សម្ដេចតេជោ ប្រាប់អ្នកដើរតួបន្លំជាកូនប្រុស សែន កំសត់ មកចាប់ជាតិឲ្យបញ្ឈប់ជាបន្ទាន់

សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា នៅព្រឹកថ្ងៃទី២៣ ខែមករា ឆ្នាំ២០២៦នេះ បានប្រាប់ឲ្យអ្នកដើរតួបន្លំជាកូនប្រុស សែន កំសត់ ដែលបានស្លាប់កាលពី៥០ឆ្នាំមុនមកចាប់ជាតិ ឲ្យបញ្ឈប់ជាបន្ទាន់ ដែលសម្ដេចយល់ថា គឺជាការភូតកុហក់ និងយកការឈឺចាប់របស់សម្ដេចដើម្បីផលប្រយោជន៍ផ្ទាល់។

ការអំពាវនាវរបស់សម្ដេចនាពេលនេះ ធ្វើឡើងបន្ទាប់ពីមានបុគ្គលម្នាក់ឈ្មោះ Sa Vath Vannda បានឆាតទំនាក់ទំនងជាមួយមនុស្សដែលស្គាល់សម្ដេចតាមប្រព័ន្ធ telegram ដោយអះអាងថា ខ្លួនពិតជាកូនប្រុស សែន កំសត់ របស់សម្ដេច និងសម្ដេចកិត្តិព្រឹទ្ធបណ្ឌិត១០០ភាគរយ និងថែមទាំងសុំជួបសម្ដេចទៀតផង។

តាមរយៈសំណេរនៅលើទំព័រហ្វេសប៊ុកនៅព្រឹកថ្ងៃទី២៣ ខែមករា ឆ្នាំ២០២៦នេះ សម្ដេចបានសរសេរថា «សូមបញ្ឈប់ប្រើប្រាស់ការឈឺចាប់របស់ខ្ញុំកាលពី៥០ឆ្នាំមុនមកបោកប្រាស់ខ្ញុំតទៅទៀតទៅ»។ សម្ដេចថា ក្រោយរំដោះចេញពីរបបប៉ុលពតឆ្នាំ១៩៧៩ ពិសេសក្រោយពេលដែលសម្ដេចនិយាយពីរឿងកូនស្លាប់ដោយមានភាគនិទាន និងភាពយន្តរឿងកូនប្រុសក្រោមពន្លឺព្រះចន្ទពេញបូណ៍មីមក មានមនុស្សមិនតិចជាង២០នាក់ទេដែលបន្លំខ្លួនធ្វើជា កំសត់ កូនប្រុសសម្ដេចដែលបានស្លាប់ទៅនោះមកចាប់ជាតិ។

បើតាមសម្ដេច មនុស្សទាំងនោះខ្លះសរសេរជាសំបុត្របញ្ជូនឱ្យសម្ដេច ខ្លះចុះតាមទស្សនាវដ្តី និងចុងក្រោយបង្ហោះតាមបណ្តាញសង្គមដូចជាFacebook ជាដើម។ សម្ដេចតេជោថា ករណីចុងក្រោយហាក់ដូចធ្ងន់បន្តិច មានទាំងអត្ថបទមានទាំងសារឆ្លើយឆ្លងជាមួយមនុស្សដែលស្គាល់ telegram របស់សម្ដេច។ សម្ដេចសូមអំពាវនាវដល់អ្នកភូតកុហកឈប់ប្រើការឈឺចាប់របស់សម្ដេចដើម្បីផលប្រយោជន៍ផ្ទាល់ខ្លួនតទៅទៀតទៅ៕