Yudai Ogawa Archives - Kampuchea Thmey Daily

ក្លិបព្រះខ័នរាជស្វាយរៀង ប្រកាសពីការចាកចេញកីឡាករ Patrick, Cristian និង Yudai

chean virakbot — Fri, 29 May 2026 04:08:54 +0000

នៅព្រឹកថ្ងៃទី២៩ ខែឧសភា ឆ្នាំ ២០២៦ ក្លិបបាល់ទាត់ ព្រះខ័នរាជស្វាយរៀង បានប្រកាសពីការចាកចេញរបស់កីឡាករសំខាន់ ៣ នាក់គឺ Patrick Robson, Cristian Roque និង Yudai Ogawa។

ខ្សែប្រយុទ្ធប្រេស៊ីល Patrick Robson បានចូលរួមជាមួយ ព្រះខ័នរាជស្វាយរៀង តែមួយរដូវកាលប៉ុណ្ណោះគឺ ២០២៥-២៦ ដោយបានជួយឲ្យក្រុមឈ្នះ ជើងឯកលីគកំពូលកម្ពុជា ជើងឯកពានរង្វាន់សម្តេចតេជោ ហ៊ុន សែន និងពានបើករដូវកាល ខេមបូឌានស៊ុបភើខាប់ ព្រមទាំងចំណាត់ថ្នាក់លេខ២ ពានងាស៊ី AFC Challenge League។ ពេលនេះ រូបគេសម្រេចចាកចេញ និងចូលរួមជាមួយក្លិប Bersin Bandung នៃលីគបាល់ទាត់កំពូលឥណ្ឌូណេស៊ី។

កីឡាករជប៉ុនសញ្ជាតិកម្ពុជា Yudai Ogawa ក៏បានចូលរួមជាមួយ ព្រះខ័នរាជស្វាយរៀង តែមួយរដូវកាលដែរ ហើយក៏សម្រេចចាកចេញវិញ។ កីឡាករសញ្ជាតិកម្ពុជារូបនេះនៅមិនទាន់ដឹងច្បាស់ថា ទៅចូលរួមជាមួយក្លិបណាទេ ឬក៏អាចចេញទៅក្រៅប្រទេសក៏ថាបាន ខណៈរូបគេបានលេងនៅក្នុងប្រទេសកម្ពុជា ប្រមាណ ៧ រដូវកាលមកហើយគិតចាប់តាំងពីឆ្នាំ ២០១៨។

ចំណែកខ្សែប្រយុទ្ធសញ្ជាតិប្រេស៊ីល Cristian Roque បានចូលរួមជាមួយព្រះខ័នរាជស្វាយរៀង ២ រដូវកាលគឺ ២០២៤-២៥ និង ២០២៥-២៦ ដោយបានឈ្នះជើងឯកលីគកំពូលកម្ពុជា ២ លើក ឈ្នះជើងឯកពានរង្វាន់សម្តេចតេជោ ហ៊ុន សែន ១ លើក ពានបើករដូវកាលខេមបូឌានស៊ុបភើខាប់ ១ លើក និងចំណាត់ថ្នាក់លេខ ២ ពាន AFC Challenge League ២ លើក។

នៅពេលនេះ Cristian Roque បានសម្រេចចិត្តចាកចេញពី ព្រះខ័នរាជស្វាយរៀង ប៉ុន្តែរូបគេនឹងមិនទាន់ចាកចេញពីប្រទេសកម្ពុជាឡើយ។ រូបគេចង់បន្តលេងនៅលីគកំពូលកម្ពុជាដោយសាររូបគេចង់ទទួលបានសញ្ជាតិកម្ពុជាដើម្បីលេងតំណាងឲ្យជម្រើសជាតិកម្ពុជាលើឆាកអន្តរជាតិ។

ព្រះខ័នរាជស្វាយរៀង ទំនងជាធ្វើការរុះរើទ្រង់ទ្រាយធំ បន្ទាប់ពីចប់រដូវកាល ដើម្បីត្រៀមខ្លួនឲ្យបានល្អសម្រាប់រដូវកាលថ្មីដែលត្រូវលេងក្នុងពានរង្វាន់អាស៊ីកម្រិតទី២ AFC Champions League Two និងពានរង្វាន់ផ្សេងៗជាច្រើនទៀត៕

អត្ថបទ៖ វិរបុត្រ

The post ក្លិបព្រះខ័នរាជស្វាយរៀង ប្រកាសពីការចាកចេញកីឡាករ Patrick, Cristian និង Yudai appeared first on Kampuchea Thmey Daily.

