេធការអំពាវនាវរបស់ប្រធានាធិបតីអ៊ុយក្រែន លោក ហ្សេលេនស្គី ជួបប្រជុំនិងចរចាបញ្ចប់សង្គ្រាមដែលបានចាប់ផ្តើមជាងបួនឆ្នាំមកនេះ ៕

សម្រួល៖ ណឺ មិនា

The post អឺរ៉ុប-កូរ៉េខាងត្បូង៖ កូរ៉េខាងជើងនឹងមិនត្រូវទទួលស្គាល់ ជារដ្ឋមានអាវុធនុយក្លេអ៊ែរទេ appeared first on Kampuchea Thmey Daily.

ប្រទេសមាននុយក្លេអ៊ែរទាំង៩ បានចំណាយកើនឡើងយ៉ាងខ្លាំងលើអាវុធនុក្លេអ៊ែរ ក្នុងឆ្នាំមុន

Minea Neu — Tue, 09 Jun 2026 03:27:28 +0000

ប្រទេសដែលមានអាវុធនុយក្លេអ៊ែរ បានបង្កើនការចំណាយរបស់ពួកគេលើកម្មវិធីអាវុធបរមាណូដល់ទៅមួយភាគប្រាំ ដល់ជិត ១១៩ប៊ីលានដុល្លារ ដែលជាកម្រិតខ្ពស់បំផុតមិនធ្លាប់មាន ដោយមានគម្រោងបង្កើនការវិនិយោគអស់រយៈពេលជាច្រើនទសវត្សរ៍មកហើយ។ នេះបើយោងតាមអ្នកធ្វើយុទ្ធនាការលើកឡើងកាលពីថ្ងៃអង្គារ និងចុះផ្សាយដោយភ្នាក់ងារសារព័ត៌មាន AFP នៅថ្ងៃទី៩ ខែមិថុនា ឆ្នាំ២០២៦ ។

យោងតាមរបាយការណ៍ថ្មីមួយពីយុទ្ធនាការអន្តរជាតិ ដើម្បីលុបបំបាត់អាវុធនុយក្លេអ៊ែរ (ICAN) រដ្ឋដែលមានអាវុធនុយក្លេអ៊ែរចំនួន៩ លើពិភពលោក បានបង្កើនការចំណាយរបស់ពួកគេលើឃ្លាំងអាវុធ ជិត ១៧ប៊ីលានដុល្លារ កាលពីឆ្នាំមុន។

អាវុធនុយក្លេអ៊ែររបស់រុស្ស៊ី។ រូបភាព៖ Reuters

របាយការណ៍ ICAN ព្រមានថា៖ « ពេលមានភាពតានតឹងផ្នែកភូមិសាស្ត្រនយោបាយកាន់តែខ្លាំង ការរត់ប្រណាំងអាវុធនុយក្លេអ៊ែរថ្មីមួយកំពុងកើតមាន ដែលអ្នករំលោភបំពានកំពុងរៀបចំឡើង បន្តអស់រយៈពេលជាច្រើនទសវត្សរ៍មកហើយ»។

លោកស្រី Susi Snyder នាយិកាកម្មវិធីរបស់ ICAN និងជាសហអ្នកនិពន្ធរបាយការណ៍ និយាយថា៖ « ការកើនឡើងនេះ រួមជាមួយនឹងការភ័យខ្លាចថា បញ្ញាសិប្បនិម្មិត(AI) អាចបង្កើនហានិភ័យនៃការប្រើប្រាស់អាវុធនុយក្លេអ៊ែរ គឺជារឿងគួរឱ្យព្រួយបារម្ភយ៉ាងខ្លាំង»។

លោកស្រី ប្រាប់ AFP ថា៖ «និយាយឱ្យត្រង់ទៅ ខ្ញុំភ័យខ្លាចណាស់»។

ការសិក្សានោះ បង្ហាញថា រដ្ឋដែលមានអាវុធនុយក្លេអ៊ែរទាំងអស់ មាន ចក្រភពអង់គ្លេស ចិន បារាំង ឥណ្ឌា អ៊ីស្រាអែល កូរ៉េខាងជើង ប៉ាគីស្ថាន រុស្ស៊ី និងសហរដ្ឋអាមេរិក បានបង្កើនការចំណាយរបស់ពួកគេកាលពីឆ្នាំមុន។

