ទោះកំពុងរងការឈ្លានពានពីថៃ តែកម្ពុជាឆ្លៀតរំលែកទុក្ខជនរងគ្រោះពីអំពើភេរវកម្មនៅអូស្ត្រាលី

ក្រសួងការបរទេសកម្ពុជា បានសម្ដែងការសោកស្ដាយចំពោះសកម្មភាពបាញ់សម្លាប់នៅឆ្នេរ Bondi ក្នុងទីក្រុងស៊ីដនី ប្រទេសអូស្ត្រាលី ដោយកម្ពុជាបានចូលរួមរំលែកទុក្ខចំពោះជនរងគ្រោះពីអំពើភេរវកម្មនេះ។

កាលពីថ្ងៃទី១៤ ខែធ្នូ ឆ្នាំ២០២៥ មានការវាយប្រហារភេរវកម្ម ដែលបានកើតឡើងនៅឆ្នេរ Bondi ក្នុងពេលការជួបជុំរបស់សហគមន៍ជនជាតិជ្វីហ្វសម្រាប់ពិធី Hanukkah ដោយបុរសពីរនាក់ ជាឪពុកនិងកូនប្រុស បានបាញ់ប្រហារទៅលើហ្វូងមនុស្ស។ ការបាញ់ប្រហារនេះ បានបណ្ដាលឱ្យមនុស្ស១៥នាក់ស្លាប់ និងជាច្រើនទៀតនាក់ត្រូវបានរងរបួស ខណៈខ្មាំងកាំភ្លើងជាឪពុក ក៏ត្រូវប៉ូលិសបាញ់ស្លាប់នៅនឹងកន្លែងកើតហេតុ។

ក្រសួងការបរទេសកម្ពុជា តាមរយៈសេចក្ដីថ្លែងការណ៍ នៅថ្ងៃទី១៥ ខែធ្នូ បានថ្កោលទោសចំពោះអំពើហិង្សានេះ ដែលបណ្តាលឱ្យបាត់បង់ជីវិតមនុស្សស្លូតត្រង់ ដោយកម្ពុជា ថា អំពើភេរវកម្មបែបនេះ គឺមិនអាចទទួលយកបាន និងមិនអាចអត់ឱនឱ្យបាន ព្រោះផ្ទុយនឹងគោលការណ៍សន្តិភាព មនុស្សជាតិ និងសន្តិសហវិជ្ជមាន។

កម្ពុជាបានសម្តែងការអាណិតអាសូរ និងចូលរួមរំលែកទុក្ខចំពោះជនរងគ្រោះ ក្រុមគ្រួសារ និងអ្នកដែលរងផលប៉ះពាល់ដោយសោកនាដកម្មនៃការវាយប្រហារភេរវកម្មនេះ។ ចំពោះមុខបញ្ហានេះ កម្ពុជា ក៏បានបង្ហាញពីស្មារតីសាមគ្គីភាពជាមួយរដ្ឋាភិបាល និងប្រជាជនអូស្ត្រាលី ហើយបញ្ជាក់ជាថ្មីពីការប្តេជ្ញាចិត្តក្នុងការប្រឆាំងអំពើហិង្សា និងភាពជ្រុលនិយមគ្រប់ទម្រង់៕