ជាក់ស្តែង ថ្មីៗនេះមានបុគ្គលិកផ្នែកធនធានមនុស្សនៃក្រុមហ៊ុនមួយចំនួន បានទម្លាយករណីគួរប្រុងប្រយ័ត្ន ដោយសារតែមានការផ្ញើអុីម៉ែលក្លែងក្លាយ ដែលភ្ជាប់មកជាមួយប្រវត្តិរូបសង្ខេបរបស់បេក្ខជន ដើម្បីបោកបញ្ឆោតឱ្យអ្នកទទួលបើកមើលឯកសារនោះ។ នៅពេលបើកឯកសារ ឬចុចលើតំណភ្ជាប់ដែលមាននៅក្នុង CV អាចបណ្តាលឱ្យមេរោគត្រូវបានដំឡើងចូលក្នុងកុំព្យូទ័រ ឬឧបករណ៍ប្រើប្រាស់ដោយមិនដឹងខ្លួន។

បើតាមការចែករំលែកពីសាធារណជនមួយរយៈពេលនេះ ស្តីពីទម្រង់នៃការវាយប្រហារតាមរយៈ file គឺរួមមាន៖
– ការផ្ញើឯកសារ Word ឬ PDF ដែលមានកូដមេរោគលាក់ខ្លួន។
– ការបញ្ចូលតំណភ្ជាប់ក្លែងក្លាយទៅកាន់គេហទំព័របន្លំ (Phishing Website)។
– ការប្រើប្រាស់ឯកសារ (ZIP/RAR) ដែលផ្ទុកកម្មវិធីមេរោគ។
– ការក្លែងបន្លំជាបេក្ខជនស្វែងរកការងារ ដើម្បីទាក់ទាញឱ្យផ្នែកធនធានមនុស្ស (HR) បើកឯកសារដែលមានមេរោគ។

តួយ៉ាងថ្មីៗនេះ នាយកដ្ឋានប្រឆាំងបទល្មើសបច្ចេកវិទ្យា ក៏បានចែករំលែកឱ្យប្រុងប្រយ័ត្នខ្ពស់លើ File name «.exe» នៅលើបណ្ដាញសង្គមតេឡេក្រាម ខណៈជនអនាមិក បានចែកចាយមេរោគប្រភេទដដែលនេះ ដោយបន្លំប្រើឈ្មោះឯកសារផ្សេងៗ ដូចជា ឈ្មោះឯកសារដែលនៅខាងចុងនៃឈ្មោះមាន .exe ឬ រូបភាពអំពីការស្លាប់ និង សន្ទរកថារបស់ថ្នាក់ដឹកនាំ ជាដើម ដែលទាក់ទាញអ្នកប្រើប្រាស់ឱ្យចាប់អារម្មណ៍ ចង់ដឹង ចង់ឮ ឈានទៅដល់ការចុចមើល និង អាចលួចយកទិន្នន័យរបស់អ្នកប្រើប្រាស់តែម្តង។

ក្រៅពីទម្រង់នៃការ CV សូម្បីតែការលក់ទំនិញលើអនឡាញ ក៏មានហានិភ័យនៃការវាយប្រហារប្រភេទនេះដែរ។ ករណីនេះ ជនអនាមិកអាចធ្វើការកុម្ម៉ង់ទំនិញពីទំព័រហ្វេសប៊ុករបស់ហាងណាមួយ ដោយផ្ញើរ file បញ្ជីរាយនាមទំនិញ ក្នុងបំណងបោកបញ្ឆោតឱ្យម្ចាស់ហាងចុចបើកឯកសារនោះជាដើម។

អាស្រ័យហេតុនេះ អ្នកជំនាញនៃនាយកដ្ឋានប្រឆាំងបទល្មើសបច្ចេកវិទ្យា បានក្រើនរំឭកដល់អ្នកប្រើប្រាស់ប្រព័ន្ធទំនាក់ទំនងសង្គមតេលេក្រាមទាំងអស់ ត្រូវពិនិត្យប្រភពនៃការផ្ញើ ឬចែកចាយឯកសារផ្សេងៗ និងពុំគួរចុចបើក ឬ ទាញយរាល់ឯកសារប្លែកៗ ដែលផ្ញើមកពីអ្នកមិនស្គាល់អត្តសញ្ញាណនោះឡើយ ជៀសវាងការបាត់បង់ទិន្នន័យ ឬ ឯកសារនានា។

ការយល់ដឹងអំពីហានិភ័យ និងការអនុវត្តវិធានការសុវត្ថិភាពឌីជីថល គឺជាចំណុចសំខាន់ក្នុងការការពារទិន្នន័យ និងកាត់បន្ថយការខូចខាតដែលអាចកើតមានពីការវាយប្រហារតាមអុីនធឺណិត៕

The post អន្ទាក់ថ្មី! CV និងឯកសារក្លែងក្លាយ កំពុងក្លាយជាមធ្យោបាយចែកចាយមេរោគ ដើម្បីលួចទិន្នន័យ appeared first on Kampuchea Thmey Daily.

