DEPRESSION Archives - Kampuchea Thmey Daily

ណុប បាយ៉ារិទ្ធ ចែករំលែកបទពិសោធន៍រឹងមាំមួយចំនួន ទៅដល់អ្នកបាក់ទឹកចិត្ត (Depression)

អ៊ិន ពិសី — Thu, 06 Jul 2023 03:55:59 +0000

បញ្ហាជំងឺបាក់ទឹកចិត្តមិនមែនជារឿងលេងសើចទេ ហើយរឹតតែមិនអាចធ្វេសប្រហែស ខណៈបច្ចុប្បន្នគេសង្កេតឃើញមានមនុស្សច្រើននាក់ ពិសេសយុវវ័យតែម្ដង បានសម្រេចជ្រើសរើសវិធីដើម្បីបញ្ចប់ជីវិតខ្លួនឯង ព្រោះតែមិនអាចដោះស្រាយបញ្ហា ឬស្វែងរកអ្នកណាមកជួយពួកគេបាន។

យ៉ាងណាកត់សម្គាល់មួយរយៈចុងក្រោយនេះ បញ្ហា នៃការបញ្ចប់ជីវិតព្រោះជំងឺបាក់ទឹកចិត្តនេះ បានកើតឡើងជាបន្តបន្ទាប់។ ជាក់ស្ដែងថ្មីៗនេះ មានករណីយុវជនខ្មែរម្នាក់ បានសម្រេចបញ្ចប់ជីវិតទាំងវ័យក្មេង ដោយសារជំងឺបាក់ទឹកចិត្ត (Depression)។

ដោយឡែកនៅយប់ថ្ងៃទី ០៥ ខែកក្កដា នេះ ក៏មានព័ត៌មានក្រៅប្រទេសភ្ញាក់ផ្អើលផងដែរ ខណៈតារាចម្រៀងស្រីល្បីឈ្មោះរបស់ហុងកុង អ្នកនាង CoCo Lee ក៏បានធ្វើអត្តឃាតបញ្ចប់ជីវិតខ្លួនឯង ព្រោះជំងឺបាក់ទឹកចិត្ត (Depression)។

តារាចម្រៀងល្បីឈ្មោះលោក ណុប បាយ៉ារិទ្ធ ដោយសារតែឃើញហេតុផលដ៏ផុយស្រួយនេះ ក៏បានចេញមកចែករំលែកបទពិសោធន៍ដ៏រឹងមាំមួយចំនួនទៅកាន់អ្នកជួបបញ្ហាជំងឺបាក់ទឹកចិត្ត (Depression) ក៏ដូចជាមហាជនទូទៅ។ លោក ណុប បាយ៉ារិទ្ធ បានរៀបរាប់ដោយខ្លឹមសារថា «ម៉ោង ២ ៤៥ នាទីរំលងអធ្រាត្រ មើល Facebook ឃើញអ្នកចាកចេញដោយជំងឺបាក់ទឹកចិត្ត គេងមិនលក់ចង់ចែករំលែកខ្លះដល់បងប្អូន»។

លោក ណុប បាយ៉ារិទ្ធ អះអាងទៀតថា «ខ្ញុំក៏ធ្លាប់បាក់ទឹកចិត្ត ខ្ញុំក៏ធ្លាប់អស់សង្ឃឹម តែខ្ញុំតែងតែប្រាប់ខ្លួនឯងថា «រឹងមាំ» សូមកុំផ្ដល់អំណាចឲ្យអតីតកាលមកកំណត់អនាគតរបស់អ្នក សូមកុំឲ្យខ្លួនឯងរស់ក្នុងជីវិតជាជនរងគ្រោះ។ អ្នកដឹងទេ? ការយំមិនមែនមានន័យថា អ្នកខ្សោយ ឬ ទន់ជ្រាយនោះទេ។ ការយំជាសំឡេងដំបូងបង្អស់ដែលមនុស្សគ្រប់គ្នាមានតាំងពីកំណើតមក ព្រោះវាជាសញ្ញាបញ្ជាក់ថា អ្នកនៅមានជីវិត»។

