អ្នកកាសែត Archives - Kampuchea Thmey Daily

ត្រឹមជាង២ឆ្នាំ អ្នកកាសែត ២៦២នាក់ ត្រូវសម្លាប់នៅហ្គាហ្សា ដោយសារអ៊ីស្រាអែល

Minea Neu — Mon, 04 May 2026 07:04:57 +0000

សមាគមអ្នកកាសែតប៉ាឡេស្ទីន បានលើកឡើងនៅថ្ងៃអាទិត្យថា ខ្លួនបានកត់ត្រាការរំលោភបំពាន និងការវាយប្រហារជាង ៣០០លើក ប្រឆាំងនឹងអ្នកកាសែតប៉ាឡេស្ទីនចាប់តាំងពីដើមឆ្នាំ២០២៦ ចំពេលមានការកើនឡើងនៃការកំណត់គោលដៅលើបុគ្គលិកក្នុងប្រព័ន្ធផ្សព្វផ្សាយ។ យោងបណ្តាញផ្សព្វផ្សាយអន្តរជាតិ។

ការប្រកាសរបស់សមាគម បានធ្វើឡើង អំឡុងពេលប្រារព្ធទិវាសេរីភាពសារព័ត៌មានពិភពលោកលើកទី៣៣ និងការតវ៉ាប្រឆាំងនឹងការវាយប្រហាររបស់អ៊ីស្រាអែលជាបន្តបន្ទាប់លើអ្នកកាសែត។ នេះបើយោងតាមភ្នាក់ងារសារព័ត៌មានតួកគី Anadolu ចុះផ្សាយថ្ងៃទី០៣ ខែឧសភា ឆ្នាំ២០២៦ ។

អ្នកកាសែតដែលអ៊ីស្រាអែលបានសម្លាប់។ រូបភាព៖ Al Jazeera

លោក Omar Nazzal អនុប្រធានសមាគមថ្លែងទៅកាន់មនុស្សជាច្រើនថា៖ « សកម្មភាពដែលរៀបចំឡើងនៅថ្ងៃសេរីភាពសារព័ត៌មានពិភពលោក មានគោលបំណងបញ្ជាក់ពីលក្ខខណ្ឌពិសេសនិងមិនធ្លាប់មានពីមុនមកដែលអ្នកកាសែតប៉ាឡេស្ទីនបានធ្វើការ»។

លោក បន្ថែមថា៖ « អ្នកសារព័ត៌មានកំពុងប្រឈមនឹងសង្គ្រាមដ៏សាហាវយង់ឃ្នងបំផុតរបស់អ៊ីស្រាអែល។ ការរំលោភបំពានជាង ៤០០០ ត្រូវបានកត់ត្រាប្រឆាំងនឹងអ្នកបម្រើការក្នុងប្រព័ន្ធផ្សព្វផ្សាយ ចាប់តាំងពីការចាប់ផ្តើមសង្គ្រាមលើតំបន់ហ្គាហ្សាក្នុងខែតុលា ឆ្នាំ២០២៣»។

ដោយឡែក លោក Mohammad al-Lahham ប្រធានគណៈកម្មាធិការសេរីភាពប៉ាឡេស្ទីននិយាយថា៖ « ចំនួនអ្នកសារព័ត៌មានដែលត្រូវបានសម្លាប់បានកើនឡើងដល់ ២៦២នាក់ មានទាំងបុរសនិងស្រ្តី ចាប់តាំងពីថ្ងៃនោះមក ក្នុងនោះ មាន ២៦១នាក់ នៅក្នុងតំបន់ហ្គាហ្សា ដោយអ្នកសារព័ត៌មានចំនួន៦នាក់ ត្រូវបានសម្លាប់ចាប់តាំងពីដើមឆ្នាំ២០២៦ »។

លោកបន្ថែមថា៖ « ឆ្នាំនេះក៏មានអ្នករងរបួសដោយផ្ទាល់ចំនួន ១០នាក់ ការចាប់ខ្លួនចំនួន ២២ករណី ការឃុំខ្លួន ឬការរារាំងមិនឱ្យផ្សាយព័ត៌មានចំនួន ១២០ករណី និងការវាយប្រហារចំនួន ១២លើក ធ្វើឡើងដោយអ៊ីស្រាអែល»។

បើទោះបីជាមានបទឈប់បាញ់ចាប់តាំងពីខែតុលា ឆ្នាំ២០២៥ ក៏ដោយ ក៏អ៊ីស្រាអែលនៅតែបន្តវាយប្រហារជារៀងរាល់ថ្ងៃ និងការបិទផ្លូវ សម្លាប់មនុស្សរាប់រយនាក់បន្ថែមទៀត ធ្វើឱ្យស្ថានភាពមនុស្សធម៌កាន់តែអាក្រក់ទៅៗនៅក្នុងតំបន់ ដែលជាជម្រករបស់ប្រជាជនប៉ាឡេស្ទីនជាង ២.៤លាននាក់ និងមានមនុស្ស ១.៥លាននាក់ផ្លាស់ទីលំនៅ៕

ប្រែសម្រួល៖ ណឺ មិនា

The post ត្រឹមជាង២ឆ្នាំ អ្នកកាសែត ២៦២នាក់ ត្រូវសម្លាប់នៅហ្គាហ្សា ដោយសារអ៊ីស្រាអែល appeared first on Kampuchea Thmey Daily.

