អេ អាំម៉ារីនភូថង Archives - Kampuchea Thmey Daily

លោក ខូវ ឆាយ សារភាពថាសូម្បីតែលោកមើលការប្រកួតរបស់ អេ អាំម៉ារីនភូថង ក៏ធុញដែរ

Sina Noun — Tue, 02 Dec 2025 02:27:36 +0000

លោក ខូវ ឆាយ សារភាពថាអំឡុងការប្រកួតរបស់កីឡាករ អេ អាំម៉ារីនភូថង ការពារខ្សែក្រវាត់ជាមួយ Mo Abdurahman សូម្បីតែលោកក៏មើលធុញចំពោះការប្រកួតនោះដែរ ដូច្នេះអ្នកប្រកួតក្រោយៗត្រូវមានស្មារតីប្រយុទ្ធមោះមុតជាងនេះ។

លោក ខូវ ឆាយ ប្រធានសហព័ន្ធ

លោក ខូវ ឆាយ ប្រធានសហព័ន្ធប្រដាល់គុនខ្មែរបានឲ្យដឹងថា ការប្រកួតការពារខ្សែក្រវាត់របស់ អេ អាំម៉ារីនភូថង កាលពីថ្ងៃទី២៨ ខែវិច្ឆិកា ឆ្នាំ២០២៥ នេះមានការវែកញែកច្រើនពីមហាជន និងលើកឡើងជាការប្រកួតអត់ល្អមើល។ សូម្បីតែលោកផ្ទាល់ក៏មើលឃើញថាអត់ល្អមើល ធុញ ចំពោះការប្រកួតមួយនេះដែរ។

ប្រធានសហព័ន្ធប្រដាល់ខាងលើបន្តទៀតថា ដោយសារតែ អេ អាំម៉ារីនភថង ថយខ្លាំងពេក ខណៈកីឡាករអង់គ្លេស Mo Abdurahman ដើរបុក មានស្មារតីប្រយុទ្ធមោះមុតជាងទើបធ្វើឲ្យមហាជនយល់ឃើញថារូបគេសមឈ្នះការប្រកួតមួយនេះ។

ទិដ្ឋភាពពិនិត្យការដាក់ពិន្ទុឡើងវិញ

យ៉ាងណាក្រោយពិនិត្យលើការពិន្ទុឡើងវិញហើយនោះគឺលទ្ធផលនៅតែ អេ អាំម៉ារីនភូថង ឈ្នះដដែល ដូច្នេះលទ្ធផលមិនមានអ្វីផ្លាស់ប្ដូរនោះឡើយ។ មួយវិញទៀតកីឡាករបរទេសថ្វីត្បិតដើរចូលមែន ប៉ុន្តែវាយក៏មិនសូវបានដូចគ្នា។ ការសរុបពិន្ទុប្រកួតឡើងវិញគឺប្រហាក់ប្រហែលគ្នាមែន ប៉ុន្តែអតិភាពឈ្នះគឺផ្ដល់ទៅឲ្យម្ចាស់ការពារខ្សែក្រវាត់ហើយលុះត្រាអ្នកមកដណ្ដើមវាយបានច្រើនដាច់ពិន្ទុទើបអាចទទួលបានជ័យជម្នះ។

ទិដ្ឋភាពពិនិត្យការដាក់ពិន្ទុឡើងវិញ

ប្រធានសហព័ន្ធរូបនេះបន្តទៀតថា ការប្រកួតដណ្ដើមខ្សែក្រវាត់លើកក្រោយៗកីឡាករត្រូវមានទឹកចិត្តប្រយុទ្ធឲ្យខ្លាំងមោះមុតជាងនេះដើម្បីឲ្យសមជាគូឯក គូដណ្ដើមខ្សែក្រវាត់ ព្រោះមានអ្នកគាំទ្រ មានម្ចាស់ឧបត្ថម្ភសុទ្ធសឹងតែជាអ្នកចាំទស្សនា។

ទិដ្ឋភាពពិនិត្យការដាក់ពិន្ទុឡើងវិញ

បញ្ជាក់ដែរថា កាលរសៀលថ្ងៃទី១ ខែធ្នូ ឆ្នាំ២០២៥ ម្សិលមិញនេះសហព័ន្ធប្រដាល់គុនខ្មែរដឹកនាំដោយលោក ខូវ ឆាយ បានបើកកិច្ចប្រជុំពិនិត្យការដាក់ពិន្ទុឡើងវិញរវាងការប្រកួតរបស់ អេ អាំម៉ារីនភូថង និងកីឡាករបរទេស Mo Abdurahman ក្នុងនោះលទ្ធផលគឺនៅតែកូនប្រុសលោក អេ ភូថង ឈ្នះដដែល។ ការសើរើលទ្ធផលប្រកួតរបស់ អេ អាំម៉ារីនភូថង នេះបន្ទាប់ពីរូបគេប្រកួតការពារខ្សែក្រវាត់នៅថ្ងៃទី២៨ វិច្ឆិកា ២០២៥ ថយពេក និងមិនសូវវាយរហូតអ្នកគាំទ្ររិះគន់ថាមិនសមឈ្នះការប្រកួតនោះឡើយ៕

រូបភាពហ្វេសបុកផេកថោន

អត្ថបទដោយ៖ នួន ស៊ីណា

The post លោក ខូវ ឆាយ សារភាពថាសូម្បីតែលោកមើលការប្រកួតរបស់ អេ អាំម៉ារីនភូថង ក៏ធុញដែរ appeared first on Kampuchea Thmey Daily.

