សាលារៀនរដ្ឋ និងឯកជន នៅបន្ទាយមានជ័យ ​បើកដំណើរការ​ ៦២ ភាគរយ​ ដូចគ្រោងទុក​

សាលារៀន ចំណេះទូទៅ រដ្ឋ និងឯកជន នៅខេត្តបន្ទាយមានជ័យ បានបើកឱ្យចូលរៀន ៦២ ភាគរយ ដូចការគ្រោងទុក មានតែក្រុងសិរីសោភ័ណមិនអាចអនុញាតឱ្យបើកបាន។

លោក ឈួ ប៊ុនរឿង ប្រធាន មន្ទីរអប់រំ យុវជន និងកីឡា ខេត្តបន្ទាយមានជ័យ ប្រាប់ថា ការបើកសាលារៀនឡើងវិញនេះគឺប្រព្រឹត្តទៅដោយរលូនរៀបរយ និងអនុវត្តបានល្អនូវវិធានការ បង្ការ ការពារជំងឺកូវីដ-១៩ ដែលរាជរដ្ឋាភិបាល និងក្រសួងសុខាភិបាលណែនាំ។

លោក ឈួ ប៊ុនរឿង បានក្រើនរម្លឹកបន្ថែម ដល់មន្ត្រីរដ្ឋបាល អប់រំ គណៈគ្រប់គ្រង និងលោកគ្រូ អ្នកគ្រូ ព្រមទាំង អាណាព្យាបាល អាជ្ញាធរមានសមត្ថកិច្ច សហការគ្នាឱ្យបានល្អនៃដំណើរការសាលារៀនឡើងវិញ ឱ្យបានលទ្ធផលល្អ មានប្រសិទ្ធិភាព និងប្រកបដោយ ការទទួលខុសត្រូវផងដែរ។

ខេត្តបន្ទាយមានជ័យ បើកដំណើរការគ្រឹះស្ថានសិក្សា ចំណេះទូទៅ រដ្ឋ ប្រមាណ ៦២% ឬ ៣១៩ សាលារៀន ក្នុងចំណោម ៥១២ សាលា។

ចំណែកសាលាឯកជន ចំនួន ៣ ក្នុងចំណោម ៥២ នៅក្នុងស្រុក ៧ រួមមាន ស្រុក ភ្នំស្រុក ព្រះនេត្រព្រះ មង្គល បូរី ស្វាយចេក ថ្មពួក អូរជ្រៅ និងស្រុកម៉ាឡៃ។

ការបើកដំណើរការសាលារៀនឡើងវិញ ធ្វើឡើងក្នុងលក្ខណៈ ៣ ទី១ បើកឡើងវិញទាំងស្រុង ទី២ បើតាមបណ្ដុំ និងឆ្លាស់វេន និងទី៣ រៀនតាមអនឡាញ៕

អត្ថបទៈ វ៉ាន់ ណាង