គំនិតផ្ដួចផ្ដើមរបស់ ឧបនាយករដ្ឋមន្ត្រី ឧបនាយករដ្ឋមន្ត្រី ស សុខា  រដ្ឋមន្ត្រីក្រសួងមហាផ្ទៃ ស្ដីពីការបង្កើតយន្តការឱ្យមានមន្ត្រីកម្ពុជា ឡាវ និងវៀតណាម ប្រចាំការ ផ្លាស់ប្ដូរព័ត៌មាន និងសម្របសម្រួលនីតិវិធីផ្សេងៗ ពាក់ព័ន្ធការបង្ក្រាបបទល្មើស រួមទាំងបទល្មើសឆបោកតាមប្រព័ន្ធបច្ចេកវិទ្យា និងការសម្របសម្រួលនីតិវិធីអន្តោប្រវេសន៍ ត្រូវបាន ឧត្តមសេនីយ៍ឯក លឿង តាមខ្វាង រដ្ឋមន្ត្រីក្រសួងនគរបាលវៀតណាម ផ្ដល់ការគាំទ្រប្រកបដោយទំនុកចិត្តខ្ពស់។

គំនិតផ្ដួចផ្ដើម និងការបញ្ជាក់គាំទ្រនេះ បានធ្វើឡើងក្នុងឱកាស ដែល ឧត្តមសេនីយ៍ឯក លឿង តាមខ្វាង ដឹកនាំគណៈប្រតិភូជួបពិភាក្សាការងារ ជាមួយឧបនាយករដ្ឋមន្ត្រី ស សុខា នៅទីស្ដីការក្រសួងមហាផ្ទៃ នារសៀលថ្ងៃទី២៩ ខែមិថុនា ឆ្នាំ២០២៦ ក្នុងឱកាសបំពេញទស្សនកិច្ច ដើម្បីចូលរួមកិច្ចប្រជុំថ្នាក់រដ្ឋមន្ត្រី លើកទី២ កម្ពុជា-ឡាវ-វៀតណាម ដែលក្រសួងមហាផ្ទៃនៃព្រះរាជាណាចក្រកម្ពុជា ទទួលធ្វើជាម្ចាស់ផ្ទះ នៅថ្ងៃទី៣០ ខែមិថុនានេះ។

បើតាមឧបនាយករដ្ឋមន្ត្រី ស សុខា យន្តការមន្ត្រីប្រចាំការត្រីភាគីនេះ មានគោលបំណងពង្រឹង និងពង្រីកកិច្ចសហប្រតិបត្តិការផ្លាស់ប្ដូរព័ត៌មានដល់គ្នាទៅវិញទៅមក ឱ្យបានលឿនរហ័ស និងប្រកបដោយប្រសិទ្ធភាព ឆ្លើយតបបានទាន់ពេលវេលា ទៅនឹងសភាពការណ៍នៃការប្រឈមបទល្មើសជាអាទិ៍ ការផ្លាស់ប្ដូរទិន្នន័យជនបរទេសធ្លាប់ប្រព្រឹត្ត ឬពាក់ព័ន្ធនឹងបទល្មើសដែលត្រូវបានដាក់ក្នុងបញ្ជីខ្មៅហាមចូលប្រទេសនីមួយៗ និងការសម្របសម្រួលនីតិវិធីអន្តោប្រវេសន៍ ដើម្បីបញ្ជូនពលរដ្ឋឱ្យគ្នាទៅវិញទៅមក ក្រោយការរកឃើញពាក់ព័ន្ធនឹងការប្រព្រឹត្តបទល្មើសផ្សេងៗជាដើម។

ស្របគ្នានឹងការផ្លាស់ប្ដូរយោបល់ក្នុងជំនួបជាមួយរដ្ឋមន្ត្រីក្រសួងសន្តិសុខសាធារណៈឡាវដែរ  ឧបនាយករដ្ឋមន្ត្រី ស សុខា និង រដ្ឋមន្ត្រីក្រសួងនគរបាលវៀតណាម បានឯកភាពគ្នាបង្កលក្ខណៈ ឱ្យថ្នាក់ដឹកនាំ និងមន្ត្រីជាន់ខ្ពស់ ឆ្លៀតពិភាក្សា និងផ្លាស់ប្ដូរយោបល់គ្នាបន្ថែមទៀត ក្នុងឱកាសក្រៅកិច្ចប្រជុំថ្នាក់រដ្ឋមន្ត្រីលើកទី២នេះ ដោយមានជំនឿយ៉ាងមុតមាំថា យន្តការនេះនឹងលេចចេញជារូបរាង ហើយចាប់ផ្ដើមធ្វើការជាមួយគ្នាក្នុងស្មារតីសហប្រតិបត្តិការប្រកបដោយមិត្តភាព សំដៅរួមចំណែកលើកកម្ពស់ប្រសិទ្ធភាពការងារបង្ការ ទប់ស្កាត់ និងបង្ក្រាបបទល្មើស។

ក្រៅពីនេះ ប្រមុខក្រសួងមហាផ្ទៃកម្ពុជា និងក្រសួងនគរបាលវៀតណាម ក៏បានពិភាក្សា និងផ្លាស់ប្ដូរយោបល់គ្នា អំពីបទពិសោធ និងលទ្ធផល នៃការអនុវត្តយន្តការសហប្រតិបត្តិការប្រចាំឆ្នាំ ដោយបានបង្ហាញការប្ដេជ្ញាចិត្តខ្ពស់ អនុវត្តឱ្យបានសម្រេចជោគជ័យ តាមស្មារតីនៃជំនួបពិភាក្សា និងការឯកភាពគ្នា របស់ថ្នាក់ដឹកនាំកំពូលនៃប្រទេសទាំងពីរ៕

The post វៀតណាមគាំទ្រគំនិតរបស់រដ្ឋមន្ត្រីមហាផ្ទៃកម្ពុជាបង្កើតក្រុមប្រចាំការផ្លាស់ប្ដូរព័ត៌មាន និងសម្របសម្រួលនីតិវិធីពាក់ព័ន្ធការបង្ក្រាបបទល្មើស រួមទាំង Online Scam appeared first on Kampuchea Thmey Daily.

