AFF U-19 Championship Archives - Kampuchea Thmey Daily

U-19 ធ្វើមិនបានល្អមែនពិត តែគ្រូបង្វឹកថា បានមើលឃើញពីភាពរីកចម្រើនរបស់កីឡាករ

Sorn Phanith — Tue, 12 Jul 2022 07:18:27 +0000

ក្រុមបាល់ទាត់ជម្រើសជាតិកម្ពុជា បានបញ្ចប់ភារកិច្ចក្នុងពានរង្វាន់យុវជនអាស៊ានក្រោមអាយុ ១៩ ឆ្នាំ (AFF U19 Boys Championship) ប្រចាំឆ្នាំ ២០២២ នៅប្រទេសឥណ្ឌូណេស៊ី ជាមួយនឹងលទ្ធផលពុំសមប្រកប។

U-19 កម្ពុជា ប្រកួត ៤ ដងក្នុងពូល B ក្នុងនោះឈ្នះតែម្ដងគត់ប្រកួតបើកឆាកទល់នឹង U-19 សិង្ហបុរី បន្ទាប់មក ៣ ប្រកួតចុងក្រោយបានរងបរាជ័យជាប់ៗគ្នាក្រោមថ្វីជើងម៉ាឡេស៊ី ឡាវ និងទីម័រខាងកើត ដែលបានធ្វើឱ្យអ្នកគាំទ្រសម្ដែងការមិនពេញចិត្ត ប៉ុន្តែគ្រូបង្វឹក លោក Gyotoku Koji បានមើលឃើញពីភាពរីកចម្រើនរបស់កូនក្រុមផងដែរ។

លោក Gyotoku Koji បាននិយាយទៅកាន់កីឡាករក្រោយចប់ការប្រកួតថា៖ «យើងឆ្លងកាត់ការប្រកួតហ្នឹងក៏មានភាពរីកចម្រើនដែរ ប៉ុន្តែភាពខ្វះខាតរបស់យើងក៏មានដែរ។ អ្វីដែលសំខាន់បំផុតចាប់ពីពេលហ្នឹងទៅយើងដឹងខ្លួនឯងគួរតែធ្វើអ្វី។ សង្ឃឹមថាអ្នកទាំងអស់ដឹងពីចំណុចខ្វះខាតខ្លួនឯង ហើយខិតខំប្រឹងហ្វឹកហាត់ដើម្បីអាចលេងបានល្អជាងហ្នឹងនៅប្រកួតក្រោយ។»

ក្រោយចប់ព្រឹត្តិការណ៍នេះ U-19 កម្ពុជា នៅសល់ព្រឹត្តិការណ៍មួយទៀត គឺការប្រកួតជើងឯកយុវជនអាស៊ីអាយុក្រោម ២០ ឆ្នាំ (AFC U-20 Asian Cup) វគ្គជម្រុះ នៅខែកញ្ញា ខាងមុខ។ គ្រូបង្វឹកសញ្ជាតិជប៉ុនរូបនេះ ក៏បានផ្ដាំផ្ញើកីឡាករឱ្យខិតខំប្រឹងប្រែងហ្វឹកហាត់ ដើម្បីមានឱកាសជាប់ U-20 កម្ពុជា។

គួរបញ្ជាក់ថា U-19 កម្ពុជា បញ្ចប់ទៅដោយឈរនៅលេខ៤ ក្នុងពូល B ក្រោយប្រកួត ៤ ដងឈ្នះ ១ ចាញ់ ៣ មាន ៣ ពិន្ទុ លើក្រុមបាតតារាង U-19 សិង្ហបុរី ដែលប្រកួតមិនដែលឈ្នះ។ ខណៈពូល B នេះ ឡាវ ជាមួយ ម៉ាឡេស៊ី ជាក្រុមឡើងវគ្គបន្ត៕

អត្ថបទ៖ មន្នីរ័ត្ន

The post U-19 ធ្វើមិនបានល្អមែនពិត តែគ្រូបង្វឹកថា បានមើលឃើញពីភាពរីកចម្រើនរបស់កីឡាករ appeared first on Kampuchea Thmey Daily.