ទីវាសេរីភាពសារព័ត៌មាន៖ អឺរ៉ុបអំពាវនាវឱ្យស៊ើបអង្កេត លើការសម្លាប់អ្នកកាសែតនៅតំបន់ជម្លោះ

Minea Neu — Mon, 04 May 2026 04:19:11 +0000

ប្រធានគោលនយោបាយការបរទេសរបស់សហភាពអឺរ៉ុប (EU) លោកស្រី Kaja Kallas បានអំពាវនាវនៅថ្ងៃអាទិត្យ ឱ្យមានការស៊ើបអង្កេតពេញលេញមួយលើការសម្លាប់អ្នកកាសែតនៅក្នុងតំបន់ជម្លោះ រួមមាន នៅប្រទេសអ៊ុយក្រែន តំបន់ហ្គាហ្សា ប្រទេសលីបង់ និងផ្នែកខ្លះនៃទ្វីបអាហ្វ្រិក។

យោងតាមភ្នាក់ងារសារព័ត៌មានតួកគី Anadolu ផ្សាយថ្ងៃទី០៣ ខែឧសភា ឆ្នាំ២០២៦ លោកស្រី Kallas បានលើកឡើងក្នុងសេចក្តីថ្លែងការណ៍មួយក្នុងនាមសហភាពអឺរ៉ុប សម្រាប់ទិវាសេរីភាពសារព័ត៌មានពិភពលោកលើកទី៣៣ ឆ្នាំ២០២៦ ថា៖ « ឆ្នាំ២០២៥ គឺជាឆ្នាំដ៏សាហាវបំផុតសម្រាប់អ្នកកាសែតទូទាំងពិភពលោក ហើយការសម្លាប់ ការធ្វើឱ្យរបួស ឬការគំរាមកំហែងពួកគេក្លាយជាការពិតដ៏គួរឱ្យរន្ធត់មួយ»។

ប្រធានគោលនយោបាយការបរទេសរបស់សហភាពអឺរ៉ុប លោកស្រី Kaja Kallas. រូបភាព៖ Reuters.

លោកស្រី បញ្ជាក់ថា៖ «ការសម្លាប់អ្នកកាសែត និងអ្នកជំនាញប្រព័ន្ធផ្សព្វផ្សាយ ដូចយើងបានឃើញនៅក្នុងសង្គ្រាមឈ្លានពានរបស់រុស្ស៊ីប្រឆាំងនឹងអ៊ុយក្រែន និងនៅក្នុងជម្លោះបច្ចុប្បន្ននៅមជ្ឈិមបូព៌ា ថ្មីៗនេះនៅតំបន់ហ្គាហ្សា និងនៅលីបង់ ក៏ដូចជានៅអាហ្វ្រិក គួរតែត្រូវបានស៊ើបអង្កេតយ៉ាងពេញលេញ ហើយអ្នកនៅពីក្រោយរឿងនេះត្រូវតែទទួលខុសត្រូវ»។

លោកស្រី Kallas ក៏បានសង្កត់ធ្ងន់លើតម្រូវការសម្រាប់សារព័ត៌មានសេរី ដោយគូសបញ្ជាក់ថា ប្រព័ន្ធផ្សព្វផ្សាយឯករាជ្យគឺជាមូលដ្ឋានគ្រឹះនៃសង្គមប្រជាធិបតេយ្យ។

លោកស្រីបន្ថែមថា៖ « ច្បាប់អន្តរជាតិគឺច្បាស់លាស់! អ្នកសារព័ត៌មានត្រូវតែទទួលបានការការពារគ្រប់ពេលវេលា។ ពួកគេត្រូវតែអាចអនុវត្តការងាររបស់ពួកគេដោយសេរី ដោយគ្មានការជ្រៀតជ្រែកហួសហេតុ ការភ័យខ្លាចនៃអំពើហិង្សា ការយាយី ការបំភិតបំភ័យ ការធ្វើទុក្ខបុកម្នេញ ឬការបណ្តេញចេញណាមួយឡើយ»៕

ប្រែសម្រួល៖ ណឺ មិនា

The post ទីវាសេរីភាពសារព័ត៌មាន៖ អឺរ៉ុបអំពាវនាវឱ្យស៊ើបអង្កេត លើការសម្លាប់អ្នកកាសែតនៅតំបន់ជម្លោះ appeared first on Kampuchea Thmey Daily.

អ៊ីស្រាអែលសម្លាប់អ្នកកាសែតបីនាក់ក្នុងថ្ងៃតែមួយ ទាំងនៅលីបង់និងតំបន់ហ្គាហ្សា

Minea Neu — Thu, 09 Apr 2026 04:46:07 +0000

គណៈកម្មាធិការការពារអ្នកកាសែត (CPJ) ថ្កោលទោសយ៉ាងខ្លាំង ចំពោះការសម្លាប់អ្នកកាសែតបីនាក់នៅក្នុងប្រទេសលីបង់និងតំបន់ហ្គាហ្សាដោយភាគីអ៊ីស្រាអែលក្នុងរយៈពេលមួយថ្ងៃ ដែលមានម្នាក់ក្នុងចំណោមពួកគេគឺជាការកំណត់គោលដៅវាយប្រហាររបស់យោធាអ៊ីស្រាអែលតែម្តង។ គំរូនៃការវាយប្រហារនេះ គូសបញ្ជាក់ពីបរិបទនៃភាពគ្មានទោសពៃរ៍កាន់តែអាក្រក់ទៅៗ និងការមិនអើពើនឹងច្បាប់អន្តរជាតិ។

