យោងតាមការបញ្ជាក់របស់លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលសាលារាជធានីភ្នំពេញនាយប់ថ្ងៃទី៦ ខែមិថុនា ឆ្នាំ២០២៦ បានឱ្យដឹងថា លោក ឯក ឃុនដឿន អភិបាលរងរាជធានី បានដឹកនាំក្រុមការងារដោយសហការជាមួយគណៈបញ្ជាការឯកភាពខណ្ឌចំការមន បានចុះត្រួតពិនិត្យ និងបង្ក្រាបទីតាំងល្បែងស៊ីសងខុសច្បាប់ចំនួន ៦ទីតាំង ស្ថិតនៅតំបន់ផ្សារចិន ផ្លូវលេខ៧៨ ក្នុងសង្កាត់ទន្លេបាសាក់ ខណ្ឌចំការមន។

ក្នុងប្រតិបត្តិការនោះ សមត្ថកិច្ចបានឃាត់ខ្លួនជនបរទេសចំនួន ២នាក់ ដែលស្នាក់នៅដោយគ្មានលិខិតឆ្លងដែនត្រឹមត្រូវ ដើម្បីចាត់វិធានការតាមនីតិវិធីច្បាប់។

លោកស្រី ដោ សម្ផស្ស បានបន្ថែមថា ក្រោមការយកចិត្តទុក អភិបាលរាជធានីភ្នំពេញ បានណែនាំដល់ប្រធានគណៈបញ្ជាការឯកភាពរដ្ឋបាលខណ្ឌទាំង១៤ ត្រូវតែបន្តបំពេញការងារព្រមៗគ្នាដោយប្ដេជ្ញាថា នឹងលុបបំបាត់ឱ្យអស់នូវរាល់បទល្មើសផ្សេងៗ រាប់ទាំងល្បែងស៊ីសងគ្រប់ប្រភេទ ជាពិសេសបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ក្នុងមូលដ្ឋានរបស់ខ្លួន។

ដោយឡែក សម្រាប់ខណ្ឌទួលគោក នៅថ្ងៃទី៦ ខែមិថុនា ឆ្នាំ២០២៦ ដោយអនុវត្តតាមអនុក្រឹត្យលេខ០៣ អនក្រ.បក និងបទបញ្ជារបស់រាជរដ្ឋាភិបាល និងក្រោមការដឹកនាំរបស់អភិបាលរាជធានីភ្នំពេញ, លោក ជា ពិសី អភិបាល នៃគណៈអភិបាលខណ្ឌ និងជាប្រធានគណៈបញ្ជាការឯកភាពរដ្ឋបាលខណ្ឌទួលគោក បានដឹកនាំ និងប្រគល់ភារកិច្ចជូនគណៈអភិបាលខណ្ឌ ដឹកនាំកម្លាំងចុះរដ្ឋបាល និងស្រង់ស្ថិតិជនបរទេសនៅតាមបុរី សណ្ឋាគារ ខុនដូ អាផាតមិន ការដ្ឋានសំណង់ អគារស្នាក់នៅរួម ផ្ទះសំណាក់ និងផ្ទះជួល ។

ប្រតិបត្តិការនេះបានចុះត្រួតពិនិត្យទីតាំងសរុបចំនួន ១៥កន្លែង តាមសង្កាត់ទាំង១០ និងរកឃើញជនបរទេសស្នាក់នៅសរុប ៥៣នាក់ ក្នុងនោះស្ត្រី ៤២នាក់ និងចំនួន ៥សញ្ជាតិផ្សេងគ្នា។ ឯការត្រួតពិនិត្យបង្ហាញថា ជនបរទេសទាំងអស់នោះមានលិខិតឆ្លងដែន និងទិដ្ឋាការត្រឹមត្រូវ៕ អត្ថបទ៖ ស្រីរ័ត្ន

The post អាជ្ញាធរមូលដ្ឋានខណ្ឌចំការមន-ទួលគោក បន្តបង្ក្រាបបទល្មើសបច្ចេកវិទ្យា រកឃើញជនបរទេសជាង ៥០នាក់ និងទីតាំងល្បែងស៊ីសងចំនួន ៦ appeared first on Kampuchea Thmey Daily.

