ព័ត៌មានអន្ដរជាតិ

ចិនជំរុញឱ្យក្រុមហ៊ុនចម្រាញ់ប្រេង ផ្អាកការនាំចេញ ខណៈជម្លោះមជ្ឈិមបូព៌ាបន្តតានតឹង

បានផុស

៣ ខែ មុន

នៅ

ថ្ងៃសុក្រ ៦ មីនា ២០២៦

ដោយ

រដ្ឋាភិបាលចិនបានស្នើសុំឱ្យក្រុមហ៊ុនចម្រាញ់ប្រេងក្នុងស្រុក ផ្អាកការចុះហត្ថលេខាលើកិច្ចសន្យានាំចេញប្រេងថ្មី ហើយព្យាយាមលុបចោលការនាំចេញដែលត្រូវបានរៀបចំរួចហើយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រកាលពីថ្ងៃព្រហស្បតិ៍ (៥ មីនា) ដោយស្រង់សម្ដីប្រភពដឹងពីបញ្ហានេះជាអនាមិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញរបស់ចិន ធ្វើឡើងចំពេលដែលការផ្គត់ផ្គង់ប្រេងសកលធ្លាក់ចូលទៅក្នុងភាពមិនប្រាកដប្រជា ដែលបណ្ដាលមកពីសង្រ្គាមរវាងសម្ព័ន្ធមិត្តអ៊ីស្រាអែល/សហរដ្ឋអាមេរិក និងអ៊ីរ៉ង់ ដោយបង្កការបិទច្រកសមុទ្រហ័រមូហ្ស ដែលរួមចំណែកប្រមាណ ២០% នៃតម្រូវការសកលប្រចាំថ្ងៃ។ មជ្ឈិមបូព៌ាជាប្រភពផ្គត់ផ្គង់ប្រេងដ៏ធំសម្រាប់ចិន ហើយចិននាំចូលប្រេងចន្លោះពី ៤៥-៥០% កាត់តាមច្រកហ័រមូហ្ស។

យ៉ាងណាមិញ ប្រភពបានប្រាប់រ៉យទ័រថា ការណែនាំរបស់ចិន មិនអនុវត្តចំពោះប្រេងឥន្ធនៈយន្តហោះដែលប្រើសម្រាប់ជើងហោះហើរអន្តរជាតិ ឬការផ្គត់ផ្គង់ប្រេងទៅកាន់ទីក្រុងហុងកុង និងក្រុងម៉ាកាវ។ ជុំវិញបញ្ហានេះ គណៈកម្មការអភិវឌ្ឍន៍ និងកំណែទម្រង់ជាតិ ដែលជាស្ថាប័នអ្នករៀបចំផែនការសេដ្ឋកិច្ចកំពូលចិន មិនបានឆ្លើយតបទៅនឹងសំណើសុំការអត្ថាធិប្បាយរបស់រ៉យទ័រទេ។

ដោយសារតែចិនគឺជាប្រទេសនាំចេញប្រេងឥន្ធនៈចម្រាញ់រួចធំជាងគេ ១ របស់អាស៊ី ការកាត់បន្ថយការនាំចេញរំពឹងថានឹងធ្វើឱ្យប៉ះពាល់ខ្លាំងដល់ការផ្គត់ផ្គង់ប្រេងឥន្ធនៈនៅទូទាំងទ្វីបអាស៊ី ខណៈតម្លៃប្រេងចម្រាញ់រួចបានហក់ឡើងខ្ពស់។

ប្រភពបាននិយាយថា ដោយសារតែដំណើរការនាំចេញសម្រាប់ខែមីនាបានធ្វើរួចរាល់ហើយ វាពិបាកក្នុងការលុបចោលវិញ ដូច្នេះការជំរុញរបស់រដ្ឋាភិបាលចិន នឹងបង្ហាញពីផលប៉ះពាល់ចាប់ពីខែមេសា តទៅ។

សម្រាប់ខែមីនា ការនាំចេញប្រេងសាំង ប្រេងម៉ាស៊ូត និងប្រេងឥន្ធនៈយន្តហោះ នឹងមិនសូវមានការប្រែប្រួលប៉ុន្មាន ដោយរក្សាបាននូវបរិមាណក្នុងរង្វង់ប្រមាណ ៣,៨ លានតោន ខណៈក្រុមហ៊ុនចិន ទាញយកប្រាក់ចំណេញច្រើនពីការនាំចេញប្រេងចម្រាញ់នៅអាស៊ី។

ទិន្នន័យពីក្រុមហ៊ុនផ្សារហ៊ុនឡុងដ៍ (LSEG) បានបង្ហាញថា អត្រាប្រាក់ចំណេញពីការចម្រាញ់ប្រេងម៉ាស៊ូត បានកើនឡើងជិតដល់កម្រិតខ្ពស់បំផុតក្នុងរយៈពេល ៣ ឆ្នាំ ប្រហែល ៤៩ ដុល្លារ/បារ៉ែលនៅថ្ងៃព្រហស្បតិ៍ ខណៈប្រាក់ចំណេញពីការផលិតប្រេងឥន្ធនៈយន្តហោះកើនលើសពី ៥៥ ដុល្លារ/បារ៉ែល។

ទិន្នន័យតាមដានកប៉ាល់ពី LSEG បង្ហាញថា ចន្លោះពីថ្ងៃទី ១-៥ ខែមីនា ចិនបាននាំចេញប្រេងឥន្ធនៈយន្តហោះចំនួន ៧០ ០០០ តោន (៥៥១ ៦០០ បារ៉ែល) ប្រេងម៉ាស៊ូត ៣៥ ០០០ តោន និងប្រេងសាំង ៣៥ ០០០ តោន។

ចិន ដែលជាប្រទេសនាំចូលប្រេងធំជាងគេបំផុតលើពិភពលោក គ្រប់គ្រងការនាំចេញប្រេងឥន្ធនៈតាមរយៈប្រព័ន្ធកូតាដើម្បីធ្វើឱ្យមានតុល្យភាពរវាងការផ្គត់ផ្គង់ក្នុងស្រុក និងតម្រូវការ។ សម្រាប់ឆ្នាំ ២០២៦ រដ្ឋាភិបាលបានចេញកូតានាំចេញប្រហែល ១៩ លានតោន ដោយដូចគ្នានឹងឆ្នាំ ២០២៥។

អ្នកទិញនៅអាស៊ីដែលនាំចូលប្រេងឥន្ធនៈពីចិនបាននិយាយថា ពួកគេនៅតែរំពឹងថានឹងទទួលបានការដឹកជញ្ជូននៅខែមីនាតាមការគ្រោងទុក៕