យោងតាមសារព័ត៌មាន Al Jazeera និង CPJ ផ្សាយថ្ងៃទី៨ ខែមសា ឆ្នាំ២០២៦ បានលើកឡើងថា ការវាយប្រហារដោយចេតនា មិនរើសគោលដៅ ឬមិនបែងចែកលើអ្នកកាសែតនិងជនស៊ីវិលក្រោមច្បាប់មនុស្សធម៌អន្តរជាតិ គឺជាឧក្រិដ្ឋកម្មសង្គ្រាមជាក់ស្តែង ជាពិសេសតម្រូវឱ្យមានការស៊ើបអង្កេតបន្ទាន់និងប្រកបដោយប្រសិទ្ធភាព។

ការវាយប្រហាររបស់អ៊ីស្រាអែលលើលីបង់។ រូបភាព៖ Reuters

អ៊ីស្រាអែលបើកការវាយប្រហារដ៏សាហាវទាំងនៅតំបន់ហ្គាហ្សានិងលីបង់នៅថ្ងៃពុធ ក្នុងពេលដែលបទឈប់បាញ់ទូទាំងតំបន់ចូលជាធរមាន ដោយសម្លាប់អ្នកកាសែត លោក Mohammed Samir Washah, អ្នកនាង Ghada Dayekh និងអ្នកនាង Suzan Khalil ដែលការណ៍នេះ ជាកំណើននៃការវាយប្រហារលើមកលើអ្នកសារព័ត៌មាន។

លោក Washah ជាអ្នកឆ្លើយឆ្លងព័ត៌មានរបស់ Al Jazeera ដែលមានមូលដ្ឋាននៅប្រទេសកាតា ត្រូវបានសម្លាប់នៅពេលដែលដ្រូនរបស់អ៊ីស្រាអែលវាយប្រហារមកលើរថយន្តរបស់លោកនៅក្នុងទីក្រុងហ្គាហ្សា។

ចំណែកនៅប្រទេសលីបង់ ជាការវាយប្រហារដាច់ដោយឡែកពីគ្នារបស់អ៊ីស្រាអែល បានសម្លាប់អ្នកនាង Dayekh ដែលជាពិធីកររបស់សារព័ត៌មាន Sawt Al-Farah មានមូលដ្ឋាននៅលីបង់ និងអ្នកនាង Khalil ជាអ្នកយកព័ត៌មាននិងជាពិធីករនៅលើទូរទស្សន៍ Al-Manar និងវិទ្យុ Al-Nour ។

លោក Mohammed Samir Washah ជាអ្នកឆ្លើយឆ្លងព័ត៌មានរបស់ Al Jazeera ។ រូបភាព៖ ICSPR

ការសម្លាប់ទាំងនេះកើតឡើងចំពេលមានការទម្លាក់គ្រាប់បែកកាន់តែខ្លាំងរបស់អ៊ីស្រាអែល នៅទូទាំងប្រទេសលីបង់ ប៉ុន្មានម៉ោង បន្ទាប់ពីបទឈប់បាញ់រវាងអ៊ីរ៉ង់-អ៊ីស្រាអែល និងសហរដ្ឋអាមេរិក។

ក្នុងពេលនោះដែរ មានការវាយប្រហារជាង ១០០លើកធ្វើឡើងក្នុងរយៈពេលប៉ុន្មាននាទី សម្លាប់ជនស៊ីវិល ២៥៤នាក់ និងរងរបួស ១ ១៦៥នាក់ ទោះបីជាមានការប្រកាសបទឈប់បាញ់ដោយភាគីអាមេរិក-អ៊ីរ៉ង់ក៏ដោយ។

CPJ សង្កត់ធ្ងន់ថា៖ « ការសម្លាប់អ្នកកាសែតនៅតំបន់ហ្គាហ្សានិងប្រទេសលីបង់នាពេលបច្ចុប្បន្ននេះ វាមិនមែនជារឿងចៃដន្យទេ តែជាផ្នែកមួយនៃការវាយប្រហារកាន់តែទូលំទូលាយលើសេរីភាពសារព័ត៌មាន។ សហគមន៍អន្តរជាតិត្រូវតែធ្វើសកម្មភាពឥឡូវនេះ ដើម្បីបញ្ឈប់ការវាយប្រហារខុសច្បាប់របស់អ៊ីស្រាអែល»៕

ប្រែសម្រួល៖ ណឺ មិនា

The post អ៊ីស្រាអែលសម្លាប់អ្នកកាសែតបីនាក់ក្នុងថ្ងៃតែមួយ ទាំងនៅលីបង់និងតំបន់ហ្គាហ្សា appeared first on Kampuchea Thmey Daily.