យោងតាមរបាយការណ៍បិទបញ្ចប់ការស៊ើបអង្កេតរបស់សមត្ថកិច្ចខេត្តព្រះសីហនុ បានឱ្យដឹងថា ក្រុមមេខ្លោងជនជាតិចិនទាំង៤នាក់នេះ ទី១-ឈ្មោះ DENG BING អាយុ៣៦ឆ្នាំ មុខរបរថៅកែកាស៊ីណូយីងហ័ង ។ ទី២-ឈ្មោះ DENG HUI អាយុ៣៩ឆ្នាំ មុខរបរអាជីវករ។ ទី៣-ឈ្មោះ WANG YU អាយុ៣៣ឆ្នាំ មុខរបរអ្នកគ្រប់គ្រងសន្ដិសុខកាស៊ីណូយីងហ័ង និង៤-ឈ្មោះ XU CHONG BAO ហៅក្រៅ WEN BO អាយុ២៩ឆ្នាំ មុខរបរ មេក្រុម បុគ្គលិកអនឡាញ។

ជនសង្ស័យខាងលើត្រូវបានរកឃើញថាបានពាក់ព័ន្ធនឹងការរៀបចំ និងដឹកនាំមជ្ឈមណ្ឌលឆបោកតាមប្រព័ន្ធបច្ចេកវិទ្យា កាន់កាប់ និងរក្សាទុកអាវុធខុសច្បាប់ រក្សាទុកនូវសារធាតុញៀន និងបទល្មើសសម្អាតប្រាក់ជាដើម។

ក្នុងប្រតិបត្តិការបង្ក្រាបនេះ សមត្ថកិច្ចបានដកហូតវត្ថុតាងជាច្រើន រួមមានកុំព្យូទ័រចំនួន ៩២៥គ្រឿង, អាវុធខ្លីម៉ាក Glock 19 មួយដើមពណ៌ខ្មៅ (លេខ X4YKZG1YS01-2202043), គ្រាប់កាំភ្លើង ១០គ្រាប់ (ជាន់ទី១៣ ភ្លុងចោល), ព្រមទាំងសារធាតុញៀនជាច្រើនប្រភេទ ដូចជាប្រភេទម្សៅក្រាមពណ៌សថ្លា មេតំហ្វេតាមីន (MET) ទម្ងន់សុទ្ធ ១៥.០៥ ក្រាម, អុិចស្តាស៊ី (MDMA) ទម្ងន់សុទ្ធ ២២០.៧៧ ក្រាម និងកេតាមីន (KET) ទម្ងន់សុទ្ធ ១៣៩.៤៨ ក្រាម និងវត្ថុតាងមួយចំនួនទៀត។

ពាក់ព័ន្ធករណីនេះ រហូតមកដល់ថ្ងៃទី៣០ ខែឧសភា ឆ្នាំ២០២៦ ដោយមានការអនុញ្ញាតពីតំណាងអយ្យការអមសាលាដំបូងខេត្ដ កម្លាំងជំនាញបានអនុវត្តនីតិវិធីបញ្ជូនជនជាតិចិនចំនួន ៦០នាក់ (ភេទប្រុស) ទៅកាន់អគ្គនាយកដ្ឋានអន្តោប្រវេសន៍ ខេត្ដតាកែវ ដើម្បីបណ្តេញចេញពីព្រះរាជាណាចក្រកម្ពុជា។

គួរបញ្ជាក់ដែរថា កាលពីថ្ងៃទី២៨ ខែឧសភា ឆ្នាំ២០២៦ គណៈកម្មការគ្រប់គ្រងល្បែងពាណិជ្ជកម្មកម្ពុជា (គ.ល.ក.) បានសម្រេចដកហូតអាជ្ញាបណ្ណប្រតិបត្តិការរបស់កាស៊ីណូ «យីងហ័ង» នៅខេត្តព្រះសីហនុ បន្ទាប់ពីរកឃើញការពាក់ព័ន្ធនឹងអំពើឆបោកអនឡាញ ការរក្សាទុកអាវុធ និងសារធាតុញៀនខុសច្បាប់។

បើតាមលេខាធិការដ្ឋានគណៈកម្មការចំពោះកិច្ច ប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) បញ្ជាក់ថា ក្នុងរយៈពេលប្រមាណ ១១ខែចុងក្រោយ ពោលគឺគិតចាប់ពីខែកក្កដា ឆ្នាំ២០២៥ ដល់ថ្ងៃទី២០ ខែឧសភា ឆ្នាំ២០២៦ សមត្ថកិច្ចកម្ពុជាក្នុងរាជធានី-ខេត្ត បានបង្ក្រាបករណីឆបោកតាមប្រព័ន្ធបច្ចេកវិទ្យាជាង ៤០០ករណី។ ក្នុងនោះ សមត្ថកិច្ចក៏បានអនុវត្តច្បាប់ ដោយបានដកហូត និងព្យួរអាជ្ញាប័ណ្ណ កាស៊ីណូចំនួន ២៥ ទីតាំងពាក់ព័ន្ធនឹងការឆបោកអនឡាញ ដើម្បីបញ្ឈប់មិនឱ្យមានសកម្មភាពអាជីវកម្មទៀតឡើយ។

