ផ្លូវថ្នល់៨០ខ្សែក្នុងខេត្តបន្ទាយមានជ័យរងផលប៉ះពាល់ដោយសង្រ្គាមឈ្លានពានបាញ់ផ្លោងទម្លាក់គ្រាប់ពីទាហានថៃ

ផ្លូវថ្នល់ប្រមាណ៨០ខ្សែនៅតាមបណ្ដាភូមិ ឃុំនានាជាប់ព្រំដែនកម្ពុជា ថៃ នៃខេត្តបន្ទាយមានជ័យ ក្នុងអំឡុងផ្ទុះសង្រ្គាមឈ្លានពានបាញ់ផ្លោងទម្លាក់គ្រាប់ពីសំណាក់ទាហានថៃបណ្តាលអោយរងការខូចខាតយ៉ាងដំណំ មានរណ្តៅតូចធំតាមប្រភេទនៃគ្រាប់។

លោក នៃ ពៅ មេឃុំគោករមៀត បានអោយដឹងថា ក្នុងមូលដ្ឋានឃុំគោករមៀត ដែលមានតំបន់បឹងត្រកួនជាតំបន់មួយរងគ្រោះដោយសារសង្រ្គាមឈ្លានពានរបស់ថៃយ៉ាងខ្លាំងតាមរយៈគ្រាប់ផ្លោង​ និងទម្លាក់គ្រាប់ពីយន្ដហោះបណ្តាលអោយផ្ទុះ ត្រូវចំផ្ទះពលរដ្ឋ និងផ្លូវជាច្រើនកន្លែង ជាពិសេសលើកំណាត់ផ្លូវជាតិលេខ៥៨ និងផ្លូវខេត្តពីបឹងត្រកួន ទៅទីរួមស្រុកថ្មពួកដោយមានរណ្តៅគ្រាប់ខ្លះធំ និងខ្លះតូច។

បើតាមពលរដ្ឋបានអោយដឹងថា ដ្បិតគ្រាប់ផ្លោងរបស់ថៃជាច្រើនគ្រាប់បានចំលើផ្លូវពិតមែន តែមិនបង្កអោយខូចរហូតបើកបរចរាចរមិនបាននោះទេ។

តាមរបាយការណ៍របស់អាជ្ញាធរស្រុកអូរជ្រៅ និងស្រុកថ្មពួក ខេត្តបន្ទាយមានជ័យ បានឲ្យដឹងកាលពីសៀលថ្ងៃទី៥ ខែមករា ឆ្នាំ២០២៦ ថា សរុបជារួមស្រុកទាំងពីរមានផ្លូវថ្នល់ចំនួន៨០ខ្សែ ត្រូវបានរងផលប៉ះពាល់ពីការបាញ់ផ្លោង និងទម្លាក់គ្រាប់ពីសំណាក់យោធាថៃក្នុងអំឡុងពេលផ្ទុះអាវុធឃ្លានពានមកលើដែនអធិបតេយ្យរបស់កម្ពុជា ជាច្រើនថ្ងៃ គិតចាប់ពីថ្ងៃទី៧ ខែធ្នូ ដល់ថ្ងៃទី២៧ ខែធ្នូ ឆ្នាំ២០២៥ នៃបទឈប់បាញ់។

ផ្លូវដែលរងផលប៉ះពាល់ដោយសារឈ្លានពានរបស់យោធាថៃខាងលើ គឺភាគច្រើននៅលើកំណត់ផ្លូវជាតិលេខ៥៨ ដែលជាផ្លូវក្រាលកៅស៊ូស្របតាមបន្ទាត់ព្រំដែន ចាប់ពីចំណុចព្រំប្រទល់របស់ក្រុងប៉ោយប៉ែត រហូតទៅដល់ព្រំប្រទល់ជាមួយ​ខេត្តឧត្តរមានជ័យ កាត់ភូមិជោគជ័យ ព្រៃចាន់ បឹងត្រកួន ដែលសុទ្ធតែជាសមរភូមិប្រយុទ្ធដ៏ក្តៅមិនអាចចរាចរយានយន្តបានឡើយក្នុងពេលដែលកើតមានឡើង។ ក្រៅពីផ្លូវដែលរងការខូចខាតខាងលើនៅមានហេដ្ឋារចនាសម្ព័ន្ធរូបវន្តខូចខាត ជាច្រើនទៀត រួមមាន លំនៅឋានពលរដ្ឋស្លូតត្រង់ ខ្សែបណ្ដាញអគ្គិសនី ទឹកស្អាត និងបណ្ដាញទំនាក់ទំនងជាដើម៕

អត្ថបទ៖ អពៅ