Everton Archives - Kampuchea Thmey Daily

Ashley Young អាចលេងប៉ះកូនប្រុសបង្កើតរបស់ខ្លួនក្នុងពាន FA Cup

Pha Rothana — Wed, 04 Dec 2024 01:35:54 +0000

កីឡាករ Ashley Young អាចនឹងលេងតទល់ជាមួយកូនប្រុសបង្កើតរបស់ខ្លួនអាយុ១៨ឆ្នាំ កីឡាករ Tyler ក្នុងការប្រកួតជុំទី៣ ពានរង្វាន់ FA Cup បន្ទាប់ពីក្លិប Everton ចាប់ឆ្នោតប៉ះក្លិប Peterborough។

កីឡាករ Tyler ដែលបានចុះហត្ថលេខាលេងឲ្យក្លិបនៅរដូវក្តៅ អាចនឹងបង្ហាញខ្លួនក្នុងពានរង្វាន់ FA Cup ប៉ះឪពុកបង្កើតរបស់ខ្លួន។ លោក Ashley Young បច្ចុប្បន្នមានអាយុ៣៩ឆ្នាំ ប៉ុន្តែនៅបន្ដអាជីពបាល់ទាត់ ទោះបីមិនសូវទទួលបានឱកាសច្រើនក្នុងការបង្ហាញខ្លួននៅលើទីលានក៏ដោយ។ កីឡាករវ័យចំណាស់រូបនេះធ្លាប់ឈ្នះពានរង្វាន់ FA Cup ក្នុងឆ្នាំ២០១៦ ពេលកំពុងលេងឲ្យក្លិបបិសាចក្រហម Manchester United។

កីឡាករ Ashley Young បានសរសេរក្នុងប្រព័ន្ធផ្សព្វផ្សាយ X ថា ៖«អស្ចារ្យ សុបិនអាចក្លាយជាការពិត»។

វាជារឿងដ៏កម្រដែលឪពុក និងកូន អាចលេងបាល់ទាត់អាជីពទល់មុខគ្នាក្នុងការប្រកួតផ្លូវការបែបនេះ។ វានឹងបង្កើតជាប្រវត្តិសាស្រ្ដថ្មីមួយផងក្នុងវិស័យបាល់ទាត់។ សង្ឃឹមថា អ្វីៗនឹងក្លាយជាការពិត ហើយកីឡាករ Tyler នឹងអាចលេងទល់នឹងឪពុករបស់ខ្លួន៕

ប្រែសម្រួល៖ ផា រតនា

The post Ashley Young អាចលេងប៉ះកូនប្រុសបង្កើតរបស់ខ្លួនក្នុងពាន FA Cup appeared first on Kampuchea Thmey Daily.

អតីតគ្រូបង្វឹកចិន លោក Li Tie សារភាពកំហុសក្នុងការទទួលសំណូកជាង១០លានដុល្លារ

Pha Rothana — Thu, 04 Apr 2024 01:15:46 +0000

អតីតគ្រូបង្វឹកក្រុមជម្រើសជាតិចិននិងជាអតីតកីឡាកររបស់ Everton លោក Li Tie បានសារភាពកំហុសដែលខ្លួនពិតជាបានទទួលសំណូកជាទឹកប្រាក់ជាង១០លានដុល្លារអាមេរិកអំឡុងពេលកំពុងកាន់តំណែង។

ក្រោយការកាត់ក្តីនៅក្នុងខេត្ត Hubei ភាគកណ្តាល ប្រទេសចិន កាលពីថ្ងៃព្រហស្បតិ៍ សប្តាហ៍មុន តុលាការបានរកឃើញថា លោក Tie ពិតជាបានទទួលយកសំណូកជាទឹកប្រាក់ជាង៧៧លានយ័ន (១០.៧ លានដុល្លារ) ពីចន្លោះឆ្នាំ២០១៧ដល់២០២១។ ជាមួយគ្នានេះ អតីតប្រធានសមាគមបាល់ទាត់ចិន លោក Chen Xuyuan ត្រូវបានកាត់ទោសឲ្យជាប់ពន្ធនាគារមួយជីវិត ពីបទទទួលសំណូកជាទឹកប្រាក់ចំនួន១១លានដុល្លារ។