យូដៃ មើលឃើញស្ទាយលេងរបស់ ព្រះខ័នរាជស្វាយរៀង ២ ចំណុច ត្រូវនឹងរបៀបលេងរបស់ខ្លួន

Kosal Sem — Mon, 21 Jul 2025 05:09:23 +0000

ខ្សែបម្រើដើមកំណើតជប៉ុន សញ្ជាតិ ខ្មែរ យូដៃ អូកាវ៉ា (Yudai Ogawa) បានសម្លឹងឃើញពីរបៀបលេង ២ ចំណុចរបស់ព្រះខ័នរាជស្វាយរៀង ដែលរូបគេគិតថា ត្រូវនឹងការលេងរបស់ខ្លួន។

កីឡាករ យូដៃ អូកាវ៉ា

ថ្លែងនៅក្នុងកិច្ចសម្ភាសជាមួយសារព័ត៌មាន «កម្ពុជាថ្មី» អតីតខ្សែបម្រើភ្នំពេញក្រោន ដែលទើបចូលរួមជាមួយព្រះខ័នរាជស្វាយរៀងនៅរដូវកាលនេះបានលើកឡើងថា ៖«ខ្ញុំបានដឹងរួចហើយពីរបៀបលេង ប៉ុន្តែនេះជាទូទៅប៉ុណ្ណោះ មិនទាន់ផ្តោតខ្លាំងទេ។ ខ្ញុំបានមើលការប្រកួតរបស់ព្រះខ័នរាជស្វាយរៀងច្រើនណាស់ កាលពីរដូវកាលមុន។ ពួកគេលេងបានយ៉ាងល្អ ទាំងការប្រកួតក្នុងលីគ និងការប្រកួតអន្តរជាតិ។ ពេលខ្ញុំលេងទល់នឹងពួកគេ ខ្ញុំជួបការលំបាកខ្លាំង។ ពួកគេលេងដោយភាពឆ្លាតវៃ និងបច្ចេកទេស។ ទាំងនេះត្រូវនឹងរបៀបលេងរបស់ខ្ញុំ»។

បើនិយាយអំពីក្លិបព្រះខ័នរាជស្វាយរៀង ជឿជាក់ថា យូដៃ បានស្គាល់ច្បាស់ហើយ អំពីរបៀបលេងរបស់ក្រុមការពារតំណែងជើងឯកលីគកំពូលកម្ពុជា Cambodian Premier League មួយនេះ ដោយសាររូបគេបានប្រឡូកអាជីពនៅក្នុងប្រទេស កម្ពុជា អស់រយៈពេល ៧ ឆ្នាំមកហើយ។ ខ្សែបម្រើវ័យ ២៨ ឆ្នាំរូបនេះ បានអះអាងថា រូបគេបានព្យាយាមតាមដានអំពីរបៀបលេងរបស់ក្លិបព្រះខ័នរាជស្វាយរៀង ច្រើនកាលពីរដូវកាលមុន។

យូដៃ បានសង្កត់ធ្ងន់ថា នៅពេលគេលេងនៅ ភ្នំពេញក្រោន ក្នុងរដូវកាលមុនៗ គឺតែងតែពិបាកខ្លាំងនៅពេលលេងទល់ ព្រះខ័នរាជស្វាយរៀង ម្តងៗ ដោយសារពួកគេជាក្រុមលេងដោយភាពវៃឆ្លាត និងបច្ចេកទេស។ យ៉ាងណា ខ្សែបម្រើជម្រើសជាតិកម្ពុជារូបនេះ យល់ថា ចំណុចលេងទាំង ២ នេះរបស់ក្រុមមានមូលដ្ឋាននៅខេត្តស្វាយរៀង គឺត្រូវនឹងរបៀបលេងរបស់ខ្លួន ដែលគេជាកីឡាករម្នាក់ចូលចិត្តលេងដោយភាពវៃឆ្លាត និងបច្ចេកទេស។

កីឡាករ យូដៃ អូកាវ៉ា

អត្ថបទ៖ សេម កុសល

The post យូដៃ មើលឃើញស្ទាយលេងរបស់ ព្រះខ័នរាជស្វាយរៀង ២ ចំណុច ត្រូវនឹងរបៀបលេងរបស់ខ្លួន appeared first on Kampuchea Thmey Daily.

យូឌៃ អូកាវ៉ា ប្រាប់ពីជីវិតបាល់ទាត់នៅកម្ពុជាចូលឆ្នាំទី៧ ទាំងមិននឹកស្មានដល់

chean virakbot — Sat, 19 Jul 2025 02:00:00 +0000

ខ្សែបម្រើដ៏ឆ្នើម យូឌៃ អូកាវ៉ា បានបន្តលេងនៅក្លិបបាល់ទាត់កម្ពុជាឈានចូលឆ្នាំទី៧ហើយ គិតចាប់តាំងពីឆ្នាំ ២០១៨ រហូតទទួលបានសញ្ជាតិខ្មែរនៅឆ្នាំ ២០២៣។

យូឌៃ ជាមួយ ព្រះខ័នរាជស្វាយរៀង

រហូតដល់ពេលនេះ យូឌៃ បានលេងឲ្យក្លិបកម្ពុជាចំនួន ៤ គឺ ក្លិបកងយោធពលខេមរភូមិន្ទ នៅឆ្នាំ ២០១៨ ក្លិបអង្គរថាយហ្គឺរ នៅឆ្នាំ ២០១៩ ក្លិបភ្នំពេញក្រោន នៅឆ្នាំ ២០២១ និងក្លិប ព្រះខ័នរាជស្វាយរៀង នៅឆ្នាំ ២០២៥។