ពាក់ព័ន្ធនឹង Cyber Security នេះដែរ កម្ពុជាថ្មីសូមលើកយកតែ ២ករណី លើអ្នកដែលយល់ច្បាស់ ទាក់ទងនឹងការការពារសុវត្ថិភាពបណ្តាញទំនាក់ទំនងសង្គមប៉ុណ្ណោះ បន្ទាប់ពីករណីទាំងពីរនេះ មានការការពារសុវត្ថិភាព ល្អកម្រិតណាក៏ដោយ នៅតែត្រូវជាប់សំណាញ់របស់ Hacker រហូតបាត់បង់គណនី Telegram របស់ខ្លួន។

បើតាមការចែករំលែកពី Youtuber ម្នាក់ “Dy Zapong” លើប្រធានបទ “បកស្រាយពីការយក Telegram ដោយមិនពឹង SMS និង 2FA Code!” បានឱ្យដឹងថា គណនីតេឡេក្រាមរបស់លោក ត្រូវបានគេ Hack និងលុបចេញពីលើបណ្តាញទំនាក់ទំនងសង្គមតែម្តង បើទោះបីគណនីរបស់លោកមានការការពារច្រើនមុខងារក៏ដោយ។ ខណៈម្ចាស់គណនី Telegram មួយផ្សេងទៀត ក៏ជួបរឿងនេះដូចគ្នាដែរ គ្រាន់តែប្រភពនៃការជ្រៀតចូលខុសគ្នាប៉ុណ្ណោះ។

មុននឹងស្វែងពីសាច់រឿងដែលត្រូវគេ Hack ករណីទាំងពីរខាងលើ កម្ពុជាថ្មី សូមណែនាំពីការរាយអន្ទាក់ដ៏សកម្មរបស់ Hacker ត្រួសៗ៖

១. បន្លំ Domain website
Hacker បានអាចបង្កើតបណ្តាញនានានាបន្លំជាបណ្តាញផ្លូវការរបស់កម្មវិធីផ្សេងៗ។ ជាក់ស្តែង ដូចដែលកម្មវិធីបណ្តាញទំនាក់ទំនងសង្គមសំខាន់ៗ ត្រូវបានបន្លំទាំងរូបភាព និងlink ដែលអាចឱ្យអ្នកចូលទៅប្រើប្រាស់ ងាយធ្លាក់ចូលអន្ទាក់នេះ។ ដូចនេះ ប្រសិនបើចង់ login ក្នុងកម្មវិធីណាមួយ ត្រូវមើលលើភាពខុសគ្នានៃ link ដែលគេអាចបន្លំតែមួយតួអក្សរក៏មាន។ Domain ផ្លូវការរបស់កម្មវិធីនេះ គឺ https://web.telegram.org/a/ ។ 

២. SMS Hijacking
ដែលភាគច្រើនកើតលើទូរស័ព្ទដៃ (Android) ដោយសារតែប្រតិបត្តិការ Android ផ្តល់លទ្ធភាពឱ្យអ្នកប្រើប្រាស់ អាចទាញយកកម្មវិធីផ្សេងៗ ក្រៅពី Play Store បាន។ ហេតុនេះ ពេលដែលយើង allow permission តាមការទាមទាររបស់កម្មវិធីដែល Hacker បានបញ្ចូលមេរោគរបស់គេហើយនោះ វានឹងសម្ងំខ្លួនធ្វើសកម្មភាពយ៉ាងស្ងៀមស្ងាត់។ ខណៈអន្ទាក់ប្រភេទនេះ មិនមែនមានតែលើកម្មវិធីទាញយកទេ វាមានក្នុង Telegeram Bot ថែមទៀត។

៣. Malware
Gremlin Stealer Malware ដែលមានគោលដៅលើ APP Data តែម្តង។ សូមស្តាប់ការបកស្រាយលម្អិតនៅនាទី 5:01 – 7:52 ក្នុងវីដេអូខាងក្រោមនេះ៖

ព័ត៌មាននៃការ Hack នេះ ដ្បិតដូចជាគួរក្តីព្រួយបារម្ភក្នុងការប្រើប្រាស់ប្រព័ន្ធបច្ចេកវិទ្យា តែអ្នកជំនាញ និងអ្នកឆ្លងកាត់ករណីនេះ អះអាងថា សម្រាប់សាមញ្ញជនធម្មតា មិនមែនជាគោលដៅរបស់ Hacker នោះឡើយ ខណៈភាគច្រើន អាចត្រឹមតែត្រូវលុបគណនីចោល។

ដោយឡែក ម្ចាស់គណនីដែលមិនធ្លាប់ត្រូវបានគេ Hack ក៏មិនប្រាកដថាគណនីរបស់ខ្លួនរឹងមាំដល់ថ្នាក់គេ Hack មិនបាននោះឡើយ វាអាចមានច្រើនកត្តា ពិសេសគឺមិនត្រូវនឹង Taget ដែលគេចង់បាន៕

The post Hacker មានវិធីសាស្ត្ររាយសំណាញ់ច្រើន អាចឆ្មក់កម្ទេចប្រព័ន្ធសុវត្ថិភាព ទោះកំណត់មុខងារកម្រិតខ្ពស់ appeared first on Kampuchea Thmey Daily.