U19 កម្ពុជាចប់ភារកិច្ចពាន AFF-U19 ជាមួយលទ្ធផលរងការរិះគន់ខ្លាំង

chean virakbot — Tue, 12 Jul 2022 00:01:00 +0000

ក្រុមបាល់ទាត់ជម្រើសជាតិកម្ពុជាអាយុក្រោម១៩ឆ្នាំ (U19) បានបញ្ចប់ភារកិច្ចក្នុងពានរង្វាន់យុវជនអាស៊ានក្រោមអាយុ១៩ឆ្នាំ (AFF U19 Boys Championship) ប្រចាំឆ្នាំ២០២២ នៅប្រទេសឥណ្ឌូណេស៊ី បន្ទាប់ពី៤ប្រកួតគឺឈ្នះ១ និងចាញ់៣។

ក្រុម U19 ត្រូវបានចាប់ឆ្នោតស្ថិតនៅក្នុងពូល B ដែលមានក្រុម ទីម័រខាងកើត សិង្ហបុរី ឡាវ និង ម៉ាឡេស៊ី។ ពូលនេះអាចចាត់ទុកជាពូលដែលស្រួលជាងគេ បើប្រៀបធៀបនឹងពូល A សុទ្ធតែក្រុមខ្លាំងដូចជាម្ចាស់ផ្ទះឥណ្ឌូណេស៊ី ថៃ វៀតណាម មីយ៉ាន់ម៉ា ហ្វីលីពីន និងព្រុយណេ។

តាមបទពិសោធ ក៏ដូចជាការអភិវឌ្ឍរយៈពេលប៉ុន្មានឆ្នាំចុងក្រោយនេះ អ្នកគាំទ្រកម្ពុជាគិតឃើញថា គោព្រៃជំទង់កម្ពុជាមានសង្ឃឹមច្រើនឡើងទៅវគ្គពាក់កណ្តាលផ្តាច់ព្រ័ត្រ ដោយសារក្រុមឡាវ និងទីម័រខាងកើតសុទ្ធជាក្រុមដែលកម្ពុជាធ្លាប់មានប្រវត្តិឈ្នះ។ លើកលែងក្រុមយុវជនម៉ាឡេស៊ីដែលជាក្រុមមានគុណភាពល្អជាងគេក្នុងពូលនេះ។

ការពិតបង្ហាញលើទីលានចំនួន៤ប្រកួតគឺបង្ហាញលទ្ធផលហួសពីការគិតរបស់អ្នកគាំទ្រ។ យុវជនកម្ពុជារកបានតែ៣ពិន្ទុប៉ុណ្ណោះពីការឈ្នះសិង្ហបុរីដោយលទ្ធផល ១-០ នៅថ្ងៃបើកឆាក ប៉ុន្តែ៣ប្រកួតចុងក្រោយចាញ់ទាំងអស់គឺចាញ់យុវជនម៉ាឡេស៊ី ១-២, ចាញ់ឡាវ ១-២ និងចុងក្រោយចាញ់ ទីម័រខាងកើត ១-៤។

លទ្ធផលបែបនេះគឺជាអ្វីដែលអ្នកគាំទ្រខកចិត្ត និងគិតឃើញថា ការអភិវឌ្ឍបាល់ទាត់កម្ពុជាហាក់ដូចជាដើរថយក្រោយដោយសារភិវឌ្ឍក្រុមយុវជនជំនាន់បានល្អរហូតដល់បង្កើតប្រវត្តិសាស្ត្រក្នុងការឡើងវគ្គ៤ក្រុមចុងក្រោយកាលពីឆ្នាំ២០១៩ និងជាប់វគ្គជម្រុះឡើងទៅកាន់ជុំផ្តាច់ព្រ័ត្រ AFC U-19 Championship កាលពីឆ្នាំ២០២០។ នៅពេលយុវជនជំនាន់មុនផុតអាយុទៅ ដល់វេនយុវជនជំនាន់ក្រោយ ប៉ុន្តែបែរឃាធ្វើមិនបានល្អទាល់តែសោះ។

អ្វីដែលគួរឲ្យចាប់អារម្មណ៍ទៀតនោះ ក្រុមបាល់ទាត់ជម្រើសជាតិកម្ពុជាស្ទើរគ្រប់ក្រុមពោលគឺចាប់ពី U19, U23 និងក្រុមធំធ្វើមិនបានល្អទាំងអស់ពោលគឺធ្លាក់ត្រឹមវគ្គជម្រុះក្នុងពូលដូចគ្នានាឆ្នាំ២០២២នេះ៕

អត្ថបទ៖ វីរបុត្រ

The post U19 កម្ពុជាចប់ភារកិច្ចពាន AFF-U19 ជាមួយលទ្ធផលរងការរិះគន់ខ្លាំង appeared first on Kampuchea Thmey Daily.