ជាក់ស្តែងលោក Li Tie ក៏ជាប់ពាក់ព័ន្ធជាមួយបញ្ហាស៊ីសំណូក ក្នុងការជ្រើសរើសកីឡាករចូលក្រុមជម្រើសជាតិចិន ហើយការរៀបចំលទ្ធផលការប្រកួត និងការចុះកិច្ចសន្យាផ្សេងៗជាមួយក្លិបជាដើម។ តុលាការប្រទេសចិនបានប្រកាសថា៖«Li Tie បានធ្វើសេចក្តីថ្លែងការណ៍ចុងក្រោយរបស់គាត់ ដោយបានសារភាពកំហុស និងសម្តែងនូវវិប្បដិសារីមួយនេះ»។

លោក Li អតីតគ្រូបង្វឹករបស់ប្រទេសចិនចាប់ពីខែមករា ឆ្នាំ២០២០ ដល់ ខែធ្នូ ឆ្នាំ២០២១ បានលេងក្នុងក្របខ័ណ្ឌលីគកំពូលអង់គ្លេស English Premier League ឱ្យក្លិប Everton ចំនួន៣៤លើក នៅចន្លោះឆ្នាំ២០០២-២០០៤។

លោក Li ក៏ត្រូវបានបង្ហាញនៅក្នុងភាពយន្តឯកសារ ចាក់ផ្សាយដោយទូរទស្សន៍រដ្ឋ CCTV កាលពីខែមករា អំពីអំពើពុករលួយ ដែលរីករាលដាលនៅក្នុងបាល់ទាត់របស់ចិន។ វីដេអូឯកសារនេះ លោកបានរៀបរាប់ថា លោកបានរៀបចំសំណូកជិត ៤២១,០០០ ដុល្លារ ដើម្បីទទួលបានតំណែងជាគ្រូបង្វឹក និងបានជួយរៀបចំលទ្ធផលការប្រកួតនៅពេលលោកជាគ្រូបង្វឹកក្លិបនៅលីគកំពូលរបស់ចិន។

លោក Li Tie បាននិយាយថា ៖«ខ្ញុំសុំទោសជាខ្លាំង។ ខ្ញុំគួរតែដាក់ក្បាលដល់ដី ហើយដើរនៅតាមដងផ្លូវ។ មានរឿងមួយចំនួនដែលកើតឡើង នៅពេលនោះគឺជាទម្លាប់ទូទៅនៅក្នុងកីឡាបាល់ទាត់»៕

ប្រែសម្រួល៖ ផា រតនា
ប្រភព៖ insideworldfootball

The post អតីតគ្រូបង្វឹកចិន លោក Li Tie សារភាពកំហុសក្នុងការទទួលសំណូកជាង១០លានដុល្លារ appeared first on Kampuchea Thmey Daily.

អតីតគ្រូបង្វឹកចិន Li Tie ត្រូវជាប់ពន្ធនាគារអស់មួយជីវិតពីបទពុករលួយ

Pha Rothana — Mon, 26 Feb 2024 09:08:54 +0000

លោក Li Tie អតីតកីឡាកររបស់ Everton ត្រូវបានរកឃើញមានទោសពីបទពុករលួយនៅប្រទេសចិនជាទឹកដីកំណើត និងត្រូវប្រឈមនឹងការកាត់ទោសឲ្យជាប់ពន្ធនាគារអស់មួយជីវិត។