ខានចាញ់យូរ ធឿន ធារ៉ា និង អេ អាំម៉ារីន ចាប់ដៃគ្នាចាញ់ក្នុងកម្មវិធីតែមួយ

Sina Noun — Mon, 29 Sep 2025 03:27:46 +0000

អ្នកប្រដាល់ល្បីឈ្មោះកម្រចាញ់ និងជាសិស្សគុនរបស់លោក អេ ភូថង គឺកីឡាករ ធឿន ធារ៉ា និងកូនប្រុសរបស់លោក អេ អាំម៉ារីន ជើងខ្លាំងរបស់កម្ពុជាទាំងពីរចាញ់ដូចគ្នាក្នុងកម្មវិធីប្រដាល់តែមួយកាលពីថ្ងៃទី២៦ ខែកញ្ញា ឆ្នាំ២០២៥ លើសង្វៀនថោន។

ធារ៉ា និង អាំម៉ារីន

ការចាញ់របស់ ធឿន ធារ៉ា ហាក់ធ្វើឲ្យអ្នកគាំទ្រគុនខ្មែរមានការភ្ញាក់ផ្អើលខ្លាំង ព្រោះកម្រឃើញកីឡាកររូបនេះចាញ់សន្លប់ណាស់ពិសេសរាល់ការប្រកួតរបស់គេនៅសង្វៀនថោនតែងតែធ្វើបានល្អ។ ការចាញ់នេះហាក់លឿនខ្លាំងពេកត្រឹមទឹកទី១ ខណៈម្នាក់ៗមិនទាន់ចេញស្នៀតអស់នៅឡើយទេ។

ការប្រកួតបែបរុំអំបោះឆៅនេះគឺប្រឈមនិងគ្រោះថ្នាក់ខ្លាំង ដូច្នេះទាល់តែមានការប្រុងប្រយ័ត្នគ្រប់ពេលទើបបាន។ ទឹកទី១ កីឡាករ RUSLAN NAGIYEV រូបនេះគឺទម្រង់វាយល្អចេញចូលលឿន និងឆក់ដៃបានច្រើន ប៉ុន្តែមិនសូវត្រូវ។ ការសន្លប់របស់ ធារ៉ា នេះដោយសារតែរូបគេឆក់វាយឆ្វេងទៅលើពោះរបស់ RUSLAN NAGIYEV ក៏ភ្លាត់ត្រូវដៃឆ្វេងរបស់ដៃគូវិញត្រង់ភ្នែកស្ដាំធ្វើឲ្យឈឺរហូតបោះបង់ការប្រកួតនៅពេលនោះតែម្ដងទៅ។

រូបភាពលើផេក Town Sports

ចំណែក អេ អាំម៉ារីន វិញមិនចាញ់សន្លប់ដូច ធារ៉ា ឡើយ ប៉ុន្តែអស់ស៊ុហ្វរលីងដោយសារប្ដូរគ្នាផង និងដៃគូវាយត្រូវច្រើនផង។ កូនប្រុសលោក អេ ភូថង រូបនេះក៏កម្រចាញ់ការប្រកួតផងដែរ ពោលតាមរយៈកាយសម្បទាខ្ពស់ វែងល្អ និងចង្វាក់វាយកាច រួមផ្សំការបោះជង្គង់ល្អផងនោះទើបរូបគេកម្រចាញ់ការប្រកួតណាស់។

រូបភាពលើផេក Town Sports

អាចថាជាការចៃដន្យខ្លាំងណាស់កូនសិស្ស និងកូនបង្កើតរបស់លោក អេ ភូថង ទាំងពីរបែរជាបរាជ័យចាញ់ដៃគូប្រកួតដូចគ្នានៅលើកម្មវិធីតែមួយជាមួយគ្នាកាលពីយប់ថ្ងៃទី២៦ ខែកញ្ញា ឆ្នាំ២០២៥ លើសង្វៀនថោននៅពេលនោះ៕

អត្ថបទដោយ៖ នួន ស៊ីណា

The post ខានចាញ់យូរ ធឿន ធារ៉ា និង អេ អាំម៉ារីន ចាប់ដៃគ្នាចាញ់ក្នុងកម្មវិធីតែមួយ appeared first on Kampuchea Thmey Daily.

ក្រោយ Dan Siam ដកខ្លួន អេ អាំម៉ារីន ត្រូវជួបម្ចាស់ផ្ទះជប៉ុនជាម្ចាស់ខ្សែក្រវាត់ ៣ ខ្សែ

Kosal Sem — Thu, 10 Jul 2025 08:04:10 +0000

អ្នកប្រដាល់គុនខ្មែរ អេ អាំម៉ារីនភូថង នឹងត្រូវប្តូរមកជួបកីឡាករម្ចាស់ផ្ទះ ជប៉ុន REITO BRAVELY នៅសង្វៀន Knock Out ជំនួសវិញ បន្ទាប់ពីកីឡាករ ថៃ Dan Siam ដកខ្លួនពីការប្រកួត។

រូបភាពផ្សព្វផ្សាយការប្រកួត

តាមការគ្រោងទុក អេ អាំម៉ារីន នឹងត្រូវដណ្តើមខ្សែក្រវាត់ Knock Out Red ពីកីឡាករថៃ Dan Siam នៅថ្ងៃទី ២០ ខែ កក្កដា ឆ្នាំ ២០២៥ ខាងមុខ ប៉ុន្តែនៅសល់ត្រឹម ២ សប្តាហ៍មុនការប្រកួតមកដល់ ស្រាប់តែជំនួបនេះត្រូវបានរំសាយទៅវិញ ដោយសារតែខាងភាគីកីឡាករ ថៃ បានសម្រេចដកខ្លួនពីការប្រកួត។

អេ អាំម៉ារីនភូថង

យ៉ាងណា ខាងសង្វៀន Knock Out បានប្រកាសសមាសភាពដៃគូថ្មីរួចហើយ ដោយ អេ អាំម៉ារីន ត្រូវជួបកីឡាករ ជប៉ុន REITO BRAVELY។ ថ្វីដ្បិត REITO នេះ ជាកីឡាករមកជំនួស Dan Siam ក៏ពិតមែន ប៉ុន្តែបើមើលពីប្រវត្តិរបស់គេកន្លងមក គឺមិនអាចមើលស្រាលបាននោះទេ ហើយរូបគេក៏រាប់ជាជើងខ្លាំងម្នាក់ផងដែរ មុនខាងសង្វៀន Knock Out ហ៊ានសម្រេចចិត្តឱ្យគេមកជួបជាមួយកូនប្រុសបង្កើតរបស់លោកគ្រូ អេ ភូថង។

យោងតាមប្រវត្តិត្រួសៗ REITO គឺធ្លាប់ឆ្លងកាត់ការប្រកួតអាជីពបានចំនួន ២៩ ដងក្នុងនោះឈ្នះ ១៦ ដង (ផ្តួលដៃគូឱ្យបោះបង់ការប្រកួត ៩ ដង) ចាញ់ ៧ ដង និងស្មើ ៦ ដង។ រូបគេជាម្ចាស់ខ្សែក្រវាត់ ៣ គ្រឿង រួមមានជើងឯក KOS Super Featherweight, M-1 JAPAN lightweight champion, និង M-1 World lightweight champion។

