Cambodian Super Cap Archives - Kampuchea Thmey Daily

ព្រះខ័នរាជស្វាយរៀង បរិច្ចាគប្រាក់រង្វាន់ ពានស៊ុបភើខាប់ ទាំងអស់ ដល់មូលនិធិកងទ័ព និងជនភៀសសឹក

chean virakbot — Mon, 04 Aug 2025 01:00:16 +0000

ក្លិបបាល់ទាត់ព្រះខ័នរាជស្វាយរៀង បានសម្រេចបរិច្ចាគប្រាក់រង្វាន់ទាំងអស់ដែលទទួលបានពីការឈ្នះជើងឯកពានបើករដូវកាលថ្មី គ្រុឌខេមបូឌានស៊ុបភើខាប់ ឆ្នាំ ២០២៥ ដល់មូលនិធិកងទ័ព និងជនភៀសសឹកពីជម្លោះព្រំដែនកម្ពុជា-ថៃ។

ព្រះខ័នរាជស្វាយរៀង បានឈ្នះជើងឯក គ្រុឌខេមបូឌានស៊ុបភើខាប់ ឆ្នាំ ២០២៥ បន្ទាប់ពីទទួលបានជ័យជម្នះលើក្លិប ភ្នំពេញក្រោន ដោយការទាត់កាត់សេចក្តី ១១ម៉ែត្រ ដោយលទ្ធផល ៥-៣ ក្រោយពេលក្រុមទាំងពីរស្មើគ្នា ២-២ ក្នុងរយៈពេល ៩០នាទីពេញ។

ការប្រកួតនេះមិនមានរៀបចំពិធីប្រគល់ពានរង្វាន់ និងអបអរសាទរនោះទេ ដើម្បីសម្តែងការគោរពដល់វិរកងទ័ពដែលបានពលីជីវិតដើម្បីការពារបូរណភាពទឹកដី កងទ័ពកំពុងឈរជើងនៅតំបន់ជួរមុខ និងជនភៀសសឹកដែលបានឃ្លាតឆ្ងាយលំនៅដ្ឋានដោយសារជម្លោះព្រំដែនកម្ពុជា-ថៃ ដែលបានផ្ទុះឡើងជាច្រើនថ្ងៃមកហើយ។

ជាមួយគ្នានេះ ប្រាក់លក់សំបុត្រ និងប្រាក់ដែលទទួលបានពីម្ចាស់ឧបត្ថម្ភក៏ត្រូវបានផ្តល់ទៅមូលនិធិកងទ័ព និងជនភៀសសឹកទាំងអស់ដែរ។

ការបរិច្ចាគប្រាក់រង្វាន់ទាំងអស់របស់ក្លិបព្រះខ័នរាជស្វាយរៀងពេលនេះគឺ បន្ថែមលើក្លិបដែលបានបរិច្ចាគចំនួន ២០លានរៀល ម្តងហើយ កាលពីថ្ងៃទី ២៨ ខែកក្កដា ឆ្នាំ ២០២៥៕

អត្ថបទ៖ វីរបុត្រ

The post ព្រះខ័នរាជស្វាយរៀង បរិច្ចាគប្រាក់រង្វាន់ ពានស៊ុបភើខាប់ ទាំងអស់ ដល់មូលនិធិកងទ័ព និងជនភៀសសឹក appeared first on Kampuchea Thmey Daily.

ព្រះខ័នរាជស្វាយរៀង ឬ ភ្នំពេញក្រោន ជាជើងឯកស៊ុបភើខាប់ ល្ងាចថ្ងៃអាទិត្យនេះ?

chean virakbot — Fri, 01 Aug 2025 03:20:26 +0000

ព្រះខ័នរាជស្វាយរៀង និង ភ្នំពេញក្រោន បើកឆាករដូវកាលថ្មី ដណ្តើមពានរង្វាន់ ខេមបូឌានស៊ុបភើខាប់ Krud Cambodian Super Cup វេលាម៉ោង ៦ល្ងាច ថ្ងៃអាទិត្យ ទី៣ ខែសីហា ឆ្នាំ ២០២៥ នៅពហុកីឡដ្ឋានជាតិអូឡាំពិក ផ្សាយផ្ទាល់ដោយ BTV។