បន្ទាប់ពីចូលរួមជាមួយក្លិប Premier League ជាលើកដំបូង Li បានចំណាយពេល៤ឆ្នាំនៅ Everton ពីឆ្នាំ២០០២ដល់ឆ្នាំ២០០៦ បានបង្ហាញខ្លួន៤០លើក បុរសវ័យ៤៦ឆ្នាំបានក្លាយជាគ្រូបង្វឹកក្រុមបាល់ទាត់ជម្រើសជាតិចិនពីឆ្នាំ២០១៩ ដល់២០២១។ នៅពេលនេះលោកនឹងត្រូវជាប់ពន្ធនាគារអស់មួយជីវិត ពាក់ព័ន្ធនឹងអំពើពុករលួយក្នុងបាល់ទាត់។ លោក Li ត្រូវបានសង្ស័យពីការទទួលយក និងផ្តល់សំណូកដើម្បីទទួលបានការងារជាគ្រូបង្វឹកជម្រើសជាតិចិន។

លោក Li Tie បាននិយាយក្នុងវីដេអូសារភាពផ្ទាល់របស់ទូរទស្សន៍ CCTV ថា លោកបានចំណាយប្រាក់ប្រហែល៣៣០,០០០ ផោនដើម្បីទទួលការងារជាគ្រូបង្វឹកក្រុមបាល់ទាត់ជម្រើសជាតិ។

លោក Li Tie បាននិយាយថា៖ «ខ្ញុំពិតជាសោកស្តាយណាស់។ ខ្ញុំគួរតែរក្សាក្បាលដល់ដី ហើយដើរតាមផ្លូវត្រូវ។ មានរឿងមួយចំនួនដែលនៅពេលនោះជាទម្លាប់ទូទៅក្នុងកីឡាបាល់ទាត់។ តាមរយៈការទទួលបាន ជោគជ័យ តាមរយៈមធ្យោបាយមិនសមរម្យ វាពិតជាធ្វើឱ្យខ្ញុំគ្មានភាពអត់ធ្មត់ និងចង់ទទួលបានលទ្ធផលរហ័ស។ ដើម្បីសម្រេចបានលទ្ធផលល្អ ខ្ញុំបានប្រើឥទ្ធិពលលើអាជ្ញាកណ្តាល សូកប៉ាន់កីឡាករ និងគ្រូបង្វឹកដែលជាគូប្រឆាំង»។

ប្រែសម្រួល៖ ផា រតនា
ប្រភព៖ Vanguard

The post អតីតគ្រូបង្វឹកចិន Li Tie ត្រូវជាប់ពន្ធនាគារអស់មួយជីវិតពីបទពុករលួយ appeared first on Kampuchea Thmey Daily.

កីឡាករបាល់ទាត់អាជីព៣រូបវិលចូលទីលានវិញជោគជ័យក្រោយរបួសធ្ងន់ធ្ងរ

Pha Rothana — Wed, 27 Dec 2023 02:56:27 +0000

កីឡាករបាល់ទាត់គ្រប់រូបតែងតែប៉ះទង្គិចគ្នាលើកទីលានដែលធ្វើឲ្យពួកគេប្រឈមនឹងរបួស គ្រោះថ្នាក់ស្រាល និងធ្ងន់។ កីឡាករខ្លះបានរបួសយ៉ាងធ្ងន់ធ្ងរដែលស្ទើរតែបាត់បង់អាជីពបាល់ទាត់ ប៉ុន្តែនៅពេលពួកគេជាសះស្បើយ បានវិលត្រឡប់មកកាន់ទីលានវិញយ៉ាងជោគជ័យ។ ជាក់ស្តែងកីឡាករអាជីព៣រូបបានរងរបួសធ្ងន់ធ្ងរ ប៉ុន្តែនៅតែធ្វើបានល្អក្រោយជាពីរបួស។