ប្រធានបាល់ទាត់អាស៊ានបញ្ជាក់ខ្លីរឿងគ្រាប់បាល់មិនឲ្យកម្ពុជាយប់មិញ

chean virakbot — Fri, 08 Jul 2022 00:56:02 +0000

ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U19) បានចាញ់ក្រុមបាល់ទាត់ជម្រើសជាតិឡាវអាយុក្រោម២៣ឆ្នាំដោយលទ្ធផល ១-២ សម្រាប់ការប្រកួតវគ្គសន្សំពិន្ទុក្នុងពូលនៃពានរង្វាន់ AFF U19 BOY CHAMPIONSHIP 2022 នៅប្រទេសឥណ្ឌូណេស៊ី។

ការប្រកួតយប់មិញនេះ ក្រុមយុវជនឡាវធ្វើបានល្អមែនទែននៅវគ្គទី១ទាំងការសម្រុក ដាក់សម្ពាធ និងស៊ុតសំដៅទីរបស់កម្ពុជា ហើយជាលទ្ធផលបានទម្លាយសំណាញ់ទីរបស់កម្ពុជាពីរគ្រាប់ដើម្បីបញ្ចប់វគ្គទី១ដោយលទ្ធផល ២-០។

នៅវគ្គទី២ ក្រុមគោព្រៃជំទង់កម្ពុជាបានកែប្រែស្ថានការឲ្យប្រសើរវិញតាមរយៈការផ្លាស់ប្តូរកីឡាករថ្មីចូល និងការសហការគ្នាបានល្អ។ កត្តានេះបានជំរុញឲ្យក្រុមយុវជនកម្ពុជាបានដាក់សម្ពាធជាបន្តបន្ទាប់ហើយក៏មានឱកាសស៊ុតបាល់សំដៅទីរបស់ឡាវច្រើនដែរ។

ការប្រឹងប្រែងរបស់កម្ពុជាបានផ្តល់ផលគួរឲ្យចាប់អារម្មណ៍គឺនៅនាទីទី៧៥ យុវជនកម្ពុជាបានស៊ុតរំលងដៃទីអ្នកចាំទីឡាវបុករបាទីហើយធ្លាក់ចូលក្នុងប្រអប់ឆ្លងផុតបន្ទាត់ ហើយបាល់លោតឡើងលើត្រូវបានអ្នកចាំទីឡាវចាប់។ ពេលនោះគឺអាជ្ញាកណ្តាលទាំងលើទីលាន និងខ្សែបន្ទាត់មើលមិនឃើញពីបាល់ចូលទីរបស់ឡាវទេ ហើយក៏គ្មានការពិនិត្យ និងតវ៉ាភ្លាមៗដែរ។

ពេលចាក់វីដេអូមើលសាឡើងវិញបង្ហាញយ៉ាងច្បាស់ថា បាល់បានចូលទីរបស់ឡាវហើយ ប៉ុន្តែគ្មានការតវ៉ា ឬស្នើសុំពិនិត្យឡើងវិញ។ បន្ទាប់មកកម្ពុជាបានស៊ុតបំប៉ោងសំណាញ់ទីឡាវបានសម្រេចដើម្បីតាមពីក្រោម ២-១ ដែលលទ្ធផលនេះបន្តដល់ចប់ការប្រកួត។

ក្រោយចប់ការប្រកួតនៅលើបណ្តាញទំនាក់ទំនងសង្គមកម្ពុជាបានបង្ហោះរូបភាពព្រោងព្រាតពីបាល់កម្ពុជាចូលទី១របស់ឡាវ។ អ្នកគាំទ្រកម្ពុជាបានទាមទារឲ្យមានការតវ៉ាចំពោះអាជ្ញាកណ្តាលដែលសម្រេចមិនឲ្យគ្រាប់បាល់របស់កម្ពុជា។

កាលពីយប់មិញនេះ «កម្ពុជាថ្មី» បានទាក់ទងសួរឯកឧត្តម ខៀវ សាម៉េត ប្រធានសហព័ន្ធកីឡាបាល់ទាត់អាស៊ីអាគ្នេយ៍ជុំវិញរឿងនេះថា តើមានចំណាត់ការយ៉ាងណា? ប្រធានសហព័ន្ធកីឡាបាល់ទាត់អាស៊ីអាគ្នេយ៍ជនជាតិកម្ពុជារូបនេះបានបញ្ជាក់ខ្លីថា «គេមានយន្តការលើអាជ្ញាកណ្តាល» ប៉ុន្តែឯកឧត្តមមិនបានបកស្រាយអ្វីវែងឆ្ងាយឡើយ។

រហូតដល់ពេលនេះ ដំណោះស្រាយបែបណាចំពោះមន្ត្រីអាជ្ញាកណ្តាលលើទីលានមិនទាន់មានទេ។

ក្រុមយុវជនកម្ពុជាមានភាគទាបបំផុតក្នុងការឡើងទៅវគ្គ៤ក្រុមចុងក្រោយ បន្ទាប់ពីចាញ់ពីរប្រកួត និងឈ្នះ១ប្រកួត។ ប្រកួតចុងក្រោយ U19 កម្ពុជាត្រូវប៉ះយុវជនទីម័រខាងកើតនៅថ្ងៃទី១១ ខែកក្កដា ឆ្នាំ២០២២៕

អត្ថបទ៖ វីរបុត្រ

The post ប្រធានបាល់ទាត់អាស៊ានបញ្ជាក់ខ្លីរឿងគ្រាប់បាល់មិនឲ្យកម្ពុជាយប់មិញ appeared first on Kampuchea Thmey Daily.