នារសៀលថ្ងៃទី១៩ ខែមិថុនា ឆ្នាំ២០២៦  នាយឧត្តមសេនីយ៍ ប៉ោ ភក្តិ រដ្ឋលេខាធិការ ក្រសួងមហាផ្ទៃ អញ្ជើញជាអធិបតីក្នុងពិធីសម្ពោធជាផ្លូវការនូវ «រឿងអប់រំខ្លី» របស់ទូរទស្សន៍មហាផ្ទៃ។

ពិធីសម្ពោធនេះ ក៏មានការអញ្ជេីញចូលរួមពី៖ អនុរដ្ឋលេខាធិការ ក្រសួងមហាផ្ទៃ, អគ្គនាយក នៃអគ្គនាយកដ្ឋាន បច្ចេកវិទ្យា និងផ្សព្វផ្សាយអប់រំ, អគ្គនាយក នៃអគ្គនាយកដ្ឋានពន្ធនាគារ, តំណាងអង្គភាពក្រោមចំណុះក្រសួងមហាផ្ទៃ, សមាគមអ្នកសិល្បៈ, សិស្ស-និស្សិត យ៉ាងច្រេីនកុះករ។ ពិធីនេះ រៀបចំធ្វើឡើងនៅរោងភាពយន្ត Sabay Cinema សាលធំ (Hall Screen X) ក្នុងផ្សារទំនើបអ៊ីអន៣)

នាឱកាសនោះ  ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ក្រសួងមហាផ្ទៃ បានថ្លែងថា ការរីកចម្រើនយ៉ាងលឿន នៃបច្ចេកវិទ្យាគមនាគមន៍ និងព័ត៌មាន បានធ្វើឱ្យពិភពលោក រួមទាំងព្រះរាជាណាចក្រកម្ពុជា ទទួលបាននូវអត្ថប្រយោជន៍ជាច្រើន តាមរយៈការចាប់យកបច្ចេកវិទ្យាឌីជីថលធ្វើជាមធ្យោបាយ ដើម្បីពង្រឹង និងពង្រីក ប្រសិទ្ធភាពការងារ និងអាជីវកម្ម។

លោក ហោ សំអាត បន្ដថា ទោះបីជាបច្ចេកវិទ្យាឌីជីថល បានផ្តល់នូវអត្ថប្រយោជន៍មហាសាលដល់មនុស្សជាតិ ប៉ុន្តែវាក៏ទាមទារឲ្យមនុស្សប្រើប្រាស់ប្រកបដោយការទទួលខុសត្រូវ និងប្រុងប្រយ័ត្នខ្ពស់ ព្រោះបច្ចេកវិទ្យានេះ ត្រូវបានប្រើប្រាស់ទាំងមនុស្សល្អ ទាំងមនុស្សអាក្រក់។

រដ្ឋលេខាធិការ ប៉ោ ភក្តិ បន្ដថា  ក្រសួងមហាផ្ទៃ បាននឹងកំពុងរុញច្រានការធ្វើទំនើបកម្មស្ថាប័ន ដោយចាត់ទុកបច្ចេកវិទ្យា ជាឧបករណ៍គន្លឹះក្នុងការលើកកម្ពស់តម្លាភាព គណនេយ្យភាព និងប្រសិទ្ធភាពខ្ពស់ ក្នុងការផ្តល់សេវា ជូនប្រជាពលរដ្ឋនៅគ្រប់មូលដ្ឋាន។

រដ្ឋលេខាធិការក្រសួងមហាផ្ទៃ នាយឧត្តមសេនីយ៍ ប៉ោ ភក្តិ លើកឡើងថា ទន្ទឹមនឹងផលវិជ្ជមានដ៏មហាសាល នៃការផ្លាស់ប្តូរទៅជាឌីជីថល កម្ពុជាក៏ត្រូវប្រឈមមុខនឹងបញ្ហាអសន្តិសុខទម្រង់ថ្មី គឺបទល្មើសបច្ចេកវិទ្យាឆ្លងដែន (Cybercrimes)។ ឧក្រិដ្ឋជន បាននឹងកំពុងប្រើប្រាស់ប្រព័ន្ធអនឡាញធ្វើជាឧបករណ៍ឆបោក លួចទិន្នន័យ និងបំផ្លាញទ្រព្យសម្បត្តិ។ សកម្មភាពខុសច្បាប់ទាំងនេះ មិនត្រឹមតែបង្កវិនាសកម្មផ្នែកសេដ្ឋកិច្ច និងហិរញ្ញវត្ថុរបស់បុគ្គល និងគ្រួសារប៉ុណ្ណោះទេ ប៉ុន្តែថែមទាំងបំផ្លាញដល់ទំនុកចិត្តឌីជីថល ដែលជាគ្រឹះនៃការអភិវឌ្ឍសង្គមឌីជីថល ព្រមទាំងបង្កផលប៉ះពាល់ដល់ស្ថិរភាពផ្លូវចិត្ត និងសណ្តាប់ធ្នាប់សាធារណៈ ដែលជាគោលដៅអាទិភាព នៃគោលនយោបាយ ភូមិ-ឃុំ-សង្កាត់ មានសុវត្ថិភាព៕

The post នាយឧត្តមសេនីយ៍ ប៉ោ ភក្តិ៖ បទល្មើសបច្ចេកវិទ្យាបំផ្លាញទំនុកចិត្តឌីជីថលដែលជាគ្រឹះនៃការអភិវឌ្ឍសង្គមឌីជីថល បង្កផលប៉ះពាល់ដល់ស្ថិរភាពផ្លូវចិត្ត appeared first on Kampuchea Thmey Daily.