របាយការណ៍ដដែល បានបង្ហាញថា ទីក្រុងវ៉ាស៊ីនតោន បានចំណាយខ្ពស់ជាងប្រទេសដទៃទៀតទាំងអស់រួមបញ្ចូលគ្នា ដោយចំណាយចំនួន ៦៩.២ប៊ីលានដុល្លារលើអាវុធនុយក្លេអ៊ែរក្នុងឆ្នាំ២០២៥ កើនឡើង ១២.៤ប៊ីលានដុល្លារកាលពីមួយឆ្នាំមុន។

ដោយឡែក ប្រទេសចិន ត្រូវគេប៉ាន់ប្រមាណថាបានចំណាយប្រាក់ចំនួន ១៣.៥ពាន់លានដុល្លារកាលពីឆ្នាំមុន បន្ទាប់មកចក្រភពអង់គ្លេស ១២.៦ប៊ីលាន និងរុស្ស៊ី ៩.៥ប៊ីលាន។

ក្នុងរយៈពេលប្រាំឆ្នាំកន្លងមកនេះ ICAN ជាស្ថាប័នឈ្នះរង្វាន់ណូបែលសន្តិភាពឆ្នាំ២០១៧ រកឃើញថាប្រទេសទាំង៩ បានចំណាយប្រាក់ជាង ៤៧០ប៊ីលានដុល្លារលើឃ្លាំងអាវុធរបស់ពួកគេ។ ការវិនិយោគទាំងនោះត្រូវបានគេរំពឹងថានឹងកើនឡើងនៅពេលអនាគត។

ការចំណាយលើអាវុធនុយក្លេអ៊ែររបស់សហរដ្ឋអាមេរិកក្នុងរយៈពេលមួយទសវត្សរ៍រវាងឆ្នាំ ២០២៥ និង ២០៣៤ ត្រូវបានព្យាករថាមានចំនួនជិត ១ទ្រីលានដុល្លារ។

អ្នកស្រាវជ្រាវនិយាយថា ចំនួនទឹកប្រាក់ដ៏ច្រើនសន្ធឹកសន្ធាប់ដែលកំពុងចំណាយគឺពិតជាគួរឱ្យភ្ញាក់ផ្អើល ជាពិសេសពេលប្រព័ន្ធមនុស្សធម៌សកលកំពុងរងផលប៉ះពាល់ពីការកាត់បន្ថយថវិកាយ៉ាងខ្លាំង។

លោកស្រី Snyder ចង្អុលបង្ហាញថា៖ « ទឹកប្រាក់ដែលប្រទេសទាំងនោះបានចំណាយក្នុងឆ្នាំ២០២៥ អាចចំណាយលើថវិកាប្រតិបត្តិការរបស់អង្គការសហប្រជាជាតិរយៈពេល ៣២ឆ្នាំ។ ការចំណាយលើអាវុធនុយក្លេអ៊ែរតែមួយថ្ងៃ កាលពីឆ្នាំមុនអាចផ្តល់សន្តិសុខស្បៀងដល់មនុស្សជាងពីរលាននាក់»៕

សម្រួល៖ ណឺ មិនា

The post ប្រទេសមាននុយក្លេអ៊ែរទាំង៩ បានចំណាយកើនឡើងយ៉ាងខ្លាំងលើអាវុធនុក្លេអ៊ែរ ក្នុងឆ្នាំមុន appeared first on Kampuchea Thmey Daily.

ក្រុមអ្នកឃ្លាំមើល៖ ក្បាលនុយក្លេអ៊ែររុះរើថ្មីច្រើនពាន់គ្រាប់ ត្រូវបានដាក់ពង្រាយ ដោយប្រទេសមហាអំណាច

Minea Neu — Mon, 08 Jun 2026 02:41:40 +0000

ក្រុមអ្នកស្រាវជ្រាវតាមដានការរត់ប្រណាំងសព្វាវុធ បានព្រមាននៅពីថ្ងៃចន្ទ នេះ ថា រដ្ឋដែលកាន់កាប់អាវុធនុយក្លេអ៊ែរ កំពុងទាញយកអាវុធរបស់ពួកគេចេញពីឃ្លាំង ហើយដាក់នៅលើប្រព័ន្ធដឹកជញ្ជូន ខណៈអាវុធមហាប្រល័យ [អាវុធនុយក្លេអ៊ែរ] ក៏កំពុងដើរតួនាទីកាន់តែខ្លាំងឡើងនៅក្នុងនយោបាយសកល។