លោកបន្តថា «តើមនុស្សណាមួយដែលកើតមកពីពោះម្ដាយមកភ្លាមដោយមិនចេះយំ? ដូច្នេះបើពេលខ្លះអ្នកចង់យំ យំហើយធូរចិត្តក៏យំចុះ ឲ្យទឹកភ្នែកហូរមកលុបលាងរឿងមិនសប្បាយចិត្តទាំងឡាយ តែក៏មិនបាច់យំយូរពេកដែរ។ ពេលបានធូរហើយឈប់យំទៀត ហើយត្រូវតែរស់បន្ត។ ជំហានដ៏ខ្លីៗ មួយៗ របស់ទារកជារៀងរាល់ថ្ងៃ គឺជាចំណុចផ្ដើម ហើយវានឹងក្លាយជាជំហានដ៏វែងឆ្ងាយនៅថ្ងៃអនាគត ដូច្នេះសូមបន្តបោះជំហាន ហើយកុំបោះបង់។ អ្នកនៅតែមានតម្លៃ បើទោះជាអ្នកបរាជ័យ តែអ្នកនៅតែមានឱកាសម្ដងហើយម្ដងទៀត ចូរកុំព្យាយាមបិទឱកាសខ្លួនឯង ហើយរើសយកការចុះចាញ់។ ដង្ហើម នៃភាពអស់សង្ឃឹម គឺជាលេសបំបាក់ទឹកចិត្តខ្លួនឯងប៉ុណ្ណោះ សូមជំនួសមកវិញដោយការតាំងចិត្ត ព្រោះអ្នកពិតជាមិនអន់ ហើយមិនអន់ដល់ថ្នាក់ចាប់ផ្ដើមជាថ្មី ឬបន្តមិនបាននោះឡើយ»។

លោក ណុប បាយ៉ារិទ្ធ និយាយទៀតថា បើទោះជាយប់ងងឹត ក៏មិនងងឹតរហូត ២៤ ម៉ោងដែរ ដរាបណាមេឃនៅមានពន្លឺ អ្នកនៅតែមានសង្ឃឹម។ ព្យាយាមរើសយកគំនិតវិជ្ជមានជានិច្ចសម្រាប់ជីវិត មិនថាមានរឿងលំបាកយ៉ាងណាទេ ថ្ងៃស្អែកគឺជាឱកាសថ្មីសម្រាប់អ្នកក្នុងការដកពិសោធន៍ និងធ្វើអ្វីៗ ឲ្យកាន់តែប្រសើរឡើង ហើយបើទោះវាជាពេលវេលាក្នុងការចាប់ផ្ដើមជាថ្មីម្ដងទៀតក៏ដោយ ប្រសិនបើអ្នកក្រឡេកមើលទៅ កូនរុក្ខជាតិមួយដើមដែលប្រឹងដុះលូតលាស់តាមចន្លោះថ្មដ៏ក្រៀមក្រោះក្ដៅហួតហែង តែវានៅតែព្យាយាម វាព្យាយាមលូត ព្យាយាមរស់ នោះអ្នកនឹងដឹងថា ជីវិតយើងក៏គួរតែតស៊ូឲ្យដល់ទីបំផុតដូចគ្នា។ កុំស្អប់ខ្លួនឯងចំពោះអ្វីគ្រប់យ៉ាងដែលអ្នកមិនមានដូចគេ មិនបានធ្វើ ឬធ្វើមិនបានដូចគេ ផ្ទុយទៅវិញចូរស្រឡាញ់ខ្លួនឯងឲ្យបានច្រើន និងរីករាយ សប្បាយចិត្តនូវអ្វីគ្រប់យ៉ាងដែលអ្នកមាន ព្រោះអ្វីដែលអ្នកមាន ក៏មិនប្រាកដថា គេគ្រប់គ្នាមានឡើយ។

លោក ណុប បាយ៉ារិទ្ធ បន្ថែមថា ការរត់គេចពីបញ្ហារបស់អ្នកប្រៀបបានទៅនឹងការប្រណាំងដែលអ្នកមិនដែលឈ្នះ ដូច្នេះហើយចូរប្រឈមមុខ ហើយព្យាយាមរកដំណោះស្រាយដោយចិត្តត្រជាក់ ដរាបណាអ្នកនៅតែតស៊ូ នោះអ្នកអាចយកឈ្នះការបាក់ទឹកចិត្តរបស់អ្នក។ ដឹងគុណខ្លួនឯងដែលអាចតស៊ូមកដល់ចំណុចដ៏វែងឆ្ងាយមួយ ដូច្នេះបើដើរមកឆ្ងាយហើយ បន្តដើរឲ្យដល់ទីបំផុត ដើរយឺត ល្អជាងឈរស្ងៀម ហើយបើឈរស្ងៀមដើម្បីសម្រាក ក៏នៅតែល្អជាងដេកដួល»៕

អត្ថបទ ៖ ចាន់រ៉ា

The post ណុប បាយ៉ារិទ្ធ ចែករំលែកបទពិសោធន៍រឹងមាំមួយចំនួន ទៅដល់អ្នកបាក់ទឹកចិត្ត (Depression) appeared first on Kampuchea Thmey Daily.