ទន្ទឹមនេះ សម្ដេច ហ៊ុន ម៉ាណែត បានគូសបញ្ជាក់ពីវិធានការម៉ឺងម៉ាត់របស់រាជរដ្ឋាភិបាល និងកិច្ចសហការជាមួយបណ្តាប្រទេសនានា ក្នុងការប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា។ សម្តេចធិបតីបានសង្កត់ធ្ងន់ថា វិធានការនេះនឹងត្រូវបន្តអនុវត្តជាប្រចាំ រហូតដល់មានការបោសសម្អាតក្រុមឧក្រិដ្ឋជនទាំងនេះឱ្យអស់ពីកម្ពុជា។ ជាការឆ្លើយតប អនុរដ្ឋមន្ត្រីការបរទេសចក្រភពអង់គ្លេស ក៏បានវាយតម្លៃខ្ពស់ចំពោះវិធានការម៉ឺងម៉ាត់របស់កម្ពុជា។

អនុរដ្ឋមន្ត្រីការបរទេសចក្រភពអង់គ្លេស បង្ហាញការពេញចិត្តចំពោះភាពជាដៃគូដ៏ជិតស្និទ្ធរវាងក្រសួង-ស្ថាប័ន​ពាក់ព័ន្ធ​ កម្ពុជា-អង់គ្លេស ជាពិសេសក្នុងវិស័យគ្រប់គ្រងហិរញ្ញវត្ថុសាធារណៈ ក៏ដូចជាការចូលរួមចំណែកក្នុងការទាក់ទាញការវិនិយោគឱ្យបានកាន់តែច្រើនពីចក្រភពអង់គ្លេសមកកាន់កម្ពុជា។​ ជាមួយនេះ, លោកស្រីបានគូសបញ្ជាក់ពីសារៈសំខាន់នៃការធ្វើពិពិធកម្មទំនាក់ទំនងរបស់​អង់គ្លេស​ តាមរយៈការបង្កើតទំនាក់ទំនងជាមួយបណ្តាប្រទេសអាស៊ាន ដើម្បីពង្រីកការតភ្ជាប់ និងចែករំលែកបទពិសោធល្អៗ និងឧត្តមានុវត្តន៍របស់ចក្រភពអង់គ្លេសជាមួយប្រទេស​នៅក្នុងតំបន់។

 សម្ដេច ហ៊ុន ម៉ាណែត ក៏បានកោតសរសើរចំពោះការរួមចំណែកដ៏មានតម្លៃរបស់ចក្រភពអង់គ្លេស ក្នុងការអភិវឌ្ឍសង្គម-សេដ្ឋកិច្ចកម្ពុជា តាមរយៈការគាំទ្រលើសកម្មភាពបោសសម្អាតមីនមនុស្សធម៌ និងការពង្រីកទំហំពាណិជ្ជកម្មរវាងប្រទេសទាំងពីរ។ សម្ដេចមានប្រសាសន៍ថា ការធ្វើពិពិធកម្មគឺជាការតភ្ជាប់ដ៏ល្អប្រសើរមួយ ដែលជួយពង្រីកទីផ្សារ និងដៃគូពាណិជ្ជកម្មរបស់ប្រទេសនីមួយៗឱ្យកាន់តែទូលំទូលាយ។​ សម្ដេចធិបតីបានឯកភាពចំពោះការលើកឡើងរបស់លោកស្រី ក្នុងការតភ្ជាប់ទំនាក់ទំនងរវាងចក្រភពអង់គ្លេស ជាមួយបណ្ដាប្រទេសក្នុងតំបន់អាស៊ាន រួមទាំងកម្ពុជា ផងដែរ ជាពិសេសក្នុងទំនាក់ទំនង និងកិច្ចសហប្រតិបត្តិការលើវិស័យសេដ្ឋកិច្ច និងពាណិជ្ជកម្ម។

សម្ដេចធិបតី និងអនុរដ្ឋមន្ត្រីការបរទេសចក្រភពអង់គ្លេស បានពិភាក្សា និងផ្លាស់ប្តូរយោបល់គ្នាលើការបង្កើន និងពង្រឹងកិច្ចសហប្រតិបត្តិការលើវិស័យអប់រំ ដែលជាវិស័យដ៏សារៈសំខាន់​ និង​ការ​ចាប់​អារម្មណ៍​ខ្ពស់ក្នុងចំណោមនិស្សិតកម្ពុជា និងជាផ្នែកមួយផ្ដល់អត្ថប្រយោជន៍យ៉ាងច្រើនដល់ប្រទេសទាំងពីរ។ សម្តេចធិបតីបានលើកទឹកចិត្តឱ្យចក្រភពអង់គ្លេស បន្តយកចិត្តទុកដាក់ និងជំរុញកិច្ចសហប្រតិបត្តិការក្នុងវិស័យនេះឱ្យកាន់តែរីកចម្រើន និងទូលំទូលាយបន្ថែមទៀត។

សម្តេចធិបតី និងលោកស្រីក៏បានបន្តពិភាក្សា និងផ្លាស់ប្ដូរយោបល់លើបញ្ហាតំបន់ និងអន្តរជាតិដែលជាកង្វល់រួម ព្រមទាំងបានសង្កត់ធ្ងន់លើសារៈសំខាន់នៃការបង្កើនកិច្ចសហប្រតិបត្តិការរវាងបណ្តាប្រទេសទាំងអស់ ដើម្បីរួមចំណែកធានាបាននូវសន្តិភាព និងវិបុលភាពពិភពលោក៕

The post កម្ពុជា-អង់គ្លេស ពិភាក្សាពីការពង្រឹងកិច្ចសហប្រតិបត្តិការវិស័យការពារជាតិ សន្តិសុខ បង្ក្រាបឧក្រិដ្ឋកម្មឆ្លងដែន appeared first on Kampuchea Thmey Daily.