REITO BRAVELY

ជាមួយគ្នានេះ កីឡាករវ័យ ២៥ ឆ្នាំ កម្ពស់ ១.៨០ ម៉ែត្ររូបនេះ ក៏ធ្លាប់ប្រកួតនៅសង្វៀន ONE Championship បាន ១ លើកផងដែរ ប៉ុន្តែជាលទ្ធផលបានចាញ់កីឡាករ មីយ៉ាន់ម៉ា Eh Mwi។ បើនិយាយអំពីជំនាញពិសេសវិញ គឺ REITO ជាកីឡាករម្នាក់ ចូលចិត្តវាយមួយៗ ប៉ុន្តែធ្ងន់ និងច្បាស់ ហើយមួយវិញទៀត រូបគេក៏ជាកីឡាករមានទម្ងន់ជើងធ្ងន់ផងដែរ។

REITO BRAVELY

គួរបញ្ជាក់ជាថ្មីថា ការប្រកួតនៅសង្វៀន Knock Out នាថ្ងៃទី ២០ ខែ កក្កដា ឆ្នាំ ២០២៥ ខាងមុខ ក្រៅអំពីគូ អេ អាំម៉ារីន និង REITO ក៏មានកីឡាករគុនខ្មែរម្នាក់ទៀត ទៅប្រកួតនៅទីនោះផងដែរ គឺ ម៉ឺន មេឃា ត្រូវជួបគ្នាជាមួយកីឡាករ ជប៉ុន Kobayashi៕

រូបភាពផ្សព្វផ្សាយការប្រកួត

អត្ថបទ៖ កុសល

The post ក្រោយ Dan Siam ដកខ្លួន អេ អាំម៉ារីន ត្រូវជួបម្ចាស់ផ្ទះជប៉ុនជាម្ចាស់ខ្សែក្រវាត់ ៣ ខ្សែ appeared first on Kampuchea Thmey Daily.

ម៉ឺន មេឃា ទៅ Knock Out លើកដំបូង ជួបម្ចាស់ផ្ទះជប៉ុន មានប្រវត្តិ ៥ ឆ្នាំចុងក្រោយចាញ់ ២ដង

Kosal Sem — Wed, 11 Jun 2025 04:07:31 +0000

ទាយាទគុនខ្មែរ និងជាកូនប្រុសបង្កើតរបស់លោកគ្រូ អេ ភូថង ទាំង២ គឺកីឡាករ អេ អាំម៉ារីន និង ម៉ឺន មេឃា នឹងដឹកដៃគ្នាទៅប្រកួតនៅសង្វៀន Knock Out របស់ជប៉ុន នៅថ្ងៃ ២០ ខែ កក្កដា ឆ្នាំ ២០២៥។

ម៉ឺន មេឃា និងអេ អាំម៉ារីន

បន្ទាប់ពីខាង Knock Out ទម្លាក់ខិតប័ណ្ណផ្សព្វផ្សាយជាផ្លូវការ អ្នកគាំទ្រហាក់ចាប់អារម្មណ៍ខ្លាំងជាងគេ ទៅលើគូរបស់ អេ អាំម៉ារីន និងកីឡាករ ថៃ Dan Siam ដោយសារអ្នកទាំង ២ ធ្លាប់ជួបគ្នារួចម្តងហើយ នៅសង្វៀន Knock Out នេះកាលពីខែ សីហា ឆ្នាំ ២០២៤ ដែលពេលនោះកីឡាករកម្ពុជា ទទួលបានជ័យជម្នះ។

យ៉ាងណា អ្នកទាំង ២ នឹងត្រូវជួបគ្នាម្តងទៀតនៅសង្វៀនដដែល ប៉ុន្តែលើកនេះជាការប្រកួតមានលក្ខណៈធំជាងមុន ដោយខាង Knock Out សម្រេចឱ្យ អេអាំម៉ារីន វ៉ៃដណ្តើមខ្សែក្រវាត់ Knock Out Red ពីកីឡាករថៃ Dan Siam តែម្តង។

ផុស្ទើប្រកួត

ងាកមកចាប់អារម្មណ៍ជាមួយ គូរបស់កីឡាករ ម៉ឺន មេឃា និងកីឡាករម្ចាស់ផ្ទះជប៉ុន Kobayashi Tsukasa វិញម្តង។ មួយគូនេះ ក៏មិនអាចមើលរំលងបានផងដែរ ដោយ Kobayashi ត្រូវបានគេចាត់ទុកជាជើងខ្លាំងមួយរូបនៅ ជប៉ុន។

កីឡាករ Kobayashi មានជំនាញប្រកួតទាំងលក្ខណៈ ឃីគបុកស៊ីង និងប្រដាល់សេរី ដែលមានប្រវត្តិប្រកួត ៥ ឆ្នាំចុងក្រោយ គិតចាប់តាំងពីឆ្នាំ ២០២១ មក គឺរូបគេប្រកួតបានចំនួន ១៤ ដង ក្នុងនោះឈ្នះ ១១ ដង ស្មើ ១ ដង និងចាញ់តែ ២ ដងប៉ុណ្ណោះ។

ផុស្ទើប្រកួត

គួរឱ្យដឹងថា ម៉ឺន មេឃា ជាកីឡាករគុនខ្មែរម្នាក់ ដែលតែងតែធ្វើបានល្អ និងភាគច្រើនទទួលបានជ័យជម្នះរាល់ពេលចេញទៅប្រកួតនៅក្រៅប្រទេសម្តងៗ។ រូបគេក៏មានបទពិសោធច្រើនក្នុងការប្រកួតឃីកបុកស៊ីងដែរ។ ទោះបីជាយ៉ាងណា ការចេញទៅសង្វៀន Knock Out នៅថ្ងៃទី ២០ ខែ កក្កដា ខាងមុខ គឺជាបទពិសោធលើកដំបូងសម្រាប់កូនប្រុសរបស់លោកគ្រូ អេ ភូថង ក្នុងការប្រកួតនៅទីនោះ៕

អត្ថបទ៖ សេម កុសល

The post ម៉ឺន មេឃា ទៅ Knock Out លើកដំបូង ជួបម្ចាស់ផ្ទះជប៉ុន មានប្រវត្តិ ៥ ឆ្នាំចុងក្រោយចាញ់ ២ដង appeared first on Kampuchea Thmey Daily.