សម្គាល់មើល តើប្តីប្រពន្ធយើងកំពុងកើត Depression ដែរ?

Sonya — Thu, 28 Jan 2021 06:50:49 +0000

នៅពេលដែលដៃគូយើងស្រាប់តែរងជំងឺធ្លាក់ទឹកចិត្ត វដ្តនៃអារម្មណ៍និងការរងទុក្ខដែលមិនអាចពន្យល់បាន យើងបែរងាយនឹងសម្គាល់ឃើញជាងអ្នកដទៃ។ ពេលខ្លះយើងដឹងលឿនជាងសាមីខ្លួនទៀតផង កាលបើពិនិត្យចំណុចទាំងនេះ៖

ភាពអស់សង្ឃឹម

ជំងឺធ្លាក់ទឹកចិត្តច្រើនតែកើតឡើងដោយចាប់ផ្តើមយល់ថា គ្មានសង្ឃឹម។ ពួកគេគិតថា ខ្លួននឹងមិនជោគជ័យឬយកឈ្នះលើការលំបាក ទុក្ខវេទនាក្នុងជីវិតបានឡើយ។ អារម្មណ៍នៃភាពគ្មានតម្លៃ ភាពអៀនខ្មាស មានកំហុសស្អប់ខ្លួនឯងនិងខកចិត្តកើនឡើងពីមួយថ្ងៃទៅមួយថ្ងៃ។ អាចសម្គាល់ឃើញសម្តីពួកគេភាគច្រើនទុទិដ្ឋិនិយមជ្រាលជ្រៅ ខុសពីគេពីមុន។

ស្មារតីស្ពឹកស្រពន់

បុគ្គលដែលធ្លាក់ទឹកចិត្តបាត់បង់ចំណាប់អារម្មណ៍លើរឿងនានានិងសកម្មភាពទម្លាប់ដែលពួកគេធ្លាប់ចូលចិត្តសូម្បីតែការរួមភេទ។ ដូចជាពួកគេលែងជាមនុស្សពីមុនទៀតហើយទាក់ទងនឹងមនុស្សសកម្មភាពជីវិតទូទៅ។ ក្រោមទម្ងន់នៃជំងឺធ្លាក់ទឹកចិត្តបុគ្គលអាចនឹងសម្ងំឯកោ។

ការប្រែប្រួលអារម្មណ៍

ការផ្លាស់ប្តូរអារម្មណ៍ដែលតំណាងឱ្យភាពជ្រាលជ្រៅ ចាប់ពីស្ពឹកមិនចង់តវ៉ា មិនចង់បញ្ចេញមតិ មិនចង់ឆ្លើយឆ្លង រហូតដល់មានប្រតិកម្មតាមរយៈកំហឹងដែលមិនសមហេតុ និងការពោលទ្រគោះបោះបោក។

ការថប់បារម្ភ

ដៃគូអាចមានអារម្មណ៍ភ័យព្រួយ មិនស្រណុកស្រួលចិត្ត ឆាប់ខឹងនិងតឹងតែងសូម្បីក្នុងរឿងតូចមួយ។ ចង្វាក់បេះដូង ចលនាដង្ហើមនិងទំនោរញើសក៏អាចផ្លាស់ប្តូរ។ ពួកគេអាចមានកំហឹងក្នុងពេលដ៏ខ្លី វង្វេង ភ្លេច ហើយរារែក សាំស៊ន លំបាកក្នុងការសម្រេចចិត្ត។

ផ្លាស់ប្តូរលំនាំគេង

ក្នុងករណីដែលមនុស្សយើងកំពុងជួបប្រទះការថប់បារម្ភនិងលំនាំនៃការគិតច្រើនពេកអាចធ្វើឱ្យពិបាកដេកលក់និងវិវត្តទៅជាការប្រឈមមុខនឹងទំងន់បន្ថែមជ្រៅឡើងៗជាប្រចាំលើជំងឺធ្លាក់ទឹកចិត្ត។

