អ្នកការទូតជាន់ខ្ពស់៖ មន្ត្រីការទូតឆ្លងកាត់ការប្រឡងរៀបចំដោយក្រសួងមុខងារកាលពីឆ្នាំមុន ពិតជាមានសមត្ថភាពខ្ពស់ និងឆន្ទៈបម្រើជាតិ

រដ្ឋលេខាធិការប្រចាំការ ក្រសួងការបរទេស លោក​ស្រី អ៊ាត សោភា ឱ្យដឹងថា មន្ត្រីការទូត កើតចេញពីការប្រឡងរៀបចំកាលពីឆ្នាំ២០២៥ កន្លងទៅ ស្របតាមគោលការណ៍កំណត់ក្នុងនិយាមនីតិវិធីប្រតិបត្តិស្តីពីការប្រឡងប្រជែងជ្រើសរើសមន្ត្រីរាជការស៊ីវិល ឈរលើស្មារតី «គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព» គឺជាមន្ត្រីការទូតដែលពិតជាមានសមត្ថភាពពិតប្រាកដ មានឆន្ទៈក្នុងការជួយអភិវឌ្ឍជាតិ។ លោកស្រី ថ្លែងដូច្នេះនាថ្ងៃទី៣១ ខែឧសភា ក្នុងពេលក្រសួងការបរទេសសហការជាមួយក្រសួងមុខសារធារណៈរៀបចំការប្រឡងជ្រើសរើសមន្ត្រីការទូតជាលើកទី២ ក្នុងរាជរដ្ឋាភិបាលនីតិកាលទី៧។

រដ្ឋលេខាធិការប្រចាំក្រសួងការប​រទេស ឱ្យដឹងថា បេក្ខជនមន្ត្រីការទូតដែលប្រឡងជាប់កាលពីឆ្នាំ២០២៥នោះ បានឆ្លងកាត់ការធ្វើកម្មសិក្សារយៈពេល១ ឆ្នាំពេញដោយជោគជ័យ ទៅតាមបែបបទដែលបានកំណត់។

ថ្លែងប្រាប់អ្នកសារព័ត៌មាន លោកស្រី អ៊ាត សោភា បញ្ជាក់ដូច្នេះថា៖«អ្នកដែលបានប្រឡងជាប់ [ជាមន្ត្រីការទូត] កាលពីឆ្នាំទៅ[២០២៥] ហើយឆ្លងកាត់កម្មសិក្សារយៈពេលមួយឆ្នាំ ពិតជាមានសមត្ថភាព ហើយមានឆន្ទៈ ខិតខំក្នុងការបំពេញការងារ។ ដូច្នេះហើយខ្ញុំគិតថា យើងអាចវាយតម្លៃបានថា និយាម និងរបៀបរបបនៃការជ្រើសរើសមន្ត្រីក្របខ័ណ្ឌថ្មីនេះ គឺពិតជាមានប្រសិទ្ធភាព ពិតជាមានតម្លាភាព ហើយពិតជាអាចផ្ដល់មកនូវមន្ត្រីដែលមានសមត្ថភាពពិតប្រាកដមែន។»។

កាលពីខែសីហា ឆ្នាំ២០២៥ ក្រសួងការបរទេស បានសហការជាមួយក្រសួងមុខងារសាធារណៈ បានរៀបចំការប្រឡងជ្រើសមន្ត្រីការទូត ដោយមានបេក្ខជនចូលរួមប្រឡងចំនួន៨០៣នាក់ប្រឡងប្រជែង ដែលនេះគឺជាការប្រឡងជ្រើសរើសមន្ត្រីការទូតកាលពីលើកទី១ ក្នុងរាជរដ្ឋាភិបាលនីតិកាលទី៧។ ឆ្លងកាត់ការប្រឡងដ៏តឹងរ៉ឹង និងការបូកពិន្ទុយ៉ាងល្អិតល្អន់ គណៈកម្មការប្រឡងជ្រើសរើសបានបេក្ខជនដែលមានពិន្ទុខ្ពស់បំផុតចំនួនត្រឹមតែ៤៨រូប ខណៈតម្រូវការមានដល់៥០រូប។

ក្នុងនីតិកាលទី៧ នេះ សម្ដេចធិ​បតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា ផ្ដល់គោលការណ៍ឱ្យក្រសួងការបរទេស និងសហប្រតិបត្តិការអន្តរជាតិ ជ្រើសរើសមន្ត្រីការទូតជាន់ខ្ពស់ជំហានដំបូងចំនួន៥០រូបសិននៅត្រឹមឆ្នាំ២០២៥, បន្ទាប់មកនៅឆ្នាំ២០២៦ អនុញ្ញាតឱ្យជ្រើសរើសចំនួន៥០រូបបន្ថែម ហើយនៅឆ្នាំ២០២៧ អនុញ្ញាតឱ្យជ្រើសរើសមន្ត្រីចំនួន៥០រូបបន្ថែមទៀត៕

ដោយ៖ ង៉ិល ណារ៉ាត់