ក្នុងបទសម្ភាសជាមួយសារព័ត៌មាន«កម្ពុជាថ្មី» យូឌៃ អូកាវ៉ា បានប្រាប់ថា តាមពិតទៅ រូបគេមិននឹកស្មានដល់ពីការលេងបាល់ទាត់នៅកម្ពុជាច្រើនឆ្នាំរហូតដល់ពេលនេះ។ ចាប់ផ្តើមបាល់ទាត់ដំបូងនៅប្រទេសកំណើត បន្ទាប់មកទៅលេងនៅប្រទេសប៉ូឡូញ ហើយបាល់មកប្រទេសកម្ពុជា ក្នុងឆ្នាំ ២០១៨។

យូឌៃ ពេលនៅជាមួយ ភ្នំពេញក្រោន

កីឡាករបានរៀបរាប់ថា ៖«ពេលមកកម្ពុជាដំបូង ខ្ញុំគិតថា លេងមួយឆ្នាំ ឬពីរឆ្នាំ ខ្ញុំនឹងចាកចេញទៅប្រទេសផ្សេង ប៉ុន្តែបន្ទាប់ពីលេងបានពីរបីឆ្នាំ ខ្ញុំមានអារម្មណ៍កាន់តែចូលចិត្តប្រទេសនេះ។ ពីរឆ្នាំក្រោយមក រឿងនេះក៏បានកើតឡើង ពីព្រោះខ្ញុំថា ច្បាប់ FIFA ប្រសិនបើកីឡាករណាលេងបាន ៥ ឆ្នាំជាប់គ្នាក្នុងប្រទេសមួយ ពួកគេអាចទទួលបានសញ្ជាតិ។ ពេលនោះខ្ញុំក៏ស្ទើរតែមិនជឿ ១០០% ដែរ»។

កីឡាករបន្តថា ៖«និយាយត្រង់ ខ្ញុំធ្លាប់ទទួលបានឱកាសចេញទៅប្រទេសផ្សេងដែរ តែមិនដឹងហេតុអ្វី ខ្ញុំអត់ទៅ។ ហាក់ដូចជា វាសនា រាល់ការសម្រេចចិត្ត ខ្ញុំតែងតែជ្រើសរើសយកកម្ពុជា អ៉ីចឹងហើយបានជានៅកម្ពុជារហូតដល់សព្វថ្ងៃ។ ខ្ញុំមិនយល់ថា ហេតុអ្វីបានជាខ្ញុំជ្រើសរើសកម្ពុជា ប៉ុន្តែប្រហែលជាមកពីពេលវេលាដែលផ្តល់ខ្ញុំទទួលបានក្លិបផ្សេងៗនៅកម្ពុជា។ ទីបំផុត ខ្ញុំជ្រើសរើសយកកម្ពុជា»។

យូឌៃ ពេលលេងឲ្យក្រុមជម្រើសជាតិកម្ពុជា

បន្ទាប់ពីបានចូលរួមក្លិប ព្រះខ័នរាជស្វាយរៀង កីឡាករដើមកំណើតជប៉ុនហាក់មិនសូវគិតច្រើនពីគោលដៅអនាគតទេ ប៉ុន្តែរូបគេបានផ្តោតលើការអភិវឌ្ឍខ្លួនប្រចាំថ្ងៃច្រើនជាង។

កីឡាករប្រាប់ថា ៖«ខ្ញុំខិតខំអភិវឌ្ឍខ្លួនពីមួយថ្ងៃទៅមួយថ្ងៃ។ សម្រាប់ខ្ញុំផ្ទាល់គឺ ព្យាយាមជារៀងរាល់ថ្ងៃ ដោយមិនគិតច្រើនពីថ្ងៃខាងមុខ ថាតើត្រូវឈ្នះជើងឯកប៉ុន្មាន។ ពិតណាស់ ការឈ្នះជើងឯកសំខាន់ ប៉ុន្តែរឿងដែលសំខាន់ តើខ្ញុំចំណាយពេលពីមួយថ្ងៃទៅមួយថ្ងៃ ឲ្យមានប្រយោជន៍យ៉ាងណា។ ខ្ញុំកំពុងអភិវឌ្ឍតាមដែលខ្ញុំអាចទៅរួច។ ដូច្នេះហើយបានជាខ្ញុំផ្តោតសំខាន់តែលើការងារប្រចាំថ្ងៃ និងព្យាយាមឲ្យបានល្អដើម្បីជួយក្រុម។ ខ្ញុំទន្ទឹងរង់ចាំរដូវកាលថ្មីចូលមកដល់»៕

យូឌៃ លេងឲ្យក្រុមជម្រើសជាតិ កម្ពុជា ប៉ះ ម៉ាឡេស៊ី

អត្ថបទ៖ វីរបុត្រ

The post យូឌៃ អូកាវ៉ា ប្រាប់ពីជីវិតបាល់ទាត់នៅកម្ពុជាចូលឆ្នាំទី៧ ទាំងមិននឹកស្មានដល់ appeared first on Kampuchea Thmey Daily.