ក្នុងរយៈពេលដូចគ្នានេះ សមត្ថកិច្ចក៏បានកសាងសំណុំរឿងបញ្ជូនទៅតុលាការចំនួន ១៤៣សំណុំរឿង/ករណី ពាក់ព័ន្ធជនសង្ស័យសរុប ១,៤៥៨នាក់ មានស្ត្រីចំនួន ២០១នាក់ដែលមាន ១៩សញ្ជាតិផ្សេងគ្នា គឺជនជាតិចិន, ម៉ាឡេស៊ី, ជប៉ុន, បង់ក្លាដេស, កូរ៉េខាងត្បូង, វៀតណាម, ឥណ្ឌូនេស៊ី, ថៃ, នេប៉ាល់, ឥណ្ឌា, ប៉ាគីស្ថាន, សិង្ហបុរី, មីយ៉ាន់ម៉ា, ហ្វីលីពីន, ម៉ុងហ្គោលលី, កៀហ្សីស៊ីស្ថាន, ស្រីលង្កា, ឡាវ និងខ្មែរផងដែរ។

ក្នុងយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យាទូទាំងប្រទេស ចាប់ពីខែមករា ឆ្នាំ២០២៥ ដល់ថ្ងៃទី២៤ ខែឧសភា ឆ្នាំ២០២៦ សមត្ថកិច្ចកម្ពុជាបានអនុវត្តនីតិវិធីបណ្តេញជនបរទេសពាក់ព័ន្ធនឹងបទល្មើសឆបោកអនឡាញសរុប សរុបចំនួន ១៨ ៨៦៤នាក់ ក្នុងនោះមានស្ត្រីចំនួន ២ ២៦៣នាក់ មាន ៣៣សញ្ជាតិផ្សេង៕

The post ករណីបង្ក្រាប Online Scam! មេខ្លោងជនជាតិចិន ៤នាក់ ត្រូវបញ្ជូនទៅតុលាការ ខណៈ៦០នាក់ទៀត បណ្តេញចេញពីកម្ពុជា appeared first on Kampuchea Thmey Daily.

លោកឧត្តមសេនីយ៍ឯក ជួន ណារិន្ទ អគ្គស្នងការរង និង ជាស្នងការនគរបាលរាជធានីភ្នំពេញ

លោកឧត្តមសេនីយ៍ឯក ជួន ណារិន្ទ ណែនាំបែបនេះ ក្នុងឱកាសដែលលោកអញ្ជើញដឹកនាំកិច្ចប្រជុំបូកសរុបវាយតម្លៃ សភាពការណ៍បទល្មើស និងលទ្ធផលកិច្ចប្រតិបត្តិការបង្រ្កាបបទល្មើស ប្រចាំឆមាសទី១ឆ្នាំ២០២៦ និងពិធីប្រកាសផ្ទេរភារកិច្ច តែងតាំងមុខតំណែង ជូនមន្រ្តីនគរបាលជាតិនៃស្នងការដ្ឋាននគរបាលជាតិ កាលពីថ្ងៃទី២៧ ខែឧសភា ឆ្នាំ២០២៦ នៅស្នងការដ្ឋាននគរបាលរាជធានីភ្នំពេញ ។

ក្នុងឱកាសនេះ លោកឧត្តមសេនីយ៍ឯក ជួន ណារិន្ទ បានណែនាំឲ្យមានការគ្រប់គ្រងនិងពង្រឹងការត្រួតពិនិត្យកម្លាំង នៅតាមអង្គភាពនីមួយៗឲ្យបានម៉ឺងម៉ាត់ និងអនុវត្តតួនាទីភារកិច្ចរបស់ខ្លួនឲ្យមានប្រសិទ្ធភាពនិងការទទួលខុសត្រូវខ្ពស់។

បន្ថែមពីនេះ លោកឧត្តមសេនីយ៍ឯក ជួន ណារិន្ទ បានណែនាំលោកអធិការនគរបាលខណ្ឌទាំង១៤ បន្តយកចិត្តទុកដាក់រៀបចំផែនការនិងទិសដៅ សហការជាមួយរដ្ឋបាលខណ្ឌក្នុងការចុះត្រួតពិនិត្យកន្លែងធ្វើការនិងស្នាក់នៅ ប្រមូលផ្តុំរបស់ជនបរទេសខុសច្បាប់ ដែលលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា។

