ព័ត៌មានអន្ដរជាតិ

មួយឆ្នាំ ប្រជាជនវៀតណាម ស្លាប់ជាង ១០០ ០០០នាក់ ដោយសារថ្នាំជក់

បានផុស

៧ ខែ មុន

នៅ

ថ្ងៃសៅរ៍ ២៧ ធ្នូ ២០២៥

ដោយ

ក្រសួងសុខាភិបាលវៀតណាម បង្ហាញទិន្នន័យថា ការប្រើប្រាស់ថ្នាំជក់បានឆក់យកជីវិតប្រជាជនខ្លួនជាង ១០០ ០០០នាក់ក្នុងមួយឆ្នាំៗ ខណៈថ្លៃចំណាយលើការថែទាំសុខភាពប្រចាំឆ្នាំ និងការខាតបង់សេដ្ឋកិច្ចជាតិឈានដល់ប្រមាណ ១០៨ទ្រីលានដុង (៤.២ប៊ីលានដុល្លារអាមេរិក)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម VN Express, តួលេខដ៏គួរឲ្យភ្ញាក់ផ្អើលនេះត្រូវបានផ្សាយកាលពីថ្ងៃពុធ នៅឯពិធីប្រគល់ពានរង្វាន់ «សណ្ឋាគារគ្មានផ្សែងបារីឆ្នើមរបស់វៀតណាម» ដែលរៀបចំនៅទីក្រុងហាណូយដោយមូលនិធិសម្រាប់ការបង្ការគ្រោះថ្នាក់ថ្នាំជក់ក្រោមក្រសួងសុខាភិបាល។

លោក Phan Thi Hai នាយករងមូលនិធិបានសង្កត់ធ្ងន់ថា ការខាតបង់ទាំងនេះបញ្ជាក់ពី៖ «ផលប៉ះពាល់យ៉ាងធ្ងន់ធ្ងរដល់សុខភាពសាធារណៈ និងការអភិវឌ្ឍសេដ្ឋកិច្ចសង្គមនានារបស់ថ្នាំជក់»។

គួរឱ្យដឹងផងដែរថាផ្សែងថ្នាំជក់នៅតែជាមូលហេតុចម្បងនៃជំងឺមហារីកសួត ជំងឺសរសៃឈាមបេះដូង និងភាពគ្មានកូន។ វាផ្ទុកសារធាតុគីមីជាង ៧០០០និងសារធាតុបង្កមហារីកយ៉ាងតិច៧០ ផ្សេងទៀត។

ប្រទេសវៀតណាម កាន់តែព្រួយបារម្ភខ្លាំងទៅៗ អំពីកំណើននៃការប្រើប្រាស់បារីអេឡិចត្រូនិចក្នុងចំណោមមនុស្សវ័យជំទង់។

លោក Hai បានកត់សម្គាល់ថាអ្នកជំងឺវ័យក្មេងរាប់ពាន់នាក់ត្រូវបានបញ្ជូនទៅមន្ទីរពេទ្យដោយសារការជក់បារីអេឡិចត្រូនិចច្រើន ដែលធ្វើឱ្យពួកគេសន្លប់ ជាពិសេសខូចខាតសួតធ្ងន់ធ្ងរ។

យោងតាមការស្ទង់មតិថ្នាំជក់សកលសម្រាប់មនុស្សពេញវ័យឆ្នាំ២០២៤ (PGATS) ការប៉ះពាល់នឹងផ្សែងបារីនៅក្នុងសណ្ឋាគាររបស់វៀតណាមបានធ្លាក់ចុះ ១៤.៦ភាគរយ បើធៀបនឹងឆ្នាំ ២០២០៕

ប្រែសម្រួល៖ ណឺ មិនា