យ៉ាងណា ក្នុងជំហានឆ្ពោះទៅរកភាពល្បីល្បាញរបស់តារាប្រុសរូបនេះ អ្នកជំនាន់ក្រោយដែលបន្តគាំទ្រលោក ទំនងជាមិនបានដឹងនូវអនុស្សាវរីយ៍បទដំបូងបង្អស់ ដែលសាងប្រជាប្រិយភាពឱ្យកិត្តិនាមរបស់តារាចម្រៀង ព្រាប សុវត្ថិ នោះឡើយ។

បើរំលឹកអតីតកាលជិត ២០ឆ្នាំមុន ក្នុងព្រឹត្តិការណ៍ប្រគំតន្ត្រីយក្សរបស់ផលិតកម្ម រស្មីហង្សមាស «Best Of The Best 2006» លោក ព្រាប សុវត្ថិ ក្នុងនាមជាតារាចម្រៀងលំដាប់ប្រទេស បានរំលឹកអនុស្សាវរីយ៍ចម្រៀងដំបូងបង្អស់ដែលធ្វើឱ្យមហាជនស្គាល់លោក នោះគឺបទ “អូនជាបេះដូងបង” ដែលជាស្នាដៃទំនុកច្រៀងដោយកវីនិពន្ធឆ្នើម លោក ថៃ នរៈសត្យា។

បើតាមការបញ្ជាក់របស់ពិធីការិនីដ៏ល្បីឈ្មោះ យុគ ចិន្ថា កំឡុងពេលជាពិធីការិនីក្នុងព្រឹត្តិការណ៍ប្រគំតន្ត្រីនាពេលនោះ បង្ហើបដែរថា “អូនជាបេះដូងបង” មិនត្រឹមជាបទដំបូងបង្អស់ដែលមហាជនបានស្គាល់តារាចម្រៀងរូបនេះប៉ុណ្ណោះទេ តែក៏ជាបទចម្រៀងដ៏ល្បីល្បាញខ្លាំងបំផុតជាង ៣ទសវត្សរ៍មុន ពោលអំឡុងឆ្នាំ១៩៩២។ ខណៈអ្នកគាំទ្រតារាប្រុសរូបនេះភាគច្រើនសុទ្ធតែធ្លាប់ស្តាប់ នៅតែចងចាំអនុស្សាវរីយ៍បទនេះពុំភ្លេចឡើយ។ 

ជោគជ័យនៅពេលនោះ ដ្បិតជាការចាប់ផ្តើមក្នុងវិថីសិល្បៈរបស់តារាចម្រៀងឯក ព្រាប សុវត្ថិ ក៏ពិតមែន តែបាននាំយកការផ្លាស់ប្តូរដ៏ធំធេងក្នុងជិវិតលោក រាប់តាំងពីការបោះជំហានដំបូងនិងបន្ទាប់ រហូតទទួលបានកេរ្តិ៍ឈ្មោះល្បីរន្ទឺទាំងលើឆាកជាតិ-អន្តរជាតិ។

មិនតែប៉ុណ្ណោះ កំពូលតារាចម្រៀង ព្រាប សុវត្ថិ បានធ្វើឱ្យមហាជនស្គាល់លោក ថាជាតារាពេញដោយសមត្ថភាព និងទេពកោសល្យមួយរូប ដែលអាចបត់បែនតាមភាពជឿនលឿននៃសិល្បៈ ខណៈតារាចម្រៀងរូបនេះ តែងបន្តអភិវឌ្ឍនខ្លួនឯងឥតឈប់ឈរ ដូចរុក្ខជាតិដែលត្រូវសន្សើមរាល់ព្រឹកព្រហាម។