ព្រះខ័នរាជស្វាយរៀងជាជើងឯកឆ្នាំ២០២៤

នេះជាការជួបគ្នាលើកទី២រវាងក្រុមទាំងពីរសម្រាប់ពានរង្វាន់បើករដូវកាលថ្មី បន្ទាប់ពីលើកទី១ កាលបើករដូវកាលមុន ព្រះខ័នរាជស្វាយរៀង បានក្លាយជាជើងឯក។ ជួបគ្នាលើកទី២ ក្នុងពានរង្វាន់ដដែល ក្រុមពីរដដែល និងនៅលើទីលានដដែល ប៉ុន្តែសមត្ថភាពស្ទើរតែខុសគ្នាទាំងស្រុង។

នេះជាការដឹកនាំក្លិប ភ្នំពេញក្រោន របស់គ្រូបង្វឹកសញ្ជាតិអ៊ុយក្រែន Oleg Starynskyi ទល់នឹងព្រះខ័នរាជស្វាយរៀង លើកដំបូងក្រោមការដឹកកាំរបស់គ្រូបង្វឹកថ្មី Mattew McConkey បន្ទាប់ពីលោក Pep Monuz បានចាកចេញទៅដឹកនាំក្លិបនៅប្រទេសចិន។ មិនត្រឹមតែប៉ុណ្ណោះកីឡាករក៏សុទ្ធថ្មីថែមទៀត។

លោក Mattew McConkey

ភ្នំពេញក្រោន បានបញ្ចេញកីឡាករបរទេស ៥ នាក់ ក្រោយចប់រដូវកាលមុន ដោយរក្សាទុកតែខ្សែការពារកូរ៉េខាងត្បូង Park Yi-young ម្នាក់គត់។ ខ្សែបម្រើសញ្ជាតិខ្មែរ យូឌៃ អូកាវ៉ា, Takashi Ose និង សឿត បារាំង ព្រមទាំងខ្សែប្រយុទ្ធ លឹម ពិសុទ្ធ និងខ្សែប្រយុទ្ធដើមកំណើតកូឡុំប៊ីសញ្ជាតិខ្មែរ Andres Neito ក៏បានចាកចេញថែមទៀត។

ប៉ុន្តែ ភ្នំពេញក្រោន បាននាំចូលខ្សែការពារបរទេស២នាក់គឺកីឡាករ Rick Ketting សញ្ជាតិហូឡង់ និង Raul Feher សញ្ជាតិរ៉ួម៉ានី ពង្រឹងតំបន់ការពារជាមួយ Park Yi-yong ខណៈខ្សែប្រយុទ្ធបរទេស៣នាក់គឺ Maksym Pryadum សញ្ជាតិអ៊ុយក្រែន, Mose Dyer សញ្ជាតិនូវែលហ្សេឡង់ និង Makerlo Tellez សញ្ជាតិប៉ូឡាវី។

លោក Oleg Starynskyi

និយាយពី ព្រះខ័នរាជស្វាយរៀង រឹតតែគួរឲ្យចាប់អារម្មណ៍ក្នុងរដូវកាលនេះ។ ពួកគេចែកផ្លូវជាមួយកីឡាករប្រេស៊ីល៣នាក់ និងឲ្យ ទីហ្វី អាមេរី ខ្ចីជើងកីឡាករ មីហ្ស៊ូណូ ហ៊ីការ៉ុ ប៉ុន្តែរក្សាទុកខ្សែបម្រើប្រយុទ្ធប្រេស៊ីល Cristian Roque, កីឡាករសញ្ជាតិឡាវ Bouphachan Bounkong, កីឡាករជប៉ុន Ryo Fujii និង Takashi Odawara។ ពួកគេបាននាំចូលខ្សែប្រយុទ្ធប្រេស៊ីល Patrick Souza និង Kwame Peprah សញ្ជាតិហ្គាណា ដែលគ្រប់កូតាកីឡាករបររទេស ៦ នាក់ ប៉ុន្តែបន្ថែមខ្សែការពារបរទេស Faris Hammouti សម្រាប់ពានអន្តរជាតិ។

អ្វីដែលភ្ញាក់ផ្អើលបំផុតនោះគឺ ព្រះខ័នរាជស្វាយរៀង នាំចូលខ្សែប្រយុទ្ធកម្ពុជាឆ្នើម សៀង ចន្ធា និងខ្សែបម្រើកណ្តាល Yudai Ogawa ព្រមទាំងខ្សែបម្រើ សុផល ឌីម៉ង់ និងខ្សែការពារ សឿត បារាំង។

