សូមគោរពអបអរសាទរ លោកជំទាវកិត្តិសង្គហបណ្ឌិត ម៉ែន សំអន ជ្រើសតាំងជាអនុប្រធានគណបក្សប្រជាជនកម្ពុជា

លិខិតអបអរសាទរ សូមគោរពជូនចំពោះ លោកជំទាវកិត្តិសង្គហបណ្ឌិត ម៉ែន សំអន សមាជិកានៃគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្ស ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច។

សូមគោរពអបអរសាទរចំពោះ លោកជំទាវកិត្តិសង្គហបណ្ឌិត ដែលត្រូវបានអង្គសន្និបាតគណៈកម្មាធិការកណ្តាល គណបក្សប្រជាជនកម្ពុជាលើកទី៤៣ អាណត្តិទី៥ បានបោះឆ្នោតជ្រើសតាំងជាអនុប្រធានគណបក្សប្រជាជនកម្ពុជា។ ការផ្តល់នូវទំនុកចិត្តនេះ គឺពិតជាស័ក្តិសមចំពោះ លោកជំទាវកិត្តិសង្គហបណ្ឌិត ដែលបានខិតខំប្រឹងប្រែងមិនខ្លាចការលំបាក នឿយហត់ដើម្បីការរស់រានមានជីវិតរបស់ប្រជាជនកម្ពុជា និងការជំរុញវឌ្ឍនភាពសង្គមលើគ្រប់វិស័យដូចបច្ចុប្បន្ននេះ។

ក្នុងឱកាសដ៍ឧត្តុង្គឧត្តមនេះ យើងខ្ញុំទាំងអស់គ្នាសូមបួងសួងដល់គុណបុណ្យព្រះរតនត្រ័យ កែវទាំងបី វត្ថុស័ក្តិសិទ្ធិក្នុងលោក ទេវតាថែរក្សាព្រះរាជាណាចក្រកម្ពុជា សូមជួយបទានសព្វសាធុការពរ បវរសួស្តី សិរីមង្គល វិបុលសុខ មហាប្រសើរជូដល់ លោកជំទាវកិត្តិសង្គហបណ្ឌិត និងក្រុមគ្រួសារ សូមមានជន្មាយុយឺនយូរ សុខភាពល្អបរិបូរណ៍ កម្លាំងខ្លាំងក្លា ប្រាជ្ញាឈ្លាសវៃដើម្បីដឹកនាំនិងអភិវឌ្ឍន៍ កាន់តែរីកចម្រើនជានិច្ចនិរន្ត។

សូមគោរពអបអរសាទរពី គណៈកម្មាធិការគណបក្សមូលដ្ឋានទំនាក់ទំនងជាមួយរដ្ឋសភា-ព្រឹទ្ធសភា។