វិទ្យាស្ថានស្រាវជ្រាវសន្តិភាពអន្តរជាតិស្តុកហូម (SIPRI) ដែលមានមូលដ្ឋាននៅប្រទេសស៊ុយអែត បាននិយាយថា មហាអំណាចនុយក្លេអ៊ែរពិភពលោក មានក្បាលគ្រាប់នុយក្លេអ៊ែរសរុបប្រមាណ ១២ ១៨៧គ្រាប់ ក្នុងនោះប្រមាណ ៩ ៧៤៥គ្រាប់ ស្ថិតក្នុងស្តុកសម្រាប់ការប្រើប្រាស់ដ៏មានសក្តានុពល ឬអាចត្រូវបានដាក់ពង្រាយរួចហើយ។

រុស្ស៊ីធ្វើសមយុទ្ធជាមួយអាវុធនុយក្លេអ៊ែរ។ រូបភាព៖ Reuters

ចំនួនទាំងនេះ មានការថយចុះបន្តិចបន្តួច បើប្រៀបធៀបទៅនឹងឆ្នាំមុន ដោយសារចាប់តាំងពីចុងបញ្ចប់នៃសង្គ្រាមត្រជាក់មក ក្បាលគ្រាប់ចាស់ៗជាទូទៅត្រូវបានរុះរើលឿនជាងក្បាលគ្រាប់ថ្មីត្រូវបានដាក់ពង្រាយ បណ្តាលឱ្យមានការថយចុះនៃចំនួនសរុប។

លោក Karim Haggag នាយក SIPRI ប្រាប់ភ្នាក់ងារសារព័ត៌មាន AFP នៅថ្ងៃទី៨ ខែមិថុនា ថា៖ « ព័ត៌មានដែលគួរឱ្យព្រួយបារម្ភជាងនេះទៅទៀតនោះគឺថា ទោះបីជាយើងមានចំនួនអាវុធនុយក្លេអ៊ែរតិចជាងមុនក៏ដោយ កម្រិតនៃគ្រោះថ្នាក់នុយក្លេអ៊ែរ និងហានិភ័យនុយក្លេអ៊ែរកំពុងកើនឡើង»។

SIPRI ព្យាករណ៍ថា និន្នាការនៃការថយចុះស្តុកអាវុធនុយក្លេអ៊ែរទំនងជានឹងបញ្ច្រាស់វិញ នៅក្នុងប៉ុន្មានឆ្នាំខាងមុខ ដោយសារល្បឿននៃការរុះរើកំពុងថយចុះ ខណៈការដាក់ពង្រាយអាវុធនុយក្លេអ៊ែរថ្មីកំពុងកើនឡើង។

លោក Haggag ក៏បានរាយបញ្ជីសញ្ញាគួរឱ្យព្រួយបារម្ភជាច្រើនផងដែរ ដូចជាការបែកបាក់នៃការគ្រប់គ្រងអាវុធជាយុទ្ធសាស្ត្រ កិច្ចព្រមព្រៀងអន្តរជាតិ និងការប្រកួតប្រជែងរវាងមហាអំណាចជាមួយនឹងអាវុធនុយក្លេអ៊ែរ។

លោក Haggag ថា៖ « និន្នាការដ៏គួរឱ្យព្រួយបារម្ភមួយទៀតគឺ រដ្ឋដែលមានអាវុធនុយក្លេអ៊ែរកំពុងដកវាចេញពីឃ្លាំង ហើយដាក់ពង្រាយនៅលើប្រព័ន្ធដឹកជញ្ជូនដែលមានសមត្ថភាពនុយក្លេអ៊ែរ។ ដូច្នេះយើងឃើញមានអាវុធនុយក្លេអ៊ែរដាក់ពង្រាយកាន់តែច្រើន»។

គួរបញ្ជាក់ថា សហរដ្ឋអាមេរិកនិងរុស្ស៊ីកាន់កាប់ស្តុកអាវុធនុយក្លេអ៊ែររបស់ពិភពលោកជិត ៨៣ភាគរយ ដោយមានក្បាលគ្រាប់ជាង ៥ ០០០គ្រាប់ ក្នុងប្រទេសពួកគេនិមួយៗ។

ដោយឡែក ប្រទេសចិនកំពុងពង្រីកឃ្លាំងអាវុធនុយក្លេអ៊ែររបស់ខ្លួនលឿនជាងប្រទេសដទៃទៀត។

លោក Haggag និយាយថា៖ « ការប្រកួតប្រជែងខាងភូមិសាស្ត្រនយោបាយកាន់តែខ្លាំងឡើង មានន័យថាជាការលើកទឹកចិត្តយ៉ាងខ្លាំងពីសំណាក់ប្រទេសចិនក្នុងការបង្កើនការពឹងផ្អែកលើអាវុធនុយក្លេអ៊ែរ»។