គុនខ្មែរផ្តល់ឲ្យ អេ អាំម៉ារីនភូថង មានរថយន្ត២គ្រឿងក្នុងវ័យ១៩ឆ្នាំ

chean virakbot — Fri, 17 Jan 2025 03:30:20 +0000

កីឡាករ អេ អាំម៉ារីនភូថង កូនប្រុសបង្កើតរបស់លោកគ្រូ អេ ភូថង និងអ្នកស្រី សាំង សុម៉ាលី មានរថយន្ត២គ្រឿងទាំងវ័យក្មេង តាមរយៈអាជីពប្រដាល់គុនខ្មែរដ៏ជោគជ័យក្នុងពេល៧ឆ្នាំប៉ុណ្ណោះ។

នៅថ្ងៃទី១៦ ខែមករា ឆ្នាំ២០២៥ អេ អាំម៉ារីនភូថង បានបង្ហាញរថយន្តថ្មីម៉ាក ម៉េកសឺដេស ១គ្រឿងដែលជាកាដូសម្រាប់ឆ្នាំថ្មី។ កីឡាករបាននិយាយថា ៖«កាដូជូនខ្លួនឯង ក្នុងឆ្នាំ2025»។ នេះជារថយន្តដែលរូបគេទិញដោយខ្លួនឯងពីកម្លាំងញើសឈាមពីការឡើងសង្វៀន ប៉ុន្តែនេះមិនមែនជារថយន្តលើកទី១ឡើយ។

អេ អាំម៉ារីនភូថង ទទួលបានរង្វាន់រថយន្ត Pick Up លើកទី១ នៅពេលបានចេញទៅប្រកួតនៅប្រទេសអូស្ត្រាលី ដោយបានផ្តួលកីឡាករ Clinton Corke ឲ្យអាជ្ញាកណ្តាលបញ្ឈប់ការប្រកួតក្នុងទឹកទី៥ ដើម្បីក្លាយជាម្ចាស់ខ្សែក្រវាត់កាលពីខែធ្នូ ឆ្នាំ២០២៣។

កីឡាកររូបនេះអាចត្រូវបានចាត់ទុកទទួលបានជោគជ័យបំផុតក្នុងចំណោមកីឡាករវ័យក្មេងដូចគ្នា។ កីឡាករបានចាប់ផ្តើមឡើងសង្វៀនតាំងពីអាយុ១២ឆ្នាំតាមរយៈឪពុកជាគ្រូបង្វឹក និងបងប្រុស បងស្រីជាអ្នកប្រដាល់ស្រាប់។ ដោយមានអំណោយផលផ្នែកខាងកាយសម្បទាបានធ្វើឲ្យរូបគេទទួលបានជោគជ័យយ៉ាងឆាប់រហ័សទាំងក្នុងស្រុក និងក្រៅប្រទេស។

កីឡាករមានកម្ពស់១.៨៥ម៉ែត្រ បានឆ្លងកាត់ការឡើងសង្វៀនប្រហែល៨០ដងហើយ។ អ្វីដែលគួរឲ្យកត់សំគាល់គឺរូបគេធ្លាប់ផ្តួលដៃគូឲ្យសន្លប់ជាង៤០ដង។ សមិទ្ធផលធំដំបូងក្នុងអាជីពប្រដាល់គឺរូបគេបានឈ្នះខ្សែក្រវាត់នៅសង្វៀនហង្សមាស កាលពីឆ្នាំ២០២១ អមដោយប្រាក់រង្វាន់៤០លានរៀល។

នៅខែមេសា ឆ្នាំ២០២៤ រូបគេបានឈ្នះខ្សែក្រវាត់គុនខ្មែរអន្តរជាតិ បន្ទាប់ពីឈ្នះកីឡាកររុស្ស៊ី Ovanes Nagabedyan ក្នុងទឹកទី១។ រូបគេសងសឹកបានសម្រេចលើមិត្តរួមជាតិ ឡុង សំណាង ដើម្បីទទួលបានខ្សែក្រវាត់សហព័ន្ធកីឡាប្រដាល់គុនខ្មែរជាមួយប្រាក់រង្វាន់២០លានរៀល ក្នុងខែឧសភា ឆ្នាំ២០២៤ នៅចំពោះមុខកំពូលអ្នកប្រដាល់ហ្វីលីពីន Manny Pacquiao។

នៅខែវិច្ឆិកា ឆ្នាំ២០២៤ អេ អាំម៉ារីនភូថង បានឈ្នះខ្សែក្រវាត់គុនខ្មែរ១ខ្សែទៀត បន្ទាប់ពីឈ្នះកីឡាករអ៊ុយក្រែន Savelit Dorgavtsev និងថ្ងៃទី១៤ ខែធ្នូ ឆ្នាំ២០២៤ រូបគេបានឈ្នះកីឡាករ Andrew Michael នៅប្រទេសអូស្ត្រាលីដើម្បីទទួលបានខ្សែក្រវាត់សហព័ន្ធគុនខ្មែរ។

អ្វីដែលគួរឲ្យចាប់អារម្មណ៍សម្រាប់ការចេញទៅប្រកួតនៅក្រៅប្រទេស អេ អាំម៉ារីនភូថង កម្រចាញ់ណាស់។ រូបគេបានផ្តួលកីឡាករថៃ Dansiam Weerasakreck ឲ្យសន្លប់ក្នុងទឹកទី៣នៅប្រទេសជប៉ុនកាលពីខែសីហា។ រូបគេបានចេញទៅប្រកួតនៅប្រទេសអូស្ត្រាលី២លើកទទួលបានជ័យជម្នះលើកីឡាករម្ចាស់ផ្ទះទាំងពីរលើក។

តាមរយៈកេរ្តិ៍ឈ្មោះល្បីរន្ទឺរទូទាំងប្រទេស អេ អាំម៉ារីនភូថង ទទួលបានឱកាសថតផ្សាយពាណិជ្ជកម្មឲ្យម៉ូតូ Honda Dream ស៊េរីថ្មីជាមួយតារាសម្តែងដ៏ស្រស់ស្អាត មាន សូនីតា។ តាមរយៈតម្លៃខ្លួនខ្ពស់ និងប្រាក់រង្វាន់គឺគ្រប់គ្រាន់ផ្តល់ឲ្យរូបគេទិញរថយន្តទំនើបបានទាំងវ័យក្មេង៕

អត្ថបទ៖ វីរបុត្រ

The post គុនខ្មែរផ្តល់ឲ្យ អេ អាំម៉ារីនភូថង មានរថយន្ត២គ្រឿងក្នុងវ័យ១៩ឆ្នាំ appeared first on Kampuchea Thmey Daily.