ការបញ្ជាក់ និងការអំពាវនាវរបស់កម្ពុជាធ្វើឡើង ស្របពេលនៅឯតាមព្រំដែនកម្ពុជា-ថៃ នៅតែមានភាពតានតឹង បទឈប់បាញ់មានភាពផុយស្រួយ  ខណៈកន្លងទៅថៃយកលេសបង្ក្រាបការឆបោកតាមអនឡាញលើអធិបតេយ្យ និងបូរណភាពទឹកដីកម្ពុជា ដោយប្រើប្រាស់កងកម្លាំងប្រដាប់អាវុធ ដើម្បីបិទបាំងទង្វើបើកការវាយប្រហារខុសច្បាប់ និងវាតទី កាន់កាប់ទឹកដីកម្ពុជា បំពានខ្សែរព្រំដែនដែលមានការទទួលស្គាល់ជាអន្តរជាតិ។

ក្នុងបទអន្តរាគមន៍ កិច្ចប្រជុំក្រុមប្រឹក្សាសហគមន៍នយោបាយ-សន្តិសុខអាស៊ាន (APSC) លើកទី៣១ នៅទីក្រុងសេប៊ូ ប្រទេសហ្វីលីពីន នៅថ្ងៃទី៧ ខែឧសភា ឆ្នាំ២០២៦ ឧបនាយករដ្ឋមន្ត្រី ប្រាក់ សុខុន បានបញ្ជាក់ជាថ្មីនូវការប្តេជ្ញាចិត្តរបស់កម្ពុជា ចំពោះការដោះស្រាយជម្លោះដោយសន្តិវិធី ការគោរពអធិបតេយ្យ និងការមិនប្រើកម្លាំង ស្របតាមច្បាប់អន្តរជាតិ។ ប្រមុខការទូតកម្ពុជា សង្កត់ធ្ងន់ថា អាស៊ាននៅតែបន្តដើរតួនាទីយ៉ាងសំខាន់ ដែលជាកម្លាំងចលករសម្រាប់សន្តិភាព ស្ថិរភាព និងការជឿទុកចិត្តគ្នា នៅក្នុងតំបន់ និងពិភពលោក។

ក្រសួងការបរទេស និងសហប្រតិបត្តិការអន្តរជាតិ ក្នុងកិច្ចប្រជុំ ឧបនាយករដ្ឋមន្ត្រី ប្រាក់ សុខុន ថ្លែងថា៖«នៅចំពោះមុខការកើនឡើងនៃភាពស្មុគស្មាញស្តីពីបញ្ហាឧក្រិដ្ឋកម្មឆ្លងដែន ជាពិសេសការគំរាមកំហែងតាមប្រព័ន្ធបច្ចេកវិទ្យា កម្ពុជាអំពាវនាវឱ្យមានការបង្កើនកិច្ចសហការក្នុងតំបន់ និងការចូលរួមយ៉ាងសកម្មជាមួយដៃគូ ដើម្បីរួមគ្នាប្រយុទ្ធប្រឆាំងនឹងបទល្មើសទាំងនេះឱ្យមានប្រសិទ្ធភាព។ »។

ក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាដែលមានលក្ខណៈឆ្លងដែន កន្លងទៅ កម្ពុជាបានអះអាងថា បានពង្រឹង និងពង្រីកកិច្ចសហប្រតិបត្តិការជាមួយដៃគូ អង្គការអន្តរជាតិ និងយន្តការពហុភាគីពាក់ព័ន្ធ ដើម្បីផ្លាស់ប្តូរព័ត៌មាន និងបច្ចេកទេសរួមគ្នា។ កម្ពុជាបានសហការយ៉ាងសកម្មក្នុងការស្រាវជ្រាវ បង្ក្រាប និងបញ្ជូនជនសង្ស័យ ព្រមទាំងការជួយសង្គ្រោះជនរងគ្រោះ ដែលពាក់ព័ន្ធនឹងបណ្តាញ ឧក្រិដ្ឋកម្មតាម ប្រព័ន្ធបច្ចេកវិទ្យា។

រាជរដ្ឋាភិបាល កម្ពុជា ក៏អំពាវនាវឱ្យមានការសហការពីអន្តរជាតិបន្ថែម ដោយផ្អែកលើគោលការណ៍ទំនួលខុសត្រូវរួម និងការចែករំលែកព័ត៌មានឱ្យបានទាន់ពេលវេលា ដើម្បីបង្កើនប្រសិទ្ធភាពក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ដែលជាបញ្ហារួមរបស់តំបន់។ កម្ពុជា ក៏បានបញ្ជាក់ជាថ្មីថា ការប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា គឺជាការប្រយុទ្ធប្រឆាំងរយៈពេលវែង ដែលត្រូវការចូលរួមពីគ្រប់ភាគីទាំងក្នុងប្រទេស និងអន្តរជាតិ៕

ដោយ៖ ង៉ិល ណារ៉ាត់

The post កម្ពុជាបញ្ជាក់ជាថ្មីពីការមិនប្រើកម្លាំងដោះស្រាយបញ្ហា និងអំពាវនាវឱ្យអាស៊ានបង្កើនកិច្ចសហការប្រឆាំងឧក្រិដ្ឋកម្មឆ្លងដែន appeared first on Kampuchea Thmey Daily.