បើតាមក្រសួងប្រប្រៃសណីយ៍ និងទូគមនាគមន៍ ការក្លែងបន្លំ (Phishing) ចោរព័ត៌មានវិទ្យាវាយប្រហារអ្នក ដោយផ្ញើសារអ៊ីមែលក្លែងបន្លំដែលមើលទៅដូចជាសារអ៊ីមែលត្រឹមត្រូវ ដែលជារឿយៗសារអ៊ីមែលនោះមើលទៅហាក់ដូចជាមកពីប្រភពដែលទុកចិត្តបាន ប៉ុន្តែវាមានបំណងបញ្ឆោតអ្នកឱ្យចែករំលែកនូវព័ត៌មានផ្ទាល់ខ្លួន ព័ត៌មានហិរញ្ញវត្ថុ ឬការចុចលើតំណភ្ជាប់ដែលមានមេរោគ។

ចំពោះមេរោគ (Malware) សំដៅទៅលើមេរោគ ដែលអាចជា Viruses, Spyware និងកម្មវិធីផ្សេងៗទៀតដែលត្រូវបានតំឡើងនៅលើឧបករណ៍ឌីជីថលរបស់អ្នក ដោយពុំដឹងខ្លួន ឬគ្មានការយល់ព្រម ដែលកម្មវិធីទាំងនេះអាចធ្វើឱ្យឧបករណ៍ឌីជីថលរបស់អ្នកគាំង បង្ហាញនូវការផ្សព្វផ្សាយពាណិជ្ជកម្មផ្សេងៗ និងអាចត្រូវបានគេប្រើដើម្បីតាមដាន និងគ្រប់គ្រងសកម្មភាពរបស់អ្នកលើអ៊ីនធឺណិត ព្រមទាំងអាចប្រើអត្តសញ្ញាណអ្នកដើម្បីលួចបន្លំ ឬបោកប្រាស់បុគ្គលផ្សេងៗដោយអ្នកមិនបានដឹងខ្លួនផងដែរ។

រីឯការវាយប្រហារតាមអ៊ីនធឺណិតបែបវិស្វកម្មសង្គម (Social Engineering) គឺជាវិធីសាស្ត្រវាយប្រហារបោកបញ្ឆោតមនុស្ស ឬធ្វើឱ្យគេទុកចិត្តដើម្បីទាញយកនូវព័ត៌មានវិទ្យាទាំងនេះត្រូវការ គឺពួកគេនឹងកំណត់ជាមុខសញ្ញា ហើយតែងតែព្យាយាមបញ្ឆោតអ្នកឱ្យផ្តល់ពាក្យសម្ងាត់ ព័ត៌មានគណនីធនាគារ ឬព័ត៌មានចូលប្រើប្រាស់ឧបករណ៍ធីជីថលរបស់អ្នក ដើម្បីពួកគេដំឡើងកម្មវិធីមេរោគដែលអាចទាញយកនូវអ្វីៗទាំងអស់ចេញពីឧបករណ៍ឌីជីថលរបស់អ្នក៕

The post តើ Hacker លួចចូលក្នុងទូរសព្ទ ឬកុំព្យូទ័ររបស់អ្នកបានដោយរបៀបណា? appeared first on Kampuchea Thmey Daily.

លោក Rim Jong Hyok ត្រូវបានរងការចោទប្រកាន់ដោយគណៈវិនិច្ឆ័យនៅទីក្រុង Kansas រដ្ឋ Kansas ពីបទលាងលុយកខ្វក់តាមរយៈធនាគារចិន បន្ទាប់មកប្រើប្រាស់លុយទាំងនោះដើម្បីទិញម៉ាស៊ីនមេកុំព្យូទ័រ និងផ្តល់ជំនួយដល់ការវាយប្រហារតាមអ៊ីនធឺណិតបន្ថែមទៀតលើវិស័យការពារជាតិ បច្ចេកវិទ្យា និងអង្គភាពរដ្ឋាភិបាលជុំវិញពិភពលោក។

ក្រុមមន្ត្រីអាមេរិកបានឲ្យដឹងថា ការចូល​លួចយកព័ត៌មានពីមន្ទីរពេទ្យអាមេរិក និងកន្លែងផ្ដល់សេវាថែទាំសុខភាពផ្សេងទៀត​បានរំខានដល់ការព្យាបាលអ្នកជំងឺ ហើយថែមទាំងទាមទារយកប្រាក់លោះទៀតផង។ លោកត្រូវបានចោទប្រកាន់ថាបានកំណត់គោលដៅលើអង្គភាពចំនួន១៧នៅរដ្ឋ​​ចំនួន១១​របស់សហរដ្ឋអាមេរិក រួមទាំងអង្គការណាសា និងមូលដ្ឋានទ័ពអាមេរិក ក៏ដូចជាក្រុមហ៊ុនការពារជាតិ និងថាមពលនៅក្នុងប្រទេសចិន តៃវ៉ាន់ និងកូរ៉េខាងត្បូង​ជាដើម​។

លើសពីនេះក៏មានការចោទប្រកាន់សមាជិកផ្សេងទៀតនៃអង្គភាព Andariel នៃការិយាល័យត្រួតពិនិត្យទូទៅរបស់ប្រទេសកូរ៉េខាងជើងដែលបានចូលប្រើប្រព័ន្ធកុំព្យូទ័ររបស់ ​អង្គការ​ណាសា ដោយទាញយកទិន្នន័យផ្សេងៗ ថែមទាំងលួចចូលដល់ខាងក្នុងប្រព័ន្ធកុំព្យូទ័ររបស់ក្រុមហ៊ុនការពារជាតិនៅរដ្ឋ Michigan និង California ក៏ដូចជាមូលដ្ឋានទ័ពអាកាស Randolph នៅរដ្ឋតិចសាស់ និងមូលដ្ឋានទ័ពអាកាស Robins ក្នុងរដ្ឋ Georgia។