លើសពីនេះ លោកបានណែនាំបន្តបង្ការបង្រ្កាបក្មេងទំនើង និងស្រាវជ្រាវតាមជំនាញបង្រ្កាបមុខសញ្ញាដែលកំពុងគេចខ្លួន និងមុខសញ្ញាក្រុមក្មេងទំនើបទើបកើតថ្មី, បន្តយកចិត្តទុកដាក់ ថែទាំគ្រប់គ្រងប៉ុស្តិ៍នគរបាលរដ្ឋបាលឲ្យបានល្អ និងធ្វើរបាយការណ៍អំពីប៉ុស្តិ៍ដែលទ្រុឌទ្រោម,បន្តចុះល្បាតត្រួតពិនិត្យដើម្បីបង្ការបង្រ្កាបបទល្មើសគ្រប់ប្រភេទ ជាពិសេស ស្រាវជ្រាវតាមដាន ក្នុងមូលដ្ឋាន គ្រប់គ្រងជនបរទេស និង បោសសម្អាត Online Scams ដែលលួចលាក់នៅតាមមូលដ្ឋានដោយភាពទទួលខុសត្រូវខ្ពស់បំផុត បើមិនធ្វើឫគប់គិត និងទទួលខុសត្រូវចំពោះមុខច្បាប់ជាដាច់ខាត។

ទន្ទឹមគ្នានេះ លោកថែមទាំងបានណែនាំឲ្យមានការយកចិត្តទុកដាក់ដោះស្រាយបញ្ហាកកស្ទះចរាចរណ៍នៅតាមគោលដៅដែលមានបញ្ហាប្រឈកកស្ទះផងដែរ៕ អត្ថបទ៖ សុភា

The post ស្នងការរាជធានី ណែនាំអធិការខណ្ឌទាំង១៤ បន្តចុះត្រួតពិនិត្យកន្លែងស្នាក់នៅជនបរទេស ដែលសង្ស័យលួចលាក់ប្រព្រឹត្តបទល្មើសOnline scam appeared first on Kampuchea Thmey Daily.

នៅរសៀលថ្ងៃទី២៤ ខែឧសភា ឆ្នាំ២០២៦ លោកឧត្តមសេនីយ៍ទោ គង់ មនោ ស្នងការនគរបាលខេត្តកោះកុង បានចេញសារក្រើនរម្លឹកជាថ្មីដល់ប្រជាពលរដ្ឋ និងម្ចាស់ផ្ទះជួល រីស៊ត និងសណ្ឋាគារទាំងអស់ថា ការជួលទីតាំងស្នាក់នៅឱ្យជនបរទេសទាំងអស់ ត្រូវត្រួតពិនិត្យរាល់លិខិតឆ្លងដែនទាំងអស់ នៃជនបរទេសដែលមានបំណងជួលសម្រាប់ស្នាក់នៅ ហើយត្រូវរាយការណ៍មកអាជ្ញារធរដែលគ្រប់គ្រងនៅក្នុងឃុំសង្កាត់ នៃទីតាំងអាគារ និងហាមឃាត់ជាដាច់ខាតពាក់ពន្ធ័ទៅនឹង Scam Online។

លោកស្នងនគរបាលខេត្តកោះកុង គូសបញ្ជាក់ទៀតថា ក្នុងករណី ម្ចាស់ទីតាំងខាងលើ ជួលឱ្យជនបរទេសស្នាក់នៅ ហើយសមត្ថកិច្ចត្រួតពិនិត្យឃើញថា ជនបរទេសដែលស្នាក់នៅគ្មានលិខិតឆ្លងដែន នោះម្ចាស់ទីតាំងត្រូវពិន័យជាប្រាក់ចំនួន ៤លានរៀលក្នុងម្នាក់ ហើយប្រសិនបើម្ចាស់ទីតាំងពាក់ពន្ធ័ទៅនឹង Scam Online ទៀតនោះនឹងត្រូវប្រឈមមុខចំពោះផ្លូវច្បាប់បន្ថែមទៀត។