លោក ត្រាំ គំរាមចាប់អ្នកកាសែតម្នាក់ដាក់គុក បន្ទាប់ពីធ្វើឱ្យបែកធ្លាយព័ត៌មានយោធាអាមេរិក

Minea Neu — Tue, 07 Apr 2026 04:31:13 +0000

ប្រធានាធិបតីសហរដ្ឋអាមេរិក លោក ដូណាល់ ត្រាំ គំរាមចាប់អ្នកកាសែតម្នាក់ដាក់គុក បន្ទាប់ពីលេចធ្លាយព័ត៌មានលម្អិតនិងធ្វើឱ្យស្មុគស្មាញដល់បេសកកម្មជួយសង្គ្រោះដល់សមាជិកអាកាសយានិកនៃយន្តហោះចម្បាំង F-១៥E Strike Eagle របស់អាមេរិក ដែលត្រូវបានបាញ់ទម្លាក់លើទឹកដីអ៊ីរ៉ង់កាលពីសប្តាហ៍មុន។ នេះបើយោងតាមសារព័ត៌មាន Al Jazeera និង RT ផ្សាយថ្ងៃទី៦ ខែមេសា ឆ្នាំ២០២៦ ។

លោក ត្រាំ និងមន្រ្តីការពារជាតិអាមេរិក។ រូបភាព៖ Reuters

ថ្លែងក្នុងសន្និសីទសារព័ត៌មានមួយនៅសេតវិមាន លោក ត្រាំ បានលើកឡើងថា អ្នកបើកយន្តហោះត្រូវបានជួយសង្គ្រោះក្នុងរយៈពេលប៉ុន្មានម៉ោងនៅថ្ងៃសុក្រ ខណៈយោធាកាន់ប្រព័ន្ធអាវុធដែលរងរបួសធ្ងន់ធ្ងរ និងលាក់ខ្លួនក្នុងភ្នំបានជួយសង្គ្រោះនៅព្រឹកថ្ងៃអាទិត្យ បន្ទាប់ពីបេសកកម្មស្មុគស្មាញមួយពាក់ព័ន្ធនឹងយន្តហោះជាង ១៥០គ្រឿង។

លោក បន្តថា រដ្ឋាភិបាលសង្ឃឹមថានឹងរក្សាការបាត់ខ្លួនរបស់អ្នកបើកយន្តហោះទីពីរជាសម្ងាត់ ដើម្បីការពារពួកគេពីកងកម្លាំងអ៊ីរ៉ង់។

យ៉ាងណាបន្ទាប់ពីប្រព័ន្ធផ្សព្វផ្សាយជាច្រើនរាយការណ៍ថាសមាជិកនាវិកម្នាក់នៅតែបាត់ខ្លួន លោក ត្រាំ ចោទប្រកាន់ថាការផ្សាយព័ត៌មាននេះបានជូនដំណឹងដល់យោធាអ៊ីរ៉ង់និងធ្វើឱ្យជីវិតរបស់សមាជិកយោធាគ្រោះថ្នាក់។

លោកត្រាំប្រាប់អ្នកយកព័ត៌មានថា៖ «យើងនឹងទៅកាន់ក្រុមហ៊ុនផ្សព្វផ្សាយដែលបានបញ្ចេញព័ត៌មាននេះ ហើយយើងនឹងនិយាយថា វាជាសន្តិសុខជាតិ មិនធ្វើវាទេ ឬចង់ទៅចូលគុក។ អ្នកដែលធ្វើព័ត៌មាននេះ នឹងទៅចូលគុក បើសិនគាត់ [អ្នកកាសែត] មិនព្រមនិយាយឱ្យដឹងពីប្រភព [ដែលបញ្ចេញព័ត៌មាននេះ]។

ប្រធានាធិបតីរូបអាមេរិកបន្តទៀតថា៖ « វាបានក្លាយជាប្រតិបត្តិការដ៏លំបាកជាងមុនដោយសារលេចធ្លាយព័ត៌មាន។ ភ្លាមៗនោះ ប្រទេសអ៊ីរ៉ង់ទាំងមូលបានដឹងថា មានអ្នកបើកយន្តហោះម្នាក់នៅលើទឹកដីរបស់ពួកគេ កំពុងតស៊ូដើម្បីរក្សាជីវិតរបស់គាត់»៕

ប្រែសម្រួល៖ ណឺ មិនា

The post លោក ត្រាំ គំរាមចាប់អ្នកកាសែតម្នាក់ដាក់គុក បន្ទាប់ពីធ្វើឱ្យបែកធ្លាយព័ត៌មានយោធាអាមេរិក appeared first on Kampuchea Thmey Daily.

អ៊ីស្រាអែលជាប្រទេសសម្លាប់អ្នកកាសែតច្រើនបំផុតក្នុងឆ្នាំ២០២៥៖ CPJ

Minea Neu — Thu, 26 Feb 2026 09:40:41 +0000

អ៊ីស្រាអែលបានសម្លាប់បុគ្គលិកប្រព័ន្ធផ្សព្វផ្សាយនិងអ្នកកាសែតក្នុងមួយតំបន់យ៉ាងហោចណាស់ ៨៤ នាក់ ក្នុងឆ្នាំ ២០២៥ ច្រើនជាងប្រទេសដទៃទៀត និងជាឆ្នាំដែលអ្នកធ្វើការលើប្រព័ន្ធផ្សព្វផ្សាយស្លាប់ច្រើនបំផុតមិនធ្លាប់មានក្នុងប្រវត្តិសាស្រ្ត។

អ្នកកាសែតប៉ាឡេស្ទីន។ រូបភាព៖ Reuters

យោងតាម Al Jazeera ចុះផ្សាយថ្ងៃទី២៥ខែកុម្ភៈ គណៈកម្មាធិការការពារអ្នកកាសែត (CPJ) បានចេញផ្សាយរបាយការណ៍ប្រចាំឆ្នាំនេះនៅថ្ងៃពុធ ហើយបានចង្អុលបង្ហាញអំពី «វប្បធម៌គ្មានទោសពៃរ៍ជាប់លាប់ ចំពោះការវាយប្រហារលើអ្នកសារព័ត៌មានដោយយោធាអ៊ីស្រាអែល»។

