អ៊ីរ៉ង់ ប្រកាស «ជ័យជម្នះធំធេង» ក្រោយ ត្រាំ ព្រមឈប់បាញ់ ២សប្តាហ៍

ប្រទេសអ៊ីរ៉ង់បានប្រកាសពីជ័យជម្នះយ៉ាងធំធេង បន្ទាប់ពីសហរដ្ឋអាមេរិក យល់ព្រមឈប់បាញ់រយៈពេល២សប្តាហ៍ ហើយថា ទីក្រុងវ៉ាស៊ីនតោន យល់ព្រមជាគោលការណ៍ទទួលយកសំណើ១០ចំណុចរបស់ខ្លួន។

តាមការផ្សាយរបស់ Hindustan Times, ក្រុមប្រឹក្សាសន្តិសុខជាតិកំពូលនៃប្រទេសអ៊ីរ៉ង់ (SNSCI) បានចេញសេចក្តីថ្លែងការណ៍នៅថ្ងៃពុធទី៨ខែមេសាឆ្នាំ២០២៦ថា៖ «ចាប់តាំងពីប្រធានាធិបតី ត្រាំ យល់ព្រមលើបទឈប់បាញ់រយៈពេលពីរសប្តាហ៍ជាមួយអ៊ីរ៉ង់មក ទីក្រុងតេហេរ៉ង់បានហៅលទ្ធផលនេះថាជាជ័យជម្នះដ៏ធំធេង ហើយវាជាបរាជ័យយ៉ាងអាម៉ាស់សម្រាប់សហរដ្ឋអាមេរិក នៅក្នុងសង្រ្គាមអយុត្តិធម៌ ខុសច្បាប់ និងជាឧក្រិដ្ឋកម្មប្រឆាំងប្រជាជាតិអ៊ីរ៉ង់»។

SNSCI បញ្ជាក់ថា អ៊ីរ៉ង់សម្រេចបាននូវគោលដៅស្ទើរតែទាំងអស់នៅក្នុងសង្រ្គាមនេះ ហើយថាភាគីសត្រូវកំពុងប្រឈមមុខនឹងបរាជ័យជាប្រវត្តិសាស្ត្រ។

មុននេះ ប្រធានាធិបតីអាមេរិក ដូណាល់ ត្រាំ បានយល់ព្រមលើបទឈប់បាញ់រយៈពេល២សប្តាហ៍ ជាមួយអ៊ីរ៉ង់ ហើយក៏កំពុងពិនិត្យលើសំណើរ១០ចំណុចរបស់ទីក្រុងតេហេរ៉ង់ដែរ ដើម្បីបញ្ចប់សង្គ្រាមជាស្ថាពរ។ 

ក្នុងសារបង្ហោះលើបណ្តាញសង្គម Truth Social នៅថ្ងៃពុធទី៨ខែមេសាឆ្នាំ២០២៦ (ពេលវេលានៅកម្ពុជា) ប្រមុខសេតវិមានសរសេរថា៖ «ខ្ញុំយល់ព្រមផ្អាកការទម្លាក់គ្រាប់បែក និងការវាយប្រហារលើប្រទេសអ៊ីរ៉ង់ ក្នុងរយៈពេលពីរសប្តាហ៍។ នេះនឹងក្លាយជា បទឈប់បាញ់ ពីភាគីទាំងសងខាង!។ កិច្ចព្រមព្រៀងនេះគឺផ្អែកលើការពិភាក្សាជាមួយនាយករដ្ឋមន្ត្រីប៉ាគីស្ថាន Shehbaz Sharif និងសេនាប្រមុខ Asim Munir»។

ក្រោយមក ទីក្រុងតេហេរ៉ង់ ក៏ឯកភាពបើកច្រកសមុទ្រ Hormuz ធ្វើឲ្យតម្លៃប្រេងជាសកល ធ្លាក់ចុះមកវិញ ដោយរដ្ឋមន្ត្រីការបរទេសអ៊ីរ៉ង់ Abbas Araghchi ប្រកាសថា ក្នុងរយៈពេល២សប្តាហ៍ ច្រកនេះនឹងបើកសម្រាប់ការធ្វើនាវាចរណ៍ដោយសុវត្ថិភាព ប៉ុន្តែបើមានការវាយប្រហារជាបន្ត នោះច្រកនេះនឹងបិទវិញដដែល។

ដំណឹងនៃបទឈប់បាញ់និងការបើកច្រកនេះ ធ្វើឲ្យតម្លៃប្រេងសកលធ្លាក់ចុះខ្លាំង ពោលគឺតម្លៃប្រេងឆៅម៉ាក Brent ធ្លាក់ចុះ៥,៨% មកនៅត្រឹម ១០៣.៤២ដុល្លារក្នុងមួយបារ៉ែល ខណៈប្រេងជួញដូរនៅសហរដ្ឋអាមេរិក ធ្លាក់ចុះជិត ៨,៥% មកនៅត្រឹម ១០៣.២៥ ដុល្លារ ចំណែកតម្លៃប្រេងឆៅ West Texas Intermediate (WTI) ធ្លាក់ចុះជាង ១៥% នៅក្នុងការជួញដូរក្រៅម៉ោង មកនៅត្រឹមតិចជាង ៩៥ ដុល្លារប៉ុណ្ណោះក្នុងមួយបារ៉ែល៕

អត្ថបទ៖ សុខ សុវណ្ណ