គួរកត់សម្គាល់ដែរថា កន្លងទៅអាជ្ញាធរសមត្ថកិច្ចខេត្តកោះកុង ធ្លាប់ចុះពិនិត្យបង្រ្កាបទីតាំងចំនួន៣ ដែលសង្ស័យថាមានសកម្មភាពឆបោកតាមប្រព័ន្ធអនឡាញខុសច្បាប់។ ពោលគឺទី១ តំបន់សាគរ ទី២ មូលដ្ឋាន ឃុំព្រែកខ្សាច់ និងទី៣តំបន់ចាំយាម ស្រុកមណ្ឌលសីមា ជាទីតាំងពិនិត្យបង្រ្កាបបោសសម្អាត និងបិទសៀលតាមអគារដែលបង្រ្កាបបានចប់ត្រឹមថ្ងៃទី១៤ ខែមីនា ឆ្នាំ២០២៦កន្លងទៅ។

លោកស្រី ឈី វ៉ា អភិបាលខេត្តកោះកុង កាលពីថ្ងៃទី៤ ខែឧសភា ឆ្នាំ២០២៦​ បានបង្ហាញដែរថា ទីតាំងរស់នៅប្រមូលផ្តុំជុំវិញតំបន់ធំៗទាំងបី និងតាមបណ្តា្កកោះមួយចំនួនកំពុងត្រួតពិនិត្យតាមដានអនុវត្តតាមអនុក្រឹត្យលេខ០៣របស់រាជរដ្ឋាភិបាលពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំ។

ក្នុងនាមលោកស្រី ជាប្រធានគណៈបញ្ជាការឯកភាពខេត្តកោះកុង នឹងបង្កើនសហការជាមួយអាជ្ញាធរមានសមត្ថកិច្ចទាំងនៅថ្នាក់ជាតិ រដ្ឋបាលក្រុង ស្រុក ឃុំ សង្កាត់ ស្រាវជ្រាវនិងចាត់វិធានការបង្ក្រាបនូវទីតាំងលេងល្បែងស៊ីសងខុសច្បាប់ទាំងនោះ៕

អត្ថបទ៖សិរីវឌ្ឍនៈ

The post ស្នងការនគរបាលខេត្តកោះកុង ក្រើនរម្លឹកដល់ម្ចាស់ទីតាំងជួលទាំងឡាយ កុំពាក់ពន្ធ័នឹង Scam Online appeared first on Kampuchea Thmey Daily.

ប្រតិបត្តិការនេះធើ្វឡើងក្រោមការដឹកនាំដោយលោក ប្រាក់ ប៉ូលី អភិបាលរងខេត្ត តំណាងលោក អ៊ុំ រាត្រី អភិបាលខេត្ត ដឹកនាំកម្លាំងគណៈបញ្ជារការឯកភាព ដោយមានការចូលរួមពីកម្លាំងជំនាញស្នងការដ្ឋាននគរបាលខេត្ត, កម្លាំងបញ្ជាការដ្ឋានកងរាជអាវុធហត្ថខេត្ត គណៈបញ្ជាការឯកភាពរដ្ឋបាលក្រុង អធិការដ្ឋាននគរបាលក្រុង បញ្ជាការមូលដ្ឋានកងរាជអាវុធហត្ថក្រុង បានចុះត្រួតពិនិត្យនិងឆែកឆេរជាក់ស្ដែង ចំនួន៥ទីតាំង ដែលមានការសង្ស័យលួចប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា Online Scam កាលពីថ្ងៃទី១៩ ខែឧសភា ឆ្នាំ២០២៦ ស្ថិតនៅភូមិព្រៃព្រិច សង្កាត់អូរជ្រៅ ក្រុងប៉ោយប៉ែត។

ក្នុងនោះកម្លាំងគណៈបញ្ជាការឯកភាពខេត្ត បានត្រួតពិនិត្យរដ្ឋបាល៣ទីតាំង រកឃើញជនបរទេសចំនួន ៣៣នាក់ ស្រី២នាក់ (ចិន២៩នាក់ ស្រី១នាក់ និងថៃ៤នាក់ ស្រី១នាក់) ក្នុងនោះរកឃើញជនជាតិចិន១៧នាក់ប្រុស ស្នាក់នៅខុសច្បាប់ បញ្ជូនទៅមណ្ឌលកងវ៉ាខេត្ត ដើម្បីបន្ដនីតិវិធីបណ្ដេញចេញ។

ក្រោយប្រតិបត្តិការបង្ក្រាបទីតាំងចំនួន២កន្លែង កម្លាំងអាជ្ញាធរបានបិទជាបណ្ដោះអាសន្ន។ ក្នុងផ្ទះវីឡាមួយកន្លែងជាទីតាំងទី១ មានកម្ពស់៣ជាន់ ១៩បន្ទប់ និងរកឃើញបន្ទប់ក្រោមដីចំនួន១ មានផ្ទុកសម្ភារៈសង្ស័យ ដែលជាសញ្ញាណនៃការប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា ទីតាំងពុំមានជនបរទេសស្នាក់នៅ, ទីតាំងទី២ ជាប្រភេទអគារកម្ពស់៦ជាន់ ១៦បន្ទប់ ២ហល រកឃើញសម្ភារៈសង្ស័យពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា ទីតាំងពុំមានជនបរទេសស្នាក់នៅ៕