យប់នេះ U19កម្ពុជា ប៉ះ U19ឡាវ លើកទី៦ ពាន AFF U19 ដើម្បីបង្កើតកំណត់ត្រាថ្មី

chean virakbot — Thu, 07 Jul 2022 01:39:25 +0000

ក្រុមបាល់ទាត់ជម្រើសជាតិកម្ពុជាអាយុក្រោម១៩ឆ្នាំ (U19) នឹងប្រកួតជាមួយក្រុមបាល់ទាត់ជម្រើសជាតិឡាវអាយុក្រោម១៩ឆ្នាំ (U19) វគ្គសន្សំពិន្ទុក្នុងពូលពានរង្វាន់ AFF U19 Championship 2022 វេលាម៉ោង៧យប់ នៅកីឡដ្ឋាន MEDYA SENAYAN ថ្ងៃទី៧ ខែកក្កដានៅប្រទេសឥណ្ឌូណេស៊ី។

ក្រុមយុវជនកម្ពុជាអាយុក្រោម១៩ឆ្នាំ

សម្រាប់ការប្រកួតក្នុងពានរង្វាន់ខាងលើនេះ ក្រុមយុវជនកម្ពុជាឆ្លងកាត់២ប្រកួតហើយ ក្នុងនោះប្រកួតលើកទី១បានយកឈ្នះក្រុមយុវជនសិង្ហបុរីដោយលទ្ធផល ១-០ ប៉ុន្តែប្រកួតលើកទី២បានចាញ់ក្រុមយុវជនម៉ាឡេស៊ី ២-១។ ចំណែកក្រុមយុវជនឡាវវិញទើបតែប្រកួតបាន១លើកប៉ុណ្ណោះដោយបានយកឈ្នះយុវជនទីម័រខាងលកើតដោយលទ្ធផល ២-០។

គោព្រៃជំទង់កម្ពុជាត្រូវការឈ្នះដាច់ខាតសម្រាប់ការប្រកួតជាមួយយុវជនឡាវថ្ងៃនេះដើម្បីបន្តក្តីសង្ឃឹមឡើងទៅវគ្គពាក់កណ្តាលផ្តាច់ព្រ័ត្រជាលើកដំបូងក្នុងប្រវត្តិសាស្ត្ររបស់ខ្លួន។ ប្រសិនបើកម្ពុជាចាញ់ថ្ងៃនេះ នោះក្តីសង្ឃឹមស្តួចស្តើងមែនទែន។ ចំណែក U19 ឡាវមានក្តីសង្ឃឹមច្រើនក្នុងឡើងទៅវគ្គបន្ទាប់ បើទោះជាចាញ់កម្ពុជាល្ងាចនេះក៏ដោយ ពីព្រោះប្រកួតក្រោយត្រូវជួបក្រុម U19 សិង្ហបុរី និង U19 ម៉ាឡេស៊ី។ យុវជនឡាវបានសម្រាកច្រើនជាងយុវជនកម្ពុជា។

ក្រុមយុវជនឡាវអាយុក្រោម១៩ឆ្នាំ

បើនិយាយពីប្រវត្តិជួបគ្នាក្នុងការប្រកួតពានរង្វាន់ AFF U19 Championship ដែលត្រូវបានដំណើរការតាំងពីឆ្នាំ២០០២មក ក្រុម U19កម្ពុជា និង U19ឡាវ ធ្លាប់ជួបគ្នា៥លើក និងមានកំណត់ត្រាល្អដូចគ្នា។ យុវជនកម្ពុជាធ្លាប់ឈ្នះយុវជនឡាវ២លើក ហើយយុវជនឡាវធ្លាប់ឈ្នះ២លើក និងស្មើ១លើក។

ទោះជាយ៉ាងណា ក្នុងពានរង្វាន់នេះ យុវជនឡាវមានប្រវត្តិល្អជាងយុវជនកម្ពុជា។ យុវជនឡាវធ្លាប់មានកំណត់ត្រាឡើងទៅកាន់វគ្គពាក់កណ្តាលផ្តាច់ព្រ័ត្រ៤លើក។ ឆ្នាំ២០០២ និងឆ្នាំ២០០៥ យុវជនឡាវឈរលើកំពូលតារាងក្នុងពូល ហើយឆ្នាំ២០១៣ និងឆ្នាំ២០១៥ ឈរនៅចំណាត់ថ្នាក់លេខ២ក្នុងពូលទៀត។