កូនសិស្ស៣នាក់របស់លោកគ្រូ អេ ភូថង ជោគជ័យបំផុត

chean virakbot — Tue, 24 Dec 2024 02:51:05 +0000

លោក អេ ភូថង បានកំពុងក្លាយជាគ្រូបង្ហាត់ប្រដាល់គុនខ្មែរដ៏ជោគជ័យម្នាក់នាពេលបច្ចុប្បន្ន បន្ទាប់ពីលោកបានចូលនិវត្តន៍។ ក្នុងនាមជាគ្រូបង្វឹក លោកមានកូនសិស្សជាច្រើន ហើយក៏មានកូនសិស្សជាច្រើនកំពុងទទួលបានជោគជ័យក្នុងអាជីព។

កូនសិស្ស៣នាក់របស់លោកគ្រូ អេ ភូថង ៣នាក់អាចចាត់ទុកជោគជ័យជាងគេក្នុងចំណោមកូនសិស្សរបស់លោក គឺ កីឡាករ អេ អាំម៉ារីនភូថង និង ម៉ឺន មេឃា ជាកូនប្រុសបង្កើតរបស់លោក និង ធឿន ធារ៉ា ជាកំពូលអ្នកប្រដាល់នៅកម្ពុជា។

អេ អាំម៉ារីនភូថង

អេ អាំម៉ារីនភូថង បានចាប់ផ្តើមឡើងសង្វៀនតាំងពីអាយុ១២ឆ្នាំតាមរយៈឪពុកជាគ្រូបង្វឹក និងបងប្រុស បងស្រីជាអ្នកប្រដាល់ស្រាប់។ ដោយមានអំណោយផលផ្នែកខាងកាយសម្បទាបានធ្វើឲ្យរូបគេទទួលបានជោគជ័យយ៉ាងឆាប់រហ័សទាំងក្នុងស្រុក និងក្រៅប្រទេស។

សមិទ្ធផលធំៗជាច្រើនដែលរូបគេសម្រេចបានទាំងវ័យក្មេងមានដូចជា ឈ្នះខ្សែក្រវាត់នៅសង្វៀនហង្សមាស កាលពីឆ្នាំ២០២១ ទទួលបានប្រាក់រង្វាន់៤០លានរៀល បន្ទាប់ពីឈ្នះរៀមច្បង ម៉ន សាម៉េត នៅវគ្គផ្តាច់ព្រ័ត្រ។

រង្វាន់ដ៏អស្ចារ្យដែលអាចចាត់ទុកជោគជ័យជាងបងបង្កើតរបស់ខ្លួនទៀតនោះគឺ អេ អាំម៉ារីនភូថង ទទួលខ្សែក្រវាត់ និងរង្វាន់រថយន្តថ្មីសន្លាង១គ្រឿង កាលពីខែធ្នូ ឆ្នាំ២០២៣ បន្ទាប់ពីបានផ្តួលកីឡាករអូស្ត្រាលី Clinton Corke ឲ្យអាជ្ញាកណ្តាលបញ្ឈប់ការប្រកួតក្នុងទឹកទី៥។

នៅខែមេសា ឆ្នាំ២០២៤ រូបគេបានឈ្នះខ្សែក្រវាត់គុនខ្មែរអន្តរជាតិ បន្ទាប់ពីឈ្នះកីឡាកររុស្ស៊ី Ovanes Nagabedyan ក្នុងទឹកទី១។ រូបគេសងសឹកបានសម្រេចលើមិត្តរួមជាតិ ឡុង សំណាង ដើម្បីទទួលបានខ្សែក្រវាត់សហព័ន្ធកីឡាប្រដាល់គុនខ្មែរ ក្នុងខែឧសភា ឆ្នាំ២០២៤ នៅចំពោះមុខកំពូលអ្នកប្រដាល់ហ្វីលីពីន Manny Pacquiao។ នៅពេលនោះ រូបគេទទួលបានប្រាក់រង្វាន់២០លានរៀល។

នៅខែវិច្ឆិកា ឆ្នាំ២០២៤ អេ អាំម៉ារីនភូថង បានឈ្នះខ្សែក្រវាត់គុនខ្មែរមួយខ្សែទៀត បន្ទាប់ពីឈ្នះកីឡាករអ៊ុយក្រែន Savelit Dorgavtsev និងចុងក្រោយ កាលពីថ្ងៃទី១៤ ខែធ្នូ ឆ្នាំ២០២៤ រូបគេបានឈ្នះកីឡាករ Andrew Michael នៅប្រទេសអូស្ត្រាលីដើម្បីទទួលបានខ្សែក្រវាត់សហព័ន្ធគុនខ្មែរ។

តាមរយៈកេរ្តិ៍ឈ្មោះល្បីរន្ទឺរទូទាំងប្រទេស អេ អាំម៉ារីនភូថង ទទួលបានឱកាសថតផ្សាយពាណិជ្ជកម្មឲ្យម៉ូតូ Honda Dream ស៊េរីថ្មីជាមួយតារាសម្តែងដ៏ស្រស់ស្អាត មាន សូនីតា។

ម៉ឺន មេឃា

កីឡាករប្រដាល់ ម៉ឺន មេឃា កូនប្រុសរបស់លោកគ្រូ អេ ភូថង ជាអត្តពលិកកម្ពុជាម្នាក់ដែលជំនាញ៤ប្រភេទកីឡាផ្សេងគ្នា និងកំពុងសកម្មក្នុងប្រភេទកីឡាទាំងនោះ។ កីឡាកររូបនេះបានឈ្នះមេដាយមាសកីឡាស៊ីហ្គេម២លើកជាប់គ្នាគឺ មេដាយមាសកីឡាវ៉ូវីណាម ក្នុងកីឡាស៊ីហ្គេម ឆ្នាំ២០២១ និងមេដាយមាសកីឡាវ៉ូវីណាម ក្នុងកីឡាស៊ីហ្គេម ឆ្នាំ២០២៣ ព្រមទាំងមេដាយមាស ប្រាក់ និងសំរិទ្ធជាច្រើនទៀតពីការប្រកួតកីឡាវ៉ូវីណាមកម្រិតអាស៊ាន អាស៊ី និងពិភពលោក។

