គណៈបញ្ជាការឯកភាពខេត្តបន្ទាយមានជ័យ បន្តចុះត្រួតពិនិត្យឆែកឆេរ ៥ ទីតាំង នៅក្រុងប៉ោយប៉ែត រកឃើញជនបរទេស ៣៣ នាក់ និងសម្ភារល្មើសមួយចំនួន

ក្រោមការបញ្ជាផ្ទាល់របស់លោក អ៊ុំ រាត្រី អភិបាលខេត្តបន្ទាយមានជ័យ និងជាប្រធានគណៈបញ្ជាការឯកភាពខេត្ត ដោយមានការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ។ កម្លាំងគណៈបញ្ជាការឯកភាពខេត្តប បានបន្តចុះត្រួតពិនិត្យ ឆែកឆេរជាក់ស្ដែង ចំនួន៥ទីតាំង ស្ថិតនៅក្នុងភូមិព្រៃព្រិច សង្កាត់អូរជ្រៅ ក្រុងប៉ោយប៉ែត រកឃើញជនបរទេសចំនួន ៣៣នាក់ និងរកឃើញបន្ទប់ក្រោមដីចំនួន១ មានផ្ទុកសម្ភារៈសង្ស័យ ដែលជាសញ្ញាណនៃការប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា។

ប្រតិបត្តិការនេះធើ្វឡើងក្រោមការដឹកនាំដោយលោក ប្រាក់ ប៉ូលី អភិបាលរងខេត្ត តំណាងលោក អ៊ុំ រាត្រី អភិបាលខេត្ត ដឹកនាំកម្លាំងគណៈបញ្ជារការឯកភាព ដោយមានការចូលរួមពីកម្លាំងជំនាញស្នងការដ្ឋាននគរបាលខេត្ត, កម្លាំងបញ្ជាការដ្ឋានកងរាជអាវុធហត្ថខេត្ត គណៈបញ្ជាការឯកភាពរដ្ឋបាលក្រុង អធិការដ្ឋាននគរបាលក្រុង បញ្ជាការមូលដ្ឋានកងរាជអាវុធហត្ថក្រុង បានចុះត្រួតពិនិត្យនិងឆែកឆេរជាក់ស្ដែង ចំនួន៥ទីតាំង ដែលមានការសង្ស័យលួចប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា Online Scam កាលពីថ្ងៃទី១៩ ខែឧសភា ឆ្នាំ២០២៦ ស្ថិតនៅភូមិព្រៃព្រិច សង្កាត់អូរជ្រៅ ក្រុងប៉ោយប៉ែត។

ក្នុងនោះកម្លាំងគណៈបញ្ជាការឯកភាពខេត្ត បានត្រួតពិនិត្យរដ្ឋបាល៣ទីតាំង រកឃើញជនបរទេសចំនួន ៣៣នាក់ ស្រី២នាក់ (ចិន២៩នាក់ ស្រី១នាក់ និងថៃ៤នាក់ ស្រី១នាក់) ក្នុងនោះរកឃើញជនជាតិចិន១៧នាក់ប្រុស ស្នាក់នៅខុសច្បាប់ បញ្ជូនទៅមណ្ឌលកងវ៉ាខេត្ត ដើម្បីបន្ដនីតិវិធីបណ្ដេញចេញ។

ក្រោយប្រតិបត្តិការបង្ក្រាបទីតាំងចំនួន២កន្លែង កម្លាំងអាជ្ញាធរបានបិទជាបណ្ដោះអាសន្ន។ ក្នុងផ្ទះវីឡាមួយកន្លែងជាទីតាំងទី១ មានកម្ពស់៣ជាន់ ១៩បន្ទប់ និងរកឃើញបន្ទប់ក្រោមដីចំនួន១ មានផ្ទុកសម្ភារៈសង្ស័យ ដែលជាសញ្ញាណនៃការប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា ទីតាំងពុំមានជនបរទេសស្នាក់នៅ, ទីតាំងទី២ ជាប្រភេទអគារកម្ពស់៦ជាន់ ១៦បន្ទប់ ២ហល រកឃើញសម្ភារៈសង្ស័យពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា ទីតាំងពុំមានជនបរទេសស្នាក់នៅ៕