១.កីឡាករ Aron Ramsey

ខ្សែបម្រើ Aron Ramsey របស់ក្លិប Arsenal បានបាក់ជើងពេលប៉ះទង្គិចជាមួយខ្សែការពារ Ryan Shawcross របស់ Stoke City ក្នុងឆ្នាំ២០១០។ កីឡាករសញ្ជាតិវេលស៍រូបនេះបានចំណាយពេល៩ខែនៅក្រៅទីលានដើម្បីព្យាបាលពីរបួស។

បញ្ហារបួសយ៉ាងធ្ងន់ធ្ងរនេះ អ្នកគាំទ្រភាគច្រើនគិតថា Ramsey អាចនឹងបញ្ចប់អាជីពបាល់ទាត់ ប៉ុន្តែអ្វីៗខុសពីការគិត។ ខ្សែបម្រើរូបនេះបានវិលត្រឡប់ចូលទីលានដោយត្រូវបានក្លិប Arsenal ឲ្យក្លិប Nottingham Forest និង Cardiff City ខ្ចីជើង។ ឆ្នាំ២០១២ Ramsey បានត្រឡប់មកកាំភ្លើងធំវិញ ហើយបានបង្ហាញទម្រង់លេងយ៉ាងល្អ និងជាប់កីឡាករជម្រើសដំបូងរបស់លោក Arsene Wenger។ រូបគេបានរួមចំណែកក្លិបឈ្នះជើងឯក FA Cup ៣លើក និងពាន Community Shield ២លើក។

២. កីឡាករ Luke Shaw

កីឡាករ Luke Shaw របស់ក្រុម Manchester United បានរបួសបាក់ជើងយ៉ាងធ្ងន់ធ្ងរក្នុងការប្រកួត Champions League ទល់នឹង PSV។ ខ្សែការពារស្លាបឆ្វេងរូបនេះបានអវត្តមានរយៈពេល១០។ គាត់បានត្រលប់ចូលទីលានវិញ ក្នុងការប្រកួតមិត្តភាពជាមួយក្រុម Wigan បន្ទាប់ពីជាសះស្បើយពីរបួស។ រូបគេបានតស៊ូយ៉ាងខ្លាំង រហូតដណ្ដើមបានកៅអីជម្រើស១១នាក់ក្រុម Manchester United និងជាប់ជម្រើសជាតិអង់គ្លេសរហូត។

Luke Shaw បានជួយក្រុមជម្រើសជាតិអង់គ្លេសក្លាយជាម្ចាស់ជើងឯករងក្នុងពានរង្វាន់ទ្វីបអឺរ៉ុបឆ្នាំ២០២0 និងឈ្នះពានរង្វាន់ Community Shield ១លើកនិង League Cup ២លើកជាក្រុម Manchester United បន្ទាប់ពីជារបួសដ៏រន្ធត់នេះ។

៣.កីឡាករ Andre Gomes

Andre Gomes បានរបួសបាក់ឆ្អឹងកជើងស្តាំ ក្នុងការប្រកួតជាមួយក្រុម Tottenham។ ពេលនោះកីឡាករ Son Heung-min ព្យាយាមឈូសយកបាល់ពីកីឡាករ Gomes ក៏ប៉ះទង្គិចជាមួយខ្សែការពារ Serge Aurier។ ខ្សែបម្រើ Andre Gomes បានចំណាយរយៈពេល១១៥ថ្ងៃក្នុងការព្យាបាល។ នេះជាពេលវេលាដ៏ឆាប់រហ័សមួយដែលស្ទើរតែមិនគួរឲ្យជឿ ហើយរូបគេបានត្រឡប់ចូលទីលានក្នុងការប្រកួតជាក្រុម Arsenal កាលពីឆ្នាំ២០២០។ ក្នុងឆ្នាំ២០២៣ ខ្សែបម្រើសរូបនេះត្រូវបានក្លិប Everton ដាក់ឲ្យក្លិប Lille របស់ប្រទេសបារាំងខ្ចីជើង។ រូបបង្ហាញខ្លួនបាន២៦ប្រកួត ស៊ុតបញ្ចូលទី៣គ្រាប់៕

អត្ថបទ៖ ផា រតនា

The post កីឡាករបាល់ទាត់អាជីព៣រូបវិលចូលទីលានវិញជោគជ័យក្រោយរបួសធ្ងន់ធ្ងរ appeared first on Kampuchea Thmey Daily.