គួរបញ្ជាក់ថា បុគ្គលិកប្រព័ន្ធផ្សព្វផ្សាយចំនួន ១២៩នាក់ ត្រូវបានសម្លាប់ នៅកន្លែងផ្សេងៗទៀតក្នុងប្រទេសឬតំបន់តែ១ឆ្នាំ២០២៥ ជាតួលេខខ្ពស់បំផុត ចាប់តាំងពីក្រុមអ្នកឃ្លាំមើលចាប់ផ្តើមកំណត់ត្រានៅឆ្នាំ ១៩៩២។

អ៊ីស្រាអែលទទួលខុសត្រូវចំពោះចំនួនអ្នកស្លាប់តែជាងពីរភាគបី នៃអ្នកទាំងអស់នោះប៉ុណ្ណោះ។

គណៈកម្មការអ្នកកាសែត CPJ និយាយថា បុគ្គលិកប្រព័ន្ធផ្សព្វផ្សាយភាគច្រើនដែលអ៊ីស្រាអែលសម្លាប់គឺជាជនជាតិប៉ាឡេស្ទីន ប៉ុន្តែការវាយប្រហារតាមអាកាសរបស់អ៊ីស្រាអែលក៏បានសម្លាប់បុគ្គលិកចំនួន ៣១នាក់ ក្នុងការិយាល័យកាសែតយេម៉ែន(Yemeni)ផងដែរ។

អ៊ីស្រាអែលធ្វើការវាយប្រហារយ៉ាងខ្លាំង ចំពោះអ្នកកាសែតជាគោលដៅរបស់ពួកគេ។ CPJ ចាត់ថ្នាក់ថា៖«វាជាឃាតកម្ម ដែលអនុវត្តឧប្បត្តិហេតុដ៏សាហាវចំនួន ៣៨ករណី ក្នុងចំណោម៤៧ករណី ត្រូវបានកត់ត្រាទូទាំងពិភពលោកដោយអង្គការ CPJ»។

CPJ លើកឡើងក្នុងសេចក្តីថ្លែងការណ៍មួយថា៖«បច្ចុប្បន្ននេះប្រទេសអ៊ីស្រាអែលបានសម្លាប់អ្នកកាសែតច្រើនជាងរដ្ឋាភិបាលដទៃទៀតចាប់តាំងពី CPJ ចាប់ផ្តើមប្រមូលចងក្រងរបាយការណ៍នៅឆ្នាំ ១៩៩២»។

CPJ ព្រមានទៀតថា ចំនួនពិតប្រាកដនៃអ្នកកាសែតដែលត្រូវបានអ៊ីស្រាអែលកំណត់គោលដៅ និងសម្លាប់អាចមានចំនួនខ្ពស់ជាងនេះទៅទៀត ព្រោះការសម្លាប់មួយចំនួនអាចត្រូវលាក់បាំងដោយការរឹតត្បិតសារព័ត៌មាន និងភាពលំបាកផ្នែកមនុស្សធម៌ ធ្វើឱ្យស្មុគស្មាញដល់ការ ស៊ើបអង្កេត អំឡុងពេលសង្គ្រាមប្រល័យពូជសាសន៍របស់អ៊ីស្រាអែលលើតំបន់ហ្គាហ្សា។

CPJ បន្តថា៖«ដោយមានភស្តុតាងជាច្រើនត្រូវបានបំផ្លាញចោលនាពេលបច្ចុប្បន្ននេះ ចំនួនពិតប្រាកដនៃអ្នកកាសែតប៉ាឡេស្ទីនក្នុងតំបន់ហ្គាហ្សា ត្រូវបានកំណត់គោលដៅដោយចេតនា របស់អ៊ីស្រាអែល អាចនឹងគ្មានអ្នកដឹងឡើយ»៕

ប្រែសម្រួល៖ ណឺ មិនា

The post អ៊ីស្រាអែលជាប្រទេសសម្លាប់អ្នកកាសែតច្រើនបំផុតក្នុងឆ្នាំ២០២៥៖ CPJ appeared first on Kampuchea Thmey Daily.

អ្នកសារព័ត៌មានស្លាប់ច្រើនបំផុតនៅប៉ាឡេស្ទីនក្នុងឆ្នាំ២០២៥ ខណៈតំបន់ច្រើនទៀតមានហានិភ័យខ្ពស់

Minea Neu — Fri, 02 Jan 2026 02:59:56 +0000

ប៉ាឡេស្ទីនគឺជាកន្លែងដែលអ្នកកាសែតស្លាប់ច្រើនជាងគេក្នុងឆ្នាំ ២០២៥ ហើយទឹកដីនេះគឺជាកន្លែងដ៏គ្រោះថ្នាក់បំផុតសម្រាប់អ្នកកាសែតដែលចុះបំពេញភារកិច្ច បើទោះបីជាពួកគេជាអ្នកដែលមានវិជ្ជាជីវៈយ៉ាងណាក៏ដោយ។ នេះបើយោងតាមរបាយការណ៍របស់អ្នកកាសែតជុំវិញពិភពលោក។