គ្រាន់តែរៀបរាប់ពីការត្រៀមខ្លួនទាំងនេះឃើញថា ពិតជាធ្វើឲ្យអ្នកគាំទ្រចាប់អារម្មណ៍ខ្លាំងបំផុត ប៉ុន្តែអ្នកគាំទ្រមិនទាន់ធ្លាប់បានឃើញសមត្ថភាពពិតប្រាកដរបស់ក្រុមទាំងពីរនៅលើទីលានឡើយ។ អ្វីៗគ្រប់យ៉ាងបង្ហាញនៅល្ងាចថ្ងៃអាទិត្យនេះហើយ។

ប្រធានក្រុមទាំងពីរ

ក្រុមទាំងពីរធ្លាប់ជួបគ្នា ២៣ លើក ក្នុងនោះ ព្រះខ័នរាជស្វាយរៀង ឈ្នះ ១០លើក ខណៈភ្នំពេញក្រោន ឈ្នះ ៧ លើក និងស្មើគ្នា ៦លើក៕

ជួបគ្នា ៥ លើកចុងក្រោយ

ព្រះខ័នរាជស្វាយរៀង ១-២ ភ្នំពេញក្រោន (Hun Sen Cup Final)
ព្រះខ័នរាជស្វាយរៀង ០-៥ ភ្នំពេញក្រោន (Cambodian Premier League)
ព្រះខ័នរាជស្វាយរៀង ២-០ ភ្នំពេញក្រោន (Cambodian Premier League)
ព្រះខ័នរាជស្វាយរៀង ៣-១ ភ្នំពេញក្រោន (Cambodian Premier League)
ព្រះខ័នរាជស្វាយរៀង ៣-៤ ភ្នំពេញក្រោន (Cambodian Premier League)

អត្ថបទ៖ វីរបុត្រ

The post ព្រះខ័នរាជស្វាយរៀង ឬ ភ្នំពេញក្រោន ជាជើងឯកស៊ុបភើខាប់ ល្ងាចថ្ងៃអាទិត្យនេះ? appeared first on Kampuchea Thmey Daily.

ព្រះខ័នរាជស្វាយរៀង ប៉ះ ភ្នំពេញក្រោន ដណ្តើមពានបើករដូវកាលថ្មី ថ្ងៃទី៣ ខែសីហា

chean virakbot — Wed, 28 May 2025 07:38:13 +0000

ការប្រកួតលីគកម្ពុជា រដូវកាល២០២៥-២៦ នឹងចាប់ផ្តើមនៅថ្ងៃសៅរ៍ ទី៩ ខែសីហា ឆ្នាំ២០២៥ បន្ទាប់រដូវកាល ២០២៤-២៥ បានបញ្ចប់ទៅដោយម្ចាស់ជើងឯកបានធ្លាក់ទៅក្លិបព្រះខ័នរាជស្វាយរៀង។

ព្រះខ័នរាជស្វាយរៀង ឈ្នះពានលីគ២០២៤-២៥

មុនពេលលីគរដូវកាលថ្មីចាប់ផ្តើមប្រកួត ក៏មានការប្រកួតដណ្តើមពានរង្វាន់បើករដូវកាលថ្មីគឺ ខេមបូឌានស៊ុបភើខាប់ ឆ្នាំ២០២៥ ដែលជាការប៉ះគ្នារវាងម្ចាស់ជើងឯកលីគ ព្រះខ័នរាជស្វាយរៀង និងម្ចាស់ជើងឯកពានសម្តេចតេជោ ហ៊ុន សែន ភ្នំពេញក្រោន នៅថ្ងៃអាទិត្យ ទី៣ ខែសីហា ឆ្នាំ២០២៥។

ភ្នំពេញក្រោន ឈ្នះពានសម្តេចតេជោ២០២៤-២៥

ព្រះខ័នរាជស្វាយរៀង ជាម្ចាស់ជើងឯកខេមបូឌានស៊ុបភើខាប់ កាលពីឆ្នាំ២០២៤ បន្ទាប់ពីបានយកឈ្នះ ភ្នំពេញក្រោន ដោយលទ្ធផល ២-១ នៅពហុកីឡដ្ឋានជាតិអូឡាំពិក។ ដូច្នេះបើករដូវកាលថ្មី ក្រុមទាំងពីរជួបគ្នាម្តងទៀត។

