ព័ត៌មានអន្ដរជាតិ

មន្ត្រីអាមេរិកនិងអ៊ីរ៉ង់ចរចាកម្មវិធីនុយក្លេអ៊ែរនៅស្វ៊ីស ខណៈត្រាំថា លោកតាមឃ្លាំមើលជានិច្ច

បានផុស

៤ ខែ មុន

នៅ

ថ្ងៃអង្គារ ១៧ កុម្ភៈ ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយកាលពីថ្ងៃចន្ទថា ខ្លួននឹងចូលរួមចរចានុយក្លេអ៊ែរដោយប្រយោលក្នុងក្តីសង្ឃឹមខ្ពស់ក្នុងការព្រមព្រៀងគ្នា រវាងអ៊ីរ៉ង់ និងសហរដ្ឋអាមេរិក ជុំវិញកម្មវិធីនុយក្លេអ៊ែររបស់ទីក្រុងតេអេរ៉ង់ (Tehran) ដោយលោកមានជំនឿចិត្តថាទីក្រុងតេអេរ៉ង់ក៏ចង់ធ្វើកិច្ចព្រមព្រៀងនេះដែរ។ កិច្ចប្រជុំទ្វេភាគីសម្របសម្រូលដោយប្រទេសអូម៉ង់កំណត់យកថ្ងៃអង្គារ នៅទីក្រុងហ្សឺណែវ។

លោក ត្រាំ និងមន្រ្តីជំនិតក្នុងសេតវិមាន។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរ៉យទ័ ចុះផ្សាយថ្ងៃទី១៧ ខែកុម្ភៈ លោកត្រាំបានប្រាប់អ្នកសារព័ត៌មាន ពេលរៀបឡើង Air Force One ថា៖«ខ្ញុំនឹងចូលរួមក្នុងកិច្ចពិភាក្សានេះដោយប្រយោល។ ហើយអ្នកចូលរួមទាំងអស់គឺមានសារៈសំខាន់ខ្លាំងណាស់»។

គួររំឭកថា ភាពតានតឹងរវាងភាគីទាំងពីរកំពុងកើនឡើងនៅមុនការចរចា ដោយសហរដ្ឋអាមេរិកនឹងដាក់ពង្រាយនាវាផ្ទុកយន្តហោះទីពីរ ទៅកាន់មជ្ឈិមបូព៌ា។

មន្ត្រីអាមេរិកបានប្រាប់រ៉យទ័រថា យោធាអាមេរិកកំពុងរៀបចំសម្រាប់យុទ្ធនាការយោធាប្រកបដោយប្រសិទ្ធភាពខ្ពស់ ប្រសិនបើកិច្ចចរចាមិនបានសម្រេច។

យ៉ាងណា ពេលសួរអំពីទស្សនវិស័យសម្រាប់កិច្ចព្រមព្រៀងមួយ លោក ដូណាល់ ត្រាំ លោកបាននិយាយថា អ៊ីរ៉ង់បានស្វែងរកជំហរបន្ទន់ឥរិយាបទក្នុងការចរចាជាយូរណាស់មកហើយ ប៉ុន្តែពួកគេដឹងពីផលវិបាកនៃវិធីសាស្រ្តនេះ កាលពីរដូវក្តៅឆ្នាំមុន ពេលសហរដ្ឋអាមេរិកទម្លាក់គ្រាប់បែកលើទីតាំងនុយក្លេអ៊ែររបស់អ៊ីរ៉ង់។

លោក ដូណាល់ ត្រាំ បានស្នើ និងលើកទឹកចិត្តទីក្រុងតេអេរ៉ង់ (Tehran ) ថា ត្រូវតែចរចានៅពេលនេះ។

លោកបានបន្តថា៖ «ខ្ញុំមិនគិតថាពួកគេចង់បានផលវិបាកនៃការមិនធ្វើកិច្ចព្រមព្រៀងទេ»។

គួរបញ្ជាក់ថា មុនពេលមានការវាយប្រហាររបស់សហរដ្ឋអាមេរិកក្នុងខែមិថុនា កិច្ចចរចានុយក្លេអ៊ែររវាងសហរដ្ឋអាមេរិក និងអ៊ីរ៉ង់បានជាប់គាំង ជុំវិញការទាមទាររបស់ទីក្រុងវ៉ាស៊ីនតោន ថាទីក្រុងតេអេរ៉ង់បានបោះបង់ចោលការពង្រឹងសមត្ថភាពលើដីរបស់ខ្លួន ដែលសហរដ្ឋអាមេរិកចាត់ទុកជាផ្លូវទៅរកអាវុធនុយក្លេអ៊ែររបស់អ៊ីរ៉ង់។

លោក ត្រាំ បាននិយាយថា៖ « យើងអាចមានកិច្ចព្រមព្រៀង ជំនួសឱ្យការបញ្ជូនយន្តហោះ B-២s ដើម្បីទម្លាក់ចូលតំបន់នុយក្លេអ៊ែររបស់ពួកគេ ហើយយើងត្រូវតែបញ្ជូន B-២s »។ ដោយលោកសំដៅលើយន្តហោះទម្លាក់គ្រាប់បែកបំបាំងកាយរបស់អាមេរិក ជាអ្នកទម្លាក់គ្រាប់បែក៕

ប្រែសម្រួល៖ ណឺ មិនា