ជាមួយគ្នានេះមន្ត្រី FBI ជាន់ខ្ពស់មួយរូបបានឲ្យដឹងថា ក្រុមឧក្រិដ្ឋកម្មអ៊ីនធឺណិតទាំងនោះស្វែងរកព័ត៌មានលម្អិតអំពីយន្តហោះចម្បាំង ប្រព័ន្ធការពារមីស៊ីល ប្រព័ន្ធទំនាក់ទំនងផ្កាយរណប និងប្រព័ន្ធរ៉ាដា។ ចំណែកកំណត់ត្រារបស់តុលាការបានឲ្យដឹងថា លោក Rim ធ្លាប់រស់នៅក្នុងប្រទេសកូរ៉េខាងជើង និងធ្វើការនៅការិយាល័យរបស់ទីភ្នាក់ងារចារកម្មយោធាទាំងនៅក្នុងទីក្រុងព្យុងយ៉ាង និង ទីក្រុង Sinuiju ។ FBI ក៏នឹងផ្ដល់រង្វាន់រហូតដល់១០លានដុល្លារជូនចំពោះអ្នកដែលផ្ដល់ព័ត៌មាននាំទៅដល់ការចាប់ខ្លួនលោក Rim ឬប្រតិបត្តិកររដ្ឋាភិបាលបរទេសផ្សេងទៀតដែលកំណត់គោលដៅសំខាន់លើហេដ្ឋារចនាសម្ព័ន្ធរបស់សហរដ្ឋអាមេរិក។

គួរបញ្ជាក់ថាក្រសួងយុត្តិធម៌អាមេរិកបានកាត់ទោសករណីជាច្រើនដែលទាក់ទងនឹងការចូលលួចព័ត៌មានរបស់កូរ៉េខាងជើង។ ជាឧទាហរណ៍ ក្នុងឆ្នាំ ២០២១ តុលាការអាមេរិកបានចោទប្រកាន់​អ្នក​បង្កើត​កម្មវិធី​កុំព្យួទ័រ (computer programmer) ៣នាក់របស់​កូរ៉េខាងជើងក្នុងការ​ចូល​លួចព័ត៌មានជាច្រើន រួមទាំងការវាយប្រហារបំផ្លិចបំផ្លាញដែល​ផ្តោត​លើស្ទូឌីយោភាពយន្តអាមេរិក និងការប៉ុនប៉ងលួច និងជំរិតយកប្រាក់ជាង ១,៣ពាន់លានដុល្លារពីធនាគារ និងក្រុមហ៊ុនជុំវិញពិភពលោក៕

អត្ថបទ៖ ប៊ុន សុភាព

The post FBI ប្រកាស​ផ្ដល់រង្វាន់១០លានដុល្លារដល់អ្នកផ្ដល់ព័ត៌មាន​នាំ​ទៅ​ចាប់​ខ្លួន​បុរសជនជាតិកូរ៉េ​ខាង​ជើងម្នាក់ appeared first on Kampuchea Thmey Daily.

យោងតាមសារព័ត៌មាន vnexpress ដោយដកស្រង់នូវសម្ដីរបស់សមាគមសន្តិសុខព័ត៌មានវៀតណាមបាននិយាយថា ការអនុវត្តបច្ចេកវិទ្យាអ៊ីនធឺណិតបាននាំមកនូវអត្ថប្រយោជន៍ជាច្រើន ប៉ុន្តែវាក៏បានធ្វើឲ្យអាជីវកម្ម និងស្ថាប័នក្លាយជាគោលដៅចម្បងសម្រាប់ពួក Hacker ទាំងក្នុង និងក្រៅប្រទេស។ មាត្រដ្ឋាននៃការវាយប្រហារបែបនេះកាន់តែធំឡើង សំដៅទៅលើអាជីវកម្ម និងស្ថាប័នសំខាន់ៗដូចជាក្រុមហ៊ុនថាមពល ធនាគារ ទីផ្សារភាគហ៊ុន ក្រុមហ៊ុនផ្តល់សេវាទូរគមនាគមន៍ ក្រុមហ៊ុនប្រេង និងសូម្បីតែបណ្តាញហេដ្ឋារចនាសម្ព័ន្ធវេជ្ជសាស្រ្ត។

នាយកដ្ឋានសន្តិសុខតាមអ៊ីនធឺណិត និងទប់ស្កាត់ឧក្រិដ្ឋកម្មដោយប្រើបច្ចេកវិទ្យាខ្ពស់ ក្រោមក្រសួងសន្តិសុខសាធារណៈ បាននិយាយថា ការវាយប្រហារផ្នែកសន្តិសុខតាមអ៊ីនធឺណិតកាន់តែស្មុគស្មាញ ទោះបីជាវិធីសាស្ត្រនៃការវាយប្រហារបែបនេះជាធម្មតាចែករំលែកស្រដៀងគ្នាក៏ដោយ។ ការវាយប្រហារបែបនេះអាចរំខានដល់ប្រតិបត្តិការ និងប្រតិបត្តិការទាំងមូល ហើយនាំទៅដល់ការលួចនូវព័ត៌មានរសើប ដែលមិនអាចយកមកវិញបានយ៉ាងងាយស្រួល។