ប្រវត្តិជួបគ្នា U19 កម្ពុជា និង U19 ឡាវ

ឆ្នាំ២០១៧ ឡាវ ១-៤ កម្ពុជា
ឆ្នាំ២០១៦ កម្ពុជា ៣-០ ឡាវ
ឆ្នាំ២០១៥ កម្ពុជា ០-០ ឡាវ
ឆ្នាំ២០១៣ កម្ពុជា ១-៣ ឡាវ
ឆ្នាំ ២០០២ កម្ពុជា ១-៤ ឡាវ

តារាងពិន្ទុបណ្តោះអាសន្នពូល B

U19 ឡាវ មាន៣ពិន្ទុ (១ប្រកួត)
U19 ម៉ាឡេស៊ី មាន៣ពិន្ទុ (១ប្រកួត)
U19 កម្ពុជា មាន៣ពិន្ទុ (២ប្រកួត)
U19 ទីម័រខាងកើត មាន៣ពិន្ទុ (២ប្រកួត)
U19 សិង្ហបុរី មាន០ពិន្ទុ (២ប្រកួត)

អត្ថបទ៖ វីរបុត្រ

The post យប់នេះ U19កម្ពុជា ប៉ះ U19ឡាវ លើកទី៦ ពាន AFF U19 ដើម្បីបង្កើតកំណត់ត្រាថ្មី appeared first on Kampuchea Thmey Daily.

U-19 កម្ពុជា ចាញ់ U-19 ម៉ាឡេស៊ី ប្រកួតទី២ ពាន AFF U-19 Championship

Kang Tola — Tue, 05 Jul 2022 11:08:33 +0000

ក្រុម U-19 កម្ពុជា បានប្រកួតចាញ់ U-19 ម៉ាឡេស៊ី ក្នុងជំនួបទី២ ពូល B នៃពានរង្វាន់ជើងឯកយុវជនអាយុក្រោម ១៩ឆ្នាំអាស៊ាន (AFF U-19 Boys Championship 2022) លទ្ធផល ១-២ នារសៀលថ្ងៃទី០៥ ខែកក្កដា។

ការប្រកួតចាប់ផ្ដើមនៅវេលាម៉ោង ៣និង០០នាទីគត់ កែចេញដោយ U-19 កម្ពុជា បានព្យាយាមលេងស្រដៀងទៅនឹងការប្រកួតជាមួយ U-19 សិង្ហបុរី ជាមួយការគ្រប់គ្រងបាល់នៅប្រមាន ១០នាទីដំបូង។ ក្រោយមកទៀតម៉ាឡេស៊ី បានចាប់ផ្ដើមបង្ហាញភាពខ្លាំងរបស់ខ្លួន និងព្យាយាមរហូតអាចរកគ្រាប់បាល់បានសម្រេចដោយកីឡាករ Najmudin Akmal នៅនាទី១៣។ ក្រោយមកទៀតកម្ពុជា ក៏បានព្យាយាមរកគ្រាប់បាល់មកវិញផងដែរជាមួយឱកាសទាត់ល្អៗនៅនាទី១៤ និងនាទី២៧ ប៉ុន្តែធ្វើមិនបានសម្រេច ហើយបែរជាត្រូវបានម៉ាឡេស៊ី បន្ថែមគ្រាប់បាល់ទី២ បានសម្រេចដោយកីឡាករ Haiqal Haqeemi Hairi នៅនាទី៣០ ជាមួយការទាត់ដ៏ល្អ។ នាទីដែលសេសសល់គឺកម្ពុជា មានឱកាសទាត់ទីច្រើនប៉ុន្តែបានត្រឹមត្រូវបានសង្គ្រោះដោយអ្នកចាំទី និងមាន ១គ្រាប់ទៀតចូលទីផងដែរ តែជាបាល់ Offside ហើយក៏បានរក្សាលទ្ធផល ០-២ ដល់ចប់វគ្គទី១។

ចូលដល់វគ្គទី២ កម្ពុជា ហាក់ធ្វើបានល្អមកវិញ ដោយព្យាយាមជាមួយឱកាសមួយចំនួន រហូតដល់នាទី៥៦ កីឡាករ ចាន់ វិបុលដេវីត បានរកគ្រាប់ទី១ ឱ្យកម្ពុជាតាមពីក្រោយបានសម្រេច បង្កើនទំនុកចិត្ត។ ក្រោយមកទៀតកម្ពុជា មានឱកាសកាន់តែច្រើនទៅៗ ប៉ុន្តែនៅតែពុំអាចធ្វើបានសម្រេច រហូតដល់លទ្ធផលបញ្ចប់ចុងក្រោយ កម្ពុជា ចាញ់ ម៉ាឡេស៊ី ១-២។ ប្រកួតបន្ទាប់របស់ U-19 កម្ពុជា ត្រូវជួប U-19 ឡាវ នៅថ្ងៃទី០៧ ខែកក្កដា ខាងមុខ៕

អត្ថបទ ៖ មន្នីរ័ត្ន

The post U-19 កម្ពុជា ចាញ់ U-19 ម៉ាឡេស៊ី ប្រកួតទី២ ពាន AFF U-19 Championship appeared first on Kampuchea Thmey Daily.