ក្នុងដំណាក់កាលនេះ ក្លិបទាំងពីរកំពុងរៀបចំក្រុម។ ជាក់ស្តែង ព្រះខ័នរាជស្វាយរៀងបានប្រកាសនាំចូលសមាជិកថ្មីជាបន្តបន្ទាប់ ហើយនឹងប្រកាសតែងតាំងគ្រូបង្វឹកថ្មីនៅថ្ងៃទី៣ ខែមិថុនា ឆ្នាំ២០២៥។ ចំណែក ភ្នំពេញក្រោន កំពុងធ្វើឲ្យមានការភ្ញាក់ផ្អើលតាមរយៈការបញ្ចេញកីឡាករបរទេសលំដាប់ជួរមុខស្ទើរទាំងអស់។

ព្រះខ័នរាជស្វាយរៀង ឈ្នះពានខេមបូឌានស៊ុបភើខាប់២០២៤

ចំណែក លីគកម្ពុជារដូវកាលថ្មីវិញនៅមិនទាន់ត្រូវបានប្រកាសជាសាធារណៈអំពីចំនួនក្លិប និងគោលការណ៍នៃការប្រកួតថ្មីឡើយ៕

អត្ថបទ៖ វីរបុត្រ

The post ព្រះខ័នរាជស្វាយរៀង ប៉ះ ភ្នំពេញក្រោន ដណ្តើមពានបើករដូវកាលថ្មី ថ្ងៃទី៣ ខែសីហា appeared first on Kampuchea Thmey Daily.

អបអរសាទរ! ព្រះខ័នរាជស្វាយរៀង ឈ្នះជើងឯក ខេមបូឌានស៊ូបភើខាប់២០២៤

chean virakbot — Sun, 04 Aug 2024 13:22:10 +0000

ព្រះខ័នរាជស្វាយរៀង បានក្លាយជាម្ចាស់ជើងឯក ខេមបូឌានស៊ូបភើខាប់ ឆ្នាំ២០២៤ បន្ទាប់ពីបានយកឈ្នះលើ ភ្នំពេញក្រោន ដោយលទ្ធផល ២-១ បើទោះជាព្រះខ័នរាជស្វាយរៀងសល់សមាជិកតែ១០នាក់នៅលើទីលាន។ សោកស្តាយ ភ្នំពេញក្រោន មានសមាជិក១១នាក់ ប៉ុន្តែមិនអាចការពារតំណែងជើងឯកឆ្នាំចាស់។

ការប្រកួតបាន២៦នាទីក្នុងវគ្គទី១ ព្រះខ័នរាជស្វាយរៀង បានបើកការនាំមុខ ១-០ ដោយខ្សែប្រយុទ្ធសញ្ជាតិប្រេស៊ីល Paplo Augusto ប៉ុន្តែវគ្គទី២ ភ្នំពេញក្រោន បានតាមស្មើ ១-១ ដោយខ្សែបម្រើ Yudai Ogawa។ ស្របពេលជាមួយគ្នានេះ ខ្សែបម្រើប្រយុទ្ធ Gabriel របស់ព្រះខ័នរាជស្វាយរៀង ត្រូវបានពិន័យកាតក្រហមបណ្តេញចេញពីទីលានតែម្តង បន្ទាប់ពីបង្កកំហុសលើខ្សែប្រយុទ្ធរបស់ភ្នំពេញក្រោន។

ទោះបីជាយ៉ាងណា ព្រះខ័នរាជស្វាយរៀង រកបានគ្រាប់បាល់ជ័យជម្នះដោយខ្សែបម្រើវ័យក្មេង មិន រតនៈ នៅទី៩០+ដើម្បីក្លាយជាម្ចាស់ជើងឯកខេមបូឌានស៊ូបភើខាប់ ឆ្នាំ២០២៤ មុនពេលរដូវកាលថ្មីចាប់ផ្តើមនៅសប្តាហ៍ក្រោយ។

-ពានរង្វាន់កីឡាករល្អ សឿយ វិសាល ជាប្រធានក្រុមរបស់ព្រះខ័នរាជស្វាយរៀង
-ពានរង្វាន់អ្នកចាំទីល្អ វីរៈ ដារ៉ា របស់ព្រះខ័នរាជស្វាយរៀង
-ព្រះខ័នរាជស្វាយរៀង ទទួលបានប្រាក់រង្វាន់២៨លានរៀល

អត្ថបទ៖ វីរបុត្រ

The post អបអរសាទរ! ព្រះខ័នរាជស្វាយរៀង ឈ្នះជើងឯក ខេមបូឌានស៊ូបភើខាប់២០២៤ appeared first on Kampuchea Thmey Daily.