ប៉ូលិសបាននិយាយថា ក្នុងពេលខាងមុខនេះ ពួក Hacker នឹងបន្តបើកការវាយប្រហារសំដៅទៅលើស្ថាប័នសេដ្ឋកិច្ច ហិរញ្ញវត្ថុ និងថាមពល។ ការវាយប្រហារអាចមានភាពស្មុគ្រស្មាញ ហើយកូដព្យាបាទអាចនឹងត្រូវបានបង្កប់នៅក្នុងប្រព័ន្ធតាំងពីយូរយារណាស់មកហើយ។

លើសពីនេះទៀតដែរ សមាគមបាននិយាយបន្ថែមទៀតថា ចំណុចខ្សោយមួយនៃប្រព័ន្ធព័ត៌មានភាគច្រើនគឺកង្វះការយល់ដឹងអំពីសារៈសំខាន់នៃសន្តិសុខតាមអ៊ីនធឺណិត ក៏ដូចជាសមត្ថភាពទាបក្នុងការឆ្លើយតប និងដោះស្រាយបញ្ហានៅពេលមានបញ្ហាកើតឡើង។ ប្រព័ន្ធព័ត៌មានសំខាន់ៗមួយចំនួនមិនត្រូវបានគ្រប់គ្រងក្នុងលក្ខណៈសំរបសំរួលទេ ហើយជាច្រើនមិនត្រូវបានត្រួតពិនិត្យ ឬវាយតម្លៃជាប្រចាំ ដែលនាំឲ្យមានភាពងាយរងគ្រោះជាច្រើន។

អង្គការ និងអាជីវកម្មគួរតែពិនិត្យ និងវាយតម្លៃប្រព័ន្ធព័ត៌មានរបស់ពួកគេ និងជូនដំណឹងដល់អាជ្ញាធរនៅពេលមានបញ្ហាកើតឡើង សមាគមបានណែនាំ។ អង្គការ​ក៏​មិន​គួរ​បង់​ថ្លៃ​លោះ​ដល់​ពួក Hacker ដើម្បី​ការពារ​គំរូ​អាក្រក់​ដែរ។

សូមបញ្ចាក់ដែរថា កាលពីមុននៅថ្ងៃទី ២៤ ខែមីនា ឈ្មួញកណ្តាលមូលបត្រ VNDirect បានទទួលការវាយប្រហារតាមអ៊ីនធឺណិតពីអង្គការអន្តរជាតិ ដែលបានអ៊ិនគ្រីបទិន្នន័យទាំងអស់របស់ខ្លួន និងធ្វើឲ្យស្ថាប័ននេះពិការអស់ជាច្រើនថ្ងៃ។ នៅថ្ងៃទី ០២ ខែមេសា សាជីវកម្មប្រេង PetroVietnam (PVOil) បាននិយាយថា ទិន្នន័យរបស់ខ្លួនក៏ត្រូវបានអ៊ិនគ្រីបផងដែរ ដែលធ្វើឲ្យប្រព័ន្ធព័ត៌មានរបស់វាចុះខ្សោយ៕

អត្ថបទ៖ សាង ស្រីល័ក្ខ

ចុចអាន៖ប៉ូលិស វៀតណាម រកឃើញគ្រឿងញៀនដែលដាក់ GPS ក្នុងសមុទ្រ ជាវិធីសាស្រ្តថ្មីរបស់ក្រុមឧក្រិដ្ឋជន

The post ប៉ូលិស វៀតណាម ថា ពួក Hacker ផ្តោតលើស្ថាប័នសំខាន់ៗ ៣ ក្នុងប្រទេស appeared first on Kampuchea Thmey Daily.

នៅពេលនេះ កម្ពុជាថ្មី សូមណែនាំគន្លឹះខ្លះៗ ដើម្បីទប់ស្កាត់ហនិភ័យខាងលើបានទាន់ពេលវេលា។

១. ផ្លាស់ប្តូរលេខ/ពាក្យសម្ងាត់ភ្លាមៗ
ជាទូទៅ យើងនឹងអាចដឹងបាន តាមរយៈការកំណត់មុខងារសុវត្ថិភាពមួយចំនួន។ បើសិនជាមានអ្នកកំពុងព្យាយាមធ្វើ សកម្មភាពអ្វីមួយលើកម្មវិធីទូរសព្ទដៃ នោះវានឹងលោត notification ពីកម្មវិធីទាំងនោះ ឬ Email ហើយទាមទារឱ្យ យើង Verify ខណៈយើងមិនបានធ្វើអ្វីសោះ។ បើសិនជាបែបនេះ មិនអាចបង្អង់យូរបានទេ ត្រូវផ្លាស់ប្តូរលេខសម្ងាត់ ភ្លាមៗ តែលេខឬពាក្យសម្ងាត់នោះ មិនត្រូវងាយឱ្យគេទាយដឹងពេកនោះទេ ត្រូវបង្កើត Strong Password (ឧទាហរណ៍: Stangystingy@05!79#23) ។