U19 កម្ពុជាត្រូវការពិន្ទុពេលជួប U19 ម៉ាឡេស៊ី ម៉ោង៣ថ្ងៃនេះ

chean virakbot — Tue, 05 Jul 2022 01:20:58 +0000

ក្រុមបាល់ទាត់យុវជនជម្រើសជាតិកម្ពុជាអាយុក្រោម១៩ឆ្នាំ (U19) នឹងប្រកួតជាមួយក្រុម U19 ម៉ាឡេស៊ី វេលាម៉ោង៣រសៀល ទី៥ ខែកក្កដា នេះ នៃពានរង្វាន់ AFF U19 Boys Championship 2022 ដែលជាការប្រកួតដ៏តឹងតែង និងសំខាន់សម្រាប់ការប្រកួតសន្សំពិន្ទុក្នុងពូល B។

ការប្រកួតជាមួយ U19 ម៉ាឡេស៊ី អាចជាជំនួបដ៏លំបាកជាងគេក្នុងចំណោមដៃគូប្រកួតក្នុងពូលនេះ ដូច្នេះការរកបានពិន្ទុពីក្រុមយុវជនម៉ាឡេស៊ីគឺមិនថា១ ឬ៣ពិន្ទុទេ ពិតជាចាំបាច់បំផុតដើម្បីផ្តល់ទំនុកក្នុងការឡើងទៅវគ្គពាក់កណ្តាលផ្តាច់ព្រ័ត្រ។ ពីព្រោះ២ប្រកួតចុងក្រោយគឺជាមួយយុវជនឡាវ និងទីម័រខាងកើត ជាការប្រកួតដែលយុវជនកម្ពុជាមានសង្ឃឹមច្រើនក្នុងការទទួលបានពិន្ទុ។

ទោះជាយ៉ាងណា ការប្រកួតរសៀលម៉ោង៣ថ្ងៃនេះ នឹងពិតជាលំបាកខ្លាំងសម្រាប់ក្រុមយុវជនកម្ពុជា ដោយសារគោព្រៃជំទង់កម្ពុជាបានចាយកម្លាំងនឿយហត់ម្តងហើយកាលពីបីថ្ងៃមុន ខណៈក្រុមយុវជនម៉ាឡេស៊ីនេះជាការប្រកួតលើកដំបូង។ ដូច្នេះក្រុមយុវជនម៉ាឡេស៊ី មានប្រៀបទាំងកម្លាំងស៊ុហ្វពេញល្អ។ កីឡាករពេញជើង គ្មានរបួស ឬនឿយហត់អស់កម្លាំងឡើយ ហើយស្របពេលក្រុមយុវជនម៉ាឡេស៊ី ជាក្រុមខ្លាំង និងអាចចាត់ទុកល្អជាងគេនៅក្នុងពូល B នេះ។

សូមបញ្ជាក់ថា បន្ទាប់ពីការប្រកួតបើកឆាកពូល B ពានរង្វាន់ AFF U19 Boys Championship 2022 ក្រុមយុវជនឡាវមាន៣ពិន្ទុ ឈរលើកំពូលតារាង បន្ទាប់ពីបានឈ្នះយុវជនទីម័រខាងកើត២-០ ខណៈយុវជនកម្ពុជាមាន៣ពិន្ទុដែរ តែឈរលេខ២ ក្រោយឈ្នះយុវជនសិង្ហបុរី១-០៕

អត្ថបទ៖ វីរបុត្រ

The post U19 កម្ពុជាត្រូវការពិន្ទុពេលជួប U19 ម៉ាឡេស៊ី ម៉ោង៣ថ្ងៃនេះ appeared first on Kampuchea Thmey Daily.

គ្រូបង្វឹកសិង្ហបុរី នៅតែរីករាយទោះចាញ់កម្ពុជា ១-០ ពាន AFF U-19 Boys Championship ម្សិលមិញ

Sorn Phanith — Mon, 04 Jul 2022 04:10:21 +0000

ក្រុម U-19 សិង្ហបុរី បានប្រកួតចាញ់ U-19 កម្ពុជា ក្នុងជំនួបបើកពូលនៃពានរង្វាន់ជើងឯកយុវជនអាយុក្រោម ១៩ ឆ្នាំអាស៊ាន (AFF U-19 Boys Championship 2022) លទ្ធផល ០-១ កាលពីល្ងាចថ្ងៃទី ០៣ ខែកក្កដា ម្សិលមិញ។