ប្រធានក្រុមថ្មី Yudai Ogawa ជឿជាក់ថា បាល់ទាត់កម្ពុជានឹងត្រចះត្រចង់

chean virakbot — Thu, 12 Sep 2024 08:29:09 +0000

ខ្សែបម្រើកណ្តាលជម្រើសជាតិកម្ពុជា Yudai Ogawa នៅតែមានជំនឿជាក់លើក្រុមបាល់ទាត់ជម្រើសជាតិកម្ពុជានឹងត្រចះត្រចង់នាពេលអនាគត បើទោះជាមួយរយៈពេលចុងក្រោយមិនសូវល្អប្រសើរក៏ដោយ។

បរាជ័យក្រោមថ្វីជើងក្រុមភ្ញៀវស្រីលង្កាដោយការស៊ុតប៉េណាល់ទីកាត់សេចក្តី ២-៤ បន្ទាប់ពីប្រើពេល១២០នាទីស្មើគ្នា ២-២ នៅលើទីលាន ពហុកីឡដ្ឋានជាតិអូឡាំពិក ជើងទី២ វគ្គជម្រុះ AFC Asian Cup 2027 យប់ថ្ងៃទី១០ ខែកញ្ញា ឆ្នាំ២០២៤ អ្នកគាំទ្រជាច្រើនបានរិះគន់លើកីឡាករ និងគ្រូបង្វឹក ដែលធ្វើឲ្យពួកគាត់មិនត្រឹមតែពិបាកចិត្តខ្លាំងរឿងបរាជ័យនោះទេ ប៉ុន្តែរងសម្ពាធធ្ងន់ពីអ្នកគាំទ្រថែមទៀត។

ក្នុងនោះលោកគ្រូបង្វឹក Félix Dalmás និងខ្សែប្រយុទ្ធ លឹម ពិសុទ្ធ ទទួលរងសម្ពាធខ្លាំងជាងគេ។ មិនត្រឹមតែរិះគន់ប៉ុណ្ណោះទេ អ្នកខ្លះថែមទាំងជេរដល់ឪពុកម្តាយរបស់កីឡាករថែមទៀត។ ពាក់ព័ន្ធនឹងការរិះគន់ទាំងនេះ Yudai Ogawa បាននិយាយថា ៖«ប្រសិនបើ អ្នករិះគន់ទៅលើកីឡាករម្នាក់ដែលរត់១២០នាទី ប្រយុទ្ធផង ចុះជួយតំបន់ការពារផង ហើយហ៊ានលើកដៃដើម្បីស៊ុតប៉េណាល់ទីដែលមានសម្ពាធថែមទៀត ខ្ញុំគិតថា រិះគន់ខុសហើយ។ ខ្ញុំនឹងគាំទ្រគាត់»។

កីឡាកររូបនេះបានបន្តថា ៖«ពិតជាមានមោទនភាពចំពោះក្រុមយើងដែលបានបង្ហាញសមត្ថភាពនៅលើទីលាន។ ខ្ញុំនៅតែជឿថា អនាគតបាល់ទាត់កម្ពុជានឹងភ្លឺស្វាង ត្រចះត្រចង់។ ទោះបីជាបរាជ័យច្រើនដងយ៉ាងណាក៏ដោយ ក៏យើងនៅតែក្រោកឈរ និងបន្តដំណើរឆ្ពោះទៅមុខជានិច្ច។ គ្មានថ្ងៃបោះបង់ទេ»។

ជាមួយគ្នានេះ Yudai Ogawa បានថ្លែងអំណរគុណដល់បងប្អូនដែលបានគាំទ្រដល់ក្រុមបាល់ទាត់ជម្រើសជាតិកម្ពុជា។

តាមរយៈបរាជ័យក្រោមថ្វីជើងស្រីលង្កាដោយលទ្ធផលប៉េណាល់ទី ២-៤ កម្ពុជាបានធ្លាក់ត្រឹមវគ្គជម្រុះជុំទី២ក្នុងជើងឯកអាស៊ី ហើយនៅចុងឆ្នាំ២០២៤ កម្ពុជាត្រូវមានកាតព្វកិច្ចធំមួយទៀតគឺប្រកួតពានរង្វាន់លំដាប់ទី១អាស៊ាន AFF Championship៕

អត្ថបទ៖ វីរបុត្រ

The post ប្រធានក្រុមថ្មី Yudai Ogawa ជឿជាក់ថា បាល់ទាត់កម្ពុជានឹងត្រចះត្រចង់ appeared first on Kampuchea Thmey Daily.

កីឡាករបរទេស៤រូបលេងលីគកម្ពុជាទទួលបានសញ្ជាតិខ្មែរ

chean virakbot — Fri, 09 Aug 2024 03:23:29 +0000

កីឡាករបរទេសដែលលេងនៅលីគក្នុងប្រទេសមួយរយៈពេលចាប់ពី៤ឆ្នាំឡើងទៅមានសិទ្ធិទទួលបានសញ្ជាតិនៅក្នុងប្រទេសនោះ។ នេះបើតាមច្បាប់អនុញ្ញាតរបស់សហព័ន្ធកីឡាបាល់ទាត់អន្តរជាតិ FIFA បានកំណត់ និងអាចលេងតំណាងឲ្យជម្រើសជាតិនោះបាន។