២. ដំណើរការកម្មវិធីប្រឆាំងមេរោគ
សម្រាប់មធ្យោបាយមួយនេះ មុននឹងដំឡើងកម្មវិធីតាមដានមេរោគក្នុងទូរសព្ទដៃ ត្រូវប្រាកដថា កម្មវិធីប្រឆាំងមេរោគ ដែលយើងគ្រោងនឹងដំឡើង មានសុវត្ថិភាព និងអាចទុកចិត្តបាន ហើយកម្មវិធីនោះមិនមែនជាកម្មវិធីដែលតាមដាន និងប្រមូលទិន្នន័យអ្នកប្រើប្រាស់។ ដើម្បីដឹងថា កម្មវិធីនោះអាចឱ្យយើងទុកចិត្តបានឬអត់ គប្បីអានលក្ខខណ្ឌរបស់គេ ឱ្យបានច្បាស់លាស់។

៣. លុបកម្មវិធីដែលសង្ស័យចេញភ្លាម
ត្រូវចាប់អារម្មណ៍ពីកម្មវិធីថ្មីៗមួយចំនួន (Mobile App) ដែលយើងបានដំឡើងក្នុងប្រព័ន្ធទូរសព្ទដៃ។ បើសិនជាសង្ស័យ ថា កើតមានភាពមិនប្រក្រតី ក្រោយដំឡើងកម្មវិធីណាមួយហើយ ត្រូវលុបកម្មវិធីនោះចោលភ្លាម។

៤. ប្រាប់ដំណឹងនេះដល់អ្នកស្និតស្នាល
មានច្រើនករណីមកហើយ ដែលជនអនាមិក បានប្រើប្រព័ន្ធបច្ចេកវិទ្យាគ្រប់គ្រងលើបណ្តាញទំនាក់ទំនងសង្គម របស់ជន ងាយរងគ្រោះ ដើម្បីយកទៅបោកប្រាស់ដូចជាការខ្ចីលុយ ឬផ្សេងៗទៀត ជាមួយនឹងមិត្តភក្តិ ឬសាច់ញាតិ ម្ចាស់គណនី។

គួររំលឹកថា Hacker មិនចេះតែអាចចូលលួចទិន្នន័យរបស់នរណាម្នាក់បានតាមចិត្តទេ។ មុននឹងឈានដល់ដំណាក់កាល ទៅគ្រប់គ្រងទូរសព្ទនរណាបាន គឺផ្តើមចេញពីភាពធ្វេសប្រហែសរបស់ខ្លួនយើងផ្ទាល់ ដូចជាការដំឡើងកម្មវិធីផ្តេសផ្តាស ប្រើអ៉ីនធឺណិតសាធារណៈ ចែកចាយទិន្នន័យផ្ទាល់ខ្លួនទៅអ្នកដទៃច្រើនពេក ឬភាពធ្វេសប្រហែសជាច្រើនផ្សេងទៀត។ មួយវិញទៀត ដើម្បីការពារលើសុវត្ថិភាពនៃការប្រើប្រាស់ ដាច់ខាតកុំបើកមុខងារអ៉ិនធឺណិត និង Wi-Fi ចោល នៅពេលមិនប្រើ៕

The post គួរធ្វើម៉េច បើសង្ស័យថា មានគេកំពុងព្យាយាមគ្រប់គ្រងទូរសព្ទដៃរបស់យើង? appeared first on Kampuchea Thmey Daily.

តាមរយៈ Wifi តើជនអានាមិក អាចមើលទិន្នន័យរបស់យើងបានដោយរបៀបម៉េច?
បើតាមលោក អ៊ូ ផាន់ណារិទ្ធ ប្រធាននាយកដ្ឋានសន្តិសុខបច្ចេកវិទ្យាគមនាគមន៍ និងព័ត៌មានវិទ្យា នៃក្រសួងប្រៃសណីយ៍ និងទូរគមនាគមន៍ ពន្យល់ថា របៀបដែលពួកជនទុច្ចរិតចាប់ផ្តើមសកម្មភាព គឺអាចផ្តើមចេញពីការចេតនាដោយប្រយោល ពោលគឺមិនសំដៅលើបុគ្គលណាម្នាក់ឡើយ ប៉ុន្តែគេនឹងកំណត់គោលដៅក្រោយតាមដានដឹងទិន្នន័យរបស់បុគ្គលនោះ។

លោកលើកឧទាហរណ៍ថា ជាទូទៅ នៅតាមហាងកាហ្វេ ឬទីសាធារណៈផ្សេងៗ ដែលយើងកំពុងនៅ ក៏អាចមានជនទុច្ចរិត អង្គុយក្នុងចំណោមនោះផងដែរ ហើយយើងក៏មិនអាចកំណត់អត្តសញ្ញាណរបស់ពួកគេបានដែរ។ មួយក្នុងចំណោមមធ្យោបាយដែលជនទុច្ចរិតប្រើប្រាស់ គឺគេបង្កើតប្រព័ន្ធ wifi មួយដែលប្រើឈ្មោះតាមទីតាំងនោះ ឧទាហរណ៍​ថា wifi របស់ហាងនោះឈ្មោះថា “ Cafe ” អ៉ីចឹង ជនទុច្ចរិតអាចបង្កើត​ប្រព័ន្ធ wifi មួយទៀត ដោយដាក់ថា “ Cafe 1” ឬ ដូចគ្នាតែម្តង ដោយគ្រាន់តែប្រើប្រាស់អក្សរតូចធំ។ ប្រការនេះ អាចធ្វើឱ្យយើងកើតមានការភ័ន្តច្រឡំ ចូលប្រើប្រាស់ wifi របស់​ជនទុច្ចរិត ហើយគេអាចតាមដានទិន្នន័យផ្ទាល់ខ្លួនយើងបាន។

