ក្រុម​ហេសបូឡា មិន​​ទទួល​យក​​បទ​​ឈប់បាញ់​​មិនពេញលេញ​ និងព្រមានវាយបក​លើ​​អ៊ីស្រាអែល​

មន្ត្រីជាន់ខ្ពស់ក្រុមហេសបូឡាម្នាក់ បាននិយាយ​នៅ​​ថ្ងៃអង្គារ ទី២ ខែមិថុនា ថា ក្រុមហេសបូឡានឹងមិនទទួលយក «បទ​​ឈប់បាញ់​ត្រឹម​ផ្នែក​​​​ណាមួយ​» ជាមួយអ៊ីស្រាអែលនោះទេ ដោយ​ដាក់​ចេញ​ការ​ព្រមានថា ក្រុមហេសបូឡា​ នឹងវាយបកវិញ ប្រសិនបើអ៊ីស្រាអែលវាយប្រហារលើទីក្រុងបេរូត (Beirut) និងតំបន់ជាយក្រុងភាគខាងត្បូង​​លីបង់​នោះ​​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Mahmoud Qomati បានប្រាប់ទីភ្នាក់ងារសារព័ត៌មាន AFP នៅក្នុងសេចក្តីថ្លែងការណ៍ជាលាយលក្ខណ៍អក្សរ​ថា៖ «យើងមិនទទួលយកបទ​​ឈប់បាញ់គ្នាមួយផ្នែកនោះទេ» ដោយលោកបានបន្ថែមថា «​ក្រុម​សត្រូវ Zionist អ៊ី [ស្រាអែល] គួរតែដឹងថា រាល់ការឈ្លានពានណាមួយមកលើតំបន់ជាយក្រុង អាចនឹងនាំឲ្យមានការឆ្លើយតបកាន់តែជ្រៅ និងកាន់តែខ្លាំងក្លាជាងមុន» ពីសំណាក់ក្រុមហេសបូឡា។

កាលពីថ្ងៃចន្ទ រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz បានលើកឡើងថា ប្រធានាធិបតីអាមេរិក លោក ដូណាល់ ត្រាំ បានប្រកាសពីកិច្ចព្រមព្រៀងមួយ ដោយអនុម័តលើគោលការណ៍ដែលថា អ៊ីស្រាអែលអាចវាយប្រហារលើតំបន់ជាយក្រុងភាគខាងត្បូងនៃទីក្រុងបេរូត ដែលជាមូលដ្ឋានរឹងមាំរបស់ក្រុមហេសបូឡា ប្រសិនបើក្រុមនេះនៅតែបន្តវាយប្រហារលើទឹកដីអ៊ីស្រាអែល។

ពីមុនមក អាមេរិកតែងតែដាក់សម្ពាធមិនឲ្យអ៊ីស្រាអែលវាយប្រហារខ្លាំងក្លាលើរដ្ឋធានីបេរូត ដើម្បីចៀសវាងការខូចខាតដល់​ជន​ស៊ីវិល និងហេដ្ឋារចនាសម្ព័ន្ធរដ្ឋលីបង់។ ប៉ុន្តែតាមរយៈសេចក្តីថ្លែងការណ៍នេះ អ៊ីស្រាអែលចង់បង្ហាញថា ទីក្រុងវ៉ាស៊ីនតោនបានផ្លាស់ប្តូរជំហរមកគាំទ្រសកម្មភាពយោធារបស់​អ៊ីស្រាអែល​វិញ ដោយសារតែក្រុមហេសបូឡាបានរំលោភលើកិច្ចព្រមព្រៀងឈប់បាញ់មុនៗ។ អាមេរិកក៏បាននាំសារព្រមាននេះទៅប្រាប់រដ្ឋាភិបាលលីបង់ និងភាគីពាក់ព័ន្ធរួចរាល់ផងដែរ៕

អត្ថបទ ៖ សាង ស្រីល័ក្ខ

លោក ត្រាំ ទ្រាំលែងបាន ជះសម្តីធ្ងន់ៗ​ ដាក់​លោក ណេតាន់យ៉ាហ៊ូ ដែលបំផ្លាញ​​​ផ្លូវ​ទៅរកសន្តិភាព​