នៅលើពិភពលោកនេះមានប្រទេសជាច្រើនបានផ្តល់សញ្ជាតិដល់កីឡាករបរទេសដែលប្រកបអាជីពបាល់ទាត់នៅក្នុងប្រទេសរបស់ខ្លួនដើម្បីពង្រឹងសមត្ថភាពក្រុមជម្រើសជាតិរបស់ខ្លួន។ ដោយឡែក ប្រទេសកម្ពុជាទើបតែរយៈពេល២ឆ្នាំចុងក្រោយបានផ្តល់សញ្ជាតិខ្មែរដល់កីឡាករបរទេសលេងនៅក្នុងលីគកំពូលកម្ពុជា។

ពេលនេះមានកីឡាករបាល់ទាត់បរទេស៤រូបទទួលបានសញ្ជាតិខ្មែរគឺកីឡាករជប៉ុន២រូប កាមេរ៉ូន១រូប និងអាហ្វ្រិកខាងត្បូង១រូប។

កីឡាករ  Yudai Ogawa

កីឡាករជប៉ុន Yudai Ogawa អាយុ២៧ឆ្នាំ ទទួលបានសញ្ជាតិកម្ពុជា ឆ្នាំ២០២៣ បន្ទាប់ពីបានមកប្រកបអាជីពបាល់ទាត់នៅកម្ពុជាតាំងពីឆ្នាំ២០១៨ ជាមួយក្លិប ក្រសួងការពារជាតិ អង្គរថាយហ្គឺរ និងភ្នំពេញក្រោន។ ខ្សែបម្រើកណ្តាលដ៏ឆ្នើមរូបនេះត្រូវបានកោះហៅចូលជម្រើសជាតិកម្ពុជាច្រើនលើកហើយ។

កីឡាករ Privat Mbarga

កីឡាករកាមេរ៉ូន Privat Mbarga អាយុ៣២ឆ្នាំ ទទួលបានសញ្ជាតិខ្មែរ ឆ្នាំ២០២៣ បន្ទាប់ពីមកប្រកបអាជីពបាល់ទាត់នៅកម្ពុជាតាំងពីឆ្នាំ២០១៣ ដោយបានចំណាយពេល៨ឆ្នាំជាមួយក្លិប បឹងកេត វេសន្ទើនភ្នំពេញ អង្គរថាយហ្គឺរ ណាហ្គាវើលដ៍ អាស៊ីអឺរ៉ុប និងព្រះខ័នរាជស្វាយរៀង មុនពេលផ្លាស់ទៅក្លិបឥណ្ឌូណេស៊ី Bali United នៅឆ្នាំ២០២១។ ទោះបីជាយ៉ាងណា នៅតែមិនទាន់ច្បាស់ថាតើអាចលេងតំណាងជម្រើសជាតិកម្ពុជាបាន។

កីឡាករ Mikaru Mizuno

កីឡាករជប៉ុន Mikaru Mizuno អាយុ៣៣ឆ្នាំ ទទួលបានសញ្ជាតិកម្ពុជា នៅឆ្នាំ២០២៤ បន្ទាប់ពីមកប្រកបអាជីពបាល់ទាត់នៅកម្ពុជាតាំងពីឆ្នាំ២០១៥ ជាមួយក្លិបដំបូង ព្រះខ័នរាជស្វាយរៀង និងផ្លាស់ទៅ បឹងកេត មុនពេលត្រឡប់ទៅ ព្រះខ័នរាជស្វាយរៀង និងខ្ចីជើងទៅ គិរីវង់សុខសែនជ័យ។ រូបគេអាចលេងឲ្យជម្រើសជាតិកម្ពុជាបាន ប្រសិនបើត្រូវបានកោះហៅ។

កីឡាករ Khan Mohammed Faeez

កីឡាករអាហ្វ្រិកខាងត្បូង Khan Mohammed Faeez អាយុ៣១ឆ្នាំ ទទួលបានសញ្ជាតិកម្ពុជានៅឆ្នាំ២០២៤ បន្ទាប់ពីមកប្រកបអាជីពបាល់ទាត់នៅកម្ពុជាតាំងពីឆ្នាំ២០១៩ ជាមួយក្លិប ក្រសួងការពារជាតិ និងវិសាខា។ ខ្សែការពាររូបនេះជាប្រធានក្រុមវិសាខា និងបានរៀបការជាមួយភរិយាជាខ្មែរគឺអាចលេងឲ្យជម្រើសជាតិកម្ពុជា។

អត្ថបទ៖ វីរបុត្រ

The post កីឡាករបរទេស៤រូបលេងលីគកម្ពុជាទទួលបានសញ្ជាតិខ្មែរ appeared first on Kampuchea Thmey Daily.

Yudai «មិនខ្វល់ក្រុម Macarthur មានមាឌធំៗ តែភ្នំពេញក្រោនលេងដោយទំនុកចិត្ត»

Pha Rothana — Thu, 26 Oct 2023 00:28:51 +0000

ជំនួបវគ្គសន្សំពិន្ទុក្នុងពូល F ពានរង្វាន់ AFC Cup រវាងក្លិបភ្នំពេញក្រោនជាមួយក្លិប Macarthur FC ដែលមកពីប្រទេសអូស្ត្រាលី វេលាម៉ោង៧យប់ ទី២៦ ខែសីហា ឆ្នាំ២០២៣ នៅពហុកីឡដ្ឋានជាតិអូឡាំពិក។