ការឯកភាពនេះ បន្ទាប់ពីនាយឧត្តមសេនីយ៍ ស ថេត អគ្គស្នងការនគរបាលជាតិ និង លោក YOO Jae Seong អគ្គស្នងការស្តីទីនគរបាលជាតិ បានបើកកិច្ចប្រជុំកំពូលនគរបាលជាតិកូរ៉េ-កម្ពុជា នៅទីក្រុងសេអ៊ូល នៃសាធារណៈរដ្ឋកូរ៉េ នាថ្ងៃទី២៩ ខែមេសា ឆ្នាំ ២០២៦ ដើម្បីពិភាក្សាអំពីវិធីសាស្ត្រយុទ្ធសាស្ត្រក្នុងការពង្រឹងកិច្ចសហប្រតិបត្តិការរវាងកងកម្លាំងនគរបាលនៃប្រទេសទាំងពីរឱ្យកាន់តែរឹងមាំបន្ថែមទៀត។

សេចក្តីប្រកាសព័ត៌មានស្តីពីលទ្ធផលផ្លែផ្កាជំនួប បានគូសបញ្ជាក់ថា ថ្នាក់ដឹកនាំនៃកងកម្លាំងនគរបាលជាតិនៃប្រទេសទាំងពីរ បានបង្ហាញនូវទស្សនៈរួមថា បណ្តាញឧក្រិដ្ឋកម្មឆ្លងដែន រួមទាំងក្រុមធ្វើប្រតិបត្តិការមជ្ឈមណ្ឌលឆបោកតាមប្រព័ន្ធបច្ចេកវិទ្យា គឺជាការគំរាមកំហែងយ៉ាងធ្ងន់ធ្ងរដល់ពិភពលោកដោយបានបញ្ជាក់នូវការប្តេជ្ញាចិត្តជាថ្មីថា កិច្ចសហប្រតិបត្តិការយ៉ាងជិតស្និទ្ធ និងសាមគ្គីភាពរបស់កងកម្លាំងនគរបាល គឺមានសារៈសំខាន់ខ្លាំងក្នុងការធានាសុវត្ថិភាពសម្រាប់ប្រជាពលរដ្ឋនៃប្រទេសទាំង២ និងការកសាងសន្តិសុខសាធារណៈក្នុងតំបន់។

ទន្ទឹមនឹងការវាយតម្លៃខ្ពស់ចំពោះសមិទ្ធផលដែលសម្រេចបានដោយក្រុមការងាររួមកម្ពុជា-កូរ៉េ សម្រាប់ពលរដ្ឋកូរ៉េ (CKJTFK) អគ្គស្នងការនគរបាលជាតិទាំងពីរបានព្រមព្រៀងគ្នាពង្រីកវិសាលភាពប្រតិបត្តិការរបស់ ក្រុមការងារ CKJTFK។ បន្ទាប់ពីថ្នាក់ដឹកនាំនៃកងកម្លាំងនគរបាលប្រទេសទាំងពីរបានព្រមព្រៀងគ្នាក្នុងការបង្កើតក្រុមការងាររួមនេះ នៅក្នុងកិច្ចប្រជុំកំពូល កាលពីខែតុលា ឆ្នាំ២០២៥ មន្ត្រីនគរបាលកូរ៉េបាននិងកំពុងធ្វើការរួមគ្នាជាមួយមន្ត្រីនគរបាលកម្ពុជា ដើម្បីប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា និងបទល្មើសពាក់ព័ន្ធផ្សេងទៀតប្រឆាំងនឹងពលរដ្ឋកូរ៉េ ចាប់តាំងពីខែធ្នូ ឆ្នាំ២០២៥កន្លងមក។

លទ្ធផលការងារលេចធ្លោរបស់ក្រុមការងារ CKJTFK បាននាំឱ្យមានការពង្រីកកិច្ចសហប្រតិបត្តិការរបស់ខ្លួនដែលជាមូលដ្ឋានគ្រឹះសម្រាប់ការការពារពលរដ្ឋកូរ៉េនៅកម្ពុជាក្នុងអំឡុងប្រតិបត្តិការយ៉ាងសកម្មរយៈពេល ៤ ខែ (ចាប់ពីខែធ្នូឆ្នាំ២០២៥ ដល់ខែមីនាឆ្នាំ២០២៦)។ ក្រុមការងារ CKJTFK ទទួលបានជោគជ័យក្នុងការចាប់ខ្លួនឧក្រិដ្ឋជនសំខាន់ៗ​សរុបចំនួន ១៦៦នាក់ រួមទាំងជនជាតិកូរ៉េ ដែលរត់គេចខ្លួនចូលមកសម្ងំនៅប្រទេសកម្ពុជា និងបានជួយសង្គ្រោះពលរដ្ឋកូរ៉េចំនួន ៥ រូប ពីការឃុំឃាំង ដែលបង្ហាញពីប្រសិទ្ធភាពនៃកិច្ចសហប្រតិបត្តិការនៃប្រទេសទាំងពីរក្នុងការការពារពលរដ្ឋកូរ៉េនៅកម្ពុជា។

ផ្អែកលើលទ្ធផលការងារលេចធ្លោទាំងនេះ ថ្នាក់ដឹកនាំនៃកងកម្លាំងនគរបាលនៃប្រទេសទាំងពីរ បានបញ្ជាក់ជាថ្មីនូវការប្តេជ្ញាចិត្តក្នុងការលុបបំបាត់បទល្មើសឆ្លងដែនតាមរយៈការឈានដល់កិច្ចព្រមព្រៀង ដើម្បីពង្រីកកិច្ចសហប្រតិបត្តិការរបស់ក្រុមការងារ CKJTFK ដែលបច្ចុប្បន្នមានកម្រិតត្រឹមតែបទល្មើសពាក់ព័ន្ធនឹងការឆបោកតាមប្រព័ន្ធបច្ចេកវិទ្យា ដោយដាក់រួមបញ្ចូលទាំងបទល្មើសគ្រឿងញៀន និងល្បែងស៊ីសងខុសច្បាប់។

ការពង្រីកកិច្ចសហប្រតិបត្តិការនេះ ត្រូវបានចាត់ទុកថាជាវិធានការបុរេសកម្ម នឹងជួយជំរុញដល់ការចែករំលែកព័ត៌មានតាមពេលវេលាជាក់ស្តែង និងប្រតិបត្តិការស៊ើបអង្កេតរួមគ្នា ស្របតាមច្បាប់និងបទប្បញ្ញត្តិនៃប្រទេសនីមួយៗ ដើម្បីឆ្លើយតបទៅនឹងបណ្តាញឧក្រិដ្ឋជនដែលកំពុងពង្រីកវិសាលភាពបង្កើតមជ្ឈមណ្ឌលយុទ្ធសាស្ត្ររបស់ពួកគេ នៅអាស៊ី អាគ្នេយ៍៕

The post នគរបាលជាតិកម្ពុជា-កូរ៉េ ព្រមព្រៀងគ្នាពង្រឹងកិច្ចសហប្រតិបត្តិការបង្ក្រាបបណ្តាញឧក្រិដ្ឋកម្មឆ្លងដែនបន្ថែមទៀត appeared first on Kampuchea Thmey Daily.