កីឡាដែលជាប្រភពដើមរបស់ ម៉ឺន មេឃា គឺគុនខ្មែរដែលរូបគេធំដឹងក្តីឡើងជាមួយកីឡាអត្តសញ្ញាណកម្ពុជាស្រាប់ដោយសារមានឪពុក និងក្រុមគ្រួសារជាអ្នកកីឡា។ សម្រាប់ការប្រកួតគុនខ្មែរ រូបគេទទួលបានខ្សែក្រវាត់ជាច្រើនខ្សែ។ បន្ទាប់មករូបគេបានប្រកួតឃីកបុកស៊ីងទាំងនៅក្នុងប្រទេសកម្ពុជា និងប្រទេសចិនដោយមិនទាន់ចាញ់សោះ។

ជាពិសេសទៀតនោះ ម៉ឺន មេឃា បានបោះជំហានចូលប្រកួតកីឡាគុនចម្រុះថែមទៀត។ រូបគេបានឈ្នះមេដាយមាសក្នុងព្រឹត្តិការណ៍ប្រកួតយុទ្ធគុនចម្រុះខ្មែរបុរាណ ពានរង្វាន់សម្តេចធិបតីឆ្នាំ២០២៤ និងបានប្រកួតកីឡាគុនចម្រុះជ្រើសរើសជើងឯកអាស៊ីទៀតផង។

ធឿន ធារ៉ា

បើកទំព័រប្រវត្តិសាស្ត្រជោគជ័យនៅសង្វៀន Thai Fight ក្នុងខែវិច្ឆិកា ធឿន ធារ៉ា បានផ្តួលកីឡាកររុស្ស៊ី-អាមេនី Yurik Davtyan ឲ្យសន្លប់ក្នុងទឹកទី១ និងចុងខែធ្នូ ឆ្នាំ២០២២ បានផ្តួលកីឡាករថៃ សៃយុគ ក្នុងទឹកទី១ ដើម្បីក្លាយជាកីឡាករកម្ពុជាទី១បានផ្តួលដៃគូឲ្យសន្លប់នៅសង្វៀន Thai Fight និងជាកីឡាករខ្មែរទី១បានផ្តួលដៃគូឲ្យសន្លប់២លើកជាប់គ្នា ហើយក៏ជាកីឡាករកម្ពុជាទី១ឈ្នះខ្សែក្រវាត់អន្តរជាតិ Thai Fight។

ការប្រកួតដណ្តើមខ្សែក្រវាត់គុនខ្មែរពិភពលោក IPCC ធឿន ធារ៉ា បានប្រើពេល៤ទឹកទើបផ្តួលកីឡាករប្រេស៊ីល ធីអាហ្គោ (Thiago) ដើម្បីឈ្នះខ្សែក្រវាត់អន្តរជាតិមួយនេះកាលពីថ្ងៃទី១១ ខែកុម្ភៈ ឆ្នាំ២០២៣។ រូបគេបានផ្តួលដៃគូពីរនាក់ឲ្យសន្លប់ក្នុងទឹកទី១ដូចគ្នាក្នុងរាត្រីតែមួយដើម្បីឈ្នះខ្សែក្រវាត់គ្រុឌអន្តរជាតិកាលពីថ្ងៃទី១៨ ខែកុម្ភៈ ឆ្នាំ២០២៣។ រូបគេបានឈ្នះខ្សែក្រវាត់គុនខ្មែរអន្តរទ្វីប Kun Khmer Intercontinental ក្នុងកម្មវិធីសេនាគុនខ្មែរយ័ន្តប្រាំបីទិស បន្ទាប់ពីបានយកឈ្នះកីឡាកទុយនេស៊ី Sabri Benhyena កាលពីថ្ងៃទី៣០ ខែកញ្ញា ឆ្នាំ២០២៣។

ធឿន ធារ៉ា បានផ្តួលកីឡាកររូម៉ានី Alex Bublea ក្នុងទឹកទី១ កាលពីខែកក្កដា ឆ្នាំ២០២៣ ដើម្បីក្លាយជាម្ចាស់ខ្សែក្រវាត់ តេជោសន្តិភាព គុនខ្មែរពិភពលោក និងបានក្លាយជាជើងឯកគុនខ្មែរពិភពលោកក្នុងព្រឹត្តិការណ៍ប្រកួតបេក្ខភាព៨រូបមកពី៨ប្រទេសផ្សេងគ្នា (8 Men Tournament) បន្ទាប់ពីផ្តួលដៃគូ៣រូបក្នុងមួយរាត្រីនៅថ្ងៃទី២៣ ខែវិច្ឆិកា ឆ្នាំ២០២៣ ដើម្បីក្លាយជាម្ចាស់រថយន្តដ៏ថ្មីសន្លាង១គ្រឿងដែលមានតម្លៃមិនក្រោម៤ម៉ឺនដុល្លារ។

អ្វីដែលកាន់តែពិសេសនោះគឺរាល់ការប្រកួតឈ្នះខ្សែក្រវាត់ រូបគេទទួលបានប្រាក់រង្វាន់ និងប្រាក់ឧបត្ថម្ភលើកទឹកចិត្តយ៉ាងច្រើនពីសប្បុរសជន។ ការឈ្នះខ្សែក្រវាត់ខ្លះទទួលបានប្រាក់៣០លានរៀល ខ្សែក្រវាត់ខ្លះទទួលបាន៦០លានរៀល និងមានដល់១០០លានរៀលថែមទៀត ព្រមទាំងទទួលបានផ្ទះ១ល្វែងទៀត។

ចុងឆ្នាំ២០២៤ រូបគេសម្រេចបានគោលបំណងធំមួយទៀតគឺវីឡាកូនកាត់ បន្ទាប់ពីបានផ្តួលដៃគូ៣នាក់ក្នុងមួយរាត្រីដើម្បីទទួលបានខ្សែក្រវាត់គុនខ្មែរពិភពលោក 8 Men Tournament ជាលើកទី២ កាលពីវិច្ឆិកា ឆ្នាំ២០២៤។

រឹតតែអស្ចារ្យទៀតនោះ ធឿន ធារ៉ា បានក្លាយជាអត្តពលិកខ្មែរដំបូងគេបង្អស់ដែលជាប់ឈ្មោះក្នុងទស្សនាវដ្តីអាមេរិកដ៏ល្បី «Forbes» បន្ទាប់ពីទទួលបានជោគជ័យយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយ និងរួមចំណែកយ៉ាងសំខាន់ក្នុងការផ្សព្វផ្សាយគុនខ្មែរទៅលើឆាកអន្តរជាតិ៕

អត្ថបទ៖ វីរបុត្រ

The post កូនសិស្ស៣នាក់របស់លោកគ្រូ អេ ភូថង ជោគជ័យបំផុត appeared first on Kampuchea Thmey Daily.