កីឡាករ សុវណ្ណ ដូណា ក្លាយជាកីឡាករនាំជ័យជម្នះដល់ក្រុមបន្ទាប់ពីអាចរកគ្រាប់បាល់ ១ គ្រាប់នៅនាទី ៦ ក្រោយការបញ្ជូនបាល់ freekick ហើយក្រឡកពីដៃអ្នកចាំទីសិង្ហបុរី ចំជើងរបស់គេផ្ទាល់ទាត់បញ្ចូលទីបានសម្រេច។

បើទោះបីជារងបរាជ័យ ប៉ុន្តែគ្រូបង្វឹករបស់ U-19 សិង្ហបុរី លោក Muhammad Fadzuhasny Juraimi នៅតែសម្ដែងក្ដីរីករាយ ដោយលោកបាននិយាយថា៖ «ខ្ញុំគិតថាកូនក្រុមបានធ្វើអស់ពីសមត្ថភាពតាមកាលៈទេសៈ។ ពួកគេភាគច្រើនមិនសូវបានប្រកួតច្រើននោះទេ ហើយអ្នកអាចមើលឃើញថាពួកគេខ្វះភាពប៉ះទង្គិចក្នុងការប្រកួត និងភាពកាយសម្បទា។»

U-19 កម្ពុជា ឈរនៅលេខ ២ ក្នុងពូល B ដោយរកបាន ៣ ពិន្ទុស្មើគ្នាជាមួយ U-19 ឡាវ ប៉ុន្តែ U-19 ឡាវ មានគ្រាប់បាល់ចំណេញច្រើនជាង។ ប្រកួតបន្ទាប់របស់ U-19 កម្ពុជា ត្រូវជួប U-19 ម៉ាឡេស៊ី នៅថ្ងៃទី ០៥ ខែកក្កដា ខាងមុខ៕

អត្ថបទ៖ ណារ៉ុង

The post គ្រូបង្វឹកសិង្ហបុរី នៅតែរីករាយទោះចាញ់កម្ពុជា ១-០ ពាន AFF U-19 Boys Championship ម្សិលមិញ appeared first on Kampuchea Thmey Daily.

បន្ទាប់ពីឈ្នះសិង្ហបុរីយប់មិញ U19 កម្ពុជានឹងធ្វើការធ្ងន់ថ្ងៃស្អែក

chean virakbot — Mon, 04 Jul 2022 01:53:12 +0000

ក្រុមបាល់ទាត់យុវជនជម្រើសជាតិកម្ពុជាអាយុក្រោម១៩ឆ្នាំ (U19) នឹងធ្វើការធ្ងន់នៅថ្ងៃស្អែក ទី៥ ខែកក្កដា នៅពេលជួបក្រុមបាល់ទាត់យុវជនជម្រើសជាតិម៉ាឡេស៊ី បន្ទាប់ពីបានប្រកួតឈ្នះក្រុមយុវជនជម្រើសជាតិសិង្ហបុរីកាលពីយប់មិញ។

សម្រាប់ការប្រកួតបើកឆាកក្នុងពូល B ជើងឯកយុវជនអាស៊ីអាគ្នេយ៍ AFF U19 Boys Championship 2022 កាលពីយប់មិញ ក្រុម U19 កម្ពុជាបានយកឈ្នះក្រុម U19 សិង្ហបុរី ដោយលទ្ធផលតឹងតែងបំផុត ១-០។ គ្រាប់បាល់តែ១គត់កើតឡើងក្នុងជំនួបនេះធ្វើបានសម្រេចដោយកីឡាករកម្ពុជា សុវណ្ណ ដូណា។

យ៉ាងណា ការពិតនៅលើទីលានវាលស្មៅ Madya Senayan ពេញ៩០នាទី ក្រុមយុវជនកម្ពុជា និងសិង្ហបុរីធ្វើធ្ងន់ដូចគ្នា។ ក្រុមទាំងពីរបានព្យាយាមសម្រុកគ្នាទៅវិញទៅមកយ៉ាងខ្លាំងដែលធ្វើឲ្យតំបន់ការពារចំណាយកម្លាំងខ្លាំង ហើយពិតជាធ្វើឲ្យពួកគេនឿយហត់អស់កម្លាំងច្រើន។

ដូច្នេះការប្រកួតលើកទី២នឹងធ្វើឲ្យក្រុម U19 កម្ពុជាពិបាកខ្លាំង ដោយសារកត្តាសំខាន់២របស់ក្រុម U19 ម៉ាឡេស៊ី។ ទី១ ក្រុមយុវជនម៉ាឡេស៊ី សម្រាប់ការប្រកួតថ្ងៃអង្គារ៍ស្អែកនេះគឺជាការប្រកួតលើកដំបូងរបស់ខ្លួន ដូច្នេះក្រុមមួយនេះមានកម្លាំងស៊ុហ្វពេញល្អ។ កីឡាករពេញជើងល្អ គ្មានរបួស ឬនឿយហត់អស់កម្លាំងឡើយ។