The post គណៈបញ្ជាការឯកភាពខេត្តបន្ទាយមានជ័យ បន្តចុះត្រួតពិនិត្យឆែកឆេរ ៥ ទីតាំង នៅក្រុងប៉ោយប៉ែត រកឃើញជនបរទេស ៣៣ នាក់ និងសម្ភារល្មើសមួយចំនួន appeared first on Kampuchea Thmey Daily.

ប្រតិបត្តិការនេះបានធ្វើឡើងកាលពីថ្ងៃទី ១២ ខែឧសភា ឆ្នាំ ២០២៦ នៅផ្លូវលំ ភូមិព្រែកជាងព្រហ្ម សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។

អាជ្ញាធរ បានឲ្យដឹងថា លោក ម៉ូវ ម៉ានិត អភិបាលខណ្ឌច្បារអំពៅ បានដឹកនាំក្រុមការងារចម្រុះ រួមទាំង លោក ម៉ៅ សឿត អធិការខណ្ឌច្បារអំពៅ ដឹកនាំកម្លាំងសហការ ដោយមានការសម្របសម្រួលផ្លូវច្បាប់ពី លោក ទិន សុចិត្រា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចុះត្រួតពិនិត្យទីតាំងផ្ទះលេខ ២២៧ ផ្លូវលំ ភូមិព្រែកជាងព្រហ្ម សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ដែលបានយកទីតាំងខាងលើប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា «Online Scam»។

អាជ្ញាធរ បញ្ជាក់ថា ការចុះត្រួតពិនិត្យនេះ រកឃើញមនុស្សចំនួន ៩ នាក់ (ជនជាតិចិន ៨ នាក់ , ជនជាតិវ៉ានូអាទូ ១ នាក់)។ ចំណែកសម្ភារៈដកហូតមានដូចជា ៖ ទូរស័ព្ទដៃចំនួន ៤១ គ្រឿង , ឡេបថបចំនួន ៧ គ្រឿង , កាំភ្លើងចំនួន ១ ដើម និង គ្រាប់កាំភ្លើងចំនួន ៤៩ គ្រាប់៕
អត្ថបទ ៖ រដ្ឋា

The post បង្ក្រាបបទល្មើស Online Scam ឃាត់ខ្លួនមនុស្ស ៩ នាក់ ដកហូតសម្ភារៈមួយចំនួនធំ នៅសង្កាត់វាលស្បូវ appeared first on Kampuchea Thmey Daily.

នេះបើយោងតាមរបាយការណ៍សង្ខេបរបស់ លោកឧត្តមសេនីយ៍ត្រី អេង លីហួរ ស្នងការរងនគរបាលខេត្តបន្ទាយមានជ័យ ក្នុងឱកាសកិច្ចប្រជុំផ្សព្វផ្សាយផែនការ ស្តីពីការបន្តនិរន្តរភាពយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា (ONLINE SCAMS) ជូនដល់អង្គភាព ពិសេសសមត្ថកិច្ចពាក់ព័ន្ធគ្រប់ជាន់ថ្នាក់ ដែលប្រារព្ធធ្វើឡើងនៅសាលប្រជុំ ក សាលាខេត្តបន្ទាយមានជ័យ កាលពីរសៀលថ្ងៃទី ០៧ ខែឧសភា ឆ្នាំ ២០២៦។

ពាក់ព័ន្ធការបង្ក្រាបបទល្មើសឆបោកតាមប្រព័ន្ធបច្ចេកវិទ្យា លោក អ៊ុំ រាត្រី អភិបាល នៃគណៈអភិបាលខេត្ត បញ្ជាក់ថា រដ្ឋបាលខេត្ត បានចេញលិខិតបិទទីតាំងទាំងស្រុង ចំពោះទីតាំងដែលរកឃើញថា បានប្រព្រឹត្តបទល្មើស និង សង្ស័យមានការប្រព្រឹត្តបទល្មើសតាមប្រព័ន្ធបច្ចេកវិទ្យា (ONLINE SCAMS)។ ក្នុងនោះ ណែនាំជំរុញឲ្យសហការអនុវត្តការចុះបង្រ្កាបទីតាំងប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) ធ្វើការឃាត់ខ្លួនជនល្មើស និង បញ្ជូនទៅស្ថាប័ន/អង្គភាពពាក់ព័ន្ធតាមនីតិវិធី។ សហការជិតស្និទ្ធជាមួយកម្លាំងអគ្គស្នងការនគរបាលជាតិ ដោយមានការសម្របសម្រួលនីតិវិធីពីព្រះរាជអាជ្ញារង នៃអយ្យការអមសាលាដំបូងខេត្ត ក្នុងការចុះត្រួតពិនិត្យទីតាំងពាក់ព័ន្ធលួចលាក់ប្រព្រឹត្តបទល្មើសអនឡាញនៅគ្រប់ទីតាំងទាំងអស់ក្នុងខេត្ត ជាពិសេសតំបន់ប៉ោយប៉ែត។