អ្នកកាសែតនៅតំបន់ហ្គាហ្សា។ Reuters

សហព័ន្ធអ្នកសារព័ត៌មានអន្តរជាតិ (IFJ) បាននិយាយថា តំបន់នេះមានអ្នកកាសែតស្លាប់ចំនួន៧៤នាក់ កាលពីឆ្នាំមុន ជាងពាក់កណ្តាលនៃអ្នកកាសែតចំនួន ១២៨នាក់ និងអ្នកធ្វើការផ្នែកប្រព័ន្ធផ្សព្វផ្សាយផ្សេងទៀតផងដែរ។ នេះបើយោងតាមរបាយការណ៍មួយដែលបានចេញផ្សាយកាលពីថ្ងៃពុធ។

សារព័ត៌មាន Al Jazeera បានផ្សាយឲ្យដឹងថា ជម្លោះនៅក្នុងតំបន់នៅមជ្ឈិមបូព៌ានេះបានសម្លាប់អ្នកកាសែតមានដូចជា ជនជាតិអាហ្រ្វិកចំនួន ១៨នាក់ អាស៊ីប៉ាស៊ីហ្វិក១៥នាក់ អាមេរិក ១១នាក់ និងអឺរ៉ុបចំនួន ១០នាក់។ ភាគច្រើននៃអ្នកស្លាប់ទាំងនោះជាបុរស ប៉ុន្តែក្នុងរបាយការណ៍នោះមានស្ត្រី ១០នាក់ផងដែរ។

អគ្គលេខាធិការនៃ (IFJ) លោក Anthony Bellanger បានឱ្យដឹងថា៖«បើតាមស្ថិតិអ្នកកាសែតចំនួន ១២៨ បានសម្លាប់ក្នុងរយៈពេលតែមួយឆ្នាំប៉ុណ្ណោះ ដែលនេះគឺជាវិបត្តិសកលដ៏ធំ។ ការស្លាប់ទាំងនេះគឺជាការរំឮកថា វាជាអំពើដ៏ឃោរឃៅមួយ ដែលអ្នកសារព័ត៌មានកំពុងត្រូវបានកំណត់ជាគោលដៅនិទណ្ឌភាព ដោយពួកគេគ្រាន់តែធ្វើការងាររបស់ពួកគេសោះ»។

គួរឱ្យដឹងផងដែរថា អ្នកកាសែតជនជាតិប៉ាឡេស្ទីនបានស្លាប់ច្រើនជាងគេក្នុងចំណោមអ្នកកាសែតបរទេសផ្សេងទៀត អ្នកសារព័ត៌មានវិជ្ជាជីវៈប៉ាឡេស្ទីនចំនួន ៥៦នាក់ត្រូវបានសម្លាប់ក្នុងឆ្នាំ ២០២៥។

មិនតែប៉ុណ្ណោះអ្នកកាសែតដែលបានស្លាប់ក៏មាន អ្នកដែលមកពីសារព័ត៌មាន Al Jazeera ផងដែរ។

ខណៈដែលមជ្ឈិមបូព៌ាគឺជាតំបន់ដែលមានមនុស្សស្លាប់ច្រើនបំផុតចំនួន៣ឆ្នាំជាប់ៗគ្នាក្នុងឆ្នាំ២០២៥ អាស៊ីប៉ាស៊ីហ្វិកក៏មានចំនួនអ្នកកាសែត និងបុគ្គលិកប្រព័ន្ធផ្សព្វផ្សាយច្រើនជាងគេដែលនៅពីក្រោយការឃុំខ្លួន។ ករណីនេះកើតឡើង នៅក្នុងប្រទេសចិន និងហុងកុង ដែលរាប់បញ្ចូលអ្នកកាសែតចំនួន ១៤៣នាក់ បន្ទាប់មកមាន ៤៩នាក់នៅក្នុងប្រទេសមីយ៉ាន់ម៉ា និង ៣៧នាក់នៅក្នុងប្រទេសវៀតណាម។

តែយ៉ាងណាអឺរ៉ុបគឺជាចំណុចក្តៅនៃការឃុំខ្លួនអ្នកកាសែតមួយផ្សេងទៀតកាលពីឆ្នាំមុន ដែលមានចំនួនអ្នកកាសែតចំនួន ១៤៩នាក់ កំពុងជាប់ពន្ធនាគារ។ IFJ បានសន្មតថា តួលេខនេះកើនឡើង ៤០ភាគរយ បើធៀបនឹងឆ្នាំមុន ថា៖ «វាជាការបង្ក្រាបសំឡេងអ្នកកាសែតកាន់តែខ្លាំងនៅ Azerbaijan និងរុស្ស៊ី» ៕

ប្រែសម្រួល៖ ណឺ មិនា

The post អ្នកសារព័ត៌មានស្លាប់ច្រើនបំផុតនៅប៉ាឡេស្ទីនក្នុងឆ្នាំ២០២៥ ខណៈតំបន់ច្រើនទៀតមានហានិភ័យខ្ពស់ appeared first on Kampuchea Thmey Daily.