ក្នុងសនី្នសីទព័ត៌មានមុនការប្រកួត កីឡាករ Yudai Ogawa ខ្សែបម្រើរបស់ភ្នំពេញក្រោនបាននិយាយថា៖«ខ្ញុំគិតថាក្នុងការប្រកួត ទោះបីក្រុម Macarthur មានប្រៀបខាងកាយសម្បទា តែការប្រកួតលើទីលាន យើងផ្តោតសំខាន់ចំពោះការលេងដោយទំនុកចិត្តបូករួមទាំងយុទ្ធសាស្រ្តនិងការគ្រប់គ្រងបាល់។ ការប្រកួតថ្ងៃនេះ ទោះបីចាញ់ប្រៀបកាយសប្បទា ក្រុមយើងទាំងមូលនឹងលេងដោយទំនុកចិត្ត»។

កីឡាកររបស់ Macarthur សំបូរដោយកីឡាករដែលមានកាយសម្បទាខ្ពស់ ធំ ដែលជាផលវិបាកមួយសម្រាប់ភ្នំពេញក្រោន។ ក្លិបតំណាងកម្ពុជានិងអូស្ត្រាលីសុទ្ធតែឈ្នះទាំង២ប្រកួតដូចគ្នា ដូច្នេះនេះជាការប្រកួតដ៏តានតឹងមួយសម្រាប់ចំណាត់ថ្នាក់លេខ១ក្នុងពូលដើម្បីឡើងទៅវគ្គបន្ត។

ការប្រកួតយប់នេះ Macarthur មិនមានវត្តមានខ្សែប្រយុទ្ធឆ្នើមកីឡាករ Valère Germain ដែលមានបទពិសោធលេងនៅលីគបារាំង១៣ឆ្នាំនៅលីគកំពូលបារាំងទេ ដោយសាររូបគេមានបញ្ហាខ្លះពេលប្រកួតកាលពីថ្ងៃសៅរ៍ ទី២១ ខែតុលា ក្នុងពានរង្វាន់ A-Leauge ។ លោក Mile Sterjovski គ្រូបង្វឹកទំនងជាទុករូបគេសម្រាកដើម្បីតៀមប្រកួតនៅថ្ងៃអាទិត្យទី២៩ ខែតុលា ជាមួយក្លិប Central Coast Mariners ៕

អត្តបទ៖ ផា រតនា

The post Yudai «មិនខ្វល់ក្រុម Macarthur មានមាឌធំៗ តែភ្នំពេញក្រោនលេងដោយទំនុកចិត្ត» appeared first on Kampuchea Thmey Daily.

អវត្តមាន Privat និង វឌ្ឍនាកា ធ្វើឲ្យកម្ពុជាកាន់តែជួបបញ្ហាក្នុងតំបន់ប្រយុទ្ធ

Pha Rothana — Tue, 17 Oct 2023 08:02:27 +0000

ក្រុមជម្រើសជាតិកម្ពុជាត្រូវជួបជាមួយក្រុមជម្រើសជាតិប៉ាគីស្ថានក្នុងការប្រកួតជើងទី២ វគ្គជម្រុះបឋមពានរង្វាន់ពិភពលោកឆ្នាំ២០២៦ នៅកីឡដ្ឋាន Jinnah ក្នុងទីក្រុង អីស្លាម៉ាបាដ វេលាម៉ោង៤ រសៀល។

ការប្រកួតជើងទី២កម្ពុជានៅតែជួបបញ្ហាកង្វះកីឡាករនៅតំបន់ប្រយុទ្ធដោយសារកីឡាករដើមកំណើតកាមេរូន ទើបចូលសញ្ជាតិកម្ពុជា Privat Mbarga និងកីឡាករ ចាន់ វឌ្ឍនាកា នៅតែមិនបន្តចូលរួមជាមួយក្រុមជម្រើសជាតិ។ ក្រុមកម្ពុជានឹងត្រូវធ្វើការធ្ងន់នារសៀលនេះ ដោយសារការប្រកួតជើងទី១នៅពហុកីឡដ្ឋានជាតិអូឡាំពិកបានត្រឹមលទ្ធផល ០-០ ក្នុងនាមម្ចាស់ផ្ទះ។

ការប្រកួតជើងទី១ កម្ពុជាធ្វើមិនបានល្អទេ ដោយពិបាករកឱកាសក្នុងការស៊ុតសំដៅទីលើក្រុមប៉ាគីស្ថាន។ ការប្រកួត៩០នាទីពេញកម្ពុជាស៊ុតបាន៩លើក ប៉ុន្តែចំគោលដៅតែ២លើកប៉ុណ្ណោះ។ ចំពោះខ្សែប្រយុទ្ធ២រូបកីឡាករ ឃាន់ សុប៉ិន និង រុឹង ប៊ុនហៀង ដែលលោក Félix Dalmás ជ្រើសរើសមកគឺសុទ្ឌតែជាកីឡាករដែលមាននាទីលេងតិចក្នុងលីគកំពូលកម្ពុជា។ នេះក៏ជាហេតុមួយដែលធ្វើឲ្យកម្ពុជាជួបបញ្ហាក្នុងតំបន់ប្រយុទ្ធ។ លោក Félix ក៏ធ្លាប់លើកឡើងពីបញ្ហាកង្វះខ្សែប្រយុទ្ធក្នុងប្រអប់ ដោយសារក្លិបនៅលីគកំពូលកម្ពុជាភាគច្រើនគឺប្រើប្រាស់ធនធានកីឡាករបរទេសក្នុងតំបន់ប្រយុទ្ធ។