ជំហានបន្ទាប់ ក្រោយពេលដែលជនទុច្ចរិត បានដឹងព័ត៌មាន​លម្អិត​ផ្ទាល់ខ្លួនយើងរួចហើយ ជននោះ អាចនឹង​ប្រើ​មធ្យោបាយ​ផ្សេងៗបោកបន្លំយើង ឬអាចដឹង សូម្បីតែការរក្សាទុកលេខសម្ងាត់របស់យើង (បើសិនជាយើងមានទម្លាប់ រក្សាទុកលេខសម្ងាត់លើកុំព្យូទ័រ ឬទូរស័ព្ទដៃ)។ លើសពីនេះ បើសិនជាប្រព័ន្ធបច្ចេកវិទ្យា​ “ទូរស័ព្ទដៃ” ដែលយើងប្រើប្រាស់ មានកម្មវិធីរបស់ធនាគារ ឬប្រព័ន្ធបណ្តាញទំនាក់ទំនងសង្គមជាដើមនោះ ហើយ​មិនបានកំណត់មុខងារការពារសុវត្ថិភាព ជនទុច្ចរិតនឹងយកទៅគ្រប់គ្រងបានដោយងាយ។

បើតាមប្រធាននាយកដ្ឋានសន្តិសុខបច្ចេកវិទ្យាគមនាគមន៍ និងព័ត៌មានវិទ្យា ដើម្បីប្រើប្រាស់ប្រព័ន្ធ wifi ប្រកបដោយសុវត្ថិភាព លោកណែនាំឱ្យមុននឹងចុចចូលទៅប្រើប្រាស់ប្រព័ន្ធ wifi នោះ ត្រូវបញ្ជាក់ជាមួយបុគ្គលិកនៅទីតាំងនោះសិន ឬមើលលើកន្លែងណាដែលហាងគេបានបិទបញ្ជាក់ឈ្មោះ wifi ប្រចាំទីតាំងរបស់គេ ចៀសវាងចុចចូលប្រើប្រាស់ប្រព័ន្ធ wifi ជនអនាមិកដោយមិនដឹងខ្លួន៕

The post អ្នកជំនាញបង្ហើបថា ជនអនាមិក អាចមើលទិន្នន័យរបស់យើងបាន តាមរយៈ wifi សាធារណៈ appeared first on Kampuchea Thmey Daily.

១ រក្សាទូរស័ព្ទឲ្យ​មាន​សុវត្ថិភាព យើងអាចកាត់បន្ថយហានិភ័យពីមេរោគទាំងនោះបាន ដោយ​ត្រូវ​ប្រាកដថា ​ទូរសព្ទរបស់​យើង​ប៉ះតែមនុស្សដែល​យើងទុកចិត្ត​ និងស្គាល់គេច្បាស់​ប៉ុណ្ណោះ។ បើមានមនុស្សណាម្នាក់​ មានបំណង​​ចង់​ធ្វើចារកម្មនៅលើទូរស័ព្ទដោយមិនប៉ះវា នោះជារឿង​លំបាក​ណាស់ ក្នុងការដំឡើង spyware ដោយមិនបានប្រើទូរស័ព្ទ យើងផ្ទាល់។

២ ត្រូវមានលេខកូដពេលចូលប្រើ វិធីនេះងាយៗ មិនពិបាក គ្រាន់តែចាក់សោទូរស័ព្ទ​របស់អ្នក ដោយប្រើពាក្យសម្ងាត់ កូដ PIN ឬស្នាមក្រយ៉ៅដៃ​ ដែល​មានសុវត្ថិភាព​បំផុត ហើយបើកការផ្ទៀងផ្ទាត់សម្រាប់​ការដំឡើង​កម្មវិធី​ផ្សេងៗ។

៣ ដំឡើងតែកម្មវិធីដែលទុកចិត្តប៉ុណ្ណោះ នៅពេល​ជ្រើសរើសកម្មវិធីនៅក្នុង App Store រកមើលកម្មវិធីដែលអាចទុកចិត្ត​បាន ជាមួយ​នឹងមូលដ្ឋានអ្នកប្រើប្រាស់ដែលបានបង្កើតឡើង​យ៉ាងល្អ​ និងមានការធានាច្បាស់លាស់។ សូមប្រយ័ត្នជាពិសេស ជាមួយកម្មវិធីសាមញ្ញដូចជាម៉ាស៊ីនគិតលេខ ដែលអាចត្រូវបានដាក់​បញ្ចូលគ្នា​យ៉ាងរហ័ស ដើម្បីលាក់ spyware ។ ដូចដែលយើងបានឃើញជាមួយនឹងកម្មវិធី VPN ឥតគិតថ្លៃ ការ​ទាញយកច្រើន និងការវាយតម្លៃរបស់អ្នកប្រើប្រាស់​ល្អ មិនមែនជា​សញ្ញានៃ​ការជឿ​ទុកចិត្តបំផុត​នោះ​ទេ។