សមិទ្ធផលធំៗ របស់ អេ អាំម៉ារីនភូថង សម្រេចបានទាំងវ័យក្មេង

chean virakbot — Mon, 16 Dec 2024 23:54:47 +0000

អេ អាំម៉ារីនភូថង កូនប្រុសបង្កើតរបស់លោកគ្រូ អេ អាំម៉ារីនភូថង និងអ្នកស្រី សាំង សុម៉ាលី កំពុងទទួលបានជោគជ័យក្នុងអាជីពប្រដាល់ទាំងវ័យក្មេង បន្ទាប់ពីបានប្រឡូកក្នុងអាជីពឈឺខ្លួនមួយនេះប្រមាណ៧ឆ្នាំកន្លងទៅ។

តាមព័ត៌មានផ្លូវការដែលបានប្រកាសតាមរយៈការឡើងសង្វៀនកាលពីថ្ងៃទី១៤ ខែធ្នូ ឆ្នាំ២០២៤ អេ អាំម៉ារីនភូថង ទើបអាយុ១៩ឆ្នាំ កម្ពស់១.៨៥ម៉ែត្រ ប៉ុន្តែធ្លងកាត់ការឡើងសង្វៀនចំនួន៧៣ដង ក្នុងនោះឈ្នះ៦៤ដង ស្មើ២ដង និងចាញ់៥ដង។ អ្វីដែលគួរឲ្យកត់សំគាល់គឺរូបគេធ្លាប់ផ្តួលដៃគូឲ្យសន្លប់៤០ដង។ សមិទ្ធផលធំៗជាច្រើនដែលរូបគេសម្រេចបានទាំងវ័យក្មេងមានដូចជា ឈ្នះខ្សែក្រវាត់នៅសង្វៀនហង្សមាស កាលពីឆ្នាំ២០២១ ទទួលបានប្រាក់រង្វាន់៤០លានរៀល បន្ទាប់ពីឈ្នះរៀមច្បង ម៉ន សាម៉េត នៅវគ្គផ្តាច់ព្រ័ត្រ។

ក្រៅពីខ្សែក្រវាត់ និងរង្វាន់ធំខាងលើ អេ អាំម៉ារីនភូថង ទទួលបានខ្សែក្រវាត់ជាច្រើនទៀត។ នៅខែមេសា ឆ្នាំ២០២៤ រូបគេបានឈ្នះខ្សែក្រវាត់គុនខ្មែរអន្តរជាតិ បន្ទាប់ពីឈ្នះកីឡាកររុស្ស៊ី Ovanes Nagabedyan ក្នុងទឹកទី១។ រូបគេសងសឹកបានសម្រេចលើមិត្តរួមជាតិ ឡុង សំណាង ដើម្បីទទួលបានខ្សែក្រវាត់សហព័ន្ធកីឡាប្រដាល់គុនខ្មែរ ក្នុងខែឧសភា ឆ្នាំ២០២៤ នៅចំពោះមុខកំពូលអ្នកប្រដាល់ហ្វីលីពីន Manny Pacquiao។ នៅពេលនោះ រូបគេទទួលបានប្រាក់រង្វាន់២០លានរៀល។

តាមរយៈកេរ្តិ៍ឈ្មោះល្បីរន្ទឺរទូទាំងប្រទេស អេ អាំម៉ារីនភូថង ទទួលបានឱកាសថតផ្សាយពាណិជ្ជកម្មឲ្យម៉ូតូ Honda Dream ស៊េរីថ្មីជាមួយតារាសម្តែងដ៏ស្រស់ស្អាត មាន សូនីតា។ អំណោយផលខាងកាយសម្បទា និងអាយុទើប១៩ឆ្នាំ កីឡាករវ័យក្មេងរូបនេះនៅមានពេលវេលាវែងឆ្ងាយក្នុងការបង្កើនភាពជោគជ័យបន្ថែមទៀត៕

អត្ថបទ៖ វីរបុត្រ

The post សមិទ្ធផលធំៗ របស់ អេ អាំម៉ារីនភូថង សម្រេចបានទាំងវ័យក្មេង appeared first on Kampuchea Thmey Daily.

គុនខ្មែរលំដាប់ជួរមុខ៣រូបទៀតទៅអង្រួនសង្វៀនជប៉ុន

chean virakbot — Tue, 04 Jun 2024 01:48:16 +0000

នាពេលខាងមុខនេះ កីឡាករគុនខ្មែរលំដាប់ជួរមុខ៣រូបទទួលបានឱកាសទៅប្រកួតនៅសង្វៀនធំរបស់ជប៉ុន។ ម្ចាស់មេដាយមាសស៊ីហ្គេម កាន់ ម៉េងហុង ទៅប្រកួតដណ្តើមខ្សែក្រវាត់ K-1 ទម្ងន់៥៥គីឡូក្រាម។ ម្ចាស់មេដាយមាសស៊ីហ្គេមទើបតែឈ្នះខ្សែក្រវាត់នៅប្រទេសបារាំងថ្មីៗ ឈុត សេរីវ៉ាន់ថង និង អេ អាំម៉ារីនភូថង ទៅប្រកួតនៅសង្វៀន Knock Out នៅថ្ងៃទី៤ ខែសីហា ឆ្នាំ២០២៤។

កីឡាករ កាន់ ម៉េងហុង ត្រូវប្រកួតជាមួយកីឡាករជប៉ុន Akihiro Kaneko ជុំដំបូង នៅថ្ងៃទី៧ ខែកក្កដា ឆ្នាំ២០២៤ ដែលមានបេក្ខភាព៨រូប។ កីឡាករជប៉ុនមានអាយុ២៧ឆ្នាំ និងបានចាប់ផ្តើមប្រឡូកប្រដាល់ឃីកបុកស៊ីងតាំងពីឆ្នាំ២០១៤។ រូបគេធ្លាប់ប្រកួតបាន២៣ដង ក្នុងនោះឈ្នះ២១ដង និងចាញ់២ដង ហើយធ្លាប់ផ្តួលដៃគូឲ្យសន្លប់១១ដង។

កីឡាករជប៉ុនរូបនេះមានខ្សែក្រវាត់ឃីកបុកស៊ីង៣ខ្សែគឺខ្សែក្រវាត់ Krush Bantamweight ឆ្នាំ២០១៨, ខ្សែក្រវាត់ K-1 Super Bantamweight ឆ្នាំ២០២២ និងខ្សែក្រវាត់ K-1 World GP Super Bantamweight ឆ្នាំ២០២២។

