ព័ត៌មានជាតិ

រដ្ឋបាលខេត្តសៀមរាប ជំរុញរៀបចំពិធីរំឭកគុណ សម្ដេចព្រះសង្ឃរាជ ជួន ណាត ជាព្រឹត្តិការណ៍ប្រចាំឆ្នាំ ដើម្បីអប់រំសីលធម៌ និងស្មារតីជាតិ

បានផុស

៣ ខែ មុន

នៅ

ថ្ងៃសៅរ៍ ១៤ មីនា ២០២៦

ដោយ

រដ្ឋបាលខេត្តសៀមរាប បានជំរុញឲ្យមានការរៀបចំពិធីរំឭកគុណ សម្ដេចព្រះសង្ឃរាជ ជួន ណាត ជាព្រឹត្តិការណ៍ប្រចាំឆ្នាំ ដើម្បីអប់រំសីលធម៌ និងស្មារតីជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញនេះ ខណៈពេលដែលសាលាគណៈខេត្តសៀមរាប និងរដ្ឋបាលខេត្ត បានរៀបចំទិវាបុណ្យរំឭកព្រះឧបការគុណ សម្តេចព្រះមហាសុមេធាធិបតី ជួន ណាត និងក្រុមជំនុំព្រះត្រៃបិដកខ្មែរ លើកទី ១៥ នៅវត្តរាជបូណ៌ ក្រុងសៀមរាប ក្រោមគំនិតផ្ដួចផ្ដើមរបស់ សម្តេចព្រះព្រហ្មរតនមុនី ពិន សែម សិរីសុវណ្ណោ កាលពីរសៀលថ្ងៃទី ១៣ ខែមីនា ឆ្នាំ ២០២៦។

លោក លី សារី អភិបាលរងខេត្តសៀមរាប មានប្រសាសន៍ថា ព្រឹត្តិការណ៍ដែលរៀបចំឡើងយ៉ាងឱឡារិកនាពេលនេះ គឺជាសក្ខីភាព នៃសេចក្ដីស្រឡាញ់ និងការដឹងគុណយ៉ាងជ្រាលជ្រៅរបស់ព្រះថេរានុត្ថេរៈ និងពុទ្ធបរិស័ទ ចំពោះបុគ្គលជាទីសក្ការៈដែលបានលះបង់ដើម្បីជាតិ និងសាសនា។ ការលើកកម្ពស់ព្រះពុទ្ធសាសនាឲ្យរីកចម្រើនតាមពុទ្ធបញ្ញត្តិ មិនត្រឹមតែជាការអភិរក្សសាសនារបស់រដ្ឋប៉ុណ្ណោះទេ ប៉ុន្តែគឺជាការកសាងមូលធនផ្លូវចិត្តដ៏សំខាន់ សម្រាប់អប់រំចរិយាធម៌ និងពង្រឹងសាមគ្គីភាពជាតិ។

លោក លី សារី មានប្រសាសន៍ទៀតថា សកម្មភាពទាំងនេះ ស្របតាមឆន្ទៈមោះមុតរបស់រាជរដ្ឋាភិបាល ក្នុងការកសាងសង្គមជាតិមួយដែលមានសុខសន្តិភាព សុខដុមរមនា និងការអភិវឌ្ឍប្រកបដោយចីរភាព។ សម្រាប់ សម្តេចព្រះមហាសុមេធាធិបតី ជួន ណាត វិញ ទោះបីព្រះអង្គបានយាងចូលទិវង្គតទៅហើយក្ដី ប៉ុន្តែព្រះកិត្តិនាម និងស្នាព្រះហស្តរបស់ព្រះអង្គ នៅតែស្ថិតស្ថេរជាអមតក្នុងប្រវត្តិសាស្ត្រខ្មែរ និងលើឆាកអន្តរជាតិ។

ដើម្បីជាការតបស្នង និងចងចាំនូវគុណូបការៈនេះ លោកបានជំរុញឲ្យរៀបចំពិធីរំឭកគុណនេះឲ្យក្លាយជាព្រឹត្តិការណ៍សាសនាប្រចាំឆ្នាំ។ ប្រើប្រាស់ពិធីនេះជាឧបករណ៍សម្រាប់អប់រំ និងដាស់តឿនស្មារតីកូនខ្មែរគ្រប់ជំនាន់ និងបន្តថែរក្សាកេរដំណែលសាសនា ដើម្បីជាពន្លឺបំភ្លឺផ្លូវសម្រាប់បច្ចុប្បន្ន និងអនាគត។

ក្នុងឱកាសនោះដែរ សម្តេចព្រះពុទ្ធជ័យមុនី បណ្ឌិត ឃឹម សន ព្រះប្រធានលេខាធិការដ្ឋានគណៈសង្ឃនាយក នៃព្រះរាជាណាចក្រកម្ពុជា មានថេរដីកាថា ពិធីបុណ្យរំឭកគុណូបការៈនេះមានអត្ថន័យជ្រាលជ្រៅ និងជាគុណប្រយោជន៍ណាស់សម្រាប់ជាតិសាសន៍មួយៗ ឲ្យយើងទាំងអស់គ្នាបាននឹករឭកឃើញចំពោះគុណមាតាបិតាក្តី ឬគុណបុព្វបុរសខ្មែរជាព្រះសង្ឃក្តី ជាគ្រហស្ថក្តី ដែលមានឧបការៈចំពោះជាតិមាតុភូមិ និងជាគំរូសម្រាប់កូនចៅជំនាន់ក្រោយៗ បានដឹង និងបានស្គាល់អ្នកប្រាជ្ញអក្សរសាស្ត្រស្រុកខ្មែរ ហើយទាំងអស់គ្នា ត្រូវតែចងចាំ និងប្រតិបត្តិតាមគន្លងមាគ៌ា នៃបុព្វបុរសខ្មែរ។ ជាពិសេស ព្រះកិត្តិនាម និងស្នាដៃរបស់ សម្តេចព្រះមហាសុមេធាធិបតី ជួន ណាត ស្ថិតនៅដក់ជាប់ជានិច្ចក្នុងបេះដូងកូនចៅជាប្រជាពលរដ្ឋកម្ពុជាជារៀងរហូត ព្រោះថាពេញមួយជីវិតរបស់ព្រះអង្គ ព្រះអង្គបានបំពេញព្រះរាជបេសកកម្មយ៉ាងធំក្រៃលែង ក្នុងវិស័យសង្គមកិច្ច និងវិស័យសិក្សាធិការ ជាដើម សម្រាប់កុលបុត្រកុលធីតាខ្មែរជំនាន់ក្រោយ រៀនសូត្រដល់សព្វថ្ងៃនេះ។

សូមជម្រាបថា ទិវាបុណ្យរំឭកគុណសម្ដេចព្រះសង្ឃរាជ ជួន ណាត និងក្រុមជំនុំព្រះត្រៃបិដក លើកទី ១៥ រៀបចំឡើងកាលពីថ្ងៃទី ១៣ និងទី១៤ ខែមីនា ឆ្នាំ ២០២៦។ ក្នុងនោះមានរៀបចំពិធីដង្ហែព្រះត្រៃរតន៍ នៅតាមបណ្តាផ្លូវមួយចំនួនក្នុងក្រុងសៀមរាប និងកម្មវិធីចម្រើនព្រះបរិត្ត សម្តែងធម្មទេសនា និងពិធីរាប់បាត្រព្រះសង្ឃ ៣៥០ អង្គ ផងដែរ៕

អត្ថបទ ៖ គឿនវេត

Related Topics:ខេត្តសៀមរាប