SIPRI ប៉ាន់ប្រមាណថាប្រទេសចិនបច្ចុប្បន្នមានក្បាលគ្រាប់នុយក្លេអ៊ែរចំនួន ៦២០គ្រាប់ អាស្រ័យលើរបៀបដែលទីក្រុងប៉េកាំងសម្រេចចិត្តរៀបចំកងកម្លាំងរបស់ខ្លួនប៉ុណ្ណោះ ហើយអាចមានមីស៊ីលផ្លោងអន្តរទ្វីប (ICBM) ច្រើន ដូចសហរដ្ឋអាមេរិកនិងរុស្ស៊ីនៅឆ្នាំ ២០៣០៕

សម្រួល៖ ណឺ មិនា

The post ក្រុមអ្នកឃ្លាំមើល៖ ក្បាលនុយក្លេអ៊ែររុះរើថ្មីច្រើនពាន់គ្រាប់ ត្រូវបានដាក់ពង្រាយ ដោយប្រទេសមហាអំណាច appeared first on Kampuchea Thmey Daily.

ន័រវែសជាប្រទេសទី៩ ចូលរួមក្នុងគម្រោងសន្តិសុខអាវុធនុយក្លេអ៊ែររបស់បារាំង នៅអឺរ៉ុប

Minea Neu — Thu, 28 May 2026 10:54:00 +0000

មេដឹកនាំនៃប្រទេសបារាំងនិងន័រវែសលើកឡើងកាលពីថ្ងៃពុធថា ទីក្រុងអូស្លូ នឹងចូលរួមក្នុងគម្រោងនុយក្លេអ៊ែរដឹកនាំដោយទីក្រុងប៉ារីស ដើម្បីជំរុញសន្តិសុខនៅទ្វីបអឺរ៉ុប។ នេះបើយោងតាមសារព័ត៌មានបារាំង France-24 ផ្សាយថ្ងៃទី២៧ ខែឧសភា ឆ្នាំ២០២៦ ។

នាយករដ្ឋមន្ត្រីន័រវែស លោក Jonas Gahr Store ចួបគ្នាជាមួយ ប្រធានាធិបតីបារាំង លោក Emmanuel Macron នៅទីក្រុងប៉ារីស ដោយប្រកាសថា៖ « ប្រទេសទាំងពីរបានចុះហត្ថលេខាលើកតិកាសញ្ញាការពារជាតិ! យើងកំពុងប្រឈមមុខនឹងស្ថានភាពសន្តិសុខធ្ងន់ធ្ងរបំផុត ចាប់តាំងពីសង្គ្រាមលោកលើកទីពីរ»។

គួរបញ្ជាក់ថា ប្រទេសន័រវេសជាប្រទេសទី៩ ដែលចូលរួមក្នុងគម្រោងនុយក្លេអ៊ែររបស់បារាំង។

នាយករដ្ឋមន្ត្រីន័រវែស Jonas Gahr Store និងប្រធានាធិបតីបារាំង Macron ។ រូបភាព៖ Reuters

លោក Jonas Gahr Store បន្តថា៖ « ក្នុងរយៈពេលប្រាំមួយខែកន្លងមកនេះ យើងធ្វើកិច្ចព្រមព្រៀងការពារជាតិជាមួយទាំងអាល្លឺម៉ង់ និងចក្រភពអង់គ្លេស ហើយខ្ញុំមានសេចក្តីសោមនស្សរីករាយដែលយើងបានចុះហត្ថលេខាលើកិច្ចព្រមព្រៀងការពារជាតិដ៏ទូលំទូលាយជាមួយបារាំងនៅថ្ងៃនេះ»។

កាលពីខែមីនា លោក Macron បង្ហាញកម្មវិធីមួយដែលក្រោមកម្មវិធីនោះ បារាំងជាប្រទេសដែលមានអាវុធនុយក្លេអ៊ែរតែមួយគត់របស់សហភាពអឺរ៉ុបដែលអាចប្រើប្រាស់ឃ្លាំងស្តុកអាវុធបរមាណូ ដើម្បីជំរុញសន្តិសុខនៅលើទ្វីបនេះ។