កាត់១០ពិន្ទុម្តងហើយ ឥឡូវ Everton ប្រឈមនឹងការកាត់៩ពិន្ទុបន្ថែមទៀត

chean virakbot — Mon, 20 Nov 2023 09:04:40 +0000

ក្លិបបាល់ទាត់ Everton កំពុងប្រឈមមុខនឹងការកាត់៩ពិន្ទុដ៏គួរឱ្យភ្ញាក់ផ្អើលបន្ថែមទៀត បន្ទាប់ពីការទើបតែត្រូវបានកាត់១០ពិន្ទុរួចហើយ ខណៈក្លិបគូប្រជែងរួមទាំង Leeds & Burnley ទាមទារសំណង៣០០លានផោន។

របាយការណ៍មួយបាននិយាយថា Everton ស្ថិតក្នុងគ្រោះថ្នាក់នៃការកាត់ពិន្ទុជាលើកទី២ ក្នុងក្របខ័ណ្ឌ Premier League។

គណៈកម្មការឯករាជ្យនឹងសម្រេចថាតើ ក្រុមរហស្សនាម Toffees មួយនេះគួរតែត្រូវបានគេដកពិន្ទុបន្ថែមដែរឬទេ ខណៈក្លិបចំនួន៣ គឺ Burnley, Leeds និង Leicester កំពុងរៀបចំផែនការទាមទារសំណង ៣០០លានផោន (៣៧៤ លានដុល្លារ) ពីពួកគេ។

កាសែត Daily Mail អះអាងថា ប្រសិនបើក្រុមទាំង៣ ទទួលបានជោគជ័យ នោះ Everton នឹងរក្សាការកាត់ពិន្ទុផ្សេងទៀត ហើយទំនងជានឹងមានគ្រោះថ្នាក់។

Everton ត្រូវបានកាត់ ១០ពិន្ទុកាលពីថ្ងៃសុក្រ បន្ទាប់ពីត្រូវបានសម្រេចថាពួកគេបានបំពានច្បាប់នៃប្រាក់ចំណេញ និងនិរន្តរភាពរបស់ Premier League។ Everton នឹងប្តឹងឧទ្ធរណ៍ចំពោះការសម្រេចចិត្តនេះ ហើយ The Telegraph និយាយថា ពួកគេនឹងតស៊ូប្រឆាំងនឹងការប៉ុនប៉ងណាមួយដើម្បីបង្ខំពួកគេឱ្យបង់ប្រាក់សំណងដល់ក្រុមផ្សេងទៀត។

ការកាត់ចេញ១០ពិន្ទុពី Everton គឺជារឿងធ្ងន់ធ្ងរបំផុតក្នុងប្រវត្តិសាស្ត្រ Premier League។ ការដាក់ទណ្ឌកម្មនេះធ្វើឱ្យពួកគេស្ថិតនៅលេខ១៩ ឬឈរនៅលេខ២ រាប់ពីបាតតារាង។ ប្រសិនបើពួកគេត្រូវដាក់ពិន្ទុបន្ថែម ក្រុមរបស់លោក Sean Dyche ទំនងជានឹងត្រូវកាត់ចោលតែម្ដង។

Everton ដែលមិនស្គាល់ចាញ់សោះក្នុងការប្រកួត ៤លើកចុងក្រោយ នឹងប្តឹងឧទ្ធរណ៍ប្រឆាំងនឹងការពិន័យដែលបានដាក់លើពួកគេក្នុងសប្តាហ៍នេះ។ ការប្រកួតបន្ទាប់របស់ពួកគេគឺប៉ះ Manchester United នៅថ្ងៃទី២៦ ខែវិច្ឆិកា៕

ប្រែសម្រួល៖ មន្នីរ័ត្ន
ប្រភព៖ goal.com

The post កាត់១០ពិន្ទុម្តងហើយ ឥឡូវ Everton ប្រឈមនឹងការកាត់៩ពិន្ទុបន្ថែមទៀត appeared first on Kampuchea Thmey Daily.