អនុរដ្ឋមន្ត្រីទី២ នៃក្រសួងការបរទេសកូរ៉េ ជម្រាបនាយករដ្ឋមន្ត្រីកម្ពុជាថា ទស្សនកិច្ចការងាររបស់លោកស្រី និងគណៈប្រតិភូមកកាន់កម្ពុជានាពេលនេះ នឹងរួមចំណែកកាត់បន្ថយនូវការភាន់ច្រឡំ តាមបណ្ដាញសារព័ត៌មាន ដោយសារការផ្សព្វផ្សាយព័ត៌មានមិនបានគ្រប់ជ្រុងជ្រោយ ក៏ដូចជានឹងរួមចំណែកពង្រឹង និងពង្រីកទំនាក់ទំនង និងកិច្ចសហប្រតិបត្តិការទ្វេភាគី ឱ្យកាន់រឹងមាំ ក្នុងគោលដៅរួមគ្នាក្នុងការប្រយុទ្ធប្រឆាំងឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា។

នៅចំពោះមុខ សម្ដេច ហ៊ុន ម៉ាណែត, លោកស្រី គីម ជីណា ក៏បានថ្លែងអំណរគុណចំពោះកម្ពុជាដែលតែងតែផ្ដល់នូវកិច្ចសហប្រតិបត្តិការដ៏ល្អប្រសើរនាពេលកន្លងមក ក្នុងការប្រយុទ្ធប្រឆាំងឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា ប្រកបដោយលទ្ធផលល្អជាផ្លែផ្កា។ ក្នុងន័យនេះ, កូរ៉េខាងត្បូងប្ដេជ្ញាបន្តកិច្ចសហប្រតិបត្តិការជាមួយកម្ពុជាឱ្យកាន់តែស៊ីជម្រៅ និងល្អប្រសើរ ថែមទៀត។

សម្ដេច ហ៊ុន ម៉ាណែត ក៏បានឆ្លើយតបទៅកាន់អនុរដ្ឋមន្ត្រីការបរទេសកូរ៉េថា ចំពោះការប្រយុទ្ធប្រឆាំងឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា, អាជ្ញាធរកម្ពុជា និងអាជ្ញាធរកូរ៉េ បាននិងកំពុងមានកិច្ចសហប្រតិបត្តិការល្អ ប្រកបដោយលទ្ធផលជាច្រើន ហើយកិច្ចសហប្រតិបត្តិការនះនឹងនៅបន្តទៀត នាពេលអនាគត។ សម្ដេចបវរធិបតីក៏បានគូសរំលេចថា កម្ពុជាតែងតែចាត់វិធានការយ៉ាងសកម្ម និងបន្តបន្ទាប់ក្នុងការប្រយុទ្ធប្រឆាំងឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា ដោយភាពម្ចាស់ការ និងមានកិច្ចសហប្រតិបត្តិការជាមួយដៃគូជាច្រើន រួមទាំងកូរ៉េខាងត្បូង។

ជុំវិញការផ្សាយព័ត៌មានអំពីបទល្មើសឆបោកតាមបច្ចេកវិទ្យាមិនគ្រប់ជ្រុងជ្រោយបង្កការយល់ច្រឡំ, អគ្គស្នងការដ្ឋាននគរបាលជាតិកម្ពុជា នៅថ្ងៃទី១៦ ខែតុលា វាយតម្លៃថា ថ្មីៗនេះបណ្តាញសារព័ត៌មានរបស់កូរ៉េខាងត្បូង និងសារព័ត៌មានបរទេសមួយចំនួនផ្សេងទៀតបានយកទៅផ្សព្វផ្សាយបន្ត ដោយចាប់ផ្តើមពីករណីឃាតកម្មលើយុវជនកូរ៉េអាយុ ២២ឆ្នាំ និង បន្តភ្ជាប់ទៅចំនួនករណីពលរដ្ឋកូរ៉េបាត់ខ្លួននៅកម្ពុជាដែលមិនត្រឹមត្រូវ បង្កជាការភ័ន្តច្រឡំអំពីរឿងហេតុ និងអាចប៉ះពាល់ដល់កិច្ចសហប្រតិបត្តិការរវាងសមត្ថកិច្ចនគរបាលនៃប្រទេសទាំងពីរ។

អគ្គស្នងការនគរបាលជាតិកម្ពុជា បញ្ជាក់ចំៗថា នៅថ្ងៃទី១៤ ខែតុលា ឆ្នាំ២០២៥ សារព័ត៌មាន The Korea Times បានស្រង់សម្ដីអគ្គស្នងការនគរបាលស្តីទី និងក្រសួងការបរទេសកូរ៉េ ចេញផ្សាយក្នុងអត្ថបទផ្ទុយពីការពិតនៅកម្ពុជា បង្កជាការយល់ច្រឡំ។  ដោយ The Korea Times ផ្សាយថាគិតត្រឹមខែសីហា ក្នុងឆ្នាំ២០២៥ មានជនជាតិកូរ៉េប្រមាណ ៨០នាក់ កំពុងបាត់ខ្លួនក្នុងប្រទេសកម្ពុជា និងមានបណ្ដឹង៣៣០ករណី ត្រូវបានប្តឹងតាមរយៈស្ថានទូតកូរ៉េប្រចាំនៅកម្ពុជារាប់បញ្ចូលទាំងបណ្តឹងផ្ទាល់ខ្លួន និងក្រុមគ្រួសារ។

