ព័ត៌មានអន្ដរជាតិ

ន័រវែសជាប្រទេសទី៩ ចូលរួមក្នុងគម្រោងសន្តិសុខអាវុធនុយក្លេអ៊ែររបស់បារាំង នៅអឺរ៉ុប

បានផុស

១ ខែ មុន

នៅ

ថ្ងៃព្រហស្បតិ៍ ២៨ ឧសភា ២០២៦

ដោយ

មេដឹកនាំនៃប្រទេសបារាំងនិងន័រវែសលើកឡើងកាលពីថ្ងៃពុធថា ទីក្រុងអូស្លូ នឹងចូលរួមក្នុងគម្រោងនុយក្លេអ៊ែរដឹកនាំដោយទីក្រុងប៉ារីស ដើម្បីជំរុញសន្តិសុខនៅទ្វីបអឺរ៉ុប។ នេះបើយោងតាមសារព័ត៌មានបារាំង France-24 ផ្សាយថ្ងៃទី២៧ ខែឧសភា ឆ្នាំ២០២៦ ។

នាយករដ្ឋមន្ត្រីន័រវែស លោក Jonas Gahr Store ចួបគ្នាជាមួយ ប្រធានាធិបតីបារាំង លោក Emmanuel Macron នៅទីក្រុងប៉ារីស ដោយប្រកាសថា៖ « ប្រទេសទាំងពីរបានចុះហត្ថលេខាលើកតិកាសញ្ញាការពារជាតិ! យើងកំពុងប្រឈមមុខនឹងស្ថានភាពសន្តិសុខធ្ងន់ធ្ងរបំផុត ចាប់តាំងពីសង្គ្រាមលោកលើកទីពីរ»។

គួរបញ្ជាក់ថា ប្រទេសន័រវេសជាប្រទេសទី៩ ដែលចូលរួមក្នុងគម្រោងនុយក្លេអ៊ែររបស់បារាំង។

នាយករដ្ឋមន្ត្រីន័រវែស Jonas Gahr Store និងប្រធានាធិបតីបារាំង Macron ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Jonas Gahr Store បន្តថា៖ « ក្នុងរយៈពេលប្រាំមួយខែកន្លងមកនេះ យើងធ្វើកិច្ចព្រមព្រៀងការពារជាតិជាមួយទាំងអាល្លឺម៉ង់ និងចក្រភពអង់គ្លេស ហើយខ្ញុំមានសេចក្តីសោមនស្សរីករាយដែលយើងបានចុះហត្ថលេខាលើកិច្ចព្រមព្រៀងការពារជាតិដ៏ទូលំទូលាយជាមួយបារាំងនៅថ្ងៃនេះ»។

កាលពីខែមីនា លោក Macron បង្ហាញកម្មវិធីមួយដែលក្រោមកម្មវិធីនោះ បារាំងជាប្រទេសដែលមានអាវុធនុយក្លេអ៊ែរតែមួយគត់របស់សហភាពអឺរ៉ុបដែលអាចប្រើប្រាស់ឃ្លាំងស្តុកអាវុធបរមាណូ ដើម្បីជំរុញសន្តិសុខនៅលើទ្វីបនេះ។

លោក Macron ថា៖ « ក្រោមគម្រោងទប់ស្កាត់នុយក្លេអ៊ែរដែលហៅថា «ការឆ្ពោះទៅមុខ» អ្នកចូលរួមនឹងអាចធ្វើជាម្ចាស់ផ្ទះបណ្តោះអាសន្ននៃកងកម្លាំងអាកាសយុទ្ធសាស្ត្ររបស់បារាំង ហើយវានឹងអាចរីករាលដាលពាសពេញទ្វីបអឺរ៉ុប ដើម្បីធ្វើឱ្យការប៉ុនប៉ងវាយប្រហាររបស់សត្រូវមានភាពស្មុគស្មាញ»។

លោក Macron និយាយថា៖ « ប្រទេសន័រវែសជាដៃគូភូមិសាស្ត្រ និងយុទ្ធសាស្ត្រដ៏សំខាន់មួយ ដែលយើងធ្លាប់មានកិច្ចសហប្រតិបត្តិការយ៉ាងសំខាន់ក្នុងការធានាការការពារទឹកដីសម្ព័ន្ធមិត្ត ប្រឆាំងនឹងការគំរាមកំហែងពីខាងក្រៅ នឹងតំណាងឱ្យតម្លៃបន្ថែមដ៏រឹងមាំសម្រាប់ការទប់ស្កាត់ដ៏ប្រសើរឡើង»។

យោងតាមតួលេខចុងក្រោយបង្អស់ដែលចេញផ្សាយដោយវិទ្យាស្ថានស្រាវជ្រាវសន្តិភាពអន្តរជាតិ Stockholm(SIPRI) និងសហព័ន្ធអ្នកវិទ្យាសាស្ត្រអាមេរិក (FAS) ប្រទេសបារាំងមានក្បាលគ្រាប់នុយក្លេអ៊ែរប្រមាណ ២៩០គ្រាប់។

យោងតាមអ្នកវិទ្យាសាស្ត្រអាតូមិក ក្បាលគ្រាប់នុយក្លេអ៊ែរជាង ៨០ភាគរយរបស់ប្រទេសបារាំងត្រូវបានបាញ់ចេញពីនាវាមុជទឹក៕

សម្រួល៖ ណឺ មិនា