ការចាប់ផ្ដើមអាជីពជាគ្រូរបស់ Lampard មិនទាន់បានល្អ ខណៈត្រូវក្លិបបណ្ដេញចេញ ២ ដង

អ៊ិន ពិសី — Tue, 24 Jan 2023 08:49:00 +0000

ក្លិប Everton បានបណ្ដេញអ្នកចាត់ការ លោក Frank Lampard ចេញពីតំណែង បន្ទាប់ពីដឹកនាំបានតិចជាង ១ ឆ្នាំ នៅ Goodison Park។

ការបរាជ័យក្រោមថ្វីដៃក្រុម West Ham United កាលពីថ្ងៃសៅរ៍ គឺជាការចាញ់លើកទី ៩ របស់ Everton ក្នុង ១២ ប្រកួត នៅក្របខណ្ឌ Premier League។ ពួកគេឈរនៅលេខរៀងទី ២ រាប់ពីបាតតារាងមកវិញ ដោយមាន ១៥ ពិន្ទុ ពីការប្រកួតចំនួន ២០ លើក នៅពីលើក្រុម Southampton ដោយខុសគ្នាលើចំនួនគ្រាប់បាល់។

អតីតខ្សែបម្រើជម្រើសជាតិអង់គ្លេស Lampard វ័យ ៤៤ ឆ្នាំ បានជំនួសតំណែង Rafael Benitez ក្នុងខែមករា ឆ្នាំ ២០២២ ជាមួយនឹងក្រុមឈរនៅលេខ ១៦ ក្នុងតារាង ហើយបានជួយ Everton ជៀសផុតពីការកាត់ចោល។

ការបណ្ដេញចេញបែបនេះ ហាក់បានសេចក្ដីថា លោក Frank Lampard នៅមិនទាន់ជោគជ័យក្នុងអាជីពជាគ្រូនៅឡើយទេ ក្នុងក្របខណ្ឌលីគកំពូលអង់គ្លេស ដ្បិតលោកធ្លាប់ត្រូវបានបណ្ដេញចេញម្ដងហើយ កាលពីដឹកនាំ Chelsea អំឡុងឆ្នាំ ២០១៩-២០២១។ នៅឆ្នាំ ២០២២ លោកបានចូលមកដឹកនាំ Everton ទៀត ប៉ុន្តែខ្វះ ៧ ថ្ងៃទៀតគ្រប់ ១ ឆ្នាំ លោកក៏ត្រូវបានបណ្ដេញចេញដោយក្លិប Everton ផងដែរ។

Lampard បានឈ្នះតែ ១២ ប្រកួត ក្នុងចំណោម ៤៤ ប្រកួតរបស់លោក នៅក្នុងការប្រកួតទាំងអស់ ដែលជាភាគរយឈ្នះ ២៧.២៧ ដែលអាក្រក់ជាងកំណត់ត្រារបស់លោក នៅ Derby (៤២.១%) និង Chelsea (៥២.៤%)៕

ប្រភព ៖ bbc.com

អត្ថបទ ៖ មន្នីរ័ត្ន

The post ការចាប់ផ្ដើមអាជីពជាគ្រូរបស់ Lampard មិនទាន់បានល្អ ខណៈត្រូវក្លិបបណ្ដេញចេញ ២ ដង appeared first on Kampuchea Thmey Daily.