ទី២ ក្រុមយុវជនម៉ាឡេស៊ី ជាក្រុមខ្លាំង និងអាចចាត់ទុកល្អជាងគេនៅក្នុងពូល B នេះ ហើយជាក្រុមមានភាគរយខ្ពស់ជាងគេក្នុងការឡើងទៅវគ្គពាក់កណ្តាលផ្តាច់ព្រ័ត្រ។ ច្បាស់ណាស់ថា ក្រុម U19 ម៉ាឡេស៊ី នឹងដាក់សម្ពាធខ្លាំងលើក្រុមយុវជនកម្ពុជាដែលមានកម្រិតបច្ចេកទេសទាបជាង ហើយកម្លាំងស៊ុហ្វក៏មិនសូវពេញល្អទៀត។

សូមបញ្ជាក់ថា បន្ទាប់ពីការប្រកួតបើកឆាកពូល B ពានរង្វាន់ AFF U19 Boys Championship 2022 ក្រុមយុវជនឡាវមាន៣ពិន្ទុ ឈរលើកំពូលតារាង បន្ទាប់ពីបានឈ្នះយុវជនទីម័រខាងកើត ២-០ ខណៈយុវជនកម្ពុជាមាន៣ពិន្ទុដែរ តែឈរលេខ២ ក្រោយឈ្នះយុវជនសិង្ហបុរី១-០៕

អត្ថបទ៖ វីរបុត្រ

The post បន្ទាប់ពីឈ្នះសិង្ហបុរីយប់មិញ U19 កម្ពុជានឹងធ្វើការធ្ងន់ថ្ងៃស្អែក appeared first on Kampuchea Thmey Daily.

AFF U-19 Championship Archives - Kampuchea Thmey Daily

U-19 ធ្វើមិនបានល្អមែនពិត តែគ្រូបង្វឹកថា បានមើលឃើញពីភាពរីកចម្រើនរបស់កីឡាករ

U19​ កម្ពុជា​ចប់​ភារកិច្ច​​​​ពាន​​ AFF-U19 ​ជា​មួយ​​លទ្ធផល​​​រង​ការរិះ​គន់​ខ្លាំង​

ប្រធាន​​បាល់ទាត់​​អាស៊ាន​​បញ្ជាក់​ខ្លី​​​រឿង​​គ្រាប់​បាល់​​​មិន​​ឲ្យ​​កម្ពុជា​​​យប់​​មិញ

យប់​​​នេះ​ U19កម្ពុជា​ ប៉ះ​​ U19​ឡាវ​ ​​លើក​​ទី​​៦​​​​ ពាន​ AFF​ U19 ​ដើម្បី​​បង្កើត​​កំណត់​​ត្រា​ថ្មី​

U-19 កម្ពុជា ចាញ់ U-19 ម៉ាឡេស៊ី ប្រកួត​ទី​២ ពាន AFF U-19 Championship

U19 កម្ពុជា​​ត្រូវ​​ការ​​ពិន្ទុ​​ពេល​​ជួប​ U19​ ម៉ាឡេស៊ី ​ម៉ោង​​៣​​ថ្ងៃ​​នេះ

គ្រូបង្វឹកសិង្ហបុរី នៅតែរីករាយទោះចាញ់កម្ពុជា ១-០ ពាន AFF U-19 Boys Championship ម្សិលមិញ

បន្ទាប់​​ពី​ឈ្នះ​​សិង្ហបុរី​​យប់​​មិញ​ U19​ កម្ពុជា​​នឹង​​ធ្វើ​ការ​​ធ្ងន់​​ថ្ងៃ​​ស្អែក

U19 កម្ពុជាចប់ភារកិច្ចពាន AFF-U19 ជាមួយលទ្ធផលរងការរិះគន់ខ្លាំង

ប្រធានបាល់ទាត់អាស៊ានបញ្ជាក់ខ្លីរឿងគ្រាប់បាល់មិនឲ្យកម្ពុជាយប់មិញ

យប់នេះ U19កម្ពុជា ប៉ះ U19ឡាវ លើកទី៦ ពាន AFF U19 ដើម្បីបង្កើតកំណត់ត្រាថ្មី

U-19 កម្ពុជា ចាញ់ U-19 ម៉ាឡេស៊ី ប្រកួតទី២ ពាន AFF U-19 Championship

U19 កម្ពុជាត្រូវការពិន្ទុពេលជួប U19 ម៉ាឡេស៊ី ម៉ោង៣ថ្ងៃនេះ

បន្ទាប់ពីឈ្នះសិង្ហបុរីយប់មិញ U19 កម្ពុជានឹងធ្វើការធ្ងន់ថ្ងៃស្អែក