អ្វីដែលគួរឱ្យកត់សម្គាល់ ឧកញ៉ា ព្រាប សុវត្ថិ ប្រឡូកសិល្បៈច្រើនឆ្នាំមកហើយ តាំងពីជំនាន់រាជិនីសំឡេងទាំង៣ រួមមាន អ្នកស្រី ហ៉ឹម ស៉ីវន, អ្នកស្រី សួន ចន្ថា និងអ្នកស្រី ម៉េង កែវពេជ្ជតា កំពុងពេញល្បីល្បាញលើពិភពតន្ត្រីនៅឡើយ។ ខណៈអ្វីដែលគួរឱ្យស្ញប់ស្ញែង ប្រជាប្រិយភាពកំពូលតារាចម្រៀងរូបនេះ ហាក់មិនសាបរលាបសោះឡើយក្នុងក្រអៅបេះដូងអ្នកគាំទ្រ និងនៅតែទទួលបានការចាប់អារម្មណ៍ខ្លាំង។

បើនិយាយដល់ទេពកោសល្យច្រៀង និងការបត់បែនក្នុងពិភពតន្ត្រីញាក់ក្រន្ត្រាក់អារម្មណ៍ កំពូលតារាចម្រៀងរូបនេះ បានប្រឡូកលើវិថីតន្ត្រីប្រភេទ Hip Hop យូរណាស់មកហើយ ចាប់តាំងពីបទ «មានថ្មីម្តេចមិនប្រាប់» និង «ចិត្តព្រៃផ្សៃ» មកម្ល៉េះ។ តួយ៉ាង ក្រោយលាទ្រនំចាស់ដែលលោកធ្លាប់សាងកេរ្តិ៍ឈ្មោះរាប់ឆ្នាំ លោក ព្រាប សុវត្ថិ បានបន្តផ្តល់អារម្មណ៍ដល់អ្នកគាំទ្រតាមរយៈស្ទីលនៃការច្រៀងថ្មីកាន់តែច្រើន ដែលមិនត្រឹមតែអាចរក្សាបានចិត្តអ្នកគាំទ្ររបស់លោកមុនៗ សូម្បីតែយុវវ័យជំនាន់ថ្មី ក៏បានស្គាល់លោកផងដែរ៕

The post បទដំបូងបង្អស់ដែលមហាជនស្គាល់ ព្រាប សុវត្ថិ រហូតក្លាយជាតារាប្រុសល្បីល្បាញលំដាប់ប្រទេស appeared first on Kampuchea Thmey Daily.

មិនខុសគ្នាពីមហាជនអ្នកគាំទ្រនោះទេ ក្នុងនោះសូម្បីតែអ្នកសិល្ប:រួមអាជីពក៏បានបង្ហាញពីគោលបំណងចង់ឃើញតារារៀមច្បងលោក ព្រាប សុវត្ថិ ធ្វើព្រឹត្តិការណ៍នៃការប្រគុំតន្រ្តី SOLO CONCERT ផងដែរ ទោះជាយ៉ាងណាគេនៅមិនទាន់ដឹងទេថាតើតារាចម្រៀងជើងចាស់រូបនេះ អាចនឹងបំពេញតាមបំអ្នកគាំទ្រយ៉ាងណានៅឡើយទេ។

ផ្អែកតាមការស្ទង់មតិ សង្កេតឃើញមានទស្សនិកជនពិសេសមិត្តៗយុវវ័យជាច្រើន បានបង្ហាញការគាំទ្រដោយម្នាក់ៗពិតចង់ឱ្យកំពូលតារាចម្រៀងលោក ព្រាប សុវត្ថិ រៀបចំព្រឹត្តិការណ៍ដ៏អស្ចារ្យនេះផងដែរ។ ចំណែកតារាចម្រៀងរួមទ្រនំលោក ខាន់ ជេមស៌ ក៏បានបញ្ចេញមតិចង់ឱ្យរៀមច្បងរូបនេះធ្វើ SOLO CONCERT ដែរ។

លោក ខាន់ ជេមស៌ បានលើកឡើងថា ចង់ឃើញបងប្រុស (ព្រាប សុវត្ថិ )ធ្វើ SOLO CONCERT ណាស់ តើបងប្អូនគិតដូចខ្ញុំដែរទេ? បើចង់សុំ comment ម្នាក់មួយមកណា។ យ៉ាងណា មតិភាគច្រើនគឺគាំទ្រ ១០០ភាគរយជុំវិញរឿងនេះ។

