ព័ត៌មានជាតិ

សម្ដេចតេជោ ហ៊ុន សែន ផ្ញើសាររំលែកទុក្ខចំពោះមរណភាពឪពុកតារាចម្រៀង ករុណា ពេជ្រ

បានផុស

៥ years មុន

នៅ

ថ្ងៃអាទិត្យ ១៧ តុលា ២០២១

ដោយ

សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានផ្ញើលិខិតរំលែកទុក្ខចំពោះមរណភាពឪពុកបង្កើតរបស់តារាចម្រៀង ករុណា ពេជ្រ ដែលទទួលមរណភាព កាលពីថ្ងៃទី ១៤ ខែតុលា ឆ្នាំ ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមលិខិតរំលែកទុក្ខរបស់ សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត កាលពីថ្ងៃទី ១៥ ខែតុលា ឆ្នាំ ២០២១ បានថ្លែងដូច្នេះថា «ក្នុងវេលាប្រកបដោយសមានទុក្ខដ៏ក្រៀមក្រំនេះ ខ្ញុំនិងភរិយា សូមសម្ដែងនូវការសោកស្ដាយដោយក្តីស្រណោះអាឡោះអាល័យចំពោះការបាត់បង់ឧបាសក ម៉ុក សាខន ដែលជាការបាត់បង់នូវឪពុក និងជីតា ប្រកបដោយព្រហ្មវិហារធម៌ និងសង្គហធម៌ដ៏ជ្រាលជ្រៅ ចំពោះកូន និងចៅជាទីស្រឡាញ់»។

សូមបញ្ជាក់ថា លោកឪពុកជាទីស្រលាញ់របស់តារាចម្រៀង លោក ករុណា ពេជ្រ គឺ លោក ម៉ុក សាខន បានទទួលមរណភាពក្នុងជន្មាយុ ៧៥ ឆ្នាំ កាលពីថ្ងៃទី ១៤ ខែតុលា ឆ្នាំ ២០២១ ដោយជំងឺប្រចាំកាយមានរយៈពេលជាច្រើនឆ្នាំ។

លោក ករុណា ពេជ្រ ក៏បានប្រកាសជាសាធារណៈនូវដំណឹងដ៏សោកស្ដាយ និងសោកសៅខ្លាំងព្រោះថា ពេលនេះលោកកំពុងតែមានទុក្ខធំដោយសារតែត្រូវបែកពីលោកឪពុកជាទីស្រលាញ់ជារៀងរហូតហើយ។

បន្ថែមពីនោះ មុនលាចាក លោកឪពុកលោក ករុណា ពេជ្រ បានធ្លាក់ខ្លួនឈឺជំងឺលើសឈាម និងដាច់សរសៃឈាមខួរក្បាល ពោលគឺប្រៀបដូចជាមនុស្សរុក្ខជាតិ សម្រាន្តស្ដូកស្ដឹងជាប់នឹងគ្រែ មិនអាចកម្រើកបានអស់រយៈពេលជាង ៣ ឆ្នាំមកហើយ៕

អត្ថបទ ៖ ចាន់រ៉ា