ចំណែក ឈុត សេរីវ៉ាន់ថង ប៉ះដៃគូដ៏ល្អម្នាក់គឺកីឡាករជប៉ុន Hisai Taimu ដែលធ្លាប់ប្រកួតឈ្នះកីឡាករកម្ពុជា ឯម សុធី និងចាញ់ពិន្ទុកីឡាករ ពេជ្រ សម្បត្តិ។ ដូច្នេះរូបគេត្រូវជួបកីឡាករកម្ពុជាទី៣នៅទឹកដីកំណើតរបស់ខ្លួនវិញម្តងដែលត្រូវបានដាក់ឈ្មោះកម្មវិធីថា Knock Out Kun Khmer។

ក្នុងកម្មវិធីជាមួយ ឈុត សេរីវ៉ាន់ថង នេះដែរ កីឡាករកម្ពស់ខ្ពស់វ័យក្មេង អេ អាំម៉ារីនភូថ ត្រូវប្រកួតជាមួយកីឡាករថៃ Dansiam Weerasakreck ដែលមានបទពិសោធច្រើននៅសង្វៀនឃីកបុកស៊ីងរបស់ជប៉ុន និងមានកម្ពស់១.៧៥ម៉ែត្រដែលទាបជាងកូនប្រុសរបស់លោក អេ ភូថង។

កីឡាករ កីឡាការិនីប្រដាល់គុនខ្មែរកាន់តែមានទីផ្សារបើកធំទូលាយនៅប្រទេសជប៉ុន បន្ទាប់ពីមួយរយៈពេលចុងក្រោយនេះថ្នាក់ដឹកនាំសហព័ន្ធ ក្លិប និងសង្វៀនឯកជនបានសហការជាមួយជប៉ុននាំយកកីឡាករជប៉ុនមកប្រកួត ហើយក៏ទទួលបានឱកាសទៅប្រកួតនៅជប៉ុន។

កាលពីឆ្នាំ២០២២ ជើងខ្លាំងគុនខ្មែរ ធឿន ធារ៉ា បានទៅប្រកួតនៅប្រទេសជប៉ុនចាញ់កីឡាករអាហ្សង់ទីន Ricardo Bravo។ កាលពីថ្ងៃទី២៧ ខែមេសា ឆ្នាំ២០២៤ ភក្តី គុនខ្មែរ បានផ្តួលកីឡាករជប៉ុន Shibata Shingo ក្នុងទឹកទី៣ នៅសង្វៀនធំសង្វៀន Knock Out។ នៅថ្ងៃទី២ ខែមិថុនា នេះ ឡៅ សៃណេត បានផ្តួលកីឡាករជប៉ុនក្នុងទឹកទី១ដើម្បីក្លាយជាកីឡាករខ្មែរទី១ឈ្នះខ្សែក្រវាត់នៅប្រទេសជប៉ុន ហើយក៏មានកីឡាករ អ៊ូច ធារិទ្ធ និងកីឡាការិនី ធន់ ស្រីពេញ ទៅប្រកួតនៅជប៉ុនកាលពីចុងសប្តាហ៍មុនដែរ៕

អត្ថបទ៖ វីរបុត្រ

The post គុនខ្មែរលំដាប់ជួរមុខ៣រូបទៀតទៅអង្រួនសង្វៀនជប៉ុន appeared first on Kampuchea Thmey Daily.

អេ អាំម៉ារីនភូថង Archives - Kampuchea Thmey Daily

លោក​ ខូវ​ ឆាយ​ សារភាព​ថា​សូម្បី​តែ​លោក​មើល​ការ​ប្រកួត​របស់​ អេ អាំម៉ារីនភូថង​ ក៏​ធុញ​ដែរ​

ខាន​​ចាញ់​យូរ​ ធឿន​ ធារ៉ា​ និង​ អេ អាំម៉ារីន ចាប់ដៃ​គ្នាចាញ់​​ក្នុង​កម្មវិធី​តែ​មួយ​

ក្រោយ Dan Siam ដកខ្លួន អេ អាំម៉ារីន ត្រូវ​ជួប​ម្ចាស់​ផ្ទះជប៉ុនជាម្ចាស់ខ្សែក្រវាត់ ៣ ខ្សែ

ម៉ឺន មេឃា ទៅ Knock Out លើកដំបូង ជួបម្ចាស់ផ្ទះជប៉ុន មានប្រវត្តិ ៥ ឆ្នាំចុងក្រោយចាញ់ ២ដង

គុនខ្មែរ​ផ្តល់ឲ្យ អេ អាំម៉ារីនភូថង​ មាន​រថយន្ត​​២​គ្រឿង​ក្នុង​វ័យ​១៩​ឆ្នាំ

កូន​សិស្ស​​៣​នាក់​របស់​លោក​គ្រូ អេ ភូថង ជោគជ័យ​បំផុត

សមិទ្ធផល​ធំ​ៗ របស់ ​អេ អាំម៉ារីនភូថង សម្រេច​បាន​ទាំង​វ័យ​ក្មេង

គុន​ខ្មែរលំដាប់ជួរមុខ៣រូបទៀតទៅអង្រួនសង្វៀន​ជប៉ុន

លោក ខូវ ឆាយ សារភាពថាសូម្បីតែលោកមើលការប្រកួតរបស់ អេ អាំម៉ារីនភូថង ក៏ធុញដែរ

ខានចាញ់យូរ ធឿន ធារ៉ា និង អេ អាំម៉ារីន ចាប់ដៃគ្នាចាញ់ក្នុងកម្មវិធីតែមួយ

ក្រោយ Dan Siam ដកខ្លួន អេ អាំម៉ារីន ត្រូវជួបម្ចាស់ផ្ទះជប៉ុនជាម្ចាស់ខ្សែក្រវាត់ ៣ ខ្សែ

គុនខ្មែរផ្តល់ឲ្យ អេ អាំម៉ារីនភូថង មានរថយន្ត២គ្រឿងក្នុងវ័យ១៩ឆ្នាំ

កូនសិស្ស៣នាក់របស់លោកគ្រូ អេ ភូថង ជោគជ័យបំផុត

សមិទ្ធផលធំៗ របស់ អេ អាំម៉ារីនភូថង សម្រេចបានទាំងវ័យក្មេង

គុនខ្មែរលំដាប់ជួរមុខ៣រូបទៀតទៅអង្រួនសង្វៀនជប៉ុន