កីឡា

ក្លឹបលោក ពេជ្រ សុផាន់ យកមាស ក្លឹប សេន ប៊ុនថេន បានថវិកា ៤០០លានរៀល ខណៈ ធឿន ធារ៉ា ចាញ់យ៉ាងលឿន

បានផុស

៤ ខែ មុន

នៅ

ថ្ងៃចន្ទ ២៦ មករា ២០២៦

ដោយ

ប្រដាល់គុនខ្មែរក្នុងសប្ដាហ៍មុននេះកក្រើកណាស់ពិសេសក្លឹបលោក ពេជ្រ សុផាន់ ឈ្នះបានកំប៉ុងមាស ឈ្នះដុំមាស ចំណែកក្លឹបលោក សេន ប៊ុនថេន ទើបទទួលបានថវិកា ៤០០លានរៀលពីក្រុមហ៊ុនវឌ្ឍនៈ ខណៈកីឡាករ ធឿន ធារ៉ា កក្រើកដូចគ្នា ប៉ុន្តែកក្រើកចាញ់ហើយរង់ការរិះគន់ខ្លាំងលើបណ្ដាញសង្គម។

ការប្រកួតគុនខ្មែរក្នុងសប្ដាហ៍ទី៣ នៃខែមករា ដែលទើបបញ្ចប់ទៅនេះគឺពិតជាកក្រើកទាំងនៅលើសង្វៀន និងកក្រើកទាំងលើបណ្ដាញសង្គម។ ក្លឹបលោក ពេជ្រ សុផាន់ គឺទទួលបានរង្វាន់ធំៗដូចជា ពេជ្រ សម្បត្តិ ឈ្នះខ្សែក្រវាត់ និងកំប៉ុងមាស ពេជ្រ អាទិទេព ឈ្នះជើងខ្លាំងៗកម្ពុជាប្រចាំទម្ងន់ ៥៧គីឡូក្រាមទទួលបានដុំមាសពីការប្រកួត។

មិនចាញ់ក្លឹបលោក ពេជ្រ សុផាន់ ប៉ុន្មានទេក្លឹបលោក សេន ប៊ុនថេន ក៏ទទួលបានថវិកា ៤០០លានរៀលលើការអភិវឌ្ឍន៍ក្លឹប និងការធ្វើជាទូតសុឆន្ទៈ (BA) របស់កីឡាករ បឺត សង្ឃឹម ជាមួយក្រុមហ៊ុនវឌ្ឍនៈផងដែរ។ ជាមួយគ្នានេះដែរក៏មានការសារទរ និងចែករំលែកច្រើនផងដែរអំពីការទទួលថវិកាយ៉ាងច្រើននេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាពលើផេកលោក សេន ប៊ុនថេន

ចំណែកកីឡាករ ធឿន ធារ៉ា ក៏មានការភ្ញាក់ផ្អើល និងផ្ទុះផងដែរ ប៉ុន្តែផ្ទុះលើការរិះគន់ច្រើននៅបណ្ដាញសង្គមបន្ទាប់ពីរូបគេបានចាញ់ដោយសន្លប់ក្នុងទឹកទី១ របស់កីឡាករបរទេស រូសឡាន ណាហ្គីយ៉ាវ ដោយស្នៀតពិសេសរួចមក។ អ្នកគាំទ្រមួយចំនួនបានបង្ហាញការមិនពេញចិត្ត និងរិះគន់ជាខ្លាំងទៅលើ ធឿន ធារ៉ា ដែលសមត្ថភាពធ្លាក់ចុះបែបនេះពិសេសការចាញ់ផ្ទួនៗកន្លងមក និងការចាញ់ក្រោមថ្វីដៃបរទេសរូបនេះជាលើកទី២។ មតិអ្នកគាំទ្រមួយចំនួនថាការធ្លាក់ចុះសមត្ថភាពរបស់ ធារ៉ា នេះបណ្ដាមកពីការដើរលេងច្រើន និងការចំណាយពេលទៅលេងបាល់ទះកន្លងមក និងមិនសូវបានហ្វឹកហាត់៕