ក្នុងជំនួបរសៀលនេះសមាជិកភ្នំពេញក្រោន៤រូបគឺកីឡាករ Yudai Ogawa, អ៊ន ចាន់ប៉ូលីន, យ៉ើ មូស្លីម និងកីឡារ ជួន ចាន់ចាវ នឹងក្លាយជាតួអង្គដ៏សំខាន់ក្នុងតំបន់បម្រើកណ្ដាលនិងតំបន់ការពារ។ ការប្រកួតជើងទី១ សមាជិកភ្នំពេញ៤រូបនេះពិតជាធ្វើបានល្អមែនទែន ជាពិសេសកីឡាករ Yudai Ogawa លេង៩០នាទីហើយបំពេញតួនាទីរបស់ខ្លួនក្នុងតំបន់បម្រើកណ្តាលបានយ៉ាងល្អ។ រូបគេក៏ជាប់ឈ្មោះជាកីឡាករដែលលេងល្អបំផុតក្នុងការប្រកួតនោះផងដែរ៕

អត្ថបទ៖ ផា រតនា

The post អវត្តមាន Privat និង វឌ្ឍនាកា ធ្វើឲ្យកម្ពុជាកាន់តែជួបបញ្ហាក្នុងតំបន់ប្រយុទ្ធ appeared first on Kampuchea Thmey Daily.

លោក Félix ប្រាប់ពីសារសំខាន់កីឡាករបរទេសចូលជម្រើសជាតិកម្ពុជា

chean virakbot — Wed, 11 Oct 2023 02:52:59 +0000

គ្រូបង្វឹកក្រុមបាល់ទាត់ជម្រើសជាតិកម្ពុជា លោក Félix Dalmás បានចាត់ទុកកីឡាករសញ្ជាតិដើមជប៉ុន Yudai Ogawa និងកីឡាករ Privat Mbarga ជាធនធានដ៏សំខាន់ក្នុងក្រុមបាល់ទាត់ជម្រើសជាតិកម្ពុជា។

នៅព្រឹកថ្ងៃទី១១ ខែតុលា ឆ្នាំ២០២៣នេះ សហព័ន្ធកីឡាបាល់ទាត់កម្ពុជាបានប្រកាសជាផ្លូវការនូវកីឡាករសញ្ជាតិដើមកាមេរូន Privat Mbarga ចូលជម្រើសជាតិកម្ពុជា។ ការធ្វើសញ្ជាតូបនីកម្មរបស់កម្ពុជានៅពេលនេះគឺដើម្បីត្រៀមខ្លួនប្រកួតជាមួយប៉ាគីស្ថាន វគ្គជម្រុះបឋម ជើងឯកពិភពលោកឆ្នាំ២០២៦។

ក្នុងបទសម្ភាសជាមួយ«កម្ពុជាថ្មី» លោកគ្រូបង្វឹកជម្រើសជាតិកម្ពុជាបានប្រាប់ថា នៅប្រទេសផ្សេងៗបានធ្វើសញ្ជាតូបនីកម្មយូរមកហើយ។ ជាក់ស្តែងក្រុមជម្រើសហុងកុងខ្លាំងគឺសុទ្ធតែកីឡាករបរទេសចូលសញ្ជាតិ ហើយប្រទេសចិនមានកីឡាករប្រេស៊ីលជាច្រើនចូលជម្រើសជាតិ ខណៈប្រទេសបារាំងមានកីឡាករចូលសញ្ជាតិច្រើនណាស់។

លោកបានបន្តថា កម្ពុជាទើបតែចាប់ផ្តើមប៉ុណ្ណោះ ហើយរំពឹងមានបន្តបន្ទាប់ទៀត បន្ទាប់វត្តមានកីឡាករ Yudai Ogawa និង Privat Mbarga។ លោកបានរៀបរាប់ថា ៖«តាមពិត យើងបានជជែកគ្នាយូរមកជុំវិញករណីនេះ។ វាជាឱកាសល្អមួយសម្រាប់ Yudai ក្លាយជាកីឡាករជម្រើសជាតិកម្ពុជា ហើយគាត់ចង់ស្នាក់នៅទីនេះយូរ។ គាត់ចង់មានឱកាសដើម្បីតំណាងឲ្យប្រទេសជាតិ។ ខ្ញុំមិនដឹងថា មានមនុស្សច្រើនដឹងរឿងនេះទេ។ គាត់សម្រេចចិត្តស្នាក់នៅទីនេះ ទោះគាត់មានឱកាសនៅកន្លែងផ្សេង។ គាត់ចង់មានពេលវេលាមួយដែលត្រូវតាមលក្ខន្តិកៈរបស់ FIFA ដូច្នេះហើយបានជាគាត់ផ្លាស់ប្តូរគំនិតដើម្បីបន្តនៅទីនេះ។ ខ្ញុំអាចយល់បានពីអ្វីដែលគាត់យកចិត្តទុកអំពីបាល់ទាត់កម្ពុជា។ ពីទំហំដែលគាត់ចង់លេងឲ្យជម្រើសជាតិ»។