អគ្គស្នងការនគរបាលជាតិកម្ពុជា ចាត់ទុកការផ្សាយនេះផ្ទុយពីការពិតនៅកម្ពុជា ព្រោះតែជាក់ស្តែងក្នុងឆ្នាំ២០២៥ នេះ សមត្ថកិច្ចកម្ពុជាបានទទួលសំណើសុំព័ត៌មានដោយផ្ទាលពីស្ថានទូតលើករណីជនជាតិកូរ៉េដែលបាត់ខ្លួនសរុបត្រឹមតែ១១៨នាក់ ហើយក្នុងនោះមាន៤០នាក់ ត្រូវបានសមត្ថកិច្ចរកឃើញបានចាកចេញពីកម្ពុជា និង០២នាក់ ពុំមានក្នុងទិន្នន័យដំណើរចេញ-ចូលកម្ពុជានោះទេ។ ចំពោះ ៧៦នាក់ ដែលពុំទាន់មានទិន្នន័យធ្វើដំណើរចេញពីប្រទេសកម្ពុជានោះ កំពុងស្ថិតក្រោមការស្រាវជ្រាវ ស្វែងរករបស់សមត្ថកិច្ចកម្ពុជាយ៉ាងយកចិត្តទុកដាក់។

អគ្គស្នងការនគរបាលជាតិអះអាងថា ដោយឡែកក្នុងឆ្នាំ២០២៥នេះ សមត្ថកិច្ចកម្ពុជាក៏ទទួលបានសំណើសុំអន្តរាគមន៍ជួយពលរដ្ឋកូរ៉េ៥២សំណើ ស្មើនឹង ៦០នាក់ តាមរយៈស្ថានទូត សាមីខ្លួន និងក្រុមគ្រួសារ។ ជាលទ្ធផល សមត្ថកិច្ចបានរកឃើញចំនួន ៣៥សំណើ ស្មើនឹង ៤០នាក់  និងរកមិនឃើញ៣សំណើ ឮស្មើនឹង៥នាក់។ ចំពោះសំណើសេសសល់ សមត្ថកិច្ចជំនាញ និងអាជ្ញាធរពាក់ព័ន្ធកំពុង បន្តស្រាវជ្រាវ។

អគ្គស្នងការនគបាលជាតិ ក៏បានឱ្យដឹងថា នៅថ្ងៃទី១៧ ខែតុលា ឆ្នាំ២០២៥ ស្ថាប័នមានសមត្ថកិច្ចពាក់ព័ន្ធ នឹងបញ្ជូនជនជាតិកូរ៉េចំនួន៥៩នាក់  ដែលទទួលបានការជួយអន្តរាគមន៍ពីអាជ្ញាធរកម្ពុជា ឬត្រូវបានឃាត់ខ្លួនដោយបទល្មើសផ្សេងៗ ត្រឡប់ទៅប្រទេសកំណើតវិញ ក្រោមកិច្ចសហការល្អពីស្ថានទូតកូរ៉េប្រចាំកម្ពុជា៕

ដោយ៖ ង៉ិល ណារ៉ាត់

The post អនុរដ្ឋមន្ត្រីការបរទេសកូរ៉េ ថា កម្ពុជា-កូរ៉េបានបង្ក្រាបឧក្រិដ្ឋកម្មឆ្លងដែនជាច្រើន  ប៉ុន្តែសារព័ត៌មានផ្សាយអវិជ្ជមាន appeared first on Kampuchea Thmey Daily.

បញ្ហាទាំងនេះស្ថិតក្រោមអាណត្តិរបស់គណៈកម្មាធិការព្រំដែនទូទៅ (GBC) គួរតែត្រូវ យកទៅពិភាក្សានៅក្នុងកិច្ចប្រជុំបន្ទាប់របស់គណៈកម្មាធិការព្រំដែនទូទៅ (GBC) ដែលគ្រោងនឹងធ្វើឡើង នាពេលឆាប់ៗខាងមុខនេះ ដូចដែលបានព្រមព្រៀងគ្នាដោយភាគីទាំងពីររួចហើយ។

នេះបើយោងតាមលទ្ធផល នៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៤របស់កម្ពុជា និងកងទ័ពភូមិភាគទី២របស់ថៃ នៅថ្ងៃទី២​៧ ខែសីហា ឆ្នាំ២០២៥ ដោយភាគីថៃធ្វើជាម្ចាស់ផ្ទះ ដែលមានគណៈ​ប្រតិភូកម្ពុជា​ដឹកនាំដោយ លោកឧត្តមសេនីយ៍ឯក ពៅ ហេង មេបញ្ជាការយោធភូមិភាគទី៤ និងជាសហប្រធាននៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ (RBC)។ គណៈ ប្រតិភូថៃដឹកនាំដោយ  ឧត្តមសេនីយ៍ឯក ប៊ុនស៊ីន ផាតក្លាង មេបញ្ជាការកងទ័ពភូមិភាគទី២ និងជាសហប្រធាននៃកិច្ចប្រជុំវិសាមញ្ញរបស់គណៈកម្មាធិការ ព្រំដែនថ្នាក់យោធភូមិភាគ (RBC)។