លោក កែវ វណ្ណថន រដ្ឋលេខាធិការក្រសួងមហាផ្ទៃ លើកឡើងថា បទល្មើសឆបោកតាមប្រព័ន្ធបច្ចេកវិទ្យា គឺជាបញ្ហាស្មុគស្មាញសម្រាប់ពិភពលោកដែលត្រូវរួមគ្នាក្នុងការដោះស្រាយបង្ក្រាបឲ្យបាន ដើម្បីថែរក្សាសន្តិសុខសណ្ដាប់ធ្នាប់សង្គមនៅក្នុងប្រទេសកម្ពុជា។

លោកបន្តថា បច្ចុប្បន្ន បទល្មើសនេះ ក្លាយជាបទល្មើសសកលមួយដែលបាននិងកំពុងគំរាមកំហែងដល់សន្តិសុខក្នុងតំបន់ និង សកលលោក ធ្វើឲ្យខូចខាតបាត់បង់ផ្នែកហិរញ្ញវត្ថុយ៉ាងធ្ងន់ធ្ងរ។

លោកក៏បានផ្ដល់អនុសាសន៍សង្កត់ធ្ងន់ទៅដល់អាជ្ញាធរខេត្ត ស្រុក-ក្រុង ពិសេសកងកម្លាំងសមត្ថកិច្ចពាក់ព័ន្ធ ត្រូវរួមសហការគ្នាធ្វើការបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) ឲ្យដករឹសគល់ ដោយក្រុមនេះបានបំបែកខ្លួនពីក្រុមធំ មកជាក្រុមតូចៗ ដែលជាការប្រមូលផ្ដុំបង្កើនសកម្មភាព នៃការឆបោកតាមប្រព័ន្ធបច្ចេកវិទ្យា ដើម្បីការពារកិត្តិយស ផលប្រយោជន៍ជាតិ ផល ប្រយោជន៍ប្រជាពលរដ្ឋ សន្តិសុខសណ្ដាប់ធ្នាប់សាធារណៈសង្គម បង្កើតបរិយាកាសសង្គមឲ្យកាន់តែល្អប្រសើរ សម្រាប់ការអភិវឌ្ឍលើគ្រប់វិស័យ៕
អត្ថបទ ៖ អេម ពៅ

The post ជិត ៥ ខែ ខេត្តបន្ទាយមានជ័យ បង្ក្រាបបទល្មើស ONLINE SCAMS ១៥ ទីតាំង ឃាត់ខ្លួនជនបរទេសជាង ៤ ពាន់នាក់ appeared first on Kampuchea Thmey Daily.

ប្រតិបត្តិការនេះ ធ្វើឡើងក្រោមការបញ្ជាផ្ទាល់ពីឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងក្រោមការសម្របសម្រួលនីតិវិធីដោយឯកឧត្តម កើត សុវណ្ណរ៉េត ព្រះរាជអាជ្ញាអមសាលាដំបូងខេត្ត ដោយមានការចូលរួមពីកម្លាំងសមត្ថកិច្ចពាក់ព័ន្ធ រួមមាន នគរបាលខេត្ត កងរាជអាវុធហត្ថ និងអាជ្ញាធរមូលដ្ឋាន។

អាជ្ញាធរខេត្តបានចាត់តាំងក្រុមការងារចម្រុះ ដឹកនាំដោយលោក ប្រាក់ ប៉ូលី និងលោក លៀម សុដា អភិបាលរងខេត្ត ដើម្បីអនុវត្តប្រតិបត្តិការចុះត្រួតពិនិត្យ និងបង្ក្រាបទីតាំងសង្ស័យនៅតាមអគារនានា ដែលត្រូវបានប្រើប្រាស់សម្រាប់ប្រព្រឹត្តបទល្មើសឆបោកតាមប្រព័ន្ធអ៊ីនធឺណិត។