នៅពេលសួរថា តើ Yudai នឹងនាំអត្ថប្រយោជន៍អ្វីខ្លះដល់ក្រុមជម្រើសជាតិកម្ពុជា លោក Félix Dalmás បានឆ្លើយថា ៖«ខ្ញុំគិតថា Yudai នឹងផ្តល់នូវអ្វីដែលយើងមិនមាននៅក្នុងក្រុមជម្រើសជាតិ ជាពិសេសនៅតំបន់បម្រើកណ្តាល។ គាត់មានគុណភាព គាត់មានចក្ខុវិស័យ ជាកីឡាករដែលមានគំរូជាអ្នកដឹកនាំ។ គាត់បានយល់ និងស្គាល់ច្រើនណាស់ពីកីឡាករ និងបាល់ទាត់កម្ពុជា។ យើងឃើញហើយ គាត់លេងនៅលីគ CPL រាល់សប្តាហ៍។ គាត់បង្ហាញខ្លួនក្នុងពានរង្វាន់ AFC Cup យ៉ាងល្អ។ គាត់ជាធនធានកីឡាករដ៏កម្រ និងជាកីឡាករសំខាន់ដែលមានកម្រិតគុណភាពខ្ពស់»។

លោកបានបន្ថែមថា Yudai និងកីឡាករចូលសញ្ជាតិផ្សេងទៀតនឹងមានឥទ្ធិពលទាំងនៅលើទីលាន និងក្រៅទីលានដល់ក្រុមជម្រើសជាតិកម្ពុជា ប៉ុន្តែលោកមិនអាចនិយាយបានទេថា ការប្រកួតដំបូង ពួកគេបង្ហាញខ្លួនល្អឥតខ្ចោះ។ ពួកគាត់ត្រូវការពេលវេលាខ្លះ។ និយាយជារួម កីឡាករបរទេសនឹងនាំមកនូវអ្វីថ្មី ពិសេសប្លែកទាំងក្នុងទីលាន និងក្រៅទីលាន ប្រកបដោយមានភាពវិជ្ជមាន និងវប្បធម៌បាល់ទាត់ថ្មី៕

អត្ថបទ៖ វីរបុត្រ

The post លោក Félix ប្រាប់ពីសារសំខាន់កីឡាករបរទេសចូលជម្រើសជាតិកម្ពុជា appeared first on Kampuchea Thmey Daily.

Yudai Ogawa Archives - Kampuchea Thmey Daily

ក្លិប​ព្រះ​ខ័ន​រាជ​ស្វាយរៀង ប្រកាស​ពី​ការ​ចាក​ចេញ​កីឡាករ Patrick, Cristian និង Yudai

យូដៃ មើលឃើញស្ទាយលេងរបស់ ព្រះខ័នរាជស្វាយរៀង ២ ចំណុច ត្រូវនឹងរបៀបលេងរបស់ខ្លួន

យូឌៃ អូកាវ៉ា ប្រាប់​ពី​​ជីវិត​បាល់ទាត់​នៅ​កម្ពុជាចូល​ឆ្នាំ​ទី​៧ ទាំង​មិន​នឹក​ស្មាន​ដល់

ប្រធាន​ក្រុម​ថ្មី Yudai Ogawa ជឿ​ជាក់​ថា បាល់ទាត់​កម្ពុជា​នឹង​ត្រចះត្រចង់

កីឡាករ​បរទេស​៤​រូប​លេងលីគ​កម្ពុជាទទួល​បាន​សញ្ជាតិ​ខ្មែរ​

Yudai «មិនខ្វល់ក្រុម Macarthur មានមាឌ​ធំ​ៗ តែភ្នំពេញក្រោនលេងដោយទំនុកចិត្ត»

អវត្តមាន Privat និង វឌ្ឍនាកា ធ្វើឲ្យកម្ពុជាកាន់តែជួបបញ្ហាក្នុងតំបន់ប្រយុទ្ធ￼

លោក Félix ប្រាប់ពីសារសំខាន់កីឡាករបរទេសចូលជម្រើសជាតិកម្ពុជា

ក្លិបព្រះខ័នរាជស្វាយរៀង ប្រកាសពីការចាកចេញកីឡាករ Patrick, Cristian និង Yudai

យូឌៃ អូកាវ៉ា ប្រាប់ពីជីវិតបាល់ទាត់នៅកម្ពុជាចូលឆ្នាំទី៧ ទាំងមិននឹកស្មានដល់

ប្រធានក្រុមថ្មី Yudai Ogawa ជឿជាក់ថា បាល់ទាត់កម្ពុជានឹងត្រចះត្រចង់

កីឡាករបរទេស៤រូបលេងលីគកម្ពុជាទទួលបានសញ្ជាតិខ្មែរ

Yudai «មិនខ្វល់ក្រុម Macarthur មានមាឌធំៗ តែភ្នំពេញក្រោនលេងដោយទំនុកចិត្ត»

អវត្តមាន Privat និង វឌ្ឍនាកា ធ្វើឲ្យកម្ពុជាកាន់តែជួបបញ្ហាក្នុងតំបន់ប្រយុទ្ធ