ការផ្លាស់ប្តូរចំណង់អាហារ

នៅពេលដែលជំងឺធ្លាក់ទឹកចិត្តមាននិន្នាការរាលដាលដល់គ្រប់វិស័យនៃជីវិតសម្រាប់បុគ្គលដែលរងផលប៉ះពាល់ សូម្បីតែចំណង់អាហារធម្មជាតិ រសជាតិ ក៏អាចផ្លាស់ប្តូរបានដែរ។ រោគសញ្ញានៃជំងឺធ្លាក់ទឹកចិត្តនាំឱ្យពួកគេបាត់បង់ចំណាប់អារម្មណ៍និងមានបញ្ហារំលាយអាហារដែលពិបាកពន្យល់ដូចជាគ្មានជំងឺក្រពះផងគេហាក់មិនចង់ហូប។

គំនិតធ្វើអត្តឃាតនិងការប៉ុនប៉ងធ្វើអត្តឃាត

មិនមែនមនុស្សទាំងអស់ដែលមានជំងឺធ្លាក់ទឹកចិត្ត សុទ្ធតែមានគំនិតធ្វើអត្តឃាតនោះទេ ប៉ុន្តែបើគេគិតដល់រឿងនេះ អាចជាសញ្ញាព្រមានធ្ងន់ធ្ងរបំផុតហើយ។ ជារឿយៗបើគេមានគំនិតនេះ គេនឹងនិយាយប្លែកៗឬអានសៀវភៅប្លែកៗ ។ល។ វាដល់ពេលដែលត្រូវស្វែងរកជំនួយនិងការគាំទ្រពីអ្នកជំនាញជាបន្ទាន់៕

ប្រែសម្រួល៖ ស្រស់

ចុចអាន៖ កុំទាន់ DEPRESSION ប្រសិនយើងមិនទាន់បានធ្វើរឿងទំាងនេះ

ចុចអាន៖ កុំនិយាយពាក្យ៧ ឃ្លានេះទៅកាន់នរណាម្នាក់ ដែលមានរោគផ្លូវចិត្តធ្ងន់

The post សម្គាល់មើល តើប្តីប្រពន្ធយើងកំពុងកើត Depression ដែរ? appeared first on Kampuchea Thmey Daily.

កុំទាន់ DEPRESSION ប្រសិនយើងមិនទាន់បានធ្វើរឿងទំាងនេះ

សាង ស្រីល័ក្ខ — Mon, 09 Nov 2020 02:48:06 +0000

មនុស្សជាច្រើនបានហក់រំលងទៅកសាងគោលដៅខ្ពស់ពេក ស្ដាប់គេពេក តាមនិន្នាការពេក ដល់ថ្នាក់ភ្លេចថា ខ្លួនកំពុងជោគជ័យ ហើយបែរជាមើលរំលង ទៅឲ្យតម្លៃជោគជ័យអ្នកផ្សេងទៅវិញ រហូតដល់តូចចិត្តខ្លួនឯងខ្លាំងឡើងៗ ជាលំដាប់។

កុំឲ្យជំងឺផ្លូវចិត្តលេបត្របាក់យើងដល់ច្រមុះបាន ចូរធ្វើរឿងទំាងនេះជាមួយគ្នា៖

១ អានសៀវភៅជាប្រចាំ

ការអានធ្វើឲ្យយើងក្លាយជាអ្នកនិពន្ធល្អជាងអ្នកដែលកំពុងសរសេរនោះទៅទៀត។ នៅពេលយើងអាន ខួរក្បាលរបស់យើងស្រូបយកបច្ចេកទេសសរសេរល្អ ៗ និងវាក្យសព្ទ។ ការអានក៏ជួយបង្កើនគំនិតវាក្យសព្ទនិងដុសខាត់អក្ខរាវិរុទ្ធរបស់យើងផងដែរ។ ពាក្យថ្មីៗលេចឡើងក្នុងបរិបទធម្មជាតិរបស់សៀវភៅ ហើយយើងអាចទាញយកអត្ថន័យពីពាក្យដែលនៅជុំវិញនោះ។ អានរាល់ថ្ងៃ ម្ដងមួយម៉ោង យើងនឹងគ្មានពេលលំបាកចិត្ត១ម៉ោង។