សំបុត្រទស្សនា ព្រះខ័នរាជស្វាយរៀង ប៉ះ ភ្នំពេញក្រោន បញ្ចុះតម្លៃ៥០%

chean virakbot — Thu, 01 Aug 2024 07:44:20 +0000

សំបុត្រចូលទស្សនាការប្រកួតរវាងក្លិបព្រះខ័នរាជស្វាយរៀង និង ភ្នំពេញក្រោន ត្រូវបានបញ្ចុះតម្លៃ៥០%ដើម្បីឲ្យអ្នកគាំទ្រកាន់តែច្រើនចូលរួមទស្សនាផ្ទាល់នៅថ្ងៃអាទិត្យ ទី៤ ខែសីហា ឆ្នាំ២០២៤។

ការប្រកួតពានរង្វាន់បើករដូវកាល ខេមពូឌានស៊ូភើខាប់ ឆ្នាំ២០២៤ នឹងធ្វើនាល្ងាចថ្ងៃអាទិត្យ ទី៤ ខែសីហា នៅពហុកីឡដ្ឋានជាតិអូឡាំពិក។ សំបុត្រត្រូវបានប្រកាសដាក់លក់មាន២ប្រភេទគឺ ប្រភេទទី១ តម្លៃ២ម៉ឺនរៀល និងប្រភេទទី២ តម្លៃ១ម៉ឺនរៀល។

យ៉ាងណា នៅរសៀល ថ្ងៃព្រហស្បតិ៍ ទី១ ខែសីហានេះ គណៈកម្មការរៀបចំការប្រកួតបានប្រកាសបញ្ចុះតម្លៃ៥០% ដូច្នេះសំបុត្រប្រភេទ A នៅសល់ត្រឹមតែ១ម៉ឺនរៀល និងសំបុត្រប្រភេទB នៅសល់ត្រឹមតែ៥ពាន់រៀល។

សំបុត្រប្រភេទ A តម្លៃ ១០ ០០០រៀល
សំបុត្រប្រភេទ B តម្លៃ ៥ ០០០រៀល

សូមបញ្ជាក់ថា ការបញ្ចុះតម្លៃពិសេសនេះមានចំនួនកំណត់ដោយចាប់ពីថ្ងៃទី១ ខែសីហា នេះ ដល់ វេលាម៉ោង៥ល្ងាច ថ្ងៃទី២ ខែសីហា ឆ្នាំ២០២៤។ បន្ទាប់មក សំបុត្រនឹងលក់ក្នុងតម្លៃធម្មតាវិញ។ ទីតាំងលក់សំបុត្រនៅពហុកីឡដ្ឋានជាតិអូឡាំពិក៕

អត្ថបទ៖ វីរបុត្រ

The post សំបុត្រទស្សនា ព្រះខ័នរាជស្វាយរៀង ប៉ះ ភ្នំពេញក្រោន បញ្ចុះតម្លៃ៥០% appeared first on Kampuchea Thmey Daily.

ភ្នំពេញក្រោន ការពារជើងឯក ខេមបូឌានស៊ូបភើខាប់ ទល់នឹងព្រះខ័នរាជស្វាយរៀង

chean virakbot — Mon, 29 Jul 2024 05:02:05 +0000

ម្ចាស់ការពារតំណែងជើងឯកឆ្នាំចាស់ ភ្នំពេញក្រោន ត្រូវប្រឈមនឹង ម្ចាស់ជើងឯកលីគកំពូលកម្ពុជា ព្រះខ័នរាជស្វាយរៀង សម្រាប់ពានរង្វាន់បើករដូវកាល គ្រុឌខេមបូឌានស៊ូបភើខាប់ នៅថ្ងៃអាទិត្យ ទី៤ ខែកក្កដា ឆ្នាំ២០២៤ នៅពហុកីឡដ្ឋានជាតិអូឡាំពិក។

ពានរង្វាន់ ខេមបូឌានស៊ូបភើខាប់ ត្រូវប៉ះគ្នារវាងក្រុមជើងឯកលីគកំពូលកម្ពុជា និងជើងឯកពានរង្វាន់សម្តេចតេជោ ហ៊ុន សែន ប៉ុន្តែកាលពីរដូវកាល២០២៣-២៤ ព្រះខ័នរាជស្វាយរៀង បានឈ្នះជើងឯកទាំងពីរ ខណៈភ្នំពេញក្រោនជាជើងឯករងទាំងពីរ ដូច្នេះតម្រូវឲ្យម្ចាស់ជើងឯកប៉ះជើងឯករង។