គួរឱ្យដឹងដែរថា កំពូលតារាចម្រៀងងារឧកញ៉ាលោក ព្រាប សុវត្ថិ គឺបានចូលប្រឡូកនៅក្នុងវិស័យសិល្ប:ចម្រៀងយ៉ាងជោគជាំមានរយ:ពេលជិត ៣ទសវត្សរ៍ហើយ ដោយលោកបានសាងបាននូវប្រជាប្រិយភាពល្បីល្បាញ និងការគាំទ្រទូទាំងប្រទេស ខណៈមិនទាន់មានតារាចាស់ថ្មីរូបណាអាចប្រជែងតំណែងលោកបានឡើយ៕ អត្ថបទ៖ ចាន់រ៉ា

The post អ្នកគាំទ្រចង់ឃើញកំពូលតារាចម្រៀង ព្រាប សុវត្ថិ រៀបចំព្រឹត្តិការណ៍ “SOLO CONCERT” appeared first on Kampuchea Thmey Daily.

តាមរយៈបទ “ក្រមុំឆ្នាស” និងបទ”ជួបតែគូកម្ម” តារាជួរមុខ Galaxy រូបនេះ បាននាំយកនូវទំនុកច្រៀងផ្សំនឹងភ្លេងមួយដ៏គួរឱ្យចាប់អារម្មណ៍ អមនឹងទិដ្ឋភាពក្បាច់រាំក្នុងឈុតប្រពៃណីខ្មែរ យ៉ាងស័ក្តិសមឥតទាស់។ ម៉្យាងវិញទៀត ក្នុងវីដេអូចម្រៀងអបអរឆ្នាំថ្មីលើកនេះ កំពូលតារាចម្រៀង ព្រាប សុវត្ថិ ចាប់គូសម្តែងជាលើកដំបូងជាមួយនឹងកញ្ញារូបស្រស់ គីម យ៉ាយ៉ា ។

តាមរយៈបទចម្រៀងខាងល មានតមិជាច្រើនលើកឡើងនៅលើបណ្ដាញសង្គមដោយបានសរសើរទៅកាន់កំពូលតារាចម្រៀង ឧកញ៉ា ព្រាម សុវត្ថិ ក៏ដូចជាផលតិកម្មថា ពីមួយឆ្នាំទៅមួយឆ្នាំតែងតែមានបទចម្រៀងពីរោះៗ និងប្លែកៗ ធ្វើឱ្យពិធីបុណ្យប្រពៃណីជាតិខ្មែរកាន់តែមានភាពសប្បាយរីករាយ ។

តួយ៉ាង រាល់បទចម្រៀងនីមួយៗ មិនថាអត្ថន័យ ទំនុកភ្លេង សុទ្ធសឹងជាការផលិតឡើងយ៉ាងសម្រិតសម្រាំង ត្រជាក់ភ្នែក ធ្វើឱ្យអ្នកទស្សនា កាន់តែជក់ចិត្តឌិតអារម្មណ៍ជាមួយរូបភាព ហើយចង់រាំលេងកម្សាន្តតាមចង្វាក់ភ្លេង ។

គួរជម្រាបថា ជារៀងរាល់ឆ្នាំ តារាជួរមុខរូបនេះ តែងផ្តល់ជូននូវចំណងដៃឆ្នាំថ្មីដល់អ្នកគាំទ្រខ្លួនមិនដែលអាក់ខានឡើយ ខណៈរាល់បទចម្រៀងដែលលោកច្រៀង និងសម្តែង សុទ្ធសឹងទទួលបានការគាំទ្រពីសាធារណជន៕

The post ឧកញ៉ា ព្រាប សុវត្ថិ ថែមចំណងដៃចម្រៀងចូលឆ្នាំ ២បទ រន្ថើនអារម្មណ៍អ្នកញាប់ញ័ររាំកម្សាន្ត appeared first on Kampuchea Thmey Daily.