៤ ប្រយ័ត្នជាមួយតំណចូល មធ្យោបាយងាយស្រួលបំផុតរបស់ក្រុម hacker ក្នុងការដំឡើង spyware ពីចម្ងាយ គឺបញ្ចុះបញ្ចូលម្ចាស់ទូរស័ព្ទឲ្យ​ដំឡើងវា។ ក្នុងឧទាហរណ៍មួយ មនុស្សនៅក្នុងប្រទេសវៀតណាម​ ត្រូវបានផ្ញើតំណភ្ជាប់ទៅកាន់កម្មវិធី​ដែលត្រូវបានសម្របសម្រួល​នៅក្នុង Google Play Store ហើយបានបញ្ចុះបញ្ចូល​ឲ្យ​ទាញយកពួកវា។ ដោយសារតែកម្មវិធីមាននៅក្នុងហាងផ្លូវការ អ្នកប្រើប្រាស់ជាច្រើន​បានជឿជាក់ខ្លាំង។ សូមប្រយ័ត្នជាមួយសារ SMS ដែលមិននឹកស្មានដល់មួយចំនួន ព្រោះពួកវាធ្លាប់បានប្រើដើម្បីធ្វើឲ្យ​គាំង iPhone និងជ្រៀតចូលទូរស័ព្ទ Android បានយ៉ាងរហ័ស។

៥ ធានាសុវត្ថិភាពទិន្នន័យ ប្រើពាក្យសម្ងាត់ដ៏រឹងមាំ​ និងមិនងាយ​មានអ្នកណា hack យកបានសម្រាប់គណនី អនឡាញរបស់យើង​ទាំងអស់។ ប្រសិនបើមានមនុស្ស​ណាម្នាក់ ស្គាល់​ពាក្យ​សម្ងាត់ iCloud របស់​អ្នក ពួកគេអាចចូលប្រើទិន្នន័យពីចម្ងាយក្នុងទូរស័ព្ទរបស់​យើង ​ដោយ​ប្រើ​ដំណោះស្រាយ​ដូចជា Cocospy ជាដើម ។

៦ កុំ jailbreak ឬ root លើទូរស័ព្ទផ្ដេសផ្ដាស វានឹងមានសុវត្ថិភាពជាង ប្រសិនបើឧបករណ៍របស់អ្នកដំណើរការទាំងស្រុង ​នៅក្នុងការការពារនៃប្រព័ន្ធប្រតិបត្តិការ Android និង iOS ។ Spyware អាច​ត្រូវ​បាន​ដំឡើង​យ៉ាង​ងាយ​ស្រួល​ជាង​មុន​ នៅ​លើ​ទូរស័ព្ទ​ដែល​បាន​ចាក់​ឬស និង​ jailbreak ហើយ​ឧបករណ៍​របស់​អ្នក​ អាច​ងាយ​នឹង​មាន​មេរោគ។ ដូច្នេះកុំចេះតែធ្វើអីលើទូរស័ព្ទផ្ដេសផ្ដាស​​ ប្រសិនបើយើងមិនស្គាល់ ឬដឹងច្បាស់ ពីប្រភពនោះច្បាស់ការនោះទេ។

៧ ទូរស័ព្ទត្រូវអាប់ដេតជានិច្ច ការអាប់ដេតទៅលើប្រព័ន្ធប្រតិបត្តិការរបស់ទូរស័ព្ទដៃ​ អាចធ្វើឲ្យសុវត្ថិភាពប្រសើរឡើងដោយលុបគុណវិបត្តិដែលត្រូវបានរកឃើញ​ ចាប់តាំងពីការធ្វើបច្ចុប្បន្នភាពចុងក្រោយ។ ការអាប់ដេត iOS បានទាន់ពេល នឹងត្រូវបាន​ការពារពីក្រុមហ៊ុន Apple ប្រសិនបើវាត្រូវបាន Jailbreak ពីមុនមក។

៨ គ្រប់គ្រងការអនុញ្ញាត និងតឹងរ៉ឹង​លើ​ទូរស័ព្ទ កុំផ្តល់ការអនុញ្ញាត​ឲ្យ​កម្មវិធីប្រើប្រាស់ទីតាំងរបស់​យើង ឬចូលប្រើរូបថត​ដោយគ្មានហេតុផល។ សូមប្រយ័ត្នជាមួយកម្មវិធីផ្លូវការមួយចំនួន ក៏ជានុយទាក់អ្នកនិយមប្រើស្មាតហ្វូននាសម័យនេះដែរ។ កម្មវិធី Find My Friends នៅលើ iPhone អាចត្រូវបានប្រើដើម្បីកំណត់ទីតាំងមនុស្ស និងឧបករណ៍ ហើយកម្មវិធី Find My Device និង Family Link របស់ Google ធ្វើដូចគ្នានៅលើ Android ៕

ប្រែសម្រួល៖ សាង ស្រីល័ក្ខ

ចុចអាន៖លេចសញ្ញាទាំងនេះ បញ្ជាក់ថា Hacker កំពុងធ្វើចារកម្មលើទូរស័ព្ទអ្នកហើយ

ចុចអាន៖លក្ខខណ្ឌសុវត្ថិភាពតាមអ៊ីនធឺណិតសំខាន់ៗទាំង ២០ គ្រប់គ្នាគួរដឹងក្នុងសម័យឌីជីថលនេះ

The post មិនចង់ឲ្យ Hacker លួចយកទិន្នន័យបាន ប្រញាប់ប្រើវិធីនេះ លើទូរស័ព្ទភ្លាម appeared first on Kampuchea Thmey Daily.