ភ្នំពេញក្រោន ជាម្ចាស់ពានរង្វាន់បើករដូវកាល២លើកជាប់គ្នាគឺឆ្នាំ២០២២ និង២០២៣ ខណៈព្រះខ័នរាជស្វាយរៀងមិនធ្លាប់ឈ្នះពានរង្វាន់បើករដូវកាលទេ គិតចាប់តាំងពីរៀបចំឲ្យមានប្រកួតលើកដំបូងនៅឆ្នាំ២០១៧ ក្នុងនោះ បឹងកេតធ្លាប់ឈ្នះនៅឆ្នាំ២០១៧ ប៉ុន្តែនៅឆ្នាំ២០១៨ ២០១៩ ២០២០ និង២០២១ មិនបានរៀបចំទេ។

ការជួបជួបគ្នានៅថ្ងៃទី៤ ខែកក្កដានេះគឺជាការពារតំណែងជើងឯកឆ្នាំចាស់របស់ភ្នំពេញក្រោនទល់នឹងក្រុមខ្លាំងកំពុងមានកីឡាករពេញជើងព្រះខ័នរាជស្វាយរៀង។

សម្រាប់ការប្រកួតនេះមានការផ្តល់ជូនជាពិសេសដល់អ្នកគាំទ្រគឺទិញសំបុត្រ២ថែម១ និងទិញសំបត្រ៥ថែម២។ សំបុត្រមាន២ប្រភេទគឺប្រភេទទី១តម្លៃ២ម៉ឺនរៀល និងប្រភេទទី២តម្លៃ១ម៉ឺនរៀល។

ព្រះខ័នរាជស្វាយរៀងពិតជារវល់ខ្លាំងមែនទែនក្នុងរដូវកាលនេះ។ ពួកគេទើបតែបញ្ចប់វគ្គជម្រុះពានរង្វាន់ ASEAN Club Championship កាលពីពេលថ្មីៗនេះ និងបានឡើងទៅកាន់វគ្គចែកពូល។ នៅក្នុងខែសីហានេះ ពួកគេត្រូវប្រកួតពានរង្វាន់បើករដូវកាល ប្រកួតលីគកំពូលកម្ពុជា និងពានរង្វាន់ ASEAN Club Championship វគ្គសន្សំពិន្ទុក្នុងពូល ក៏ចាប់ផ្តើមប្រកួតក្នុងខែសីហាដែរ៕

អត្ថបទ៖ វីរបុត្រ

The post ភ្នំពេញក្រោន ការពារជើងឯក ខេមបូឌានស៊ូបភើខាប់ ទល់នឹងព្រះខ័នរាជស្វាយរៀង appeared first on Kampuchea Thmey Daily.

ភ្នំពេញក្រោនក្រសោបយកពានទាំងអស់ចាប់តាំងពីក្រុមហ៊ុន CLP បង្កើតឡើង

chean virakbot — Mon, 31 Jul 2023 01:19:39 +0000

ក្លិបបាល់ទាត់ភ្នំពេញក្រោនបានប្រមូលយកពានរង្វាន់ផ្លូវការទាំងអស់ចាប់តាំងពីក្រុមហ៊ុន Cambodian Premier League (CPL) ត្រូវបានបង្កើតឡើងដើម្បីពានរង្វាន់ឲ្យកាន់តែមានលក្ខណៈស្តងដា និងអាជីពនៅក្នុងប្រទេសកម្ពុជា។

ចាប់តាំងពីក្រុមហ៊ុន CPL ត្រូវបានបង្កើតឡើងក្នុងរយៈពេល២ឆ្នាំចុងក្រោយនេះមានពានរង្វាន់ផ្លូវការចំនួន៦គឺភ្នំពេញក្រោនបានឈ្នះខេមបូឌានព្រីមៀរលីគ២រដូវកាលជាប់គ្នា ឈ្នះជើងឯកខេមបូឌានលីគខាប់២រដូវកាលជាប់គ្នា និងឈ្នះជើងឯកខេមបូឌានស៊ុបភើបខាប់២ដូវកាលជាប់គ្នា។

ភ្នំពេញក្រោនបានឈ្នះវិសាខាដោយលទ្ធផល ២-១ ដើម្បីឈ្នះជើងឯកខេមបូឌានលីគខាប់ លើកទី១ ឆ្នាំ២០២២ និងបានឈ្នះណាហ្គាវើលដ៏ដោយប៉េណាល់ទីកាត់សេចក្តីដើម្បីឈ្នះ ខេមបូឌានលីគខាប់ លើកទី២ ឆ្នាំ២០២៣។