ជាមួយនឹងចង្វាក់បែបសហសម័យ រួមបញ្ចូលដោយទំនុកច្រៀងដែលចេះលេងពាក្យសម្តីដើរទាន់សម័យគេពេញនិយម “ម៉េចហើយជីវិត” ឧកញ៉ា ព្រាប សុវត្ថិ ធ្វើឱ្យសាធារណជនដែលជាអ្នកគាំទ្រ កោតសរសើរគ្រប់ៗគ្នា ខណៈខ្លះ នាំគ្នាយកសំឡេងត្រាប់ផ្សំនឹងកាយវិការ ចែករំលែកពេញបណ្តាញទំនាក់ទំនងសង្គម ពិសេស Tik Tok ។

ជាក់ស្តែង MV ចម្រៀង ត្រៀមអបអរសង្ក្រាន្តឆ្នាំថ្មីរបស់តារាចម្រៀងលំដាប់ប្រទេសមួយបទរូបនេះ បានដាស់រសអារម្មណ៍ទស្សនិកជនដែលជាអ្នកគាំទ្រ ឱ្យនឹកដល់ពណ៌សម្បុរមួយបែបនៃចម្រៀងរបស់ខ្លួន ដែលធ្លាប់តែបំពេរអារម្មណ៍មហាជនជិត ៣ទសវត្សរ៍កន្លងមកនេះ។

ទោះពេលវេលារំកិលទៅមុខឥតឈប់ឈរ តែកំពូលតារាចម្រៀងជួរមុខផលិតកម្មធំរូបនេះ តែងតែផ្តល់នូវការកម្សាន្តអារម្មណ៍ដល់អ្នកគាំទ្រជាហូរហែរ។ តួយ៉ាង ចម្រៀងចូលឆ្នាំប្រពៃណីជាតិរបស់លោករាល់ឆ្នាំ តែងតែទទួលបានការគាំទ្រ និងត្រូវបានចាក់រាំតាមកម្មវិធីក្នុងភូមិស្រុក ក៏ដូចជាលើកច្រៀងតាមអកកាដង់ជាដើម។

គួរជម្រាបដែរថា ជាច្រើនឆ្នាំលើវិថីចម្រៀង កំពូលតារាចម្រៀងរូបនេះ តែងតែផ្តល់អារម្មណ៍ផ្សេងៗដល់អ្នកគាំទ្រខ្លួនជានិច្ច ជាមួយនឹងទេពកោសល្យច្រៀងដ៏បុិនប្រសព្វគ្រប់ទម្រង់ និងគ្រប់ចង្វាក់។ យ៉ាងណា សន្ទុះនៃការគាំទ្រ MV មួយបទនេះ បានស្តែងយ៉ាងច្បាស់ថា ប្រជាប្រិយភាពរបស់លោកគឺនៅតែមានក្នុងចិត្តអ្នកគាំទ្រ៕

The post MV ចម្រៀង ត្រៀមអបអរសង្ក្រាន្តឆ្នាំថ្មី ព្រាប សុវត្ថិ ជាប់ Top Trending Music លើ You Tube appeared first on Kampuchea Thmey Daily.

ជាមួយនឹងចង្វាក់បែបសហសម័យ រួមបញ្ចូលដោយទំនុកច្រៀងដែលចេះលេងពាក្យសម្តីដើរទាន់សម័យគេពេញនិយម “អាម៉េចហើយជីវិត” ធ្វើឱ្យសាធារណជនដែលជាអ្នកគាំទ្រកំពូលតារាចម្រៀងរូបនេះ សរសើរគ្រប់ៗគ្នាថា “អេម” ខណៈមតិខ្លះជឿថា មួយបទនេះ ដឹងតែធ្វើឱ្យយុវវ័យរាំហុយដីទៀតហើយ ថ្ងៃចូលឆ្នាំប្រពៃណីជាតិខ្មែរខាងមុខនេះ។