២ បង្រៀនអ្នកដទៃអ្វីក្ដីដែលយើងចេះ

មូលហេតុមួយក្នុងចំណោមហេតុផលទូទៅបំផុត ដែលមនុស្សជោគជ័យចាប់ផ្ដើមពីការបង្រៀនគឺធ្វើឲ្យជីវិតរបស់សិស្សជាច្រើនតាមដែលយើងអាចធ្វើបាន ផ្លាស់ប្ដូរ។ ក្លាយជាគ្រូបង្រៀនអាចឲ្យយើងចែកចាយមេរៀនជីវិតដែលពួកគេមិនងាយភ្លេច ហើយដាក់យើងឲ្យស្ថិតក្នុងឥទិ្ធពលលើការសម្រេចចិត្ត អាកប្បកិរិយា ភាពខ្លាំងភាពទន់ខ្សោយនិងការស្រមើស្រមៃរបស់ពួកគេ។ មនុស្សគ្រប់គ្នាតែងតែចេះអ្វីម៉្យាងសម្រាប់បង្រៀនអ្នកផ្សេង ។បង្រៀនតាមវីដេអូលើអ៊ីនធឺណិតក៏បាន។

៣ ការរៀនសូត្រ

ការៀន ជាអាហារបំប៉នរាងកាយរបស់យើង។ ត្រូវរៀនជាជានិច្ចភាសា ឬជំនាញណាក្តីចេះឬមិនចេះ យើងនឹងហោចណាស់បាន ព័ត៌មាននិងការបំប៉នចិត្តនិងរកឃើញវិធីថ្មីៗទាក់ទងនឹងមនុស្សមកពីវប្បធម៌ផ្សេងៗគ្នាជំនាញខុសគ្នា ហោចណាស់យើងមើលគ្រូយូរទៅចេះវិធីបង្រៀន។

៤ ផ្តល់អំណោយ

ក្រយ៉ាងណា គង់មានអ្វីម្យ៉ាងអាចលះបង់ជួយ។ យើងមិនមែនក្រជាងគេលើលោកនេះទេ។ នៅពេលយើងផ្តល់ឲ្យអ្នកដទៃ យើងមិនត្រឹមតែធ្វើឲ្យពួកគេមានអារម្មណ៍ជិតស្និទ្ធនឹងយើងប៉ុណ្ណោះទេ យើងក៏មានអារម្មណ៍ជិតស្និទ្ធនឹងពួកគេដែរ យើងមានប្រយោជន៍ឬអត់អាស្រ័យទង្វើរបស់យើង។

៥ បោះបង់រឿងអតីតកាល

វាធ្ងន់ណាស់។ ទំាងល្អទំាងមិនល្អវាញំាញីយើងណាស់។ ប្រសិនបើយើងអាចបោះបង់ចោលនិងចាប់ផ្ដើមទទួលយកអ្វីៗចំពោះមុខ បញ្ហាស្ត្រេស ការអាក់អន់ចិត្តជាមួយអ្នកដទៃ ការតស៊ូនឹងការបាត់បង់ ការចុះចាញ់នឹងការភ័យខ្លាចកុំអនុញ្ញាតឲ្យវាមកកំណត់យើង។ យើងជាម្ចាស់លើខ្លួនឯង បើយើងថាយើងខ្លាំង គឺខ្លាំងហើយ បើយើងព្រមខ្សោយយើងនឹងខ្សោយមែន៕

ប្រែសម្រួល៖ ស្រស់

ចុចអាន៖ស្ត្រីសម័យទំនើប មានគ្រប់លក្ខណា រមែងប្រកាន់ចរិយាមារយាទប៉ុន្មាននេះជាប់ខ្លួន

ចុចអាន៖ជួបវិបត្តិអត់ការងារធ្វើយូរពេក គួរធ្វើបែបណា?

The post កុំទាន់ DEPRESSION ប្រសិនយើងមិនទាន់បានធ្វើរឿងទំាងនេះ appeared first on Kampuchea Thmey Daily.

DEPRESSION Archives - Kampuchea Thmey Daily

ណុប បាយ៉ារិទ្ធ ចែករំលែកបទពិសោធន៍រឹងមាំមួយចំនួន ទៅដល់អ្នកបាក់ទឹកចិត្ត (Depression)

សម្គាល់មើល តើប្តីប្រពន្ធយើងកំពុងកើត Depression ដែរ?

កុំ​ទាន់ DEPRESSION ប្រសិន​យើង​មិន​ទាន់​បាន​ធ្វើ​រឿង​ទំាង​នេះ

កុំទាន់ DEPRESSION ប្រសិនយើងមិនទាន់បានធ្វើរឿងទំាងនេះ