ជាមួយគ្នានេះ ក្រុមជើងឯកលីគកំពូលកម្ពុជាពីររដូវកាលចុងក្រោយបានយកឈ្នះវិសាខាដោយលទ្ធផល ២-១ ដើម្បីទទួលបានជើងឯកខេមបូឌានស៊ុបភើខាប់ លើកទី១ ឆ្នាំ២០២២ និងឈ្នះជើងឯកខេមបូឌានស៊ុបភើខាប់ លើកទី២ ឆ្នាំ២០២៣ តាមរយៈជ័យជម្នះលើវិសាខា ២-១ ទៀត។

តាមរយៈសមិទ្ធផលទាំងនេះ ភ្នំពេញក្រោនកំពុងក្លាយជាក្លិបដែលទទួលបានជោគជ័យខ្លាំងបំផុតក្នុងរយៈពេល២ឆ្នាំចុងក្រោយ។

ពានរង្វាន់ទាំង៦របស់ភ្នំពេញក្រោន

ជើងឯកខេមបូឌានព្រីមៀរលីគ ២០២១
ជើងឯកខេមបូឌានព្រីមៀរលីគ ២០២២
ជើងឯកខេមបូឌានលីគខាប់ ២០២២
ជើងឯកខេមបូឌានលីគខាប់ ២០២៣
ជើងឯកខេមបូឌានស៊ុបភើខាប់ ២០២២
ជើងឯកខេមបូឌានស៊ុបភើខាប់ ២០២៣

អត្ថបទ៖ វីរបុត្រ

The post ភ្នំពេញក្រោនក្រសោបយកពានទាំងអស់ចាប់តាំងពីក្រុមហ៊ុន CLP បង្កើតឡើង appeared first on Kampuchea Thmey Daily.

ភ្នំពេញក្រោនឈ្នះពានស៊ុបភើខាប់លើកទី២ បន្ទាប់ពីឈ្នះវិសាខា ២-១

chean virakbot — Sun, 30 Jul 2023 13:48:03 +0000

ក្លិបបាល់ទាត់ភ្នំពេញក្រោនបានបង្កើតកំណត់ត្រាឈ្នះជើងឯកខេមបូឌានស៊ុបភើខាប់ពីរលើកជាប់គ្នា បន្ទាប់ពីទទួលបានជ័យជម្នះលើក្រុមវិសាខា ដោយលទ្ធផល ២-១ នៅពហុកីឡដ្ឋានជាតិអូឡាំពិក។

ការប្រកួតនៅវគ្គទី១ឃើញថា វិសាខា ហាក់មានទម្រង់ដាក់សម្ពាធច្រើនលើភ្នំពេញក្រោន ប៉ុន្តែគ្មានគ្រាប់បាល់កើតឡើងទេ។ នៅវគ្គទី២ វិសាខានៅបន្តព្យាយាមដាក់សម្ពាធរហូតអាចបំប៉ោងសំណាញ់ទីរបស់ភ្នំពេញក្រោនបានសម្រេចដោយខ្សែប្រយុទ្ធសញ្ជាតិជប៉ុនTakumu Nishihara។

បន្ទាប់ពីត្រូវបានដៃគូនាំមុខ ភ្នំពេញក្រោន ចាប់ផ្តើមវាយសម្រុកវិញរហូតទទួលបានបាល់ពិន័យ១១ម៉ែត្រ នៅនាទី៨២ បន្ទាប់ពីខ្សែការពាររបស់វិសាខា ស៊ិន សុផាណាត លើកដៃប៉ះបាល់។ ខ្សែបម្រើកណ្តាលសញ្ជាតិជប៉ុន Yudai Ogawa ស៊ុតបានសម្រេចដើម្បីតាមស្មើ ១-១ ហើយភ្នំពេញក្រោនបានបន្តដាក់សម្ពាធថែមទៀត។ ចប់៩០នាទី ក្រុមទាំងពីរបានត្រឹមស្មើគ្នា ១-១។