AFP អំពាវនាវឱ្យជម្លៀសអ្នកកាសែតនៅហ្គាហ្សា ជាបន្ទាន់

Bun sopheap — Wed, 23 Jul 2025 04:49:32 +0000

សមាគមអ្នកកាសែត (SDJ) ដែលជាសមាគមបុគ្គលិកនៅទីភ្នាក់ងារសារព័ត៌មានបារាំង (AFP) បានចេញការអំពាវនាវជាបន្ទាន់ឱ្យចាត់វិធានការជាបន្ទាន់ដើម្បីការពារអ្នករាយការណ៍ឯករាជ្យប៉ាឡេស្ទីនដែលកំពុងធ្វើការនៅហ្គាហ្សា ចំពេលស្ថានភាពសង្គ្រាមកាន់តែយ៉ាប់យ៉ឺន។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AFP កាលពីថ្ងៃទី២២ខែកក្កដានេះ ។

អ្នកកាសែតដែលរាយការណ៍ផ្ទាល់ពីហ្គាហ្សា។ (រូបភាព៖ Getty)

នៅក្នុងសេចក្តីថ្លែងការណ៍មួយដែលបានចេញផ្សាយកាលពីថ្ងៃច័ន្ទ SDJ បានព្រមានថាស្ថានភាពរបស់អ្នកកាសែតបានក្លាយទៅជាធ្ងន់ធ្ងរ ដោយលើកឡើងពីស្ថានភាពរស់នៅកាន់តែអាក្រក់ និងការគំរាមកំហែងឥតឈប់ឈរចំពោះជីវិតរបស់ពួកគេដោយសារតែជម្លោះដែលកំពុងបន្ត។

អ្នកគ្រប់គ្រង AFP បានបន្ទរពីកង្វល់របស់ SDJ ដោយទទួលស្គាល់នូវភាពក្លាហាន និងការប្តេជ្ញាចិត្តដ៏វិសេសវិសាលរបស់ភ្នាក់ងាររបស់ខ្លួនក្នុងកាលៈទេសៈដ៏លំបាកនេះ។ AFP បាននិយាយថា៖ «យើងបានឃើញស្ថានភាពរបស់ពួកគេកាន់តែអាក្រក់ទៅៗ ហើយឥឡូវនេះវាបានក្លាយទៅជាមិនអាចទ្រាំទ្របាន» ដោយបន្ថែមថា ទោះបីជាទីភ្នាក់ងារនេះបានជម្លៀសបុគ្គលិកទាំងប្រាំបីនាក់ និងក្រុមគ្រួសាររបស់ពួកគេដោយជោគជ័យនៅចន្លោះខែមករា និងខែមេសា ឆ្នាំ២០១៤ ក៏ដោយ ក៏ដំណើរការសម្រាប់អ្នករាយការណ៍ឯករាជ្យមានការលំបាកជាងដោយសារតែការឡោមព័ទ្ធហ្គាហ្សារបស់អ៊ីស្រាអែល។

អ្នកកាសែតសោកសៅក្រោយក្រុមការងាររបស់ខ្លួនស្លាប់នៅក្នុងការវាយប្រហាររបស់អ៊ីស្រាអែលនៅហ្គាហ្សា។ (រូបភាព៖ EPA)

ចាប់តាំងពីថ្ងៃទី ៧ ខែតុលា ឆ្នាំ ២០២៣មក អ៊ីស្រាអែលបានរារាំងអ្នកសារព័ត៌មានអន្តរជាតិទាំងអស់ពីការចូលទៅក្នុងតំបន់ហ្គាហ្សា ដែលធ្វើឱ្យការងាររបស់អ្នករាយការណ៍ឯករាជ្យប៉ាឡេស្ទីនក្នុងស្រុកមានសារៈសំខាន់សម្រាប់ការផ្សាយព័ត៌មានជាសកល។ ទោះជាយ៉ាងណាក៏ដោយ AFP បានសង្កត់ធ្ងន់ថាសុវត្ថិភាពរបស់ពួកគេឥឡូវនេះត្រូវតែជាអាទិភាព។

ឥឡូវនេះ ទីភ្នាក់ងារនេះកំពុងស្វែងរកមធ្យោបាយយ៉ាងសកម្មដើម្បីជម្លៀសទាំងនោះ និងក្រុមគ្រួសាររបស់ពួកគេ ហើយកំពុងអំពាវនាវឱ្យអាជ្ញាធរអ៊ីស្រាអែលអនុញ្ញាតជាបន្ទាន់នូវការឆ្លងកាត់ដោយសុវត្ថិភាពរបស់ពួកគេចេញពីតំបន់ហ្គាហ្សា៕

សេចក្ដីប្រកាសរបស់ AFP

អត្ថបទ៖ ប៊ុន សុភាព

The post AFP អំពាវនាវឱ្យជម្លៀសអ្នកកាសែតនៅហ្គាហ្សា ជាបន្ទាន់ appeared first on Kampuchea Thmey Daily.

អ្នកកាសែតដោះមីនតោនត្រូវបានដោះលែង

hun sirivadh — Mon, 10 Feb 2025 07:22:47 +0000

និពន្ធនាយកសារព័ត៌មានមាតុភូមិលោក ស៊ុន សុផល បានប្រាប់កម្ពុជាថ្មីនៅថ្ងៃទី១០ ខែកុម្ភៈនេះថាបុគ្គលិកលោកឈ្មោះ ទឺ ពិទូ ត្រូវបានតុលាការតាមរយៈការសម្របសម្រួលពីអាជ្ញាធរខេត្តសម្រេចដោះលែងឱ្យមានសេរីភាពវិញហើយ។ ទោះជាយ៉ាងណាលោកមិនអាចបញ្ជាក់បានទេថាជាការទម្លាក់ចោលការចោទប្រកាន់ ឬគ្រាន់តែឱ្យនៅក្រៅឃុំបណ្ដោះអាសន្ន។

លោក ស៊ុន សុផល បានបញ្ជាក់ថាពេលនេះលោក ទឺ ពិទូ បានទៅដល់គេហដ្ឋានរបស់លោកវិញហើយ បន្ទាប់ពីត្រូវបានដោះលែងនៅម៉ោង១១និង៣០នាទីថ្ងៃទី១០ ខែកុម្ភៈនេះ។