បើទោះបីជាចម្រៀងមួយបទនេះ ពុំទាន់បង្ហាញអត្ថន័យពេញលេច ឬចេញ MV ក៏ដោយក្តី តែតាមរយៈការបង្ហើបអត្ថន័យជិត ២០វិនាទី សាធារណជនដែលជាអ្នកគាំទ្រ បានទស្សទាយថា នោះជាចម្រៀងថ្មីរបស់ឧកញ៉ា ព្រាប សុវត្ថិ ដែលត្រៀមសម្រាប់ឱកាសចូលឆ្នាំប្រពៃណីជាតិខ្មែរខាងមុខ។ ឯអ្វីដែលគួរឱ្យចាប់អារម្មណ៍នោះគឺ ចង្វាក់នៃបទនេះ ដែលពិតខុសប្លែកពីឱកាសចូលឆ្នាំប្រពៃណីជាតិឆ្នាំមុនៗ ដែលលោកធ្លាប់តែច្រៀងចង្វាក់បែបប្រជាប្រិយ។

ជាច្រើនឆ្នាំលើវិថីចម្រៀង កំពូលតារាចម្រៀងរូបនេះ តែងតែផ្តល់អារម្មណ៍ផ្សេងៗដល់អ្នកគាំទ្រខ្លួនជានិច្ច ជាមួយនឹងទេពកោសល្យច្រៀងដ៏បុិនប្រសព្វ គ្រប់ទម្រង់ និងគ្រប់ចង្វាក់។ យ៉ាងណា មួយបទនេះ អ្នកគាំទ្រក៏កំពុងទន្ទឹងរង់ចាំថ្ងៃចេញ Full MV ផងដែរ៕

The post បង្ហើបបទ “អាម៉េចហើយជីវិត” អ្នកគាំទ្រលោក ព្រាប សុវត្ថិ ទាយទុកថា ដឹងតែរាំហុយដីទៀតហើយ ចូលឆ្នាំខ្មែរ appeared first on Kampuchea Thmey Daily.

ការវិលត្រលប់មកកាន់ពិភពចម្រៀងនិងតន្ត្រីជាថ្មី ឈាមជ័រអ្នកចម្រៀងរូបនេះ បាននាំយកខ្លួនឯងក្នុងការផ្លាស់ប្តូរថ្មី ទាំងការរាំនិងច្រៀង ធ្វើឱ្យអ្នកសិល្បៈនិងអ្នកនិយមតាមដានវិស័យចម្រៀង មានការចាប់អារម្មណ៍ខ្លាំង។

ក្នុងនោះ ឧកញ៉ា ខេមរៈ សិរីមន្ត ក៏បានបង្ហាញការគាំទ្រដល់កូនប្រុសទី២ របស់ឧកញ៉ា ព្រាប សុវត្ថិ រូបនេះផងដែរ តាមរយៈការសរសេរឈ្មោះ N.John រួមនឹងថ្ងៃខែនៃការប្រកាសចេញ Ablum ចម្រៀងផ្លូវការភ្ជាប់នឹងពាក្យកាត់ DND ដោយជូនពរឱ្យការផ្តើមជំហានថ្មីលើវិថីសិល្បៈរបស់ សុវត្ថិ មុនីនាគ បានជោគជ័យឈានឆ្ពោះដល់ឆាកអន្តរជាតិ។

ទន្ទឹមនឹងពាក្យពេចន៍ជូនពរនេះ ឧកញ៉ា ព្រាប សុវត្ថិ ក៏បានសម្តែងការអរគុណដល់តារាចម្រៀងរួមទ្រនំរូបនេះ ដែលស្រលាញ់គាំទ្រកូនប្រុសលោក ពិសេសក្រោយពេលដែល មុនីនាគ វិលវិញជាមួយនឹងការផ្លាស់ប្តូរថ្មីនេះ។

បច្ចុប្បន្ន សុវត្ថិ មុនីនាគ កំពុងឆក់យកបេះដូងអ្នកគាំទ្រ ពិសេសយុវវ័យ បន្ទាប់ពីតារាចម្រៀងវ័យក្មេងរូបនេះ បង្ហើបសកម្មភាពច្រៀងប៉ុន្មានបទ ដែលជាការផលិតកម្រិតស្តង់ដាអន្តរជាតិ ជាមួយស្ទីលរាំឡូយប្លែក រហូតត្រូវបានគេយកទៅ Reaction ពេញ TikTok ។