ការប្រកួតបន្ថែមម៉ោង១៥នាទី២ដង។ រយៈពេល១៥នាទីដំបូងគ្មានគ្រាប់បាល់កើតឡើងទេ ប៉ុន្តែ១៥នាទីវគ្គទី២ មានគ្រាប់បាល់កើតឡើងសម្រាប់ភ្នំពេញក្រោន។ នៅនាទីទី១១០ ខ្សែបម្រើ ឡុង ភារ៉ាត់ ស៊ុតបាលហ្វ្រីឃីតបានធ្វើឲ្យខ្សែបម្រើរបស់វិសាខា ស៊ិន សុវណ្ណមករា ធ្វើឲ្យបាល់ចូលទីខ្លួនឯង ដែលផ្តល់ជ័យជម្នះដល់ភ្នំពេញក្រោន ២-១។

នេះជាការការពារជើងឯកបានសម្រេចរបស់ភ្នំពេញក្រោន និងជាការឈ្នះជើងឯកខេមបូឌានស៊ុបភើខាប់លើកទី២ជាប់គ្នា។ រយៈពេល២រដូវកាលចុងក្រោយនេះ ភ្នំពេញក្រោន ឈ្នះពានរង្វាន់សំខាន់៦គ្រឿងគឺ ខេមបូឌានព្រីមៀរលីគ២រដូវកាលជាប់គ្នា ខេមបូឌានលីគខាប់២រដូវកាលជាប់គ្នា និងខេមបូឌានស៊ុបភើខាប់២រដូវកាលជាប់គ្នា៕

អត្ថបទ៖ វីរបុត្រ

The post ភ្នំពេញក្រោនឈ្នះពានស៊ុបភើខាប់លើកទី២ បន្ទាប់ពីឈ្នះវិសាខា ២-១ appeared first on Kampuchea Thmey Daily.

Cambodian Super Cap Archives - Kampuchea Thmey Daily

ព្រះ​ខ័នរាជ​ស្វាយរៀង ឬ ភ្នំពេញ​ក្រោន ជា​ជើង​ឯកស៊ុបភើ​ខាប់ ល្ងាច​​ថ្ងៃ​អាទិត្យ​នេះ?

ព្រះ​ខ័ន​រាជ​ស្វាយរៀង ប៉ះ ភ្នំពេញ​ក្រោន ដណ្តើម​ពាន​បើក​រដូវ​កាល​ថ្មី ​ថ្ងៃ​ទី​៣ ខែ​សីហា

អបអរសាទរ!​ ព្រះ​ខ័ន​រាជ​ស្វាយរៀង ឈ្នះជើង​ឯក ខេមបូឌានស៊ូបភើ​ខាប់២០២៤

សំបុត្រ​ទស្សនា ព្រះខ័នរាជស្វាយរៀង ប៉ះ ភ្នំពេញក្រោន បញ្ចុះតម្លៃ៥០%

ភ្នំពេញ​ក្រោន ការពារ​ជើងឯក ខេមបូឌានស៊ូបភើខាប់ ទល់​នឹងព្រះខ័ន​រាជ​ស្វាយរៀង

ភ្នំពេញក្រោនក្រសោបយក​ពាន​ទាំង​អស់​ចាប់​តាំងពីក្រុម​ហ៊ុន CLP បង្កើត​ឡើង

ភ្នំពេញក្រោនឈ្នះ​ពាន​ស៊ុបភើខាប់លើកទី២ បន្ទាប់ពីឈ្នះវិសាខា ២-១

ព្រះខ័នរាជស្វាយរៀង ឬ ភ្នំពេញក្រោន ជាជើងឯកស៊ុបភើខាប់ ល្ងាចថ្ងៃអាទិត្យនេះ?

ព្រះខ័នរាជស្វាយរៀង ប៉ះ ភ្នំពេញក្រោន ដណ្តើមពានបើករដូវកាលថ្មី ថ្ងៃទី៣ ខែសីហា

អបអរសាទរ! ព្រះខ័នរាជស្វាយរៀង ឈ្នះជើងឯក ខេមបូឌានស៊ូបភើខាប់២០២៤

សំបុត្រទស្សនា ព្រះខ័នរាជស្វាយរៀង ប៉ះ ភ្នំពេញក្រោន បញ្ចុះតម្លៃ៥០%

ភ្នំពេញក្រោន ការពារជើងឯក ខេមបូឌានស៊ូបភើខាប់ ទល់នឹងព្រះខ័នរាជស្វាយរៀង

ភ្នំពេញក្រោនក្រសោបយកពានទាំងអស់ចាប់តាំងពីក្រុមហ៊ុន CLP បង្កើតឡើង

ភ្នំពេញក្រោនឈ្នះពានស៊ុបភើខាប់លើកទី២ បន្ទាប់ពីឈ្នះវិសាខា ២-១