យុទ្ធនាការនេះ អនុវត្តស្របតាមបទបញ្ជា និងបទដ្ឋានច្បាប់របស់រាជរដ្ឋាភិបាល រួមមានបទបញ្ជាលេខ ០១ បប ចុះថ្ងៃទី១៤ ខែកក្កដា ឆ្នាំ២០២៥ អនុក្រឹត្យលេខ ០៣ អនក្រ.បក ចុះថ្ងៃទី៥ ខែមករា ឆ្នាំ២០២៦ និងច្បាប់ពាក់ព័ន្ធនឹងការប្រឆាំងបទល្មើសបច្ចេកវិទ្យា។ ព្រមទាំងផែនការសកម្មភាពលេខ ០១០/២៦ ដែលបានដាក់ចេញដោយគណៈបញ្ជាការឯកភាពរដ្ឋបាលខេត្ត។

គួរជម្រាបថា ចាប់តាំងពីថ្ងៃទី១២ ខែមីនា ឆ្នាំ២០២៦ មក កម្លាំងសមត្ថកិច្ចបានសហការជាមួយថ្នាក់ជាតិ ចុះបង្ក្រាបទីតាំងសរុបចំនួន ៥កន្លែង និងឃាត់ខ្លួនជនបរទេសខុសច្បាប់ចំនួន ៣,៨៥៣នាក់ ដែលភាគច្រើនជាជនជាតិចិន។ ទីតាំងទាំងនេះ ស្ថិតនៅក្នុងស្រុកម៉ាឡៃ និងក្រុងប៉ោយប៉ែត។ បន្ថែមពីនេះ ក្រុមការងារចម្រុះខេត្តក៏បានចុះបង្ក្រាបបន្ថែមចំនួន ៣ទីតាំងផ្សេងទៀត ដោយឃាត់ខ្លួនជនសង្ស័យចំនួន ១៦១នាក់ ដែលជាជនជាតិចិន។

ដោយឡែក នៅថ្ងៃទី០៣ ខែឧសភា ឆ្នាំ២០២៦ កម្លាំងសមត្ថកិច្ចបានបន្តប្រតិបត្តិការនៅក្នុងក្រុងប៉ោយប៉ែត ចំនួន ៣ទីតាំងទៀត ដោយរកឃើញជនបរទេសគ្មានឯកសារត្រឹមត្រូវចំនួន ១៨៥នាក់ ក្នុងនោះមានជនជាតិឥណ្ឌូនេស៊ី ១៥៤នាក់ និងជនជាតិថៃ ៣១នាក់ ព្រមទាំងរឹបអូសវត្ថុតាងពាក់ព័ន្ធមួយចំនួន។ ជារួម ក្នុងប្រតិបត្តិការនេះ អាជ្ញាធរបានចាប់ខ្លួនជនបរទេសលើសពី ៤,០០០នាក់ ដែលពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា។

ជាមួយគ្នានេះ ក្រុមការងារចម្រុះខេត្តក៏បានចុះត្រួតពិនិត្យទីតាំងរស់នៅប្រមូលផ្តុំចំនួន ៩កន្លែង នៅក្នុងក្រុងប៉ោយប៉ែត ស្រុកអូរជ្រៅ និងស្រុកម៉ាឡៃ ដោយបានណែនាំម្ចាស់ទីតាំងឲ្យធ្វើកិច្ចសន្យា និងគោរពតាមច្បាប់។ ទីតាំងទាំងនេះ មានជនបរទេសសរុបចំនួន ៣០៣នាក់ ក្នុងនោះមានស្ត្រី ១២នាក់។

អាជ្ញាធរខេត្តបន្ទាយមានជ័យ បញ្ជាក់ដែរថា នឹងបន្តពង្រឹងវិធានការបង្ក្រាប និងត្រួតពិនិត្យឲ្យបានតឹងរឹងបន្ថែមទៀត ដើម្បីទប់ស្កាត់ និងបំបាត់បទល្មើសឆបោកតាមប្រព័ន្ធបច្ចេកវិទ្យា ដែលកំពុងក្លាយជាបញ្ហាប្រឈមសម្រាប់សង្គម និងសន្តិសុខសាធារណៈ៕

The post ខេត្តបន្ទាយមានជ័យ បន្តបោសសម្អាតបទល្មើសបច្ចេកវិទ្យា ចាប់ខ្លួនជនបរទេសជាង ៤,០០០នាក់ appeared first on Kampuchea Thmey Daily.