មិនតែប៉ុណ្ណោះ មហាជនដែលជាអ្នកគាំទ្រ យល់ថា សុវត្ថិ មុនីនាគ នឹងក្លាយជាតារាចម្រៀងខ្មែរដ៏លេចធ្លោមួយរូបទៀត លើឆាកអន្តរជាតិ ក្នុងពេលអនាគត ខណៈគ្រប់គ្នាក៏កំពុងទទឹងរង់ចាំថ្ងៃបើកបង្ហាញ Album ចម្រៀងថ្មី ដែលជាការផលិតកម្រិតស្តង់ដាអន្តរជាតិ របស់តារាចម្រៀងជំនាន់ថ្មីរូបនេះ នៅថ្ងៃទី ២៨កុម្ភៈ ខាងមុខនេះផងដែរ៕

The post ឧកញ៉ា សុវត្ថិ អរគុណឧកញ៉ា សិរីមន្ត ដែលគាំទ្រនិងជូនពរ មុនីនាគ ឱ្យជោគជ័យលើវិថីសិល្បៈឈានឆ្ពោះដល់ឆាកអន្តរជាតិ appeared first on Kampuchea Thmey Daily.

ក្នុងនោះ ក៏មានយុវវ័យដែលជាគាំទ្រ បានចូលរួមបញ្ចេញមតិដែរថា សប្បាយនឹងច្រៀងក្នុងកម្មវិធីប្រគំតន្ត្រីជាមួយកំពូលតារាចម្រៀង ព្រាប សុវត្តិខ្លាំងណាស់ ខណៈខ្លះទៀត បង្ហាញការនឹករលឹកដល់កូនប្រុសទាំង៣ របស់ឧកញ៉ារូបនេះ ដោយចង់ឱ្យកម្មវិធីប្រគំតន្ត្រីនៅស្រុកកោះធំក្រោយៗ​ នាំយកមុនីវណ្ណ មុនីវុឌ្ឍ និងមុនីនាគ មកជាមួយផង។
ការលើកឡើងនេះ គឺបន្ទាប់ពីឧកញ៉ា ព្រាប សុវត្ថិ បានឡើងច្រៀងលើឆាកប្រគំតន្ត្រីមួយ លើទឹកដីនៃស្រុកកោះធំ ខេត្តកណ្តាល។

តាមរយៈការបញ្ចេញព្រោងព្រាត ភ្ជាប់ជាមួយនឹងវីដេអូសកម្មភាពជាច្រើន របស់តារាចម្រៀងល្បីឈ្មោះ ព្រាប សុវត្តិ សង្កេតឃើញថា ប្រជាប្រិយភាពរបស់លោកសម្រាប់យុវវ័យនៅស្រុកកោះធំនេះ ពិតជាមិនធម្មតា ខណៈលោកបានញុាំងអារម្មណ៍ឱ្យសប្បាយរីករាយនឹងលោក ជាមួយនឹងបទចម្រៀងជាច្រើនបទ។ អ្វីដែលគួរកត់សម្គាល់ ត្រឹមតែបង្ហើរសំនៀងជាមួយប្រយោគដំបូងនៃក្បាលបទចម្រៀង “សែកមន្ត” អ្នកគាំទ្រនាំគ្នាស្រែកហ៊ោខ្ញៀវខ្ញារ និងបន្ទោរតាមផងដែរ។

ឈរលើឆាកតន្ត្រីនៅស្រុកកោះធំ លោកមិនត្រឹមតែអង្រួនយកបានបេះដូងយុវវ័យប៉ុណ្ណោះទេ សូម្បីតែកូនៗដ៏ស្រស់សង្ហារទាំងបីរូបរបស់លោក ក៏មានប្រជាប្រិយភាពសម្រាប់អ្នកគាំទ្រនៅទីនេះផងដែរ ខណៈក្នុងចំណោមនោះ មានអ្នករំលឹកនិងស្នើឱ្យមានវត្តមានជាមួយលោកដែរ ក្នុងការប្រគំលើទឹកស្រុកនេះក្រោយៗ៕