គួរឱ្យដឹងថាលោក ទឺ ពិទូ ត្រូវសមត្ថកិច្ចឃាត់ខ្លួនកាលពីថ្ងៃទី៦ ខែកុម្ភៈ បន្ទាប់ពីលោកបានដោះមីនតោនដែលរកឃើញនៅចំណុចព្រំដែនកម្ពុជា-ថៃ យកទៅឱ្យនគរបាលប៉ុស្តិរដ្ឋបាលសង្កាត់អូរស្មាច់ ក្រុងសំរោង ខេត្តឧត្តរមានជ័យ។ លោក និងមិត្តភ័ក្រ ត្រូវបានតុលាការចោទប្រកាន់ពីបទបោះបង់អាវុធ ឬវត្ថុដទៃទៀតដែលអាចនាំឱ្យមានគ្រោះថ្នាក់ដល់បុគ្គលក្នុងទីកន្លែងសាធារណៈ ឬទីកន្លែងដែលសាធារណជនអាចចូលទៅបាន ដែលអាចប្រឈមនឹងទោសពន្ធនាគារពី៦ខែ ដល់៣ឆ្នាំ។

ក្នុងវីដេអូថ្លែងអំណរគុណអាជ្ញាធរដែលបានដោះលែងលោក ពិទូ បានទទួលស្គាល់កំហុស និងថាមូលហេតុដែលលោកក្លាហានដោះគ្រាប់មីនតោនទៅប្រគល់ឱ្យនគរបាលដោយសារពេលនោះគឺលោកស្រវឹងស្រា។

លោកថា៖ «ដោយសារខ្ញុំស្រវឹង ដល់ពេលដែលខ្ញុំស្វាងទៅខ្ញុំភ័យដែរ! ថាអាចផ្ទុះដែលអាចបង្កគ្រោះថ្នាក់ដល់ខ្ញុំ សមត្ថកិច្ច និងប្រជាជនដទៃទៀត»។

លោកថ្លែងអំណរដល់អាជ្ញាធរ និងតុលាការដែលបានលើកលែងទោសដល់លោកផងដែរ និងសន្យាថាមិនប្រព្រឹត្តិកំហុសជាលើកទី២ទេ។

លោក ពិទូ គឺជាភ្នាក់ងារសារព័ត៌មានមាតុភូមិនៅខេត្តឧត្តរមានជ័យនៅថ្ងៃកើតហេតុខាងលើលោកបានធ្វើការផ្សាយផ្ទាល់ពីទីតាំងគ្រាប់មីនតោនមួយនៅក្បែរព្រំដែនកម្ពុជា-ថៃ ដែលសមត្ថកិច្ចបញ្ជាក់ថាទីតាំងនោះជាតំបន់ស។ នៅល្ងាចថ្ងៃដដែលលោកនិងមិត្តភ័ក្របានទៅដោះមីនតោននោះយកទៅឱ្យនគរបាលប៉ុស្តិ៍អូរស្មាច់តែម្ដង ដែលបង្កការភ្ញាក់ផ្អើល និងត្រូវបានឃាត់ខ្លួនតែម្ដង។ ក្រោយឃាត់ខ្លួនមានមតិចម្រុះពីពលរដ្ឋដែលខ្លះថាការចាប់ខ្លួនជាការត្រឹមត្រូវ និងខ្លះបានរិះគន់អាជ្ញាធរផងដែរ៕

អត្ថបទដោយ ហ៊ុន សិរីវឌ្ឍន៍

The post អ្នកកាសែតដោះមីនតោនត្រូវបានដោះលែង appeared first on Kampuchea Thmey Daily.

អ្នកកាសែត Archives - Kampuchea Thmey Daily

ត្រឹមជាង​២ឆ្នាំ ​អ្នក​កាសែត ២៦២នាក់​ ​ត្រូវសម្លាប់​នៅ​ហ្គាហ្សា​ ដោយសារ​​អ៊ីស្រាអែល​

អ៊ីស្រាអែល​សម្លាប់​អ្នក​កាសែត​បី​នាក់​​ក្នុង​​ថ្ងៃ​តែ​​មួយ​​​ ទាំង​នៅ​លីបង់​និង​តំបន់​ហ្គាហ្សា​

អ៊ី​ស្រាអែល​​ជា​ប្រទេស​​​សម្លាប់​អ្នក​កាសែត​​​ច្រើន​បំផុត​​​ក្នុង​​​ឆ្នាំ២០២៥​៖ CPJ

AFP អំពាវនាវឱ្យជម្លៀសអ្នកកាសែតនៅហ្គាហ្សា ជាបន្ទាន់

អ្នកកាសែតដោះមីនតោនត្រូវបានដោះលែង

ត្រឹមជាង២ឆ្នាំ អ្នកកាសែត ២៦២នាក់ ត្រូវសម្លាប់នៅហ្គាហ្សា ដោយសារអ៊ីស្រាអែល

អ៊ីស្រាអែលសម្លាប់អ្នកកាសែតបីនាក់ក្នុងថ្ងៃតែមួយ ទាំងនៅលីបង់និងតំបន់ហ្គាហ្សា

អ៊ីស្រាអែលជាប្រទេសសម្លាប់អ្នកកាសែតច្រើនបំផុតក្នុងឆ្នាំ២០២៥៖ CPJ