កីឡា

ក្លឹបប្រដាល់របស់ ស៊ឹម ប៊ុនស្រ៊ន់ មានសិស្សចេញប្រកួត និងដំណើរការទៅបណ្ដើរៗហើយ

បានផុស

២ ខែ មុន

នៅ

ថ្ងៃព្រហស្បតិ៍ ២៨ ឧសភា ២០២៦

ដោយ

អតីតអ្នកប្រដាល់គុនចម្រុះ និងគុនខ្មែរ លោក ស៊ឹម ប៊ុនស្រ៊ន់ បន្ទាប់ពីប្រកាសបើកដំណើរក្លឹបកសិកម្មរាមាគុនខ្មែរបានប្រហែល ៤-៥ខែកន្លងទៅនេះ ឥលូវមានសិស្សចូលហ្វឹកហាត់ខ្លះហើយ និងបានឡើងប្រកួតកម្មវិធីតូចៗនៅតាមវត្តបណ្ដើរៗផងដែរ។

លោក ស៊ឹម ប៊ុនស្រ៊ន់

លោក ស៊ឹម ប៊ុនស្រ៊ន់ បានឲ្យដឹងថា ចាប់តាំងពីសាងសង់រួចរាល់ និងដាក់សម្ភារហ្វឹកហាត់ហើយនោះក៏ក្លឹបចាប់ផ្ដើមដំណើរការបន្តិចម្ដងៗ និងមានសិស្សហ្វឹកហាត់ដើម្បីឡើងប្រកួតខ្លះហើយ។ ក្នុងរយៈពេល ៤-៥ខែមកនេះក្លឹបរបស់ខ្លួនបានបណ្ដុះបានយុវជនដែលចង់ចាប់អាជីពប្រដាល់នេះបាន ២រូប និងបានឡើងប្រកួតបាន ៣-៤ប្រកួតហើយនៅតាមកម្មវិធីតូចៗក្នុងវត្តកន្លងទៅនេះ។

ទិដ្ឋភាពសិស្សរបស់ ប៊ុនស្រ៊ន់ ប្រកួតកន្លងទៅ

អតីតកីឡាករជើងខ្លាំងរូបនេះបន្ថែមទៀតថា ក្លឹបប្រដាល់កសិកម្មរាមាគុនខ្មែររបស់ខ្លួននេះនៅតែបន្តទទួលយុវជនដែលចង់មកហ្វឹកហាត់ជាមួយបន្ថែមទៀតពិសេសអ្នកដែលរស់នៅខេត្តកំពង់ចាម ឬនៅស្រុកភូមិក្បែរៗក្លឹបម្ដុំផ្លូវវាងស្គន់នេះ។ អ្នកដែលមានបំណងចង់មកហ្វឹកហាត់ជាមួយលោកគឺគ្រាន់តែបញ្ជាក់ពីអត្តសញ្ញាណ និងមានការយល់ព្រមពីអាណាព្យាបាលគឺបានហើយ។ ការស្នាក់នៅហូបចុកគឹក្លឹបជាអ្នករ៉ាប់រងផងដែរ និងមានការងារឲ្យធ្វើទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិដ្ឋភាពសិស្សរបស់ ប៊ុនស្រ៊ន់ ប្រកួតកន្លងទៅ

ប៊ុនស្រ៊ន់ បញ្ជាក់ទៀតថាក្លឹបប្រដាល់នេះអាចប្រើពេល ១ឆ្នាំទៀតនឹងមានមុខមាត់ខ្លះហើយ ឬមានកីឡាករអាចចេញប្រកួតតាមកម្មវិធីផ្សេងៗដូចបណ្ដាក្លឹបដទៃទៀត។ យ៉ាងណាលោកក៏មិនបង្ខំ ឬពន្លឿនការងារក្លឹបនេះណាស់ដែរ ពោលធ្វើតាមដំណើរដោយក្ដីស្រឡាញ់ និងតាមលទ្ធភាពរបស់ខ្លួន។

បញ្ជាក់ដែរថា ក្លឹបប្រដាល់របស់ ស៊ឹម ប៊ុនស្រ៊ន់ នេះគឺមានទីតាំងនៅផ្លូវវាងស្គន់ ភូមិប៉ាណា ឃុំសូទិព្ទ ស្រុកជើងព្រៃ ខេត្តកំពង់ចាម។ ប៊ុនស្រ៊ន់ ជាអតីតអ្នកប្រដាល់គុនចម្រុះ គុនខ្មែរ និងធ្លាប់ប្រឡូកលើសង្វៀន ONE ជាច្រើនឆ្នាំ៕