លោក Macron ថា៖ « ក្រោមគម្រោងទប់ស្កាត់នុយក្លេអ៊ែរដែលហៅថា «ការឆ្ពោះទៅមុខ» អ្នកចូលរួមនឹងអាចធ្វើជាម្ចាស់ផ្ទះបណ្តោះអាសន្ននៃកងកម្លាំងអាកាសយុទ្ធសាស្ត្ររបស់បារាំង ហើយវានឹងអាចរីករាលដាលពាសពេញទ្វីបអឺរ៉ុប ដើម្បីធ្វើឱ្យការប៉ុនប៉ងវាយប្រហាររបស់សត្រូវមានភាពស្មុគស្មាញ»។

លោក Macron និយាយថា៖ « ប្រទេសន័រវែសជាដៃគូភូមិសាស្ត្រ និងយុទ្ធសាស្ត្រដ៏សំខាន់មួយ ដែលយើងធ្លាប់មានកិច្ចសហប្រតិបត្តិការយ៉ាងសំខាន់ក្នុងការធានាការការពារទឹកដីសម្ព័ន្ធមិត្ត ប្រឆាំងនឹងការគំរាមកំហែងពីខាងក្រៅ នឹងតំណាងឱ្យតម្លៃបន្ថែមដ៏រឹងមាំសម្រាប់ការទប់ស្កាត់ដ៏ប្រសើរឡើង»។

យោងតាមតួលេខចុងក្រោយបង្អស់ដែលចេញផ្សាយដោយវិទ្យាស្ថានស្រាវជ្រាវសន្តិភាពអន្តរជាតិ Stockholm(SIPRI) និងសហព័ន្ធអ្នកវិទ្យាសាស្ត្រអាមេរិក (FAS) ប្រទេសបារាំងមានក្បាលគ្រាប់នុយក្លេអ៊ែរប្រមាណ ២៩០គ្រាប់។

យោងតាមអ្នកវិទ្យាសាស្ត្រអាតូមិក ក្បាលគ្រាប់នុយក្លេអ៊ែរជាង ៨០ភាគរយរបស់ប្រទេសបារាំងត្រូវបានបាញ់ចេញពីនាវាមុជទឹក៕

សម្រួល៖ ណឺ មិនា

The post ន័រវែសជាប្រទេសទី៩ ចូលរួមក្នុងគម្រោងសន្តិសុខអាវុធនុយក្លេអ៊ែររបស់បារាំង នៅអឺរ៉ុប appeared first on Kampuchea Thmey Daily.

អាវុធនុយក្លេអ៊ែរ Archives - Kampuchea Thmey Daily

រុស្ស៊ី ៖ អាវុធនុយក្លេអ៊ែរ ជាការធានាតែមួយគត់ ដើម្បីទប់ស្កាត់សង្គ្រាមលោក

កូរ៉េខាង​ជើង​ថ្កោល​ទោស​ប្រទេស G7 លើការ​អំពាវ​នាវ​ឱ្យ​ទី​ក្រុង​ព្យុង​យ៉ាង ​រំ​សាយ​អាវុធ​នុយ​ក្លេអ៊ែរ​

តើ​រុស្ស៊ី​អាច​ដាក់​គ្រាប់​នុយ​ក្លេ​អ៊ែរ ​ក្នុង​លំហ​អាកាស​យ៉ាង​ដូចម្តេច?

យោធា​ជាន់​ខ្ពស់​អាល្លឺម៉ង់​ ថា ​រុស្ស៊ី​អាចកំពុងដាក់​ឧបករណ៍​នុយក្លេអ៊ែរ​ចូល​ក្នុង​លំហ​អាកាស​

ន័រ​វែស​​ជា​ប្រទេស​ទី​៩ ​ចូលរួមក្នុង​គម្រោង​សន្តិសុខ​អាវុធនុយក្លេអ៊ែរ​របស់​បារាំង​ នៅ​អឺរ៉ុប​

កូរ៉េខាងជើងថ្កោលទោសប្រទេស G7 លើការអំពាវនាវឱ្យទីក្រុងព្យុងយ៉ាង រំសាយអាវុធនុយក្លេអ៊ែរ

តើរុស្ស៊ីអាចដាក់គ្រាប់នុយក្លេអ៊ែរ ក្នុងលំហអាកាសយ៉ាងដូចម្តេច?

យោធាជាន់ខ្ពស់អាល្លឺម៉ង់ ថា រុស្ស៊ីអាចកំពុងដាក់ឧបករណ៍នុយក្លេអ៊ែរចូលក្នុងលំហអាកាស

ន័រវែសជាប្រទេសទី៩ ចូលរួមក្នុងគម្រោងសន្តិសុខអាវុធនុយក្លេអ៊ែររបស់បារាំង នៅអឺរ៉ុប