គួររម្លឹកថា រាជរដ្ឋាភិបាលកម្ពុជា កាលពីថ្ងៃទី១៤ ខែកក្កដា ឆ្នាំ២០២៥ បានដាក់ចេញ យុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យានៅទូទាំងប្រទេស ដោយមានការចូលរួមអនុវត្តសកម្មភាពពីក្រសួង ស្ថាប័ន អាជ្ញាធរថ្នាក់ក្រោមជាតិ និងសមត្ថកិច្ចពាក់ព័ន្ធ ដើម្បីបង្ការ ទប់ស្កាត់ និងប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាឱ្យមានប្រសិទ្ធភាពខ្ពស់ សំដៅចូលរួមចំណែកថែរក្សា ការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។ ក្នុងការបោសសម្អាតការឆបោកតាមប្រព័ន្ធបច្ចេកវិទ្យានេះ សមត្ថកិច្ចចម្រុះនឹងចាត់វិធានការ តាមផ្លូវច្បាប់យ៉ាងតឹងរ៉ឹងបំផុតចំពោះ មេខ្លោងទាំងឡាយដែលជាប់ពាក់ព័ន្ធនឹងអំពើឆបោកតាមប្រព័ន្ធបច្ចេកវិទ្យានេះ៕

The post កម្ពុជា-ថៃ បង្ហាញឆន្ទៈទប់ស្កាត់ឧក្រិដ្ឋកម្មឆ្លងដែន និងការឆបោកតាមអនឡាញ appeared first on Kampuchea Thmey Daily.

ការគាំទ្រនេះបានធ្វើឡើងបន្ទាប់ពីក្រសួងមហាផ្ទៃកម្ពុជា និងក្រសួងមហាផ្ទៃសិង្ហបុរី បានឈានដល់ការចុះអនុស្សារណៈនៃការយោគយល់គ្នាស្ដីពីការបង្ការ និងប្រយុទ្ធប្រឆាំងឧក្រិដ្ឋកម្មឆ្លងដែន ដែលជាឯកសារសហប្រតិបត្តិការស្នូលថ្មីមួយទៀតសម្រាប់ប្រទេសទាំងពីរ។ ឯកសារនេះ ត្រូវបានចុះហត្ថលេខាក្នុងពេលមានដំណើរទស្សនកិច្ចរបស់រដ្ឋមន្ត្រីក្រសួងមហាផ្ទៃកម្ពុជា លោក ស សុខា នៅសិង្ហបុរី រយៈពេល៣ថ្ងៃ ពីថ្ងៃទី៧ ដល់ថ្ងៃទី៩ ខែកក្កដា ឆ្នាំ២០២៥។

នាឱកាសទទួលជួបលោកឧបនាយករដ្ឋមន្ត្រី ស សុខា នៅវិមានរដ្ឋបាល កាលពីរសៀលថ្ងៃទី៨ ខែកក្កដា ឆ្នាំ២០២៥ លោក ឡរ៉េន វ៉ុង នាយករដ្ឋមន្រ្តីសិង្ហបុរី បានកោតសរសើរ និងវាយតម្លៃខ្ពស់ចំពោះឆន្ទៈ និងលទ្ធផលដ៏ជាក់ស្ដែងរបស់កម្ពុជាលើការងារប្រយុទ្ធប្រឆាំងឧក្រិដ្ឋកម្មឆ្លងដែន។

ចំពោះការសម្រេចបាននូវការចុះហត្ថលេខាលើអនុស្សរណៈរវាងក្រសួងមហាផ្ទៃកម្ពុជា និងក្រសួងមហាផ្ទៃសិង្ហបុរី ពេលនេះ លោកនាយករដ្ឋមន្ត្រីសិង្ហបុរី បានបង្ហាញការគាំទ្រ និងអះអាងថា នេះឆ្លុះបញ្ចាំងអំពីការប្តេជ្ញាចិត្ត និងកិច្ចខិតខំប្រឹងប្រែងរបស់ភាគីទាំងពីរក្នុងការប្រយុទ្ធប្រឆាំងឧក្រិដ្ឋកម្មឆ្លងដែន។ ខណៈលោក ក៏គាំទ្រចំពោះការលើកកម្ពស់សមត្ថភាព កម្លាំងអនុវត្តច្បាប់នៃក្រសួងមហាផ្ទៃកម្ពុជាផងដែរ។ នេះបើតាមខ្លឹមសារលើសេចក្ដីប្រកាសព័ត៌មានរបស់ក្រសួងមហាផ្ទៃកម្ពុជា នៅថ្ងៃនេះ។

ក្នុងក្របខណ្ឌតំបន់ លោកនាយករដ្ឋមន្ត្រី ឡរ៉េន វ៉ុង និងឧបនាយករដ្ឋមន្ត្រី ស សុខា ក៏បានគូសបញ្ជាក់អំពីសារៈសំខាន់ក្នុងការពង្រឹងមជ្ឈភាពអាស៊ាន ហើយក្នុងន័យនេះ ភាគីទាំងពីរ ថា កិច្ចសហប្រតិបត្តិការរវាងក្រសួងមហាផ្ទៃកម្ពុជា និងសិង្ហបុរី ក៏នឹងរួមចំណែកធានាបានសន្តិសុខ ស្ថិរភាព និងវិបុលភាពក្នុងតំបន់អាស៊ាន តាមរយៈកិច្ចខិតខំប្រឹងប្រែងរួមគ្នាក្នុងការបង្ការ ទប់ស្កាត់ និងបង្ក្រាបបានបទល្មើសឆ្លងដែនគ្រប់ប្រភេទ ជាពិសេសបទល្មើសគ្រឿងញៀន ការឆបោកតាមប្រព័ន្ធបច្ចេកវិទ្យា និងអំពើជួញដូរមនុស្ស ជាដើម៕

ដោយ៖ ធឿន វ៉ាន់សុង

The post នាយករដ្ឋមន្ត្រីសិង្ហបុរី គាំទ្រចំពោះកិច្ចសហការជាមួយកម្ពុជាក្នុងការប្រយុទ្ធប្រឆាំងឧក្រិដ្ឋកម្មឆ្លងដែន appeared first on Kampuchea Thmey Daily.