ព័ត៌មានអន្ដរជាតិ

ព្យុងយ៉ាង ថា សមយុទ្ធយោធារវាងកូរ៉េខាងត្បូង និងអាមេរិក កំពុងរារាំងកូរ៉េខាងជើងច្បាស់ក្រឡែត

បានផុស

៦ ខែ មុន

នៅ

ថ្ងៃសុក្រ ២៨ វិច្ឆិកា ២០២៥

ដោយ

ចុះផ្សាយដោយទីភ្នាក់ងារ Koreaherald នាថ្ងៃសុក្រទី២៨ ខែវិច្ឆិកា កូរ៉េខាងជើងបានរិះគន់សមយុទ្ធប្រឆាំងនាវាមុជទឹករវាងសហរដ្ឋអាមេរិក និងកូរ៉េខាងត្បូងថ្មីៗនេះ ដែលមានឈ្មោះថា «Silent Shark» ក៏ដូចជាសមយុទ្ធយោធារួមគ្នាផ្សេងទៀត ដោយថា សមយុទ្ធបែបនេះមានគោលបំណងរារាំងទីក្រុងព្យុងយ៉ាងយ៉ាងច្បាស់ក្រឡែត។

នាវាមុជទឹក Ahn Mu របស់កងទ័ពជើងទឹកចាកចេញពីមូលដ្ឋានយោធា Jinhae កាលពីថ្ងៃទី ៤ ខែវិច្ឆិកា ដើម្បីចូលរួមក្នុងសមយុទ្ធ Silent Shark ជាមួយអាមេរិក។ (រូបភាព៖ Yonhap)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានកណ្តាលកូរ៉េដែលគ្រប់គ្រងដោយរដ្ឋ បានចេញការរិះគន់នៅក្នុងអត្ថាធិប្បាយមួយ ដោយផ្តោតលើសមយុទ្ធរួមគ្នាថ្មីៗនេះរវាង វ៉ាស៊ីនតោន និងសេអ៊ូល រួមទាំងសមយុទ្ធប្រតិបត្តិការប្រឆាំងពិសេសនៅជិតទីក្រុងព្យុងថេក (Pyeongtaek) ប្រទេសកូរ៉េខាងត្បូង និងសមយុទ្ធ Silent Shark រយៈពេលមួយខែនៅកោះហ្គាំ (Guam)។

ទីភ្នាក់ងារ KCNA ក៏បានលើកឡើងពីការដាក់ពង្រាយយន្តហោះចម្បាំង F-16 របស់អាមេរិក ទៅកាន់មូលដ្ឋានទ័ពអាកាសអូសាន ក្នុងប្រទេសកូរ៉េ ដើម្បីជំរុញសមត្ថភាពប្រតិបត្តិការរួមគ្នា ក៏ដូចជាការដំឡើងនៃចំណុចផ្គត់ផ្គង់អាវុធ និងការចាក់ប្រេងអាមេរិកនៅលើកោះយ៉ូណាហ្គូនី ប្រទេសជប៉ុន និងសមយុទ្ធគំនិតផ្តួចផ្តើមសន្តិសុខរីកសាយភាយនាពេលខាងមុខ នៅក្នុងដែនទឹកជប៉ុន។

KCNA បានបញ្ចាក់បន្ថែមទៀតថា វាជាការពិតដែលមិនអាចប្រកែកបានថា ពួកគេមានគោលបំណងរារាំងកូរ៉េខាងជើង និងប្រទេសក្នុងតំបន់ដោយកម្លាំង និងធានាឧត្តមភាពផ្លូវអាកាសក្នុងករណីចាំបាច់។ ជាងនេះទៀត ព្យុងយ៉ាងបានហៅពួកគេថាជាចលនាយោធា «ទម្លាប់ និងមិនប្រុងប្រយ័ត្នដោយអាមេរិក» និងអះអាងថា ប្រភពដើមនៃអស្ថិរភាពស្ថានភាពក្នុងតំបន់ និងកត្តាអាក្រក់ជំរុញលទ្ធភាពនៃជម្លោះប្រដាប់អាវុធ គឺសហរដ្ឋអាមេរិក។

ទោះជាបែបនេះក្ដី កូរ៉េខាងជើងបានឆ្លើយតបយ៉ាងម៉ឺងម៉ាត់វិញថា នឹងខិតខំប្រឹងប្រែងបន្ថែមទៀតដើម្បីការពារអធិបតេយ្យភាពជាតិ និងផលប្រយោជន៍របស់ខ្លួន ព្រមទាំងការពារសន្តិភាព និងស្ថិរភាពក្នុងតំបន់តាមរយៈការអនុវត្តសិទ្ធិសំខាន់ៗរបស់ខ្លួន ដើម្បីឆ្លើយតបទៅនឹងការបង្ហាញកម្លាំងយោធាឡើងវិញរបស់សហរដ្ឋអាមេរិក។

យ៉ាងណាមិញ ចំពោះការអត្ថាធិប្បាយរបស់ភ្នាក់ងារ KCNA នៅថ្ងៃសុក្រនេះ ហាក់ដូចជាបានបង្ហាញពីផលប្រយោជន៍រួមរបស់កូរ៉េខាងជើងជាមួយចិន ដែលចោទប្រកាន់អាមេរិកពីបទប៉ុនប៉ងផ្លាស់ប្តូរឯកតោភាគីចំពោះស្ថានភាពបច្ចុប្បន្ននៅក្នុងច្រកសមុទ្រតៃវ៉ាន់ និងតំបន់ទូលំទូលាយ និងស្តីបន្ទោសសកម្មភាពយោធាថ្មីៗរបស់រដ្ឋអាមេរិក៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