The post មិននឹកស្មាន! អ្នកស្រុកកោះធំ គាំទ្រគ្រួសារកំពូលតារាចម្រៀង ព្រាប សុវត្ថិ ខ្លាំង ដោយស្នើឱ្យមានវត្តមានកូនលោកទាំង៣ ក្នុងការប្រគំតន្ត្រីក្រោយៗ appeared first on Kampuchea Thmey Daily.

នៅ​រសៀល​ថ្ងៃ​ទី ១៥ ខែ​មករា ឆ្នាំ ២០២៥ នេះ លោក​ឧកញ៉ា ព្រាប សុវត្ថិ និង ភរិយា បាន​ប្រកាស​ចូលរួម​ចំណែក​ទិញ​ស្រូវ​ពី​ប្រជា​កសិករ​ចំនួន ៥០ តោន ជូន​ប្រជាពលរដ្ឋ​ដែល​កំពុង​មាន​​ជីវភាព​ខ្វះខាត ដើម្បី​ចូលរួម​ជួយ​បន្ត​ផ្ដល់​ស្នាមញញឹម​ដល់​ប្រជាជន​ខ្មែរ​ទាំងអស់។

តាមរយៈ​នេះ មាន​មហាជន​អ្នកគាំទ្រ​ជាច្រើន បាន​សម្ដែង​ការ​សាទរ​ចំពោះ​ទង្វើ​ដ៏​សប្បុរស​របស់ កំពូល​តារា​ចម្រៀង លោក​ឧកញ៉ា ព្រាប សុវត្ថិ និង ភរិយា ដែល​បាន​យកចិត្តទុកដាក់​គិតគូរ​ដល់​សុខទុក្ខ​ប្រជាកសិករ ក៏​ដូចជា​ប្រជាពលរដ្ឋ​ខ្មែរ​ដែល​កំពុង​ជួប​ប្រឈម​នឹង​បញ្ហា​ជីវភាព​ខ្វះខាត។

កត់​សម្គាល់​ថា នេះ​មិនមែន​ជា​លើក​ទី ១ ទេ ដែល​កំពូល​តារា​ចម្រៀង លោក​ឧកញ៉ា ព្រាប សុវត្ថិ គិតគូរ​ពី​សុខទុក្ខ​របស់​ប្រជាពលរដ្ឋ​មាន​ជីវភាព​ខ្វះខាត។ ជារឿយៗ តារា​ចម្រៀង​រូប​នេះ តែង​តែ​រួមចំណែក​ជួយ​តាមរយៈ​ការ​ជួយ​ទិញ ឬ ជូន​ជា​ថវិកា​តិចតួច​ដល់​អ្នក​ដែល​ជួប​ការ​ខ្វះខាត​ខ្លាំង។

កំពូល​តារា​ចម្រៀង​ប្រចាំ​កម្ពុជា ឧកញ៉ា ព្រាប សុវត្ថិ ជា​មនុស្ស​រួសរាយ​រាក់ទាក់ មិន​ឆ្មើងឆ្មៃ និង​តែង​តែ​រួម​ចំណែក​ជួយ​ដល់​សង្គមជាតិ តាមរយៈ​កម្មវិធី​សប្បុរសធម៌​នានា ឬ សកម្មភាព​សប្បុរស​តិចតួច ទាំងនេះ ជាហេតុ​ធ្វើ​ឲ្យ​មហាជន​អ្នកគាំទ្រ​កាន់តែ​ស្រលាញ់​ពេញ​ចិត្ត​លោក​ទ្វេ​ឡើង៕

The post ឧកញ៉ា ព្រាប សុវត្ថិ ប្រកាសទិញស្រូវពីកសិករ ៥០ តោន ជូនពលរដ្ឋមានជីវភាពខ្វះខាត appeared first on Kampuchea Thmey Daily.